ឯកឧត្តមអភិសន្តិបណ្ឌិត ស សុខា ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃ បានដាស់តឿនដល់មន្ត្រីដែលពាក់ព័ន្ធនឹងបទល្មើសគ្រឿងញៀន សូមដកខ្លួនថយ និងកែប្រែឥរិយាបថជាបន្ទាន់ បើមិនដូច្នេះនឹងប្រឈមមុខនឹងច្បាប់។

ថ្លែងជុំវិញបញ្ហាគ្រឿងញៀន ឯកឧត្តមអភិសន្តិបណ្ឌិត ស សុខា បានលើកឡើងថា៖” បញ្ហាគ្រឿងញៀននៅកម្ពុជា បើមិនមានការពាក់ព័ន្ធនឹងមន្ត្រីជាអ្នកអនុវត្តច្បាប់មួយចំនួននោះទេ ប្រាកដណាស់បញ្ហានេះមិនធំដុំដូចបច្ចុប្បន្នឡើយ”។

បន្ថែមពីនេះ រដមន្ត្រីក្រសួងមហាផ្ទៃ ក៏បានស្នើអភិបាលស្រុកនៅពេលចុះមូលដ្ឋាន ត្រូវមានការផ្សព្វផ្សាយគ្រឿងញៀន យ៉ាងហោចណាស់ត្រូវឆ្លៀតពេល១០នាទី ដើម្បីអប់រំដល់ពលរដ្ឋមូលដ្ឋានឱ្យចៀសឆ្ងាយពីបញ្ហាគ្រឿងញៀន។

បើយោងតាម ឯកឧត្តម នាយឧត្តមសេនីយ៍ មាស វិរិទ្ធ អគ្គលេខាធិការអាជ្ញាធរជាតិប្រយុទ្ធប្រឆាំងគ្រឿងញៀនបានឱ្យដឹងថា កម្ពុជានៅតែបន្តរងការគំរាមកំហែងពីនិន្នាការនៃគ្រឿងញៀនសកល ជាពិសេសពីតំបន់ត្រីកោណមាស៕

រឿងមួយដែលអ្នកនៅម្នាក់ឯងតែងព្រួយបារម្ភគឺបញ្ហាជាប់គន្លឹះទ្វារដែលមិនបានរំពឹងទុក ហើយភាគច្រើនវាកើតឡើងដោយយើងមិនបានត្រៀមខ្លួន ឬប្រយ័ត្នប្រយែង ជាពិសេសគន្លឹះទ្វារបន្ទប់ទឹក។ កាលណាដែលយើងជាប់គាំងក្នុងបន្ទប់ម្នាក់ឯងយូរ អាចធ្វើឱ្យអ្នកខ្ជះខ្ជាយពេលវេលានិងលុយកាក់ដើម្បីដោះស្រាយបញ្ហា ឬក៏អាចធ្វើឱ្យអ្នកមានអារម្មណ៍ថប់បារម្ភទៀតផង។ ចំពោះបញ្ហាទ្វារខូច តែងតែកើតឡើងជាមួយនឹងគន្លឹះបន្ទប់ទឹក ព្រោះផ្ទៃបន្ទប់ទឹកច្រើនមានសំណើម។

ជាលទ្ធផល គន្លឹះនៅកន្លែងនោះអាចច្រេះបានយ៉ាងងាយ ដូច្នេះហើយដើម្បីការពារបញ្ហាទ្វារខូច ក៏ដូចជាដោះស្រាយបញ្ហាគន្លឹះទ្វារខូច ចូរអ្នកអនុវត្តវិធីសាស្ត្រដូចខាងក្រោម៖

