ប្រទេសថៃ ៖ ក្រោយកើតហេតុការណ៍គ្រោះរញ្ជួយដីនៅប្រទេសមីយ៉ាន់ម៉ា និងមានឥទ្ធិពលដល់បណ្តាខេត្តជាច្រើនរបស់ថៃ បានធ្វើឱ្យអភិបាលខេត្តភូកេត ចេញសេចក្តីប្រកាសបន្ទាន់មួយស្នើឱ្យមន្ត្រីពាក់ព័ន្ធតាមដានស្ថានការណ៍គ្រោះធម្មជាតិ ២៤ម៉ោង ។ ពលរដ្ឋនៅខេត្តភូកេត បារម្ភពីរលកយក្សស៊ូណាមិ បន្ទាប់ពីក្នុងបណ្តាញសង្គមចែកចាយកម្រិតទឹកសមុទ្រនៅខេត្តភូកេត ស្រុកចុះយ៉ាងឆាប់រហ័សខុសពីធម្មតា ហើយពណ៌ទឹកសមុទ្រខាប់ ។

លោក សូផុន សុវណ្ណារ៉ាត់ អភិបាលខេត្តភូកេត និងជាប្រធាននាយកដ្ឋានបង្ការ និងកាត់បន្ថយគ្រោះមហន្តរាយខេត្តភូកេត បានចេញសេចក្តីប្រកាសបន្ទាន់មួយ ដើម្បីជូនដំណឹងទៅកាន់មន្ត្រីស្ថាប័នពាក់ព័ន្ធ ដែលសេចក្តីប្រកាសបញ្ជាក់ថា កាលពីរសៀលថ្ងៃទី២៨ ខែមីនា កន្លងមក មានគ្រោះរញ្ជួយដីជម្រៅ១០គីឡូម៉ែត្រ នៅប្រទេសមីយ៉ាន់ម៉ា ។ ហេតុនេះ ដើម្បីកុំឱ្យពលរដ្ឋ និងភ្ញៀវទេសចរព្រួយបារម្ភ នាយកដ្ឋានបង្ការ និងកាត់បន្ថយគ្រោះមហន្តរាយខេត្តភូកេត សូមអនុវត្តវិធានការដូចខាងក្រោម ៖

១-ជូនដំណឹងទៅពលរដ្ឋ និងភ្ញៀវទេសចរនៅភូកេត ឱ្យបានជ្រាបពីការអនុវត្តពេលកើតគ្រោះរញ្ជួយដី និងរលកយក្សស៊ូណាមិ ដើម្បីកុំឱ្យភ័យស្លន់ស្លោ
២-ចូរប្រុងប្រយ័ត្នស្ថានការណ៍ ក្រោយការជូនដំណឹងពីប្រព័ន្ធដែលគ្របដណ្តប់ក្នុងតំបន់ អំពីគ្រោះធម្មជាតិ និងអនុវត្តតាមផែនការ បើកើតរញ្ជួយដី និងស៊ូណាមិ
៣-បើកើតរញ្ជួយដី និងឈានទៅស៊ូណាមិ គឺអាចតាមដានការជូនដំណឹងពីភ្នាក់ងារឧតុនិយម និងមជ្ឈមណ្ឌលដាស់តឿនគ្រោះធម្មជាតិ, នាយកដ្ឋានបង្ការ និងកាត់បន្ថយគ្រោះមហន្តរាយ ។

ហេតុនេះ សូមអាជ្ញាធរតាមដានស្ថានការណ៍គ្រោះធម្មជាតិ ២៤ម៉ោង ហើយបើកើតហេតុការណ៍នៅខេត្តភូកេត ចូរផ្តល់ដំណឹងមកកាន់នាយកដ្ឋានបង្ការ និងកាត់បន្ថយគ្រោះមហន្តរាយខេត្តភូកេតជាបន្ទាន់ តាមរយៈលេខទូរស័ព្ទ 076-510-098 ឬលេខ 1784 ។

ដោយឡែក តាមការចុះផ្សាយរបស់សារព័ត៌មានថៃ Top News Online ឱ្យដឹងថា ពលរដ្ឋរស់នៅខេត្តភូកេត បារម្ភពីការកើតរលកយក្សស៊ូណាមិ និងបានជញ្ជូនរបស់របរចេញពីអគារខុនដូខ្ពស់ៗ ក្រោយកើតរញ្ជួយដីជាបន្តបន្ទាប់នៅប្រជុំកោះស៊ូម៉ាត្រា ប្រទេសឥណ្ឌូណេស៊ី កម្រិត៥.៣រិចទ័រ ជម្រៅ៦គីឡូម៉ែត្រ ដែលស្ថិតនៅភាគនិរតីស្រុកមឿង ខេត្តភូកេត ប្រមាណ ៤០១គីឡូម៉ែត្រ ។

ការរញ្ជួយដីផ្ទួនៗគ្នានៅប្រទេសឥណ្ឌូណេស៊ី បានធ្វើឱ្យពលរដ្ឋថៃនៅខេត្តភូកេត ភ័យខ្លាចយ៉ាងខ្លាំង ពីព្រោះគ្រោះធម្មជាតិអាចកើតឡើងគ្រប់ពេលវេលា ហើយគ្មានអ្នកណាដឹងមុនឡើយ ។ គ្រោះរញ្ជួយដីគ្មានការជូនដំណឹងពីរដ្ឋាភិបាលទេ អ្វីគួរធ្វើនាពេលបច្ចុប្បន្ន គឺត្រូវចៀសឱ្យផុតពីហេតុការណ៍អាក្រក់ៗ ៕

