បើនិយាយអំពីមេដឹកនាំប្រទេសនីមួយៗ យើងតែងសង្កេតឃើញថាពួកគាត់គឺជាមនុស្សជាមនុស្សដែលម៉ឺងម៉ាត់ ហ្មត់ចត់ ជាពិសេសគឺមេដឹកនាំរបស់ប្រទេសកំពូលដូចជាមហាអំណាចជាដើម។ តាមពិត នៅពីក្រោយការដឹកនាំ ពួកគាត់ក៏ជាមនុស្សទន់ភ្លន់ ដែលមានក្ដីស្រលាញ់ ជាពិសេសនោះមានមេដឹកនាំខ្លះស្រលាញ់សត្វឆ្កែរបស់គាត់លើសពីសត្វចិញ្ចឹមទៅទៀត ពោលគឺប្រៀបដូចជាសមាជិកគ្រួសារអញ្ចឹង។ តើមេដឹកនាំប្រទេសណាខ្លះដែលស្រលាញ់សត្វឆ្កែខ្លាំងនោះ?

៥. លោក Moon Jae In៖ អតីតប្រធានាធិបតីប្រទេសកូរ៉េខាងត្បូងរូបនេះ បានទទួលចិញ្ចឹមសត្វឆ្កែមួយក្បាល ដែលត្រូវបានគេបោះបង់ចោល និងផ្ដល់ជីវិតដែលល្អបំផុតអោយវា ព្រមទាំងដាក់ឈ្មោះអោយវាថា Tori ។ លោកក៏ធ្លាប់ទទួលបានកាដូរជាសត្វឆ្កែ ពីមេដឹកនាំកូរ៉េខាងជើង គីម ជុងអ៊ុនផងដែរ។ ក្នុងអាណត្តិនៃការដឹកនាំរបស់លោក លោកបានផ្សព្វផ្សាយពីការថែរក្សាសុកមាលភាពសត្វ និងព្យាយាមលុបបំបាត់ការជួញដូរសាច់ឆ្កែ។

៤. លោក Emmanuel Macron ៖ ជាប្រធានាធិបតី របស់ប្រទេសបារាំង។ លោក និងភរិយាជាមនុស្សដែលស្រលាញ់សត្វឆ្កែដូចគ្នា ដូចនេះកាលពីឆ្នាំ២០១៧ នាក់ទាំង២ បានយកឆ្កែមួយពីមជ្ឈមណ្ឌលថែទាំសត្វអនាថា និងដាក់ឈ្មោះអោយវាថា Nemo។ លោកបានជម្រុញអោយមានការការពារសិទ្ធិសត្វ ហាមឃាត់ការលក់ដូរសត្វឆ្កែ និងសត្វឆ្មានៅក្នុងប្រទេសបារាំង ហើយសម្រាប់នរណាម្នាក់ដែលចង់ចិញ្ចឹមសត្វទាំងនេះ គឺត្រូវទៅទទួលចិញ្ចឹមពីមជ្ឍមណ្ឌលជួយសង្រ្គោះសត្វអនាថា។

៣. ម្ចាស់ក្សត្រី Elizabeth II ៖ ពេញមួយជីវិតរបស់គាត់ គាត់ចិញ្ចឹមឆ្កែ ដែលសរុបមានប្រហែលជាង ៣០ក្បាល។ ជីវិតឆ្កែនីមួយៗ របស់ម្ចាស់ក្សត្រី គឺប្រើជីវិតមានលក្ខណៈបែបជាខ្សែររាជវង្ស ដោយអោយពួកវារស់នៅក្នុងភូមិគ្រឹះ មានចុងភៅផ្ទាល់ខ្លួន និងអាចធ្វើដំណើរជុំវិញពិភពលោកបានជាមួយទ្រង់។

