ប្រទេសថៃ ៖ កាលពីថ្ងៃទី២៧ ខែមករា ឆ្នាំ២០២៥ សារព័ត៌មានថៃរាយការណ៍ថា នៅចុងខែមករានេះ ប្រទេសថៃនឹងចាប់ផ្តើមប្រតិបត្តិការយន្តហោះជាង២០គ្រឿង បង្កើតទឹកភ្លៀងសិប្បនិម្មិតនៅពេលយប់ ដើម្បីកាត់បន្ថយខ្យល់ពុលលើបរិយាកាសក្នុងទីក្រុងបាងកក និងបណ្តាខេត្តដែលមានខ្យល់ពុលខ្លាំង តាមគោលនយោបាយរបស់រដ្ឋាភិបាល ។

លោក រ៉ាឆេន សិល្បៈរ៉ាយ៉ាក់ អគ្គនាយករងនៃនាយកដ្ឋានទឹកភ្លៀងសិប្បនិម្មិតនិយាយថា ស្ថានការណ៍ខ្យល់ពុល PM 2.5 នៅទីក្រុងបាងកក និងតំបន់ជុំវិញ កាលពីថ្ងៃទី២៧ ខែមករា កន្លងមក គឺល្អប្រសើរជាងមុន ដោយសារឥទ្ធិពលខ្យល់ត្រជាក់ពីប្រទេសចិនគ្របដណ្តប់លើថៃ ។ លើសពីនេះ គឺមានសំណើមក្នុងខ្យល់បង្កើតជាពពកស្រូបធូលី ។

រដ្ឋាភិបាលថៃស្ថិតក្រោមការដឹកនាំរបស់លោកស្រី ផេថងថាន ស៊ីណាវ៉ាត់ បានប្រគល់តួនាទីឱ្យនាយកដ្ឋានទឹកភ្លៀងសិប្បនិម្មិតសហការជាមួយស្ថាប័នពាក់ព័ន្ធកាត់បន្ថយខ្យល់ពុលពេលយប់ ។ នៅថ្ងៃទី២៧ ខែមករា យើងបានទំនាក់ទំនងទៅក្រុមហ៊ុនវិទ្យុអាកាសចរណ៍ថៃ អំពីពេលវេលាបង្កើតទឹកភ្លៀងសិប្បនិម្មិត ព្រមទាំងបញ្ជូនអ្នកបើកយន្តហោះទៅចូលរួមវគ្គបណ្តុះបណ្តាលរយៈពេល២ថ្ងៃ ។

ពេលវេលាបង្កើតទឹកភ្លៀងសិប្បនិម្មិត គឺនឹងធ្វើឡើងនៅម៉ោង២យប់ រៀងរាល់យប់ ដើម្បីឱ្យបរិយាកាសនាព្រឹកថ្ងៃបន្ទាប់បានល្អប្រសើរឡើង និងកាត់បន្ថយផលប៉ះពាល់សុខភាពពលរដ្ឋ ។ ក្រុមការងារនាយកដ្ឋានទឹកភ្លៀងសិប្បនិម្មិតបានត្រៀមខ្លួនរួចរាល់ហើយសម្រាប់ការបង្កើតទឹកភ្លៀងសិប្បនិម្មិត ចាប់ពីយប់ថ្ងៃទី៣០ ខែមករា រហូតដល់ថ្ងៃទី៣០ ខែមេសា ខាងមុខ ក្នុងទីក្រុងបាងកក និងបណ្តាខេត្តដែលមានខ្យល់ពុលខ្លាំង ។ នេះបើតាមការលើកឡើងរបស់លោក រ៉ាឆេន សិល្បៈរ៉ាយ៉ាក់ អគ្គនាយករងនៃនាយកដ្ឋានទឹកភ្លៀងសិប្បនិម្មិត ។

គួរបញ្ជាក់ថា នាយកដ្ឋានទឹកភ្លៀងសិប្បនិម្មិតបានប្រតិបត្តិការបង្កើតទឹកភ្លៀងសិប្បនិម្មិតជាបន្តបន្ទាប់ តាំងពីខែធ្នូ ឆ្នាំ២០២៤ ប៉ុន្តែប្រទេសថៃនៅតែប្រឈមនឹងខ្យល់ពុល ដោយសារការលួចដុតកាកសំណល់ក្នុងចម្ការ ។ ការស្ងប់ខ្យល់ គឺជាឧបសគ្គសំខាន់របស់ក្រុមការងារបង្កើតទឹកភ្លៀងសិប្បនិម្មិត ប៉ុន្តែការប្រើប្រាស់យន្តហោះត្រួតពិនិត្យបរិយាកាសឃើញថា ស្ថានការណ៍ខ្យល់ពុលនៅថៃបានកាត់បន្ថយ ពីព្រោះមានខ្យល់បក់ ៕

