ក្នុងមួយឆ្នាំៗ ប្លាស្ទិករាប់លានតោនត្រូវបានធ្លាក់ចូលក្នុងបាតសមុទ្រ ដែលជាទូទៅត្រូវការរយៈពេលប្រហែល៥០០ឆ្នាំទើបអាចរលាយអស់ និងមិនអាចបម្លែងទៅជាសារជាតិល្អសម្រាប់ភពផែនដីបាននោះទេ។ ផ្ទុយទៅវិញនៅពេលដែលកាកសំណល់ប្លាស្ទិកទាំងនោះនៅក្នុងទឹកសមុទ្រយូរៗទៅ វានឹងបំបែកខ្លួនទៅជាមីក្រូប្លាស្ទិកតូចៗ ដែលអាចគំរាមកំហែងដល់បរិស្ថាន និងជីវៈចម្រុះទាំងឡាយនៅក្នុងសមុទ្រ។

តាមការចុះផ្សាយដោយផ្ទាល់របស់វិទ្យាស្ថានដែលមានឈ្មោះថា Riken ដែលជាក្រុមស្រាវជ្រាវដ៏ធំមួយនៅប្រទេសកាលពីថ្ងៃទី ២២ ខែវិច្ឆិកា ឆ្នាំ២០២៤ បាននិយាយថា ឥឡូវនេះពួកគេបានរកឃើញវិធីបង្កើតនូវប្រភេទប្លាស្ទិកម្យ៉ាង ដែលអាចរលាយ និងបម្លែងខ្លួនដោយមិនប៉ះពាល់ដល់បរិស្ថាននោះទេ។ តើប្លាស្ទិកនេះអាចរលាយ និងបម្លែងខ្លួនឆាប់រហ័សពិតមែន រឺទេ?

ដើម្បីដោះស្រាយបញ្ហាដែលប៉ះពាល់ដល់បរិស្ថាននៅលើដី និងក្នុងទឹក វិទ្យាស្ថាន Riken បានបង្កើតប្រភេទប្លាស្ទិកម្យ៉ាងដែលមានភាពរឹងមាំគ្រប់គ្រាន់សម្រាប់តម្រូវការរបស់មនុស្សប្រចាំថ្ងៃ ប៉ុន្តែនៅពេលគេឈប់ប្រើប្រាស់ វានឹងរលាយត្រឹមរយៈពេលប៉ុន្មានម៉ោងប៉ុណ្ណោះដោយការដាក់ត្រាំវានៅក្នុងទឹកអំបិល រឺទឹកសមុទ្រ។ មិនត្រឹមតែងាយរលាយប៉ុណ្ណោះទេ ប៉ុន្តែវានឹងមិនបន្សល់នូវសារធាតុមីក្រូប្លាស្ទិក ថែមទាំងផ្ដល់អោយដីសារជាតិម្យ៉ាងដែលស្រដៀងនឹងជីទៀតផង។

ការរកឃើញនេះត្រូវបានធ្វើឡើងកាលពីឆ្នាំ ២០២៤ កន្លងទៅថ្មីៗនេះ ដោយ Riken រួមសហការជាមួយនឹងសកលវិទ្យាល័យនៃទីក្រុងតូក្យូ (University Of Tokyo) ។ លោក Takuzo Aida ដែលបានដឹកនាំគម្រោងស្រាវជ្រាវនេះបាននិយាយថា “ ការបង្កើតប្លាស្ទិកប្រភេទថ្មីនេះ នឹងផ្ដល់អោយនូវថង់ប្លាស្ទិករឹងមាំ អាចកែច្នៃឡើងវិញបាន ព្រមទាំងរលាយដោយមិនបន្សល់នូវមីក្រូប្លាស្ទិកដល់ផ្ទៃដីនោះទេ” ។

យោងតាមក្រុមអ្នកវិទ្យសាស្រ្តខាងលើបានបង្ហាញថា លក្ខណៈពិសេសរបស់វាថាមានដូចជា៖ ងាយនឹងរលាយបន្ទាប់ពីត្រូវទឹកសមុទ្រ, បញ្ចេញនូវសារធាតុផូស្វ័រ និងអាសូតទៅក្នុងដីបន្ទាប់ពីរលាយ ដែលសារជាតិទាំងនេះមានលក្ខណៈស្រដៀងនឹងជីដែរ ព្រមទាំងងាយស្រួលយកទៅកែច្នៃទៅតាមតម្រូវការដែលគេចង់បានទៀតផង។