២. លោក Barack Obama ៖ អតីតប្រធានាធិបតីទី៤៤ របស់សហរដ្ឋអាមេរិករូបនេះ មានឆ្កែចំនួន២ក្បាល ដែលមានឈ្មោះថា Bo និង Sunny។ នៅឆ្នាំ ២០០៩ Bo បានក្លាយជាឆ្កែដំបូង (The First Dog) ដែលបានរស់នៅ និងចេញចូលសេតវិមានដោយសេរី។ Bo និង Sunny តែងតែចូលរួមក្នុងកម្មវិធីសប្បុរសធម៌ផ្សេងៗ ហើយបានក្លាយជាសត្វចិញ្ចឹមដែលល្បីល្បាញនៅក្នុងប្រវត្តិសាស្រ្តអាមេរិក។

១. លោក Vladimir Putin៖ ប្រធានាធិបតីរបស់មហាអំណាចរុស្ស៊ីរូបនេះ ជាមនុស្សដែលស្រលាញ់សត្វឆ្កែណាស់។ លោកតែងបង្ហាញក្ដីស្រលាញ់របស់គាត់ តាមរយៈការចំណាយពេលវេលាលេងជាមួយពួកវា អនុញ្ញាតអោយចូលក្នុងកិច្ចប្រជុំ និងសមយុទ្ធយោធាមួយចំនួន ។ ក្រៅពីនេះ គាត់តែងលើកកម្ពស់សិទ្ធិសត្វ និងការពារសត្វអនាថាផងដែរ៕

ប្រទេសថៃ ៖ គណៈកម្មការគ្រប់គ្រងមូលនិធិប្រេងឥន្ធនៈប្រទេសថៃបានកាត់បន្ថយអត្រាមូលនិធិប្រេងឥន្ធនៈ ដើម្បីឱ្យតម្លៃលក់រាយប្រេងសាំង និងប្រេងម៉ាស៊ូត ធ្លាក់ចុះ១បាតក្នុង១លីត្រ (ឬធ្លាក់ចុះ១០០រៀលក្នុង១លីត្រ) ចាប់ថ្ងៃទី២៨ ខែមីនា ឆ្នាំ២០២៥ តទៅ ។ ការបញ្ចុះតម្លៃប្រេងឥន្ធនៈនឹងជួយសម្រាលបន្ទុកការចំណាយរបស់ពលរដ្ឋដែលធ្វើដំណើរទៅតាមបណ្តាខេត្ត និងដើរកម្សាន្តក្នុងថ្ងៃចូលឆ្នាំថ្មីខាងមុខ ស្របពេលតម្លៃប្រេងឥន្ធនៈលើពិភពលោកធ្លាក់ចុះ ។

កាលពីថ្ងៃទី២៤ ខែមីនា ឆ្នាំ២០២៥ លោក Phiraphan Salirathaviphak ឧបនាយករដ្ឋមន្ត្រី និងរដ្ឋមន្ត្រីក្រសួងថាមពល ក្នុងឋានៈជាប្រធានគណៈកម្មការគ្រប់គ្រងមូលនិធិប្រេងឥន្ធនៈ និយាយថា គណៈកម្មការបានប្រជុំកំណត់គោលការណ៍គ្រប់គ្រងតម្លៃលក់រាយប្រេងឥន្ធនៈនៅថៃឱ្យធ្លាក់ចុះ ខណៈតម្លៃប្រេងឥន្ធនៈលើពិភពលោកធ្លាក់ចុះ ។

កិច្ចប្រជុំបានសម្រេចអនុម័តកែសម្រួលអត្រាមូលនិធិប្រេងឥន្ធនៈសម្រាប់ប្រេងសាំង និងប្រេងម៉ាស៊ូត ដែលធ្វើឱ្យការលក់រាយប្រេងធ្លាក់ចុះ១បាតក្នុង១លីត្រ ដើម្បីជួយកាត់បន្ថយការចំណាយរបស់ពលរដ្ឋ ។ ការបញ្ចុះតម្លៃប្រេងឥន្ធនៈនឹងធ្វើឡើងជា២ដំណាក់កាល រួមមាន ៖ ដំណាក់កាលទី១ នឹងបញ្ចុះចំនួន៥០រៀលក្នុង១លីត្រ ចាប់ពីថ្ងៃទី២៨ ខែមីនា និងដំណាក់កាលទី២ នឹងបញ្ចុះចំនួន៥០រៀលទៀតក្នុង១លីត្រ ចាប់ពីថ្ងៃទី៤ ខែមេសា ។