សហរដ្ឋអាមេរិក៖ ថ្មីៗនេះស្ថាបនិក SpaceX លោក Elon Musk បានសរសេរនៅលើបណ្តាញសង្គម X ថាខ្លួននឹងសាកល្បងមុខងារ Starlink Direct-to-Cell នៅប៉ុន្មានថ្ងៃខាងមុខ ដែលអនុញ្ញាតឱ្យស្មាតហ្វូនទាំងអស់អាចភ្ជាប់ដោយផ្ទាល់ទៅនឹងផ្កាយរណប ដើម្បីប្រើប្រាស់អ៊ីនធឺណិត។

យោងតាមសារព័ត៌មានបរទេសចុះផ្សាយថា មុខងារថ្មីនេះត្រូវបានសាកល្បងជាលើកដំបូងនៅអាមេរិក បន្ទាប់មកនឹងពង្រីកទៅក្រុមហ៊ុនផ្សេងទៀតទូទាំងពិភពលោក។ សម្រាប់ព័ត៌មានលម្អិតក្រុមហ៊ុននឹងប្រកាសក្នុងពេលឆាប់ៗនេះ ទាក់ទងនឹងឧបករណ៍ដែលគាំទ្រ និងរបៀបចូលរួមក្នុងកម្មវិធីបេតា ដើម្បីដំណើរការមុខងារ Starlink Direct-to-Cell ។

Starlink Direct-to-Cell គឺជាមុខងារមួយដែលអនុញ្ញាតឱ្យឧបករណ៍ចល័តភ្ជាប់ដោយផ្ទាល់ទៅនឹងប្រព័ន្ធផ្កាយរណប ដោយមិនចាំបាច់ទិញកាតបញ្ចូលលុយដូចសព្វថ្ងៃនេះទៀតទេ។ មានន័យថាលោកអ្នកគ្រាន់តែប្រើមុខងារនេះ គឺអាចប្រើប្រាស់អ៊ីនធឺណិតបានដោយសេរីគ្រប់ទីកន្លែងតែម្តង។ មុខងារ Direct-to-Cell របស់ Starlink ក៏ជាជំហានដ៏សំខាន់មួយឆ្ពោះទៅមុខក្នុងការផ្សារភ្ជាប់គម្លាតទំនាក់ទំនងសកលផងដែរ។ ដូច្នេះមនុស្សរាប់លាននាក់នៅតំបន់ជនបទ និងដាច់ស្រយាលដែលខ្វះសេវាទូរស័ព្ទគឺលែងបារម្ភទៀតហើយ។

ការបង្កើតសេវាកម្មថ្មីនេះ គឺដើម្បីឱ្យមានផ្កាយរណបចំនួន ៤២,០០០ ដែលចូលរួមក្នុងបណ្តាញអ៊ីនធឺណិតអវកាស។ តាមពិតទៅប្រព័ន្ធអ៊ីនធឺណិតផ្កាយរណប Starlink គឺមានជាយូរមកហើយ គ្រាន់តែមិនទូលំទូលាយ ដោយសារមហាសេដ្ឋី Elon Musk ចង់ភ្ជាប់តែប៉ុន្មានតំបន់ប៉ុណ្ណោះ។ ទោះជាយ៉ាងណាលោកក៏ចាប់ផ្តើមមានគំនិតចង់ភ្ជាប់សេវាកម្មនេះទូទាំងពិភពលោកតែម្តង ដូច្នេះសេវាអ៊ីនធឺណិតផ្កាយរណបរបស់ក្រុមហ៊ុនបច្ចុប្បន្នគឺបានឈានដល់ល្បឿន ៥០ – ១៥០ Mbps ខណៈតំបន់ខ្លះមានល្បឿនរហូតដល់ ១៧៥ Mbps ឯណោះ៕

