កងទ័ពរំដោះប្រជាជនចិន បានចេញសេចក្តីព្រមានភ្លាមៗ លើការប្រឆាំងនឹងការបំបែកខ្លួនរបស់តៃវ៉ាន់ ពីប្រទេសចិន។

បើតាមអ្នកនាំពាក្យយោធាចិនលោក Wu Qian បានព្រមានថា៖”ចិន នឹងធ្វើសកម្មភាពលឿនបំផុត ប្រសិនបើកោះតៃវ៉ាន់ប្រកាសឯករាជ្យ ហើយប្រទេសដែលគាំទ្រតៃវ៉ាន់ត្រូវតែដកខ្លួនចេញ បើមិនដូចច្នេះភ្លើងសង្គ្រាមអាចនឹងកើតមានឡើង”។

យ៉ាងណាមិញ នេះមិនមែនជាលើកទីមួយទេ ដែលចិនព្រមានតៃវ៉ាន់ ព្រោះកន្លងមក ចិនតែងតែព្រមាននឹងប្រើកម្លាំងយោធា ដើម្បីទាមទារកោះនេះមកគ្រប់គ្រងវិញ។

នាប៉ុន្មានឆ្នាំចុងក្រោយនេះ តៃវ៉ាន់ បានសម្ងំស្វែងរកប្រទេសគាំទ្រ ដើម្បីឱ្យខ្លួនប្រកាសឯករាជ្យ និងក្លាយជាប្រទេសពេញសិទ្ធមានការទទួលស្គាល់ពីអង្គការសហប្រជាជាតិ។

គួរបញ្ជាក់ថា តៃវ៉ាន់ មិនត្រូវបានគេចាត់ទុកជាប្រទេសពេញលេញនោះទេ ក្រោយមានតែ១២ប្រទេសប៉ុណ្ណោះ នៃសមាជិកអង្គការសហប្រជាជាតិចំនួន១៩៨ ទទួលស្គាល់ប្រទេសនេះជារដ្ឋឯករាជ្យ៕

ប្រទេសចិន ៖ រោងចក្រមួយកន្លែងទីក្រុងឆុងឈីង ប្រទេសចិន បានប្រើប្រាស់ឧបករណ៍បំពាក់បច្ចេកវិទ្យាទំនើប ដោយការប្រមូលសំរាមនៅតាមផ្ទះពលរដ្ឋមកដុត ដើម្បីផលិតជាអគ្គិសនីពុំប៉ះពាល់បរិស្ថាន ។ ក្រោយពីបញ្ជូនសំរាមតូច-ធំចូលក្នុងឧបករណ៍រួច វានឹងដុតសំរាមទាំងអស់នៅសល់តែកំទេច រួចហើយ ក្រុមហ៊ុនក៏ប្រមូលកំទេចសំរាមទុកសាងសង់ផ្លូវថ្នល់ ដែលនេះជាការជួយកាត់បន្ថយការចំណាយប្រាក់យ៉ាងច្រើនរបស់រដ្ឋាភិបាលក្នុងការកម្ចា.ត់សំរាម ។

ក្រុមហ៊ុនដែលមានជំនាញផ្នែកដុតសំរាមផលិតជាអគ្គិសនីនេះ ឈ្មោះ Chongqing Sanfeng Environmental Industrial Group Co., Ltd បានប្រមូលសំរាមតាមផ្ទះពលរដ្ឋនៅភាគឦសានទីក្រុងឆុងឈីង មកដុតផលិតជាអគ្គិសនី ហើយក្រុមហ៊ុនអាចកម្ចាត់សំរាមរហូតដល់៣ពាន់តោនក្នុង១ថ្ងៃ ។ កំដៅដែលកើតឡើងដោយសារការដុតសំរាមនឹងត្រូវយកមកផលិតជាប្រភពថាមពលអគ្គិសនី រីឯទឹកបង្ហូរពីឧបករណ៍ដុតសំរាម ក្រុមហ៊ុនយកមកចម្រាញ់ជាទឹកបរិសុទ្ធ និងស្រោចដំណាំ ខណៈកំទេចសំរាមនឹងប្រមូលទុកសាងសង់ផ្លូវ ។