១.ប្រសិនបើអ្នកជាប់គាំងក្នុងបន្ទប់ទឹក ហើយបន្ទប់នោះមានបង្អួច ឬរន្ធ ចូរស្រែករកជំនួយ។
២.ត្រូវគិតហើយរកអ្វីមួយក្នុងបន្ទប់ទឹកដែលអាចប្រើជាឧបករណ៍ដោះស្រាយបញ្ហា ដូចជាស្នូលក្រដាស ឬក្រដាសកាតុងធ្វើកេស ដោយបញ្ចូលក្រដាសទៅក្នុងចង្អូរនៃទ្វារជុំវិញសោ បន្ទាប់មកទាញស្នូលក្រដាសឡើងលើ វាជាវិធីមួយដែលអាចជួយដោះសោទ្វារបាន។
៣.ប្រសិនបើមានឧបករណ៍ដែកគ្រប់គ្រាន់នៅក្នុងបន្ទប់ទឹកដូចជាទួណឺវីស ចូរអ្នកកាត់ស៊ុមកូនសោចេញ ហើយមើលទៅលើកូនសោដើម្បីមើលថាតើវាអាចដោះសោបានដែរឬទេ?

វិធីការពារ ឬបញ្ជៀសបញ្ហាទ្វារខូច៖
១.ផ្លាស់ប្តូរទ្វារឱ្យមានសុវត្ថិភាពជាងមុន ព្រោះសោទ្វារមូលមិនថាម៉ាកល្អប៉ុណ្ណាក៏ដោយ នៅពេលប្រើជាសោទ្វារបន្ទប់ទឹក វាត្រូវបានប៉ះពាល់ដោយធម្មជាតិទៅនឹងសំណើម នេះបណ្តាលឱ្យមានហានិភ័យនៃការច្រេះនិងការខូចខាត។

២.ទុកឧបករណ៍មេកានិកមួយចំនួននៅក្នុងបន្ទប់ទឹកដូចជា ទួណឺវីស កាតផ្លាស្ទិច ឬកាតឥណទានដែលផុតកំណត់។

៣.ពិនិត្យស្ថានភាពនៃកូនសោទ្វារជានិច្ច នៅពេលប្រើបានយូរ អ្នកគួរដាក់ប្រេង ឬប្រេងរំអិលជាប្រចាំនៅលើកូនសោទ្វារក្នុងតំបន់រន្ធគន្លឹះ ឬតំបន់ dowel នេះនឹងជួយការពារការស្អិតនិងច្រែះ។

៤.យកទូរស័ព្ទដៃរបស់អ្នកចូលទៅបន្ទប់ទឹក នេះជាវិធីសាស្ត្រដែលបានណែនាំឱ្យប្រើក្នុងករណីមានអាសន្ន ព្រោះនៅលើទូរស័ព្ទអ្នកគឺមានលេខមនុស្សជិតស្និតជាច្រើន ដូច្នេះអ្នកអាចខលសុំជំនួយពីពួកគេបាន។

៥.បែងចែកតំបន់សើម និងតំបន់ស្ងួតក្នុងបន្ទប់ទឹក៖ ការបែងចែកបន្ទប់ទឹកជាពីរគឺតំបន់សើមនិងស្ងួត ក៏ជួយការពារបញ្ហាសំណើមដែលនឹងកើតឡើងជាមួយនឹងកូនសោទ្វារផងដែរ។ ដូច្នេះកុំបិទទ្វារទាំងស្រុង បើដឹងថាទ្វារខូច កុំបិទទ្វារទាំងស្រុង ទុកវាឱ្យនៅចំហរបន្តិច ដើម្បីសុវត្ថិភាព៕

មនុស្សភាគច្រើនជឿថា បើអ្នកណាម្នាក់សុបិនឃើញពស់ដេញតាម បង្ហាញថា អ្នកនោះនឹងជិតដល់គូព្រេងនាពេលឆាប់ៗ ប៉ុន្តែអ្នកខ្លះទៀតបែរជាបារម្ភពីហេតុការណ៍មិនល្អកើតឡើង ពេលសុបិនឃើញពស់ ។

សូមកុំបារម្ភអី ពីព្រោះការសុបិនឃើញពស់ មិនមែនជាការប្រាប់ពីហេតុការណ៍អាក្រក់ទាំងអស់ទេ ប៉ុន្តែវាអាចប្រាប់ពីហេតុការណ៍ល្អៗជាច្រើន ។

