សហរដ្ឋអាមេរិក ៖ រូបគំនូររបស់ប្រធានាធិបតីអាមេរិក លោក Donald Trump ត្រូវបានគេបំពាក់នៅលើជញ្ជាំងអគារ Capitol រដ្ឋខូឡូរ៉ាដូ សហរដ្ឋអាមេរិក ព្រមជាមួយរូបគំនូរអតីតប្រធានាធិបតីអាមេរិកជាច្រើនរូបទៀត ប៉ុន្តែលោក Trump បែរជាពុំសប្បាយចិត្តនឹងរូបគំនូររបស់ខ្លួនទៅវិញ ។ លោកក៏បញ្ជាឱ្យអភិបាលរដ្ឋខូឡូរ៉ាដូ ទម្លាក់រូបគំនូរលោកចុះ ដោយសារវាអាក្រ.ក់ ខ្លាំងជាងរូបពិត លោកពុំអាចទទួលយកបានទេ ។

កាលពីថ្ងៃទី២៣ ខែមីនា ឆ្នាំ២០២៥ លោក Trump និយាយថា រូបគំនូររបស់លោកនៅរដ្ឋខូឡូរ៉ាដូ ពិតជាអាក្រក់មើលជាងរូបភាពពិត អ្នកគូររូបនេះមានចេតនាធ្វើឱ្យវាអាក្រក់ ហើយសូម្បីតែខ្លួនលោក ក៏ពុំអាចទទួលយកបានដែរ លោកពុំធ្លាប់ឃើញរូបបែបនេះពីមុនមកទេ ។ រូបគំនូររបស់លោក គឺជាស្នាដៃរបស់វិចិត្រករឈ្មោះ សារ៉ា ប៊តមេន ដែលលោកស្រីបានគូររូបលោក Trump តាំងពីឆ្នាំ២០១៩ ។ ក្រៅពីរូបគំនូរលោក Trump លោកស្រីក៏បានគូររូបអតីតប្រធានាធិបតីអាមេរិកជាច្រើនទៀតបំពាក់លើជញ្ជាំងអគារ Capitol រដ្ឋខូឡូរ៉ាដូ ដូចជា ៖ លោក បារ៉ាក់ អូបាម៉ា ។

លោក Trump និយាយថា រូបគំនូររបស់លោក បារ៉ាក់ អូបាម៉ា មើលទៅល្អណាស់ បើធៀបនឹងរូបរបស់លោក ពីព្រោះរូបលោកអាក្រក់មើលខ្លាំងណាស់ ។ អ្នកស្រី សារ៉ា ប៊តមេន ជាវិចិត្រករគូររូបបានបាត់បង់ថ្វៃដៃ ដោយសារអ្នកស្រីមានអាយុកាន់តែច្រើន ទើបលោកបញ្ជាឱ្យអភិបាលរដ្ឋខូឡូរ៉ាដូ ទម្លាក់រូបលោកចុះជាបន្ទាន់ ។ អភិបាលរដ្ឋខូឡូរ៉ាដូ គួរតែមានអារម្មណ៍ខ្មាស់អៀនចំពោះទង្វើរបស់ខ្លួន ។

លោក Trump ថែមទាំងបានសរសេរក្នុងបណ្តាញសង្គមអំពីរូបគំនូរថា គ្មានអ្នកណាចូលចិត្តរូបមិនល្អរបស់ខ្លួនទេ ហើយលោកពុំចង់ដាក់រូបគំនូរលោកលើជញ្ជាំងអគារ Capitol ជាមួយអតីតប្រធានាធិបតីអាមេរិកផ្សេងទៀតទេ ។ ក្រោយពីលោកបញ្ជាឱ្យអភិបាលរដ្ឋខូឡូរ៉ាដូ ទម្លាក់រូបលោកចុះ ធ្វើឱ្យពលរដ្ឋអាមេរិកជាច្រើននាក់នាំគ្នាមកទស្សនា និងថតរូបគំនូររបស់លោក មុនពេលទម្លាក់ចុះ ។ រូបលោក Trump ដែលគេដោះចេញពីជញ្ជាំងអគារ Capitol រដ្ឋខូឡូរ៉ាដូ គឺនឹងយកទៅដាក់នៅកន្លែងសមរម្យមួយ ហើយរង់ចាំការបញ្ជាពីលោក នាពេលក្រោយ ។

