ប្រទេសកម្ពុជា ៖ លោក Elon Musk ស្ថាបនិកក្រុមហ៊ុន SpaceX និង Starlink និងជារដ្ឋមន្ត្រីក្រសួងប្រសិទ្ធភាពរដ្ឋាភិបាលអាមេរិក (DOGE ) បានបញ្ជូនអ្នកតំណាងរបស់ខ្លួនមកជួបសម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីកម្ពុជា នៅរាជធានីភ្នំពេញ កាលពីថ្ងៃទី២០ ខែកុម្ភៈ ឆ្នាំ២០២៥ ដើម្បីពិភាក្សាពីការវិនិយោគនៅកម្ពុជា ។ កម្ពុជាបានក្លាយជាប្រទេសគោលដៅវិនិយោគរបស់ក្រុមហ៊ុន SpaceX នៅឆ្នាំ២០២៥ ហើយក្រុមហ៊ុននេះមានគោលបំណងពង្រឹងទំនាក់ទំនងឱ្យកាន់តែរឹងមាំជាមួយរដ្ឋាភិបាលកម្ពុជា។

កាលពីថ្ងៃទី២៤ ខែកុម្ភៈ កន្លងមក សារព័ត៌មានបច្ចេកវិទ្យា Developing Telecom រាយការណ៍ថា វាពិតជាគួរឱ្យភ្ញាក់ផ្អើលយ៉ាងខ្លាំង នៅពេលអ្នកតំណាងក្រុមហ៊ុន SpaceX និង Starlink របស់មហាសេដ្ឋីដ៏ល្បីនៅអាមេរិក លោក Elon Musk បានធ្វើដំណើរមករាជធានីភ្នំពេញ ដើម្បីពិភាក្សាពីការវិនិយោគជាមួយសម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីកម្ពុជា នៅវិមានសន្តិភាព នៅថ្ងៃទី២០ ខែកុម្ភៈ ។

ពេលជជែកជាមួយនាយករដ្ឋមន្ត្រីកម្ពុជា លោកស្រី Rebecca Hunter នាយកទីផ្សារក្រុមហ៊ុន SpaceX និង Starlink និយាយថា កម្ពុជា គឺជាគោលដៅវិនិយោគរបស់ក្រុមហ៊ុន Space X និង Starlink ហើយក្រុមហ៊ុននេះកំពុងស្វែងរកឱកាសវិនិយោគក្នុងវិស័យបច្ចេកវិទ្យានៅកម្ពុជា ដើម្បីពង្រឹងទំនាក់ទំនងឱ្យកាន់តែរឹងមាំជាមួយរដ្ឋាភិបាលកម្ពុជា ។

ក្រៅពីនេះ លោកស្រី Hunter ក៏បានជួបជាមួយមន្ត្រីជាន់ខ្ពស់មួយចំនួនទៀតរបស់កម្ពុជាផងដែរ ដើម្បីពិភាក្សាពីការពង្រីកវិនិយោគ ។ ការពិភាក្សារវាងលោកស្រី Hunter ជាមួយមន្ត្រីក្រសួងប្រៃសណីយ៍ និងទូរគមនាគមន៍កម្ពុជា គឺផ្តោតលើឱកាសកែលម្អសេវាទូរគមនាគមន៍របស់កម្ពុជាឱ្យកាន់តែទំនើប ខណៈការពិភាក្សារវាងលោកស្រីជាមួយមន្ត្រីក្រសួងពាណិជ្ជកម្មកម្ពុជា គឺផ្តោតលើគោលដៅវិនិយោគក្នុងការលើកកម្ពស់សក្តានុពលវេទិកាពាណិជ្ជកម្មអេឡិចត្រូនិក ។

បច្ចុប្បន្ន ក្រុមហ៊ុន Starlink ពុំទាន់ទទួលបានលិខិតអនុញ្ញាតជាផ្លូវការក្នុងការផ្តល់សេវាកម្មនៅប្រទេសកម្ពុជាទេ ប៉ុន្តែក្រុមហ៊ុន Kiripos នៅកម្ពុជាបាននាំចូលឧបករណ៍អ៊ីនធើរណេតផ្កាយរណប Starlink ពីអាមេរិកមកចែកចាយនៅកម្ពុជា ហើយអតិថិជនត្រូវបង់ថ្លៃចំនួន២០០ដុល្លារអាមេរិកក្នុង១ខែ សម្រាប់ថ្លៃសេវារ៉ូមីង (Roaming) ។ នេះបើតាមការចុះផ្សាយរបស់សារព័ត៌មានបរទេស ។