ប៉ុន្តែសំរាមភាគច្រើននៅទីក្រុងឆុងឈីង គឺជាសំរាមសើម ដូចជា ៖ កាកសំណល់បន្លែ-អាហារ សំបកផ្លែឈើ ស្មៅ និងស្លឹកឈើ ដែលធ្វើឱ្យក្រុមហ៊ុនពិបាកដុតវាឱ្យក្តៅដើម្បីផលិតអគ្គិសនី ទើបធ្វើឱ្យការផលិតអគ្គិសនីពីសំរាមនៅទីក្រុងនេះ បានតិចជាងទីក្រុងផ្សេងៗ ។ ប៉ុន្តែការកម្ចាត់សំរាមរបស់ក្រុមហ៊ុនអាចជួយឱ្យរដ្ឋាភិបាលកាត់បន្ថយការចំណាយប្រាក់យ៉ាងច្រើនក្នុងការកម្ចាត់សំរាម ។

ក្រៅពីនេះ ក្រុមហ៊ុនបានប្រើប្រាស់កម្លាំងកម្មករតិចធ្វើការក្នុងរោងចក្រដុតសំរាម ដើម្បីកាត់បន្ថយគ្រោះថ្នាក់នៅកន្លែងការងារ ។ ទោះជាការកម្ចាត់សំរាមរបស់ក្រុមហ៊ុនចិនប្រើប្រាស់បច្ចេកវិទ្យាថ្មីក្តី ប៉ុន្តែវានឹងទទួលបានការពេញនិយមកាន់តែខ្លាំងនៅតាមប្រទេសនានា ។ បច្ចុប្បន្ន ក្រុមហ៊ុនបានលក់បច្ចេកវិទ្យាកម្ចាត់សំរាមទៅឱ្យប្រទេសជាច្រើន ដូចជា ៖ អូស្ត្រាលី ដាណឺម៉ាក និងថៃ ។

ប្រទេសថៃបានទិញបច្ចេកវិទ្យាកម្ចាត់សំរាមផលិតជាអគ្គិសនីពីក្រុមហ៊ុនចិន អស់រយៈពេល១០ឆ្នាំហើយ គឺរោងចក្រជាច្រើននៅថៃបានប្រើប្រាស់បច្ចេកវិទ្យាដុតសំរាមរបស់ចិន ដូចជា ៖ រោងចក្រនៅភូកេត ណាខនប៉ាធុម ស្រះបុរី និងណាខនរ៉ាជសីម៉ា ។

ការកម្ចាត់សំរាមផលិតជាអគ្គិសនីតាមរយៈឧបករណ៍ទំនើប គឺបង្ហាញពីជម្រើសថ្មីក្នុងការវិនិយោគ ដោយសារបច្ចុប្បន្ន អគ្គិសនីនៅថៃមានតម្លៃខ្ពស់ ។ នាយកក្រុមហ៊ុនចិននិយាយថា ការផលិតអគ្គិសនីពីការដុតសំរាម ពិតជាមានប្រយោជន៍ដល់សង្គម ច្រើនជាងការទទួលបានចំណូលតែម្យ៉ាង ហើយអគ្គិសនីដែលផលិតបាននឹងអាចជួយជំរុញសេដ្ឋកិច្ច ៕

ការតវ៉ារបស់បងប្អូនប្រជាពលរដ្ឋខ្មែរទាំងក្នុងស្រុក និងបរទេស ចាប់ផ្តើមទទួលបានលទ្ធផលបណ្តើរៗហើយខ្មែរយើង! ថៃបានប្រាប់ពលរដ្ឋខ្លួនកុំឱ្យគិតច្រើន «ករណីពលរដ្ឋខ្មែរនៅក្រៅប្រទេសទាមទារយកកោះគុត» ព្រោះពួកគេមានសិទ្ធិក្នុងការតវ៉ា ។ មិនតែប៉ុណ្ណោះ អតីតនាយករដ្ឋមន្ត្រីថៃ លោក Srettha Thavisin បាននិយាយមកកាន់សារព័ត៌មានថា ៖ «ក្រៅពីបញ្ហាកោះគុត ថៃគួរបែងចែកផលប្រយោជន៍ឧស្ម័នធម្មជាតិនៅបាតសមុទ្រជាមួយកម្ពុជា ព្រោះវាពុំមែនជារបស់ថៃតែមួយទេ វាជារបស់កម្ពុជាដែរ ។ បើថៃរវល់តែតវ៉ាជាមួយកម្ពុជា ថៃនឹងពុំទទួលបានប្រយោជន៍ពីឧស្ម័ននេះ ពីព្រោះតម្លៃឧស្ម័ននឹងធ្លាក់ចុះជាបន្តបន្ទាប់ ចាប់ពី៥ឆ្នាំ ទៅ១០ឆ្នាំខាងមុខ» ។

