អ្នកជំនាញអះអាងថា ដើមឈើក៏ចេះនិយាយគ្នាដែរ ប៉ុន្តែវាចូលចិត្តនិយាយរឿងកុហកពីគ្រោះធម្មជាតិប្រាប់ដើមឈើនៅក្បែរៗ ដើម្បីឱ្យវាមានជីវិតរស់បន្តទៀត ឬនិយាយជាមួយដើមឈើផ្សេង ដូចកីឡាករនិយាយបំបាក់ស្មារតីគ្នានៅទីលានប្រកួត ដូចជា ៖ ចេញទៅ, ផ្លែឈើលើដើមរបស់ខ្ញុំទុំហើយ, ជួយផង និងប្រុងប្រយ័ត្ន ។ ពេលដើមឈើមួយទៀតទទួលដំណឹងពីគ្រោះធម្មជាតិ វានឹងការពារខ្លួនតាមវិធីផ្សេងៗ ។

ការនិយាយឃ្លាទាំងនេះរបស់ដើមឈើ គឺអ្នកជំនាញបានវាស់កម្រិតសំឡេង Ultrasonic ដែលដើមឈើតែងតែនិយាយរកគ្នាពេលកើតហេតុការណ៍ផ្សេងៗ ដូចជា ៖ ពេលពួកវាឈឺចាប់ ។ ដើមឈើទាំងឡាយចូលចិត្តនិយាយរឿងកុហកពីគ្រោះធម្មជាតិប្រាប់គ្នា ហើយពេលដើមឈើមួយទៀតឮថា នឹងមានគ្រោះធម្មជាតិកើតឡើង វានឹងបញ្ចេញសារធាតុពុលការពារដើមរបស់វា ប៉ុន្តែការពិត គ្មានគ្រោះធម្មជាតិកើតឡើងទេ ។

Thomas Scott ជាអ្នកជំនាញផ្នែកការវិវត្តដើមឈើ មកពីសាកលវិទ្យាល័យ Oxford ប្រទេសអង់គ្លេស ដែលបានសរសេរការស្រាវជ្រាវនេះនិយាយថា ៖ «ពេលដើមឈើ១ដើមនិយាយរឿងកុហកប្រាប់ដើមឈើមួយទៀត នឹងធ្វើឱ្យវាទទួលបានប្រយោជន៍ ។ លទ្ធផលការស្រាវជ្រាវបង្ហាញឱ្យឃើញថា ដើមឈើតែងតែនិយាយរឿងមិនពិតប្រាប់គ្នា ច្រើនជាងនិយាយការពិត» ។

ដើមឈើនីមួយៗតែងតែប្រជែងគ្នាដណ្តើមយកពន្លឺព្រះអាទិត្យ និងសារធាតុចិញ្ចឹម ទើបពួកវានិយាយរឿងកុហកប្រាប់គ្នាដើម្បីឱ្យដើមឈើនៅក្បែរៗបាត់បង់ធនធានសម្រាប់ការពារខ្លួនឯង បើទោះជាគ្មានគ្រោះធម្មជាតិកើតឡើងក៏ដោយ ។

តាមទិន្នន័យផ្នែកវិទ្យាសាស្ត្រឱ្យដឹងថា ដើមឈើអាចទំនាក់ទំនងគ្នាបានតាមរយៈមែកធាង និងប្រព័ន្ធឫសនៅក្រោមដី ឈ្មោះថា «Mycorrhizal Network» ។ ប្រព័ន្ធនេះអាចឱ្យដើមឈើ១ដើម ទំនាក់ទំនងជាមួយដើមឈើផ្សេងៗនៅក្នុងព្រៃ ហើយមានដើមឈើធំបំពេញតួនាទីជាទីតាំងកណ្តាលសម្រាប់ឱ្យដើមឈើផ្សេងៗទាក់ទងគ្នា ។

