តារាសម្តែង ស៊ីន យូប៊ីន ទទួលបានការកោតសរសើរយ៉ាងខ្លាំងក្នុងសកម្មភាពដែលនាងបានជូនវត្ថុអនុស្សាវរីយ៍បង្ហាញអ្វីដែលជារបស់ខ្មែរទៅកាន់តារាល្បីៗដែលបានមកចូលរួមកម្មវិធី Bulgari ដែលបានរៀបចំនៅខេត្តសៀមរាប។ យូប៊ីន បានបំពេញតួនាទីក្នុងនាមជាម្ចាស់ផ្ទះបានយ៉ាងល្អខណៈគឺគេសង្កេតឃើញថានាងមានភាពទំនាក់ទំនងស្និទ្ធស្នាលជាមួយតារាសម្តែង ម៉ៃ ដាវីកា។

ដូចប្រិយមិត្តមួយចំនួនបានដឹងហើយថាតារាសម្តែង ស៊ីន យូប៊ីន ធ្លាប់បាននិយាយហើយថានៅពេលចូលរួមកម្មវិធីនានាមិនឱ្យខ្មែរបាក់មុខនោះទេ បើទោះបីជាកម្មវិធីនោះធំយ៉ាងណាប៉ុន្តែមិនបានឱ្យតម្លៃមកខ្មែរគឺនាងមិនចូលរួមដាច់ខាត ជាពិសេស យូប៊ីន គឺនិយមចូលចិត្តបង្ហាញអ្វីដែលជារបស់ខ្មែរនៅលើឆាកអន្តរជាតិ។

ថ្មីៗនេះទស្សនិកជនភាគច្រើនក៏បានដឹងហើយថាប្រ៊េនលំដាប់ពិភពលោករបស់ Bulgari បានមករៀបចំកម្មវិធីដ៏ធំនៅមុខប្រាសាទបាយ័នដោយប្រមូលផ្តុំទៅដោយតារាល្បីៗជាច្រើនចូលរួមក្នុងនោះមានទាំងតារាខ្មែរ តារាហ្វីលីពីន សិង្ហបុរី ថៃ វៀតណាម និងតារាជាច្រើនទៀតមកចូលរួមនិងបានផ្សព្វផ្សាយពីគ្រឿងអលង្ការម៉ាយីហោនេះដែលភ្ជាប់ជាមួយប្រាសាទខ្មែរ មើលហើយត្រជាក់ភ្នែកជាទីបំផុតពីតារាសម្តែងសិង្ហបុរី តារាសម្តែងថៃ បវរកញ្ញាចក្រវាលឆ្នាំ២០១៥ Miss Cosmo 2024 ជាដើម។

នាថ្ងៃទី២១ នេះ តារាសម្តែង ស៊ីន យូប៊ីន បានចែករំលែកវីដេអូមួយដែលធ្វើឱ្យអ្នកគាំទ្ររំភើបចិត្តជាខ្លាំងក្រោយពីឃើញសកម្មភាពនាង។ យូប៊ីន បានជូនវត្ថុអនុស្សាវរីយ៍ជាប្រអប់ស្មុករបស់ដែលធ្វើដោយដៃដោយក្នុងនោះមានជាក្រមាខ្មែរ និងដំណាប់ស្វាយ។ កាលពីថ្ងៃទី២០ កុម្ភៈ តារាថៃ ម៉ៃ ដាវីកា ក៏បានភ្លក្សរសជាតិអាកោខ្មែរ ប្រហិតឆឹង ផងដែរ។

សកម្មភាពនេះអ្នកគាំទ្រសរសើរ ស៊ីន យូប៊ីន មិនដាច់ពីមាត់ដែលនាងបានបំពេញតួនាទីបានយ៉ាងល្អក្នុងនាមជាម្ចាស់ផ្ទះដែលកម្មវិធីលំដាប់ថ្នាក់ពិភពលោកនេះមករៀបចំលើទឹកដីកម្ពុជាជាលើកដំបូង៕

តារារ៉េប ខ្មែរមួយជីវិត (Khmer1Jivit ) គាំទ្រក្នុងការលុបបំបាត់បទចម្រៀងរ៉េបចោលនៅកម្ពុជា។ ក្នុងនោះលោកក៏សង្ឃឹមថាសិល្បៈចម្រៀងខ្មែរនឹងត្រឡប់ទៅសម័យកាលចម្លងពីគេ ស្រួលផលិតមួយឆ្នាំ២០អាល់ប៊ុមក៏បាន។ ការគាំទ្រនេះគឺបន្ទាប់ពីក្រសួងវប្បធម៌ និងវិចិត្រសិល្បៈបានចេញសេចក្តីណែនាំបញ្ឈប់រាល់ស្នាដៃសិល្បៈដែលមានខ្លឹមសារគ្រោតគ្រាត អសុរោះនិងលុបចោលនូវរាល់ស្នាដៃអវិជ្ជមានដែលបង្ហោះកន្លងមក។

