សម្ដេចមហាបវរធិបតី ហ៊ុន ម៉ាណែត នាយករដ្ឋមន្រ្តីនៃព្រះរាជាណាចក្រកម្ពុជា គ្រោងនឹងស្នើទូលទៅកាន់ព្រះមហាក្សត្រ ដើម្បីតែងតាំងអតីតសង្ឃ ជួន កក្កដា អោយក្លាយជាអនុរដ្ឋលេខាធិការ នៃក្រសួងធម្មការ និងសាសនា។

ថ្លែងក្នុងឳកាសពិធីបុណ្យទន្លេ នាខេត្តតាកែវ កាលពីថ្ងៃទី ២២ ខែមីនានេះ សម្ដេចបានលើកឡើងថា៖ ដោយការមើលឃើញពីចំណេះដឹង និងឆន្ទៈរបស់លោកជួន កក្កដា ក្នុងការជួយជ្រោមជ្រែងក្នុងវិស័យពុទ្ធសាសនា ដូចនេះរាជរដ្ឋាភិបាល នឹងស្នើតែងតាំងតំណែងមួយជូនដល់លោក ដើម្បីជួយទ្រទ្រង់វិស័យនេះបន្តទៅមុខទៀត។

សម្ដេចនាយករដ្ឋមន្រ្តី បានគូសបញ្ជាក់៖ ការលាចាកសិក្ខាបទរបស់អតីតព្រះសង្ឃ ជួន កក្កដា គឺជាការសម្រេចចិត្តរបស់លោកខ្លួនឯង មិនមាននរណាម្នាក់ចាប់បង្ខំលោកផ្សឹក ដូចមនុស្សមួយចំនួនបានចោទប្រកាន់លើរាជរដ្ឋាភិបាលនោះឡើយ។ ដោយសម្ដេចបានមានប្រសាសន៍ថា ”ដូច្នេះសូមឱ្យលោកតា លោកយាយ អ៊ុ ពូ មីង អ្នកគាំទ្រជួន កក្កដា កុំមានការយល់ច្រលំ ហើយប្រពន្ធខ្ញុំក៏គាត់ជឿខ្ញុំហើយថា ខ្ញុំអត់មានបង្ខំលោកទេ។ នេះគឺសម្រេចតាមរបស់ប្អូនបណ្ឌិត ជួន កក្កដា ដែលលោកចង់បានបន្ដការងារជួយទៅដល់សាសនាជួយដល់សង្គមជាតិ ប៉ុន្ដែគ្រាន់តែប្ដូរផ្លូវពុទ្ធចក្រទៅក្នុងផ្លូវអាណាចក្រ ហើយយើងនឹងបន្តផ្ដល់ឱកាសឱ្យលោកបណ្ឌិត បន្ដចូលរួម ដើម្បីជួយកសាងពង្រឹងព្រះពុទ្ធសាសនា ដែលជាមូលដ្ឋានសម្រាប់សង្គមជាតិយើងបន្ដទៀត”។

ឆ្លៀតក្នុងឳកាសអបអរសាទរពិធីបុណ្យទន្លេ លើកទី៩ ដដែលនេះ សម្ដេចមហាបវរធិបតី ហ៊ុន ម៉ាណែត បានអំពាវនាដល់វពុទ្ធសាសនិក បន្តគាំទ្រចំពោះគម្រោងជួយវិស័យពុទ្ធសាសនា ដែលផ្ដួចផ្ដើមដោយអតីតព្រះតេជគុណ ជួន កក្កដា ដើម្បីជាប្រយោជន៍ដល់វិស័យពុទ្ធសាសនា និងជួយកុមារជំនាន់ក្រោយដែលសិក្សានៅពុទ្ធិកសិក្សាបន្តទៅមុខទៀត៕

សហរដ្ឋអាមេរិក ៖ លោក Elon Musk ទីប្រឹក្សាជំនិតរបស់ប្រធានាធិបតីអាមេរិក លោក Donald Trump បានបង្ហាញការមិនពេញចិត្តយ៉ាងខ្លាំង ក្រោយពីសារព័ត៌មាន The New York Times រាយការណ៍ថា លោកបានទទួលព័ត៌មានសម្ងាត់ពាក់ព័ន្ធនឹងគម្រោងធ្វើសង្គ្រា.មជាមួយចិន បន្ទាប់ពីលោកចូលរួមកិច្ចប្រជុំជាមួយរដ្ឋមន្ត្រីក្រសួងការពារជាតិអាមេរិក លោក Pete Hegseth នៅក្រសួងការពារជាតិ (ឬមន្ទីរបញ្ចកោណ) ជាលើកដំបូង កាលពីថ្ងៃទី២១ ខែមីនា ឆ្នាំ២០២៥ ។

