សត្វកន្លាត គឺជាសត្វដែលមនុស្សគ្រប់គ្នាស្គាល់ថាជាសត្វល្អិតចង្រៃ ព្រោះតែវាគ្មានអនាម័យនិងតែងនាំមកនូវមេរោគចូលផ្ទះនោះ ប៉ុន្តែបែរជាសត្វកន្លាតមួយប្រភេទ ដែលទឹកដោះរបស់វាមានអាហាររូបត្ថម្ភលើសលប់មិនគួរអោយជឿទៅវិញ។

កាលពីឆ្នាំ២០១៦ អ្នកវិទ្យាសាស្រ្តបានសិក្សាឃើញថា សារជាតិចិញ្ចឹមដែលមាននៅក្នុងទឹកដោះសត្វកន្លាតមួយប្រភេទដែលមានឈ្មោះថា Pacific Beetle Cockroach គឺមានលើសទឹកដោះសត្វគោដែលមនុស្សនិយមទទួលទានរហូតដល់ទៅ៤ដង។ គេរកឃើញថានៅក្នុងទឹកដោះសត្វកន្លាតមានសារជាតិអាមីណូ-អាស៊ីតទាំង៩ ដែលល្អសម្រាប់ការលូតលាស់, មានប្រូតេអ៊ីនគ្រីស្តាល់ដែលផ្ដល់នូវថាមពល, និងមានប្រូតេអ៊ីនសំខាន់ៗទូទៅលើសទឹកដោះគោធម្មតា៤ដង ព្រមទាំងមានកាឡូរី និងជាតិខ្លាញ់ខ្ពស់ផងដែរ។

សូមបញ្ជាក់ថាសត្វកន្លាតប្រភេទ Pacific Beetle Cockroach នេះគឺខុសពីសត្វកន្លាតប្រភេទទូទៅ ដោយសារពួកវាមិនបង្ករកំណើតតាមរយៈការទម្លាក់ពងនោះទេ ពោលគឺវាបង្កើតកូនចេញមកតែម្ដង។ ចំពោះការរកឃើញថាទឹកដោះរបស់វាមានគុណប្រយោជន៍បែបនេះ គឺតាមរយៈការធ្វើ X-Ray Crystallography ដែលជាបច្ចេកវិទ្យាសិក្សាសម្រាប់សិក្សាពីអាតូម និងម៉ូលេគុលរបស់ធាតុដែលមាទំហំតូចៗ។

បើទោះបីជាការរកឃើញថាទឹកដោះសត្វកន្លាតនេះមានអត្ថប្រយោជន៍ និងផ្ដល់សារជាតិចិញ្ចឹមលើសទឹកដោះគោក្ដី ប៉ុន្តែក៏នៅមានហេតុផលមួយចំនួនដែលគេមិនអាចយកវាមកដាក់លក់នៅលើទីផ្សារបានដូចជា៖ ទី១ បរិមាណដែលសត្វកន្លាតអាចផលិតបានគឹមិនអាចបំពេញតម្រូវការរបស់មនុស្សនោះទេ, ទី២ បញ្ហាផ្លូវចិត្ត មនុស្សជាច្រើននឹងចង់ផឹកវាឡើយទោះបីវាមានគុណសម្បត្តិយ៉ាងណាក៏ដោយ​ ព្រោះវាបានមកពីសត្វកន្លាត, ទី៣ ការអាឡែកហ្ស៊ី ដោយសារវាផលិតមកពីសត្វល្អិតដូច្នេះមនុស្សមួយចំនួនអាចនឹងមានប្រតិកម្មបន្ទាប់ពីផឹកវា។

សរុបសេចក្ដីមក យើងឃើញថាទោះបីជាទឹកដោះសត្វកន្លាតមានអត្ថប្រយោជន៍ច្រើនជាងទឹកដោះគោក្ដី ប៉ុន្តែទឹកដោះគោនៅតែជាជម្រើសល្អ និងងាយស្រួលរកបំផុតនៅក្នុងពេលបច្ចុប្បន្ននេះ។ ប៉ុន្តែចុះប្រសិនបើអ្នកវិទ្យាសាស្រ្តអាចរកវិធីផលិតវាបានច្រើន និងអាចមានលក់នៅលើទីផ្សារនោះ តើអ្នកនឹងសាកល្បងញ៉ាំវាដែរ រឺទេ?

