ប្រទេសម៉ាឡេស៊ី ៖ បន្ទុកក្នុងផ្ទះរបស់ក្រុមគ្រួសារជាច្រើននៅតំបន់អាស៊ីអាគ្នេយ៍ គឺកូនៗមានតួនាទីថែទាំឪពុក-ម្តាយចាស់ជរា ឬជួលអ្នកថែទាំឪពុក-ម្តាយពេលកូនៗត្រូវធ្វើដំណើរទៅកន្លែងឆ្ងាយ ។ ប៉ុន្តែពលរដ្ឋម៉ាឡេស៊ីពុំធ្វើបែបនេះទេ ពួកគេនិយមផ្ញើឪពុក-ម្តាយជរានៅមន្ទីរពទ្យ ដើម្បីឱ្យពួកគេមានឱកាសដើរលេងនៅក្រៅប្រទេសយ៉ាងសប្បាយចិត្ត ហើយគិតថា ឪពុក-ម្តាយជាបន្ទុកសម្រាប់កូនចៅ ដែលវាបានក្លាយជាបញ្ហាថ្មីនៅម៉ាឡេស៊ី ។

មន្ទីរពេទ្យកូឡាឡាំពួរ គឺជាមន្ទីរពេទ្យរដ្ឋដ៏ធំបំផុតនៅប្រទេសម៉ាឡេស៊ី ប្រកាសថា តាំងពីឆ្នាំ២០២២ រហូតមកដល់ឆ្នាំ២០២៥ ឪពុក-ម្តាយចាស់ៗត្រូវបានកូនចៅយកមកទុកចោលនៅមន្ទីរពេទ្យកាន់តែច្រើនជារៀងរាល់ឆ្នាំ គឺក្នុង១ឆ្នាំៗ កើនឡើងប្រមាណ ១០០នាក់ ។

ម៉ាឡេស៊ី គឺជាប្រទេសមួយមានប្រព័ន្ធធានារ៉ាប់រងសុខភាពលក្ខណៈស្តង់ដារ និងសេវាព្យាបាលជំងឺនៅមន្ទីរពេទ្យមានតម្លៃសមរម្យ ។ ប៉ុន្តែពលរដ្ឋម៉ាឡេស៊ីបច្ចុប្បន្ន បែរជានាំឪពុក-ម្តាយចាស់ជរាទៅផ្ញើនៅមន្ទីរពេទ្យឱ្យមើលការខុសត្រូវ ដើម្បីឱ្យពួកគេមានឱកាសដើរលេងនៅថ្ងៃឈប់សម្រាក ។ មន្ទីរពេទ្យជាច្រើនប្រកាសដូចៗគ្នាថា នៅថ្ងៃឈប់សម្រាកម្តងៗ គ្រួសារជាច្រើនបាននាំឪពុក-ម្តាយមកផ្ញើនៅមន្ទីរពេទ្យ ហើយមនុស្សចាស់មួយចំនួនគ្មានជំងឺអ្វីទេ ។

គ្រួសារមួយដែលបាននាំឪពុក-ម្តាយទៅផ្ញើនៅមន្ទីរពេទ្យ ប្រាប់ថា បើនាំឪពុក-ម្តាយទៅដើរលេង ពួកគេពិបាកចាត់ចែងម្ហូបអាហារសម្រាប់ឪពុក-ម្តាយបរិភោគ ។ បើឪពុក-ម្តាយបរិភោគអាហារច្រើនពេក នាំឱ្យប៉ះពាល់សុខភាព ឈឺនេះ ឈឺនោះ ទើបនាំឪពុក-ម្តាយមកផ្ញើនៅមន្ទីរពេទ្យឱ្យគ្រូពេទ្យថែទាំ ។