គួរបញ្ជាក់ថា ស្ថាបនិកក្រុមហ៊ុន SpaceX និង Starlink លោក Elon Musk បានក្លាយជារដ្ឋមន្ត្រីក្រសួងប្រសិទ្ធភាពរដ្ឋាភិបាលអាមេរិក (DOGE ) ក្រោយពីគណបក្សសាធារណរដ្ឋបានឈ្នះឆ្នោត ហើយលោកជាមេដឹកនាំសំខាន់ក្នុងរដ្ឋាភិបាលអាមេរិករបស់លោកប្រធានាធិបតី Donald Trump ៕

ប្រទេសចិន ៖ មនុស្សភាគច្រើនចាត់ទុកថា ការស្វែងរកគូស្រករ និងរៀបការ គឺជារឿងសំខាន់បំផុតក្នុងជីវិត ប៉ុន្តែនាពេលថ្មីៗនេះ រោងចក្រគីមីមួយកន្លែងនៅទីក្រុងលីនអ៊ី ខេត្តសានទុង ប្រទេសចិន បានកំណត់គោលការណ៍ថ្មីតម្រូវឱ្យបុគ្គលិកនៅលីវ អាយុចាប់ពី២៨ឆ្នាំ ទៅ៥៨ឆ្នាំ ត្រូវតែរៀបការ និងមានកូនក្នុងរយៈពេល៩ខែ បើពុំដូច្នោះទេ រោងចក្រនឹងបណ្តេញចេញពីការងារ ។

ការកំណត់គោលការណ៍យ៉ាងតឹងរ៉ឹងនេះ បានដាក់សម្ពាធដល់បុគ្គលិកនៅលីវយ៉ាងខ្លាំង ។ កាលពីខែមករា ឆ្នាំ២០២៥ រោងចក្រនេះបានប្រកាសពីគោលការណ៍ថ្មីថា រោងចក្រចាត់ទុកការធ្វើការ និងបង្កើតគ្រួសារ គឺជាការដឹងគុណឪពុក-ម្តាយ និងសង្គមជាតិ ។ ដូច្នេះ បុគ្គលិកនៅលីវត្រូវតែរៀបការ និងមានកូនដើម្បីបង្កើតធនធានមនុស្សដ៏សំខាន់របស់ប្រទេស ។

រោងចក្របានកំណត់ឱ្យបុគ្គលិកនៅលីវទាំងអស់ត្រូវតែរៀបការឱ្យបានមុនថ្ងៃទី៣០ ខែកញ្ញា ឆ្នាំ២០២៥ ហើយបើបុគ្គលិកនៅលីវពុំអនុវត្តតាមគោលការណ៍នេះទេ រោងចក្រនឹងបញ្ឈប់ពីការងារ ។ ក្រៅពីនេះ ខ្លឹមសារក្នុងគោលការណ៍បញ្ជាក់ថា បុគ្គលិកណាពុំរៀបការ និងមានកូន ឬពុំស្តាប់បង្គាប់ឪពុក-ម្តាយ ឬគ្មានគូស្នេហ៍ នឹងចាត់ទុកថា គឺជាអាកប្បកិរិយាពុំស្មោះត្រង់ និងខ្វះចិត្តមេត្តា ។

ប៉ុន្តែការកំណត់គោលការណ៍ថ្មីរបស់រោងចក្រធ្វើឱ្យបុគ្គលិក និងអ្នកលេងបណ្តាញសង្គមរិះគន់គ្រប់គ្នា ។ អ្នកលេងបណ្តាញសង្គមម្នាក់និយាយថា វាគ្រាន់តែជាលេសដើម្បីកាត់បន្ថយចំនួនបុគ្គលិក តើរោងចក្រតាំងខ្លួនជាអ្វី ទើបហ៊ានកំណត់ជីវិតផ្ទាល់ខ្លួនរបស់បុគ្គលិក? រីឯអ្នកលេងបណ្តាញសង្គមផ្សេងទៀតថា ចម្លែកណាស់ ពេលនិស្សិតរៀននៅសាកលវិទ្យាល័យ រដ្ឋាភិបាលហាមនិស្សិតមានសង្សារ ប៉ុន្តែដល់ពេលមានការងារធ្វើ បែរជាបង្ខំឱ្យរៀបការទៅវិញ ។ ខ្ញុំមកធ្វើការ ពុំមែនឱ្យក្រុមហ៊ុនកំណត់ជីវិតទេ ។

