បច្ចុប្បន្នបច្ចេកវិទ្យាកាន់តែទំនើប មនុស្សតែងព្យាយាមបង្កើតឧបករណ៍ជាច្រើនដែលអាចជូនដំណឹងដល់មនុស្សមុនពេលមានគ្រោះធម្មជាតិកើតឡើង ដើម្បីអោយមនុស្សអាចរកដំណោះស្រាយក្នុងការទប់ស្កាត់ រឺការពារខ្លួនបានទាន់ពេលវេលា។

ទន្ទឹមនឹងនេះផងដែរ នៅមុនពេលមានគ្រោះមហន្តរាយម្ដងៗធម្មជាតិក៏អាចបញ្ជូនសញ្ញាអោយមនុស្សបានដឹងមុនផងដែរ គ្រាន់តែពេលខ្លះយើងមិនបានចាប់អារម្មណ៍លើវាប៉ុណ្ណោះ។ ដូច្នេះមកដឹងពីសញ្ញា ដែលធម្មជាតិចង់បង្ហាញថាវាអាចនឹងមានគ្រោះធម្មជាតិកើតឡើងដូចខាងក្រោម៖

១. អក្ការៈរបស់សត្វខុសប្រក្រតី៖ បើអ្នកសង្កេតឃើញសត្វធ្វើផ្លាស់ទីដោយរត់ រឺហោះហើរជាហ្វូងធំៗ រឺសត្វមានភាពជ្រួលច្រប់ថប់បារម្ភ នេះអាចបណ្ដាលមកពីពួកវាមានញ្ញាណម្យ៉ាងដែលអាចចាប់បានសញ្ញានៃគ្រោះធម្មជាតិណាមួយ ដែលរៀបនឹងកើតឡើងហើយ ដូចនេះមនុស្សគួរមានការប្រុង..ប្រយ័ត្ន។

២. ប្រទះឃើញសត្វសមុទ្រដែលរស់នៅទឹកជ្រៅ៖ ប្រសិនបើអ្នកប្រទះឃើញសត្វសមុទ្រមួយចំនួនដែលរស់នៅតែក្នុងទឹកជ្រៅ អណ្ដែត រឺទើរនៅលើឆ្នេរសមុទ្រ នេះអាចជាសញ្ញានៃភាពមិនប្រក្រតីដែលកើតមាននៅក្រោមទឹកដែលវារស់នៅហើយ។ សត្វត្រីដូចជា Oarfish Anglerfish រឺ សត្វផ្សេងទៀត ដែលរស់នៅតែក្រោមទឹកដ៏ជ្រៅ បែរជាខំហែលឡើងមកខាងលើ បានន័យថាមជ្ឍដ្ឋានដែលវារស់នៅមានការប្រែប្រួល ហើយវាមានភាគរយច្រើនក្នុងការកើតមាននូវការរញ្ជួយដី ។

៣. ស្ថានភាពទឹកសមុទ្រ៖ បើសុខៗស្រាប់តែឃើញទឹកសមុទ្រស្រកចុះខ្លាំងពីច្រាំង នោះអ្នកគួរធ្វើដំណើរចាកឆ្ងាយពីទីនោះអោយបានកាន់តែឆាប់ កាន់តែល្អព្រោះវាជាសញ្ញាមុនពេលមហាសមុទ្របញ្ជូនរលកយក្សស៊ូណាមីមកកាន់ផ្ទៃគោកហើយ។

៤. ការព្រឺរោម រឺបះសក់ខណៈមេឃកំពុងងឹត៖ ប្រសិនបើនៅទីវាលកំឡុងពេលមេឃងងឹតមានពពកខ្មៅ ហើយអ្នកចាប់ផ្ដើមមានអារម្មណ៍ថាមិនស្រណុក ហើយសក់ក្បាលរបស់អ្នកបះឡើងត្រង់ទៅលើ អ្នកគួរប្រញាប់រត់ចូលកន្លែងសុវត្ថិភាពដូចជា៖ ក្នុងផ្ទះ រឺអគ្គារ, ក្នុងរថយន្ត និងជៀសឆ្ងាយពីដើមឈើ, តំបន់មានទឹក, ទីតាំងដែលមានលោហៈធាតុ និងចរន្តអគ្គិសនីជាដាច់ខាត ព្រោះនេះជាសញ្ញានៃរន្ទះបាញ់ដែលអាចនឹងកើតមានក្បែរៗអ្នក។