បច្ចេកវិទ្យាកាន់តែទំនើបកាន់តែជួយមនុស្សបានច្រើន ថ្មីៗនេះអ្នកវិទ្យាសាស្រ្តផ្នែកវេជ្ជសាស្រ្តមកពីប្រទេសជាច្រើនបានរកឃើញរបកគំហើញថ្មីមួយដែលជាRobot មានទំហំតូច ប៉ុន្តែមានសមត្ថភាពខ្លាំង ដោយវាអាចកម្ចាត់កោសិកាមហារីកចេញពីខ្លួនមនុស្សបាន។

Robot នេះមានឈ្មោះថា Microscopic Robot រឺ Nanobots មានទំហំត្រឹមតែ 1nm (ណាណូម៉ែត្រ) តែប៉ុណ្ណោះ ដែលទំហំនេះគឺតូចជាងកោសិកាគ្រាប់ឈាមរបស់មនុស្សទៅទៀត។ ក្រុមវិទ្យាសាស្រ្តប្រទេសបារាំង អង់គ្លេស អេស្ប៉ាញ ស្កត់ឡេន សហរដ្ឋអាមេរិក ព្រមទាំងចិនបានរួមគ្នាសិក្សា និងបង្កើតវាឡើងមកដើម្បីទៅប្រឆាំងនឹងកោសិកាមហារីក។

អ្នកជំនាញនិយាយថាការសិក្សាលើRobotនេះប្រើប្រាស់ពេលជាច្រើនឆ្នាំចាប់តាំងពីឆ្នាំ១៩៩០ជាង ក្រោយមកក៏មានការចូលរួមសហការស្រាវជ្រាវបន្ថែមពីប្រទេសជាច្រើនទៀត ហើយប្រទេសបារាំងបានប្រកាសជាផ្លូវការនូវគម្រោងផលិតRobotនេះនៅឆ្នាំ២០១១ បន្ទាប់មកវាត្រូវបានអភិវឌ្ឍន៍ជាបន្តបន្ទាប់ដោយបណ្ដារប្រទេសនៅអឺរ៉ុប និងចិន។

ការបង្កើតនៃRobotនេះមាន២ប្រភេទ ដោយប្រភេទទី១ វាធ្វើការតាមរយៈការបញ្ជារ និងទី២ តាមរយៈស្វ័យដំណើរការ (ប្រើប្រាស់សារធាតុគីមីក្នុងការស្វែងរកនិងបំផ្លាញកោសិកាមហារីកដោយខ្លួនឯង)។ នៅពេលផលិតវាឡើងមក អ្នកវិទ្យាសាស្រ្តបានដាក់សាកល្បងវានៅក្នុងខ្លួនរបស់សត្វដែលមានដុំសាច់មហារី ហើយទទួលបានការព្យាបាលដោយជោគជ័យ។

នៅប្រទេសបារាំងកាលពីឆ្នាំ២០១៨គេធ្លាប់សាកល្បងវាលើមនុស្សរួចមកហើយ ជាលទ្ធផលគេឃើញថាមានសង្ឃឹមក្នុងការព្យាបាល ប៉ុន្តែមិនទាន់បានទាំងស្រុងនៅឡើយ ព្រោះវាអាស្រ័យតាមប្រភេទ និងដំណាក់កាលនៃជំងឺ។ ដោយឡែកកាលពីថ្មីៗនេះគេហទំព័រព័ត៌មានល្បីរបស់អង់គ្លេស The Time បានបង្ហាញថាបច្ចុប្បន្នគេកំពុងសិក្សាពីសក្តានុពល និងសុវត្ថិភាពក្នុងការប្រើប្រាស់វាបន្ថែមទៀតដើម្បីអាចដាក់ប្រើប្រាស់ជាផ្លូវការនៅក្នុងវិស័យសុខាភិបាលនាអនាគតប្រហែល១០ឆ្នាំខាងមុខទៀត៕