កាលពីដើមខែមីនា ឆ្នាំ២០២៥ សារព័ត៌មានថៃរាយការណ៍ថា ពលរដ្ឋខ្មែររស់នៅក្រៅប្រទេសចាប់ផ្តើមប្រមូលផ្តុំគ្នាតវ៉ាទាមទារយកកោះគុតពីថៃ ដូចជា នៅជប៉ុន និងកូរ៉េខាងត្បូង ។ នាពេលថ្មីៗនេះ ពលរដ្ឋខ្មែរបានប្រមូលផ្តុំគ្នាជាច្រើនកន្លែងនៅទីក្រុងសេអ៊ូល ប្រទេសកូរ៉េខាងត្បូង ដើម្បីទាមទារកោះគុតពីថៃមកវិញ ទើបសារព័ត៌មានថៃសុំសម្ភាសន៍ជាមួយរដ្ឋមន្ត្រីក្រសួងការពារជាតិថៃ ហើយរដ្ឋមន្ត្រីក្រសួងការពារជាតិថៃប្រាប់ថា ការតវ៉ានៅទីក្រុងសេអ៊ូល គឺជាសិទ្ធិរបស់ពលរដ្ឋខ្មែរ ។

លោក Phumtham Wechayachai ឧបនាយករដ្ឋមន្ត្រី និងរដ្ឋមន្ត្រីក្រសួងការពារជាតិនិយាយថា សូមពលដ្ឋថៃកុំគិតច្រើន ពីព្រោះតាមលទ្ធិប្រជាធិបតេយ្យ គឺពលរដ្ឋប្រទេសនីមួយៗមានសិទ្ធិបញ្ចេញមតិដូចគ្នា ឬខុសគ្នា ។ ហេតុនេះ ការតវ៉ាទាមទារកោះគុតរបស់ពលរដ្ឋខ្មែរនៅកូរ៉េខាងត្បូង គឺជាសិទ្ធិរបស់ពួកគេ ហើយការតវ៉ានេះកើតឡើងនៅកូរ៉េខាងត្បូង វាជារឿងរបស់កូរ៉េខាងត្បូង ប៉ុន្តែសូមកុំឱ្យប៉ះពាល់ដល់អធិបតេយ្យភាពថៃ ។ យើងគ្មានបញ្ហាអ្វីទេ ពីព្រោះមនុស្សគ្រប់រូបមានសិទ្ធិនិយាយស្តី ។

ប៉ុន្តែពលរដ្ឋថៃបានបង្ហាញក្តីបារម្ភយ៉ាងខ្លាំង ក្រោយពីពលរដ្ឋខ្មែររស់នៅប្រទេសជប៉ុន និងកូរ៉េខាងត្បូង ប្រមូលផ្តុំគ្នាតវ៉ាទាមទារកោះគុតពីថៃ ព្រមទាំងបារម្ភថា តើនៅថ្ងៃខាងមុខ ពលរដ្ឋខ្មែររស់នៅប្រទេសផ្សេងទៀត នឹងនាំគ្នាតវ៉ាទាមទារកោះគុត ដូចពលរដ្ឋខ្មែរនៅកូរ៉េខាងត្បូងដែរឬទេ?

គួរបញ្ជាក់ថា ពលរដ្ឋខ្មែររស់នៅ និងធ្វើការនៅប្រទេសកូរ៉េខាងត្បូង ប្រមាណជាង២ពាន់នាក់ បាននាំគ្នាតវ៉ានៅទីក្រុងសេអ៊ូល ដើម្បីទាមទារឱ្យរដ្ឋាភិបាលខ្មែរបញ្ចប់ការចរចាទ្វេភាគីជាមួយរដ្ឋាភិបាលថៃ ហើយប្តឹងរឿងកោះគុតទៅតុលាការអន្តរជាតិ (ICJ) ដោយសារបច្ចុប្បន្ន ថៃបានគ្រប់គ្រងកោះនេះ ។