ការបញ្ចុះតម្លៃប្រេងឥន្ធនៈនេះ គឺជារង្វាន់សម្រាប់ពលរដ្ឋធ្វើដំណើរទៅតាមបណ្តាខេត្ត និងដើរកម្សាន្តក្នុងថ្ងៃចូលឆ្នាំថ្មីខាងមុខ ដោយសារចូលឆ្នាំថ្មីនឹងមានការធ្វើដំណើរច្រើន ជាពិសេស រថយន្តចាក់ប្រេង ។ វាជាការជួយសម្រាលបន្ទុកចំណាយរបស់ពលរដ្ឋ ដើម្បីឱ្យពួកគេអាចធ្វើដំណើរទៅស្រុកកំណើតជួបជុំគ្រួសារ និងដើរកម្សាន្តក្នុងប្រទេសពេលចូលឆ្នាំ ។

សូមពលរដ្ឋមានទំនុកចិត្តថា គណៈកម្មការគ្រប់គ្រងមូលនិធិប្រេងឥន្ធនៈនឹងរក្សាតម្លៃប្រេងឥន្ធនៈឱ្យសមរម្យសម្រាប់ពលរដ្ឋ ពីព្រោះយើងធ្វើការនៅក្រោមគោលការណ៍ «បើកចំហ, តម្លាភាព និងអាចត្រួតពិនិត្យបាន» សម្រាប់ជាប្រយោជន៍ដល់ពលរដ្ឋ និងគ្រប់វិស័យ ។ នេះបើតាមការលើកឡើងរបស់លោក Phiraphan ។

គួរបញ្ជាក់ថា ប្រទេសថៃតែងតែបញ្ចុះតម្លៃប្រេងឥន្ធនៈជាបន្តបន្ទាប់ ជាពិសេស ក្នុងថ្ងៃបុណ្យទានធំៗ ដើម្បីជួយសម្រាលបន្ទុកការចំណាយរបស់ពលរដ្ឋ ដែលត្រូវធ្វើដំណើរទៅស្រុកកំណើត ។ វាក៏ជាការជួយជំរុញសេដ្ឋកិច្ចថៃផងដែរ ដើម្បីឱ្យពលរដ្ឋធ្វើដំណើរទៅបណ្តាខេត្តកាន់តែច្រើន ហើយចំណាយប្រាក់ទិញចំណីអាហារ និងទំនិញតាមផ្លូវ ។ ជំហ៊ានបន្ទាប់ ក្រសួងថាមពលនឹងទប់ស្កាត់តម្លៃហ្គាសកុំឱ្យឡើងថ្លៃ គឺធុងហ្គាសទម្ងន់១៥គីឡូក្រាម នឹងរក្សាតម្លៃត្រឹមតែ៤២៣បាត (ឬប្រមាណ៤ម៉ឺន៨ពាន់រៀល) ៕

ប្រទេសចិន ៖ កាលពីថ្ងៃទី២៤ ខែមីនា ឆ្នាំ២០២៥ សារព័ត៌មានបរទេសរាយការណ៍ថា រដ្ឋាភិបាលចិនបានហាមពលរដ្ឋបង្ហោះអួ.តទ្រព្យសម្បត្តិហូរហៀរក្នុងបណ្តាញសង្គម និងបិទគណនី Influencer ជាង៤ពាន់នាក់ ដោយសារបង្ហាញពីទ្រព្យសម្បត្តិ និងការរស់នៅហ៊ឺហារលើគំនរមាសប្រាក់ក្នុងបណ្តាញសង្គម ។ ការហាមឃាត់ពលរដ្ឋរបស់រដ្ឋាភិបាលចិន គឺក្នុងគោលបំណងកាត់បន្ថយគម្លាតសង្គម និងគម្លាតប្រាក់ចំណូលពលរដ្ឋ ។

