លោកគ្រូក៏ឃាត់មិនបាន ទឹកភ្នែកក៏ទប់មិនជាប់ កូននេនច្រើនអង្គដែលធ្លាប់ស្ថិតក្រោមការមើលថែ និងបណ្ដុះបណ្ដាលដោយលោកគ្រូ ជួន កក្កដា សម្រក់ទឹកភ្នែកក្រោយលោកគ្រូលាចាកសិក្ខបទ បន្សល់នូវភាពអាលោះអាល័យ ប្រៀបដូចកូនៗដែលត្រូវបែកពីឪពុកលែងអាចរស់នៅជុំគ្នាបានដូចមុន។

មហាជន ច្បាស់ជាធ្លាប់បានជ្រាបមកហើយ អំពីវត្តប្រាសាទនាងខ្មៅ ដែលមិនត្រឹមតែជាទីកន្លែងស្នាក់អាស្រ័យ សម្រាប់ព្រះសង្ឃ និងជាទីកន្លែងសម្រាប់ធ្វើបុណ្យរបស់ពុទ្ធបរិស័ទប៉ុណ្ណោះទេ ប៉ុន្តែថែមទាំងជាទីកន្លែងផ្តល់ការរៀនសូត្រ ដល់ព្រះសង្ឃដែលក្មេងៗគ្មានទីពឹង និងជាកូនប្រជាពលរដ្ឋក្រខ្សត់រាប់រយអង្គផងដែរ ។

ព្រះសង្សក្មេងៗសរុបជាង ៣០០អង្គ ទទួលបានការទំនុកបម្រុង និងមើលថែយ៉ាងយកចិត្តពីសំណាក់លោកគ្រូជួន កក្កដា និង ព្រះសង្ឃាភិរ័ត ភិន វុទ្ធី ជាព្រះចៅអធិការវត្តនេះ។ បើតាមការលើកឡើងរបស់លោកគ្រូ ជួន កក្កដាកន្លងមកបានអោយដឹងថា ភិក្ខុ និងលោកនេនទាំងនោះសុទ្ធតែជាក្មេងមកពីគ្រួសារទីទាល់ក្រ ជាក្មេងដែលត្រូវឪពុកម្តាយលែងលះគ្នាមិនមានទីពំនាក់ ហើយធ្វើដំណើរមកពីទីជិតឆ្ងាយ ទាំង២៥ខេត្ត – រាជធានី ដើម្បីសុំវត្តស្នាក់អាស្រ័យ និងបួសរៀន ។

ការគង់ស្នាក់អាស្រ័យ ម្ហូបសម្រាប់ឆាន់ ការសិក្សារៀនសូត្រដែលមានទាំងភាសាខ្មែរ អង់គ្លេស និងកុំព្យូទ័រ គឺមិនតម្រូវអោយនេន រឺសង្ឃអង្គណាចំណាយសម្បីបន្តិចឡើយ។ កត្តាទាំងនេះហើយ បានធ្វើអោយព្រះសង្ឃក្មេងៗទាំងនេះ ទទួលបានចំណេះ ភាពកក់ក្ដៅ និងការយកចិត្តទុកដាក់ ដែលគ្រប់អង្គមិនដែលទទួលបានពីគ្រួសារពីមុនមកនោះទេ។ ដូច្នេះ ការដែលលោកគ្រូជួន កក្កដា ដែលដូចជាឪពុកទី២ បានលាចាកសិក្ខាបទបែបនេះ ធ្វើអោយនេនតូចៗជាច្រើន ហាក់មិនអាចធ្វើព្រះទ័យបាន ប្រៀបដូចជាអារម្មណ៍ដែលត្រូវបាត់បង់ភាពកក់ក្ដៅជាលើកទី២អញ្ចឹងដែរ។

ដោយឡែក អតីតភិក្ខុជួន ភក្ដីបានលើកឡើងដែរថា ខ្លួននឹងមិនបានឃ្លាតឆ្ងាយពីវត្តប្រាសាទនាងខ្មៅ ដែលធ្លាប់មានអនុស្សាវរីយ៍អស់១៣ឆ្នាំនេះទេ។ លោកនឹងបន្តបំពេញកិច្ចការងារផ្សេងៗ ដើម្បីជួយទ្រទ្រង់ដល់សាមណេ ភិក្ខុ កូននេន និងសេក្ខលោក ដែលគង់ និងស្នាក់នៅវត្តប្រាសាទនាងខ្មៅដូចដើម ដូចនេះសូមកុំមានការព្រួយបារម្ភអី៕