យោងតាមតម្រាកាត់សប្តិបុរាណបង្ហាញថា បើសុបិនឃើញពស់ លោកអ្នកនឹងជួបហេតុការណ៍ដូចខាងក្រោមនេះ ៖

១-ស្នេហា ៖ បើនៅលីវ ហើយសុបិនឃើញពស់រឹតខ្លួន គឺយើងនឹងជួបគូព្រេង និងអាចចូលរោងការ ។ ប៉ុន្តែបើមានប្តី-ប្រពន្ធ ឬគូស្នេហ៍រួចហើយ ការសុបិនឃើញពស់ ពុំមែនមានន័យថា យើងនឹងជួបមនុស្សថ្មីទេ គឺមានន័យថា ទំនាក់ទំនងប្តី-ប្រពន្ធ ឬគូស្នេហ៍នឹងកាន់តែផ្អែមល្ហែមលើសមុន ។

២-ការផ្លាស់ប្តូរ ៖ ការសុបិនឃើញពស់ អាចបញ្ជាក់ពីការផ្លាស់ប្តូរ ឬចាប់ផ្តើមធ្វើអ្វីថ្មីៗ មានន័យថា យើងនឹងចាប់ផ្តើមធ្វើអ្វីមួយថ្មីដ៏ល្អក្នុងជីវិត ។

៣-ដាស់តឿន ៖ បើសុបិនឃើញពស់ដេញតាម មានន័យថា ឱ្យយើងប្រញាប់ធ្វើអ្វីមួយ ។ ពស់កំពុងតែដាស់តឿនឱ្យយើងប្រុងប្រយ័ត្នខ្លួននូវហេតុការណ៍បម្រុងនឹងកើតឡើង ឬពេលខ្លះ យើងអាចមានសត្រូវចាស់ និងសត្រូវថ្មី កំពុងគិតមិនល្អ ។ ហេតុនេះ ចូរប្រញាប់ធ្វើបុណ្យចែកទានដើម្បីឧទ្ទិសកុសលឱ្យម្ចាស់កម្មពៀរ ។

៤-លាភសំណាង ៖ ការសុបិនឃើញពស់អាចមានន័យថា យើងនឹងទទួលបានលាភសំណាងក្នុងការផ្សងសំណាង ។ ប៉ុន្តែវាអាស្រ័យលើរាសីរបស់យើងផងដែរ បើសំណាងល្អ យើងនឹងក្លាយជាសេដ្ឋីមានប្រាក់ច្រើនត្រឹមមួយប៉ព្រិចភ្នែក ។

៥-ការងារ ៖ បើសុបិនឃើញពស់នៅក្នុងផ្ទះ ឬវារចូលផ្ទះ មានន័យថា ការងាររបស់យើងនឹងជោគជ័យរីកចម្រើនទៅមុខ ឬចៅហ្វាយនាយអាណិតអាសូរ និងជួយការងាររបស់យើង ។ ក្រៅពីនេះ យើងនឹងមានឱកាសឡើងតួនាទីការងារ ប៉ុន្តែគួរតែចេះឱនលំទាននៅកន្លែងការងារផងដែរ ដើម្បីឱ្យចៅហ្វាយនាយស្រឡាញ់ចូលចិត្ត ។

៦-ប្រុងប្រយ័ត្នខ្លួន ៖ បើសុបិនឃើញពស់មានពិស ឬពស់វែកនៅជុំវិញខ្លួន មានន័យថា ឱ្យយើងប្រយ័ត្នបញ្ហាអាចកើតឡើងក្នុងក្រុមគ្រួសារ ដូចជា ៖ ការបាត់បង់ប្រាក់កាសដោយមិនដឹងខ្លួន ។ ដូច្នេះ ចូរគិតឱ្យគ្រប់ជ្រុងជ្រោយមុននឹងសម្រេចចិត្តធ្វើអ្វីមួយ ហើយរឿងអាក្រក់នឹងកន្លងផុតទៅ ៕

