ប្រទេសថៃ ៖ ក្រោយកើតគ្រោះរញ្ជួយដីធ្ងន់ធ្ងរកម្រិត៧.៧រិចទ័រ នៅទីក្រុង Mandalay ប្រទេសមីយ៉ាន់ម៉ា កាលពីរសៀលថ្ងៃទី២៨ ខែមីនា ឆ្នាំ២០២៥ និងធ្វើឱ្យញ័ររង្គើដល់តំបន់ជាច្រើននៅប្រទេសថៃ ជាពិសេស ទីក្រុងបាងកកកើតចលាចល ពលរដ្ឋថៃពុំហ៊ានស្នាក់នៅក្នុងអគារខុនដូខ្ពស់ៗ ខណៈពលរដ្ឋខ្លះសម្រេចចិត្តធ្វើដំណើរទៅស្រុកកំណើតដើម្បីគេចពីរញ្ជួយដី ឃើញថា មានការចែកចាយព័ត៌មានជាច្រើនក្នុងបណ្តាញសង្គមពីរលកយក្សស៊ូណាមិ អាចនឹងកើតឡើងនៅប្រទេសថៃឆាប់ៗ ។ ហេតុនេះ ពលរដ្ឋពុំហ៊ានទៅលេងមាត់សមុទ្រ ជាពិសេស សមុទ្រនៅខេត្តភូកេត ។

ប៉ុន្តែការិយាល័យទំនាក់ទំនងសាធារណៈនៅខេត្តភូកេត បញ្ជាក់ថា ខេត្តភូកេតមានសុវត្ថិភាព និងពុំរងផលប៉ះពាល់ដោយសារគ្រោះរញ្ជួយដីទេ ។ រីឯព័ត៌មានដែលផ្សព្វផ្សាយក្នុងបណ្តាញសង្គមថា ក្រោយកើតគ្រោះរញ្ជួយដីនៅទីក្រុងបាងកក ស្រាប់តែទឹកសមុទ្រនៅខេត្តភូកេតរីងភ្លាមៗ ជាសញ្ញាបង្ហាញពីរលកយក្សស៊ូណាមិអាចនឹងកើតឡើងនៅប្រទេសថៃឆាប់ៗ គឺជាព័ត៌មានក្លែងក្លាយ ។ ហេតុនេះ សូមពលរដ្ឋកុំជឿព័ត៌មាននេះឱ្យសោះ ។

កាលពីថ្ងៃទី២៨ ខែមីនា ឆ្នាំ២០២៥ ការិយាល័យទំនាក់ទំនងសាធារណៈនៅខេត្តភូកេត បានសរសេរក្នុងហ្វេសប៊ុកថា ៖ «ខេត្តភូកេតមានសុវត្ថិភាព និងពុំរងផលប៉ះពាល់ដោយសារគ្រោះរញ្ជួយដីទេ ។ ព័ត៌មានរឿងទឹកសមុទ្រស្រក គឺជាព័ត៌មានក្លែងក្លាយ សូមកុំជឿ» ។ អាជ្ញាធរនៅឆ្នេរសមុទ្រប៉ាតង បញ្ជាក់ថា បរិវេណឆ្នេរសមុទ្រប៉ាតង មានសភាពធម្មតា ហើយអាជ្ញាធរគ្រប់រូបបានតាមដានស្ថានការណ៍គ្រោះរញ្ជួយដីយ៉ាងដិតដល់ ។

ចំណែកភ្នាក់ងារការពារ និងកាត់បន្ថយគ្រោះមហន្តរាយធម្មជាតិ បានតាមដានស្ថានការណ៍គ្រោះរញ្ជួយដីឃើញថា ពលរដ្ឋនៅតំបន់មាត់សមុទ្រ ពុំទទួលកម្លាំងរំញ័រដោយសាររញ្ជួយដីទេ ។ ភ្នាក់ងារការពារ និងកាត់បន្ថយគ្រោះមហន្តរាយធម្មជាតិ បានកំណត់វិធានការមួយចំនួនដូចខាងក្រោម ៖

