ប្រទេសវៀតណាម ៖ រដ្ឋាភិបាលវៀតណាមមានគម្រោងកាត់បន្ថយខេត្ត និងស្ថាប័នរដ្ឋនៅតាមបណ្តាខេត្ត ចំនួនពាក់កណ្តាល ឬស្មើ៥០% ព្រមទាំងកាត់បន្ថយមន្ត្រីធ្វើការនៅមូលដ្ឋានចាប់ពី៦០% ទៅ៧០% តាមផែនការកំណែទម្រង់ដែលមានទិសដៅកាត់បន្ថយការចំណាយថវិការាប់លានដុល្លាររបស់រដ្ឋាភិបាល ខណៈវៀតណាមទើបកាត់បន្ថយក្រសួងនាពេលថ្មីៗនេះ ។ នេះបើតាមការចេញផ្សាយរបស់សារព័ត៌មានបរទេស កាលពីថ្ងៃទី២៥ ខែមីនា ឆ្នាំ២០២៥ ។

កាលពីខែកុម្ភៈ ឆ្នាំ២០២៥ រដ្ឋសភាវៀតណាមបានអនុម័បង្កើតផែនការកំណែទម្រង់រចនាសម្ព័ន្ធគ្រប់គ្រងប្រទេស រួមទាំងការរំលាយស្ថាប័នរដ្ឋាភិបាលមួយចំនួនដែលធ្វើការងារស្រដៀងគ្នា ឱ្យក្លាយជាស្ថាប័នតែមួយ ។ ការកាត់បន្ថយចំនួនក្រសួង, ស្ថាប័នតាមបណ្តាខេត្ត និងចំនួនខេត្ត គឺក្នុងគោលបំណងលើកកម្ពស់ប្រសិទ្ធភាពការងារមន្ត្រីរាជការ, កាត់បន្ថយការចំណាយថវិការាប់លានដុល្លាររបស់រដ្ឋាភិបាល និងជំរុញសេដ្ឋកិច្ច ។

តាមសេចក្តីថ្លែងការណ៍ផ្សព្វផ្សាយលើគេហទំព័ររបស់រដ្ឋាភិបាលវៀតណាម កាលពីថ្ងៃទី១៨ ខែមីនា ឆ្នាំ២០២៥ គឺលោកស្រី Pham Thi Thanh Tra រដ្ឋមន្ត្រីក្រសួងមហាផ្ទៃបញ្ជាក់ថា គម្រោងកាត់បន្ថយចំនួនខេត្ត និងស្ថាប័នរដ្ឋតាមបណ្តាខេត្ត គឺធ្វើឡើងនៅមុនខែសីហា ឆ្នាំ២០២៥ ។ វាធ្វើឱ្យក្រសួង និងស្ថាប័នផ្សេងៗរបស់រដ្ឋ នឹងកាត់បន្ថយពី៣០ស្ថាប័ន មកនៅត្រឹមតែ២២ស្ថាប័ន ។ រីឯមន្ត្រីធ្វើការនៅមូលដ្ឋាន ម្នាក់ក្នុងចំណោម៥នាក់ នឹងត្រូវបញ្ឈប់ពីការងារ នារយៈពេល៥ឆ្នាំខាងមុខ ។

វៀតណាមមានមន្ត្រីរាជការសរុបជិត២លាននាក់ បើគិតត្រឹមឆ្នាំ២០២២ ហើយរដ្ឋាភិបាលវៀតណាមប្រកាសថា នឹងបញ្ឈប់ការងារមន្ត្រីរាជការ ចំនួន១សែននាក់ ឬស្នើឱ្យពួកគេចូលនិវត្តន៍ពីការងារមុនអាយុ ដើម្បីឱ្យស្របតាមផែនការកំណែទម្រង់ ។ រហូតមកដល់ខែមីនា ឆ្នាំ២០២៥ រដ្ឋាភិបាលវៀតណាមបានឱ្យមន្ត្រីរាជការចូលនិវត្តន៍មុនអាយុ ស្មើជាង២ម៉ឺន២ពាន់នាក់ ។

មតិមួយចំនួនបារម្ភថា ការធ្វើកំណែទម្រង់របស់រដ្ឋាភិបាលវៀតណាមអាចបង្កភាពចលាចលរយៈពេលខ្លី និងកើតបញ្ហាផ្សេងៗក្នុងស្ថាប័នរដ្ឋតាមបណ្តាខេត្ត ព្រមទាំងដំណើរការងារក្នុងស្ថាប័នរដ្ឋនឹងយឺតយ៉ាវ ដោយសាររដ្ឋាភិបាលកាត់បន្ថយមន្ត្រីរាជការ ។ ប៉ុន្តែមន្ត្រីក្រសួងការបរទេសវៀតណាមឱ្យដឹងថា កំណែទម្រង់នេះនឹងគ្មានផលប៉ះពាល់ចំពោះការវិនិយោគ និងការប្រកបអាជីវកម្មផ្សេងៗទេ ។