ចំណែកអ្នកតំណាងរោងចក្របានផ្តល់សម្ភាសន៍ជាមួយសារព័ត៌មានថា វាជាការសម្រេចចិត្តរបស់ប្រធានរោងចក្រ ហើយជារឿងផ្ទៃក្នុង ។ ក្រោយមក ភ្នាក់ងារទទួលខុសត្រូវផ្នែកការងារនៅទីក្រុងលីនអ៊ី បានចេញលិខិតព្រមានរោងចក្រថា បើមានបុគ្គលិកណាម្នាក់ត្រូវបានបណ្តេញចេញពីការងារដោយសារមូលហេតុពុំរៀបការ ភ្នាក់ងារទទួលខុសត្រូវការងារនឹងចាត់វិធានការរោងចក្រតាមផ្លូវច្បាប់ ៕

មិត្តភាពជាង១០ឆ្នាំមានទាំងផ្អែមមានទាំងប្រៃ ប៉ុន្តែ ទេព បូព្រឹក្ស និង ពេជ្រ សូលីកា មិនបោះបង់គ្នាចោលនោះទេទោះបីប្រឈមមុខនឹងបញ្ហារៀងខ្លួនក៏ដោយ ខណៈ ទេព បូព្រឹក្ស បានទៅលើកទឹកចិត្តជូនបាច់ផ្កាដ៏ធំទៅដល់ ពេជ្រ សូលីកា ក្នុងការប្រគំតន្រ្តីទោលលើកដំបូង។

ថ្មីៗនេះតារាចម្រៀង ពេជ្រ សូលីកា បានបញ្ចប់ការប្រគំតន្រ្តីទោលរបស់ខ្លួនលើកដំបូងប្រកបដោយភាពជោគជ័យមានទាំងអ្នកសិល្បៈនិងអ្នកគាំទ្រជាច្រើនចូលរួមសេដទាំងអស់គ្នា។ សំបុត្រការប្រគំតន្រ្តីរបស់តារាចម្រៀង ពេជ្រ សូលីកា គឺបានសាងប្រវត្តិសាស្រ្តសម្រាប់តារាចម្រៀងក្នុងស្រុកដែលឈានដល់១៤៩ដុល្លារសម្រាប់សំបុត្រ VIP លើសកំណត់ត្រាកំពូលតារាចម្រៀងក្នុងស្រុកចំនួន២រូប។

តាមរយៈវីដេអូហ្វេនៗដែលចូលរួមចែករំលែកនៅលើបណ្តាញសង្គមក្នុងកម្មវិធីប្រគំតន្រ្តីរបស់ ពេជ្រ សូលីកា គឺមានការចូលរួមស៊ុបប្រាយពីរៀមច្បង យក់ ថិតរដ្ឋា រួមទាំងតារាចម្រៀង ស៊ូ លីផេង រួមទាំងការច្រៀងជាមួយប្អូនស្រីរបស់នាងផងដែរហើយកម្លាំងចិត្តសំខាន់មួយទៀតចំពោះនាងគឺជាកូនប្រុសបណ្តូលចិត្តក៏បានទៅចូលការប្រគំតន្រ្តីម៉ាក់ៗដូចគ្នា។

ក្នុងនោះចំពោះមិត្តភាពវិញ ពេជ្រ សូលីកា ទទួលបានការស៊ុបប្រាយពីតារាចម្រៀង ទេព បូព្រឹក្ស ដោយនាងបានកាន់បាច់ផ្កាកុលាបពណ៌ក្រហមដ៏ធំនិងស្រស់ស្អាតជូនពួកម៉ាកនៅលើឆាកប្រគំតន្រ្តី។

គួរឱ្យដឹងថា កន្លងមកនេះ ទេព បូព្រឹក្ស ធ្លាប់បង្ហាញទស្សនិកជនដោយមិនលាក់លៀមដែរថានាងនិង ពេជ្រ សូលីកា ជាមិត្តភក្តិសម្លាញ់ជាង១០មកហើយ មានទាំងមិននិយាយរកគ្នាទៀត តែពេលនេះមានកូនរៀងៗខ្លួន ចាស់ចិត្តចាស់គំនិតលែងងរងក់ដាក់គ្នាហើយ៕