១-មជ្ឈមណ្ឌលគ្រប់គ្រងហេតុការណ៍នៅតាមបណ្តាខេត្ត ត្រូវតាមដានស្ថានការណ៍ និងផលប៉ះពាល់ដែលកើតឡើងដោយសារគ្រោះរញ្ជួយដីឱ្យបានជាប់លាប់
២-ជូនដំណឹងដល់ពលរដ្ឋអំពីស្ថានការណ៍កើតឡើង ដើម្បីកាត់បន្ថយការភ័យស្លន់ស្លោរ និងណែនាំពលរដ្ឋពីវិធីការពារខ្លួនឱ្យមានសុវត្ថិភាព
៣-ពិនិត្យមើលការខូចខាត ព្រមទាំងជួយសង្គ្រោះជនរងគ្រោះតាមគោលការណ៍កំណត់របស់រដ្ឋ ។

មន្ត្រីពាក់ព័ន្ធត្រូវរាយការណ៍ស្ថានការណ៍ និងផលប៉ះពាល់ផ្សេងៗក្នុងខេត្តទៅកាន់ភ្នាក់ងារការពារ និងកាត់បន្ថយគ្រោះមហន្តរាយធម្មជាតិជាបន្តបន្ទាប់ ។ ហេតុការណ៍គ្រោះរញ្ជួយដីកើតឡើងនៅមីយ៉ាន់ម៉ា បានធ្វើឱ្យញ័ររង្គើរដល់ទីក្រុងបាងកក, តំបន់ជុំវិញទីក្រុងបាងកក, បណ្តាខេត្តភាគខាងជើង, ភាគឦសាន និងភាគខាងត្បូង សូមពលរដ្ឋតាមដានស្ថានការណ៍ និងព័ត៌មានយ៉ាងដិតដល់ ហើយពលរដ្ឋអាចស្នើសុំជំនួយតាមរយៈលេខទូរស័ព្ទ ករណីរងគ្រោះដោយសាររញ្ជួយដី ។

ដោយឡែក អ្នកសារព័ត៌មានថៃ MCOT បានរាយការណ៍ពីខេត្តភូកេតថា ខេត្តភូកេតពុំបានខូចខាត ឬរងផលប៉ះពាល់ដោយសារគ្រោះរញ្ជួយដីដែលកើតឡើងនៅមីយ៉ាន់ម៉ាទេ ពីព្រោះគ្រប់តំបន់របស់ខេត្តភូកេត មានសភាពធម្មតា ។ ក្រោយទីក្រុងបាងកករញ្ជួយដី ក៏មានពាក្យចចាមអារ៉ាមថា ទឹកសមុទ្រនៅខេត្តភូកេតរីងស្ងួត រហូតដល់ធ្វើឱ្យមនុស្សមួយចំនួនបារម្ភពីរលកយក្សស៊ូណាមិ គឺពុំពិតឡើយ ពលរដ្ឋនៅខេត្តភូកេត ពុំទទួលកម្លាំងរំញ័រដូចបណ្តាខេត្តផ្សេងទេ ។

ពេលកើតរញ្ជួយដីនៅទីក្រុងបាងកក គឺនាយករដ្ឋមន្ត្រីថៃ លោកស្រី ផេថងថាន ស៊ីណាវ៉ាត់ និងរដ្ឋមន្ត្រីក្រសួងមហាផ្ទៃ លោក អនុថីន ឆាន់វីរៈគូន កំពុងប្រជុំជាមួយមន្ត្រីរាជការនៅខេត្តភូកេត ហើយគ្មានអ្នកណាម្នាក់ទទួលកម្លាំងរំញ័រទេ ។ ប៉ុន្តែលោកស្រី ផេថងថាន បានដឹងដំណឹងពីរញ្ជួយដីនៅទីក្រុងបាងកកតាមសេចក្តីរាយការណ៍ ។ រីឯយន្តហោះអាចឡើង-ចុះនៅអាកាសយានដ្ឋានភូកេតជាធម្មតា ខណៈដំណើរកម្សាន្ត និងការប្រកបរបររកស៊ីនៅភូកេត គឺល្អប្រសើរ ពុំដូចពាក្យចចាមអារ៉ាមទេ ៕