ប្រទេសចិន ៖ កាលពីថ្ងៃទី៣ ខែមេសា ឆ្នាំ២០២៥ រដ្ឋាភិបាលចិនបានចេញសេចក្តីថ្លែងការណ៍អំពាវនាវឱ្យអាមេរិកលុបចោលការដាក់ពន្ធលើទំនិញនាំចូលពីចិនជាបន្ទាន់ ព្រមទាំងបញ្ជាក់ថា ចិននឹងដាក់ពន្ធលើទំនិញអាមេរិកវិញដើម្បីការពារផលប្រយោជន៍របស់ចិន ។ ការប្រកាសឱ្យអាមេរិកលុបចោលការកំណត់ពន្ធនេះ គឺក្រោយពីប្រធានាធិបតីអាមេរិក លោក Donald Trump បានដាក់ពន្ធលើទំនិញនាំចូលពីប្រទេសដៃគូពាណិជ្ជកម្មរបស់អាមេរិកនៅទូទាំងពិភពលោក ក្នុងនោះអាមេរិកដាក់ពន្ធលើទំនិញចិន ស្មើ៣៤% ។

ក្រសួងពាណិជ្ជកម្មចិនបញ្ជាក់ថា វិធានការពន្ធរបស់អាមេរិកផ្ទុយនឹងផលប្រយោជន៍រួម ដែលទទួលបានពីការចរចាពាណិជ្ជកម្មពហុភាគីនាពេលកន្លងមក ហើយអាមេរិកមើលរំលងការពិត ខណៈអាមេរិកខ្លួនឯងក៏ទទួលបានផលប្រយោជន៍យ៉ាងច្រើនពីពាណិជ្ជកម្មសេរីរហូតមក ។

កាលពីថ្ងៃទី២ ខែមេសា លោក Trump បានដំឡើងពន្ធ៣៤% លើទំនិញនាំចូលពីប្រទេសចិន ហើយនេះជាការដំឡើងពន្ធលើសពន្ធចាស់ស្មើត្រឹមតែ២០% ដែលលោក Trump បានប្រកាសយកពន្ធទំនិញចិន ២០% កាលពីដើមឆ្នាំ២០២៥ ។

ប្រទេសនានាលើពិភពលោក ត្រូវប្រឈមនឹងពន្ធនាំចូលទំនិញ ស្មើ១០% សម្រាប់ទំនិញគ្រប់ប្រភេទដែលនាំចូលអាមេរិក ដោយអនុវត្តចាប់ពីថ្ងៃទី៥ ខែមេសា ឆ្នាំ២០២៥ ។ រីឯប្រទេសដែលអាមេរិកចាត់ទុកថា បានដាក់ពន្ធទំនិញអាមេរិកខ្ពស់ ឬអនុវត្តវិធានការពាណិជ្ជកម្មពុំយុត្តិធម៌ អាមេរិកនឹងដាក់ពន្ធខ្ពស់វិញ (ហៅថា Reciprocal Tariff) ដែលអនុវត្តចាប់ពីថ្ងៃទី៩ ខែមេសា ។

បើតាមលោក Stephen Miran ប្រធានក្រុមប្រឹក្សាសេដ្ឋកិច្ចអាមេរិក គឺការដំឡើងពន្ធលើទំនិញនាំចូលពីប្រទេសនានានឹងធ្វើឱ្យប៉ះពាល់សេដ្ឋកិច្ចរយៈពេលខ្លី ប៉ុន្តែលោក Trump ផ្តោតលើគោលដៅរយៈពេលវែងក្នុងការកែទម្រង់ប្រព័ន្ធសេដ្ឋកិច្ចឱ្យមាននិរន្តរភាព និងយុត្តិធម៌ ។ រីឯរដ្ឋមន្ត្រីក្រសួងហិរញ្ញវត្ថុអាមេរិក លោក Scott Bessant សូមឱ្យប្រទេសនានាកុំដាក់ពន្ធលើទំនិញអាមេរិកវិញ ពីព្រោះវានឹងធ្វើឱ្យស្ថានការណ៍កាន់តែឡើងកំដៅ ។

លោក Trump ធ្លាប់បានចុះហត្ថលេខាលើបទបញ្ជាប្រតិបត្តិបិទចន្លោះប្រហោងពន្ធ ឬហៅថា «De Minimis» ដែលអនុញ្ញាតឱ្យទំនិញតម្លៃទាបរបស់ចិន និងហុងកុង អាចនាំចូលអាមេរិកដោយពុំចាំបាច់បង់ពន្ធ ។ ប៉ុន្តែការដំឡើងពន្ធថ្មីរបស់អាមេរិកនឹងធ្វើឱ្យប៉ះពាល់ដល់ក្រុមហ៊ុនអេឡិចត្រូនិក និងក្រុមហ៊ុនតូចតាចរបស់ចិន ។

អ្នកវិភាគសន្និដ្ឋានថា ការដំឡើងពន្ធទំនិញទៅវិញទៅមករវាងចិន និងអាមេរិក ដែលជាប្រទេសមហាអំណាចសេដ្ឋកិច្ចលើពិភពលោក នឹងប៉ះពាល់ដល់ការផ្គត់ផ្គត់ទំនិញពិភពលោក ហើយធ្វើឱ្យសេដ្ឋកិច្ចពិភពលោក មិនប្រាកដប្រជា ។ បើគ្មានការចរចារកវិធីដោះស្រាយទេ បញ្ហាពន្ធនឹងក្លាយជាសង្គ្រាមពាណិជ្ជកម្មមិនខាន ៕