ការស្រាវជ្រាវរបស់ Society for the Protection of Underground Networks (SPUN) បញ្ជាក់យ៉ាងច្បាស់ថា ដើមឈើចាប់ពី៨០% ទៅ៩០% បាននិយាយទាក់ទងគ្នាតាមរយៈ Mycorrhizal Network ។

អ្នកជំនាញអង់គ្លេសបកស្រាយថា ដើមឈើធំមានតួនាទីបញ្ជូនសារធាតុចិញ្ចឹមទៅឱ្យដើមឈើផ្សេងទៀត ដើម្បីឱ្យឆាប់ធំលូតលាស់ និងរឹងមាំ ។ ដើមឈើក្នុងព្រៃសហការគ្នាបែបនេះ ពុំបោះបង់ចោលគ្នា ហើយពួកវាតែងតែនិយាយពីរឿងរ៉ាវទាំងអស់ដែលកើតឡើងក្នុងព្រៃឱ្យដើមឈើផ្សេងដឹង ដោយសារពួកវាមានបណ្តាញ Network ៕

ប្រទេសថៃ ៖ អង្គភាពសម្របសម្រួលមីយ៉ាន់ម៉ាបានទំនាក់ទំនងមកកាន់មជ្ឈមណ្ឌលបញ្ជាការព្រំដែនថៃនៅខេត្តតាក ដើម្បីបញ្ជូនជនរងគ្រោះចំនួន២៦០នាក់ ដែលចាញ់ល្បិ.ចក្រុមឆបោកអនឡាញ និងការជួញដូរមនុស្សនៅខេត្តមៀវឌី ប្រទេសមីយ៉ាន់ម៉ា តាមច្រកដឹកទំនិញនៅឃុំឆងឃេប ស្រុកភពព្រះ ខេត្តតាក ។ បន្ទាប់មក ថៃនឹងទំនាក់ទំនងទៅស្ថានទូតបញ្ជូនជនរងគ្រោះត្រឡប់ទៅប្រទេសកំណើតវិញ ក្នុងចំណោមជនរងគ្រោះទាំងនេះ ក៏មានជនជាតិខ្មែរដែរ ។

ជនរងគ្រោះដែលត្រូវក្រុមឆបោកលួងលោមឱ្យមកធ្វើការនៅប្រទេសមីយ៉ាន់ម៉ា ចំនួន២៦០នាក់ (ប្រុស២២១នាក់ និងស្រី៣៩នាក់) គឺមកពី២០ប្រទេស ត្រូវបានភាគីមីយ៉ាន់ម៉ា និងកងកម្លាំង (Democratic Karen Buddhist Army-DKBA) ប្រគល់ឱ្យភាគីថៃ នៅបរិវេណច្រកដឹកទំនិញក្នុងឃុំឆងឃេប ស្រុកភពព្រះ ខេត្តតាក ។

បន្ទាប់មក មន្ត្រីពាក់ព័ន្ធ និងប៉ូលិសអន្តោប្រវេសន៍ថៃនៅខេត្តតាក បាននាំជនរងគ្រោះទាំងអស់មកត្រួតពិនិត្យឯកសារដើម្បីបញ្ជាក់អត្តសញ្ញាណឃើញថា ជនរងគ្រោះទាំងនេះមកពី២០ប្រទេស រួមមាន ៖ ហ្វីលីពីន, កេនយ៉ា, តង់ហ្សានី, ប្រេស៊ីល, អេត្យូពី, ប៉ាគីស្ថាន, បង់ក្លាដែស, នេប៉ាល់, កម្ពុជា, ស្រីលង្ការ, អ៊ូហ្គង់ដា, តៃវ៉ាន់, ឡាវ, ឥណ្ឌូណេស៊ី, ប៊ូរុនឌី, នីហ្សេរីយ៉ា, កាណា, ឥណ្ឌា, ម៉ាឡេស៊ី និងចិន ។