ចំណែកលោកស្រី សារ៉ា ប៊តមេន ជាវិចិត្រករគូររូបលោក Trump ពុំបាននិយាយអ្វីទេ ពាក់ព័ន្ធនឹងលោក Trump រិះគន់ថា ថ្វីដៃគូររូបអន់ខ្លាំង ។ ប៉ុន្តែលោកស្រីធ្លាប់និយាយមកកាន់ប្រព័ន្ធផ្សព្វផ្សាយនាពេលកន្លងមកថា វាមានសារៈសំខាន់ណាស់ ដែលរូបគំនូររបស់លោក បារ៉ាក់ អូបាម៉ា និងរូបលោក Trump ពាក់ព័ន្ធនឹងរឿងនយោបាយ ៕

ប្រទេសជប៉ុន ៖ ប្រទេសជប៉ុនបានត្រៀមខ្លួនរួចជាស្រេចដើម្បីទប់ទល់នឹងគ្រោះមហន្តរាយធម្មជាតិធ្ងន់ធ្ងរ ដែលអាចកើតឡើងដោយសារបន្ទុះភ្នំភ្លើងហ្វូជិ (Fuji) ដោយសារភ្នំភ្លើងនេះជាតំបន់ទេសចរណ៍ដ៏ពេញនិយមរបស់ពលរដ្ឋជប៉ុន និងភ្ញៀវទេសចរបរទេស ។ វាបានស្ងប់ស្ងាត់ គ្មានការផ្ទុះភ្នំភ្លើងអស់រយៈពេលយ៉ាងយូរ ហើយវាពុំធ្លាប់ស្ងប់ស្ងាត់បែបនេះទេពីមុនមក ។ តាមធម្មតា ភ្នំភ្លើងនឹងផ្ទុះឡើងចាប់ពី៥០ឆ្នាំ ទៅ២០០ឆ្នាំ ដែលធ្វើឱ្យអ្នកជំនាញដាស់តឿនពីការផ្ទុះភ្នំភ្លើងគ្រប់ពេលវេលា ។

ភ្នំភ្លើងហ្វូជិ បានផ្ទុះលើកចុងក្រោយកាលពីឆ្នាំ១៧០៧ (ឬជាង៣០០ឆ្នាំមុន) ហើយភ្នំភ្លើងនេះនឹងផ្ទុះឡើងម្តងទៀត បើវាផ្ទុះពិតមែន វានឹងធ្វើឱ្យប៉ះពាល់នៅតំបន់ទេសចរណ៍យ៉ាងធ្ងន់ធ្ងរ និងសម្លាប់ជីវិតមនុស្សយ៉ាងច្រើន ។ មន្ត្រីជប៉ុនបានដកស្រង់ការស្រាវជ្រាវមួយថា បើភ្នំភ្លើងហ្វូជិផ្ទុះម្តងទៀត វានឹងបញ្ចេញផ្សែងផេះគ្របដណ្តប់ពេញបរិយាកាសទាំងអស់ ឬមានកម្រិតខ្លាំងជាងការរញ្ជួយដី និងរលកយក្សស៊ូណាមិ កាលពីឆ្នាំ២០១១ រហូតដល់១០ដង ។

ផ្សែងផេះចេញពីភ្នំភ្លើងហ្វូជិយ៉ាងច្រើនមហាសាលនេះ នឹងគ្របដណ្តប់ពេញខេត្តស៊ិសូអូកាក់ ដែលជាទីតាំងរបស់ភ្នំភ្លើងហ្វូជិ ហើយផ្សែងផេះនឹងគ្របដណ្តប់លើទីក្រុងយ៉ូកូហាម៉ា និងទីក្រុងខាវ៉ាសាគិ ក្នុងខេត្តខាណាង៉ាវ៉ាក់ ឬផ្សែងភ្នំភ្លើងនឹងបាញ់ឆ្ងាយទៅដល់ខេត្តហ្វូគុឈិម៉ាក់ ឯណោះ ។ លើសពីនេះ សូម្បីតែទីក្រុងតូក្យូ ក៏គេចមិនផុតដែរ គឺនឹងរងផលប៉ះពាល់ដោយសារការផ្ទុះភ្នំភ្លើងហ្វូជិ ដែលមានផ្សែងពណ៌ខ្មៅយ៉ាងច្រើនពេញមេឃ និងបាំងពន្លឺថ្ងៃ ធ្វើឱ្យទីក្រុងទាំងនេះងងឹតដូចយប់ ។