ប្រទេសមីយ៉ាន់ម៉ា ៖ ភ្នាក់ងារសង្គ្រោះបានប្រទះឃើញសាកស.ព បវរកញ្ញាទេសចរណ៍មីយ៉ាន់ម៉ា ឆ្នាំ២០១៨ (Miss Tourism Myanmar 2018) ក្រោមអគារខុនដូបាក់បែកនៅកណ្តាលទីក្រុងម៉ាន់ដាឡៃ ក្នុងចំណោមសាកស.ព ពលរដ្ឋមីយ៉ាន់មារហូតដល់៣,០៨៥នាក់ ដែលបានស្លា.ប់ ដោយសារគ្រោះរញ្ជួយដីកាលពីថ្ងៃទី២៨ ខែមីនា ឆ្នាំ២០២៥ ។ ក្រៅពីនេះ មានពលរដ្ឋមីយ៉ាន់ម៉ារងរបួសចំនួន៤,៧១៥នាក់ និងបាត់ខ្លួន ៣៤១នាក់ ។ នេះបើតាមការចុះផ្សាយរបស់សារព័ត៌មានបរទេស កាលពីថ្ងៃទី៣ ខែមេសា ។

ហ្វេសប៊ុកផេកឈ្មោះ «Blessed Entertainment Miss Tourism Myanmar» បានរាយការណ៍កាលពីថ្ងៃទី២ ខែមេសា ថា ភ្នាក់ងារសង្គ្រោះមីយ៉ាន់ម៉ាបានប្រទះឃើញសាកសពនារីម្នាក់ពាក់អាវពណ៌ស ស្លៀកខោជើងវែង និងមានកាបូបប្រាក់ជាប់ខ្លួន ស្ថិតនៅខាងត្បូងអគារខុនដូបាក់បែក «Sky Villa» ប្លុក B ក្នុងអំឡុងពេលភ្នាក់ងារសង្គ្រោះកំពុងស្វែងរកមនុស្សនៅរស់រានមានជីវិតក្រោមខុនដូនេះ ។

ក្រោយមក ភ្នាក់ងារសង្គ្រោះក៏បានត្រួតពិនិត្យសាកសពនារីខាងលើឃើញថា នាងជាបវរកញ្ញាទេសចរណ៍មីយ៉ាន់ម៉ា ឆ្នាំ២០១៨ ហើយភ្នាក់ងារសង្គ្រោះក៏បានយកសាកសពនាងចេញពីខុនដូបាក់បែក និងបញ្ជូនសាកសពទៅធ្វើបុណ្យតាមប្រពៃណីនៅទីក្រុងយាំងហ្គន ។ បវរកញ្ញាទេសចរណ៍មីយ៉ាន់ម៉ារូបនេះធ្លាប់បានចូលរួមប្រកួតតំណាងប្រទេសមីយ៉ាន់ម៉ា ក្នុងពិធីប្រកួត «Miss Tourism World 2018» ដែលរៀបចំដោយ Blessed Entertainment ។

ចំណែកហ្វេសប៊ុកផេក «Blessed Entertainment» បញ្ជាក់ថា បវរកញ្ញាទេសចរណ៍មីយ៉ាន់ម៉ា ឆ្នាំ២០១៨ ពិតជាស្លាប់មែន ដែលនាងជាមនុស្សម្នាក់បានស្លាប់ដោយសាររញ្ជួយដីនៅមីយ៉ាន់ម៉ា ក្នុងចំណោមពលរដ្ឋជាង៣,០០០នាក់ ។ រដ្ឋាភិបាលមីយ៉ាន់ម៉ាឱ្យដឹង ហេតុការណ៍រញ្ជួយដីនៅមីយ៉ាន់ម៉ា ធ្វើឱ្យពលរដ្ឋស្លាប់ចំនួន៣,០៨៥នាក់, រងរបួស ៤,៧១៥នាក់ និងបាត់ខ្លួន ៣៤១នាក់ ។

ការប្រទះឃើញសាកសពបវរកញ្ញាទេសចរណ៍មីយ៉ាន់ម៉ា បានធ្វើឱ្យពលរដ្ឋមីយ៉ាន់ម៉ា និងអ្នកគាំទ្រនាងយ៉ាងច្រើននៅលើពិភពលោក អាឡោះអាល័យ និងសោកសៅយ៉ាងខ្លាំង ។ វាជាគ្រោះធម្មជាតិដ៏ខ្លាំងក្លាបំផុតដែលបានកើតឡើងនៅប្រទេសមីយ៉ាន់ម៉ាក្នុងរយៈពេលជាច្រើនឆ្នាំមកនេះ ភ្នាក់ងារសង្គ្រោះបានព្យាយាមស្វែងរកសាកសពពលរដ្ឋមីយ៉ាន់ម៉ានៅជាប់ក្រោមអគារបាក់បែក ប៉ុន្តែការស្វែងរកសាកសពមានឧបសគ្គយ៉ាងខ្លាំង ៕

ប្រទេសមីយ៉ាន់ម៉ា ៖ ពលរដ្ឋមីយ៉ាន់ម៉ាបានស្លា.ប់ ដោយសារគ្រោះរញ្ជួយដីដ៏ខ្លាំងក្លាកើនឡើងរហូតដល់ចំនួន៣,០៨៥នាក់ និងរងរបួស ៤,៧១៥នាក់ ខណៈពលរដ្ឋ ៣៤១នាក់ បាត់ខ្លួននៅក្រោមអគារបាក់បែក ។ ក្រោយរញ្ជួយដីកើតឡើង ពលរដ្ឋមីយ៉ាន់ម៉ាពុំហ៊ានត្រឡប់ទៅផ្ទះវិញទេ ពួកគេបោះតង់សម្រាកនៅតាមទីធ្លា និងចិញ្ចើមផ្លូវ ស្របពេលអាកាសធាតុក្តៅខ្លាំង និងភ្លៀងធ្លាក់ខ្លាំង ។ ការរស់នៅបែបនេះធ្វើឱ្យអង្គការសុខភាពពិភពលោក (WHO) បារម្ភពីជំងឺផ្សេងៗឆ្លងរាតត្បាតខ្លាំង ស្របពេលមន្ទីរពេទ្យជាច្រើនខូចខាតដោយសាររញ្ជួយដី ។