គិតមកត្រឹមខែមិនា ឆ្នា២០២៥នេះ វិទ្យាស្ថានRiken កំពុងធ្វើការពិភាក្សា និងស្រាវជ្រាវជាមួយនឹងសកលវិទ្យាល័យនៃទីក្រុងតូក្យូបន្ថែម ដើម្បីដាក់វាអោយប្រើប្រាស់នៅក្នុងវិស័យធំៗមួយចំនួនដូចជា៖ ក្នុងផ្នែកវេជ្ជសាស្រ្ត, វិស័យកសិកម្មជាដើម ដើម្បីពិសោធន៍មើលពីគុណភាព និងប្រសិទ្ធភាព មុននឹងផលិតជាទ្រង់ទ្រាយធំសម្រាប់ដាក់អោយប្រើប្រាស់បានទូលំទូលាយជាសកលនៅលើគ្រប់វិស័យ៕

យោងតាមរបាយការណ៍ព័ត៌មានដែលបានចេញផ្សាយកាលពីខែមីនា ឆ្នាំ២០២៥ សហរដ្ឋអាមេរិកកំពុងពិចារណាលើការដាក់ចេញនូវគោលការណ៍រឹតត្បិតការធ្វើដំណើរមកកាន់ទឹកដីអាមេរិក ដែលអាចនឹងប៉ះពាល់ដល់ពលរដ្ឋមកពី ៤៣ ប្រទេស។

គោលការណ៍នេះត្រូវបានគេរាយការណ៍ថា ចែកចេញជា៣ប្រភេទ៖ “ក្រហម” “ទឹកក្រូច” និង “លឿង” ។ ប្រទេសដែលស្ថិតក្នុងប្រភេទ “លឿង” ត្រូវបានផ្តល់ពេល ៦០ ថ្ងៃដើម្បីដោះស្រាយបញ្ហាដែលសហរដ្ឋអាមេរិកបានកំណត់ បើមិនដូច្នោះទេ ពួកគេអាចនឹងត្រូវផ្លាស់ទៅប្រភេទ “ទឹកក្រូច” ឬ “ក្រហម” ដែលមានការរឹតត្បិតធ្ងន់ធ្ងរជាងមុន ។ហើយក្នុងនោះកម្ពុជាត្រូវបានដាក់បញ្ចូលក្នុងប្រភេទ “លឿង” ។

សម្រាប់ពណ៌ “ក្រហម” ត្រូវបានគេចាត់ទុកថាជាចំណាត់ថ្នាក់ដែលធ្ងន់ធ្ងរបំផុត។ ប្រទេសទាំង ១១ដែលមាននៅក្នុងចំណាត់ថ្នាក់ពណ៌ក្រហមនេះ មិនត្រូវបានអនុញ្ញាតអោយចូលនោះទេ មិនថាការមករស់នៅ ជាភ្ញៀវទេសចរ រឺជាសិស្សនិសិត្សនោះទេ ប្រទេសទាំងនេះនឹងមិនអាចចូលមកកាន់ទឹកដីសហរដ្ឋអាមេរិកជាដាច់ខាត។

ដោយឡែកសម្រាប់ពណ៌ “ទឹកក្រូច” គឺជាប្រទេសដែលនឹងត្រូវរឹតបន្តឹងVisaជាខ្លាំងក្នុងការស្នើសុំចូលមកកាន់ទឹកដីអាមេរិក។ ក្នុងនោះមានចំនួន១០ប្រទេស ដែលនឹងមិនត្រួវបានហាមឃាត់មិនអោយចូលទាំងស្រុងនោះទេ ប៉ុន្តែការស្នើសុំVisa នឹងមានភាពលំបាកខ្លាំង ព្រោះគេអាចនឹងធ្វើការសម្ភាសន៍ផ្ទាល់មួយទល់នឹងមួយ ហើយអនុញ្ញាសម្រាប់តែការមកធ្វើជំនួញ រឺBusiness Tripប៉ុណ្ណោះ សម្រាប់ការធ្វើអន្តោប្រវេសន៍ រឺមកទេសចរណ៍ផ្សេងៗក៏នឹងត្រូវបានអនុញ្ញាតដូចគ្នា។

រីឯពណ៌ “លឿង” មានចំនួន ២២ប្រទេស ហើយប្រទេសទាំងនេះ មានរយៈពេល៦០ថ្ងៃក្នុងការជូនដំណឹង និងផ្ដល់ឯកសារមួយចំនួនទាក់ទងនឹងភាពគ្មានអំពើពុករលួយ រឺបញ្ហាសិទ្ធិមនុស្សនៅក្នុងប្រទេសរបស់ខ្លូនដើម្បីអាចដកខ្លួនចេញពីបញ្ជីនេះ។ ប៉ុន្តែក្នុងករណីឯកសារដែលផ្ដល់ទៅកាន់អាមេរិកមិនគ្រប់គ្រាន់ រឺអាមេរិកស៊ើបឃើញថាប្រទេសណាមួយមានបញ្ហាទាំងនេះ ប្រទេសនោះអាចនឹងប្រឈមនឹងការចូលទៅក្នុងបញ្ជីរពណ៌ “ទឹកក្រូច” រឺ “ក្រហម” មិនខាន។