ផលប៉ះពាល់ផ្សេងៗនឹងកើតឡើងផងដែរ បន្ទាប់ពីភ្នំភ្លើងហ្វូជិផ្ទុះ ដូចជា ៖ ប៉ះពាល់សុខភាពពលរដ្ឋ, ប៉ះពាល់ការរស់នៅប្រចាំថ្ងៃ ព្រមទាំងបំផ្លាញហេដ្ឋារចនាសម្ព័ន្ធផ្សេងៗរបស់ជប៉ុន ។ នេះបើតាមការស្រាវជ្រាវពីការផ្ទុះភ្នំភ្លើងហ្វូជិ ។

រដ្ឋាភិបាលជប៉ុនសន្និដ្ឋានថា ការចាត់ការអ្វីៗគ្រប់យ៉ាងដែលបានខូចខាតដោយសារភ្នំភ្លើង ឱ្យត្រឡប់មករកសភាពធម្មតាវិញ នឹងចំណាយពេលយូររហូតដល់រាប់សិបឆ្នាំ ។ ហេតុនេះ រដ្ឋាភិបាលជប៉ុនបានចាត់វិធានការទប់ទល់នឹងគ្រោះមហន្តរាយ ដែលអាចកើតឡើងដោយសារការផ្ទុះភ្នំភ្លើងហ្វូជិ ដោយបញ្ជាទៅមន្ត្រីរដ្ឋាភិបាលទាំងថ្នាក់លើ និងថ្នាក់ក្រោម ពន្លឿនការថែទាំ និងជួសជុលហេដ្ឋារចនាសម្ព័ន្ធសំខាន់ៗឱ្យរឹងមាំ ។

ចំណែកពលរដ្ឋ រដ្ឋាភិបាលជប៉ុនបានណែនាំឱ្យនៅតែក្នុងលំនៅឋានពេលភ្នំភ្លើងហ្វូជិផ្ទុះ និងគួរត្រៀមស្បៀងអាហារទុកឱ្យគ្រប់គ្រាន់ យ៉ាងហោចណាស់ ស្បៀងអាចបរិភោគបាន២សប្តាហ៍ ។ ករណីមានគ្រោះមហន្តរាយធ្ងន់ធ្ងរ គួរតែជម្លៀសពលរដ្ឋចេញពីទីក្រុង ឬពលរដ្ឋប្រញាប់ចាកចេញពីតំបន់ដែលខ្លួនរស់នៅជាបន្ទាន់ ។

ប៉ុន្តែមតិផ្សេងៗពុំយល់ស្របនឹងផែនការទប់ទល់គ្រោះមហន្តរាយធម្មជាតិរបស់រដ្ឋាភិបាលជប៉ុនទេ ពីព្រោះវិធានការនេះអាចពុំសមស្របសម្រាប់តំបន់មួយចំនួនដែលមានពលរដ្ឋរស់នៅច្រើន ជាពិសេស នៅទីក្រុងតូក្យូ ៕

ប្រទេសថៃ ៖ លោក ផីផាត់ រ៉ាជឆាគិចប្រាកាន រដ្ឋមន្ត្រីក្រសួងការងារថៃ បានស្នើឱ្យអាជ្ញាធរចុះតាមតំបន់ផ្សេងៗដើម្បីត្រួតពិនិត្យការធ្វើការខុសច្បាប់របស់ពលករបរទេស ហើយលោកបញ្ជាក់ថា អាជ្ញាធរថៃបានត្រួតពិនិត្យក្នុងតំបន់គ្រប់ពេលវេលា និងហាមពលករបរទេសធ្វើការងាររបស់ពលរដ្ឋថៃ ។ បើរកឃើញពលករបរទេសធ្វើការខុសច្បាប់ អាជ្ញាធរនឹងចាប់ផាកពិន័យ និងបញ្ជូនទៅប្រទេសវិញ ។ ការរឹតបន្តឹងនេះ ក្រោយពីមន្ត្រីគណបក្សប្រឆាំងលើកឡើងថា មានជ.នជាតិចិនលួ.ច ធ្វើការនៅថៃខុសច្បាប់ ។