ប្រទេសថៃ ៖ កាលពីថ្ងៃទី២៤ ខែកុម្ភៈ ឆ្នាំ២០២៥ សារព័ត៌មានថៃរាយការណ៍ថា ប៉ូលិសអន្តោប្រវេសន៍ថៃបានឃា.ត់ ខ្លួនបុរសម្នាក់ជាកូនកាត់ថៃ-ឥណ្ឌា ករណីយកក្រដាសប្រាក់បាតថៃ ស្មើជាង១៥លានបាត ពីប្រទេសកម្ពុជាឆ្លងដែនចូលទឹកដីថៃ ។ បុរសរូបនេះសារភាពថា ប្រាក់ទាំងអស់ គឺខ្លួនបានពីការលេងល្បែងឈ្នះនៅកាស៊ីណូមួយកន្លែងក្នុងទីក្រុងប៉ោយប៉ែត ។

បុរសខាងលើបានស្ពាយកាបូបយ៉ាងធំឆ្លងដែនពីប្រទេសកម្ពុជា ចូលមកទឹកដីថៃ ប៉ុន្តែដោយសារសង្ស័យ ប៉ូលិសអន្តោប្រវេសន៍នៅខេត្តស្រះកែវ ក៏បានឃាត់ខ្លួនសាកសួរពីប្រវត្តិរូប គឺបុរសរូបនេះជាកូនកាត់ថៃ-ឥណ្ឌា អាយុ៤៧ឆ្នាំ និងមានផ្ទះស្នាក់នៅក្នុងទីក្រុងបាងកក ។ បន្ទាប់មក ប៉ូលិសអន្តោប្រវេសន៍បានត្រួតពិនិត្យកាបូបស្ពាយដ៏ធំនេះ ហើយពេលបើកកាបូប ធ្វើឱ្យប៉ូលិសភ្ញាក់ផ្អើលយ៉ាងខ្លាំង ដោយសារមានប្រាក់រហូតដល់ជាង១៥លានបាតក្នុងនោះ ។

តាមការសាកសួរជំហ៊ានដំបូង បុរសកូនកាត់សារភាពថា ប្រាក់ទាំងអស់ គឺខ្លួនបានពីការលេងល្បែងឈ្នះនៅកាស៊ីណូមួយកន្លែងនៅទីក្រុងប៉ោយប៉ែត ប្រទេសកម្ពុជា ។ ប៉ុន្តែប៉ូលិសអន្តោប្រវេសន៍ថៃពុំជឿទេ ដោយសារបុរសនេះបានលួចយកក្រដាសប្រាក់បាតថៃចូលទឹកដីថៃយ៉ាងច្រើន ដោយគ្មានការជូនដំណឹងទៅមន្ត្រីគយ ។ ដូច្នេះ ប៉ូលិសសន្និដ្ឋានថា វាជាប្រាក់បានមកពីការប្រព្រឹត្តទង្វើខុសច្បាប់ និងអាចពាក់ព័ន្ធជាមួយការឆបោកតាមអនឡាញ ។

ប៉ូលិសអន្តោប្រវេសន៍ថៃបានចោទប្រកាន់បុរសកូនកាត់ពីបទលួចនាំចូលប្រាក់បាតដោយគ្មានការជូនដំណឹងទៅមន្ត្រីគយ ។ បច្ចុប្បន្ន ប៉ូលិសអន្តោប្រវេសន៍កំពុងតែស៊ើបអង្កេតបន្ថែមទៀត ដើម្បីចាត់ការបុរសនេះតាមផ្លូវច្បាប់ ។

ប៉ូលិសអន្តោប្រវេសន៍ឱ្យដឹងថា ការយកក្រដាសប្រាក់បាតឆ្លងដែនយ៉ាងច្រើនសន្ធឹកសន្ធាប់បែបនេះ គឺល្មើសនឹងមាត្រា២៤២ នៃច្បាប់គយ ឆ្នាំ២០១៧ ព្រមទាំងល្មើសនឹងសេចក្តីប្រកាសរបស់ក្រសួងហិរញ្ញវត្ថុ ៕