ប្រាប់តៗគ្នាផង បុណ្យទន្លេនៅខេត្តតាកែវរៀបចំស្អាតណាស់ មានកម្មវិធីកម្សាន្តយ៉ាងសម្បូររបែបទៀត ហើយមានរយៈពេលតែ៣ថ្ងែទេ បើមិនបានមកលេងទេ ប្រ.យ័ត្នស្ដាយក្រោយ។

ព្រឹត្តិការណ៍បុណ្យទន្លេឆ្នាំនេះ គឺជាលើកទី៩ ហើយនឹងត្រូវប្រារព្ធឡើងនៅក្នុងខេត្តតាកែវ ចាប់ពីថ្ងៃទី ២១-២៣ ខែមីនានេះ ក្នុងបរិវេណសួនច្បារ “មាត់បឹងតាកែវ” រៀបចំឡើងដោយក្រសួងទេសចរណ៍ និងរដ្ឋបាលខេត្តតាកែវ ដែលមានការតុបតែងយ៉ាងស្រស់ស្អាត ព្រមទាំងមានកម្មវីធីកម្សាន្តសប្បាយៗជាច្រើនសម្រាប់ទទួលភ្ញៀវទេសចរមកពីគ្រប់ទិសទី។

ដូចធ្លាប់បានដឹងកន្លងមកហើយថា ខេត្តតាកែវជាខេត្តមួយដែលស្ថិតនៅមិនឆ្ងាយពីភ្នំពេញប៉ុន្មាននោះទេ ដែលមានទាំងភ្នំ ទន្លេ និងប្រាសាទបុរាណថែមទៀត។ ក្នុងនេះផងដែរ ការប្រារព្ធព្រឹត្តិការណ៍ “បុណ្យទន្លេ” លើកទី៩ នៅក្នុងខេត្តតាកែវ គឺធ្វើឡើងក្រោមប្រធានបទ៖ “គុណតម្លៃនៃទន្លេ ផ្សារភ្ជាប់វប្បធម៌ និងទេសចរណ៍ធម្មជាតិ” ក្នុងគោលបំណងផ្សព្វផ្សាយពីវប្បធម៌ និងអរិយធម៌ តាមរយៈការទាក់ទាញភ្ញៀវទេចរ។

ព្រឹត្តិការណ៍បុណ្យទន្លេលើកទី៩នេះ ក៏នឹងមានការអញ្ជើញចូលរួមដ៏ខ្ពង់ខ្ពស់ពីសម្ដេចមហាបវរធិមតី ហ៊ុន ម៉ាណែត នាយករដ្ឋមន្រ្តីនៃព្រះរាជាណាចក្រកម្ពុជា រួមជាមួយនឹងថ្នាក់ដឹកនាំសំខាន់ៗផ្សេងទៀត។ កម្មវិធីដ៏អធឹកអធម និងសោមនស្សរីករាយនេះ នឹងផ្ដល់នូវទស្សនីយភាព និងសកម្មភាពកម្សាន្តដូចជា៖ ការសម្ដែងសិល្បៈបុរាណ, ការប្រគុំតន្រ្តីរបស់តារាល្បីៗប្រចាំប្រទេស, ការប្រកួតប្រដាល់ រត់ប្រណាំង អុកយក្ស និងផ្សេងៗជាច្រើនប្រភេទ, ការតាំងពិពណ៌សមិទ្ធផល និងផលិតផលក្នុងស្រុក, មហោស្រពម្ហូបអាហារ និងភេសជ្ជៈ ជាពិសេសនៅពេលរាត្រី នឹងមានការបង្ហោះគោម រួមជាមួយការបាញ់កាំជ្រួចអបអរសាទរ ពិធីបុណ្យទន្លេនេះផងដែរ។

អាស្រ័យហេតុនេះ ក្រសួងទេសចរណ៍ សូមអញ្ជើញភ្ញៀវជាតិ អន្តរជាតិ និងសាធារណៈជនចូលរួមទស្សនា និងកម្សាន្តអោយបានច្រើនកុះករ៕

ព្រឹត្តិការណ៍ “សមរាត្រីអង្គរ” រឺ Equinox Angkor ដែលត្រូវបានស្គាល់ថាជាបាតុភូតព្រះអាទិត្យ រះចំកំពូលកណ្ដាលនៃប្រាសាទអង្គរវត្ត នឹងកើតមានឡើងនៅចន្លោះថ្ងៃទី២១-២៣ ខែមីនា ឆ្នាំ២០២៥នេះ ដូច្នេះហើយវាជាឳកាសមួយដែលអ្នកមិនគួររំលងនោះទេ។

