តំបន់ធម្មជាតិមួយដែលគ្របដណ្ដប់ដោយវាលស្មៅពណ៌បៃតងខៀវខ្ចីនៅរដូវវស្សា និងប្រែទៅជាពណ៌មាសចែងចាំងនៅរដូវប្រាំង លាតសន្ធឹងយ៉ាងធំល្វឹងល្វើយលើទំហំដីប្រមាណ ១,០៣០ហិកតា និងមានឈ្មោះថា “វាលធំ” ត្រូវបានអ្នករុករកទីតាំងធម្មជាតិដ៏ល្បីលោក Gregory McCann ចាត់ទុកថា “គ្មានតំបន់ធម្មជាតិណាមួយនៅក្នុងប្រទេសកម្ពុជា ថៃ ឡាវ វៀតណាម ឬម៉ាឡេស៊ី អាចមកប្រកួតសម្រស់ជាមួយនឹង “វាលធំ” បានឡើយ។ នេះបើតាមការសិក្សារបស់គាត់កន្លងមក។
“វាលធំ” ស្ថិតក្នុងឧទ្យានជាតិវីរៈជ័យ ក្នុងភូមិសាស្ត្រស្រុកតាវែង ខេត្តរតនៈគិរី ដែលយើងត្រូវធ្វើដំណើរចេញពីស្រុកតាវែង ទៅដល់វាលធំ ក្នុងចម្ងាយផ្លូវ ៣២គ.ម។ ប្រសិនបើក្នុងរដូវប្រាំង យើងអាចធ្វើដំណើរតាមរយៈម៉ូតូមកបាន ប៉ុន្តែបើឈានចូលដល់រដូវស្សាយើងអាចជិះម៉ូតូបាន១៨គ.ម ដល់ត្រឹមជើងភ្នំជីអីក ត្រូវដើរ១៤គ.ម ពីជើងភ្នំទើបឡើងដល់ “វាលធំ”។
នៅទីនេះជាឧទ្យានជាតិដែលទេសភាពស្រស់ស្អាតគ្រប់រដូវកាល និងអាចគយគន់៣៦០ដឺក្រេ។ ជាមួយលក្ខខណ្ឌអាកាសធាតុដ៏ល្អ ពិសេសនៅសិរសិររដូវ យើងទស្សនាថ្ងៃលិច ថ្ងៃរះ និងចំណាយពេលបោះតង់ ដែលជាទិសដៅពិសេសបន្ទាប់សម្រាប់អ្នកដើរភ្នំ។
គួរជម្រាបថា តំបន់ដែលស្ថិតនៅក្នុងឧទ្យានជាតិវីរៈជ័យនេះ ត្រូវបានបង្កើតឡើងដោយព្រះរាជក្រឹត្យឆ្នាំ១៩៩៣ ដែលមានផ្ទៃដី ៣៣២,៥០០ហិកតា គ្របដណ្ដប់លើព្រៃស្រោង ពាក់កណ្ដាលស្រោងនិងព្រៃល្បោះវាលស្មៅ។ វាជាដែនជម្រកធម្មជាតិដ៏សំខាន់សម្រាប់សត្វស្លាបជាង ២០០ប្រភេទ, ថនិកសត្វ ១៥ប្រភេទ, សត្វល្មូន ៣០ប្រភេទ, មច្ឆា៣៧ ប្រភេទ, កណ្ដូប ១៩ប្រភេទ, ស្រមោច ៣០ប្រភេទ និងសត្វផ្សេងៗទៀតជាច្រើន។
ក្នុងការធ្វើដំណើរមកកាន់ទីនេះ ភ្ញៀវទេសចរត្រូវទាក់ទងទៅកាន់មន្ទីរបរិស្ថានខេត្តរតនៈគិរីដើម្បីចុះឈ្មោះ និងបង់ថ្លៃសេវាចូលឧទ្យានជាតិជាមុនសិន រួចអាចបន្តទាក់ទងទៅកាន់សហគមន៍ដើម្បីជួលម៉ូតូ ឬស្វែងរកមគ្គុទេសក៍នាំផ្លូវដើម្បីមានភាពងាយស្រួល។
នៅទីនេះស័ក្តិសមខ្លាំងសម្រាប់ភ្ញៀវទេសចរទាំងឡាយដែលពេញនិយមនឹងការសម្រាកបោះតង់បែបផ្សងព្រេង ដោយអ្នកអាចគយគន់មើលសម្រស់ធម្មជាតិពីលើវាលដ៏ធំល្វឹងល្វើយ, ទស្សនាសត្វស្លាប, សត្វព្រៃ ទស្សនាថ្ងៃរះ ឬលិច និងបើក្នុងលក្ខខណ្ឌធាតុអាកាសអំណោយផល នៅរាត្រីខ្លះវាក៏ជាទីតាំងល្អមួយដែលអាចឲ្យទស្សនាតារាសាស្រ្តបានផងដែរ៕