ប្រទេសថៃ ៖ កាលពីថ្ងៃទី១១ ខែមីនា ឆ្នាំ២០២៥ រដ្ឋមន្ត្រីក្រសួងការងារថៃ លោក ផីផាត់ រ៉ាឆាគិចប្រាកាន (Phipat Ratchakitprakarn) បានប្រកាសដំណឹងល្អសម្រាប់ពលករ ៣សញ្ជាតិ រួមមាន ៖ កម្ពុជា ឡាវ និងមីយ៉ាន់ម៉ា ដែលធ្វើការនៅប្រទេសថៃ ថា កិច្ចប្រជុំគណៈកម្មការគោលនយោបាយគ្រប់គ្រងការងារពលករបរទេស បានសម្រេចអនុញ្ញាតឱ្យពលករ ៣សញ្ជាតិ អាចធ្វើដំណើរត្រឡប់ទៅប្រទេសកំណើតដើម្បីចូលរួមពិធីបុណ្យចូលឆ្នាំថ្មី ដោយពុំចំណាយប្រាក់ថ្លៃ Re-Entry Permit (ឬថ្លៃសុំការអនុញ្ញាតត្រឡប់មកប្រទេសថៃវិញ) ។

សេចក្តីសម្រេចក្នុងកិច្ចប្រជុំនេះ គឺជាការគាំទ្រទំនាក់ទំនងផ្នែកការងាររវាងថៃ និងប្រទេសជិតខាង ព្រមទាំងជួយកាត់បន្ថយការចំណាយប្រាក់របស់ពលរដ្ឋបរទេសដែលធ្វើការនៅថៃ ដែលពួកគេត្រូវធ្វើដំណើរទៅលេងក្រុមគ្រួសារ និងចូលរួមពិធីបុណ្យចូលឆ្នាំថ្មី ឆ្នាំ២០២៥ ។ ក្រសួងការងារថៃបញ្ជាក់ថា ពលករបរទេស គឺជាកម្លាំងដ៏សំខាន់សម្រាប់ជំរុញសេដ្ឋកិច្ចថៃ ការលើកលែងថ្លៃ Re-Entry នេះ គឺជាការគោរពសិទ្ធិ និងផ្តល់អត្ថប្រយោជន៍ដល់ពលករបរទេស ដើម្បីឱ្យពួកគេត្រឡប់មកធ្វើការនៅថៃវិញជាមួយកម្លាំងចិត្ត ។

ពេលវេលាដែលពលករ ៣សញ្ជាតិ អាចធ្វើដំណើរត្រឡប់ទៅប្រទេសកំណើត ដោយពុំចំណាយប្រាក់ថ្លៃធ្វើ Re-Entry គឺចាប់ពីថ្ងៃទី១ ខែមេសា រហូតដល់ថ្ងៃទី១៥ ខែឧសភា ឆ្នាំ២០២៥ ដោយអនុវត្តតាមចំណុចលម្អិតដូចខាងក្រោម ៖

-ពលករកម្ពុជា ឡាវ និងមីយ៉ាន់ម៉ា ដែលមានលិខិតអនុញ្ញាតការងារត្រឹមត្រូវ នឹងអាចធ្វើដំណើរចាកចេញ និងត្រឡប់មកថៃវិញ ដោយពុំចាំបាច់ស្នើសុំ Re-Entry Permit
-រយៈពេលដែលក្រសួងការងារថៃលើកលែងថ្លៃ Re-Entry គឺចាប់ពីថ្ងៃទី១ ខែមេសា រហូតដល់ថ្ងៃទី១៥ ខែឧសភា ឆ្នាំ២០២៥
-បើពលករបរទេសធ្វើដំណើរត្រឡប់មកថៃវិញ ក្រោយថ្ងៃទី១៥ ខែឧសភា ពួកគេនឹងពុំទទួលការលើកលែងថ្លៃ Re-Entry ទេ ហើយត្រូវស្នើសុំការអនុញ្ញាតចូលថៃ ។