មនុស្សភាគច្រើនទូទាំងពិភពលោក ប្រហែលជាធ្លាប់បានស្គាល់គ្រូទាយពិការភ្នែក Baba Vangaរួចមកហើយ ដែលកន្លងមកគេតែងចុះផ្សាយអំពីការទស្សន៍ទាយពីជោគវាសនារបស់សកលលោក និងហេតុការណ៍ធំៗជាច្រើន ហើយរឿងរ៉ាវទាំងនោះសុទ្ធតែបានកើតឡើង ដូចអ្វីដែលគាត់ទស្សន៍ទាយមែន។

ការទាយទុកមុនរបស់គាត់ ត្រូវបានគេចងក្រងជាសៀវភៅតាំងពីគាត់នៅមានជីវិតមកម្ល៉េះ ហើយការទាយនោះ គឺគាត់បានទាយទុករហូតដល់ឆ្នាំ ៥០៧៩ ឯណោះ។ ដោយឡែក ថ្មីៗនេះគេបានដកស្រង់នូវទំនាយធំៗរបស់គាត់សម្រាប់ឆ្នាំ ២០២៥ ដែលមានដូចខាងក្រោម៖

១. សង្រ្គាមរវាងប្រទេសនៅលោកខាងលិច និងខាងកើត៖ ទំនាយនោះបានទាយថា នឹងមានសង្រ្គាមធ្ងន់..ធ្ងរ ដែលអាចនឹងបណ្ដាលអោយមនុស្សស្លា..ប់ជាច្រើន ព្រមទាំងមានការផ្លាស់ប្ដូររបបនយោបាយពិភពលោកផងដែរ។ នៅក្នុងនោះក៏បានសរសេផងដែរថា លោកVladimir Putin អាចនឹងត្រូវបានគេជ្រើសរើសធ្វើជាប្រធានាធិបតីរុស្ស៊ីជាថ្មីម្ដងទៀត ហើយសង្រ្គាមលោកលើកទី៣ អាចនឹងកើតមានឡើង ដែលវាចំណុចដំបូងនៃវិនាសកម្មរប់ពិភពលោក។

២. គ្រោះធម្មជាតិ៖ មនុស្សជាតិនឹងជួបប្រទះនឹងគ្រោះធម្មជាតិយ៉ាងធ្ងន់ធ្ងរនៅប្រទេសជាច្រើនដូចជា៖ គ្រោះទឹកជំនន់, បន្ទុះភ្នំភ្លើង, រញ្ជួយដី, ការកើនឡើងកម្ដៅ និងកម្ពស់ទឹកសមុទ្រ ។ល។

៣. វិទ្យាសាស្រ្តរីកចម្រើនខ្លាំង៖ គាត់បាននិយាយថា ការផ្លាស់ប្ដូរសរីរាង្គរបស់មនុស្សនឹងកាន់តែងាយស្រួលជាងមុន ដោយគេបានរកឃើញវិធីនៅក្នុងការដាក់ចិញ្ចឹមសរីរាង្គនៅក្នុងមន្ទីរពិសោធន៍បាន។ ក្រៅពីនេះផ្នែកបច្ចេកវិទ្យា ក៏នឹងកាន់តែមានឥទ្ធិពលក្នុងសង្គមមនុស្សកាន់តែខ្លាំង។ លើសពីនេះ មនុស្សនឹងអាចទាក់ទងគ្នា តាមរយៈការបញ្ជូនរលកសម្លេងពីខួរក្បាលតាមរយៈឧបករណ៍ម្យ៉ាង ហើយមនុស្សនឹងអាចមានទំនាក់ទំនងជាមួយជីវិតក្រៅភពផែនដីផងដែរ។

៤. វិបត្តិសេដ្ឋកិច្ចនៅអាមេរិក៖ ក្នុងទំនាយបានសរសេថា សហរដ្ឋអាមេរិក នឹងជួបជាមួយវិបត្តិសេដ្ឋកិច្ចយ៉ាងធ្ងន់..ធ្ងរ ។