ទាំងនេះ មិនមែនគ្រាន់តែជាការលើកឡើងរបស់មនុស្សពីមាត់មួយទៅមាត់មួយនោះទេ ប៉ុន្តែវាគឺជាការពិត ដោយសូម្បីតែអ្នកវិទ្យាសាស្រ្តក៏យល់ស្របនឹងការយល់ឃើញនេះដែរ ព្រោះវាមានហេតុផលសមស្របពិតប្រាកដមែន។

ប្រទេសមីយ៉ាន់ម៉ា ៖ នៅថ្ងៃទី៣១ ខែមីនា ឆ្នាំ២០២៥ សារព័ត៌មាន BBC រាយការណ៍ថា ប្រទេសមីយ៉ាន់ម៉ា បានកើតគ្រោះរញ្ជួយដីជាថ្មី មានកម្រិត៥.៩រិចទ័រ ស្ថិតនៅតំបន់ម៉ាត់តារា ភាគពាយ័ព្យទីក្រុងម៉ាន់ដាឡៃ កាលពីវេលាម៉ោង៣និង៣៨រសៀលថ្ងៃទី២៩ ខែមីនា ដែលធ្វើឱ្យពលរដ្ឋស្លា.ប់ ដោយសាររញ្ជួយដីកើនឡើងរហូតដល់ជាង១,៧០០នាក់, រងរបួសជិត៣,៥០០នាក់ និងបាត់ខ្លួន៣០០នាក់ ។ គ្រោះរញ្ជួយដីលើកក្រោយនេះ គឺមានកម្លាំងញ័រខ្លាំងប្រហាក់ប្រហែលនឹងគ្រោះរញ្ជួយដីលើកដំបូងដែលមានកម្រិត៧.៧រិចទ័រ ។

ភ្នាក់ងារសង្គ្រោះបានស្វែងរកមនុស្សបាត់ខ្លួននៅក្រោមអគារបាក់បែកចំនួន៤ មានកម្ពស់១១ជាន់ នៅទីក្រុងម៉ាន់ដាឡៃ ដែលបានដួលរលំដោយសាររញ្ជួយដីកាលពីថ្ងៃទី២៨ ខែមីនា កន្លងមក ។ បើគិតមកដល់ថ្ងៃទី៣១ ខែមីនា គឺភ្នាក់ងារសង្គ្រោះបានជួយសង្គ្រោះមនុស្សជាប់នៅក្រោមអគារ ចំនួន២៩នាក់ និងរកឃើញសាកសព ៩នាក់ ។ ភ្នាក់ងារសង្គ្រោះនៅតែព្យាយាមស្វែងរកមនុស្សនៅក្រោមអគារបន្ត ក្រោយពីមន្ត្រីកាកបាទក្រហមអន្តរជាតិប្រកាសថា មានមនុស្សជាង៩០នាក់ទៀតជាប់នៅក្រោមអគារ ។

ចំណែកការស្វែងរកមនុស្សបាត់ខ្លួនទៅទីក្រុងសាកាយ ដែលស្ថិតនៅក្បែរចំណុចកណ្តាលគ្រោះរញ្ជួយដី គឺភ្នាក់ងារសង្គ្រោះបានរកឃើញសាកសពនៅក្រោមអគារបាក់បែក ចំនួន៨៨នាក់ និងជួយសង្គ្រោះមនុស្សចេញពីអគារបាន ចំនួន៣៦នាក់ ។