មូលហេតុសំខាន់ដែលគ្រួសារជាច្រើននាំឪពុក-ម្តាយមកផ្ញើនៅមន្ទីរពេទ្យ ដោយសារពួកគេយល់ថា គ្មានប្រាក់គ្រប់គ្រាន់សម្រាប់ព្យាបាលជំងឺឪពុក-ម្តាយ ទើបពួកគេនាំឪពុក-ម្តាយទៅផ្ញើនៅមន្ទីរពេទ្យជាច្រើនខែ និងពុំនាំត្រឡប់មកផ្ទះវិញ ។ ក្រៅពីនេះ កូនចៅមួយចំនួនបាននាំឪពុក-ម្តាយទៅរស់នៅមណ្ឌលថែទាំមនុស្សចាស់ ហើយបង់ប្រាក់ឱ្យមណ្ឌលសម្រាប់ការចំណាយតែម្តងគត់ ។ បន្ទាប់មក បាត់ស្រមោលឈឹង ឈប់បង់ប្រាក់ឱ្យមណ្ឌលសម្រាប់ការថែទាំ និងលែងមកសួរសុខទុក្ខឪពុក-ម្តាយ ។

វាជាបញ្ហាថ្មីមួយដែលរដ្ឋាភិបាលម៉ាឡេស៊ីពិបាកដោះស្រាយ ដោយសារក្រុមគ្រួសារកាន់តែច្រើនយល់ឃើញថា ការថែទាំឪពុក-ម្តាយជាបន្ទុកក្នុងផ្ទះ ដែលធ្វើឱ្យពួកគេគ្មានពេលវេលារកស៊ី ឬដើរលេង ។ មតិខ្លះថា វាដូចគ្នានឹងការយកសត្វចិញ្ចឹមទៅផ្ញើនៅកន្លែងថែទាំសត្វ ពីព្រោះកន្លែងទាំងនេះមានជំនាញខាងថែទាំសត្វ ដើម្បីឱ្យម្ចាស់មានពេលវេលាដើរកម្សាន្តយ៉ាងសប្បាយចិត្ត ៕

សាប៊ូដុំ និងសាប៊ូទឹក មានតួនាទីសម្អាតស្បែករាងកាយដែលទទួលបានការពេញនិយមយ៉ាងខ្លាំងនាពេលបច្ចុប្បន្ន ហើយសាប៊ូទាំង២ប្រភេទនេះមានគុណសម្បត្តិ និងគុណវិបត្តិខុសៗគ្នា ។ មនុស្សភាគច្រើនគិតថា ការប្រើប្រាស់សាប៊ូទឹកដុសខ្លួន គឺល្អជាងសាប៊ូដុំ ពីព្រោះវាមានសំណើមច្រើន ប៉ុន្តែការដុសខ្លួនដោយសាប៊ូទឹក នឹងចំណាយទឹកអស់ច្រើនជាងសាប៊ូដុំ ។

ការដុសខ្លួនដោយសាប៊ូទឹកពេលងូតទឹក គឺមនុស្សម្នាក់ៗតែងតែប្រើប្រាស់សាប៊ូក្នុងបរិមាណច្រើនដើម្បីដុសឱ្យសព្វរាងកាយ ហើយពួកគេត្រូវការទឹកយ៉ាងច្រើនសម្រាប់លាងជម្រះសាប៊ូចេញពីខ្លួនប្រាណ ។ រីឯការប្រើប្រាស់សាប៊ូដុំវិញ គេនិយមប្រើប្រាស់តែបន្តិចប៉ុណ្ណោះសម្រាប់ដុសសម្អាតរាងកាយ ដែលធ្វើឱ្យចំណាយទឹកសម្រាប់លាងសម្អាតខ្លួន តិចជាងសាប៊ូទឹក ។