៥. ការរីកចម្រើននៃសាសនា៖ មានការព្យាករណ៍ថា មនុស្សទូទាំងពិភពលោក នឹងនាំគ្នាចាប់ផ្ដើមមានទំនោរទៅលើជំនឿនៃសាសនាយ៉ាងខ្លាំងក្លាម្ដងទៀត។

គួរបញ្ជាក់ថា ទាំងនេះពុំមែនជាការទាយក្នុងពេលបច្ចុប្បន្ននោះទេ ទំនាយរបស់គាត់ត្រូវបានគេរៀបចំចងក្រងដាក់ជាសៀវភៅតាំងពីមុនពេលគាត់បានទទួលមរ..ណៈភាព នៅឆ្នាំ១៩៩៦មកម្ល៉េះ ហើយត្រូវបានគេយកមកនិយាយសារជាថ្មី ដោយសារឃើញជាក់ស្ដែងនូវរឿងរ៉ាវមួយចំនួន ដែលកំពុងកើតឡើងនាពេលបច្ចប្បន្ននេះពិតប្រាកដមែន ដូច្នេះគួរជឿ រឺមិនគួរជឿគឺអាស្រ័យលើការពិចារណារបស់បុគ្គលរៀងខ្លួន៕

ប្រទេសមីយ៉ាន់ម៉ា ៖ សារព័ត៌មាន AP រាយការណ៍ថា អង្គការសហប្រជាជាតិ (UN) នឹងផ្តល់ជំនួយថវិកាចំនួន៥លានដុល្លារអាមេរិកសម្រាប់ជួយប្រទេសមីយ៉ាន់ម៉ា ដែលបានរងគ្រោះដោយសាររញ្ជួយដីធ្ងន់ធ្ងរ ស្មើកម្រិត៧.៧រិចទ័រ កាលពីរសៀលថ្ងៃទី២៨ ខែមីនា ឆ្នាំ២០២៥ ។ រីឯប្រធានាធិបតីអាមេរិក លោក Donald Trump បានសន្យាថា លោកនឹងផ្តល់ថវិកាជួយមីយ៉ាន់ម៉ា ផងដែរ ក្រោយពីមេដឹកនាំរដ្ឋាភិបាលយោធាមីយ៉ាន់ម៉ា លោក Min Aung Hlaing អំពាវនាវស្នើសុំជំនួយមនុស្សធម៌ពីអន្តរជាតិ ។

មេដឹកនាំរដ្ឋាភិបាលយោធាមីយ៉ាន់ម៉ា លោក Min Aung Hlaing បានថ្លែងតាមទូរទស្សន៍ថា ចំនួនមនុស្សស្លាប់ដោយសារគ្រោះរញ្ជួយដី បានកើនឡើងរហូតដល់១៤៤នាក់ និងរងរបួសចំនួន៧៣០នាក់ ប៉ុន្តែចំនួននេះនឹងកើនឡើងបន្តទៀត ។ អគារក្នុងតំបន់ជាច្រើននៅជុំវិញចំណុចកើតគ្រោះរញ្ជួយដីបានខូចខាតយ៉ាងខ្លាំង ជាពិសេស នៅទីក្រុង Mandalay, ទីក្រុង Yangon និងទីក្រុង Naypyidaw ។

អគារក្នុងទីក្រុងចំនួន៥ ដែលស្ថិតនៅក្បែរចំណុចកណ្តាលគ្រោះរញ្ជួយដីបានខូចខាតជាច្រើនកន្លែង ហើយស្ពានចំនួន២កន្លែងបានបាក់រលំ ក្នុងនោះមានស្ពានបុរាណដែលតភ្ជាប់រវាងទីក្រុង Mandalay និងទីក្រុង Yangon ។ នេះបើតាមការចុះផ្សាយរបស់សារព័ត៌មាន Global New Light របស់មីយ៉ាន់ម៉ា ។