ប្រទេសវៀតណាមដែលគ្រប់គ្រងដោយគណបក្សកុម្មុយនិស្ត បានបែងចែកខេត្តជា៦៣ខេត្ត ហើយវៀតណាមមានអង្គភាពរដ្ឋបាលថ្នាក់ស្រុកប្រមាណ៧០០អង្គភាព និងអង្គភាពរដ្ឋបាលថ្នាក់ឃុំ ជាង១ម៉ឺនអង្គភាព ។ ប៉ុន្តែពុំទាន់មានការប្រកាសជាផ្លូវការថា តើរដ្ឋាភិបាលវៀតណាមនឹងកាត់បន្ថយ ឬរួមបញ្ចូលខេត្តនៅពេលណាទេ ។

លោក តូ ឡឺម អគ្គលេខាធិការបក្សកុម្មុយនិស្តវៀតណាមបាននិយាយកាលពីខែធ្នូ ឆ្នាំ២០២៤ ថា ស្ថាប័នរដ្ឋពុំគួរក្លាយជាកន្លែងរបស់មន្ត្រីរាជការគ្មានសមត្ថភាព បើយើងចង់បានសុខភាពរាងកាយរឹងមាំ ពេលខ្លះ យើងត្រូវតែលេបថ្នាំល្វីង និងអត់ធ្មត់ជាមួយការឈឺចាប់ដើម្បីកម្ចាត់សាច់មិនល្អ ៕

បច្ចុប្បន្នផ្លូវហាយវ៉េគឺមានច្រើនណាស់នៅលើពិភពលោកយើងនេះ ប៉ុន្តែផ្លូវដែលវែងជាងគេបំផុតនោះគឺផ្លូវហាយវ៉េ Pan-American ដែលលាតសន្ធឹងប្រវែង ៣០០០០ គីឡូម៉ែត្រពីអាឡាស្កា សហរដ្ឋអាមេរិក ទៅកាន់ចុងភាគខាងត្បូងនៃប្រទេសអាហ្សង់ទីន នេះបើយោងតាមសៀវភៅកំណត់ត្រាហ្គីណេស និងគេហទំព័របរទេស IFL Science។

ផ្លូវហាយវ៉េ Pan-American ត្រូវបានសាងសង់ជាលើកដំបូងនៅក្នុងឆ្នាំ ១៩៣៧ និងបញ្ចប់ក្នុងឆ្នាំ ១៩៧០ ហើយត្រូវបានគេចាត់ទុកថាជាគម្រោងដ៏ល្អមួយក្នុងការតភ្ជាប់ប្រទេសនានា ដោយអ្នកខ្លះនិយាយថានេះអាចជាមធ្យោបាយមួយដើម្បីបង្កើនការលក់រថយន្តដែលផលិតនៅសហរដ្ឋអាមេរិក និងទំនិញជាច្រើនទៀតដែលត្រូវបាននាំចេញទៅកាន់អាមេរិកឡាទីន។

ទោះជាយ៉ាងណាក៏ដោយ គម្រោងនេះហាក់ដូចជាមានផ្នែកជាច្រើនមិនទាន់បញ្ចប់ជាផ្លូវការនោះទេ។ បច្ចុប្បន្នផ្លូវហាយវេ Pan-American មិនត្រូវបានតភ្ជាប់ទាំងស្រុងទេ ហើយវាមិនអាចទៅរួចទេក្នុងការបើកបរប្រវែងទាំងមូលរបស់វា។ កន្លងទៅសហរដ្ឋអាមេរិកធ្លាប់បានសន្យាថានឹងផ្តល់មូលនិធិភាគច្រើនដើម្បីសាងសង់ផ្នែកនៃផ្លូវហាយវេ Pan-American បន្ថែមទៀត ប៉ុន្តែផែនការនេះបានប្រឈមមុខនឹងការប្រឆាំងយ៉ាងខ្លាំងក្លាពីសកម្មជនបរិស្ថាន ដោយសារតែមានការព្រួយបារម្ភថាវានឹងជាគ្រោះមហន្តរាយសម្រាប់អេកូឡូស៊ី ភាពចម្រុះ និងសហគមន៍ជនជាតិដើមភាគតិចក្នុងតំបន់។