តាមការស្រាវជ្រាវបង្ហាញថា ការប្រើប្រាស់សាប៊ូទឹក នឹងចំណាយទឹកអស់ច្រើនជាងសាប៊ូដុំ ចាប់ពី២ដង ទៅ៣ដងឯណោះ ។ បើចង់សន្សំសំចៃទឹកពេលងូតទឹក យើងគួរតែជ្រើសរើសសាប៊ូដុំសម្រាប់ដុសខ្លួន ។ ក្រៅពីនេះ នៅមានកត្តាផ្សេងទៀតដែលពាក់ព័ន្ធនឹងការសន្សំសំចៃទឹកពេលងូតទឹកផងដែរ ដូចជា ៖ រយៈពេលងូតទឹក, សីតុណ្ហភាពទឹក និងកម្លាំងទឹកខ្លាំង ឬខ្សោយ ។ បើងូតទឹកយូរពេក ឬសីតុណ្ហភាពទឹកខ្ពស់ពេក ឬទឹកចេញខ្លាំងពីឧបករណ៍ផ្កាឈូក វានឹងធ្វើឱ្យយើងប្រើប្រាស់ទឹកកាន់តែច្រើន ។

ខាងក្រោមនេះ គឺជាវិធីសន្សំសំចៃទឹកពេលងូតទឹក ៖
-កំណត់សីតុណ្ហភាពទឹកឱ្យសមល្មម គឺមិនក្តៅខ្លាំងពេក ឬត្រជាក់ពេក
-បិទទឹកគ្រប់ពេលវេលា ពេលពុំប្រើប្រាស់
-ប្រើប្រាស់សាប៊ូដុំជំនួសសាប៊ូទឹក និង
-ងូតទឹកព្រមគ្នាជាមួយសមាជិកគ្រួសារ ។

ហេតុនេះ យើងអាចអនុវត្តវិធីងាយៗដើម្បីសន្សំសំចៃទឹកពេលងូតទឹកដែលអាចធ្វើបានរៀងរាល់ថ្ងៃ ដើម្បីកាត់បន្ថយការប្រើប្រាស់ទឹកអស់ច្រើន ព្រមទាំងជួយការពារបរិស្ថានពីការបំពុលដោយសារទឹកស្អុយ ៕

មហាសេដ្ឋី Kazuo Inamori គឺជាអតីតប្រធានក្រុមហ៊ុន Japan Airlines និងជាសហស្ថាបនិកនៃក្រុមទូរគមនាគមន៍ KDDI ដ៏ល្បីល្បាញមួយរបស់ប្រទេសជប៉ុន។ ប៉ុន្តែបច្ចុប្បន្នលោកបានមរណភាពហើយ ក្នុងជន្មាយុ ៩០ ឆ្នាំ ដោយសាររោគាពាធ។ ទោះបីជាយ៉ាងនេះក្តី លោកបានបន្សល់ទុកនូវជីវប្រវត្តិដ៏អស្ចារ្យ និងដំបូន្មានល្អៗជាច្រើនសម្រាប់យុវជនជំនាន់ក្រោយ។ យោងតាមការចុះផ្សាយរបស់សារព័ត៌មានបរទេស CNBC ទម្លាប់មួយចំនួនរបស់មហាសេដ្ឋីជប៉ុន អាចជាគន្លឹះដ៏ល្អមួយក្នុងការជួយមនុស្សឱ្យផ្លាស់ប្តូរជីវិតរបស់ពួកគេដើម្បីក្លាយជាអ្នកមាន។

១.មិនចុះចាញ់ ឬមិនបោះបង់៖ អតីតប្រធានក្រុមហ៊ុន Japan Airlines កើតមកក្នុងភាពក្រីក្រ ធ្លាប់បរាជ័យក្នុងសាកលវិទ្យាល័យ ដែលគាត់ចង់បាន មានន័យថា លោកបានដាក់ពាក្យប្រលងចូលសកលវិទ្យាល័យដែលលោកប្រាថ្នា ប៉ុន្តែមិនជាប់នោះទេ ហើយលោកក៏សម្រេចចិត្តទៅរៀននៅសកលវិទ្យាល័យមួយផ្សេងទៀត។