សហរដ្ឋអាមេរិក ៖ កាលពីថ្ងៃទី២៣ ខែកុម្ភៈ ឆ្នាំ២០២៥ យន្តហោះរបស់ក្រុមហ៊ុនអាកាសចរណ៍ American Airlines ជើងហោះហើរ 292 ដែលបានហោះហើរពីទីក្រុងញូវយ៉ក សហរដ្ឋអាមេរិក ទៅកាន់ទីក្រុងញូវដេលី ប្រទេសឥណ្ឌា បានសម្រេចចិត្តចុះចតជាបន្ទាន់នៅអាកាសយានដ្ឋានអន្តរជាតិ Leonardo da Vinci ក្នុងទីក្រុងរ៉ូម ប្រទេសអ៊ីតាលី ក្រោយទទួលបានសារគំរា.ម ថា មានគ្រាប់បែ.ក ផ្ទុះលើយន្តហោះ ។

មុនពេលចុះចតនៅទីក្រុងរ៉ូម គេឃើញយន្តហោះចម្បាំង២គ្រឿង ហោះអមយន្តហោះរបស់ក្រុមហ៊ុនអាកាសចរណ៍ American Airlines ហើយខាងអាកាសយានដ្ឋាន Leonardo da Vinci ក៏បានត្រៀមរថយន្តពន្លត់អគ្គិភ័យចតនៅលើ Runway ផងដែរ ដើម្បីផ្តល់សុវត្ថិភាពដល់អ្នកដំណើរឱ្យចៀសផុតពីគ្រោះថ្នាក់ដោយសារគ្រាប់បែកផ្ទុះ ។ បន្ទាប់មក ភ្នាក់ងារជំនាញបានត្រួតពិនិត្យយន្តហោះ និងសម្ភារៈទាំងអស់របស់អ្នកដំណើរទយ៉ាងលម្អិត ប៉ុន្តែពុំឃើញគ្រាប់បែកឡើយ ។

ក្រុមហ៊ុនអាកាសចរណ៍ American Airlines ឱ្យដឹងថា យន្តហោះបានចុះចតបន្ទាន់នៅទីក្រុងរ៉ូម ដើម្បីឱ្យបុគ្គលិកអាកាសចរណ៍បានសម្រាក មុនពេលហោះហើរទៅកាន់ទីក្រុងញូវដេលី ប្រទេសឥណ្ឌា នៅថ្ងៃទី២៤ ខែកុម្ភៈ ។ មូលហេតុដែលអាកាសយានិកសម្រេចចិត្តចុះចតយន្តហោះនៅទីក្រុងរ៉ូមភ្លាមៗនេះ ដោយសារមានការគំរាមដាក់គ្រាប់បែកផ្ទុះលើយន្តហោះ ពេលយន្តហោះកំពុងតែហោះលើសមុទ្រ Caspian ប៉ុន្តែក្រោយការត្រួតពិនិត្យ បែរជាមិនឃើញអ្វីខុសប្លែក ។

ក្រោយពីយន្តហោះនេះចុះចតនៅអាកាសយានដ្ឋានក្នុងទីក្រុងរ៉ូម បុគ្គលិកអាកាសចរណ៍ក៏បាននាំអ្នកដំណើរទាំងអស់ជិះរថយន្តទៅកាន់អគារអ្នកដំណើរ ហើយអ្នកដំណើរគ្រប់រូប ព្រមទាំងសម្ភារៈត្រូវឆ្លងកាត់ការត្រួតពិនិត្យបន្ថែមទៀត ។ ការត្រួតពិនិត្យសម្ភារៈអ្នកដំណើរនេះធ្វើឡើងល្អិតល្អន់ និងចំណាយពេលយូររហូតដល់ជាង២ម៉ោង ។

អ្នកដំណើរម្នាក់ដែលធ្វើដំណើរពីរដ្ឋមីឈីហ្គេន សហរដ្ឋអាមេរិក ដើម្បីទៅលេងគ្រួសារនៅប្រទេសឥណ្ឌា រៀបរាប់ថា អាកាសយានិកប្រកាសថា យន្តហោះចាំបាច់ត្រូវផ្លាស់ប្តូរគោលដៅ ប្រមាណ៣ម៉ោង មុនពេលទៅដល់ទីក្រុងញូវដេលី ដើម្បីផ្តល់សុវត្ថិភាពដល់អ្នកដំណើរ ។ ពីដំបូង អ្នកដំណើរអង្គុយស្ងាត់ស្ងៀម ប៉ុន្តែក្រោយមក ពួកគេក៏ចាប់ផ្តើមតានតឹងផ្លូវចិត្ត ពេលអាកាសយានិកប្រាប់ថា នឹងមានយន្តហោះចម្បាំង២គ្រឿង ហោះអមយន្តហោះនេះទៅកាន់ទីក្រុងរ៉ូម ៕