អង្គការសុខភាពពិភពលោក បានដាស់តឿនកាលពីថ្ងៃទី៣ ខែមេសា ឆ្នាំ២០២៥ ថា អាកាសធាតុក្តៅខ្លាំង និងភ្លៀងធ្លាក់ខ្លាំង អាចធ្វើឱ្យជំងឺផ្សេងៗឆ្លងរាតត្បាតមកលើពលរដ្ឋមីយ៉ាន់ម៉ា ដែលនៅរស់រានមានជីវិតពីគ្រោះរញ្ជួយដី កម្រិត៧.៧រិចទ័រ កាលពីថ្ងៃទី២៨ ខែមីនា កន្លងមក ។ តាំងពីកើតរញ្ជួយដីខ្លាំងក្លា រហូតមកដល់ថ្ងៃទី៣ ខែមេសា ពលរដ្ឋមីយ៉ាន់ម៉ាបានបោះតង់ស្នាក់នៅតាមទីធ្លា ហើយពួកគេប្រឈមនឹងការឆ្លងជំងឺរាតត្បាតខ្លាំង ។

គ្រោះរញ្ជួយដីលើកនេះបានបង្កការខូចខាតធ្ងន់ធ្ងរនៅទូទាំងប្រទេសមីយ៉ាន់ម៉ា គឺអគារ មន្ទីរពេទ្យ និងលំនៅឋាន ត្រូវបានបំផ្លាញអស់ជាច្រើន ។ នៅតំបន់ខ្លះទៀតរងផលប៉ះពាល់ដោយសាររញ្ជួយដីខ្លាំងបណ្តាលឱ្យពលរដ្ឋគ្មានកន្លែងរស់នៅ ខ្វះខាតស្បៀងអាហារ និងទឹកប្រើប្រាស់ ។ កាលពីថ្ងៃទី៣ ខែមេសា រដ្ឋាភិបាលមីយ៉ាន់ម៉ាឱ្យដឹងថា ពលរដ្ឋស្លាប់ដោយសាររញ្ជួយដី បានកើនឡើងរហូតដល់ចំនួន៣,០៨៥នាក់, រងរបួស ៤,៧១៥នាក់ និងបាត់ខ្លួន ៣៤១នាក់ ។

មន្ត្រីអង្គការសុខភាពពិភពលោក បារម្ភពីពលរដ្ឋមីយ៉ាន់ម៉ាកើតជំងឺអាសន្នរោគ ជំងឺស្បែក គ្រុនចាញ់ និងគ្រុនឈាម ដែលឆ្លងរាតត្បាតខ្លាំងនៅតាមទីប្រជុំជនរងផលប៉ះពាល់ដោយសាររញ្ជួយដីខ្លាំងបំផុត ដូចជា ៖ ទីក្រុងម៉ាន់ដាឡៃ, ទីក្រុងសាកាយ និងទីក្រុងណៃពិដោ ។ អង្គការសុខភាពពិភពលោកបានត្រៀមស្បៀងអាហារ និងតង់សម្រាក ស្មើទឹកប្រាក់១លានដុល្លារ សម្រាប់បញ្ជូនមកមីយ៉ាន់ម៉ា ។

កត្តាមួយធ្វើឱ្យកើតជំងឺឆ្លងរាតត្បាតខ្លាំង គឺបណ្តាលមកពីមន្ទីរពេទ្យផ្សេងៗក្នុងតំបន់រញ្ជួយដី បានរងការខូចខាតអស់ជាងពាក់កណ្តាល ។ ជាក់ស្តែង មន្ទីរពេទ្យជាច្រើននៅទីក្រុងម៉ាន់ដាឡៃ និងទីក្រុងណៃពិដោ ត្រូវបានបំផ្លាញ រហូតដល់គ្រូពេទ្យព្យាបាលអ្នករងរបួសនៅក្រៅមន្ទីរពេទ្យ ។ ក្រៅពីនេះ ពលរដ្ឋមីយ៉ាន់ម៉ាបានបោះតង់ស្នាក់នៅតាមទីធ្លានានា ដែលមានអាកាសធាតុក្តៅខ្លាំងរហូតដល់៣៨អង្សាសេ ដោយសារពួកគេបារម្ភពី Aftershocks ពុំហ៊ានត្រឡប់ទៅផ្ទះវិញទេ ។

មីយ៉ាន់ម៉ាបានកើតវិបត្តិរយៈពេលវែងអាចធ្វើឱ្យមានជំងឺឆ្លងរាតត្បាតជាច្រើន ដូចជា ៖ ជំងឺស្បែក, គ្រុនចាញ់ និងគ្រុនឈាម ប៉ុន្តែជំងឺគួរឱ្យបារម្ភបំផុត គឺអាសន្នរោគ ព្រោះជំងឺនេះធ្លាប់ឆ្លងរាតត្បាតនៅទីក្រុងម៉ាន់ដាឡៃ កាលពីឆ្នាំ២០២៤ ។ អ្វីកាន់តែធ្ងន់ធ្ងរជាងនេះ គឺភ្នាក់ងារឧតុនិយមប្រកាសថា នឹងមានភ្លៀងធ្លាក់ខ្លាំង ចាប់ពីថ្ងៃទី៦ ដល់ថ្ងៃទី១១ ខែមេសា ដែលបណ្តាលឱ្យអ្នករស់នៅទីសាធារណៈប្រឈមនឹងការឆ្លងមេរោគពីទឹក ។ នេះបើតាមមន្ត្រីអង្គការសុខភាពពិភពលោក នៅមីយ៉ាន់ម៉ា ៕