សារព័ត៌មាន South China Morning រាយការណ៍ថា កន្លងមក រដ្ឋាភិបាលចិនបានបិទគណនី Influencer ឬបុគ្គលល្បីល្បាញក្នុងបណ្តាញសង្គមចំ នួន៣នាក់ ដែលមានអ្នកតាមដានរាប់លាននាក់ ពីព្រោះគណនីទាំងនេះតែងតែបង្កើតមាតិកាអួតទ្រព្យសម្បត្តិសម្បូរបែបរបស់ខ្លួន ។ Influencer ទាំងនេះថែមទាំងបង្ហោះពីជីវិតស៊ីវិល័យ ហ៊ឺហារក្នុងបណ្តាញសង្គម ដូចជា ៖ Weibo, Tencent, Douyin និង Xiaohongshu ។

ការបង្ហោះពីទ្រព្យសម្បត្តិ លុយកាក់ និងមាសប្រាក់ ដើម្បីក្លាយជាតារាល្បី ឬអយដលក្នុងបណ្តាញសង្គមនឹងត្រូវបញ្ចប់ ក្រោយពីរដ្ឋាភិបាលចិនបញ្ជាឱ្យបិទបណ្តាញសង្គមទាំងអស់របស់ Influencer ទាំង៣រូប ព្រមទាំងហាមឃាត់ការប្រើប្រាស់បណ្តាញសង្គម ។ លើសពីនេះ គណនីបណ្តាញសង្គមរបស់ Influencer ចិនជាច្រើននាក់ទៀតត្រូវបានបិទចោលទាំងអស់ ដោយសារពួកគេបង្ហោះរូបភាពពីជីវិតរស់នៅលើគំនរមាសប្រាក់ ។

រដ្ឋាភិបាលចិនបានចេញវិធានការគ្រប់គ្រងការបង្ហោះទ្រព្យសម្បត្តិក្នុងបណ្តាញសង្គម គឺក្នុងគោលបំណងកាត់បន្ថយគម្លាតសង្គម និងគម្លាតប្រាក់ចំណូល ។ វិធានការនេះពុំបានបញ្ជាក់ថា «ហាមពលរដ្ឋអួតទ្រព្យសម្បត្តិ» ទេ ប៉ុន្តែវាជាការគ្រប់គ្រងយ៉ាងតឹងរ៉ឹងលើការបង្ហោះខ្លឹមសារពុំសមរម្យក្នុងបណ្តាញសង្គមនានា ដូចជា ៖ Weibo, Douyin និង Xiaohongshu ។

បច្ចុប្បន្ន រដ្ឋាភិបាលចិនបានលុបចោលការបង្ហោះអួតទ្រព្យសម្បត្តិ និងបង្ហោះខ្លឹមសារពុំសមរម្យ រហូតដល់ជាង៦ម៉ឺនមាតិកា, បិទការផ្សាយផ្ទាល់ ១,១៧៤លើក និងបិទគណនី Influencer ជាង៤ពាន់នាក់ ។ រីឯកម្មវិធី Weibo បានលុបចោលការបង្ហោះខ្លឹមសារពុំសមរម្យ រហូតដល់ជាង១,១០០មាតិកា ខណៈកម្មវិធី Douyin និង Xiaohongshu ក៏បានលុបចោលការបង្ហោះខ្លឹមសារពុំសមរម្យជាច្រើន និងលុបគណនីអ្នកប្រើប្រាស់ផងដែរ ៕

ប្រទេសថៃ ៖ កាលពីថ្ងៃទី២១ ខែមីនា ឆ្នាំ២០២៥ សារព័ត៌មានថៃរាយការណ៍ថា នាយកដ្ឋានពន្ធដារប្រទេសថៃបារម្ភពីក្រុមយុវជនដែលប្រកបមុខរបរជា Influencer និងលក់ផលិតផលអនឡាញ ប្រឈមមុខនឹងការផាកពិន័យខ្ពស់ពីរដ្ឋ ដោយសារតាមការពិនិត្យមើលឯកសារការបង់ពន្ធឃើញថា ក្រុមយុវជនជាច្រើននាក់ដែលទទួលបានប្រាក់ចំណូលខ្ពស់ស្របតាមការកំណត់ ប៉ុន្តែពុំព្រមបង់ពន្ធប្រាក់ចំណូលជូនរដ្ឋ ។