មេដឹកនាំរដ្ឋាភិបាលយោធាមីយ៉ាន់ម៉ា លោក Min Aung Hlaing និយាយថា ចំនួនពលរដ្ឋមីយ៉ាន់ម៉ាស្លាប់ដោយសារគ្រោះរញ្ជួយដី បានកើនឡើងរហូតដល់ជាង១,៧០០នាក់, រងរបួសជិត៣,៥០០នាក់ និងបាត់ខ្លួន៣០០នាក់ ។ ប្រទេសមីយ៉ាន់ម៉ាសន្និដ្ឋានថា ចំនួនពលរដ្ឋស្លាប់ដោយសាររញ្ជួយដីនឹងកើនឡើងច្រើនជាងនេះ ។

កាលពីថ្ងៃទី២៩ ខែមីនា កន្លងមក រដ្ឋាភិបាលយោធាមីយ៉ាន់ម៉ាបានអនុញ្ញាតឱ្យភ្នាក់ងារសង្គ្រោះបរទេសរាប់រយនាក់ធ្វើដំណើរមកមីយ៉ាន់ម៉ា ដើម្បីស្វែងរកពលរដ្ឋបាត់ខ្លួននៅក្រោមអគារបាក់រលំក្នុងតំបន់ជាច្រើន ដោយសាររញ្ជួយដីកម្រិត៧.៧រិចទ័រ កាលពីថ្ងៃទី២៨ ខែមីនា ។ ភ្នាក់ងារសង្គ្រោះមកពីប្រទេសឥណ្ឌា ចិន ហុងកុង និងថៃ បានធ្វើដំណើរមកដល់មីយ៉ាន់ម៉ា ព្រមទាំងផ្តល់ជំនួយឱ្យមីយ៉ាន់ម៉ាផងដែរ ។ រីឯម៉ាឡេស៊ី សិង្ហបុរី និងរុស្ស៊ី ក៏បានបញ្ជូនភ្នាក់ងារសង្គ្រោះមកមីយ៉ាន់ម៉ាដូចគ្នា ខណៈកូរ៉េខាងត្បូង តៃវ៉ាន់ និងវៀតណាម នឹងបញ្ជូនភ្នាក់ងារសង្គ្រោះនាពេលឆាប់ៗ ។

គួរបញ្ជាក់ថា គ្រោះរញ្ជួយដីជាថ្មីមានកម្រិត៥.៩រិចទ័រ នៅតំបន់ម៉ាត់តារា ភាគពាយ័ព្យទីក្រុងម៉ាន់ដាឡៃ ប្រទេសមីយ៉ាន់ម៉ា កាលពីវេលាម៉ោង៣និង៣៨រសៀលថ្ងៃទី២៩ ខែមីនា មានឥទ្ធិពលមកដល់ខេត្ត២ របស់ប្រទេសថៃ គឺខេត្តមេហុងស៊ន និងខេត្តឈៀងម៉ៃ ។ រញ្ជួយដីនៅតំបន់ម៉ាត់តារា គឺស្ថិតនៅឆ្ងាយពីស្រុកប៉ាងម៉ាផា ខេត្តមេហុងស៊ន របស់ថៃ ប្រមាណ៣៣២គីឡូម៉ែត្រ ៕

ប្រទេសថៃ ៖ អ្នកគ្រប់គ្រងអគារ Baiyoke Sky Hotel បានប្រកាសទៅកាន់សាធារណជនថា អគារនេះគ្មានស្នាមប្រេះ ឬផ្អៀង ដោយសារគ្រោះរញ្ជួយដីនៅទីក្រុងបាងកក កាលពីរសៀលថ្ងៃទី២៨ ខែមីនា ឆ្នាំ២០២៥ ទេ ពីព្រោះអគារនេះត្រូវបានបានសាងសង់ឡើងដើម្បីទប់ទល់នឹងការរញ្ជួយដីកម្រិតខ្លាំងបំផុត បើធៀបនឹងអគារផ្សេងៗ ។ ការប្រកាសបែបនេះក្រោយពីមានការចែកចាយរូបភាពអគារ Baiyoke Sky Hotel ក្នុងបណ្តាញសង្គមថា មានស្នាមប្រេះក្រោយរញ្ជួយដី ។

