កាលពីថ្ងៃទី១៣ ខែកុម្ភៈ កន្លងមក ពលរដ្ឋខ្មែរមួយក្រុមបានមកលេងនៅប្រាសាទតាមាន់ធំ និងច្រៀងចម្រៀងជាតិដើម្បីផ្តល់កម្លាំងចិត្តដល់កងទ័ពខ្មែរដែលឈរជើងនៅប្រាសាទតាមាន់ធំ ស្ថិតលើភ្នំដងរែក ឃុំគោកមន ស្រុកបន្ទាយអំពិល ខេត្តឧត្តរមានជ័យ ជាប់ព្រំដែនខេត្តសុរិន្ទ ប៉ុន្តែត្រូវបានកងទ័ពថៃហាមឃាត់ ហើយអះអាងថា វាជាការច្រៀងចម្រៀងបង្ហាញពីអត្តសញ្ញាណជាតិ និងពុំសមស្របតាមកិច្ចព្រមព្រៀងរវាងប្រទសទាំងពីរ ។

លើសពីនេះ កងទ័ពថៃថែមទាំងហាមឃាត់ពលរដ្ឋខ្មែរច្រៀងចម្រៀងជាតិនៅប្រាសាទតាមាន់ធំជាលើកទី២ ដើម្បីកុំឱ្យប៉ះពាល់ដល់ទំនាក់ទនងល្អ និងស្ថិតភាពនៅតំបន់ព្រំដែន ។ ការច្រៀងចម្រៀងជាតិរបស់ពលរដ្ឋខ្មែរធ្វើឱ្យកងទ័ព និងពលរដ្ឋថៃពុំពេញចិត្តយ៉ាងខ្លាំង ហើយពួកគេតវ៉ាថា ប្រាសាទតាមាន់ធំស្ថិតក្នុងទឹកដីថៃ ពលរដ្ឋខ្មែរគ្មានសិទ្ធិច្រៀងចម្រៀងជាតិទេ គឺមានសិទ្ធិត្រឹមតែមកដើរលេងទស្សនាប្រាសាទ និងថ្វាយបង្គំវត្ថុស័ក្តិសិទ្ធិប៉ុណ្ណោះ ។

ក្រោយពីកើតហេតុការណ៍កងទ័ពថៃហាមឃាត់ពលរដ្ឋខ្មែរច្រៀងចម្រៀងជាតិនៅប្រាសាទតាមាន់ធំ មហាជនខ្មែរបានកោតសរសើរយ៉ាងខ្លាំងក្នុងបណ្តាញសង្គមចំពោះភាពក្លាហានរបស់មេទ័ព និងកងទ័ពខ្មែរទាំងអស់ដែលឈរជើងនៅប្រាសាទតាមាន់ធំ ។

តាមហ្វេសប៊ុកផេករបស់រដ្ឋបាលខេត្តឧត្តរមានជ័យឱ្យដឹងថា កាលពីរសៀលថ្ងៃទី១៨ ខែកុម្ភៈ ឆ្នាំ២០២៥ ឯកឧត្ដម មាន ចាន់យ៉ាដា អភិបាលខេត្តឧត្តរមានជ័យ បានដឹកនាំមន្ត្រីអង្គភាពពាក់ព័ន្ធចុះសួរសុខទុក្ខកងកម្លាំងប្រដាប់អាវុធឈរជើងលើជួរភ្នំដងរែក និងត្រួតពិនិត្យសមិទ្ធផលតាមបន្ទាត់ព្រំដែនកម្ពុជា-ថៃ នៅតំបន់ប្រាសាទតាមាន់ធំ ស្ថិតក្នុងភូមិតាមាន់សែនជ័យ ឃុំគោកមន ស្រុកបន្ទាយអំពិល ខេត្តឧត្តរមានជ័យ ។

ឯកឧត្តមបានផ្តាំផ្ញើសាកសួរសុខទុក្ខដោយក្តីនឹករលឹកពីសម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃព្រះរាជាណាចក្រកម្ពុជា និងលោកជំទាវបណ្ឌិត ដែលសម្ដេចតែងតែគិតគូរយកចិត្តទុកដាក់ជានិច្ចពីសុខទុក្ខ និងជីវភាពរស់នៅរបស់កងកម្លាំងប្រដាប់អាវុធ ជាពិសេស កងកម្លាំងប្រដាប់អាវុធកំពុងឈរជើងការពារតាមបន្ទាត់ព្រំដែនកម្ពុជា-ថៃ ។