អង្គការសហប្រជាជាតិ (UN) ប្រកាសថា នឹងផ្តល់ប្រាក់ចំនួន៥លានដុល្លារអាមេរិក សម្រាប់ជួយពលរដ្ឋមីយ៉ាន់ម៉ាដែលរងគ្រោះដោយសាររញ្ជួយដី ក្រោយពីមេដឹកនាំរដ្ឋាភិបាលយោធាមីយ៉ាន់ម៉ា លោក Min Aung Hlaing អំពាវនាវស្នើសុំជំនួយមនុស្សធម៌ពីអន្តរជាតិ ហើយមេដឹកនាំមីយ៉ាន់ម៉ាបញ្ជាក់ថា ត្រូវការជំនួយឈាមយ៉ាងច្រើនដើម្បីសង្គ្រោះជីវិតពលរដ្ឋ ។

ដោយឡែក ប្រធានាធិបតីអាមេរិក លោក Donald Trump បានថ្លែងកាលពីថ្ងៃទី២៨ ខែមីនា ថា រដ្ឋាភិបាលអាមេរិកនឹងផ្តល់ជំនួយឱ្យមីយ៉ាន់ម៉ា ប៉ុន្តែអ្នកជំនាញបានសាកសួរពីភាពច្បាស់លាស់របស់អាមេរិកពាក់ព័ន្ធនឹងការផ្តល់ថវិកាជំនួយទៅក្រៅប្រទេស ពីព្រោះតាំងពីថ្ងៃដែលលោក Trump ឡើងកាន់តំណែង គឺអាមេរិកបានកាត់បន្ថយការចំណាយថវិកាជាបន្តបន្ទាប់ ។

ទោះយ៉ាងណា លោក Trump បាននិយាយជាមួយសារព័ត៌មាន Reuters នៅសេតវិមានក្នុងទីក្រុងវ៉ាស៊ីនតោន ថា លោកបានជជែកជាមួយមន្ត្រីមីយ៉ាន់ម៉ារួចហើយ ពាក់ព័ន្ធនឹងស្ថានការណ៍គ្រោះរញ្ជួយដី ហើយរដ្ឋាភិបាលអាមេរិកនឹងផ្តល់ជំនួយមួយចំនួនដល់មីយ៉ាន់ម៉ា ៕

កាលពីមុនពិភពលោករបស់យើងធ្លាប់ត្រូវបានគ្រប់គ្រងដោយសត្វពស់ ដែលមានទំហំធំជាងមនុស្សទៅទៀត ហើយពួកវាគឺជាសត្វយក្សសម័យបុរេប្រវត្តិដ៏ពិតប្រាកដ។ ពស់ គឺជាពពួកសត្វល្មូនដែលភាគច្រើនមានពិស អាចបង្កគ្រោះថ្នាក់ទៅដល់មនុស្សបានយ៉ាងងាយ ដែលធ្វើឱ្យមនុស្សគ្រប់គ្នាមានការខ្លាចរអានឹងប្រភេទសត្វនេះណាស់។ ដូច្នេះហើយតើលោកអ្នកដឹងទេថា ពស់ណាខ្លះដែលមានទំហំធំជាងគេនៅលើពិភពលោក?

យោងតាមការចុះផ្សាយរបស់គេហទំព័របរទេស IFL Science បានឱ្យដឹងថា ពស់ខាងក្រោមនេះគឺជាពស់ដែលធំជាងគេបំផុតក្នុងប្រវត្តិសាស្ត្រពិភពលោក៖

១.Titanoboa៖ គឺជាពស់ថ្លាន់ដែលមានដើមកំណើតនៅអាមេរិកខាងត្បូង ហើយវាមានអាយុកាលប្រហែល ៦០ លានឆ្នាំ បន្ទាប់ពីសត្វដាយណូស័របានផុតពូជ។ ពស់នេះមានប្រវែង ១៣ ទៅ ១៤ ម៉ែត្រ ជាមួយទម្ងន់ ១.១ ទៅ ១.៣ តោន ជាសត្វដែលធំជាងគេបំផុតនៅលើភពផែនដីកាលពីអតីតកាល ទោះជាយ៉ាងណាបច្ចុប្បន្នពស់ប្រភេទនេះបានផុតពូជហើយ។