លើសពីនេះ តំបន់នេះតែងតែមានកងជីវពលប្រដាប់អាវុធ ក្រុមក្មេងទំនើង និងអ្នកជួញដូរគ្រឿងញៀនជាញឹកញាប់ ដែលធ្វើឱ្យវាក្លាយជាកន្លែងគ្រោះថ្នាក់ខ្លាំងក្នុងការធ្វើដំណើរឆ្លងកាត់។ ទោះបីជាមានការរំខានបែបនេះក៏ដោយ ក៏ផ្លូវហាយវ៉េ Pan-American នៅតែរក្សាកំណត់ត្រាពិភពលោក Guinness សម្រាប់ “ផ្លូវដែលវែងជាងគេបំផុតនៅលើពិភពលោក”។ រីឯចំណាត់ថ្នាក់លេខ ២ វិញបានទៅលើផ្លូវហាយវេ Trans-Asia 1 (AH1) ដែលជាផ្លូវវែងបំផុត មានប្រវែង ២០,៥៥៧ គីឡូម៉ែត្រពីរដ្ឋធានីតូក្យូរបស់ជប៉ុនទៅកាន់ព្រំដែនទួរគី-ប៊ុលហ្គារី ឆ្លងកាត់កូរ៉េ ចិន ភាគអាគ្នេយ៍ និងអាស៊ី បង់ក្លាដែស ឥណ្ឌា ប៉ាគីស្ថាន និងអ៊ីរ៉ង់។

ទន្ទឹមនឹងនេះ ផ្លូវហាយវេរបស់ប្រទេសអូស្ត្រាលីក៏ជាប់ចំណាត់ថ្នាក់លេខ ៣ ជាផ្លូវវែងជាងគេបំផុតលើលោកផងដែរ ជាមួយចម្ងាយ ១៤,៥០០ គីឡូម៉ែត្រ។ ផ្លូវហាយវេរបស់ប្រទេសអូស្ត្រាលី គឺជាផ្លូវដែលអាចបើកបរបានពេញលេញ ដោយរចនាសម្ព័ន្ធនេះទទួលបានកំណត់ត្រាពិភពលោកហ្គីណេសសម្រាប់ “ផ្លូវបន្តវែងបំផុត”៕

ប្រទេសចិន ៖ BYD គឺជាក្រុមហ៊ុនផលិតរថយន្តអគ្គិសនីរបស់ប្រទេសចិនប្រកាសថា ប្រាក់ចំណូលពីការលក់រថយន្តអគ្គិសនីកាលពីឆ្នាំ២០២៤ របស់ខ្លួន លើសប្រាក់ចំណូលរបស់គូប្រជែង គឺក្រុមហ៊ុន Tesla រាប់លានដុល្លារ ។ ប្រាក់ចំណូលរបស់ BYD បានកើនឡើង២៩% ស្មើទឹកប្រាក់១០៧ពាន់លានដុល្លារអាមេរិក ខ្ពស់ជាងប្រាក់ចំណូលរបស់ Tesla ដែលស្មើត្រឹមតែជាង៩៧ពាន់លានដុល្លារ ។

ក្រុមហ៊ុន BYD បានជំរុញការលក់រថយន្តអគ្គិសនីតម្លៃថោកនៅលើទីផ្សារ ដើម្បីប្រជែងជាមួយរថយន្ត Tesla Model 3 ដែលជាប់តំណែងជារថយន្តលក់ដាច់ជាងគេនៅចិនយូរមកហើយ ។ រីឯរថយន្ត Tesla បានប្រឈមជាមួយបញ្ហាយ៉ាងខ្លាំងនៅលើពិភពលោក ជាពិសេស នៅអាមេរិក មានការដុតបំផ្លាញ និងដាក់គ្រាប់បែកផ្ទុះរថយន្ត Tesla ជាច្រើនកន្លែង ដោយសារនាយកក្រុមហ៊ុន Tesla លោក Elon Musk មានទំនាក់ទំនងជិតស្និទ្ធជាមួយប្រធានាធិបតីអាមេរិក លោក Donald Trump ។

កាលពីឆ្នាំ២០២៤ ក្រុមហ៊ុន BYD បានលក់រថយន្តអគ្គិសនី ចំនួន១លាន៧សែន៦ម៉ឺនគ្រឿង ប្រហាក់ប្រហែលគ្នានឹងរថយន្ត Tesla ដែលលក់បាន១លាន៧សែន៩ម៉ឺនគ្រឿង ។ បើរួមបញ្ចូលទាំងការលក់រថយន្ត Hybrid ឃើញថា ចំនួនលក់រថយន្តរបស់ក្រុមហ៊ុន BYD បានវ៉ាដាច់ Tesla យ៉ាងខ្លាំង គឺការលក់រថយន្តលើពិភពលោករបស់ BYD ស្មើរហូតដល់៤លាន៣សែនគ្រឿង កាលពីឆ្នាំ២០២៤ ។