នៅពេលរៀនចប់មហាសេដ្ឋីរូបនេះក៏បានចាប់ផ្តើមបង្កើតរោងចក្រសេរ៉ាមិចមួយប៉ុន្តែក្ស័យធន។ ពាក់កណ្តាលដំបូងនៃជីវិតរបស់គាត់គឺពោរពេញទៅដោយបញ្ហាប្រឈមយ៉ាងស្មុគស្មាញជាច្រើន ប៉ុន្តែជំនួសឱ្យការត្អូញត្អែរ គឺលោកមិនចុះចាញ់ និងមិនបោះបង់នោះទេ។ លោកបានព្យាយាម តស៊ូឥតឈប់ឈរ ដើម្បីផ្លាស់ប្តូរជោគវាសនារបស់លោករហូតដល់ជោគជ័យ។

ដូច្នេះមហាសេដ្ឋី Kazuo Inamori ទើបតែទទួលបានភាពជោគជ័យនៅអាយុ ៧៧ ឆ្នាំដោយបានកាន់កាប់ក្រុមហ៊ុនអាកាសចរណ៍ជប៉ុន ដែលជួយឱ្យក្រុមហ៊ុនដ៏ធំមួយនេះទទួលបានប្រាក់ចំណេញលេខមួយនៅទូទាំងពិភពលោក។ លើសពីនេះមហាសេដ្ឋីជប៉ុនក៏បានបង្កើតក្រុមហ៊ុន Kyocera និង Second Telecom ដែលធ្វើឱ្យក្រុមហ៊ុនទាំងពីរនេះបានចូលទៅក្នុងក្រុមហ៊ុនកំពូល ៥០០ នៅលើពិភពលោកផងដែរ។

២.កត់ត្រានៅអ្វីដែលយើងធ្វើ និងរៀនកែលម្អ៖ មហាសេដ្ឋីជប៉ុន Kazuo Inamori តែងតែយកសៀវភៅកត់ត្រាមកជាមួយ ដោយសរសេរបច្ចេកទេសនីមួយៗ ដែលលោកត្រូវរៀន។ បើមិនចេះស្ទាត់ទេគាត់សុខចិត្តហាត់រាប់ពាន់ដងរហូតដល់ស្ទាត់ជំនាញ។ ការកែលម្អតូចៗទាំងនេះបាននាំលោក Kazuo Inamori ទៅកាន់មុខតំណែងមួយចំនួនដែលលោករំពឹងទុក។

Kazuo Inamori ជឿជាក់ថា “គ្មានការជោគជ័យណាមួយដែលមិនខិតខំនោះទេ ហើយក៏មិនមានទេពកោសល្យពីកំណើតអ្វីដែរ។ នៅពីក្រោយសមិទ្ធិផលល្អៗទាំងអស់ គឺជាមនុស្សដែលតស៊ូ និងព្យាយាមជានិច្ចដើម្បីកែលម្អ”។ មហាសេដ្ឋីរូបនេះបានសង្កត់ធ្ងន់ថា ទោះបីជាចំណុចចាប់ផ្តើមរបស់អ្នកទាបប៉ុណ្ណាក៏ដោយឱ្យតែអ្នកប្រសើរឡើងជារៀងរាល់ថ្ងៃ មិនយូរមិនឆាប់ អ្នកនឹងបង្កើតចំណុចរបត់មួយ ហើយនឹងក្លាយជាអ្នកមាននាពេលអនាគត។