ក្រោយពីត្រួតពិនិត្យឯកសាររកអត្តសញ្ញាណជនរងគ្រោះទាំងអស់រួចហើយ ភាគីថៃបានទំនាក់ទំនងទៅស្ថានទូតប្រទេសទាំងនេះឱ្យមកទទួលយកជនរងគ្រោះត្រឡប់ទៅប្រទេសកំណើតវិញ ។ នេះជាការបញ្ជូនខ្លួនជនរងគ្រោះចាញ់បោកតាមអនឡាញដំណាក់កាលដំបូង ហើយមីយ៉ាន់ម៉ានឹងបញ្ជូនជនរងគ្រោះចំនួន៧,០០០នាក់ទៀត មកប្រទេសថៃ ។

លោក Phumtham Wechayachai ឧបនាយករដ្ឋមន្ត្រី និងរដ្ឋមន្ត្រីក្រសួងការពារជាតិនិយាយថា ជនរងគ្រោះទាំង២៦០នាក់នេះពុំស្នាក់នៅប្រទេសថៃទេ គឺថៃនឹងទំនាក់ទំនងទៅប្រទេសកំណើតពួកគេដោយផ្ទាល់ឱ្យមកទទួលពលរដ្ឋត្រឡប់ទៅវិញ បើប្រទេសណាមានជនរងគ្រោះច្រើននាក់អាចយកយន្តហោះមកដឹកតែមួយជើង ។ កាលពីរសៀលថ្ងៃទី១២ ខែកុម្ភៈ មីយ៉ាន់ម៉ាផ្តល់ដំណឹងមកថា នឹងបញ្ជូនជនរងគ្រោះមកឱ្យថៃ ចំនួន៧,០០០នាក់ទៀត ។

ការបញ្ជូនជនរងគ្រោះចាញ់បោកតាមអនឡាញមកឱ្យថៃ ក្រោយពីរដ្ឋាភិបាលថៃអនុវត្តវិធានការក្តៅ ដូចជា ៖ កាត់ភ្លើង បណ្តាញអ៊ីនធើរណេត សេវាទូរស័ព្ទ និងប្រេងឥន្ធនៈនៅបរិវេណព្រំដែនប្រទេសជិតខាង ហើយរដ្ឋាភិបាលចិនបានអរគុណថៃ ដែលអនុវត្តវិធានការក្តៅបំបែកទីតាំងក្រុមឆបោកអនឡាញ ៕

មនុស្សនៅទូទាំងពិភពលោកចាត់ទុកថា ១៤ កុម្ភៈ គឺជាថ្ងៃក្តីស្រឡាញ់ ហើយថ្ងៃនេះ គេនឹងនឹកឃើញដល់ផ្កាកុលាប ដែលតែងតែនៅក្នុងដៃរបស់គូស្នេហ៍គ្រប់ទីកន្លែង ។ កុលាប គឺជាផ្កាដ៏ស្រស់ស្អាតបំផុត និងពុំអាចខ្វះបានក្នុងថ្ងៃក្តីស្រឡាញ់ ប៉ុន្តែចំនួនផ្កាកុលាបដែលប្រគល់ឱ្យមនុស្សពិសេសក្នុងថ្ងៃនេះ ឬថ្ងៃពិសេសផ្សេងៗ មិនមែនគ្រាន់តែបង្ហាញពីភាពស្រស់ស្អាតប៉ុណ្ណោះទេ ប៉ុន្តែវាបង្កប់នូវអត្ថន័យជ្រាលជ្រៅ និងបង្ហាញពីអារម្មណ៍ផ្សេងៗ ។

ហេតុនេះ មុនពេលប្រគល់ផ្កាកុលាបឱ្យអ្នកណាម្នាក់ គួរតែគិតពីអត្ថន័យចំនួនផ្កា និងពណ៌របស់វា ដើម្បីបង្ហាញពីអារម្មណ៍របស់យើងទៅអ្នកទទួល ។ ខាងក្រោមនេះ គឺជាអត្ថន័យរបស់ចំនួនផ្កាកុលាប ៖