ឯកឧត្ដមក៏បានកោតសរសើរ និងដឹងគុណដល់បងប្អូនកងទ័ព នាយទាហាន ពលទាហានទាំងអស់ ដែលបានលះបង់កម្លាំងកាយ-ចិត្ត ហ៊ានពលីអាយុជីវិត ចូលរួមក្នុងសមរភូមិ ដើម្បីការពារជាតិ អធិបតេយ្យភាព បូរណភាពទឹកដី និងនាំមកនូវសុខសន្តិភាព ស្ថិរភាព ។ ឯកឧត្តមអភិបាលខេត្ត ក៏បានអញ្ជើញត្រួតពិនិត្យសមិទ្ធផលនានា ជាពិសេស អាងស្តុបទឹកមួយកន្លែងដែលបានសាងសង់រួចរាល់សម្រាប់ឱ្យកងកម្លាំង និងពលរដ្ឋនៅទីនោះប្រើប្រាស់ ។

ឯកឧត្តមមានប្រសាសន៍ថា នៅតំបន់ប្រាសាទតាមាន់ មានសភាពការណ៍ប្រក្រតីជាធម្មតា សូមអញ្ជើញបងប្អូនមកទស្សនាជាក់ស្តែងប្រាសាទបុរាណកេរ្តិ៍តំណែលដូនតាយើង ។

នេះមិនមែនជាលើកទីមួយទេ ដែលឯកឧត្ដមអភិបាលខេត្តបានអញ្ជើញចុះសួរសុខទុក្ខកងកម្លាំងនៅតាមបណ្ដោយព្រំដែន កន្លងមក ឯកឧត្ដមតែងតែចុះសួរសុខទុក្ខជាញឹកញាប់ជាមួយកងកម្លាំង ដើម្បីផ្សារភ្ជាប់នូវក្ដីនឹករលឹក ព្រមទាំងគាំទ្ររវាងសមរភូមិមុខ និងសមរភូមិក្រោយ ៕

ថ្មីៗនេះប្រិយមិត្តតាមដានវិស័យបវរកញ្ញាជ្រាបមកហើយជុំវិញស្ថាបនិក MGI ចំណាយលុយរាប់លានទិញសិទ្ធិរៀបចំកម្មវិធីប្រកួតបវរកញ្ញចក្រវាលថៃដែលធ្វើឱ្យមានការជជែកវែកញែកមិនធម្មតាក្នុងប្រទេសកម្ពុជា។ ស្របពេលដែលរឿងនេះកំពុងតែមានអ្នកតាមដានយកចិត្តទុកដាក់ច្រើនកញ្ញា ខាត់ ស្រីច័ន្ទ បានលើកឡើងថាបវរកញ្ញាក្នុងស្រុកមិនសូវមានសន្ទុះគាំទ្រនោះទេ ប៉ុន្តែបវរកញ្ញាគេវិញយកមកវិភាគចេះចុះ។

នៅយប់ថ្ងៃទី១៨ កុម្ភៈ កញ្ញា ខាត់ ស្រីច័ន្ទ បានចេញវីដេអូមួយរយៈពេលជាង២នាទី នៅលើបណ្តាញសង្គមរបស់ខ្លួនដោយបានដាក់ចំណងជើងថា «ស្បថនិយាយតែ១០%ទេខ្លាចគេជេរ»។ ក្នុងវីដេអូនេះដែរអ្នកគ្រប់គ្រងកម្មវិធី Miss Mera Cambodia បាននិយាយថា សង្គមសព្វថ្ងៃមិនសូវខ្វាយខ្វល់បញ្ហារបស់ខ្លួនឯងតែចូលចិត្តខ្វល់ខ្វាយពីបញ្ហារបស់អ្នកដទៃ ដោះស្រាយបញ្ហារបស់អ្នកដទៃ។