នាយកដ្ឋានពន្ធដារថៃបានកំណត់ឱ្យពលរដ្ឋដែលទទួលបានប្រាក់ចំណូលពីការប្រកបមុខរបរទាំងអស់ ត្រូវមកបង់ពន្ធប្រាក់ចំណូលជូនរដ្ឋ ចាប់ពីថ្ងៃទី២១ ខែមីនា រហូតដល់ថ្ងៃទី៣១ ខែមីនា ឆ្នាំ២០២៥ ប៉ុន្តែបើពលរដ្ឋបង់ពន្ធប្រាក់ចំណូលតាមអនឡាញ គឺអាចបង់រហូតដល់ថ្ងៃទី៨ ខែមេសា ឆ្នាំ២០២៥ ។

លោក ពីនសាយ ស៊ូរ៉ាត់សាវ៉ាឌី ប្រធាននាយកដ្ឋានពន្ធដារនិយាយថា បច្ចុប្បន្ន ការប្រមូលពន្ធប្រាក់ចំណូលពីពលរដ្ឋធម្មតា គឺជាប្រាក់ចំណូលលំដាប់ទី៣ របស់នាយកដ្ឋានពន្ធដារ ។ នាយកដ្ឋានពន្ធដារបានប្រមូលពន្ធប្រាក់ចំណូលពលរដ្ឋ ស្មើប្រមាណ៤សែនលានបាតក្នុង១ឆ្នាំ ហើយនៅឆ្នាំ២០២៥ នាយកដ្ឋានពន្ធដារបានប្រមូលពន្ធប្រាក់ចំណូលពលរដ្ឋ ជិត៣ខែហើយ ។

តាមទិន្នន័យគិតត្រឹមថ្ងៃទី១៣ ខែមីនា ឆ្នាំ២០២៥ ពលរដ្ឋថៃបានបង់ពន្ធប្រាក់ចំណូល ស្មើនឹង៧លាន៤សែនបាត និងខ្ពស់ជាងឆ្នាំ២០២៤ ១៣% ដែលស្មើត្រឹមតែ៣លាន៥សែនបាត ។ បច្ចុប្បន្ន នាយកដ្ឋានពន្ធដារបានទទួលការបង់ពន្ធប្រាក់ចំណូលពលរដ្ឋ ស្មើនឹង៨២% ហើយពលរដ្ឋ១៨% ទៀត ពុំទាន់បង់ពន្ធប្រាក់ចំណូល ដោយសារមានបញ្ហាឯកសារ ព្រោះពួកគេមានប្រាក់ចំណូលផ្សេងទៀតក្រៅពីការងារ ។ នាយកដ្ឋានពន្ធដារសង្ឃឹមថា ពលរដ្ឋនឹងមកបង់ពន្ធប្រាក់ចំណូលបន្តទៀត ។

លោក ពីនសាយ បន្តថា ពលរដ្ឋជាអ្នកធ្វើការបានបង់ពន្ធប្រាក់ចំណូលរបស់ខ្លួនធម្មតា និងគ្មានអ្វីគួរឱ្យបារម្ភទេ ប៉ុន្តែអ្វីគួរឱ្យបារម្ភ គឺក្រុមយុវជនដែលមានប្រាក់ចំណូលខ្ពស់ស្របតាមការកំណត់ ពុំបង់ពន្ធជូនរដ្ឋ ។ តាមទិន្នន័យកាលពី៣ឆ្នាំកន្លងមក បង្ហាញថា ពលរដ្ឋពុំបង់ពន្ធប្រាក់ចំណូល គឺជាក្រុមយុវជនដែលធ្វើការពាក់ព័ន្ធនឹងឌីជីថល ដូចជា ៖ អ្នកលក់ផលិតផលអនឡាញ និង Influencer ។ ហេតុនេះ មន្ត្រីនាយកដ្ឋានពន្ធដារបានពិភាក្សាគ្នាផ្តល់ភាពសំខាន់លើការបង់ពន្ធប្រាក់ចំណូលរបស់ក្រុមយុវជន ។

