ប្រទេសឥណ្ឌូនេស៊ីបានចាប់ផ្តើមដំណើរការមហិច្ឆតាដ៏ធំមួយគឺដើម្បីផ្តល់អាហារឥតគិតថ្លៃដល់សិស្សសាលាចំនួន ៨០ លាននាក់។ គំនិតផ្តួចផ្តើមនេះ ណែនាំដោយប្រធានាធិបតី Prabowo Subianto ក្នុងគោលបំណងប្រយុទ្ធប្រឆាំងនឹងជំងឺក្រិន ដែលបង្កឡើងដោយកង្វះអាហារូបត្ថម្ភដែលប៉ះពាល់ដល់ជិត ២០% នៃកុមារឥណ្ឌូនេស៊ីដែលមានអាយុក្រោម ៥ ឆ្នាំ និងធ្វើឱ្យសុខភាពទូទៅរបស់ពួកគេប្រសើរឡើង។

ទោះយ៉ាងណាក៏ដោយ កម្មវិធីនេះបានប្រឈមមុខនឹងឧបសគ្គមួយចំនួនចាប់តាំងពីការចាប់ផ្តើមដំណើរការមក។ បញ្ហាប្រឈមចម្បងមួយគឺសុវត្ថិភាពចំណីអាហារ ដោយថ្មីៗនេះ សិស្សជិត ៨០ នាក់នៅស្រុក Cianjur បានធ្លាក់ខ្លួនឈឺបន្ទាប់ពីទទួលទានអាហារដែលផ្តល់ដោយកម្មវិធីសាលា។ របាយការណ៍បានបង្ហាញថា សាច់មាន់ដែលហាន់រួចមានក្លិនមិនល្អ ដែលនាំឱ្យសិស្សមានរោគសញ្ញាដូចជាវិលមុខ និងចង់ក្អួតក្រោយបរិភោគរួច។ ឧបទ្ទវហេតុនេះគឺជាផ្នែកមួយនៃនិន្នាការដ៏គួរឱ្យព្រួយបារម្ភ ដោយមានករណីស្រដៀងគ្នានេះត្រូវបានរាយការណ៍នៅក្នុងខេត្តផ្សេងទៀត។ អាជ្ញាធរកំពុងស៊ើបអង្កេតរកមូលហេតុ ដោយផ្តោតលើការរៀបចំម្ហូបអាហារ និងស្តង់ដារអនាម័យ។ ឪពុកម្តាយសិស្សនៅតំបន់ដែលរងផលប៉ះពាល់បានចាប់ផ្តើមរៀបចំអាហារថ្ងៃត្រង់សម្រាប់កូនៗរបស់ពួកគេ ដោយសម្តែងការព្រួយបារម្ភអំពីគុណភាពនៃអាហារ។ នេះបើតាមការចុះផ្សាយរបស់គេហ័រទំព័រសារព័តមានបរទេស BBC។

កម្មវិធីនេះភ្ជាប់មកជាមួយតម្លៃដ៏ច្រើនសន្ធឹកសន្ធាប់ចំនួន ២៨ ពាន់លានដុល្លារ ដែលធ្វើឱ្យវាក្លាយជាគំនិតផ្តួចផ្តើមអាហារសាលាថ្លៃបំផុតមួយនៅទូទាំងពិភពលោក។ អ្នករិះគន់បានចោទជាសំណួរអំពីការបែងចែកធនធាននេះ ជាពិសេសបើប្រៀបធៀបទៅនឹងប្រទេសផ្សេងទៀតដូចជាប្រទេសឥណ្ឌា ដែលផ្តល់អាហារដល់កុមារចំនួន ១២០ លាននាក់ក្នុងចំណែកមួយនៃតម្លៃសរុបប៉ុណ្ណោះ។ ដើម្បីផ្តល់មូលនិធិដល់កម្មវិធីនេះ រដ្ឋាភិបាលបានកាត់បន្ថយថវិកាយ៉ាងច្រើន រួមទាំងការកាត់បន្ថយថវិកាអប់រំ និងអាហារូបករណ៍ផងដែរ។ ការសម្រេចចិត្តទាំងនេះបានបង្កឱ្យមានការតវ៉ា ដោយមានអ្នកខ្លះលើកឡើងថា កម្មវិធីផ្តល់អាហារឥតគិតថ្លៃនេះមានអទិភាពលើការអភិវឌ្ឍន៍ការសិក្សាទាំងមូលទៅទៀត។

អ្នកជំនាញបានរិះគន់កម្មវិធីនេះចំពោះការអនុវត្តប្រញាប់ប្រញាល់ពេក ដោយមិនយកចិត្តទុកដាក់រៀបចំផែនការឲ្យហ្មត់ចត់។ ការចោទប្រកាន់ពីការគ្រប់គ្រងមិនត្រឹមត្រូវ និងការក្លែងបន្លំមូលនិធិបានធ្វើឱ្យមានភាពស្មុគស្មាញបន្ថែមទៀតដល់ការដាក់ឲ្យប្រើប្រាស់នៃកម្មវិធីនេះ។ រដ្ឋាភិបាលបានសន្យាដោះស្រាយបញ្ហាទាំងនេះ ដោយមានផែនការពង្រឹងវិធានការសុវត្ថិភាពចំណីអាហារ និងធានាតម្លាភាពក្នុងការបញ្ចេញមូលនិធិ។