ធម្មជាតិតែងតែជាប្រភពនៃការបំផុសគំនិត ការព្យាបាល និងភាពអស្ចារ្យ។ ក្នុងចំណោមគុណសម្បត្តិដ៏ច្រើនរបស់វា ព្រៃឈើជាជម្រកនៃភាពស្ងប់ស្ងាត់ និងជីវិត។ ព្រៃក្រាស់ ជារឿយៗត្រូវបានលាក់បាំងដោយអាថ៌កំបាំង និងភាពទាក់ទាញ ផ្តល់ឲ្យនូវការមើលឃើញដល់ប្រព័ន្ធអេកូឡូស៊ីដែលសំបូរទៅដោយជីវចម្រុះ និងសម្រស់ធម្មជាតិ។

ព្រៃឈើជុំវិញពិភពលោកបានទាក់ទាញចិត្តអ្នកចូលចិត្តផ្សងព្រេង និងអ្នកស្រលាញ់ធម្មជាតិ ឲ្យទៅកម្សាន្តក៏ដូចជាស្រង់យកបទពិសោធន៍ដ៏អស្ចារ្យពីវាផងដែរ។ខាងក្រោមនេះជាព្រៃឈើដ៏អស្ចារ្យបំផុតទាំង៥របស់ពិភពលោកសម្រាប់អ្នកចូលចិត្តដើរលេងតំបន់ព្រៃ

1. ព្រៃអាម៉ាហ្សូន អាមេរិកខាងត្បូង (Amazon Rainforest, South America)ព្រៃអាម៉ាហ្សូនលាតសន្ធឹងលើប្រទេសជាច្រើន រួមទាំងប្រទេសប្រេស៊ីល ប៉េរូ និងកូឡុំប៊ី ព្រៃអាម៉ាហ្សូនគឺជាពិភពធម្មជាតិដ៏អស្ចារ្យ។ វាគ្របដណ្តប់លើផ្ទៃដីជាង 5.5 លានគីឡូម៉ែត្រការ៉េ ហើយជាជម្រកនៃពពួករុក្ខជាតិ និងសត្វដ៏អស្ចារ្យ។ ដំបូលក្រាស់នៃព្រៃឈើ ទន្លេដែលហូរច្រោះ និងប្រភេទសត្វជាច្រើនបង្កើតបានជាប្រព័ន្ធអេកូឡូស៊ីដ៏រស់រវើក និងចម្រុះ ដែលវាជារឿយៗត្រូវបានគេហៅថាជា “សួតនៃផែនដី” ។ ជាមួយនឹងទំហំដ៏ធំរបស់វា និងជីវចម្រុះដែលមិនអាចប្រៀបផ្ទឹមបាន ព្រៃអាម៉ាហ្សូន គឺជាសក្ខីភាពនៃភាពអស្ចារ្យរបស់ធម្មជាតិ។

2. Black Forest ប្រទេសអាល្លឺម៉ង់ ស្ថិតនៅភាគនិរតីនៃប្រទេសអាឡឺម៉ង់ ព្រៃខ្មៅគឺជាទឹកដីដែលមអាថ៌កំបាំង និងដូចជារឿងព្រេងនិទាន។ តំបន់នេះត្រូវបានកំណត់លក្ខណៈដោយព្រៃក្រាស់ ភ្នំរំកិល និងភូមិប្លែកៗ។ ឈ្មោះព្រៃនេះកើតចេញពីព្រៃបៃតងចាស់គ្របដណ្តប់លើផ្ទៃដី ដែលមិនអនុញ្ញាតឲ្យពន្លឺព្រះអាទិត្យចាំងជះទៅដល់ឡើយ បង្កើតបានជាបរិយាកាសអាថ៌កំបាំង និងគួរឱ្យទាក់ទាញបំផុត។ អ្នកឡើងភ្នំ និងអ្នកចូលចិត្តធម្មជាតិសម្រុកទៅ Black Forest ដើម្បីរុករកផ្លូវលំ បឹងដ៏ស្រស់ស្អាត និងទីក្រុងដែលមានមន្តស្នេហ៍ដូចជា Baden-Baden និង Triberg ជាកន្លែងដែលដូចជារឿងនិទានដែលមានជីវិតរស់រើក។