ក្រុមហ៊ុន BYD ថែមទាំងបានផលិតរថយន្តថ្មីម៉ាក Qin L ដើម្បីប្រជែងជាមួយរថយន្ត Tesla Model 3 ទៀតផង ។ រថយន្តម៉ាក Qin L លក់ចាប់ពីតម្លៃជាង១១ម៉ឺនយាន់ ខណៈរថយន្ត Tesla Model 3 លក់ចាប់ពីតម្លៃជាង២៣ម៉ឺនយាន់ ។ ការលក់រថយន្តតម្លៃថោកនេះ ស្របពេលពលរដ្ឋចិនសន្សំសំចៃប្រាក់ជាងមុន ដោយសារសដ្ឋកិច្ចធ្លាក់ចុះ វិបត្តិអចលនទ្រព្យ និងបំណុលរដ្ឋាភិបាលថ្នាក់មូលដ្ឋានខ្ពស់ ។

ក្រៅពីនេះ BYD បានអភិវឌ្ឍន៍បច្ចេកវិទ្យាថ្មីសម្រាប់សាករថយន្តអគ្គិសនីត្រឹមតែ៥នាទី ប៉ុន្តែអាចបើកបរបានរាប់រយគីឡូម៉ែត្រ ហើយលឿនជាងការសាករថយន្តអគ្គិសនី Tesla ដែលចំណាយពេលដល់១៥នាទី ។ កាលពីខែកុម្ភៈ ឆ្នាំ២០២៥ BYD បានបំពាក់ប្រព័ន្ធបើកបរឆ្លាតវៃ «God’s Eye» មានលក្ខណៈស្តង់ដារសម្រាប់រថយន្តគ្រប់ម៉ាកដោយពុំគិតថ្លៃ ។

ចំណែករថយន្តអគ្គិសនី Tesla ប្រឈមនឹងបញ្ហាច្រើន ក្រោយពីលោក Elon Musk កាន់តំណែងជាប្រធានគ្រប់គ្រងប្រសិទ្ធភាពការងាររដ្ឋាភិបាលអាមេរិក (DOGE) ហើយលោកមានតួនាទីកាត់បន្ថយការចំណាយប្រាក់របស់រដ្ឋាភិបាល ។ ក្រៅពីនេះ លោក Elon Musk បានពាក់ព័ន្ធនឹងនយោបាយបរទេស ដូចជា ៖ លោកគាំទ្រគណបក្ស Alternative fur Deutschland មុនការបោះឆ្នោតនៅប្រទេសអាល្លឺម៉ង់ ហើយលោករិះគន់នាយករដ្ឋមន្ត្រីអង់គ្លេស លោក Keir Starmer ៕

ប្រទេសចិន ៖ ស្ថាប័នវិទ្យាសាស្ត្រ និងកសិកម្មចិនបានសហការជាមួយក្រុមហ៊ុន Automotive Walking Technology ផលិតឧបករណ៍បំពាក់បច្ចេកវិទ្យា AI ដ៏ទំនើបសម្រាប់ចៀរជ័រកៅស៊ូ និងអាចបម្លាស់ទីក្នុងចម្ការកៅស៊ូដោយស្វ័យប្រវត្តិ ។ វាជាការអភិវឌ្ឍបច្ចេកវិទ្យាក្នុងវិស័យកសិកម្មចិនឱ្យកាន់តែទំនើប ហើយការផលិតឧបករណ៍នេះ គឺដើម្បីដោះស្រាយបញ្ហាខ្វះខាតកម្មករចៀរកៅស៊ូ ដែលប៉ះពាល់ដល់ឧស្សាហកម្មកៅស៊ូចិននាពេលបច្ចុប្បន្ន ។

ឧបករណ៍ចៀរកៅស៊ូនេះនឹងត្រូវបញ្ជូនទៅសាកល្បងចៀរជ័រក្នុងចម្ការកៅស៊ូខេត្តហៃណាន ស្ថិតនៅភាគខាងត្បូងប្រទេសចិន ដែលជិតដល់ខែចៀរកៅស៊ូ គឺខែមេសា ឆ្នាំ២០២៥ ។ បើតាមវីដេអូ គឺឧបករណ៍នឹងបម្លាស់ទីទៅជិតដើមកៅស៊ូ ហើយយកដៃរបស់វាចៀរជ័រកៅស៊ូ បន្តិចក្រោយមក ជ័រកៅស៊ូពណ៌ស ក៏ហៀរចេញពីដើមកៅស៊ូត្រង់កន្លែងដែលវាចៀរ ។