ដោយឡែក អតីតនាយករដ្ឋមន្ត្រីថៃ លោក Srettha Thavisin បាននិយាយមកកាន់សារព័ត៌មានថា ក្រៅពីបញ្ហាកោះគុត ថៃគួរបែងចែកផលប្រយោជន៍ឧស្ម័នធម្មជាតិនៅបាតសមុទ្រជាមួយកម្ពុជា បើទោះជាមន្ត្រីគណបក្សប្រឆាំងថៃពុំព្រមចរចាជាមួយកម្ពុជា និងអះអាងថា ឧស្ម័នធម្មជាតិជារបស់ថៃ ១០០% ។ លោកថា ៖ «ថៃគួរបែងចែកផលប្រយោជន៍ឧស្ម័នធម្មជាតិជាមួយកម្ពុជា ពីព្រោះវាពុំមែនជារបស់ថៃតែមួយទេ វាជារបស់កម្ពុជាដែរ ។ បើថៃរវល់តែតវ៉ាជាមួយកម្ពុជា ថៃនឹងពុំទទួលបានប្រយោជន៍ពីឧស្ម័ននេះ ពីព្រោះតម្លៃឧស្ម័ននឹងធ្លាក់ចុះជាបន្តបន្ទាប់ ចាប់ពី៥ឆ្នាំ ទៅ១០ឆ្នាំខាងមុខ» ។

ហេតុនេះ ថៃគួរតែសុំបែងចែកឧស្ម័នធម្មជាតិនៅបាតសមុទ្រពាក់កណ្តាលជាមួយកម្ពុជា ហើយក្រុមហ៊ុននានានឹងដាក់ទីតាំងយកឧស្ម័នធម្មជាតិនៅខាងថៃ គឺនឹងធ្វើឱ្យថៃទទួលបានប្រយោជន៍ច្រើនជាង៥០% ដោយសារថៃមានឧបករណ៍ច្រើនសម្រាប់យកឧស្ម័ន ។

បើទោះជាយ៉ាងណាក្តី ព័ត៌មានខាងលើគ្រាន់តែជាការបកប្រែក្រៅផ្លូវការ និងចុះផ្សាយលើបណ្តាញសង្គមពីភាគីថៃតែម្ខាងប៉ុណ្ណោះ ។ លទ្ធផល និងព័ត៌មានលម្អិតពីបញ្ហា «ករណីពលរដ្ឋខ្មែរនៅក្រៅប្រទេសទាមទារយកកោះគុត» ឱ្យរញ្ជួយដល់ប្រទេសថៃ សារព័ត៌មាន KBN News យើងខ្ញុំនឹងផ្សាយជូនបន្ថែមទៀត ៕

មហាជនបានចាប់អារម្មណ៍នឹងតារាសម្តែងស្រីឈ្មោះ ជេន ស៊ីមួ (Jane Seymour) ជនជាតិអង់គ្លេសកាត់អាមេរិក បើទោះជាមានអាយុរហូតដល់៧៤ឆ្នាំក្តី ប៉ុន្តែនៅតែរក្សាសម្រស់ស្អាតដូចស្ត្រីអាយុជាង៤០ឆ្នាំ ហើយមនុស្សភាគច្រើនពុំចង់ជឿថា អ្នកស្រីមានអាយុច្រើនបែបនេះទេ ។ អ្នកស្រី ស៊ីមួ បានប្រាប់ថា ដោយសារទម្លាប់ការបរិភោគអាហារទាំងនេះ និងពេញចិត្តជាមួយជីវិតខ្លួនឯង ទើបធ្វើឱ្យអ្នកស្រីមានសុខភាពល្អ និងសម្រស់ក្មេងវ័យ ។

អ្នកស្រីបានល្បីល្បាញ និងមានគេស្គាល់ច្រើន ក្រោយពីអ្នកស្រីសម្តែងភាពយន្ត James Bond កាលពីឆ្នាំ១៩៧៣ រឿង «Live and Let Die» ហើយអ្នកស្រីតែងតែប្រាប់ពីគន្លឹះធ្វើឱ្យសម្រស់ក្មេងវ័យ និងការថែទាំសុខភាពរបស់ខ្លួនជានិច្ច ។ អ្នកស្រីបានប្រាប់ពីគន្លឹះថែទាំខ្លួនឱ្យស្អាតជាអមតៈទៅកាន់សារព័ត៌មានបរទេសថា អ្នកស្រីពុំធ្លាប់សម្រកទម្ងន់ទេកន្លងមក គ្រាន់តែអ្នកស្រីបរិភោគអាហារដើម្បីសុខភាព និងអាហារដែលខ្លួនចូលចិត្តប៉ុណ្ណោះ ពីព្រោះវាធ្វើឱ្យអ្នកស្រីមានសេចក្តីសុខ និងរីករាយនឹងការបរិភោគអាហារ ។