ភ្នំពើងតានាន់ ជាតំបន់ព្រៃភ្នំនិងទេសចរណ៍ធម្មជាតិ ដែលមានពើងថ្មជាច្រើនដុះបន្តុបលើគ្នាយ៉ាងគួរឱ្យទាក់ទាញ អមជាមួយនឹងទេសភាពព្រៃព្រឹក្សាដ៏ខៀវស្រងាត់ព័ទ្ធជុំវិញ ខណៈកំពុងតែលាក់ខ្លួននៅលើទឹកដីនៃខេត្តសៀមរាប។

ក្រៅពីប្រាសាទបុរាណនៅតំបន់អង្គរវត្តជាទីតាំងប្រវត្តិសាស្រ្តខ្មែរដ៏ល្បីល្បាញ, ទឹកដីខេត្តសៀមរាប ក៏នូវមានទេសភាពធម្មជាតិរាប់មិនអស់ ដែលជាទីចាប់អារម្មណ៍សម្រាប់ភ្ញៀវទេសចរទាំងជាតិនិងអន្តរជាតិ។ ភ្នំពើងតានន់ ឬភ្នំពើងតានាន់ មានទីតាំងស្ថិតនៅភូមិគោកភ្នៅ ឃុំគោកដូង ស្រុកអង្គរជុំ ខេត្តសៀមរាប និងមានចម្ងាយប្រមាណ ៧២ គីឡូម៉ែត្រ ពីរង្វង់មូលនាគព័ន្ធ។

ផ្ទាំងថ្មដុះមូលធំៗដេញពន្លឺភ្លឺផ្លេកៗត្រួតលើគ្នារប៉ាត់រប៉ាយរាប់ពាន់ដុំនៅលើខ្នងភ្នំ អមជាមួយនឹងទឹកអូរហូររិញៗកាត់ថ្ម ដើមឈើបៃតងស្រស់អមជាមួយវាលចម្ការនៅតាមជើងភ្នំ ផ្កាព្រៃភ្នំពណ៌ស ក្រហម រួមទាំងពន្លកផ្កាចាហួយចេញត្រួយខ្ចីដ៏ស្រស់បំព្រង។ នៅរដូវវស្សា ភ្ញៀវទេសចរគឺអាចមើលឃើញទិដ្ឋភាពដ៏ខៀវស្រងាត់ព័ទ្ធជុំវិញ បង្កើតបានជាអារម្មណ៍ស្រស់ស្រាយ។ នៅពេលឡើងទៅលើផ្ទាំងថ្ម អ្នកនឹងសម្លឹងឃើញទិដ្ឋភាព ក៏ដូចជាចម្ការដំណាំនានារបស់ប្រជាពលរដ្ឋតំបន់នោះរហូតដល់ទៅ១៨០ដឺក្រេ។

ចំណុចពិសេសនៃភ្នំពើងតានាន់នេះគឺស្ថិតនៅក្នុងប្រភេទព្រៃភ្នំ និងទេសចរណ៍ធម្មជាតិ។ សកម្មភាពជាច្រើនដែលអ្នកអាចរីករាយជាមួយដំណើរកម្សាន្តលើភ្នំនេះគឺមានដូចជា៖ ទស្សនាទេសភាពព្រៃភ្នំ, ពិកនិច, គយគន់ថ្ងៃលិច, គយគន់ថ្ងៃរះ, បទពិសោធន៍ឡើងភ្នំ, ដើរលេងថ្មើរជើង និងបោះតង់សម្រាកជាដើម។

បើយោងតាមវិទ្យាស្ថានមនុស្សសាស្រ្តនិងវិទ្យាសាស្រ្តសង្គមបានបញ្ជាក់ថា ថ្មដុះធម្មជាតិនៅលើភ្នំពើងតានាន់នេះ គឺមានអាយុកាលចន្លោះពី ៦៥ ទៅ ១៩០លានឆ្នាំមុន ដែលជាស្លាកស្នាមបង្ហាញថា ទីតាំងនេះធ្លាប់លិចទឹក ខណៈក៏បានរកឃើញស្លាកស្នាមផូស៊ីលលាយសមុទ្រខ្លះៗជាប់នឹងថ្មផងដែរ៕