តាមការស្រាវជ្រាវចុងក្រោយរបស់មន្ទីរពេទ្យនៅទីក្រុងប៉េកាំង ប្រទេសចិន បង្ហាញថា ការបរិភោគអាហារមានរសជាតិប្រៃខ្លាំងពេកប្រឈមនឹងអាយុខ្លី បើទោះជាយើងពុំបានផឹកស្រា និងពុំប្រើប្រាស់ថ្នាំបញ្ចុះសម្ពាធឈាមក្តី ។ ការស្រាវជ្រាវនេះបានណែនាំឱ្យបរិភោគអាហារតាមវិធីមួយចំនួនដើម្បីឱ្យមានសុខភាពរឹងមាំ និងប្រើប្រាស់គ្រឿងផ្សំផ្សេងៗជំនួសអំបិល ។
ការសិក្សាបានតាមដានមនុស្សចំនួន៦,៥១០នាក់ នៅទីក្រុងប៉េកាំង អស់រយៈពេលជាង៣ឆ្នាំ ហើយលទ្ធផលបង្ហាញថា ៖
-អ្នកមានបរិមាណសូដ្យូមច្រើនក្នុងទឹកនោម ឬខ្ពស់ជាង៥ក្រាមក្នុង១ថ្ងៃ ប្រឈមនឹងការស្លាប់កើនឡើងទ្វេដង បើធៀបនឹងអ្នកមានបរិមាណសូដ្យូម ចាប់ពីជាង៣ក្រាម ទៅជាង៤ក្រាមក្នុង១ថ្ងៃ
-ក្រុមមនុស្សពុំផឹកស្រា គឺការបរិភោគអាហារប្រៃខ្លាំងកាន់តែធ្វើឱ្យប្រឈមនឹងការស្លាប់មុនអាយុ
-ក្រុមមនុស្សពុំប្រើប្រាស់ថ្នាំបញ្ចុះសម្ពាធឈាម គឺការបរិភោគអាហារប្រៃខ្លាំង ក៏ប្រឈមនឹងការស្លាប់មុនអាយុដែរ ។
ការស្រាវជ្រាវនេះបានផ្តោតសំខាន់លើការគ្រប់គ្រងបរិមាណសូដ្យូមក្នុងអាហារ ដោយចៀសវាងការបរិភោគប្រៃខ្លាំង ខណៈអង្គការសុខភាពពិភពលោក (WHO) បានណែនាំឱ្យបរិភោគអាហារមានជាតិសូដ្យូម មិនលើស២ក្រាមក្នុង១ថ្ងៃ ដើម្បីមានសុខភាពរឹងមាំ ។
តើគួរធ្វើដូចម្តេចខ្លះដើម្បីឱ្យមានសុខភាពរឹងមាំ?
-កាត់បន្ថយការបរិភោគអាហារកែច្នៃ អាហារកញ្ចប់ និងអាហារមានរសជាតិដិត
-អានស្លាកសញ្ញានៅលើអាហារដើម្បីត្រួតពិនិត្យបរិមាណសូដ្យូមក្នុងអាហារ
-ចម្អិនអាហារដោយគ្រឿងទេសផ្សេងៗជំនួសអំបិល
-ហាមដាច់ខាតថែមអំបិលក្នុងអាហារ
-ពិគ្រោះយោបល់ជាមួយគ្រូពេទ្យ ឬអ្នកជំនាញម្ហូបអាហារ ដើម្បីសុំការណែនាំក្នុងការកាត់បន្ថយបរិមាណសូដ្យូមក្នុងអាហារ ។
ហេតុនេះ ការកាត់បន្ថយបរិមាណសូដ្យូមក្នុងអាហារ ពិតជាមានសារៈសំខាន់ខ្លាំងណាស់ក្នុងការថែទាំសុខភាពឱ្យល្អ ព្រមទាំងកាត់បន្ថយហានិភ័យនៃការស្លាប់មុនអាយុ ៕