លោក Elon Musk បានឆ្លើយតបភ្លាមៗទៅកាន់ការផ្សព្វផ្សាយរបស់សារព័ត៌មាន The New York Times ដោយលោកសរសេរក្នុងបណ្តាញសង្គម X ថា ៖ «វាជាការឃោសនាសុទ្ធសាធ» ។ លោកបានអំពាវនាវឱ្យចាត់វិធានការតាមច្បាប់ទៅលើមន្ត្រីមន្ទីរបញ្ចកោណ ដែលបានបង្ហាញព័ត៌មានមិនពិតទៅប្រព័ន្ធផ្សព្វផ្សាយ ។

ប្រធានាធិបតីអាមេរិក លោក Donald Trump ក៏បានបដិសេធដែរថា យើងពុំបានជជែករឿងធ្វើសង្គ្រាមជាមួយចិនក្នុងកិច្ចប្រជុំនៅមន្ទីរបញ្ចកោណទេ ។ អ្នកបង្ហាញពីផែនការធ្វើសង្គ្រាមទៅបុគ្គលខាងក្រៅ ជាពិសេស អ្នកជំនួញដែលទទួលបានផលប្រយោជន៍នៅចិន គឺប្រឈមនឹងហានិភ័យ ។

ចំណែរដ្ឋមន្ត្រីក្រសួងការពារជាតិអាមេរិក លោក Pete Hegseth ឱ្យដឹងថា កិច្ចប្រជុំជាមួយលោក Elon Musk គឺជាការជជែកគ្នាពុំផ្លូវការ យើងផ្តោតលើប្រធានបទ «ការច្នៃប្រឌិត និងប្រសិទ្ធភាព» ហើយយើងពុំបាននិយាយពីគម្រោងធ្វើសង្គ្រាមជាមួយចិនទេ ។

លោក Elon Musk នាយកគ្រប់គ្រងក្រុមហ៊ុន SpaceX, Starlink និង Tesla បានធ្វើកិច្ចសន្យាជាច្រើនច្បាប់ជាមួយក្រសួងការពារជាតិអាមេរិក ដែលធ្វើឱ្យមហាជនមានចម្ងល់ពីបញ្ហាផលប្រយោជន៍ ។ រីឯមន្ត្រីសេតវិមានឱ្យដឹងថា លោក Elon Musk នឹងដកខ្លួនចេញពីតួនាទីក្នុងរដ្ឋាភិបាល ប្រសិនបើរកឃើញថា មានទំនាស់ផលប្រយោជន៍ ។ សមាជិកព្រឹទ្ធសភា២រូបមកពីគណបក្សប្រជាធិបតេយ្យ (Democrat) ពុំទុកចិត្ត និងផ្ញើលិខិតទាមទារឱ្យរដ្ឋមន្ត្រីការពារជាតិលាតត្រដាងព័ត៌មានអ្វីខ្លះដែលបានពិភាក្សាជាមួយលោក Elon Musk ។

តើមន្ត្រីរូបណានៅមន្ទីរបញ្ចកោណដែលបានធ្វើឱ្យបែកធ្លាយព័ត៌មានសម្ងាត់ទៅ The New York Times ថា អាមេរិកគ្រោងធ្វើសង្គ្រាមជាមួយចិន? តើលោក Elon Musk នឹងអាចចាត់ការមន្ត្រីរូបនេះដែរឬទេ? ហេតុនេះ សូមលោកអ្នករង់ចាំតាមដានការចុះផ្សាយរបស់សារព័ត៌មាន KBN បន្តទៀត ៕

ប្រទេសកូរ៉េខាងត្បូង ៖ កាលពីចុងសប្តាហ៍ទី៣ ខែមីនា ឆ្នាំ២០២៥ ភ្លើងបានឆេះព្រៃជាង៣០កន្លែងនៅកូរ៉េខាងត្បូង ដែលធ្វើឱ្យភ្នាក់ងារពន្លត់ភ្លើង និងអាជ្ញាធរស្លា.ប់ យ៉ាងហោចណាស់៤នាក់ ខណៈពលរដ្ឋជាង១,៥០០នាក់ ត្រូវជម្លៀសចេញពីលំនៅឋាន ។ ភ្នាក់ងារពន្លត់ភ្លើងសន្និដ្ឋានថា វាបណ្តាលមកពីផ្កាភ្លើងចេញពីម៉ាស៊ីនកាត់ស្មៅក្នុងកសិដ្ឋានមួយកន្លែង ហើយភ្លើងឆេះព្រៃភាគច្រើន គឺនៅភាគអាគ្នេយ៍ប្រទេស រហូតធ្វើឱ្យរដ្ឋាភិបាលកូរ៉េខាងត្បូងប្រកាសពីគ្រោះមហន្តរា.យ កាលពីថ្ងៃទី២២ ខែមីនា ។