នៅក្នុងសកម្មភាពដែលបង្ហាញពីការមិនទុកចិត្តគ្នា និងភាពតានតឹងផ្នែកនយោបាយ រដ្ឋាភិបាលអាមេរិកបានហាមឃាត់បុគ្គលិករបស់ខ្លួនដែលឈរជើងនៅក្នុងប្រទេសចិនមិនឱ្យមានទំនាក់ទំនងស្នេហាជាមួយជនជាតិចិន។ ការណែនាំនេះត្រូវបានអនុវត្តនៅក្នុងខែមករាឆ្នាំ 2025 ដោយឯកអគ្គរដ្ឋទូតសហរដ្ឋអាមេរិកលោក Nicholas Burns នៅមុនពេលដែលគាត់ចាកចេញពីតួនាទី។ នេះបើតាមចុះផ្សាយរបស់សារព័ត័មានបរទេស Bangkok Post។

ការរឹតបន្តឹងនេះអនុវត្តយ៉ាងទូលំទូលាយចំពោះបុគ្គលិករដ្ឋាភិបាលអាមេរិកដែលបានប្រកាសនៅទូទាំងប្រទេសចិនដីគោក រួមទាំងស្ថានកុងស៊ុលធំៗដូចជាទីក្រុងប៉េកាំង ក្វាងចូវ សៀងហៃ សេនយ៉ាង និងវូហាន ក៏ដូចជាដែនដីពាក់កណ្តាលស្វយ័តរបស់ទីក្រុងហុងកុងផងដែរ។ គោលការណ៍នេះមិនត្រឹមតែអនុវត្តចំពោះបុគ្គលិករដ្ឋាភិបាលអាមេរិកដែលឈរជើងនៅក្នុងប្រទេសចិនប៉ុណ្ណោះទេ ប៉ុន្តែថែមទាំងចំពោះសមាជិកគ្រួសារ និងបុគ្គលផ្សេងៗដែលធ្វើការជាមួយរដ្ឋាភិបាលនិងមានសិទ្ធិទទួលបានព័ត៌មានសម្ងាត់ ផងដែរ។

ច្បាប់នេះបានធ្វើឲ្យមានការព្រួយបារម្ភកាន់តែខ្លាំងឡើងរបស់ក្រុងវ៉ាស៊ីនតោនអំពីសន្តិសុខជាតិ ខណៈដែលទំនាក់ទំនងរវាងសហរដ្ឋអាមេរិក និងចិនបន្តកាន់តែយ៉ាប់យ៉ឺនលើបញ្ហាដូចជាជម្លោះពាណិជ្ជកម្ម និងឥទ្ធិពលសកលលោក។ សហរដ្ឋអាមេរិកបានអនុវត្តគោលនយោបាយនេះជាមធ្យោបាយមួយដើម្បីគ្រប់គ្រង ឬដោះស្រាយបញ្ហាប្រឈមដែលកំពុងកើនឡើងនៅក្នុងទំនាក់ទំនងរបស់ខ្លួនជាមួយប្រទេសចិន។ នៅពេលដែលភាពតានតឹងផ្នែកការទូតកើនឡើង សហរដ្ឋអាមេរិកមើលឃើញថាការរឹតបន្តឹងនេះអាចជាវិធានការបង្ការដែលមានគោលបំណងជៀសវាងផលវិបាក ឬហានិភ័យបន្ថែមទៀតនៅក្នុងការដោះស្រាយរបស់ខ្លួនជាមួយទីក្រុងប៉េកាំង។

បច្ចុប្បន្ននេះ ទាំងក្រសួងការបរទេសចិន និងស្ថានទូតអាមេរិកប្រចាំប្រទេសចិន គ្មានភាគីណាបានបញ្ចេញមតិទាក់ទងនឹងការអនុវត្តបម្រាមនេះទេ។ គោលនយោបាយនេះបន្ថែមភាពស្មុគស្មាញដែលមានស្រាប់មួយទៀតនៅក្នុងទំនាក់ទំនងដ៏តានតឹងរវាងមហាអំណាចពិភពលោកទាំងពីរ៕

ផ្សារទំនើបឌូបៃ មានទីតាំងនៅកណ្តាលទីក្រុងឌូបៃ ឈរជាផ្សារទំនើបដ៏ធំបំផុតរបស់ពិភពលោក ដែលផ្តល់ជូននូវការលាយបញ្ចូលគ្នានៃប្រណីតភាព រចនាប័ទ្ម និងការកម្សាន្តជាច្រើន។ ជាមួយនឹងហាងលក់រាយរាប់ពាន់ ជម្រើសអាហារ និងការកម្សាន្តដ៏គួរឱ្យចាប់អារម្មណ៍ ដែលបានទាក់ទាញភ្ញៀវជាតិ និងអន្តរជាតិរាប់លាននាក់ជារៀងរាល់ឆ្នាំ។ ផ្សារទំនើបឌូបៃ គ្របដណ្តប់លើផ្ទៃដីសរុបប្រហែល ១.១ លានម៉ែត្រការ៉េ ដែលស្មើនឹងទីលានបាល់ទាត់ប្រហែល ២០០។ ផ្ទៃខាងក្នុងរបស់វាមានទំហំរហូតដល់ ៥៥០,០០០ម៉ែត្រការ៉េ ជាមួយនឹងទំហំកន្លែងលក់រាយដល់ទៅ ៣៥០,០០០ ម៉ែត្រការ៉េ។