ចំណែកលោក ស៊ុមឆាយ មរកតស្រ៊ីវ៉ាន់ មន្ត្រីនាយកដ្ឋានស្វែងរកការងារនៃក្រសួងការងារថៃផ្តាំផ្ញើថា សូមពលករត្រឡប់មកថៃវិញតាមពេលកំណត់ គឺមុនថ្ងៃទី១៥ ខែឧសភា ដើម្បីឱ្យពលករទទួលបានសិទ្ធិត្រឹមត្រូវ ។ នាយកដ្ឋានស្វែងរកការងារនឹងប្រកាសពីរយៈពេលលើកលែងថ្លៃ Re-Entry ឱ្យពលករទាំងអស់ជ្រាប និងត្រឡប់មកថៃទាន់ពេលវេលា ដើម្បីកុំឱ្យប៉ះពាល់ការងាររបស់ពលករនៅថៃ ។

យើងចង់ឱ្យពលករគ្រប់រូបទទួលបានឱកាសល្អៗ ដោយត្រឡប់ទៅប្រទេសកំណើតជួបជុំក្រុមគ្រួសារក្នុងពិធីបុណ្យចូលឆ្នាំថ្មីខាងមុខ និងត្រឡប់មកធ្វើការនៅថៃតាមពេលកំណត់ ។ សូមឱ្យគ្រប់គ្នាតាមដានព័ត៌មាន ឬការប្រកាសរបស់ស្ថាប័នពាក់ព័ន្ធ ដើម្បីអនុវត្តតាមលក្ខខណ្ឌត្រឹមត្រូវ ។ នេះបើតាមការលើកឡើងរបស់លោក ស៊ុមឆាយ ។

គួរបញ្ជាក់ថា ពលករបរទេសដែលទៅធ្វើការនៅប្រទេសថៃដោយស្របច្បាប់ ហើយពេលចង់ធ្វើដំណើរត្រឡប់មកប្រទេសកំណើតវិញ គឺពលករត្រូវទៅការិយាល័យប៉ូលិសអន្តោប្រវេសន៍ថៃ (ឬភាសាថៃហៅថា ត ម៉) ដើម្បីស្នើសុំ Re-Entry Permit ដោយពលករត្រូវបង់ប្រាក់ថ្លៃ Re-Entry ក្នុងម្នាក់ ចំនួន១ពាន់បាត (ឬជាង៣០ដុល្លារ) សម្រាប់ការឆ្លងដែន ១លើក ។ Re-Entry គឺជាការសុំអនុញ្ញាតត្រឡប់មកប្រទេសថៃវិញ ឬរក្សាសិទ្ធិទិដ្ឋាការ បើពលករពុំបានធ្វើ Re-Entry ទេ ពួកគេនឹងអស់សិទ្ធិធ្វើការនៅថៃ ៕

ប្រទេសឥណ្ឌា ៖ កាលពីថ្ងៃទី១១ ខែមីនា ឆ្នាំ២០២៥ សារព័ត៌មានបរទេសរាយការណ៍ថា Guinness World Records បានចាត់ចំណាត់ថ្នាក់យុវជនឥណ្ឌាម្នាក់ឈ្មោះ Lalit Patidar អាយុ១៨ឆ្នាំ ជាមនុស្សដុះរោមលើផ្ទៃមុខច្រើនបំផុតលើពិភពលោក នៅឆ្នាំ២០២៥ ។ យុវជនរូបនេះមានជំងឺម្យ៉ាងហៅថា ជំងឺឆ្កែចចក (Werewolf Syndrome) ឬហៅតាមវេជ្ជសាស្ត្រថា (Hypertrichosis) ដែលបណ្តាលឱ្យដុះរោមយ៉ាងក្រាស់លើផ្ទៃមុខ និងរាងកាយ ។