២.Palaeophis colossaeus៖ គឺជាពស់សមុទ្របុរាណដែលគ្របដណ្តប់ភាគច្រើននៃអាហ្វ្រិកខាងជើងកាលពីជាង ៥០ លានឆ្នាំមុន។ ដោយវាមានប្រវែង ១២ ម៉ែត្រ និងទម្ងន់ប្រហែល ១ តោន ពស់នេះត្រូវបានគេជឿថារស់នៅក្នុងទន្លេធំៗ ឬមហាសមុទ្រធំៗ។

៣.Gigantophis Garstini៖ Gigarstini គឺជាសត្វពស់ចម្លែកដ៏ធំមួយដែលរស់នៅប្រហែល ៤០ លានឆ្នាំមុន។ អ្នកស្រាវជ្រាវបានប៉ាន់ស្មានថាវាមានប្រវែងរាងកាយពី ៧ ទៅ ១០ ម៉ែត្រ ហើយវាមានទំនាក់ទំនងជាមួយពស់យក្សផុតពូជមួយទៀតគឺ Madtsoia នៅក្នុងប្រទេសឥណ្ឌា ដែលបង្ហាញថាពស់យក្សនេះធ្លាប់ត្រូវបានគេរកឃើញយ៉ាងទូលំទូលាយនៅទូទាំងអាស៊ី។

៤.Anacondas៖ យោងតាមសួនសត្វជាតិ និងវិទ្យាស្ថាន Smithsonian Institute of Conservation Biology បានឱ្យដឹងថា បច្ចុប្បន្នពស់ថ្លាន់ Anacondas គឺជាពស់ដែលធំជាងគេនៅលើពិភពលោក ដោយវាត្រូវបានគេប្រទះឃើញភាគច្រើននៅក្នុងព្រៃអាម៉ាហ្សូន ជាមួយប្រវែង ៩ ម៉ែត្រ និងមានទម្ងន់ ៣៩៩ គីឡូក្រាម ៕

ប្រសិនបើលោកអ្នកមានបំណងចង់ទិញរថយន្តមួយទឹក ឬរថយន្តជជុះ ដែលជួយសន្សំសំចៃខ្ពស់ ដោយមិនចង់ទិញទៅខុស អ្នកចាំបាច់ត្រូវមើលពីសភាពម៉ាស៊ីន ជើងក្រោម ទឹកថ្នាំ និងឆែកមើលថាតើជារថយន្តកាត់ត ពីរបីកំណាត់ឬអត់។

ការទិញរថយន្តដំបូងក្នុងជីវិតរបស់អ្នកគឺជាបញ្ហាប្រឈមមួយ ដូច្នេះប្រសិនបើរថយន្តជជុះមានចំណុច ៥ នេះអ្នកត្រូវតែជៀសវាង និងមិនគួរទិញឡើយកុំឱ្យខាតលុយ ដែលចំណុចនោះរួមមាន៖

១.រថយន្តដែលលេងពណ៌៖ រថយន្តប្រើហើយដែលត្រូវបានលាបពណ៌ទាំងអស់ ឬផ្លាស់ប្តូរពណ៌ដើមរបសរថយន្ត គឺភាគច្រើនមានស្នាមឆ្កូត និងស្នាមប្រឡាក់តូចៗជាច្រើនកន្លែង ដោយសារតែរថយន្តមួយទឹកនេះបានឆ្លងកាត់ការបុកខ្លាំង ឬក្រឡាប់រហូតដល់ត្រូវលាបពណ៌រថយន្តទាំងមូល ទោះបីជាវាមានតម្លៃថោកប៉ុណ្ណាក៏ដោយ ក៏អ្នកមិនគួរទិញនិងត្រូវជៀសវាងបញ្ហានេះផងដែរ។