ផ្សារទំនើបនេះមានហាងលក់រាយជាង ១,២០០ហាង ដែលបង្ហាញពីការលាយបញ្ចូលគ្នានៃម៉ាកប្រណីតលំដាប់ខ្ពស់ ម៉ូដទាន់សម័យ និងហាងពិសេសៗ។ វាបំពេញតាមគ្រប់តម្រូវការ និងចំណូលចិត្តរបស់អ្នក មិនថាអ្នកស្វែងរក សម្លៀកបំពាក់ទាន់សម័យ ឬរចនាប័ទ្មដ៏កម្រនោះទេ។ Dubai Mall ក៏ជាមជ្ឈមណ្ឌលកម្សាន្តផងដែរដូចជា Dubai Aquarium & Underwater Zoo ផ្តល់នូវការជម្រកដ៏អស្ចារ្យរបស់ជីវិតសត្វសមុទ្រ រួមទាំងត្រីឆ្លាម និងត្រីរ៉េផងដែរ ខណៈពេលដែល VR Park ដែលជាជាមជ្ឈមណ្ឌលកម្សាន្តនិម្មិតដែលទំនើបទាន់សម័យ បានទាក់ទាញអ្នកទស្សនាក្នុងការផ្សងព្រេងជាមួយកម្មវិធីនិម្មិតដ៏គួរឱ្យរំភើបជាច្រើន។ កន្លែងជិះស្គីទឹកកកឌូបៃដែលមានទំហំធំខ្នាតអូឡាំពិក សាកសមបំផុតមិនថាអ្នកចាប់ផ្តើមដំបូង ឬជាអ្នកជិះស្គីជំនាញនោះទេ។

នៅជាប់នឹងផ្សារទំនើបគឺអគារ Burj Khalifa ដែលជាអគារខ្ពស់ជាងគេក្នុងពិភពលោក បានផ្តល់នូវទិដ្ឋភាពដែលមិនអាចបំភ្លេចបាន។ អ្នកទស្សនាក៏អាចរីករាយជាមួយប្រព័ន្ធទឹកឌូបៃ ដែលជាការបង្ហាញទឹកដ៏អស្ចារ្យមានទីតាំងនៅបឹង Burj តែម្ដង។ អ្វីដែរពិសេសគឺ ផ្សារទំនើបឌូបៃ រៀបចំព្រឹត្តិការណ៍ និងពិធីបុណ្យផ្សេងៗ រាប់ចាប់ពីការបង្ហាញម៉ូត រហូតដល់ការតាំងពិពណ៌វប្បធម៌ បង្កើតជាបទពិសោធន៍សម្រាប់ភ្ញៀវគ្រប់រូបពេញមួយឆ្នាំ។

ដើម្បីធានាបាននូវដំណើរកម្សាន្តដ៏រីករាយ ភ្ញៀវទេសចរណ៍គួរស្ដាប់តាមការណែនាំ ដើម្បីជៀសវាងហ្វូងមនុស្សច្រើនពាន់នាក់។ បាក់ស្បែកជើងដែលមានផាសុខភាពគឺជាកត្តាចាំបាច់សម្រាប់ការធ្វើដំណើរទៅកាន់ផ្សារដែលមានទំហំធំទូលាយនេះ ជាពិសេសគឺពិនិត្យមើលកាលវិភាគកម្មវិធីសំខាន់ៗដែលធ្វើឡើងជារៀងរាល់ឆ្នាំនៅទីនោះតែម្ដង៕

នាយករដ្ឋមន្រ្តីហ្គ្រីនឡែន លោក Jens-Frederik Nielsen បានធ្វើការបដិសេធយ៉ាងម៉ឺងម៉ាត់ចំពោះការអះអាងដែលថាសហរដ្ឋអាមេរិកនឹងមានឪកាសក្នុងការគ្រប់គ្រងហ្គ្រីនឡែន។ សេចក្តីថ្លែងការណ៍របស់គាត់ធ្វើឡើងជាការឆ្លើយតបទៅនឹងការលើកឡើងរបស់ប្រធានាធិបតីអាមេរិក Donald Trump ដែលក្នុងនោះ Trump បានអះអាងថាមានការពិភាក្សាពិតប្រាកដអំពីការបញ្ចូល Greenland ក្នុងអំឡុងអាណតិ្តរបស់លោក។ លោក Trump បានសំដៅទៅលើ Greenland ជាទីតាំងយុទ្ធសាស្ត្រមួយដែលមានតម្លៃភូមិសាស្ត្រនយោបាយដ៏សំខាន់។

លោក Nielsen បានសរសេនៅក្នុង Facebook ដោយបានសង្កត់ធ្ងន់លើស្វ័យភាពរបស់ Greenland ដោយបញ្ជាក់យ៉ាងច្បាស់ថា “អាមេរិកនឹងមិនមានឪកាសក្នុងកាន់កាប់ហ្រ្គីនឡែនឡើយ។ យើងមិនមែនជាកម្មសិទ្ធិរបស់អ្នកណាទេ។ យើងកំណត់អនាគតរបស់យើងផ្ទាល់” ។ ការឆ្លើយតបនេះបង្ហាញពីការប្តេជ្ញាចិត្តរបស់ Greenland ក្នុងការការពារអធិបតេយ្យភាព និងឯករាជ្យភាពរបស់ខ្លួនពីឥទ្ធិពលបរទេស។ សេចក្តីថ្លែងការណ៍នេះគូសបញ្ជាក់យ៉ាងច្បាស់ថា ជោគវាសនារបស់ហ្គ្រីនឡែនស្ថិតនៅក្នុងដៃប្រជាជនរបស់ខ្លួន។

ដោយបន្ថែមភាពស្មុគ្រស្មាញដល់ស្ថានការណ៍ អនុប្រធានាធិបតីសហរដ្ឋអាមេរិកលោក JD Vance ថ្មីៗនេះបានទៅទស្សនាមូលដ្ឋានយោធាអាមេរិកនៅ Greenland ។ ក្នុងអំឡុងពេលទស្សនកិច្ចរបស់គាត់ លោក Vance បានរិះគន់ពីអសមត្ថភាពរបស់ប្រទេសដាណឺម៉ាកក្នុងការផ្តល់ការការពារគ្រប់គ្រាន់សម្រាប់ Greenland ដោយទទូចថាសហរដ្ឋអាមេរិកអាចនឹងមើលថែបានប្រសើរជាងមុនដើម្បីធានាសន្តិសុខនៃទឹកដីនេះ។

