សាធារណជនអ្នកប្រើប្រាស់បណ្តាញសង្គមបានសម្តែងការកោតសរសើរយ៉ាងខ្លាំងចំពោះពាក្យសម្តីអង់អាចក្លាហានរបស់ ឧត្តមសេនីយ៍ត្រី នាក់ វង្ស មេបញ្ជការកងពលតូចថ្មើរជើងលេខ៤២ ដែលលោកបាននិយាយដាក់កងកម្លាំងទាហានក្រោមឱវាទថា« បា.ញ់គ្នាបា.ញ់…កុំខ្លាច »។

ថ្មីៗនេះប្រព័ន្ធផ្សព្វផ្សាយថៃបានចុះផ្សាយព្រោងព្រាតពីវីដេអូមួយដែលមានប្រជាពលរដ្ឋខ្មែរនិងទាហានច្រៀងចម្រៀងជាតិនៅបរិវេណប្រាសាទតាមាន់ធំ ហើយខាងប្រទេសថៃកើតទុក្ខមិនសុខចិត្តថានឹងដាក់លិខិតតវ៉ា។ នៅលើបណ្តាញសង្គមខ្មែរវិញ មានវីដេអូមួយត្រូវបានចែករំលែកយ៉ាងទូលំទូលាយនិងត្រូវបានសាធារណជនកោតសរសើរមិនដាច់ពីមាត់ពីសម្តីមោះមុតរបស់មេទ័ពកម្ពុជាក្នុងការការពារទឹកដី។

តាមរយៈវីដេអូត្រូវបានគេដឹងថានោះជាសម្តីរបស់ ឧត្តមសេនីយ៍ត្រី នាក់ វង្ស មេបញ្ជការកងពលតូចថ្មើរជើងលេខ៤២ ដែលបាននិយាយប្រាប់ទៅកូនទាហានថា «ថ្ងៃក្រោយឃើញថៃមកឈរនៅហ្នឹងក៏មិនឱ្យឈរដូចគ្នាថៃមកមើលហាម មិនឱ្យចុះមក មិនឱ្យច្រៀងតម្រងជួរអីទាំងអស់ បា.ញ់ ! បា.ញ់ គ្នា បា.ញ់ កុំខ្លាច… »។ ការចុះត្រួតពិនិត្យតំបន់ប្រាសាទតាមាន់ធំនិងសម្តីខាងលើនេះរបស់ ឧត្តមសេនីយ៍ត្រី នាក់ វង្ស ត្រូវបានប្រជាពលរដ្ឋចែករំលែកព្រោងព្រាតនិងបានពោលកោតសរសើរយ៉ាងខ្លាំង។

កាលពីថ្ងៃទី១៣ ខែកុម្ភៈ ឆ្នាំ២០២៥ នៅបរិវេណប្រាសាទតាមាន់ធំទាហាន និងពលរដ្ឋខ្មែរមួយក្រុមច្រៀងបទចម្រៀងជាតិនៅបរិវេណប្រាសាទតាមាន់ធំ ស្ថិតលើភ្នំដងរ៉ែក ឃុំគោកមន ស្រុកបន្ទាយអំពិល ខេត្តឧត្តរមានជ័យ ជាប់ព្រំដែនខេត្តសុរិន្ទ ត្រូវបានភាគីថៃបង្ហាញអារម្មណ៍មិនសប្បាយចិត្ត៕

នាពេលថ្មីៗនេះ ក្រសួងវប្បធម៌ និងវិចិត្រសិល្បៈ បានរៀបចំសិក្ខាសាលាស្ដីពី ការប្រមូលធាតុចូលរៀបចំឯកសារដាក់ “មហាសង្រ្កាន្ត” ចុះក្នុងបញ្ជីបេតិកភណ្ឌវប្បធម៌អរូបី នៃមនុស្សជាតិរបស់អង្គការយូណេស្កូ។

សិក្ខាសាលានេះ មានគោលបំណងប្រមូលផ្តុំអ្នកជំនាញ និងសហគមន៍ ដើម្បីពង្រឹងដំណើរការរៀបចំឯកសារ”មហាសង្រ្កាន្ត”ដែលជាពិធីបុណ្យប្រពៃណីជាតិដ៏សំខាន់របស់ខ្មែរ ដើម្បីត្រូវបានទទួលស្គាល់ជាផ្នែកមួយនៃបេតិកភណ្ឌវប្បធម៌អរូបី។

មហាសង្ក្រាន្តខ្មែរ ដែលប្រារព្ធឡើងក្នុងឱកាសបុណ្យចូលឆ្នាំថ្មីប្រពៃណីជាតិខ្មែរ គឺជាព្រឹត្តិការណ៍ដ៏សំខាន់ បង្ហាញពីទំនៀមទម្លាប់វប្បធម៌ដ៏សម្បូរបែបរបស់ប្រទេសកម្ពុជា ដែលមានបន្សល់ទុកតាំងពីបុរាណកាល។

តាមរយៈការទទួលស្គាល់ពីអង្គការយូណេស្កូ កម្ពុជាសង្ឃឹមថា “មហាសង្រ្កាន្ត” នឹងជួយលើកកម្ពស់បេតិកភណ្ឌវប្បធម៌របស់ខ្លួននៅលើឆាកអន្តរជាតិបន្ថែមទៀត។