ដោយឡែកសម្រាប់មូលហេតុចម្បងដែលកម្ពុជាត្រូវបានដាក់ក្នុងប្រភេទ “លឿង” គឺទាក់ទងនឹងការព្រួយបារម្ភអំពីសន្តិសុខលិខិតឆ្លងដែន និងការចែករំលែកព័ត៌មាន ។ របាយការណ៍ជាច្រើនបានលើកឡើងជាពិសេសអំពីការចោទប្រកាន់ថា កម្ពុជា រួមជាមួយប្រទេសផ្សេងទៀត ត្រូវបានគេចោទថាបានលក់លិខិតឆ្លងដែន ឬសញ្ជាតិ ។ ការអនុវត្តបែបនេះបង្កឱ្យមានការព្រួយបារម្ភសម្រាប់សហរដ្ឋអាមេរិក ព្រោះវាអាចអនុញ្ញាតឱ្យបុគ្គលមកពីប្រទេសដែលស្ថិតក្នុងការហាមឃាត់ (ប្រទេសក្នុង “បញ្ជីក្រហម”) អាចគេចវេសពីការរឹតត្បិតទាំងនេះដោយទទួលបានលិខិតឆ្លងដែនពីប្រទេសក្នុងបញ្ជី “លឿង” ។ ដែលនេះអាចបង្កើតជាចន្លោះប្រហោងដ៏សំខាន់នៅក្នុងវិធានការសន្តិសុខជាតិរបស់សហរដ្ឋអាមេរិក។

ចំពោះញ្ញត្តិថ្មីខាងលើរបស់សហរដ្ឋអាមេរិកអាចនឹងផ្ដល់ផលលំបាកមួយចំនួនដល់ប្រទេសដែលមានក្នុងបញ្ជីទាំងនេះដែលរួមមានទាំងប្រទេសកម្ពុជាផងដែរ ជាពិសេសសម្រាប់ពលរដ្ឋដែលចង់ធ្វើចំណាកស្រុកទៅរស់នៅ រឺសិក្សារៀនសូត្រនៅទីនោះ ដូច្នេះមានតែរង់ចាំមើលរយៈពេល៦០ថ្ងៃទៅមុខទៀតព្រោះវាអាចនឹងមានការកែប្រែឡើងវិញ៕

ថ្មីៗនេះ សមាជិកសភាបារាំង លោក Raphaël Glucksmann បានទាមទារឱ្យសហរដ្ឋអាមេរិក ប្រគល់រូបសំណាកសេរីភាព “Statue of Liberty” ត្រឡប់មកឱ្យបារាំងវិញ។

សមាជិកសភាបារាំង រូបនេះ បានលើកឡើងថា៖” ក្រោមការដឹកនាំរបស់លោក Donald Trump សហរដ្ឋអាមេរិក បានធ្វើសកម្មភាពផ្ទុយនឹងរូបសំណាកតំណាងនិមិត្តរូបនៃសេរីភាព និងលទ្ធិប្រជាធិបតេយ្យ”។

ក្រោយពីឡើងកាន់តំណែងមិនបានប៉ុន្មាន លោក Trump បានដក​អាមេរិក​​ចេញពីកិច្ចព្រមព្រៀងអាកាសធាតុទីក្រុងប៉ារីស និងកាត់បន្ថយជំនួយទៅកាន់អ៊ុយក្រែន ខណៈភ្លើងសង្គ្រាមអ៊ុយក្រែន-រុស្សុី នៅតែបន្តឡើង។

គួរបញ្ជាក់ថា រូបសំណាកសេរីភាព “Statue of Liberty” នេះ ជាអំណោយរបស់បារាំងជូនទៅដល់អាមេរិក នៅថ្ងៃទី២៨ តុលា ឆ្នាំ១៩៨៦។

រូបសំណាកនេះមានកំពស់៤៦ម៉ែត្រ មានចុងស្រួច៧នៃមកុដ ឈរកាន់បន្ទះថ្មដែលឆ្លាក់ដោយកាលបរិច្ឆេទនៃឯករាជ្យភាពរបស់អាមេរិកជាលេខរ៉ូម៉ាំង និងច្រវ៉ាក់ដែលបាក់នៅលើជើងខាងឆ្វេង៕