ក្រោយពីមន្ត្រីគណបក្សប្រឆាំង១រូបនិយាយថា មានជនជាតិចិនមកធ្វើការនៅថៃដោយគ្មានប័ណ្ណអនុញ្ញាតការងារ លោក ផីផាត់ រដ្ឋមន្ត្រីក្រសួងការងារ បានលើកឡើងកាលពីថ្ងៃទី២៥ ខែមីនា ឆ្នាំ២០២៥ ថា បច្ចុប្បន្ន មានជនជាតិចិនមកធ្វើការនៅថៃ និងទទួលបានប័ណ្ណអនុញ្ញាតការងារស្របច្បាប់ (Work Permit) ស្មើជាង៥ម៉ឺននាក់ ។ នាយកដ្ឋានការងារបានត្រួតពិនិត្យរកពលករធ្វើការខុសច្បាប់ ក្រោយការលើកឡើងរបស់មន្ត្រីគណបក្សប្រឆាំង ហើយក្រសួងការងារនឹងប្រគល់តួនាទីនេះឱ្យក្រុមការងារពិសេស សហការជាមួយនាយកដ្ឋានការងារ ។

ពួកគេទៅនឹងចុះតាមតំបន់ផ្សេងៗដើម្បីត្រួតពិនិត្យជនជាតិចិនថា តើពួកគេធ្វើការនៅថៃមានឯកសារត្រឹមត្រូវតាមច្បាប់ដែរឬទេ? បើពួកគេធ្វើការខុសច្បាប់ ឬគ្មានប័ណ្ណអនុញ្ញាតការងារ (Work Permit) គឺនាយកដ្ឋានការងារ និងក្រសួងការងារ នឹងអនុវត្តតាមវិធានការ គឺចាប់ខ្លួន, ផាកពិន័យ និងបញ្ជូនទៅប្រទេសវិញ ។

លោក ផីផាត់ បញ្ជាក់ថា ក្រុមការងារពិសេស និងនាយកដ្ឋានការងារបានចុះត្រួតពិនិត្យការធ្វើការងាររបស់ពលករបរទេសនៅខេត្តឈុនបុរី និងបានចាប់ខ្លួនពលករបរទេសចំនួន៥២នាក់ ។ ក្រសួងការងារពុំបានព្រងើយកន្តើយទេ បើទោះជាជនបរទេសមានប័ណ្ណអនុញ្ញាតការងារត្រឹមត្រូវតាមច្បាប់ក្តី ប៉ុន្តែបើពួកគេធ្វើការងារដែលថៃពុំអនុញ្ញាត គឺក្រសួងការងារនឹងចាត់វិធានការតាមច្បាប់ ព្រមទាំងបញ្ជូនទៅប្រទេសវិញ ។

ដោយឡែក កាលពីថ្ងៃទី១៥ ខែមីនា កន្លងមក លោក ផីផាត់ រដ្ឋមន្ត្រីក្រសួងការងារបានដឹកនាំមន្ត្រីពាក់ព័ន្ធធ្វើដំណើរទៅកោះសាមុយ ខេត្តសុរ៉ាជថានី ដើម្បីពិនិត្យមើលការធ្វើការរបស់ពលករបរទេសនៅតំបន់ទេសចរណ៍ ព្រមទាំងពិនិត្យមើលការជួលពលករបរទេសធ្វើការខុសច្បាប់ និងការប្រើប្រាស់កម្លាំងពលកម្មកុមារ ។ ក្រោយការចុះពិនិត្យនៅតំបន់ចំនួន១៥ បានរកឃើញពលករបរទេស ចំនួន២០១នាក់ ក្នុងនោះមានពលករមីយ៉ាន់ម៉ា ១១០នាក់, ឡាវ ១០នាក់, ខ្មែរ ៨០នាក់ និងរុស្ស៊ីម្នាក់ ហើយក្នុងចំណោមនេះ មានពលករបរទេសធ្វើការគ្មានប័ណ្ណអនុញ្ញាត ២នាក់ និងធ្វើការខុសពីប័ណ្ណអនុញ្ញាត ៦នាក់ ។

ក្រសួងការងារនឹងកាត់បន្ថយចំនួនពលករបរទេសធ្វើការខុសច្បាប់ និងការពារកុំឱ្យពួកគេដណ្តើមការងារពលរដ្ឋថៃ ដោយពិន័យប្រាក់ពលករបរទេសគ្មានប័ណ្ណអនុញ្ញាតការងារ ចាប់ពី៥ពាន់ ទៅ៥ម៉ឺនបាត រួចហើយបញ្ជូនទៅប្រទេសវិញ ។ រីឯថៅកែថៃ ដែលជួលបរទេសបរទេសខុសច្បាប់ នឹងពិន័យប្រាក់ចាប់ពី១ម៉ឺន ទៅ១សែនបាត ៕