ហ្គ្រីនលែន គឺជាប្រទេសកោះមួយនៅអាមេរិកខាងជើង ដែលជាផ្នែកនៃព្រះរាជាណាចក្រដាណឺម៉ាក។ វាស្ថិតនៅចន្លោះមហាសមុទ្រអាកទិក និង មហាសមុទ្រអាត្លង់ទិក នៅភាគខាងកើតនៃប្រជុំកោះអាកទិករបស់កាណាដា។ ហ្គ្រីនលែន គឺជាកោះធំជាងគេបំផុតរបស់ពិភពលោក។ទីតាំង និងធនធានធម្មជាតិរបស់វាបានធ្វើឱ្យវាក្លាយជាអ្នកលេងដ៏សំខាន់នៅក្នុងតំបន់អាក់ទិក។

ទោះជាយ៉ាងណាក៏ដោយ ជំហរដ៏ម៉ឺងម៉ាត់របស់ Nielsen បញ្ជាក់យ៉ាងច្បាស់ថា រាល់ក្តីប្រាថ្នារបស់បរទេសដើម្បីគ្រប់គ្រង Greenland គឺមិនស្វាគមន៍ឡើយ ហើយនឹងត្រូវបានប្រឆាំងយ៉ាងម៉ឺងម៉ាត់។ ជាមួយនឹងការកើនឡើងនូវចំណាប់អារម្មណ៍ភូមិសាស្ត្រនយោបាយនៅក្នុងតំបន់អាក់ទិក ភាពជាអ្នកដឹកនាំរបស់ហ្គ្រីនឡែននៅតែបន្តតស៊ូមតិសម្រាប់ស្វ័យភាព និងសិទ្ធិរបស់ប្រជាជនរបស់ខ្លួន ដោយធានាថាអនាគតរបស់ប្រទេសនេះនៅតែស្ថិតក្នុងដៃរបស់ពួកគេ៕

ក្នុងរយៈពេលប៉ុន្មានឆ្នាំចុងក្រោយនេះ ការទទួលបានទិដ្ឋាការសិស្ស F-1 របស់សហរដ្ឋអាមេរិកបានក្លាយជាបញ្ហាប្រឈមកាន់តែខ្លាំងសម្រាប់សិស្សនិស្សិតអន្តរជាតិ។ សារពើពន្ធឆ្នាំ ២០២៣-២០២៤ បានរកឃើញអត្រាបដិសេធនៃការស្នើសុំទិដ្ឋាការ F-1 ៤១% ដែលជាចំនួនខ្ពស់បំផុតក្នុងរយៈពេលមួយទសវត្សរ៍។ ក្នុងចំណោមពាក្យស្នើរសុំចំនួន ៦៧៩,០០០ ដែលទទួលបាន គឺមាន ២៧៩,០០០ ហើយដែលត្រូវបានបដិសេធ ដែលនេះបង្ហាញពីការកើនឡើងគួរឱ្យកត់សម្គាល់ពីអត្រាបដិសេធកាលពីឆ្នាំមុន ៣៩% ។

និន្នាការនេះអាចត្រូវបានសន្មត់ថាជាផ្នែកមួយនៃការផ្លាស់ប្តូរវិធីសាស្រ្ត ដែលក្រសួងការបរទេសសហរដ្ឋអាមេរិកប្រើដើម្បីគណនាទិន្នន័យទិដ្ឋាការ ដែលជាការផ្លាស់ប្តូរដែលបានអនុវត្តចាប់តាំងពីឆ្នាំ ២០១៩ មក ។ ខណៈពេលដែលចំនួនពាក្យស្នើសុំមានការប្រែប្រួលក្នុងរយៈពេលជាច្រើនឆ្នាំ ជំងឺរាតត្បាតនៅឆ្នាំ ២០១៩-២០ បានបណ្តាលឱ្យមានការធ្លាក់ចុះយ៉ាងខ្លាំងបន្ថែមទៀត។ ទោះបីជាចំនួនពាកលស្នើរសុំបានស្ទុះងើបឡើងវិញក្រោយជំងឺរាតត្បាតក៏ដោយ ក៏នៅកំឡុងឆ្នាំ ២០២៣-២៤ មានការថយចុះបន្តិចបើធៀបនឹងឆ្នាំមុនៗ។

ទោះបីជាមានបញ្ហាប្រឈមទាំងនេះក៏ដោយ សហរដ្ឋអាមេរិកនៅតែជាគោលដៅដ៏ពេញនិយមសម្រាប់សិស្សនិស្សិតអន្តរជាតិដែរ ដោយក្នុងឆ្នាំសិក្សា ២០២៣-២០២៤ មានសិស្សជាង 1.1 លាននាក់មកពីជុំវិញពិភពលោកបានចុះឈ្មោះនៅក្នុងស្ថាប័នរបស់សហរដ្ឋអាមេរិក ដែលជាចំនួនខ្ពស់បំផុតមិនធ្លាប់មាន។ និស្សិតទាំងនេះមិនត្រឹមតែរួមចំណែកបង្កើតឲ្យមានវប្បធម៌ចម្រុះនៅក្នុងបរិវេណសាលាប៉ុណ្ណោះទេ ប៉ុន្តែថែមទាំងនាំមកនូវអត្ថប្រយោជន៍សេដ្ឋកិច្ចដ៏សំខាន់ផងដែរ ដោយបន្ថែមទឹកប្រាក់ប្រមាណ ៥០ ពាន់លានដុល្លារដល់សេដ្ឋកិច្ចសហរដ្ឋអាមេរិក។

ឥណ្ឌាបាននាំមុខគេក្នុងនាមជាប្រភពនៃនិស្សិតអន្តរជាតិធំជាងគេនៅសហរដ្ឋអាមេរិក បន្ទាប់មកគឺប្រទេសចិន។ ប្រទេសវៀតណាមឈរនៅលំដាប់លេខរៀងទីប្រាំមួយដោយមានសិស្សចំនួន ២២,០៦៦ នាក់បានចុះឈ្មោះចូលរៀន។