កាលពីរសៀលថ្ងៃទី២៨ ខែមីនា កន្លងមក មានគ្រោះរញ្ជួយដីកម្រិត៧.៧រិចទ័រ កើតឡើងនៅកណ្តាលប្រទេសមីយ៉ាន់ម៉ា និងបណ្តាលឱ្យកម្លាំងរំញ័រមានឥទ្ធិពលមកដល់តំបន់ភាគខាងជើង ភាគកណ្តាលប្រទេសថៃ រួមទាំងទីក្រុងបាងកក ។ ហេតុការណ៍នេះធ្វើឱ្យអគារនានាក្នុងទីក្រុងបាងកក បាក់រំលំជាបន្តបន្ទាប់ ដូចជា ៖ អគារកំពុងសាងសង់ក្នុងតំបន់ចាក់តុចាក់ ជាដើម ។ ក្រោយមក ក្នុងបណ្តាញសង្គមមានការបង្ហោះរូបភាពអគារ Baiyoke Sky Hotel មានស្នាមប្រេះ និងផ្អៀងអគារ ក្រោយកើតរញ្ជួយដី ។

ក្រោយមានការចែកចាយរូបភាពអគារ Baiyoke Sky Hotel មានស្នាមប្រេះ អ្នកគ្រប់គ្រងសណ្ឋាគារនេះបានសរសេរក្នុងហ្វេសប៊ុកផេកឈ្មោះ «Beerbaiyoke» ថា ៖ មនុស្សភាគច្រើនអាចរង់ចាំការបង្ហោះរបស់យើង ការបង្ហោះយឺតយ៉ាវ ដោយសារយើងជាប់រវល់ជាមួយភ្ញៀវ និងពិនិត្យសណ្តាប់ធ្នាប់ជាមួយវិស្វករក្នុងអគារ ។ មានការផ្ញើសារជាច្រើនមកយើង សូមអរគុណចំពោះការបារម្ភ នេះពុំមែនជារញ្ជួយដីលើកទី១ ទេ ។ យើងមានជំនាញលើការផ្តល់សុវត្ថិភាព និងទទួលខុសត្រូវភ្ញៀវ ។

យើងទទួលដំណឹងថា អគារ Baiyoke Sky Hotel មានស្នាមប្រេះ និងផ្អៀង គឺពុំមែនជាការពិតទេ វាគ្រាន់តែរបកថ្នាំប៉ុណ្ណោះ កន្លងមក ក៏របកថ្នាំដែរ ។ អគារនេះមានបិទស្លាកផ្សព្វផ្សាយពាណិជ្ជកម្ម ពេលខ្លះ វារបកថ្នាំ ប៉ុន្តែយើងនឹងរៀបចំឱ្យស្អាតឡើងវិញ ។ រីឯអគារផ្សេងៗនៅក្បែរនេះពុំខូចខាតទេ យើងពុំបារម្ភឡើយ ពីព្រោះយើងមានទំនុកចិត្ត ប៉ុន្តែយើងបារម្ភពីអារម្មណ៍ភ្ញៀវមកស្នាក់នៅ ។ អគារត្រូវបានសាងសង់ឡើងដើម្បីទប់ទល់នឹងការរញ្ជួយដីខ្លាំងបំផុត បើធៀបនឹងអគារផ្សេង ។ Baiyoke Sky Hotel នៅតែជាអគារមានកម្ពស់ខ្ពស់បំផុតនៅទីក្រុងបាងកក ។

ខាងសណ្ឋាគារបានត្រួតពិនិត្យរួចហើយ គ្មានអ្វីខូចខាតសូម្បីតែបន្តិច ។ រីឯនៅចំណុចងាយរងផលប៉ះពាល់ដោយសាររញ្ជួយដី គឺកញ្ចក់របស់សណ្ឋាគារ ហើយបើតាមការពិនិត្យឃើញថា គ្មានស្នាមប្រេះកញ្ចក់ទេ ។ អ្នកសាងសង់សណ្ឋាគារបានសាងសង់ឱ្យវាអាចទប់ទល់នឹងគ្រោះរញ្ជូយដីខ្លាំងជាងអគារផ្សេងៗ ដើម្បីបង្ការការខូចខាច ឬបាក់រលំអគារ ។ នេះបើតាមការលើកឡើងរបស់អ្នកគ្រប់គ្រងអគារ Baiyoke Sky Hotel ៕