ក្រៅពីការជួបជុំក្រុមគ្រួសារកូនចៅក្នុងថ្ងៃចូលឆ្នាំចិន ទំនៀមទម្លាប់មួយទៀតរបស់ជនជាតិចិន គឺការផ្តល់អាំងប៉ាវ ។ យើងនឹងឆ្ងល់ថា តើអ្នកណាជាអ្នកផ្តល់អាំងប៉ាវ ហើយគួរផ្តល់ប្រាក់តាមចំនួនលេខណាខ្លះទើបមានលាភសំណាងពេញមួយឆ្នាំ? តាមជំនឿរបស់ចិន ការផ្តល់អាំងប៉ាវទៅឱ្យកូនចៅ ត្រូវបានចាត់ទុកថា គឺជាការឱ្យពរជ័យដល់អ្នកទទួលឱ្យមានលាភសំណាង ចម្រើនរុងរឿង និងមានសុខភាពល្អ ។

តាមទំនៀមទម្លាប់ចិន អ្នកដែលផ្តល់អាំងប៉ាវ គឺអាម៉ា អាកុង ប៉ា និងម៉ា ប៉ុន្តែកូនចៅដែលមានការងារធ្វើទទួលបានប្រាក់ខែខ្លួនឯង គឺពួកគេអាចផ្តល់អាំងប៉ាវទៅឱ្យក្មេងៗបាន ។ សរុបមក មនុស្សចាស់ទុំក្នុងគ្រួសារ ឬអ្នកមានចំណូលគួរតែផ្តល់អាំងប៉ាវទៅឱ្យសមាជិកគ្រួសារដែលមានអាយុតិចជាង ។

ការដាក់ប្រាក់ក្នុងអាំងប៉ាវដើម្បីទទួលបានលាភសំណាង រួមមាន ៖

១-ចៀសវាងលេខ៤ ៖ ការទទួលបានលាភសំណាងនៅថ្ងៃចូលឆ្នាំចិន គួរតែចាប់អារម្មណ៍លើការសែនម្ហូបអាហារបុព្វបុរសដែលបានចែកឋាន, ស្លៀកពាក់ឈុតពណ៌ក្រហមដើម្បីទាក់ទាញទ្រព្យសម្បត្តិ និងប្រកាន់យកបម្រាមក្នុងថ្ងៃចូលឆ្នាំចិន ។ រីឯតួលេខ ក៏គួរចាប់អារម្មណ៍ដូចគ្នាដែរ ចូរចៀសវាងដាក់ប្រាក់ក្នុងអាំងប៉ាវ ដែលមានចំនួនលេខ៤ ពីព្រោះលេខ៤ មានន័យថា សេចក្តីស្លាប់ ។

២-លេខ៦ និងលេខ៨ ជាលេខសំណាងបំផុត ៖ លេខសំណាងបំផុតសម្រាប់ការដាក់ប្រាក់ក្នុងអាំងប៉ាវឱ្យក្មេងៗ គឺលេខ៦ និងលេខ៨ ពីព្រោះជនជាតិចិនមានជំនឿថា លេខទាំងពីរនេះតំណាងឱ្យភាពរលូនក្នុងជីវិត ។

៣-ក្រដាសប្រាក់ និងសំបកអាំងប៉ាវ ៖ គួរតែដាក់ក្រដាសប្រាក់ថ្មីៗក្នុងអាំងប៉ាវ និងហាមដាក់ក្រដាសប្រាក់ចាស់ ឬដាច់រហែក ។ រីឯសំបកអាំងប៉ាវ ត្រូវតែមានសភាពថ្មី, មិនរហែក និងពុំជ្រាបទឹក ។

គួរតែត្រួតពិនិត្យឆ្នាំលើសំបកអាំងប៉ាវផងដែរ ដូចជា ៖ ឆ្នាំ២០២៥នេះ គឺជាឆ្នាំម្សាញ់ យើងគួរតែជ្រើសរើសសំបកអាំងប៉ាវមានរូបសត្វពស់ធំៗ ពីព្រោះក្រៅពីការនាំមកនូវសិរីសួស្តីក្នុងឆ្នាំថ្មីហើយ វាក៏បង្ហាញពីមារយាទ និងការយកចិត្តទុកដាក់ទៅអ្នកដែលយើងផ្តល់អាំងប៉ាវឱ្យ ។

ហេតុនេះ ការចាប់អារម្មណ៍ពីរឿងអាំងប៉ាវ មានសារៈសំខាន់បំផុតក្នុងថ្ងៃចូលឆ្នាំចិន ។ បើពុំសូវមានប្រាក់ច្រើនដាក់អាំងប៉ាវ យើងអាចកាត់បន្ថយចំនួនប្រាក់ ពីព្រោះចំណុចសំខាន់ក្នុងថ្ងៃចូលឆ្នាំចិន ពុំស្ថិតនៅលើចំនួនប្រាក់ទេ ប៉ុន្តែស្ថិតនៅលើការជួបជុំក្រុមគ្រួសារ សែនម្ហូបអាហារទៅបុព្វបុរសដែលបានចែកឋាន ៕