តាមការពិនិត្យមើលក្នុងបណ្តាញសង្គម គឺយុវជនថៃជាច្រើនបានប្រកបមុខរបរជា Influencer និងលក់ផលិតផលអនឡាញ ហើយលោក ពីនសាយ ក៏បានស្រង់ឈ្មោះក្រុមយុវជនមកឱ្យមន្ត្រីពន្ធដារពិនិត្យមើលក្នុងឯកសារ ព្រោះចង់ដឹងថា តើពួកគេបានបង់ពន្ធប្រាក់ចំណូលឬនៅ? ប៉ុន្តែតាមការពិនិត្យឃើញថា ពួកគេពុំបានបង់ពន្ធប្រាក់ចំណូលទេ តាំងពី៣ឆ្នាំ-៤ឆ្នាំមុន មកម្ល៉េះ ។ នាយកដ្ឋានពន្ធដារមានអំណាចឱ្យយុវជនបង់ពន្ធប្រាក់ចំណូលកាលពី២ឆ្នាំកន្លងមក ហើយនាយកដ្ឋានពន្ធដារមានសិទ្ធិពិនិត្យឯកសារបង់ពន្ធរបស់យុវជន កាលពី៥ឆ្នាំមុន ។

បើនាយកដ្ឋានពន្ធដារពិនិត្យឃើញថា យុវជនដែលមានប្រាក់ចំណូលខ្ពស់ស្មើនឹងការកំណត់របស់រដ្ឋ ប៉ុន្តែពុំព្រមបង់ពន្ធ គឺពួកគេនឹងតម្រូវឱ្យបង់ពន្ធប្រាក់ចំណូល ព្រមទាំងបង់ប្រាក់ការផាកពិន័យ ។ ឧទាហរណ៍ ៖ បើយុវជនម្នាក់លក់ផលិតផលអនឡាញ ឬជា Influencer ត្រូវបង់ពន្ធចំនួន១ម៉ឺនបាត គឺនាយកដ្ឋានពន្ធដារនឹងតម្រូវឱ្យពួកគេបង់រហូតដល់៥ម៉ឺនបាត (រួមទាំងប្រាក់ពិន័យ) នាយកដ្ឋានពន្ធដារពុំចង់ឃើញយុវជនបង់ប្រាក់ពិន័យបែបនេះទេ ៕

ប្រទេសអង់គ្លេស ៖ ក្រុមហ៊ុនបច្ចេកវិទ្យាអង់គ្លេសបានអភិវឌ្ឍន៍បច្ចេកវិទ្យាដ៏ទំនើបសម្រាប់ការផលិតពេជ្រនៅលើអវកាស ហើយក្រុមហ៊ុនសង្ឃឹមថា នឹងអាចផលិតគ្រាប់ពេជ្របរិសុទ្ធ មិនកខ្វក់ និងមានគុណភាពល្អ ទុកប្រើប្រាស់ក្នុងឧស្សាហកម្មផ្សេងៗ ។ ក្រៅពីនេះ ពេជ្រដែលផលិតលើអវកាសនឹងអាចបង្កើតជាវត្ថុផ្សេងៗក្នុងលំហរ ដែលអាចប្រើប្រាស់ជាប្រយោជន៍ដល់មនុស្ស នាថ្ងៃអនាគត ។

ពេជ្រ គឺជាវត្ថុរឹងបំផុតលើពិភពលោក ដែលអាចយកទៅប្រើប្រាស់ជាមួយវត្ថុដុសខាត់ និងឧបករណ៍កាត់តម្រឹម រួមទាំងមានប្រយោជន៍សម្រាប់ប្រើប្រាស់ក្នុងការរុករកលើអវកាស ដូចជា ៖ ប្រើជាឧបករណ៍កាត់អាចទប់ទល់នឹងកំដៅខ្លាំងលើអាចម៍ផ្កាយ ។ ហេតុនេះ Space Forge គឺជាក្រុមហ៊ុនស្រាវជ្រាវអវកាសមានគោលដៅបញ្ជូនបន្ទប់ពិសោធន៍ដំបូងទៅកាន់លំហរ ដើម្បីសាកល្បងផលិតគ្រាប់ពេជ្រ ឬដាំពេជ្រលើលំហរគ្មានទម្ងន់ ។ ក្រុមហ៊ុនសង្ឃឹមថា នឹងទទួលបានគ្រាប់ពេជ្របរិសុទ្ធ និងមិនកខ្វក់ដូចពេជ្រលើផែនដី ។