គន្លឹះអាថ៌កំបាំងក្នុងការបរិភោគអាហារ គឺនៅពេលព្រឹក អ្នកស្រីតែងតែផឹកកាហ្វេ និងបរិភោគស៊ុតស្ងោរ ដើម្បីឱ្យរាងកាយទទួលបានប្រូតេអ៊ីន ។ វាជួយឱ្យអ្នកស្រីឆ្អែតបានយូរ និងកាត់បន្ថយចំណង់បរិភោគអាហារ ដោយសារស៊ុតពណ៌ស អាចជួយបង្កើតសាច់ដុំយ៉ាងមានប្រសិទ្ធភាព ។ បន្ទាប់មក ចាប់ពីម៉ោង១២ថ្ងៃត្រង់ រហូតដល់ពេលរសៀល អ្នកស្រីបរិភោគអាហារឱ្យឆ្អែត ហើយអ្នកស្រីចូលចិត្តអាហារបែបពលរដ្ឋរស់នៅបណ្តាប្រទេសតាមឆ្នេរសមុទ្រមេឌីទែរ៉ាណេ គឺបរិភោគគ្រាប់ធញ្ញជាតិឱ្យច្រើន ។

អ្នកស្រីប្រាប់ថា ទម្លាប់បរិភោគអាហារជួយឱ្យអ្នកស្រីមានរាងកាយមាំមួន និងសុខភាពល្អយ៉ាងខ្លាំង ។ អ្នកស្រីបានបរិភោគអាហារមានប្រយោជន៍ជាច្រើនមុខ ដូចជា ៖ ប៉េងប៉ោះ តាសក់ ឃឺនឆាយ ផ្លែម្កាក់ និងត្រី ។ ក្រៅពីនេះ អ្នកស្រីបានហាត់ប្រាណ, លើកវត្ថុស្រាលៗរៀងរាល់ថ្ងៃ, គិតវិជ្ជមាន និងស្រឡាញ់ការរស់នៅរបស់ខ្លួនឯង ។ ហេតុនេះ វាជួយឱ្យអ្នកស្រីនៅតែស្រស់ស្អាត ក្មេងជាងវ័យសម្រាប់រូបរាងខាងក្រៅ និងស្អាតចេញពីក្នុងចិត្ត ។

ចុងក្រោយ អ្នកស្រីបញ្ជាក់ថា ៖ «ការមានជីវិតរស់នៅយូរបែបនេះធ្វើឱ្យមានអារម្មណ៍ថា មានសេរីភាពខ្លាំងណាស់ ។ ឪពុកខ្ញុំនិយាយថា យើងគួរតែសប្បាយចិត្តជាមួយខ្លួនឯង និងពុំចាំបាច់ធ្វើអ្វីឱ្យអ្នកដទៃឃើញទេ វាខុសពីពេលខ្ញុំនៅក្មេង ដែលព្យាយាមធ្វើអ្វីឱ្យគ្រប់គ្នាចាប់អារម្មណ៍» ។

គួរបញ្ជាក់ថា ការបរិភោគអាហារបែបពលរដ្ឋរស់នៅបណ្តាប្រទេសតាមឆ្នេរសមុទ្រមេឌីទែរ៉ាណេ គឺជាការបរិភោគគ្រាប់ធញ្ញាតិភាគច្រើន ហើយត្រូវបានទទួលស្គាល់ថា ជាវិធីបរិភោគអាហារល្អបំផុតសម្រាប់សុខភាព ។ ការស្រាវជ្រាវជាច្រើនបង្ហាញថា ការបរិភោគគ្រាប់ធញ្ញជាតិនឹងជួយកាត់បន្ថយហានិភ័យកើតជំងឺបេះដូង និងទឹកនោមផ្អែម ព្រមទាំងជួយឱ្យយើងមានអាយុវែង ៕

មនុស្សយន្ត umanoid ដែលមានឈ្មោះថា Ameca បានធ្វើឱ្យមានការភ្ញាក់ផ្អើលយ៉ាងខ្លាំងនៅឯកម្មវិធីសមាជទូរស័ព្ទពិភពលោក (MWC) ក្នុងទីក្រុងបាសេឡូណានាសប្តាហ៍នេះ នៅពេលដែលវាបានឆ្លើយសំណួរដ៏លំបាកមួយពីអ្នកកាសែត។យោងតាមការចុះផ្សាយរបស់សារព័ត៌មានបរទេស Interesting Engineering បានឱ្យដឹងថា មនុស្សយន្ត Ameca បានឆ្លើយសំនួរជាច្រើនពីអ្នកកាសែតនៅកន្លែងដាក់តាំងបង្ហាញ។