ប្រទេសថៃ ៖ ក្រោយពីទីក្រុងបាងកក កើតគ្រោះរញ្ជួយដីធ្ងន់ធ្ងរកាលពីរសៀលថ្ងៃទី២៨ ខែមីនា ឆ្នាំ២០២៥ ដោយសារទទួលកម្លាំងរំញ័រពីរញ្ជួយដីនៅទីក្រុង Mandalay ប្រទេសមីយ៉ាន់ម៉ា ដែលធ្វើឱ្យអគារកំពុងសាងសង់ជាច្រើនកន្លែងនៅទីក្រុងបាងកក បាក់រលំជាបន្តបន្ទាប់ ដូចជា ៖ អគារនៅតំបន់ចាក់តុចាក់ បានធ្វើឱ្យពលរដ្ឋថៃចែកចាយការទស្សន៍ទាយពីគ្រោះរញ្ជួយដីនៅថៃរបស់គ្រូទាយដ៏ល្បីល្បាញម្នាក់ក្នុងបណ្តាញសង្គម ។ ការទស្សន៍ទាយនេះ គឺតាំងពីខែធ្នូ ឆ្នាំ២០២៤ គឺត្រឹមត្រូវ១០០% ស្តាប់ហើយគួរឱ្យព្រឺសម្បុរខ្លាំងណាស់ ។

ពលរដ្ឋថៃនៅតែតក់ស្លុតចំពោះហេតុការណ៍រញ្ជួយដី កាលពីរសៀលថ្ងៃទី២៨ ខែមីនា កន្លងមក ដែលមានចំណុចកណ្តាលនៅប្រទេសមីយ៉ាន់ម៉ា និងមានកម្លាំងរំញ័រឆ្ងាយមកដល់ទីក្រុងបាងកក និងបណ្តាខេត្តមួយចំនួនរបស់ថៃ ។ ក្រោយរញ្ជួយដី អ្នកលេងបណ្តាញសង្គមថៃបានចែកចាយការទស្សន៍ទាយពីគ្រោះរញ្ជួយដីនៅថៃរបស់អ្នកស្រី ប្រាយ ក្រាស៊ិប ដោយសារការទាយរបស់អ្នកស្រីពីហេតុការណ៍កើតឡើង គឺត្រឹមត្រូវគ្មានខុស ។

អ្នកស្រី ប្រាយ ក្រាស៊ិប ធ្លាប់បានទស្សន៍ទាយពីគ្រោះរញ្ជួយដីក្នុងយូធូប (YouTube) ថា ក្នុងចន្លោះចាប់ពីខែមករា ដល់ខែមិថុនា ឆ្នាំ២០២៥ គឺនឹងមានគ្រោះរញ្ជួយដីខ្លាំងក្លាកើតឡើងនៅប្រទេសមីយ៉ាន់ម៉ា ហេតុនេះ ខេត្តរបស់ថៃដែលនៅជាប់ព្រំដែនមីយ៉ាន់ម៉ា សូមត្រៀមខ្លួន ។ រីឯទីក្រុងបាងកក នឹងមានកម្លាំងរំញ័រខ្លាំង ដោយសាររញ្ជួយដីនៅមីយ៉ាន់ម៉ា ។ លោកស្រីបានមើលឃើញហេតុការណ៍បម្រុងនឹងកើតឡើងយូរមកហើយ គ្រាន់តែអ្នកស្រីពុំហ៊ាននិយាយ ។

អ្នកស្រី ប្រាយ ក្រាស៊ិប បានដឹងពីហេតុការណ៍រញ្ជួយដីនៅប្រទេសថៃ តាំងពី២ខែ ទៅ៣ខែមុនមកម៉្លេះ ហើយអ្នកស្រីលើកយកមកនិយាយ ដើម្បីចង់ឱ្យមានការការពារគ្រោះថ្នាក់យ៉ាងល្អបំផុត ។ អ្នកស្រីចង់ឱ្យពលរដ្ឋថៃទុកដាក់ប្រាក់កាសនៅកន្លែងខ្ពស់ ឬដាក់ក្នុងធនាគារ ពីព្រោះមិនចង់ឱ្យប្រាក់ពលរដ្ឋអណ្តែតតាមទឹក អ្នកស្រីពុំចង់ឃើញវាខូចខាត ។ អ្នកស្រីទាយថា គ្រោះរញ្ជួយដីក្នុងប្រទេសថៃ នឹងកើតឡើងនៅពាក់កណ្តាលឆ្នាំ២០២៥ គឺនៅខែមីនា ឬខែមេសា ។