ប្រទេសជប៉ុន៖ ក្រុមហ៊ុនទូរគមនាគមន៍ជប៉ុនមួយក្រុមបានបង្កើតឧបករណ៍ឥតខ្សែល្បឿនលឿន 6G ដំបូងបង្អស់របស់ពិភពលោក ដែលអាចផ្ទុកទិន្នន័យបានដល់ទៅ ២០ ដងនៃល្បឿន 5G ដោយឧបករណ៍នេះអាចបញ្ជូនទិន្នន័យក្នុងល្បឿន ១០០ ជីហ្គាបៃក្នុងមួយវិនាទី (Gbps) នៅចម្ងាយរហូតដល់ ១០០ ម៉ែត្រ នេះបើយោងតាមការចុះផ្សាយរបស់ Interesting Engineering។
ក្រុមហ៊ុនចំនួនបួនគឺ DOCOMO, NTT Corporation, NEC Corporation និង Fujitsu បានបង្កើតសម្ព័ន្ធភាពសម្រាប់គម្រោងនេះ។ ចាប់តាំងពីឆ្នាំ ២០២១ ក្រុមហ៊ុនទាំងនេះបានសហការលើការស្រាវជ្រាវ និងការអភិវឌ្ឍន៍ទាក់ទងនឹងឧបករណ៍ terahertz ដោយត្រួសត្រាយផ្លូវសម្រាប់យុគសម័យ 6G។

យោងតាមក្រុមហ៊ុន ការធ្វើតេស្តនាពេលថ្មីៗនេះសម្រេចបាននូវការបញ្ជូនល្បឿនលឿនបំផុត ១០០ ជីហ្គាបៃក្នុងមួយវិនាទី (Gbps) នៅលើប្រេកង់ 100 GHz និង 300 GHz នៅចម្ងាយរហូតដល់ ១០០ ម៉ែត្រ។ ដើម្បីបង្កើតឧបករណ៍ 6G ដែលមានល្បឿនលឿនបែបនេះ ក្រុមហ៊ុនសមាជិកនីមួយៗបានរួមចំណែកយ៉ាងធំធេងក្នុងការធ្វើឱ្យប្រសើរឡើងនូវបច្ចេកវិទ្យា sub-terahertz ។ ដោយក្រុមហ៊ុន DOCOMO បានធ្វើការវិភាគការកំណត់រចនាសម្ព័ន្ធប្រព័ន្ធឥតខ្សែសម្រាប់កម្មវិធីទូរគមនាគមន៍ 100 GHz ។ បន្ទាប់មកពួកគេបានកែសម្រួលឧបករណ៍បញ្ជូនឥតខ្សែដើម្បីឱ្យអាចបញ្ជូនទិន្នន័យក្នុងល្បឿនរហូតដល់ 100 Gbps លើសពី 100 ម៉ែត្រ។

រីឯក្រុមហ៊ុន NTT ក៏បានបន្តការអភិវឌ្ឍន៍ឧបករណ៍ឥតខ្សែកម្រិតខ្ពស់ដោយផ្តោតលើឧបករណ៍ 300 GHz ។ សមិទ្ធិផលរបស់ពួកគេបាននាំឱ្យមានការអភិវឌ្ឍន៍ឧបករណ៍ឥតខ្សែ 300 GHz ដែលអាចបញ្ជូនបានក្នុងល្បឿន 100 Gbps លើសពី 100 ម៉ែត្រ។ ចំណែក NEC វិញក៏បានប្រើប្រាស់ធនធានដើម្បីស្រាវជ្រាវដំណោះស្រាយសម្រាប់ប្រព័ន្ធឥតខ្សែ 100 GHz ។ លទ្ធផលគឺអង់តែនអារេសកម្មដំណាក់កាលស្មុគស្មាញ (APAA) ដែលមានច្រើនជាង 100 ផ្នែក។

Fujitsu ដែលជាក្រុមហ៊ុនចុងក្រោយក៏បានបង្កើតបច្ចេកវិទ្យា semiconductor ថ្មីដែលបង្កើនសញ្ញានៅប្រេកង់ 100 GHz និង 300 GHz ជាមួយនឹងដំណើរការខ្ពស់។ អ្នកជំនាញសង្កត់ធ្ងន់ថាសក្ដានុពលនៃបច្ចេកវិទ្យា 6G កម្រិតខ្ពស់គឺគ្មានដែនកំណត់នោះទេ ព្រោះវាផ្តល់នូវការតភ្ជាប់គ្មានថ្នេរនាពេលអនាគត ដែលអនុញ្ញាតឱ្យមានកម្មវិធីជាច្រើនចាប់ពីការបញ្ជូនវីដេអូដែលមាននិយមន័យខ្ពស់រហូតដល់ការគ្រប់គ្រងយានយន្តដោយស្វ័យភាពក្នុងពេលជាក់ស្តែង ខណៈពេលដែលបង្កើនតម្រូវការទំនាក់ទំនង៕