ប្រយ័ត្នអាហារ៥ប្រភេទក្នុងរដូវក្តៅដែលអាចបង្កគ្រោះថ្នា.ក់ដល់សុខភាព

ការបរិភោគចំណីអាហារក្នុងរដូវក្តៅ ពិតជាសំខាន់ណាស់សម្រាប់ការថែទាំសុខភាព ពីព្រោះបើបរិភោគអាហារប៉ះពាល់សុខភាពចូលក្នុងរាងកាយ ឬផឹកទឹកលាយឡំមេរោគ វានឹងបណ្តាលឱ្យក្អួតចង្អោរ ឈឺពោះ រាគរូស និងឈានទៅការពុលអាហារ ។ អ្នកឯកទេសផ្នែកចំណីអាហារបានណែនាំឱ្យប្រយ័ត្នអាហារ៥ប្រភេទនេះក្នុងរដូវក្តៅ ពីព្រោះបើបរិភោគអាហារផ្តេសផ្តាស វានឹងបង្កគ្រោះថ្នា.ក់ដល់សុខភាព ។

អ្នកស្រី ផនខៈណុក ខាំវ៉ាត់ អ្នកឯកទេសផ្នែកចំណីអាហារមកពីនាយកដ្ឋានអាហារូបត្ថម្ភនៃមន្ទីរពេទ្យ Navavej ទីក្រុងបាងកក ប្រទេសថៃ បានណែនាំពីអាហារមួយចំនួនដែលបង្កគ្រោះថ្នាក់ដល់រាងកាយក្នុងរដូវក្តៅ ដូចជា ៖

១-អាហារមានខ្ទិះដូង ៖ អាហារមានខ្ទះដូង ឆាប់ផ្អូមណាស់ក្នុងរដូវក្តៅ ដូចជា ៖ សម្លមានខ្ទិះដូង និងបង្អែមដាក់ខ្ទិះដូង ។ ហេតុនេះ គួរទុកដាក់អាហារខ្ទិះដូង និងកំដៅវាឱ្យបានត្រឹមត្រូវសម្រាប់បរិភោគក្នុងរដូវក្តៅ ដើម្បីកុំឱ្យប៉ះពាល់សុខភាព ។

២-បន្លែស្រស់ៗ ៖ បន្លែស្រស់ដាំក្នុងកសិដ្ឋានដែលគ្មានការថែទាំត្រឹមត្រូវតាមស្តង់ដារ គឺសម្បូរដោយមេរោគ ថ្នាំកម្ចាត់សត្វល្អិត ជីគីមី និងអាចមានមេរោគ Enteroaggregative E. coli ផ្ទុកក្នុងលាមកសត្វ ។ តូបលក់បន្លែខ្លះលាងបន្លែពុំស្អាតទេ ដែលធ្វើឱ្យអ្នកបរិភោគបន្លែស្រស់ពុលបាន ដូចជា ៖ សាឡាត់ ឬបន្លែសម្រាប់អន្លក់ ។

៣-បុកល្ហុង, ញំ, នំបញ្ចុក ៖ បុកល្ហុង គឺជាអាហារដែលពុំបានឆ្លងកាត់ការចម្អិនដោយភ្លើងទេ ហើយវាងាយនឹងឆ្លងមេរោគផ្សេងៗ ។ កន្លែងលក់បុកល្ហុង និងអាហារប្រភេទញំខ្លះអាចប្រើប្រាស់គ្រឿងផ្សំគ្មានអនាម័យ ដូចជា ៖ ទឹកប្រហុកគ្មានស្តង់ដារ, សណ្តែកដីដុះផ្សិត, បង្គាក្រៀមជ្រលក់ពណ៌ ព្រមទាំងអាហារមានរសជាតិហឹរខ្លាំង ឬជូរខ្លាំង ដែលធ្វើឱ្យរលាកបំពង់រំលាយអាហារ ។ ដូចគ្នានេះ ទឹកសម្លនំបញ្ចុក ធ្វើឡើងពីខ្ទិះដូង គឺឆាប់ខូចណាស់ក្នុងរដូវក្តៅ ដែលធ្វើឱ្យយើងឆាប់ពុលអាហារ បើបរិភោគបន្លែស្រស់លាងមិនស្អាតជាមួយនំបញ្ចុក ។

៤-អាហារសមុទ្រ ៖ សីតុណ្ហភាពកើនឡើងខ្ពស់ក្នុងរដូវក្តៅនឹងធ្វើឱ្យមេរោគក្នុងអាហារសមុទ្រធំលូតលាស់យ៉ាងឆាប់រហ័ស ហើយប្រឈមនឹងការពុលអាហារ ។ ហេតុនេះ គួរជ្រើសរើសអាហារសមុទ្រស្រស់ៗ គ្មានក្លិន និងបរិភោគអាហារសមុទ្រឆ្អិនគ្រប់ពេលវេលា កុំបរិភោគអាហារសមុទ្រមានពណ៌ខុសធម្មតា ។

៥-ទឹកកក ៖ ទឹកកកខ្លះពុំបានផលិតត្រឹមត្រូវបានស្តង់ដារទេ ហើយការផឹកទឹកកកប្រភេទនេះប្រឈមនឹងផលប៉ះពាល់សុខភាពយ៉ាងខ្លាំង ។ ទឹកកកខ្លះមានម្សៅ ឬកំទេចតូចៗនៅក្នុងនោះ ដែលជាមូលហេតុបណ្តាលឱ្យពុលអាហារ ។

សរុបមក ការពុលអាហារបណ្តាលមកពីការបរិភោគអាហារ ឬទឹកមានមេរោគ ដែលធ្វើឱ្យក្អួតចង្អោរ ឈឺពោះ និងរាគរូស ។ អាកាសធាតុក្តៅបែបនេះ អ្នកឯកទេសចំណីអាហារបានណែនាំឱ្យបរិភោគអាហារឆ្អិន មានអនាម័យ ចៀសវាងបរិភោគអាហារឆាប់ផ្អូមដើម្បីការពារការឆ្លងមេរោគ រួមទាំងលាងសម្អាតដៃឱ្យស្អាតមុនពេលបរិភោគជានិច្ច ៕