កន្លងមកនេះតារាសម្តែង ឃុន និង ពេជ្រ វត្តីសារ៉ាវឌ្ឍី បានធ្វើឱ្យមានការចាប់អារម្មណ៍ចំពោះអ្នកទាំងពីរដោយសារតែឃើញរូបភាពស្និទ្ធស្នាលរហូតមានអ្នកខ្លះសង្ស័យថាពួកគេកំពុងមានទំនាក់ទំនង។ ទោះយ៉ាងណា ឃុន បាននិយាយនៅក្នុងកម្មវិធីមួយដោយទម្លាយថារូបភាពនោះគ្រាន់តែជាការសម្តែងដែលកម្មវិធីតម្រូវឱ្យអ្នកទាំងពីរមានភាពផ្អែមល្ហែមចំពោះគ្នា។
កំលោះសង្ហា ហេង ម៉េងឃុន បាននិយាយនៅក្នុងកម្មវិធី Celeb Spicy Talk ថា លោកនិង ពេជ្រ វត្តីសារ៉ាវឌ្ឍី បានជួបគ្នាក្នុងរយៈពេលខ្លីដោយសារតែថតកម្មវិធីមួយនៅតាមខេត្តកំពតហើយកម្មវិធីនោះតម្រូវឱ្យមានទំនាក់ទំនងស្នេហាជាមួយគ្នាក្នុងរយៈពេល៤ថ្ងៃហើយប្លែកត្រង់ថាមើលទៅដូចស្និទ្ធស្នាល ដោយសារតែកម្មវិធីមិនតម្រូវឱ្យមានស្គ្រីបទេ។ ឃុន បានពន្យល់បន្ថែមថា យើងចាប់ផ្តើមស្នេហាមួយដែលតម្រូវឱ្យអ្នកទាំងពីរស្រលាញ់គ្នា តើរយៈពេល៤ថ្ងៃយើងនឹងនាំគ្នាទៅណាខ្លះ មានសកម្មភាពអ្វីខ្លះ។
ពិធីការិនីនៅក្នុងកម្មវិធី កញ្ញា ខាត់ ស្រីច័ន្ទ បានក្តោបចម្លើយមកដែរថាការស្និទ្ធស្នាលរបស់ឃុន និង ពេជ្រ វត្តីសារ៉ាវឌ្ឍី គ្រាន់តែជាការសម្តែងនៅក្នុងវិស័យសិល្បៈ។ ឃុន បន្ថែមថាអ្នកទាំងពីរនៅក្នុងសិល្បៈតែឆ្ងាយពីគ្នាដែរដោយពិបាកជួបគ្នាដែរតែចៃដន្យជួបគ្នាក្នុងកម្មវិធីក៏បង្កើតឱ្យមានរូបភាពទាំងនោះនៅលើបណ្តាញសង្គមហ្វេកប៊ុកនិងប្រព័ន្ធអនឡាញ។
កន្លងមកនេះ រូបភាពមួយចំនួនដែលឃើញ ឃុន ចូលរួមកម្មវិធី ពេជ្រ វត្តីសារ៉ាវឌ្ឍី មានភាពស្និទ្ធស្នាលខុសពីធម្មតា បានធ្វើឱ្យអ្នកមួយចំនួនសង្ស័យពីទំនាក់ទំនងរបស់ពួកគេ ខណៈអ្នកខ្លះក៏ Ship ឃុន និង ពេជ្រ វត្តីសារ៉ាវឌ្ឍី ថែមទៀតដោយសារតែអ្នកទាំងពីរមើលទៅសមគ្នាខ្លាំង។
តារាសម្តែងដ៏ស្រស់សង្ហា ឃុន គឺបានលេចមុខជាតួឯកក្នុងខ្សែភាពយន្តជាច្រើនទាំងរឿងភាគនិងភាពយន្តខ្នាតធំ ហើយលោកជាតារាប្រុសមួយរូបកំពុងត្រូវប៉ាន់លើវិស័យភាពយន្តខ្មែរដោយសារតែទេពកោល្យនិងភាពសង្ហារបស់លោក។ ចំណែក ពេជ្រ វត្តីសារ៉ាវឌ្ឍី គឺត្រូវប៉ាន់ខាងផ្សាយពាណិជ្ជកម្មជាច្រើនហើយនាងក៏ទទួលស្គាល់ថាដោយសារតែពេលនេះខ្លួននាងជា BA ច្រើនផលិតផលទើបធ្វើឱ្យពិបាកចូលប្រកួតបវរកញ្ញាម្តងទៀត៕