-ផ្កា១ទង ៖ បង្ហាញពីស្នេហ៍គ្រាដំបូង និងការលះបង់
-ផ្កា២ទង ៖ សេចក្តីស្នេហាប្រគល់ឱ្យគ្នាទៅវិញទៅមកជារៀងរហូត
-ផ្កា៣ទង ៖ ខ្ញុំស្រឡាញ់អ្នក
-ផ្កា៤ទង ៖ គ្មានអ្វីអាចបំបែកយើងទាំងពីរឱ្យឃ្លាតឆ្ងាយពីគ្នា
-ផ្កា៥ទង ៖ អារម្មណ៍ចំពោះមនុស្សពិសេស គឺលើសអ្វីៗទាំងអស់
-ផ្កា៦ទង ៖ ខ្ញុំត្រូវការក្លាយជាមនុស្សពិសេសរបស់អ្នក
-ផ្កា៧ទង ៖ ខ្ញុំលង់ស្នេហ៍អ្នកហើយ
-ផ្កា៨ទង ៖ ខ្ញុំនឹងស្ថិតនៅក្បែរ និងផ្តល់កម្លាំងចិត្តឱ្យអ្នកជានិច្ច
-ផ្កា៩ទង ៖ ស្នេហាអមរតៈ
-ផ្កា១០ទង ៖ អ្នកជាមនុស្សល្អឥតខ្ចោះ
-ផ្កា១១ទង ៖ ខ្ញុំស្រឡាញ់អ្នកខ្លាំងណាស់
-ផ្កា១២ទង ៖ សូមឱ្យអ្នកជារបស់ខ្ញុំតែម្នាក់គត់
-ផ្កា១៣ទង ៖ ស្នេហាអាថ៌កំបាំង ឬស្នេហាពុំបើកចំហ
-ផ្កា១៥ទង ៖ ខ្ញុំសូមទោស
-ផ្កា២០ទង ៖ ភាពស្មោះត្រង់
-ផ្កា២១ទង ៖ ខ្ញុំសូមសន្យាជាមួយអ្នក
-ផ្កា២៤ទង ៖ ខ្ញុំនឹកអ្នកគ្រប់ពេលវេលា
-ផ្កា២៥ទង ៖ សូមចូលរួមត្រេកអរផង
-ផ្កា៣០ទង ៖ ខ្ញុំជឿជាក់លើសេចក្តីស្នេហារបស់យើង
-ផ្កា៣៦ទង ៖ ការចងចាំដ៏សែនស្រស់ស្អាត
-ផ្កា៤០ទង ៖ ស្នេហាពិត
-ផ្កា៥០ទង ៖ ស្រឡាញ់ដោយគ្មានលក្ខខណ្ឌ
-ផ្កា៩៩ទង ៖ ស្រឡាញ់ជារៀងរហូត
-ផ្កា១០០ទង ៖ ស្រឡាញ់អស់ពីចិត្តពីថ្លើម
-ផ្កា១០១ទង ៖ ស្រឡាញ់អ្នកតែម្នាក់គត់
-ផ្កា១០៨ទង ៖ សូមរៀបការជាមួយអ្នក
-ផ្កា៣៦៥ទង ៖ ស្រឡាញ់អ្នករាល់ថ្ងៃ និង
-ផ្កា៩៩៩ទង ៖ ស្រឡាញ់អស់មួយជីវិត ។