២.រថយន្តធ្លាប់ផ្លាស់ប្តូរគ្រឿងម៉ាស៊ីន៖ នៅក្នុងករណីនៃការទិញរថយន្តជជុះជាលើកដំបូង ជៀសវាងរថយន្តដែលបានផ្លាស់ប្តូរគ្រឿងម៉ាស៊ីន ព្រោះភាគច្រើនម្ចាស់ដើមប្រើរហូតដល់មានស្នាមជាំ និងកង្វះការថែទាំត្រឹមត្រូវ ដូច្នេះឡានបែបនេះមិនគួរប្រើទៀតទេ ដោយសារតែផលវិបាកអាចកើតឡើងនៅពេលក្រោយ។

៣.រថយន្តដែលមានជម្រើសច្រើនពេក៖ ជាការពិតណាស់ រថយន្តមានជម្រើសច្រើន វានឹងផ្តល់ភាពងាយស្រួលកាន់តែប្រសើរ ប៉ុន្តែទោះជាយ៉ាងណា ប្រសិនបើដល់ពេលជួសជុលវា? អ្នកក៏នឹងត្រូវប្រឈមមុខនឹងវិក័យប័ត្រជួសជុលថ្លៃជាងគេផងដែរ ឧទាហរណ៍ ជាមួយនឹងកៅអីអគ្គិសនីដ៏ប្រណិត ដែលអាចបណ្តាលឱ្យខូចខាតដល់ប្រអប់លេខ និងម៉ូទ័រនាពេលអនាគតជាដើម។

៤.រថយន្តមិនពេញនិយម៖ ប្រសិនបើអ្នកទិញរថយន្តជជុះដំបូង យល់ល្អអ្នកគួរទិញរថយន្តទាន់សម័យបន្តិច ព្រោះវាអាចជាការល្អប្រសើរក្នុងការជ្រើសរើសរថយន្តទីផ្សារពេញនិយមដោយសារវាមានគ្រឿងបន្លាស់គ្រប់គ្រាន់ងាយស្រួលជួសជុល និងអាចលក់បន្តទៀតបាន។ ទោះជាយ៉ាងណា ប្រសិនបើអ្នកទិញរថយន្តហួសសម័យ អ្នកត្រូវប្រឈមនឹងបញ្ហាពិបាករកគ្រឿងបន្លាស់ ជួសជុលថ្លៃ និងហាងជួសជុលមិនបានគ្រប់ជ្រុងជ្រោយ ព្រោះអ្នកបច្ចេកទេសមិនសូវជំនាញ ដោយគ្រឿងបន្លាស់ខ្លះអាចត្រូវរង់ចាំបញ្ជាទិញពីបរទេសច្រើនខែ ដែលនេះជាហេតុធ្វើឱ្យខ្ជះខ្ជាយពេលវេលា។

៥.រថយន្តដែលមានម៉ាស៊ីនធំ៖ ថ្វីត្បិតតែតម្លៃរថយន្តប្រើរួច ផ្តល់ភាពងាយស្រួលសម្រាប់អ្នកទិញក្នុងការធ្វើជាម្ចាស់រថយន្តម៉ូដែលធំក៏ដោយ ប៉ុន្តែប្រសិនបើអ្នកទិញវាជាឡានដំបូងរបស់អ្នកសម្រាប់ប្រើប្រាស់ប្រចាំថ្ងៃ អ្នកគួរតែជ្រើសរើសឡានដែលប្រើម៉ាស៊ីនតូចចាប់ពី ១.៥ លីត្រឡើងទៅ ឬអតិបរមាមិនគួរលើសពី ១.៨ លីត្រទេ ព្រោះម៉ាស៊ីនធំប្រេងកាន់តែច្រើនត្រូវបានខ្ជះខ្ជាយ។ ជាពិសេសរថយន្តដែលមានម៉ាស៊ីន ៦ ស៊ីឡាំង គួរចៀសវាងប្រសិនបើអ្នកមិនចង់ចំណាយលុយដោយសារតែថ្លៃសាំង ដូច្នេះមានន័យថា រថយន្តដែលមានម៉ាស៊ីនធំស៊ីសាំងខ្លាំងជាងរថយន្តដែលមានម៉ាស៊ីនតូច៕