បន្ទាប់ពីមានរឿងអាស្រូវស្នេហាកាលពីឆ្នាំ២០២១ សកម្មភាពសិល្បៈ Lucas ត្រូវស្រុតចុះនិងបានដកខ្លួនចេញពីក្រុម NCT កាលពីឆ្នាំ២០២៣ ពេលនេះប្រព័ន្ធផ្សព្វផ្សាយបានរាយការណ៍ Lucas តារារ៉េបហុងកុង នឹងបង្ហាញខ្លួននៅក្នុងរឿងភាគតៃវ៉ាន់។ ខណៈពេលដែលព័ត៌មានលម្អិតនៃស៊េរីនេះមិនទាន់មាននៅឡើយ ប៉ុន្តែលោកកំពុងចូលរួមរៀនសម្ដែង រាំ និងប្រដាល់។
Lucas បានថ្លែងអំណរគុណចំពោះឱកាសនេះថា៖ «ខ្ញុំពិតជាសប្បាយចិត្ត និងថ្លែងអំណរគុណចំពោះនាយក និងបុគ្គលិកដែលបានផ្តល់ឱកាសនេះដល់ខ្ញុំ។ នេះជាការសម្ដែងលើកដំបូងរបស់ខ្ញុំ ហើយខ្ញុំភ័យខ្លាំងណាស់ ប៉ុន្តែនាយក បុគ្គលិក និងលោកគ្រូអ្នកគ្រូបានផ្តល់ដំបូន្មានជាច្រើនដល់ខ្ញុំ ដែលអនុញ្ញាតឱ្យខ្ញុំរៀបចំបានល្អ ខ្ញុំនឹងប្រឹងប្រែងសម្តែងឱ្យអស់ពីសមត្ថភាព ហើយសង្ឃឹមថាអ្នកទាំងអស់គ្នានឹងទន្ទឹងរង់ចាំ និងចូលចិត្តវា»។
តារាចម្រៀងវ័យ២៦ឆ្នាំរូបនេះក៏បាននិយាយអំពីបទពិសោធន៍របស់ខ្លួននៅតៃវ៉ាន់ផងដែរថា៖ «មិត្តភក្តិតៃវ៉ាន់របស់ខ្ញុំសុទ្ធតែស្លូតបូត…គួរសម និងរួសរាយណាស់។ ម្ហូបតៃវ៉ាន់ឆ្ងាញ់ណាស់ ហើយអ្វីដែលខ្ញុំចូលចិត្តគឺបាយសាច់ជ្រូកបំពង និងម្ហូបឆ្នាំងភ្លើងក្តៅបែបតៃវ៉ាន់។ ខ្ញុំពិតជាចូលចិត្តតៃវ៉ាន់»។
គួរបញ្ជាក់ផងដែរថា Lucas បានបង្ហាញខ្លួនជាលើកដំបូងនៅក្នុងក្រុមចម្រៀងបុរសកូរ៉េខាងត្បូង NCT ក្នុងឆ្នាំ ២០១៨ ហើយបានចូលរួមជាមួយក្រុមរងដែលមានមូលដ្ឋាននៅប្រទេសចិន WayV និងក្រុម SuperM ។ ជាច្រើនឆ្នាំមកនេះ តារាប្រុសរូបនេះទទួលបានភាពល្បីល្បាញនៅក្នុងប្រទេសចិនសម្រាប់ការចូលរួមក្នុងកម្មវិធីជាច្រើន Keep Running ។ នៅខែសីហា ឆ្នាំ២០២១ Lucas មានភាពចម្រូងចម្រាស នៅពេលដែលអ្នកលេងអ៊ីនធឺណិតដែលអះអាងថាជាអតីតមិត្តស្រីរបស់លោកបានបញ្ចេញសារឯកជនហើយបានចោទប្រកាន់តារាប្រុសរូបនេះថាបោកបញ្ឆោត និងកេងប្រវ័ញ្ចហិរញ្ញវត្ថុនាង។ ក្រោយមកមានបុគ្គលបួននាក់ទៀតបានចេញមុខអះអាងថា លោកមិនស្មោះត្រង់ និងបានទាមទារហួសហេតុអំឡុងពេលទំនាក់ទំនងរបស់ពួកគេ។
ឆ្លើយតបទៅនឹងការចោទប្រកាន់របស់ពួកគេ Lucas បានបង្ហោះសារសូមទោសដែលសរសេរដោយដៃនៅលើ Instagram ដោយសូមទោសអ្នកគាំទ្រ និងអ្នកដែលឈឺចាប់ដោយសារតែខ្លួន។ លោកក៏បានចែករំលែកថាលោកនឹងបញ្ឈប់រាល់សកម្មភាព កម្សាន្ត របស់ខ្លួនសម្រាប់ពេលវេលាដើម្បីឆ្លុះបញ្ចាំងពីសកម្មភាពរបស់ខ្លួនឯង។
នៅឆ្នាំ ២០២៣ Lucas បានចាកចេញពីក្រុម NCT និង WayV ។ លោកបានត្រឡប់មកអាជីពសិល្បៈវិញនៅដើមឆ្នាំ២០២៤ នៅក្នុងស៊េរីភាពយន្តឯកសារពីរផ្នែក Freeze and Unfreeze ជាកន្លែងដែលលោកបានឆ្លុះបញ្ចាំងពីជីវិតរបស់ខ្លួន និងរឿងអាស្រូវ។ Lucas បានបង្ហាញខ្លួនទោលរបស់លោកក្នុងផលិតកម្ម SM នៅក្នុងខែមេសា ឆ្នាំ២០២៤ ជាមួយនឹងបទ Renegade៕