ក្រុមហ៊ុន Space Forge បញ្ជាក់ថា ការផលិតពេជ្រនេះ គឺធ្វើឡើងក្នុងបន្ទប់ពិសោធន៍លើអវកាស ដែលបន្ទប់នេះដើរតួនាទីដូចគ្នានឹងមីក្រូវ៉េវពិសេស ។ ក្រុមហ៊ុននឹងដាក់សារធាតុប្រតិកម្ម២ប្រភេទក្នុងបន្ទប់ពិសោធន៍ រួចហើយ បញ្ចូលអ៊ីដ្រូសែន និងមេតាន ។ បន្ទាប់មក ពេលបើកបន្ទប់សោធន៍ ក្រុមហ៊ុននឹងទទួលបានសារធាតុ Plasma ជាច្រើនក្នុងនោះ ដែលវានឹងជួយឱ្យឧស្ម័ន និងសារធាតុទាំង២ប្រភេទ មានប្រតិកម្មជាមួយគ្នាក្លាយជាស្រទាប់ៗ រហូតបង្កើតជាគ្រាប់ពេជ្រមានគុណភាពល្អ ។

គ្រាប់ពេជ្រមានគុណភាពល្អទាំងនេះ ពុំមែនសម្រាប់ផលិតជាគ្រឿងអលង្ការទេ ប៉ុន្តែក្រុមហ៊ុននឹងយកវាទៅប្រើជាចំហាយកំដៅក្នុងឆ្នាំងសាករថយន្តអគ្គិសនី ឬធ្វើជាឧបករណ៍ពង្រីកសេវាវិទ្យុក្នុងប្រព័ន្ធទូរគមនាគមន៍ និងប្រើប្រាស់ក្នុងឧស្សាហកម្មផ្សេងៗ ។ ប៉ុន្តែក្រុមហ៊ុនប្រឈមនឹងបញ្ហាមួយ តើគួរធ្វើដូចម្តេច ទើបអាចយកគ្រាប់ពេជ្រផលិតនៅអវកាសមកកាន់ផែនដីយ៉ាងមានសុវត្ថិភាព? ក្រុមហ៊ុនបានបង្កើតស្រទាប់ការពារកំដៅបែប Origami ហៅថា «Pridwen» ដែលឈ្មោះនេះ គឺដាក់តាមគ្រឿងសឹករបស់ព្រះមហាក្សត្រអង់គ្លេស ព្រះនាម Arthur ដែលល្បីល្បាញក្នុងប្រវត្តិសាស្ត្រជាវីវៈបុរសសម័យមជ្ឈិម ។

ស្រទាប់ការពារកំដៅនេះនឹងជួយការពារគ្រាប់ពេជ្រដែលផលិតលើអវកាស មិនឱ្យទទួលកំដៅខ្លាំងពេលបញ្ជូនមកផែនដី ។ ជំហានដំបូង គ្រាប់ពេជ្រដែលបានពីអវកាសនឹងត្រូវប្រើប្រាស់នៅមជ្ឈមណ្ឌលបង្ហោះរ៉ុក្កែតនៅអាមេរិក នៅខែមេសា ឆ្នាំ២០២៥ ។ បន្ទាប់មក ក្រុមហ៊ុននឹងបញ្ជូនគ្រាប់ពេជ្រទាំងនេះទៅប្រើប្រាស់ក្នុងឧស្សាហកម្មផលិតវត្ថុផ្សេងៗ នាថ្ងៃអនាគត ៕