បង្ហោះចេញពីទឹកដីអាម៉េរិកត្រូវនឹងយប់ថ្ងៃទី២០កុម្ភៈ ម៉ោងនៅកម្ពុជា តារាចម្រៀងរ៉េប ខ្មែរមួយជីវិត បានបង្ហោះសំណេរមួយថា «បំបាត់ចោលបទចម្រៀងរ៉េបចោល ក៏ល្អដែរ ខ្ញុំសង្ឃឹមថា សិល្បៈចំរៀងខ្មែរនឹងត្រឡប់ទៅកាន់សម័យកាលបទចម្លងពីគេវិញ យ៉ាងហោចណាស់ស្រួលផលិត ម៉ាឆ្នាំ២០អាល់ប៊ុមក៏បានដែរ«។ ខ្លឹមសារដែលលោកបានបង្ហោះនេះគឺក្រោយពេលក្រសួងវប្បធម៌ និងអ្នកសិល្បៈមួយចំនួនពេញចិត្តចំពោះចំណាត់ការរបស់ក្រសួងវប្បធម៌ និងវិចិត្រសិល្បៈដែលឱ្យអ្នកសិល្បៈទាំងអស់បញ្ឈប់បទចម្រៀងដែលមានខ្លឹមសារគ្រោតគ្រាត អសុរោះ។

កាលពីថ្ងៃទី១៤ កុម្ភៈ ក្រសួងវប្បធម៌ និងវិចិត្រសិល្បៈ បានចេញសេចក្តីណែនាំឱ្យអ្នកសិល្បៈបញ្ឈប់ជាបន្ទាន់ នូវការតែងនិពន្ធ ច្រៀង ការផ្សព្វផ្សាយបទចម្រៀង និងស្នាដៃសិល្បៈនានា ដែលមានខ្លឹមសារគ្រោតគ្រាត អសុរោះ ប្រាសចាកពីក្រមសីលធម៌និងសេចក្តីថ្លៃថ្នូរសង្គម និងសូមលុបចោលនូវរាល់ស្នាដៃអវិជ្ជមានដែលបង្ហោះ ផ្សព្វផ្សាយក្នុងបណ្តាញសង្គមនាពេលកន្លងមក ដោយព្រួយបារម្ភពីការប៉ះពាល់យ៉ាងធ្ងន់ធ្ងរដល់វប្បធម៌ ទំនៀមទម្លាប់ ប្រពៃណី កិត្យានុភាពនៃសង្គមជាតិ ពិសេសប៉ះពាល់លើអនីតិជនដែលជាកុមារ។

ក្រោយចេញសេចក្តីណែនាំនេះគេសង្កេតឃើញថាមានអ្នកទាំងគាំទ្រនិងមិនគាំទ្រជាពិសេសអ្នកគាំទ្រក្នុងចំណោមវិស័យហ៊ីបហប ខណៈគេក៏បានឃើញអ្នកសិល្បៈមួយចំនួនបានបង្ហាញការគាំទ្រចំណាត់ការរបស់ក្រសួងវប្បធម៌ និងវិចិត្រសិល្បៈ។ តារាមួយចំនួនក៏បាននិយាយដែរថាសិល្បៈរ៉េបឌីសគ្នាគឺជាវប្បធម៌របស់ប្រទេសលោកខាងលិចប៉ុន្តែយើងជាជនជាតិខ្មែរយើងមិនអាចទៅធ្វើតាមដូចជាគេបាននោះទេ៕

មិនមែនជាលើកទី១នោះទេដែលមានរៀមច្បងនៅក្នុងវិស័យសិល្បៈបានចេញមកនិយាយពីអ្នកជំនាន់ក្រោយដែលមិនចេះគោរពនិងឱ្យតម្លៃទៅដល់សិល្បកររៀមច្បង។ ថ្មីៗនេះអ្នកនាង ខាត់ សុឃីម ក៏បានផ្តល់បទសម្ភាសន៍បាននិយាយពី Rapper និងអ្នកបង្កើតមាតិកា ប្អូនៗជំនាន់ក្រោយមិនចេះលើកដៃសូម្បីជម្រាបសួររៀមច្បងមានការបែងចែករើសអើងគ្នា។