ការកើនឡើងអត្រាបដិសេធនៃទិដ្ឋាការសុំចូលរៀន F-1 បង្កើតជាចម្ងល់យ៉ាងខ្លាំងអំពីអនាគតនៃការអប់រំអន្តរជាតិនៅសហរដ្ឋអាមេរិក ខណៈពេលដែលបញ្ហាប្រឈមនៅតែមាន ភាពទាក់ទាញជាសកលនៃការអប់រំរបស់អាមេរិកក៏នៅតែមានភាពរឹងមាំផងដែរ ហើយកិច្ចខិតខំប្រឹងប្រែងដើម្បីដោះស្រាយឧបសគ្គទាំងនេះមានសារៈសំខាន់ណាស់ក្នុងការធានាបន្តនូវភាពជោគជ័យរបស់សហរដ្ឋអាមេរិក ក្នុងនាមជាមជ្ឈមណ្ឌលនៃឧត្តមភាពសិក្សា៕

ប្រទេសចិនបានផ្តួចផ្តើមធ្វើសមយុទ្ធយោធាទ្រង់ទ្រាយធំនៅជុំវិញកោះតៃវ៉ាន់នៅដែលខ្លួនហៅថាជា “ការព្រមានយ៉ាងតឹងរ៉ឹង” ដែលប្រឆាំងនឹងសកម្មភាពបំបែកខ្លួនរបស់តៃវ៉ាន់។ វាបានធ្វើឡើងបន្ទាប់ពីមានការលើកឡើងរបស់ប្រធានាធិបតីតៃវ៉ាន់ លោក ឡៃ ឈីងតេ ដែលបានហៅទីក្រុងប៉េកាំងថាជា “កម្លាំងសត្រូវបរទេស”។ សមយុទ្ធនេះរៀបចំឡើងដោយកងទ័ពជើងទឹក និងកងកម្លាំងរ៉ុក្កែតរបស់ប្រទេសចិន រួមមានការសមយុទ្ធត្រៀមប្រយុទ្ធ ការវាយប្រហារតាមដែនសមុទ្រ ដីគោក និងសេណារីយ៉ូបិទផ្លូវ។

រដ្ឋាភិបាលរបស់តៃវ៉ាន់បានប្រតិកម្មយ៉ាងខ្លាំងនឹងវីដេអូរបស់យោធាចិនដាក់ឈ្មោះលោក ឡៃ ឈីងតេ ថាជា “ប៉ារ៉ាស៊ីត” ដែលបង្ហាញរូបគាត់ក្នុងលក្ខណៈបែបតុក្កតា និងប្រមាថមើលងាយ ដោយរដ្ឋមន្ត្រីការពារជាតិរបស់តៃវ៉ាន់បានហៅសកម្មភាពបែបនេះថាមិនត្រឹមតែជាការបង្កហេតុប៉ុណ្ណោះទេ ប៉ុន្តែថែមទាំងបំផ្លាញសន្តិភាព និងស្ថិរភាពក្នុងតំបន់ផងដែរ។

ជាការឆ្លើយតប តៃវ៉ាន់បានចល័តនាវាចម្បាំង យន្តហោះ និងប្រព័ន្ធមីស៊ីល ដើម្បីតាមដានស្ថានការណ៍យ៉ាងដិតដល់។ រដ្ឋាភិបាលរបស់កោះតៃវ៉ាន់បានអះអាងជាថ្មីនូវជំហររបស់ខ្លួនថាការសម្រេចចិត្តអំពីអនាគតរបស់កោះនេះគឺស្ថិតនៅលើប្រជាជនរបស់ខ្លួនតែប៉ុណ្ណោះ ដោយបានច្រានចោលការទាមទារអធិបតេយ្យភាពរបស់ទីក្រុងប៉េកាំង។

កាលពីពេលថ្មីៗនេះ រដ្ឋមន្ត្រីការពារជាតិអាមេរិក លោក Pete Hegseth បានធ្វើទស្សនកិច្ចនៅអាស៊ី ដើម្បីពង្រឹងសម្ព័ន្ធភាព ដែលអាចមានឥទ្ធិពលលើសក្ដានុពលក្នុងតំបន់។ អ្នកវិភាគជឿថា ប្រទេសចិនបានជ្រើសរើសពេលវេលាជាក់លាក់នេះសម្រាប់ធ្វើសមយុទ្ធរបស់ខ្លួន ដើម្បីដាក់សម្ពាធដោយប្រយោលដល់តៃវ៉ាន់ ខណៈពេលដែលជៀសវាងការប្រឈមមុខដាក់គ្នាដោយផ្ទាល់ជាមួយសហរដ្ឋអាមេរិក។ នេះមានសារៈសំខាន់ ខណៈដែលទាំងប្រទេសចិន និងសហរដ្ឋអាមេរិកក៏កំពុងរៀបចំសម្រាប់ការចរចាពាណិជ្ជកម្មផងដែរ ហើយប្រទេសចិនទំនងជាចង់រក្សាតុល្យភាព ដើម្បីជៀសវាងភាពតានតឹងដែលអាចកើនឡើងខ្លាំងពេក។

លើសពីនេះទៀត ចារកម្មពីតៃវ៉ាន់បង្ហាញថា ចិនអាចនឹងប្រើសមយុទ្ធទាំងនេះ ដើម្បីបង្វែរការផ្តោតអារម្មណ៍របស់យោធាខ្លួនពីបញ្ហាផ្ទៃក្នុង រួមទាំងការស៊ើបអង្កេតអំពើពុករលួយ ដែលបានធ្វើឱ្យរង្គោះរង្គើដល់ការបង្កើតវិស័យការពារជាតិនាពេលថ្មីៗនេះ។នេះបើតាមគេហ័ទំព័រសារព័ត៌មានបរទេស CNN៕