៣.ត្រូវរៀនស្រឡាញ់ការងារដែលខ្លួនធ្វើ៖ បុគ្គលល្បីៗនៅលើពិភពលោក រាប់ចាប់ពីអ្នកចម្រៀង វិស្វករ ស្ថាបនិកក្រុមហ៊ុន សេដ្ឋី និងមហាសេដ្ឋី សុទ្ធតែសប្បាយរីករាយនឹងការងាររបស់ខ្លួនជានិច្ច។ មហាសេដ្ឋី Bill Gates ប្រហែលមិនបង្កើតក្រុមហ៊ុន Microsoft ឡើងនោះទេ ប្រសិនបើលោកស្អប់ ឬមិនចូលចិត្តកម្មវិធី Software។ ដូច្នេះមហាសេដ្ឋីជប៉ុន Kazuo Inamori បានចែករំលែកថា អាថ៌កំបាំងជោគជ័យ គឺធ្វើឱ្យការងារបច្ចុប្បន្នរបស់អ្នកក្លាយជាការងារដែលជាចំណង់ចំណូលចិត្តរបស់អ្នក ទោះបីជាអ្នកមិនបានធ្វើការងារដែលអ្នកប្រាថ្នាក៏ដោយ៕

កូលាបពណ៌ខ្មៅ គឺជាផ្កាដ៏កម្រមួយ ត្រូវបានមនុស្សជាច្រើនគិតថា វាមិនមែនជាផ្កាដុះតាមធម្មជាតិនោះទេ ដោយអ្នកខ្លះគិតថា វាជាផ្កាដែលគេយកទៅបាញ់ថ្នាំឱ្យចេញពណ៌ខ្មៅ។ ប៉ុន្តែតាមពិតទៅផ្កានេះគឺដុះតាមធម្មជាតិ មិនមានការបាញ់ថ្នាំអ្វីឡើយ ហើយក៏ជាផ្កាដែលជិតផុតពូជផងដែរ។ ផ្កាកូលាបពណ៌ខ្មៅមានអត្ថប្រយោជន៍ជាច្រើនចំពោះសុខភាព និងសម្រស់ ហើយក៏មានអត្ថន័យល្អទៀតផង។ ទោះជាយ៉ាងណា ផ្កានេះត្រូវបានគេរកឃើញថា រីកដុះដាលតែនៅក្នុងភូម Halfeti ប្រទេសទួរគីប៉ុណ្ណោះ។

យោងតាមសារព័ត៌មានបរទេស Hurriet Daily News មូលហេតុដែលផ្កាកូលាបមានពណ៌ខ្មៅខុសគេ គឺដោយសារដីនៅភូមិ Halfeti មានទីតាំងនៅច្រាំងទន្លេ Euphrates ដែលមានកម្រិត pH ពិសេសអាចផ្តល់ឱ្យផ្កានេះមានពណ៌ខ្មៅបែបធម្មជាតិ។ ពូជផ្កានេះត្រូវបានគេយកទៅដាំដុះនៅកន្លែងផ្សេងៗទៀតជុំវិញពិភពលោកដែរ ប៉ុន្តែនៅពេលចេញផ្កា ស្រាប់តែមានពណ៌ក្រហមធម្មតាទៅវិញ។

ដូច្នេះរហូតមកដល់ពេលនេះ ផ្កាកូលាបពណ៌ខ្មៅ ត្រូវបានគេរកឃើញថា រីកដុះដាលតែនៅក្នុងភូមិ Halfeti ប្រទេសទួរគីមួយប៉ុណ្ណោះ។ បើនិយាយពីអត្ថន័យវិញ ផ្កាកូលាបពណ៌ខ្មៅត្រូវបានគេជឿថា តំណាងឱ្យភាពច្បាស់លាស់ និងពិតប្រាកដ ដែលចង់បញ្ជាក់ដល់ស្នេហាជ្រាលជ្រៅជានិរន្តរ៍ និងអត្ថន័យមួយទៀតតំណាងឱ្យភាពស្រស់ស្អាតនៃកូនក្រមុំអារ៉ាប់។