ក្នុងបទសម្ភាសន៍ សខ្មៅ ដែលបានចាក់ផ្សាយនៅយប់ថ្ងៃទី២០ កុម្ភៈ តារាពហុជំនាញ ខាត់ សុឃីម គឺបានចូលរួមផ្តល់សម្ភាសន៍ដោយបានចែករំលែករឿងរ៉ាវជាច្រើនទាំងនៅក្នុងអាជីពសិល្បៈរួមទាំងជីវិតឯកជន។ ទាក់ទងនឹងអ្នកសិល្បៈជំនាន់ថ្មីអ្នកនាង ខាត់ សុឃីម ថា អ្នកជំនាន់ក្រោយមិនមានសុជីវធម៌ដៃធ្ងន់ មុខមិនញញឹម។

អ្នកនាង បាននិយាយថា មិនទទួលបានការឱ្យតម្លៃព្រោះតែជាអ្នកសិល្បៈចាស់ហើយខាងផ្នែកបុរាណទៀត ដែលមានបែងចែកភាពល្បីតាមកម្រិតA,B,C,D,E ជាដើម។ អ្នកនាង ខាត់ សុឃីម ថា Rapper មកក្មេងៗមិនដឹងថាក្រែងចិត្តយើងជាមនុស្សចាស់ក៏មិនដឹង តែតាមការសម្គាល់របស់ខ្លួនគឺភាគច្រើនរើសអើង មិនខ្វល់អ្វីទាំងអស់ មិនដឹងការគួរសមបាត់ទៅណា ទោះបីជា Rapper តែហ្នឹងជាអ្នកសិល្បៈ ជាកូនខ្មែរ អ្នកសិល្បៈពីមុននៅគួរសម ពេលឃើញគ្នា តែដល់សម័យនេះហេតុអ្វីបានទៅជាអ៊ីចឹង។

តារាពហុជំនាញរូបនេះថា «មិនត្រឹមតែប្អូនៗក្មួយៗ Rapper នោះទេ អ្នកធ្វើមាតិកាល្បីៗខ្លួនអ្នកនាងធ្លាប់ចូលរួមកម្មវិធីផ្សេងៗ នៅក្នុងបណ្តាញសង្គមពួកគាត់ឡូយ រួសរាយ តែពេលជួបក្រៅហេតុអ្វីបានជាដៃរាងធ្ងន់ មុខមិនញញឹម យើងមិនមែនជាខ្មែរដូចគ្នាទេឬយ៉ាងមិច»។ និយាយដោយចម្ងល់ អ្នកនាង ខាត់ សុឃីម ថា ឬមួយគេប្រកាន់មិនរាប់អានសិល្បករចាស់ៗព្រោះតែខ្លាចបាក់កាលីប មិនជម្រាបសួរខ្លាចគេថោក មិនញញឹមខ្លាចស្តាយស្នាមញញឹមឬក៏យ៉ាងមិច។

ក្នុងនោះដែរ អ្នកនាង ខាត់ សុឃីម ថាការនិយាយបែបនេះរបស់ខ្លួនបើថាស្អប់ក៏ស្អប់ចុះដើម្បីកែលម្អប្អូនៗក្មួយៗ ហើយនៅពេលអាយុប៉ិនខ្លួននៅពេលក្មេងៗធ្វើដាក់ចឹងវិញមានអារម្មណ៍បែបណា ៕

បន្ទាប់ពីបង្ហោះសំណេរនិងចេញវីដេអូដោយអារម្មណ៍ក្តៅចិត្តទៅកាន់ភ្ញៀវដែលពាក់ស្បែកជើងជាន់លើសាឡុងនិងអ្នកលួចយកតុក្កតាទៅស្រាប់តែមានរឿងកាន់តែក្តៅគគុកកើតឡើងបន្ទាប់ពីមានគណនីមួយចេញមកបង្ហោះថាហាងល្បីជេរភ្ញៀវនិងមានបំណងចង់ឈប់ឱ្យទិញកន្លែងនោះកុំឱ្យមានលុយទៅទិញហើយត្រូវគេដៀល។ ប៉ីប៉ី ឌី និង ទ្រី សក្កដា ហៅ អាដា សក្កដា ចេញមកបង្ហោះសំណេរដាក់មួយចាស់ដៃផ្អើលអស់បណ្តាញសង្គម។