ប្រទេសហ្វីលីពីន ៖ កាលពីថ្ងៃទី២៤ ខែមីនា ឆ្នាំ២០២៥ កងទ័ពហ្វីលីពីន និងអាមេរិក សរុបជាង៥,០០០នាក់ បានចាប់ផ្តើមធ្វើសមយុទ្ធមួយឈ្មោះ «Salaknib» នៅបន្ទាយកងទ័ព «Fort Magsaysay» ក្នុងខេត្ត Nueva Ecija ប្រទេសហ្វីលីពីន ដែលការធ្វើសមយុទ្ធនេះនឹងចំណាយពេលរហូតដល់៣សប្តាហ៍ ។ វាជាការធ្វើសមយុទ្ធកងទ័ពទ្រង់ទ្រាយដំណាក់កាលទី១ ហើយប្រទេសទាំងពីរនឹងធ្វើសមយុទ្ធកងទ័ពដំណាក់កាលទី២ នៅចុងឆ្នាំ២០២៥ ស្របពេលហ្វីលីពីនមានជម្លោះជាមួយចិនរឿងសមុទ្រចិនខាងត្បូង ។

នៅសប្តាហ៍ទី៤ ខែមីនា នេះ រដ្ឋមន្ត្រីក្រសួងការពារជាតិអាមេរិក លោក Pete Hegseth មានគម្រោងធ្វើដំណើរទៅកាន់ទីក្រុងម៉ានីល ប្រទេសហ្វីលីពីន ដើម្បីជួបជាមួយប្រធានាធិបតីហ្វីលីពីន លោក Ferdinand Marcos និងជួបមេបញ្ជាការកងទ័ពហ្វីលីពីន ក្នុងគោលបំណងតាមដានលទ្ធផលការធ្វើសមយុទ្ធកងទ័ពរវាងប្រទេសទាំងពីរដែលទើបចាប់ផ្តើម ។ វាជាការធ្វើដំណើរទៅប្រទេសហ្វីលីពីនជាលើកដំបូងរបស់លោក Hegseth តាំងពីលោកប្រធានាធិបតីអាមេរិក Donald Trump តែងតាំងលោកជារដ្ឋមន្ត្រីការពារជាតិ ។

ការធ្វើសមយុទ្ធកងទ័ពឈ្មោះ «Salaknib» ជាច្រើនសប្តាហ៍នេះ គឺផ្តោតលើការការពារទឹកដី និងការចល័តកងកម្លាំងទ័ព ហើយនេះជាការធ្វើសមយុទ្ធដំណាក់កាលទី១ ហើយកងទ័ពប្រទេសទាំងពីរនឹងធ្វើសមយុទ្ធដំណាក់កាលទី២ នៅចុងឆ្នាំ២០២៥ ។ វាជាការធ្វើសមយុទ្ធកប្រចាំឆ្នាំរវាងហ្វីលីពីន និងអាមេរិក ដែលកងទ័ពប្រទេសទាំងពីរបានធ្វើសមយុទ្ធរួមគ្នា តាំងពីឆ្នាំ២០១៦ មកម៉្លេះ ។ នេះបើតាមការលើកឡើងរបស់កងទ័ពហ្វីលីពីន ។

ក្រៅពីនេះ កងទ័ពប្រទេសទាំងពីរនឹងពង្រឹងកិច្ចសហការរួមគ្នាលើគ្រប់វិស័យ, បង្កើនសមត្ថភាពការធ្វើសង្គ្រាម និងបង្ហាញពីការប្តេជ្ញាចិត្តទ្វេភាគីយ៉ាងរឹងមាំក្នុងការការពារបូរណភាពទឹកដីរបស់ប្រទេសហ្វីលីពីន ។

គួរបញ្ជាក់ថា ហ្វីលីពីន និងអាមេរិកមានទំនាក់ទំនងកាន់តែជិតស្និទ្ធខ្លាំងឡើង តាំងពីប្រធានាធិបតីហ្វីលីពីន លោក Ferdinand Marcos ឡើងកាន់តំណែងកាលពីឆ្នាំ២០២២ ហើយលោកចាប់ផ្តើមប្រឆាំងនឹងរដ្ឋាភិបាលទីក្រុងប៉េកាំង ដែលអះអាងថា ចិនជាម្ចាស់កម្មសិទ្ធិលើសមុទ្រចិនខាងត្បូង ។ លោកបានកំណត់គោលនយោបាយការបរទេសឱ្យហ្វីលីពីនបង្កើនទំនាក់ទំនងជិតស្និទ្ធជាមួយអាមេរិក ស្របពេលហ្វីលីពីនកំពុងមានជម្លោះជាមួយចិនរឿងសមុទ្រចិនខាងត្បូង ៕