បើនិយាយពីអត្ថប្រយោជន៍វិញ មិនថាផ្កាកូលាបពណ៌ណានោះទេ សុទ្ធតែល្អចំពោះសុខភាព និងសម្រស់ ខណៈភាគច្រើនគេយកទៅផលិតជាប្រេងផ្កាកូលាប និងផលិតជាតែ។ តែកូលាបផ្តល់អត្ថប្រយោជន៍ជាច្រើនដូចជា កាត់បន្ថយអាការឈឺចាប់ពេលមករដូវ, ជំនួយស្បែកឱ្យស និងមានសំណើម, ជួយពង្រឹងប្រព័ន្ធភាពសុំា, ជួយប្រព័ន្ធរំលាយអាហារ, ជួយកាត់បន្ថយស្រេ្តស រួមទាំងជួយកាត់បន្ថយអត្រាឆ្លងមេរោគផ្លូវទឹកនោមផងដែរ នេះបើយោងតាមការសិក្សានៅកោះតៃវ៉ាន់ក្នុងឆ្នាំ ២០០៥៕

ប្រទេសតួកគី ៖ ប្រទេសតួកគីបានពិន័យប្រាក់ក្រុមហ៊ុនផលិតស្បែកជើង និងសម្ភារៈកីឡាដ៏ល្បីល្បាញរបស់អាល្លឺម៉ង់ឈ្មោះ Adidas ចំនួន១៥,២០០ដុល្លារអាមេរិក ករណីក្រុមហ៊ុននេះពុំផ្តល់ដំណឹងទៅអតិថិជនឱ្យជ្រាបថា ស្បែកជើងឃ្លុបម៉ាក Samba OG ដែលទទួលបានការពេញនិយមខ្លាំងនោះផលិតពីស្បែកជ្រូក ។ នេះបើតាមការចុះផ្សាយរបស់សារព័ត៌មានបរទេស កាលពីថ្ងៃទី១៧ ខែកុម្ភៈ ឆ្នាំ២០២៥ ។

ភ្នាក់ងារគ្រប់គ្រងការផ្សព្វផ្សាយពាណិជ្ជកម្មរបស់តួកគីឱ្យដឹងថា ក្រុមហ៊ុន Adidas បានផលិតស្បែកជើងឃ្លុបម៉ាក Samba OG ហើយទទួលបានការពេញនិយមពីអតិថិជនយ៉ាងច្រើន ព្រមទាំងតារាម៉ូឌែលអាមេរិកផងដែរ ដូចជា ៖ អ្នកនាង Kendall Jenner និងអ្នកនាង Bella Hadid ប៉ុន្តែក្រុមហ៊ុនពុំប្រាប់អតិថិជនឱ្យច្បាស់ថា ស្បែកជើងនេះផលិតពីស្បែកជ្រូក ។

ការប្រើប្រាស់វត្ថុធាតុដើមសម្រាប់ផលិតស្បែកជើង ដែលប៉ះពាល់ដល់សាសនារបស់អតិថិជនភាគច្រើន គឺក្រុមហ៊ុន Adidas ត្រូវតែប្រាប់អតិថិជនឱ្យច្បាស់លាស់ ប៉ុន្តែក្រុមហ៊ុនបែរជាផ្សព្វផ្សាយពាណិជ្ជកម្មពីស្បែកជើងឃ្លុបម៉ាក Samba OG ដើម្បីទាក់ទាញអតិថិជន ។ ហេតុនេះ ភ្នាក់ងារគ្រប់គ្រងការផ្សព្វផ្សាយពាណិជ្ជកម្មតួកគី បានសម្រេចចិត្តពិន័យប្រាក់ក្រុមហ៊ុននេះ ចំនួន១៥,២០០ដុល្លារអាមេរិក ។

ចំណែកក្រុមហ៊ុន Adidas បានបញ្ជាក់ក្នុងលិខិតខ្លីមួយថា ក្រោយពីដឹងថាតួកគីពិន័យប្រាក់ ក្រុមហ៊ុនបានកែតម្រូវទិន្នន័យលម្អិតបញ្ជាក់ពីការប្រើប្រាស់ស្បែកជ្រូកធ្វើជាវត្ថុធាតុដើមផលិតស្បែកជើងឃ្លុបនៅលើគេហទំព័រ ប៉ុន្តែក្រុមហ៊ុនសូមពុំនិយាយអ្វីពាក់ព័ន្ធនឹងការពិន័យប្រាក់នេះ ។