Central Park ដែលជាឧទ្យានកណ្តាលនៃទីក្រុងញូវយ៉ក សហរដ្ឋអាមេរិក មានផ្ទៃដីជាង ៣៤១ ហិកតា កាលពីមុនគឺជាដីដែលគេបោះបង់ចោលដោយសារហេតុផលហួសចិត្តមួយនេះ។
នៅអំឡុងឆ្នាំ ១៨៥៣ សមាជិកសភាញូវយ៉កបានសម្រេចចិត្តទិញដីមួយកន្លែងនៅលើកោះ Manhattan ដើម្បីសាងសង់សួនឧទ្យានដ៏ធំមួយ ហើយបានប្រើឈ្មោះផ្លូវការថា Central Park តាំងពីពេលនោះមក។

ប៉ុន្តែមនុស្សជំនាន់នោះជឿថា ដីដែលបានជ្រើសរើសសម្រាប់សាងសង់ឧទ្យាននេះគឺមិនមានភាពទាក់ទាញសោះឡើយ ធ្វើឱ្យដីនេះក្លាយជាដីដែលទំនេរ ត្រូវបានគេបោះបង់ចោល និងគួរឱ្យខ្លាចអស់រយៈពេល ៣-៤ ឆ្នាំ។ ទោះជាយ៉ាងណានៅឆ្នាំ ១៨៥៧ ដល់ ១៨៦៦ ដីដ៏ធំល្វឹងល្វើយនេះក៏ត្រូវបានគេសាងសង់ និងប្រែក្លាយ “ដីដែលគេបោះបង់ចោល” ទៅជាឧទ្យានដែលមានអ្នកទស្សនា និងចូលចិត្តជាងគេបំផុតក្នុងពិភពលោក។

នៅឆ្នាំ ១៩៣០ ឧទ្យាននេះបានចូលដំណើរការជួសជុលធំមួយ ជាមួយនឹងការផ្តល់មូលនិធិពីរដ្ឋាភិបាលសហរដ្ឋអាមេរិក ដើម្បីសាងសង់បឹង សួនកុមារ និងកន្លែងនេសាទ។ នៅឆ្នាំ ១៩៦០ ឧទ្យានកណ្តាលនៃទីក្រុងញូវយ៉កបានក្លាយជានិមិត្តរូបនៃចលនាវប្បធម៌ និងនយោបាយ រួមទាំងការតវ៉ា និងការប្រគុំតន្ត្រីជាច្រើនដែលត្រូវបានប្រារព្ធឡើងនៅសួនឧទ្យាននេះ។ ក្នុងរយៈពេលកន្លងមក Central Park តែងតែផ្តោតលើការជួសជុលឥតឈប់ឈរ និងកែលម្អសកម្មភាពនានា ដើម្បីបម្រើប្រជាពលរដ្ឋ និងភ្ញៀវទេសចរឱ្យកាន់តែប្រសើរឡើង។ ដូច្នេះពេញមួយប្រវត្តិសាស្រ្តនៃការបង្កើត និងការអភិវឌ្ឍន៍ Central Park គឺបានឆ្លងកាត់ការផ្លាស់ប្តូរយ៉ាងច្រើនពីមួយឆ្នាំទៅមួយឆ្នាំ។

យោងតាមស្ថិតិពីគេហទំព័រទេសចរណ៍ Travel + Leisure Central Park ឧទ្យានកណ្តាលនៃទីក្រុងញូវយ៉ក ឬហៅថា Central Park គឺបានក្លាយជាគោលដៅដ៏ពេញនិយមបំផុតនៅសហរដ្ឋអាមេរិកក្នុងឆ្នាំ ២០២៤ ស្ថិតក្នុងចំណាត់ថ្នាក់លេខមួយតែម្តង។ អ្នកទស្សនាជាង ៩០% បានសរសើរមិនដាច់ពីមាត់ពីសម្រស់ធម្មជាតិ ចាប់ពីសួនច្បារដ៏គួរឱ្យស្រឡាញ់ ប្រាសាទបុរាណ សួនសត្វចម្រុះ កន្លែងជិះស្គី សួនកុមារចំនួន ២១ កន្លែង និងក្លោងទ្វារជាច្រើន ក៏ដូចជាសកម្មភាពឥតគិតថ្លៃរាប់មិនអស់នៅទីនេះផងដែរ៕