កាលពីថ្ងៃទី២៣ ខែមីនា មជ្ឈមណ្ឌលគ្រប់គ្រងគ្រោះមហន្តរាយ និងសុវត្ថិភាព ប្រកាសថា ភ្លើងបានឆេះព្រៃជាច្រើនកន្លែង ស្របពេលកូរ៉េខាងត្បូងមានអាកាសធាតុក្តៅហែង ។ នៅល្ងាចថ្ងៃទី២១ ខែមីនា ភ្លើងចាប់ផ្តើមឆេះព្រៃលើកដំបូង និងឆេះខ្លាំងបំផុតនៅតំបន់សានឈៀង ភាគខាងត្បូងខេត្តកៀងសាន់ ។ តាមភ្នាក់ងារពន្លត់ភ្លើង គឺបណ្តាលមកពីផ្កាភ្លើងចេញពីម៉ាស៊ីនកាត់ស្មៅក្នុងកសិដ្ឋាន ដោយភ្នាក់ងារអាចពន្លត់ភ្លើងបាន៧០% កាលពីព្រឹកថ្ងៃទី២២ ខែមីនា ប៉ុន្តែដោយសារខ្យល់ខ្លាំង ទើបភ្លើងឆេះរាលដាលទៅតំបន់នៅក្បែរ ។

ពេលកំពុងពន្លត់ភ្លើងនៅតំបន់សានឈៀង គឺមន្ត្រីពន្លត់ភ្លើង និងអាជ្ញាធរបានស្លាប់អស់៤នាក់ ព្រមទាំងរងរបួសធ្ងន់៥នាក់ របួសស្រាលម្នាក់ ។ រីឯទីក្រុងនៅភាគខាងជើងខេត្តកៀងសាន់ ក៏មានភ្លើងឆេះព្រៃខ្លាំងដែរ និងឆេះរាលដាលទៅតំបន់ក្បែរគ្នា ។

ភ្នាក់ងារកសិកម្មកូរ៉េខាងត្បុងបានបញ្ជូនឧទ្ធម្ភាគចក្រ ជាង១០០គ្រឿង ដោយសហការជាមួយសមត្ថកិច្ច ភ្នាក់ងារពន្លត់ភ្លើង កងទ័ព និងអាជ្ញាធរ សរុបជាង៦០០នាក់ ជួយគ្នាពន្លត់ភ្លើងនៅ៣តំបន់ ព្រមទាំងបញ្ជូនឧបករណ៍ផ្សេងៗ ។ ភ្លើងបានបំផ្លាញលំនៅឋានពលរដ្ឋអស់៤០ខ្នង និងធ្វើឱ្យពលរដ្ឋជាង១,៥០០នាក់រស់នៅ៣តំបន់ត្រូវចាកចេញទៅស្នាក់នៅជម្រកបណ្តោះអាសន្ន ដូចជា ៖ មជ្ឈមណ្ឌលសហគមន៍ និងក្លិបហាត់ប្រាណ ។

រដ្ឋាភិបាលកូរ៉េខាងត្បូងបានប្រកាសពីគ្រោះមហន្តរាយនៅតំបន់ភ្លើងឆេះព្រៃ និងបញ្ជូនកម្លាំងទៅតំបន់គ្រោះថ្នាក់បន្ថែមទៀត ដើម្បីជួយជម្លៀសពលរដ្ឋ ។ ក្រៅពីនេះ រដ្ឋាភិបាលក៏បានផ្តល់ប្រាក់ឧបត្ថម្ភដល់ពលរដ្ឋដែលខូចខាតទ្រព្យសម្បត្តិ និងចាកចេញពីលំនៅឋាន ។

មន្ត្រីក្រសួងមហាផ្ទៃ និងសុវត្ថិភាព ដែលមានតួនាទីជាអនុប្រធានមជ្ឈមណ្ឌលគ្រប់គ្រងគ្រោះមហន្តរាយ បានប្រាប់ឱ្យពលរដ្ឋប្រុងប្រយ័ត្ន ពីព្រោះការប្រមាថរបស់មនុស្សជាមូលហេតុចម្បងធ្វើឱ្យភ្លើងឆេះព្រៃ ។ សូមពលរដ្ឋចៀសវាងយកសម្ភារៈងាយឆេះតាមខ្លួនពេលដើរព្រៃ, ហាមដុតកាកសំណល់កសិកម្ម និងបោះចោលកន្ទុយបារីនៅកន្លែងត្រឹមត្រូវ ។

តាមទិន្នន័យរបស់ភ្នាក់ងារកសិកម្ម គឺចាប់ពីឆ្នាំ២០១៥ ដល់ឆ្នាំ២០២៤ កូរ៉េខាងត្បូងមានភ្លើងឆេះព្រៃសរុបចំនួន៥,៤៥៥លើក ក្នុងនោះភ្លើងឆេះព្រៃ៥៦% កើតឡើងចាប់ពីខែមីនា ដល់ខែឧសភា ។ មូលហេតុភ្លើងឆេះព្រៃ គឺដោយសារមានអាកាសធាតុស្ងួត និងខ្យល់បក់ខ្លាំង ៕