ខាត់ ស្រីច័ន្ទ ក៏បាននិយាយពីបញ្ហាបវរកញ្ញាដែលកើតឡើងថ្មីៗនេះជាដើមរឿងបវរកញ្ញាក្នុងស្រុកមិនសូវមានសន្ទុះគាំទ្រខ្លាំងទេ មិនសូវមានអ្នកខ្វល់ខ្វាយតែបើរឿងគេវិញវិភាគចេះវិភាគចុះ។ ក្នុងនោះអ្នកគ្រប់គ្រងកម្មវិធីបវរកញ្ញាក្នុងស្រុករូបនេះបានឱ្យយោបល់ថា យើងមើលគេប៉ុន្តែមិនបាច់និយាយ បើមើលហើយមានកន្លែងណាដែលល្អ ដើរទៅមុខជាងយើង ងាកមកខំប្រឹងតស៊ូគាំទ្រនៅក្នុងស្រុកឱ្យដើរទៅមុខ។ កញ្ញា បានលើកឡើងទៀតថា បើយើងអង្គុយមើលគេហើយយើងគិតថាល្អជាងគេយើងអង្គុយគងទាក់ខ្លាហើយញញឹម មិនចាំបាច់ភ័យនោះទេព្រោះយើងល្អជាង ប៉ុន្តែបើយើងមិនទាន់ដល់គេ ឬនៅមានកម្រិត ឬកុំរវល់តែម្តង មើលខ្លួនឯងឱ្យតែល្អ អភិវឌ្ឍន៍ខ្លួនឯងកុំទៅគិតគូររឿងគេច្រើន។

ខាត់ ស្រីច័ន្ទ បានបន្ថែមដោយលើកជាឧទាហរណ៍ទៀតថា បើសិនជាអ្នកស្អប់នាង តែដឹងពីជីវិតនាងគ្រប់បែបយ៉ាងនាងមានមោទនភាពទៅវិញទេដោយសារតែនាងដឹងថាម្នាក់ហ្នឹងកំពុងតែតាមដាន កំពុងច្រណែន មានអីដែលមិនដល់នាងហើយបានជាតាមដានហើយម្នាក់នោះឈឺចាប់ទោម្នេញនូវអ្វីដែលនាងបានធ្វើ ប៉ុន្តែបើគេមិនខ្វល់សោះពីអ្វីដែលនាងបានធ្វើ នោះមានន័យថានាងប្រហែលជាអស់តម្លៃក្នុងកែវភ្នែកគេហើយ។

ក្នុងនោះដែរ ខាត់ ស្រីច័ន្ទ ចង់ឱ្យអ្នកតាមដានវិស័យបវរកញ្ញាធ្វើមិចឱ្យគេមើលមកដឹងថាគេលែងមានតម្លៃនៅក្នុងកែវភ្នែកយើង ទោះបីជាយើងរបៀបថាកំពុងចង់ប្រកួតប្រជែងជាមួយគេក៏ដោយយើងនៅឱ្យស្ងៀមធ្វើឱ្យច្រើនជាងនិយាយនោះជោគជ័យហើយ។

គួរបញ្ជាក់ថា ការដែល ខាត់ ស្រីច័ន្ទ ចេញមកនិយាយវីដេអូខាងលើនេះបន្ទាប់ពីមានការនិយាយច្រើនពីលោក ណាវ៉ាត់ ទិញសិទ្ធិគ្រប់គ្រងកម្មវិធីប្រកួតបវរកញ្ញាចក្រវាលថៃរយៈពេល៥ឆ្នាំក្នុងតម្លៃជាង៥លានដុល្លារ៕

ថ្មីៗនេះ ព្រះគ្រូធម្មាចារ្យ ផលធរោ ផុន ភក្តី អាត្មាភាពសូមបិណ្ឌបាត្រ ឱ្យមន្រ្តីកែប្រែពណ៌ អាវ ខោ ជនសង្ស័យ ខណៈក្រឡេកមើលមួយភ្លេត ស្រដៀងនឹងព្រះសង្ឃ។

បើតាមការបង្ហោះរបស់ ព្រះគ្រូធម្មាចារ្យ បានលើកឡើងថា៖” អាត្មាភាពសូមបិណ្ឌបាត្រ ក្រសួងពាក់ព័ន្ធ ជាពិសេសសម្តេចក្រឡាហោម ស ខេង និង សម្តេចអភិសន្តិបណ្ឌិត ស សុខា អាត្មាសូមចម្រើនពរបិណ្ឌបាត្រពីចម្ងាយ សូមចម្តេចជួយឱ្យមន្រ្តីយើងកែប្រែពណ៌ អាវ ខោ នេះផង”។