យោងតាមការបង្ហោះរបស់ក្រសួងទេសចរ បានអោយដឹងថា ព្រឹត្តិការណ៍ “សមរាត្រីអង្គរ” អាចកើតមានត្រឹម១-២ ដងប៉ុណ្ណោះក្នុងមួយឆ្នាំ ដែលមាននៅចន្លោះខែមីនាម្ដង និងនៅខែកញ្ញាម្ដង។ ប៉ុន្តេបាតុភូតនេះអាចមើលឃើញបានច្បាស់ តែនៅក្នុងរដូវប្រាំងប៉ុណ្ណោះ ពោលគឺខែមីនា។ ហេតុនេះ នៅថ្ងៃទី២១-២៣ ខាងមុខ អ្នកជំនាញ និងក្រសួងបានបញ្ជាក់ថា នឹងមានព្រឹត្តិការណ៍នេះកើតឡើងនៅចំកំពូលកណ្ដាលរបស់ប្រាសាទអង្គរវត្ត ចន្លោះម៉ោង៥:០០នាទីព្រឹក។

បាតុភូតដ៏អស្ចារ្យមួយនេះ បានសបញ្ជាក់អោយឃើញពីលក្ខណៈពិសេសរបស់បុព្វបុរសខ្មែរ ក្នុងការគិតគូរពីប្លង់ស្ថាបត្យកម្ម ដែលមានទាំងការគុណគូរគណិតវិទ្យា ដំណើរតារាសាស្រ្ត រួមផ្សុំជាមួយជំនឿ ទើបអាចសាងសង់បាននូវប្រាសាទមួយដែលអាចអោយព្រះអាទិត្យរះចំកណ្ដាលកំពូលក្នុងពេលវេលាដែលសឹងតែដដែលៗជារៀងរាល់ឆ្នាំដូចនេះ។

គួរជម្រាបថា ព្រឹត្តិការណ៍ “សមរាត្រី Equinox Angkor គឺជាព្រឹត្តិការណ៍ដ៏ពេញនិយមបំផុតមួយ ដែលអាចទាក់ទាញភ្ញៀវទេសចរជាតិ និងអន្តរជាតិមកពីគ្រប់ទិសទី ដើម្បីមកប្រជុំគ្នានៅមុខច្រកចូលទិសខាងលិចនៃប្រាសាទអង្គរវត្ត សម្រាប់ការទស្សនា និងផ្តិតយករូបភាពពីព្រឹត្តិការណ៍ដ៏អស្ចារ្យមួយនេះ។

អាស្រ័យដូចបានជម្រាបជូនដូចខាងលើ សូមភ្ញៀវជាតិ-អន្តរជាតិ ជាពិសេសសាធារណៈជនដែលនៅក្នុងប្រទេស ចូលរួមទស្សនាមហាព្រឹត្តិការណ៍នេះកុំបីអាកខាន និងយ៉ាងហោចណាស់គួរទៅទស្សនាដោយផ្ទាល់អោយបានម្ដងក្នុងមួយឆាកជីវិត៕

«ប្រាសាទភ្នំក្អែកពង» ជាប្រាសាទបុរាណមួយដែលមានរចនាបទដូចទៅនឹងប្រាសាទសំបូរព្រៃគុកនៅក្នុងទឹកដីខេត្តកំពង់ធំដែរ។ ប្រាសាទនេះសាងសង់ឡើងអំពីឥដ្ឋ ស្ថិតនៅលើចង្កេះភ្នំក្អែកពង ក្នុងភូមិក្អែកពង ឃុំតាំងស្យា ស្រុកភ្នំស្រួច ខេត្តកំពង់ស្ពឺ។ បើតាមការសិក្សារបស់មន្រ្តីជំនាញផ្នែកបុរាណវិទ្យា បានឱ្យដឹងថា ប្រាសាទភ្នំក្អែកពងត្រូវបានបុព្វបុរសសាងសង់ឡើងប្រហែលជានៅចុងសតវត្សទី៧ ឬដើមសតវត្សទី៨ ក្នុងរាជ្ជកាលព្រះបាទឥសានវ័រ្មនទី១ ចន្លោះឆ្នាំ ៦១៦-៦៣៥ ដើម្បីឧទ្ទិសដល់ព្រះឥសូរ។