សរុបមក អត្ថន័យចំនួនផ្កាកុលាប គឺគ្រាន់តែជាជំនឿដែលគេនិយមប្រើប្រាស់ជាទូទៅ វាអាចមានភាពខុសគ្នាទៅតាមវប្បធម៌ប្រទេសនីមួយៗ ។ ក្រៅពីចំនួនផ្កាកុលាប ពណ៌ផ្កាកុលាប ក៏មានអត្ថន័យខុសៗគ្នាដែរ ហើយការជ្រើសរើសចំនួន និងពណ៌ផ្កាកុលាប គួរតែគិតពីអារម្មណ៍ និងអត្ថន័យដែលយើងត្រូវការបង្ហាញទៅអ្នកទទួល ៕

ប្រទេសប្រេស៊ីល ៖ នាដើមខែកុម្ភៈ ឆ្នាំ២០២៥ ប្រធានាធិបតីប្រេស៊ីល លោក Lula da Silva ថ្លែងថា លោក Donald Trump ត្រូវបានពលរដ្ឋបោះឆ្នោតជ្រើសរើសជាអ្នកគ្រប់គ្រងសហរដ្ឋអាមេរិក មិនមែនឱ្យលោកគ្រប់គ្រងពិភពលោកទេ ។

ពេលផ្តល់សម្ភាសន៍ជាមួយវិទ្យុចំនួន២ នៅខេត្តបាហៀ ស្ថិតនៅភាគឦសានប្រទេសប្រេស៊ីល កាលពីថ្ងៃទី៦ ខែកុម្ភៈ កន្លងមក លោក Silva ថ្លែងថា លោកគោរពតាមលទ្ធផលការបោះឆ្នោត ហើយលោក Trump ត្រូវបានពលរដ្ឋបោះឆ្នោតឱ្យធ្វើជាប្រធានាធិបតីគ្រប់គ្រងសហរដ្ឋអាមេរិក ។ ប៉ុន្តែពលរដ្ឋពុំបានបោះឆ្នោតឱ្យលោក Trump ក្លាយជាអ្នកគ្រប់គ្រងពិភពលោកទេ ។

ប្រធានាធិបតីប្រេស៊ីល លោក Silva បានថ្លែងពីករណីលោក Trump តាំងចិត្តបណ្តេញពលរដ្ឋប៉ាឡេស្ទីនចេញពីតំបន់ Gaza ថា ប្រធានាធិបតីអាមេរិកចាំបាច់ត្រូវតែរក្សាទំនាក់ទំនងប្រជាធិបតេយ្យ និងអរិយធម៌ជាមួយប្រទេសផ្សេងៗនៅលើពិភពលោក ។

កាលពីថ្ងៃទី៤ ខែកុម្ភៈ កន្លងមក លោក Trump បានថ្លែងថា អាមេរិកនឹងគ្រប់គ្រងតំបន់ Gaza ហើយអាមេរិកនឹងអភិវឌ្ឍន៍តំបន់នេះ ក្រោយការជម្លៀសពលរដ្ឋប៉ាឡេស្ទីនទៅរស់នៅកន្លែងផ្សេង ។ ក្រោយពីលោក Trump ថ្លែងបែបនេះ លោក Silva រិះគន់ថា អាមេរិកតាំងខ្លួនជាប្រទេសគោរពប្រជាធិបតេយ្យ ប៉ុន្តែបែរជាចង់គ្រង់គ្រងប្រទេស និងទឹកដីមួយចំនួន នេះបញ្ជាក់ថា អាមេរិកចង់បង្កើតសង្គ្រាម ។

គួរបញ្ជាក់ថា គម្រោងកាន់កាប់តំបន់ Gaza បានធ្វើឱ្យប្រទេសនានារិះគន់លោក Trump យ៉ាងខ្លាំង ប៉ុន្តែលោក Trump អះអាងថា មេដឹកនាំអ៊ីស្រាអែល លោក Benjamin Netanyahu រីករាយធ្វើតាមគម្រោងរបស់លោក គឺបណ្តេញពលរដ្ឋប៉ាឡេស្ទីនជាង២លាននាក់ ទៅរស់នៅកន្លែងផ្សេងដើម្បីអភិវឌ្ឍន៍តំបន់នេះ ៕