គួរបញ្ជាក់ថា នៅពាក់កណ្តាលខែមីនា ឆ្នាំ២០២៥ ក្រសួងនឹងរៀបចំសិក្ខាសាលាម្តងទៀត ដើម្បីសម្រេចយកឈ្មោះផ្លូវការ ក្នុងការដាក់ស្នើចុះបញ្ជី នៅចុងខែមីនាតែម្តង៕

ក្នុងឱកាសយាងសម្ពោធមហាកុដិសម្តេចព្រះសង្ឃរាជ ជួន ណាត, វិទ្យាស្ថានស្រាវជ្រាវ និងអភិរក្សសាស្ត្រាស្លឹករឹតខ្មែរ នៅវត្តឧណ្ណាលោម ព្រះករុណាព្រះបាទសម្តេច ព្រះបរមនាថ នរោត្តម សីហមុនី មានព្រះរាជបន្ទូលថា វត្តអារាមព្រះពុទ្ធសាសនា បានក្លាយទៅជាចលករ មួយដែលមិនអាចកាត់ផ្តាច់ចេញបាន រវាងដំណើរជីវិតប្រជាពលរដ្ឋខ្មែរប្រចាំថ្ងៃ និងការអភិវឌ្ឍសង្គម ជាតិ ដែលមានន័យថាវត្តអារាម និងសង្គមគឺតែមួយ ។

ព្រះករុណាព្រះមហាក្សត្រ ទ្រង់មានព្រះរាជបន្ទូលទៀតថា តាំងពីអតីតកាល រហូតមកដល់បច្ចុប្បន្នកាល វត្តអារាមជួយផ្តល់កន្លែងស្នាក់នៅ បួសរៀន សូត្រចំណេះដឹងទូទៅដល់អ្នកដែលមានការខ្វះខាត។

បើតាមព្រះរាជបន្ទូល ព្រះករុណាព្រះមហាក្សត្រ វត្តអារាមព្រះពុទ្ធសាសនាខ្មែរ មានតួនាទីដ៏ពិសិដ្ឋ៤យ៉ាង ដែលរួមមាន៖

• វត្តអារាមខ្មែរ បានបណ្តុះសីលធម៌ គុណធម៌ ដែលជាផ្នែកមួយនៃពុទ្ធចរិយាសាស្ត្រ
• វត្តអារាមខ្មែរ ជាកន្លែង អប់រំទាំងផ្លូវកាយ ផ្លូវចិត្ត កសាងធនធានមនុស្ស
• វត្តអារាមខ្មែរ ជាឃ្លាំងសម្រាប់រក្សាទុកនូវ មត៌កវប្បធម៌ ប្រពៃណី ចំណេះដឹងដ៏សំបូរបែប
• វត្តអារាមខ្មែរ ជាទីកន្លែងថែរក្សាអត្តសញ្ញាណ ព្រលឹងជាតិ ដ៏សំខាន់តាំងតែពីបរមបុរាណ

កាលពីយប់ថ្ងៃទី១៧ ខែកុម្ភៈ ឆ្នាំ២០២៥ លោកបណ្ឌិត សុខ ទូច ប្រធានរាជបណ្ឌិត្យសភាកម្ពុជា ត្រូវបានកម្លាំងនគរបាលហៅផ្លុំអាល់កុល រហូតកើតជាជម្លោះពាក្យសម្តី ដោយលោកចោទសមត្ថកិច្ចបានស្រែកកំហកប្រើពាក្យមិនសមរម្យថា”ហែងស្អីបានមកបញ្ជាកងកម្លាំង”។

ពាក់ព័ន្ធនឹងករណីនេះ ឯកឧត្តម ឧត្តមសេនីយ៍ឯក ជួន ណារិន្ទ ស្នងការនគរបាលរាជធានីភ្នំពេញ បានអញ្ជើញមន្រ្តីនគរបាលចុះអនុវត្តច្បាប់ចរាចរណ៍គោលដៅខណ្ឌសែនសុខ មកសួរនាំនៅស្នងការដ្ឋាននគរបាលរាជធានីភ្នំពេញ ហើយអញ្ជើញលោក បណ្ឌិតសុខ ទូច ដើម្បីចូលដោះស្រាយបញ្ហាដែលមានការបង្ហោះផ្សព្វផ្សាយតាមបណ្តាញសង្គមដោយចោទប្រកាន់មកលើសមត្ថកិច្ចថាបានប្រើពាក្យមិនសមរម្យចំពោះគាត់។

បើតាមក្រុមការងារព័ត៌តមាន និងប្រតិកម្មរហ័ស នៃស្នងការដ្ឋាននគរបាលរាជធានីភ្នំពេញ បានបកស្រាយថា៖” លោក សុខ ទូច មិនព្រមសហការ ហើយបានប្រើប្រាស់កាយវិការ ពាក្យសំដីមិនសមរម្យតាំងពីពេលចុះពីលើឡានទៅលើនគរបាល”។

តែយ៉ាងណាមិញ ចំពោះការពិតជាក់ស្តែងយ៉ាងណានោះ យើងមានតែរងចាំលទ្ធផលនៃការចូលខ្លួនដោះស្រាយរបស់បណ្ឌិត សុខ ទូច ជាមួយឯកឧត្តម ឧត្តមសេនីយ៍ឯក ជួន ណារិន្ទជាបន្តទៀត៕