បច្ចុប្បន្នប្រាសាទដ៏កំសត់នេះហាក់រំលងភ្នែកភ្ញៀវទេសចរ ដោយសារមិនសូវមានអ្នកស្គាល់។ ដូច្នេះដើម្បីទៅដល់ទីតាំងប្រាសាទ យើងត្រូវធ្វើដំណើរចេញពីរាជធានីភ្នំពេញ ស្របតាមបណ្ដោយផ្លូវជាតិលេខ៤​ មកដល់គីឡូម៉ែត្រលេខ ៧០-៧១ យើងនឹងឃើញផ្លាកសញ្ញារោងចក្រផលិតគ្រឿងផ្ទុះ C06 របស់រាជរដ្ឋាភិបាលនៅខាងស្ដាំដៃ ហើយបត់ចូលតាមផ្លូវនោះប្រមាណ ១ គីឡូម៉ែត្រ នោះយើងនឹងឃើញមានស្រះមួយនៅឆ្វេងដៃ ក្បែរជើងភ្នំក្អែកពងនេះតែម្តង។

ប្រាសាទភ្នំក្អែកពង សង់បែរមុខទៅទិសខាងកើត លើចង្កេះភ្នំក្អែកពង មានចម្ងាយត្រឹមតែ ១៥០ ម៉ែត្រប៉ុណ្ណោះពីជើងភ្នំ។ ប្រាសាទបុរាណមួយនេះត្រូវបានអ្នកស្រុកជឿថា ជាប្រាសាទសក្តិសិទ្ធសុំអ្វីបានហ្នឹង ហើយក៏ជាទីកន្លែងប្រារព្ធពិធីបួងសួងសុំទឹកកភ្លៀងផងដែរ។ យោងតាមអ្នកបុរាណវិទ្យា ប្រាសាទភ្នំក្អែកពងនេះ ទំនងជាប្រាសាទដំបូងគេនៅក្នុងទឹកដីខេត្តកំពង់ស្ពឺ ហើយក៏ជាប្រាសាទបុរាណតែមួយគត់ ដែលនៅរក្សារូបរាងបានល្អជាងគេផងដែរ៕

នាព្រឹកថ្ងៃទី២១ ខែមីនា ក្នុងពិធីបំពាក់ឋានន្តរសក្តិថ្នាក់នាយឧត្តមសេនីយ៍ផុតលេខផ្កាយមាស៥ នៃកងយោធពលខេមរភូមិន្ទ ជូនសម្តេច ទៀ បាញ់ និងសម្តេច ម៉ែន សំអន សម្តេចតេជោហ៊ុន សែន បានពន្យល់ច្បាស់ៗ ជុំវិញមតិមហាជនដែលមានភាពងឿងឆ្ងល់ ហេតុអ្វីមិនមានការបំពាក់ឋានន្តរសក្តិថ្នាក់នាយឧត្តមសេនីយ៍ផុតលេខផ្កាយមាស៥ ជូនសម្តេចក្រឡហោម ស ខេង។

សម្តេច ហ៊ុន សែន បានមានប្រសាសន៍ថា៖”សម្តេច ស ខេង អតីតរដ្ឋមន្ត្រីក្រសួងមហាផ្ទៃ ស្ថិតក្នុងក្របខណ្ឌស៊ីវិល។ កាលពីអំឡុងឆ្នាំ១៩៩៧-១៩៩៨ សម្តេច ស ខេង ចង់ត្រឹមតែពាក់សក្តិ៥ប៉ុណ្ណោះ”។

ដោយឡែកសម្តេច ទៀ បាញ់ ធ្លាប់អតីតរដ្ឋមន្ត្រិក្រសួងការពារជាតិ រីឯសម្តេច ម៉ែន សំអន ជាអតីតរដ្ឋមន្ត្រីក្រសួងអធិការកិច្ច ទំនាក់ទំនងព្រឹទ្ធសភា និងរដ្ឋសភា ស្ថិតក្នុងក្របខណ្ឌយោធា។

គួរបញ្ជាក់ថា តាំងពីឆ្នាំ២០០៩មក មានតែឥស្សរជន៥រូបប៉ុណ្ណោះ ដែលទទួលបានឋានន្តរសក្តិថ្នាក់នាយឧត្តមសេនីយ៍ផុតលេខ ផ្កាយមាស៥ រួមមាន សម្តេច ជា ស៊ីម, សម្តេច ហេង សំរិន, សម្តេច ហ៊ុន សែន, សម្តេច ទៀ បាញ់ និងសម្តេច ម៉ែន សំអន៕