គួរបញ្ជាក់ថា កាលពីឆ្នាំ២០២០ ការិយាល័យកិច្ចការសាសនារបស់ប្រទេសតួកគីប្រកាសថា ការផលិតស្បែកជើង ឬសម្លៀកបំពាក់ពីស្បែកជ្រូក ឬរោមជ្រូក គឺតួកគីពុំអនុញ្ញាតទេ ពីព្រោះអ្នកប្រាជ្ញមូស្លីមចាត់ទុកថា ការប្រើប្រាស់ផលិតផលធ្វើពីស្បែកជ្រូក គឺជាមនុស្សពុំបរិសុទ្ធ ៕

ផ្លូវថ្មើរជើងដែលវែងជាងគេឆ្លងកាត់រហូតដល់១៧ប្រទេស គឺអាចធ្វើដំណើរដោយជើងមានរយៈចម្ងាយប្រមាណ 14,334 miles (ប្រមាណ 23,068 km) ដោយអាចធ្វើដំណើរពីទីក្រុងខេបថោន (Cape Town) រដ្ឋធានីនៃប្រទេសអាហ្វ្រិកខាងត្បូងឆ្ពោះមកកាន់ទីក្រុងម៉ាហ្កាដាន (Magadan) នៃប្រទេសរុស្សី។

ការធ្វើដំណើរតាមផ្លូវនេះគឺត្រូវឆ្លងកាត់១៧ប្រទេសហើយអាចដើរដោយជើងសុទ្ធសាធនៅលើផ្លូវ និងស្ពានដោយមិនមានជិះយន្តហោះ ជិះកាណូត ជិះសាឡាង ដោយគ្រាន់តែឆ្លងកាត់ខ្ពង់រាប ព្រៃភ្នំ វាលខ្សាច់ និងវាលទឹកកក។ ប្រសិនបើយើងគណនាដើរថ្មើរជើងជាមធ្យម៨ម៉ោងក្នុងមួយថ្ងៃដោយមិនសម្រាកសោះ យើងនឹងប្រើពេលអស់ ៥៨០ថ្ងៃដើម្បីបញ្ចប់ដំណើរនេះ ហើយត្រូវឡើងចុះក្នុងរយៈកម្ពស់ 123 000ម. ដែលស្មើនឹងឡើងចុះភ្នំអេវ៉េរ៉េសចំនួន១៣ដង។ ប៉ុន្តែក្នុងករណីបើជិះកង់ យើងត្រូវពេល៤៨ថ្ងៃជិះដោយមិនឈប់សម្រាកសោះ ហើយប្រមាណ១៤៥ថ្ងៃបើជិះក្នុងមួយថ្ងៃ៨ម៉ោង។

ក្រៅពីនេះទៀតក៏មានបញ្ហាជាច្រើនដូចជារឿងទិដ្ឋាការ ការប្រើប្រាស់ភាសា សម្ភារៈត្រូវយកតាមខ្លួននិងការផ្លាស់ប្តូអាកាសធាតុ ជាពិសេសបញ្ហានយោបាយ និយាយជារួមគឺត្រូវជួបឧបសគ្គនានាជាច្រើនយ៉ាងណាស់ទាំងលក្ខណៈធម្មជាតិ និងសន្តិសុខ។

ថ្វីត្បិតតែផ្លូវមួយនេះត្រូវបានគេស្គាល់យ៉ាងទូលំទូលាយជាសាកលយ៉ាងណាក៏ដោយ ប៉ុន្តែមកដល់ថ្ងៃនេះមិនទាន់មាននរណាម្នាក់អាចសម្រេចបាននូវបេសកកម្មនេះនៅឡើយ៕