3. ព្រៃឫស្សី ប្រទេសជប៉ុន (Bamboo Forest, Japan) ស្ថិតនៅក្នុងស្រុក Arashiyama នៃទីក្រុងក្យូតូ ព្រៃនេះគឺជាជម្រកឫស្សីដ៏ស្រស់ស្អាតនិងល្បីល្បាញជាងគេលើពិភពលោក។ ព្រៃដ៏ស្ងប់ស្ងាត់នេះ ជាកន្លែងដែលអាចឃើញមានដើមឬស្សីខ្ពស់ៗដែលបក់មកយ៉ាងទន់ភ្លន់តាមខ្យល់ និងពន្លឺថ្ងៃដែលឆ្លងកាត់តាមដើមឬស្សី បង្កើតឱ្យមានចលនារវាងពន្លឺ និងស្រមោលប្រៀបបានដូចជាវាកំពុងតែប្រលែងគ្នា ដែលធ្វើឱ្យព្រៃនេះក្លាយជាកន្លែងដ៏ល្អឥតខ្ចោះសម្រាប់ការដើរលេងដោយស្ងប់សុខ។ ព្រៃឬស្សីនេះបង្កប់នូវខ្លឹមសារនៃភាពស្ងប់ស្ងាត់ ដែលជាសក្ខីភាពនៃសម្រស់ធម្មជាតិ និងបេតិកភណ្ឌវប្បធម៌របស់ប្រទេសជប៉ុន។
4. Daintree Rainforest ស្ថិតនៅក្នុងរដ្ឋ Queensland ប្រទេសអូស្ត្រាលី ព្រៃ Daintree Rainforest គឺជាព្រៃទឹកភ្លៀងដ៏ចំណាស់ និងចម្រុះបំផុតនៅលើពិភពលោក ដែលត្រូវបានគេប៉ាន់ស្មានថាមានអាយុកាលប្រហែល 180 លានឆ្នាំមកហើយ។ តំបន់បេតិកភណ្ឌពិភពលោករបស់អង្គការយូណេស្កូនេះមានរុក្ខជាតិបៃតងខៀវស្រងាត់ ដើមឈើបុរាណ និងសត្វព្រៃដ៏សម្បូរបែប រួមទាំងបក្សីកម្រផងដែរ។ Daintree មិនត្រឹមតែមើលទៅគួរឲ្យភ្ញាក់ផ្អើលប៉ុណ្ណោះទេ ប៉ុន្តែក៏មានសារៈសំខាន់ក្នុងបរិស្ថានផងដែរ ដោយវាដូចជាការមើលទៅភពផែនដីពីអតីតកាលដូច្នេះដែរ។ អ្នកទស្សនាអាចទៅកម្សាន្តនិងរុករកព្រៃឈើនេះដោយដំណើរទេសចរណ៍ដែលមានហ្គាយន៍ណែនាំ ផ្លូវដើរលើអាកាស និងជិះទូកតាមដងទន្លេ ជ្រមុជទឹក និងមើលជីវចម្រុះច្រើនប្រភេទនៃព្រៃកំណប់ធម្មជាតិនេះ។

5. Monteverde Cloud Forest, Costa Rica ព្រៃភ្នំនេះជាដែនជម្រកសម្រាប់ជីវចម្រុះជាច្រើនប្រភេទ ដោយវាត្រូវបានគ្របដោយអ័ព្ទជាញឹកញាប់ ដែលបង្កើតបរិយាកាសដ៏អាថ៌កំបាំង។ បរិយាកាសត្រជាក់ និងសើមជានិជ្ចនេះគាំទ្រដល់ពពួករុក្ខជាតិ និងសត្វជាច្រើនប្រភេទ ពិសេសប្រភេទសត្វជាច្រើនដែលមានលក្ខណៈពិសេសសម្រាប់តែតំបន់នេះ។ ជាមួយនឹងដើមឈើដែលគ្របដណ្ដប់ដោយស្លែ វល្លិព្យួរ និងសត្វព្រៃដ៏សម្បូរបែប ព្រៃ Monteverde Cloud គឺជាឋានសួគ៌សម្រាប់អ្នកទេសចរណ៍ និងអ្នកចូលចិត្តធម្មជាតិ៕