ពេជ្រ វត្តីសារ៉ាវឌ្ឍី និង ហុក សារិតុលា ជាបវរកញ្ញាខ្មែរដំបូងគេដែលត្រូវបានអញ្ជើញដោយផ្ទាល់ពីប្រទេសទីម័រខាងកើតតំណាងឱ្យសិល្បករកម្ពុជាក្នុងការសម្តែងកិច្ចស្វាគមន៍ដំណើរទស្សនកិច្ចរបស់សម្តេចអគ្គមហាសេនាបតីតេជោហ៊ុនសែនមកកាន់ប្រទេសទីម័រខាងកើត។
នៅថ្ងៃទី៨ ឧសភា ពេជ្រ វត្តីសារ៉ាវឌ្ឍី Miss Grand Cambodia 2022 បានបង្ហោះរូបច្រើនសន្លឹកនៅលើបណ្តាញសង្គមរបស់ខ្លួនក្នុងឈុតសំលៀកបំពាក់ប្រពៃណីខ្មែរជាមួយនឹងពាក្យពេចន៍ថា «ជាកិត្តិយសដ៏ធំមួយតំណាងឱ្យសិល្បករកម្ពុជាក្នុងការសម្តែងកិច្ចស្វាគមន៍ដំណើរទស្សនកិច្ចរបស់សម្តេចអគ្គមហាសេនាបតីតេជោ ហ៊ុន សែន មកកាន់ប្រទេសទីម័រខាងកើត»។
ងាកទៅកាន់បណ្តាញសង្គមរបស់ ហុក សារិតុលា លំដាប់រងទី២ Miss Supranational Cambodia 2025 បានបង្ហោះនៅលើបណ្តាញសង្គមរបស់ខ្លួនដែរថា «ជាកិត្តិយសដែលនាងខ្ញុំបានចូលរួមថ្លែងនូវបទចម្រៀងរបស់កម្ពុជាក្នុងការស្វាគមន៍ដ៏សំខាន់ជូនសម្ដេច ពុក នៅក្នុងប្រទេសទីម័រឡេស្តេ»។ មិនត្រឹមតែទទួលបានឱកាសដ៏ពិសេសនេះប៉ុណ្ណោះទេ ហុក សារិតុលា គឺមានការរំភើបញ័រដៃខ្លាំង។ បវរកញ្ញារូបនេះបានសរសេរថា «ដៃទាំងពីរកំពុងតែញ័រហើយ លើកទី១ដែលនាងខ្ញុំឡើងច្រៀងបទចម្រៀងជូនដល់សម្ដេចពុកផ្ទាល់»។
ការបង្ហាញវត្តមានរបស់ ពេជ្រ វត្តីសារ៉ាវឌ្ឍី និង ហុក សារិតុលា តំណាងឱ្យសិល្បករកម្ពុជាក្នុងការសម្តែងកិច្ចស្វាគមន៏ដំណើរទស្សនកិច្ចរបស់សម្តេចអគ្គមហាសេនាបតីតេជោហ៊ុនសែនមកកាន់ប្រទេសទីម័រខាងកើតនេះអ្នកទាំងពីរគឺជាបវរកញ្ញាខ្មែរដំបូងគេដែលទទួលបានកិត្តិយសដ៏ពិសេសនេះ។
គួរឱ្យដឹងថាក្រៅពីសកម្មភាពសិល្បៈផ្ទាល់ខ្លួននិងការប្រកួតបវរកញ្ញា ពេជ្រ វត្តីសារ៉ាវឌ្ឍី និង ហុក សារិតុលា គឺមានទំនាក់ទំនងជិតស្និទ្ធចាត់ទុកគ្នាដូចជាបងប្អូន ហើយអ្នកទាំងពីរជារឿយៗមានមុខជួយនៅក្នុងព្រឹត្តិការណ៍ជាតិផងដែរ៕