យប់ថ្ងៃទី២០ ខែកុម្ភៈ ស្រាប់តែផ្ទុះការភ្ញាក់ផ្អើលបន្ទាប់ពី ប៉ីប៉ីឌី និង អាដា សក្កដា ចេញមកបង្ហោះសារយ៉ាងក្តៅគគុក។ មុននឹងអ្នកទាំងពីរបង្ហោះនេះគឺគេបានឃើញគណនីហ្វេកប៊ុកមួយបានបង្ហោះសំណេរថា «មានហាងកាហ្វេមួយនោះ ពេលវាល្បីលក់ដាច់កើបលុយទៅវាជេរភ្ញៀវ ដៀលភ្ញៀវផ្អើល FB សូមបងប្អូនឈប់ទិញកន្លែងវាទៅមានលុយហើយកុំឱ្យវាដៀល»។

សំណេរមួយនេះបានធ្វើឱ្យ ប៉ីប៉ីឌី និង ទ្រី សក្កដា ឆេះឆួលយ៉ាងខ្លាំង។ ទ្រី សក្កដា បាននិយាយថា «អ៊ីចឹងបានថាមនុស្សរៀនចេះដឹងមានមុខដំណែងខ្ពស់ប៉ុណ្ណា មិនប្រាកដថាមានសីលធម៌ល្អក្នុងការរស់នៅប្រចាំថ្ងៃទេ ! Noted»។ ខ្លឹមសារមួយទៀត សក្កដា ថា «យកស្បែកជើងទៅជាន់សាឡុងគេឡើងគគ្រិច ឆ្លៀតមីខ្លះលួចតុក្កតាទៅផ្ទះទៀត ហើយមិនឱ្យគេជេរ ចង់ឱ្យគេអញ្ជើញទៅច្រាសបាយមែន ពួកមី Comment តែស្ករហ្នឹងទៀត ពួកមីសណ្តានចោរមែនបានខំកាន់ជើងពួកមីលួចរបស់គេហ្នឹងម៉េស អាខ្លះការងាររដ្ឋទៀតហ្អា ប៉ាភ្លីប៉ាភ្លើអញ្ចឹង យីអញ …»។

ចំណែកឯ ប៉ីប៉ីឌី វិញ បានបង្ហោះនៅលើបណ្តាញសង្គមថា «អាមួយនោះ មានការងារមុខតំណែងល្អជាដែរ តែខួរអន់មិនចេះបែងចែកថាអញជេរភ្ញៀវជារួម ឬជេរភ្ញៀវដែលអន់ចរិត
សុទ្ធតែឱ្យគេ ឈប់ទិញកន្លែងអញ ហែងកាន់ជើងអ្នកខុស ឬក៏ហែងមានទម្លាប់ថោកទាបចឹងដែរ? មានលុយទិញ អស្ចារ្យចឹងហ្មង? បើថ្លៃថ្នូរគ្មានអាណាដៀលទេ តែបើមានលុយហើយ ភ្លើមិនចេះគិតអញដៀលហើយ អាណាក៏ដោយហែងនៅតែហែងទៅ កុំរម៉ាស់រឿងអញ»។

មិនទាន់អស់សេចក្តីនោះទេ ប៉ីប៉ីឌី ជាថៅកែហាងច្រើនកន្លែងបានបង្ហោះទៀតថា «មីអ្នកcmtនោះ ក៏ចឹងដែរសុទ្ធតែអញកើតចេញពីសត្វតិរិច្ឆាន នាងឯងជាស្អី បានខ្ចាក់ពាក្យហ្នឹងចេញមកបាន? សម្តីនេះមិនត្រឹមតែប្រមាថអញទេ ប្រមាថដល់ម្តាយអញទៀតនាងឯងឋានៈដល់ណាក៏អញមិនខ្លាចដែរ ចេញមកតទល់ជាមួយអញ ម៉េចបានកញ្ចាស់ក្បាលហើយភ្លើនិយាយគ្មានខួរក្បាលអញ្ចឹង? នាងឯងមិនស្មើនឹងសត្វតិរិច្ឆានផង មីគ្មានកំណើត»។

បន្ទាប់ពីប្រើសម្តីធ្ងន់ៗបង្ហោះនៅលើបណ្តាញសង្គមឆ្លើយតបទៅវិញនេះ ប៉ីប៉ីឌី ក៏បានបង្ហាញដែរថា គណនីទាំងពីរនោះបាន Locked profile បាត់ហើយ៕