ប្រទេសចិន ៖ កាលពីថ្ងៃទី២៤ ខែមីនា ឆ្នាំ២០២៥ មន្ត្រីក្រសួងការពារជាតិរបស់ចិនឱ្យដឹងថា ចិនគ្រោងធ្វើសមយុទ្ធកងទ័ពកណ្តាលសមុទ្រជាមួយថៃ នៅក្បែរទីក្រុងចាងជៀង ខេត្តក្វាងទុង ស្ថិតនៅភាគខាងត្បូងប្រទេសចិន ចាប់ពីចុងខែមីនា រហូតដល់ដើមខែមេសា ឆ្នាំ២០២៥ ។ ការធ្វើសមយុទ្ធកងទ័ពនេះ គឺក្នុងគោលបំណងពង្រឹងសម្ព័ន្ធភាពរវាងកងទ័ពទាំង២ប្រទេស និងការពារការគំរា.មកំហែ.ង ។

នេះជាការហ្វឹកហាត់រួមគ្នារវាងកងទ័ពជើងទឹកទាំង២ប្រទេស ដើម្បីពង្រឹងទំនាក់ទំនងសន្តិសុខ និងការពារការគំរាមកំហែងក្នុងតំបន់អាស៊ីអាគ្នេយ៍ ។ ការធ្វើសមយុទ្ធមានគោលដៅសំខាន់ គឺពង្រឹងកិច្ចសហការរួមគ្នាក្នុងសង្គ្រាមនៅសមុទ្រ និងទប់ស្កាត់ការគំរាមកំហែងនៅសមុទ្រ នាថ្ងៃអនាគត ។

មន្ត្រីក្រសួងការពារជាតិចិនបញ្ជាក់ថា ការធ្វើសមយុទ្ធកងទ័ពនឹងមានការហ្វឹកហាត់ផ្នែកយុទ្ធសាស្ត្រ, ការហ្វឹកហាត់ការពារខ្លួនពីការគំរាមកំហែងដោយសារនាវាមុជទឹក, វិធីការពារខ្លួនពីការវាយប្រហារផ្លូវអាកាស ព្រមទាំងការជួយសង្គ្រោះជីវិតមនុស្សពេលមានអាសន្ន ។

នេះជាការពង្រឹងកិច្ចសហការផ្នែកកងទ័ពរវាងចិន និងថៃ ដែលប្រទេសទាំងពីរមើលឃើញថា សន្តិសុខក្នុងតំបន់ជារឿងសំខាន់ ។ ហេតុនេះ ការធ្វើសមយុទ្ធរួមគ្នានឹងជួយបង្កើនការយល់ដឹងអំពីយុទ្ធសាស្ត្រ និងប្រតិបត្តិការរួមគ្នាក្នុងស្ថានការណ៍ជាក់ស្តែង ។

ម្យ៉ាងទៀត ការធ្វើសមយុទ្ធកងទ័ពមានសារៈសំខាន់ ដើម្បីបង្ហាញឱ្យឃើញពីទំនាក់ទំនងជិតស្និទ្ធរវាងចិន និងថៃ ជាពិសេស ទំនាក់ទំនងកងទ័ព និងការរក្សាសន្តិភាពនៅតំបន់អាស៊ីអាគ្នេយ៍ ។ វាក៏មានសារៈសំខាន់សម្រាប់សេដ្ឋកិច្ច និងពាណិជ្ជកម្មរវាងប្រទេសទាំង២ ផងដែរ ។

វាជាការបើកឱកាសឱ្យកងទ័ពប្រទេសទាំង២ អាចផ្លាស់ប្តូរចំណេះដឹង និងបច្ចេកវិទ្យាផ្នែកកងទ័ពទៅវិញទៅមក ព្រមទាំងពង្រឹងសន្តិសុខក្នុងតំបន់អាស៊ី និងពិភពលោក យ៉ាងមានប្រសិទ្ធភាព ។ នេះជាលើកទី៦ហើយ ដែលកងទ័ពជើងទឹកប្រទេសទាំង២ បានធ្វើសមយុទ្ធរួមគ្នា ៕