គួរបញ្ជាក់ថា លោកស្រីបានទស្សន៍ទាយពីគ្រោះរញ្ជួយដីធ្ងន់ធ្ងរកើតឡើងនៅថៃ កាលពីថ្ងៃទី២៧ ខែធ្នូ ឆ្នាំ២០២៤ ហើយអ្នកស្រីសូមកុំឱ្យវាកើតឡើងពិតប្រាកដ ពីព្រោះពុំចង់ឃើញពលរដ្ឋថៃបាត់បង់ទ្រព្យសម្បត្តិដោយសាររញ្ជួយដី ។ ក្រោយពីអ្នកស្រីបានទស្សន៍ទាយបែបនេះ ស្រាប់តែប្រទេសថៃកើតរញ្ជួយដីពិតមែន ហើយទីក្រុងបាងកក រងគ្រោះធ្ងន់ធ្ងរជាងគេ ។ ពលរដ្ឋនៅបាងកក ពុំបានត្រៀមខ្លួនមុនទេ ហេតុការណ៍នេះកើតឡើងឆាប់រហ័សខ្លាំងពេកធ្វើឱ្យចលាចល និងស្ទះចរាចរណ៍ ។

នេះគ្រាន់តែជាការទស្សន៍ទាយប៉ុណ្ណោះ ហើយការជឿ ឬមិនជឿ គឺជាជំនឿរបស់បុគ្គលម្នាក់ៗ ។ ប៉ុន្តែសម្រាប់ពលរដ្ឋថៃភាគច្រើនមានជំនឿលើការទស្សន៍ទាយរបស់អ្នកស្រី ប្រាយ ក្រាស៊ិប ពីព្រោះអ្នកស្រីធ្លាប់បានទាយពីហេតុការណ៍កើតឡើងជាច្រើនទៀត ឃើញថា ការទាយរបស់អ្នកស្រីត្រឹមត្រូវស្ទើរទាំងអស់ ៕

ប្រទេសជប៉ុន ៖ កាលពីថ្ងៃទី២៧ ខែមីនា ឆ្នាំ២០២៥ សារព័ត៌មានបរទេសរាយការណ៍ថា ក្រុមហ៊ុន Fukuyama Transporting នៅខេត្តហ៊ិរ៉ូស៊ីម៉ា ប្រទេសជប៉ុន បានចាប់ផ្តើមបណ្តុះបណ្តាល និងបង្រៀនភាសាជប៉ុនដល់បេក្ខជនដាក់ពាក្យធ្វើការជាអ្នកបើកបររថយន្តដឹកទំនិញនៅវៀតណាម ព្រមទាំងឱ្យបេក្ខជនសាកល្បងបើកបររថយន្តដឹកទំនិញ ។ ក្រុមហ៊ុននេះមានគោលដៅជួលបុគ្គលិកបរទេសចំនួន១៥នាក់ សម្រាប់បើកបររថយន្តដឹកទំនិញនៅជប៉ុន នារដូវក្តៅ ឆ្នាំ២០២៦ ។