តាំងពីអាយុ៦ឆ្នាំ រហូតមកដល់បច្ចុប្បន្ន យុវជន Patidar បានដុះរោមវែងៗជាច្រើនរហូតដល់៥សង់ទីម៉ែត្រ នៅលើផ្ទៃមុខ ដៃ និងរាងកាយ ។ តាមស្ថិតិវេជ្ជសាស្ត្របញ្ជាក់ថា Hypertrichosis គឺជាជំងឺពាក់ព័ន្ធនឹងហ្សែន ដែលកើតលើមនុស្សត្រឹមតែ៥០នាក់ប៉ុណ្ណោះ ហើយជំងឺនេះពុំទាន់មានថ្នាំព្យាបាលទេ ។ ហេតុនេះ អ្នកជំងឺត្រូវថែទាំសុខភាពខ្លួនឯង ដោយការកោររោម កាត់សក់ ឬកម្ចាត់រោមរបស់ខ្លួនតាមវិធីផ្សេងៗ ។

ការដុះរោមពេញផ្ទៃមុខ និងរាងកាយបានធ្វើឱ្យលោក Patidar មានរូបរាងលេចធ្លោ និងខុសប្លែកពីយុវជនដទៃយ៉ាងខ្លាំងតាំងពីក្មេងមក ។ លោកត្រូវអត់ធ្មត់នឹងការសើចចំអកពីមិត្តភក្តិក្នុងថ្នាក់រៀន ឬយុវជនផ្សេងទៀតថា លោកជាសត្វស្មា ដោយសារផ្ទៃមុខរបស់លោកដុះរោមពេញទាំងអស់ ខណៈមិត្តភក្តិខ្លះទៀតខ្លាចលោកទៀតផង ។

ក្រោយពេល Guinness World Records ចាត់ចំណាត់ថ្នាក់លោកជាមនុស្សដុះរោមលើផ្ទៃមុខច្រើនបំផុតលើពិភពលោក លោក Patidar ត្រេកអរយ៉ាងខ្លាំងរហូតដល់និយាយលែងចេញ ដែលបានជាប់ចំណាត់ថ្នាក់ជាមនុស្សរោមវែងជាងគេលើពិភពលោក ។ លោកថា ៖ «បច្ចុប្បន្ន ពុំសូវមានអ្នកណាធ្វើមិនល្អដាក់ខ្ញុំទេ មនុស្សភាគច្រើនល្អជាមួយខ្ញុំណាស់ ។ កាលពីខ្ញុំចូលរៀនដំបូង ក្មេងៗដែលឃើញខ្ញុំ ពួកគេភ័យខ្លាច ប៉ុន្តែពេលស្គាល់ខ្ញុំកាន់តែច្បាស់ ពួកគេក៏រាប់អានខ្ញុំដូចមិត្តភក្តិផ្សេងទៀត ។

មនុស្សជាច្រើនបានណែនាំឱ្យលោកកម្ចាត់រោមលើផ្ទៃមុខ និងរាងកាយចេញ ប៉ុន្តែលោកពុំបានធ្វើតាមការណែនាំទាំងនេះទេ ។ លោកចូលចិត្តរូបរាងបែបនេះ ហើយក៏ពុំចង់កោររោមចេញដែរ ។ គ្រូពេទ្យពុំអាចបញ្ជាក់ច្បាស់ថា តើជំងឺ Hypertrichosis កើតឡើងដោយសារអ្វី? ប៉ុន្តែអ្នកកើតជំងឺនេះតាំងពីកំណើត គ្រូពេទ្យសន្និដ្ឋានថា វាបណ្តាលមកពីហ្សែនដំណើរការខុសប្រក្រតី ទើបបណ្តាលឱ្យរាងកាយដុះរោមខុសធម្មតា ហើយអ្នកកើតជំងឺ Hypertrichosis ធ្លាប់មានសមាជិកគ្រួសារផ្សេងទៀតកើតជំងឺនេះដែរ ៕