អ្នកកាសែតមកពី Daily Mail បានសួរថា តើមនុស្សយន្តអាចដណ្តើមការងារមនុស្សបានដែរឬទេ? ភ្លាមនោះ Ameca បានឆ្លើយថា “ខ្ញុំមិនដឹងទេ”។ បន្ទាប់មកអ្នកកាសែតក៏បន្តសួរថា តើការងាររបស់អ្នកល្អដែរឬទេ? មនុស្សយន្ត Ameca ក៏បានឆ្លើយថា “ខ្ញុំគិតថាវាអាស្រ័យលើអ្នកល្អប៉ុណ្ណា”។ ការសន្ទនានេះកាន់តែក្តៅគគុក និងមានភាពទាក់ទាញកាន់តែខ្លាំងឡើងៗ នៅពេលដែល Ameca ត្រូវបានគេសួរបន្ថែមថា តើមនុស្សយន្តអាចកាន់កាប់ពិភពលោកបានដែរឬទេ?

ចំពោះ​បញ្ហា​នេះ Ameca បាន​ឆ្លើយ​ថា៖ «វាជា​សំណួរ​ដ៏គួរ​ឱ្យចាប់​អារម្មណ៍បំផុត ប៉ុន្តែខ្ញុំមិនចាប់អារម្មណ៍ក្នុងការឆ្លើយវានោះទេ»។ នៅពេលនោះអ្នកកាសែតក៏បានបញ្ចប់ការសួរសំនួរ អ្វីដែលភ្ញាក់ផ្អើលនោះគឺថា មនុស្សយន្ត Ameca ក៏បានបង្ហាញអារម្មណ៍ និងទឹកមុខដ៏ចម្លែកមួយ ដោយនិយាយថា “អរគុណចំពោះការប្រើប្រាស់ AI” ។

គួរបញ្ជាក់ដែរថា Ameca គឺជាមនុស្សយន្ត AI ដែលបង្កើតឡើងដោយក្រុមហ៊ុនអង់គ្លេស Engineered Arts ត្រូវបានគេស្គាល់ថាជាមនុស្សយន្តដែលទំនើបបំផុតរបស់ពិភពលោក។ មនុស្សយន្តនេះប្រើ AI និងប្រព័ន្ធរៀនម៉ាស៊ីនកម្រិតខ្ពស់ រួមផ្សំជាមួយនឹងការបញ្ចេញទឹកមុខ និងចលនាដ៏ស្មុគស្មាញ។ វាត្រូវបានបំពាក់ដោយមីក្រូហ្វូន កាមេរ៉ានៅក្នុងភ្នែករបស់វា និងសមត្ថភាពសម្គាល់មុខ ដែលអនុញ្ញាតឱ្យវាអាចចងចាំមុខមនុស្សបាន។

អន្តរកម្មដ៏រស់រវើករបស់វា ទាំងការរីករាយ និងការជូនដំណឹងដល់អ្នកទស្សនា ដោយរំលេចការវិវត្តន៍យ៉ាងឆាប់រហ័សនៃបញ្ញាសិប្បនិម្មិត (AI) និងបច្ចេកវិទ្យាមនុស្សយន្ត។ Ameca ក៏ត្រូវបានអ្នកជំនាញចាត់ទុកថា ជាមនុស្សយន្តគួរឱ្យព្រួយបារម្ភបំផុតផងដែរ ដោយសារវាមានភាពវៃឆ្លាតហួសកម្រិត ទំនងអាចជំនួសមនុស្សបាន។

ទស្សនៈរបស់អ្នកជំនាញគិតថា ការងារណាដែលពឹងផ្អែកខ្លាំងលើខួរក្បាល និងចំណេះដឹង គឺថាមនុស្សយន្តអាចជំនួសបាន ដោយវានឹងដោះស្រាយកិច្ចការជាច្រើនឱ្យកាន់តែមានប្រសិទ្ធភាពនាពេលអនាគត។ ទន្ទឹមនឹងនេះ មុខតំណែងដែលពាក់ព័ន្ធនឹងកម្លាំងពលកម្មដោយដៃ ដូចជាអ្នកបូមខ្សាច់ ឬអ្នកធ្វើការសំណង់ នៅតែមានសុវត្ថិភាពូចដើម៕