ជ័រកៅស៊ូរបស់ចិនពិតជាមានសារៈសំខាន់ណាស់សម្រាប់ការផលិតសំបកកៅស៊ូកង់រថយន្ត និងផលិតជាវត្ថុផ្សេងទៀតក្នុងឧស្សាហកម្ម ប៉ុន្តែបច្ចុប្បន្ន នៅតាមចម្ការកៅស៊ូចិនប្រឈមនឹងបញ្ហាខ្វះខាតកម្មករចៀរជ័រយ៉ាងច្រើន ដោយសារកម្មករធ្វើការងារធ្ងន់ ចៀរជ័រកៅស៊ូពេលយប់ និងឈឺថ្កាត់ដោយសារធ្វើការក្នុងចម្ការកៅស៊ូ ។

ឧបករណ៍ចៀរជ័រកៅស៊ូបំពាក់ដោយបច្ចេកវិទ្យា AI ដើម្បីឱ្យវាអាចធ្វើការក្នុងចម្ការកៅស៊ូគ្រប់ប្រភេទ មិនថាដីក្នុងចម្ការមានសភាពរាបស្មើ ឬខ្ពស់ទាប ។ វានឹងបម្លាស់ទីពីដើមកៅស៊ូ១ ទៅដើមកៅស៊ូ១ទៀត ហើយចៀរជ័រលើដើមកៅស៊ូបានយ៉ាងល្អ ។ ក្រៅពីនេះ បច្ចេកវិទ្យា AI អាចបញ្ជាក់ពីជម្រៅ និងសំបកដើមកៅស៊ូទៀតផង ដែលធ្វើឱ្យប្រសិទ្ធភាពចៀរជ័រ ស្មើរហូតដល់៨០% ថែមទាំងទទួលបានជ័រកៅស៊ូមានគុណភាពល្អ មិនខុសគ្នាពីការចៀររបស់មនុស្ស ។

រយៈពេល១ម៉ោង ឧបករណ៍នេះអាចចៀរជ័រកៅស៊ូ ចាប់ពី១០០ដើម ទៅ១២០ដើម ដោយប្រើប្រាស់ថាមពលថ្មលីចូម អាចធ្វើការបានជាង៨ម៉ោង ។ អ្នកប្រើប្រាស់អាចផ្លាស់ប្តូរថ្មរបស់វាយ៉ាងឆាប់រហ័ស ដោយចំណាយពេលត្រឹមតែ២០វិនាទីប៉ុណ្ណោះ គឺវាអាចធ្វើការក្នុងចម្ការកៅស៊ូធំៗរាប់ម៉ោង និងពុំផ្អាកដំណើរការ ។

នាយករងស្ថាប័នវិទ្យាសាស្ត្រ និងកសិកម្មចិនឱ្យដឹងថា ស្ថាប័នបានពិភាក្សាជាមួយក្រុមហ៊ុនផលិតជ័រកៅស៊ូអន្តរជាតិជាច្រើន និងក្រុមអ្នកដាំកៅស៊ូនៅតំបន់អាស៊ីអាគ្នេយ៍ រួមទាំងពិភាក្សាជាមួយប្រទេសឥណ្ឌណេស៊ី និងថៃផងដែរ គឺពួកគេចាប់អារម្មណ៍ខ្លាំងនឹងឧបករណ៍ចៀរកៅស៊ូរបស់ចិន ។

ក្រុមការងារស្ថាប័នវិទ្យាសាស្ត្រ និងកសិកម្មបានអភិវឌ្ឍន៍បច្ចេកវិទ្យាឧបករណ៍ចៀរជ័រកៅស៊ូជាបន្តបន្ទាប់ ហើយមិនយូរទេ អ្នកប្រើប្រាស់នឹងអាចពិនិត្យមើលវាចៀរជ័រតាមរយៈទូរស័ព្ទដៃ និងមើលឃើញចម្ការកៅស៊ូយ៉ាងច្បាស់ពីចម្ងាយ ដោយអ្នកប្រើប្រាស់ពុំចាំបាច់ធ្វើដំណើរមកចម្ការកៅស៊ូ ។ យើងនឹងបំពាក់បច្ចេកវិទ្យា AI បន្ថែមទៀត ដើម្បីវាអាចធ្វើការក្នុងចម្ការកៅស៊ូមានប្រសិទ្ធភាព ១០០% ៕