ក្រុមហ៊ុនដឹកជញ្ជូននៅជប៉ុនចាប់ផ្តើមទទួលយកជនបរទេសមកធ្វើការជាអ្នកបើកបររថយន្តដឹកទំនិញកាន់តែច្រើន ហើយជនបរទេសដែលធ្វើការជាអ្នកបើករថយន្តដឹកទំនិញអាចស្នើសុំទិដ្ឋាការពិសេស ស្របពេលជប៉ុនខ្វះខាតកម្លាំងពលកម្មយ៉ាងខ្លាំង ។ ការដាក់ពាក្យសុំទិដ្ឋាការពិសេសក្នុងឧស្សាហកម្មដឹកទំនិញនៅជប៉ុន គឺបេក្ខជនត្រូវឆ្លងកាត់ការសាកល្បងពាក់ព័ន្ធនឹងចរាចរណ៍របស់ជប៉ុន និងវិធីផ្ទុកទំនិញ ដែលជប៉ុនបានធ្វើការប្រឡងលើកដំបូងនៅខែធ្នូ ឆ្នាំ២០២៤ និងធ្វើការសាកល្បងសមត្ថភាពបេក្ខជនជាង២០០នាក់ ។ នេះបើតាមសេចក្តីរាយការណ៍របស់ Nikkei Asia ។

ចំណែកក្រុមហ៊ុន Sakai Moving Service នៅទីក្រុងអូសាកា បានចាប់ផ្តើមស្វែងរកបុគ្គលិកបរទេស តាមរយៈក្រុមហ៊ុនស្វែងរកការងារនៅឥណ្ឌូណេស៊ី ។ ក្រោយការសម្ភាសន៍ និងវាយតម្លៃបេក្ខជន ក្រុមហ៊ុនមានគម្រោងជួលបុគ្គលិកបរទេស ចាប់ពីអាយុ២០ឆ្នាំ ទៅ៤០ឆ្នាំ ស្មើជាង១០នាក់ ដើម្បីធ្វើការផ្នែកបើកបររថយន្ត ។ ពេលបេក្ខជនធ្វើដំណើរមកដល់ជប៉ុន ក្រុមហ៊ុននឹងបង្រៀនភាសាជប៉ុន ព្រមទាំងជួយផ្លាស់ប្តូរប័ណ្ណបើកបរដើម្បីឱ្យមានសិទ្ធិបើកបរនៅជប៉ុន ហើយក្រុមហ៊ុនរំពឹងថា បុគ្គលិកបរទេសនឹងចាប់ធ្វើការជាអ្នកបើកបររថយន្ត នៅខែមីនា ឆ្នាំ២០២៦ ដែលជាអំឡុងពេលមានការដឹកជញ្ជូនទំនិញច្រើនបំផុត ។

ដូចគ្នានេះ ក្រុមហ៊ុន Senko Group Holdings បានកំណត់គោលដៅជួលបុគ្គលិកបើករថយន្តដឹកទំនិញឱ្យបាន១០០នាក់ ស្ថិតក្រោមគម្រោងទិដ្ឋាការពិសេស ។ ក្រុមហ៊ុននេះនឹងរត់ការស្នើសុំប័ណ្ណបើកបរ និងបង្រៀនភាសាជប៉ុនដល់បុគ្គលិកបរទេស ។

មន្ត្រីក្រសួងដែនដី ហេដ្ឋារចនាសម្ព័ន្ធ ដឹកជញ្ជូន និងទេសចរណ៍ឱ្យដឹងថា បុគ្គលិកបើកបររថយន្តដឹកទំនិញធ្វើការច្រើនជាងបុគ្គលិកទូទៅ ប្រមាណ២០% ក្នុង១ឆ្នាំ ប៉ុន្តែពួកគេទទួលបានប្រាក់ចំណូលប្រចាំឆ្នាំ តិចជាងបុគ្គលិកទូទៅ ប្រមាណ១០% ។

គួរបញ្ជាក់ថា ក្រុមហ៊ុនដឹកជញ្ជូនជប៉ុនជាច្រើនបានជួលបុគ្គលិកបរទេសមកធ្វើការជាអ្នកបើកបររថយន្ត ដោយសារនៅជប៉ុនខ្វះខាតកម្លាំងពលកម្មយ៉ាងខ្លាំង ជាពិសេស បុគ្គលិកថែទាំមនុស្សចាស់ ។ ជប៉ុនរំពឹងថា នឹងអាចជួលជនបរទេសមកធ្វើការរហូតដល់២៤,៥០០នាក់ ចាប់ពីឆ្នាំ២០២៤ ដល់ឆ្នាំ២០២៨ ៕