ព្រះគ្រូធម្មាចារ្យ បានបន្ថែមទៀតថា៖” ឯកសណ្ឋាននេះ វាដូចពេកទៅនឹងព្រះសង្ឃ ដែលនាំឱ្យប្រទេសកាន់ព្រះពុទ្ធសាសនាផ្សេងទៀត គេមើលងាយយើងព្រោះអាចយល់ច្រឡំតែម្តង ក្បាលកោ ហើយពណ៌ទៅទាំងព្រមពីលើដល់ក្រោម វាដូចពេកហើយ”។

ចំពោះឯកសណ្ឋានជនសង្ស័យនេះ ជារឿយៗគេតែងឃើញមានពណ៌ទឹកក្រូច និងពណ៌ខៀវ ដែលសមត្ថកិច្ចឱ្យជនសង្ស័យពាក់នៅអំឡុងពេលបង្ហាញខ្លួន មុននឹងបញ្ជូនទៅកាន់ទោសនៅសាលាដំបូងរាជធានីភ្នំពេញ៕

នៅព្រឹកថ្ងៃទី១៩ ខែកុម្ភៈ ឆ្នាំ២០២៥ ក្នុងពិធីប្រគល់សញ្ញាបត្រជូនដល់និស្សិតសាកលវិទ្យាល័យ អាស៊ី អឺរ៉ុប សម្តេចធិបតី ហ៊ុន ម៉ាណែត បានបកស្រាយច្បាស់ៗពីភាពចម្រូងចម្រាស់លើបញ្ហាគ្របសៀវភៅប្រវត្តិវិទ្យាថ្មី ដែលពលរដ្ឋខ្លះថា ជាការដឹងគុណប្រទេសជិតខាង។

ពាក់ព័ន្ធនឹងបញ្ហានេះ សម្តេចធិបតី បានមានប្រសាសន៍ថា៖”មានមតិ មួយចំនួនបានចោទប្រកាន់ទៅលើការដាក់បង្រៀនសៀវភៅប្រវត្តិវិទ្យាថ្មីថា ដើម្បីកែប្រែប្រវត្តិសាស្រ្តឱ្យខ្មែរដឹងគុណប្រទេសជិតខាង ដែលការចោទនេះ ពុំមែនជាការពិតនោះទេ ព្រោះថា ខ្លឹមសារនៅក្នុងសៀវភៅប្រវត្តិវិទ្យារក្សានៅដដែល គ្រាន់តែធ្វើទំនើបកម្មសៀវភៅឱ្យមានភាពល្អប្រសើរប៉ុណ្ណោះ”។

សម្តេចធិបតី សង្កត់ធ្ងន់ទៀតថា៖”ការព្រួយបារម្ភពីប្រទេសជាតិ មិនមែនជារឿងខុសនោះទេ ប៉ុន្តែអ្នកដែលព្រួយបារម្ភខ្លះ មិនបានទាំងអានសៀវភៅថ្មីនោះផង ដូច្នេះ យើងមិនត្រូវជឿទៅលើអ្វីដែលគេបាននិយាយនោះទេ ពោលគឺត្រូវស្រាវជ្រាវទៅលើបញ្ហាឱ្យបានច្បាស់ទើបយើងអាចធ្វើការសម្រេចចិត្តត្រឹមត្រូវ”។

បន្ថែមពីនេះ សម្តេចធិបតីក៏បានអំពាវនាវដល់ក្រសួងអប់រំ ឱ្យបង្ហោះផ្សាយសៀវភៅប្រវិត្តវិទ្យាថ្មីទាំងនោះនៅលើបណ្តាញសង្គមដើម្បីបង្ហាញប្រាប់ប្រជាពលរដ្ឋទាំងអស់ថា សៀវភៅនេះ មិនបានបំភ្លៃប្រវត្តិសាស្រ្តឱ្យយើងដឹងគុណប្រទេសណាមួយនោះឡើយ៕