ខណៈពេលដែលប្រធានាធិបតី Prabowo នៅតែប្តេជ្ញាចិត្តចំពោះគំនិតផ្តួចផ្តើមនេះ ដោយសន្យាថានឹងដោះស្រាយបញ្ហាសុវត្ថិភាពចំណីអាហារ និងការពារមូលនិធិសាធារណៈ ភាពជោគជ័យរបស់កម្មវិធីគឺអាស្រ័យលើការយកឈ្នះលើបញ្ហាប្រឈមទាំងនេះ និងទទួលបានទំនុកចិត្តពីសាធារណៈជនឡើងវិញ។ គំនិតផ្តួចផ្តើមនេះបានទាក់ទាញទាំងការសរសើរ និងការរិះគន់ ដោយឆ្លុះបញ្ចាំងពីការពិតដ៏ស្មុគស្មាញនៃតុល្យភាពគោលដៅប្រកបដោយមហិច្ឆិតាជាមួយនឹងការអនុវត្តជាក់ស្តែង៕

ប្រទេសអូស្ត្រាលី ៖ ស្ត្រីម្នាក់រស់នៅរដ្ឋវេសស្ទឺន ប្រទេសអូស្ត្រាលី បានចំណាយពេល១៥ឆ្នាំ សន្សំតុក្កតាពណ៌លឿង Minions តូច-ធំដាក់ពេញផ្ទះ ស្មើនឹង១,០៣៥តុក្កតា រហូតដល់ Guinness World Records ចុះក្នុងកំណត់ត្រាពិភពលោកជាផ្លូវការ គឺជាស្ត្រីមានតុក្កតាច្រើនបំផុត ប្រចាំឆ្នាំ២០២៥ ។ អ្នកស្រីមិនបញ្ចប់ត្រឹមនេះទេ គឺអ្នកស្រីនឹងទិញតុក្កតាពណ៌លឿងបន្តបន្ទាប់ទៀតមកដាក់ក្នុងផ្ទះ ទោះជាកូនស្រីប្រាប់ថា គ្រប់គ្រាន់ក៏ដោយ ។

ស្ត្រីរូបនេះឈ្មោះ Liesl Benecke បាននិយាយមកកាន់ Guinness World Records ថា ៖ «ខ្ញុំបានលង់ស្រឡាញ់តុក្កតា Minions ភ្លាមៗ ក្រោយពីខ្ញុំទស្សនាភាពយន្តរឿង Despicable Me លើកដំបូង កាលពីឆ្នាំ២០១០ ។ តាំងពីពេលនោះមក ខ្ញុំក៏ចាប់ផ្តើមសន្សំតុក្កតាជាទីស្រឡាញ់របស់ខ្ញុំអស់រយៈពេល១៥ឆ្នាំ ។ ខ្ញុំអស់សំណើចយ៉ាងខ្លាំងជាមួយតុក្កតាដែលមានរូបរាងគួរឱ្យស្រឡាញ់ទាំងនេះ ។ ខ្ញុំជាក្មេងធាត់ម្នាក់ ហើយចាប់ផ្តើមប្រមូលតុក្កតា Minions ពីគ្រប់កន្លែងដែលខ្ញុំទៅ» ។

កូនស្រីប្រាប់ខ្ញុំថា នាងចង់បានផ្ទះមួយទៀតសម្រាប់ដាក់តុក្កតា Minions របស់ខ្ញុំ ។ ខ្ញុំសប្បាយចិត្តខ្លាំងណាស់ដែលមានតុក្កតាជាច្រើននៅក្បែរខ្លួន ព្រមទាំងឃើញស្នាមញញឹមយ៉ាងស្រស់ស្អាតពីពួកតុក្កតាខ្លួនលឿង ។ ទោះជាមនុស្សខ្លះមើលឃើញថា តុក្កតា Minions មានពណ៌លឿងដូចៗគ្នាទាំងអស់ ប៉ុន្តែក្នុងចំណោមនេះ ក៏មានតុក្កតាដែលអ្នកស្រី Benecke ចូលចិត្តខ្លាំងជាងគេ គឺតុក្កតា Stuart ដែលបានសម្តែងក្នុងភាពយន្ត គឺវាកំប្លែង ចូលចិត្តលេងសើច និងមានលក្ខណៈលេចធ្លោ គឺមានសក់ស្អាត ភ្នែកតែ១ ។

អ្នកស្រីស្រឡាញ់តុក្កតា Minions ខ្លាំងណាស់ ដល់ថ្នាក់សាក់រូបតុក្កតានៅលើដៃទៀតផង ហើយមានមនុស្សជាច្រើន ជាពិសេស ក្មេងៗបាននិយាយពីស្នាមសាក់តុក្កតានេះ អ្នកស្រីក៏ចាប់ផ្តើមជជែកពីក្តីស្រឡាញ់តុក្កតាជាមួយពួកគេ ។ អ្នកស្រីគ្មានថ្ងៃឈប់ទិញតុក្កតាទេ អ្នកស្រីនឹងទិញតុក្កតាឱ្យច្រើនថែមទៀតយកមកទុកក្នុងផ្ទះ ដើម្បីឱ្យក្លាយជាគ្រួសារតុក្កតាយ៉ាងធំ បើទោះជាកូនស្រីប្រាប់ថា តុក្កតាក្នុងផ្ទះគ្រប់គ្រាន់ហើយ គ្មានកន្លែងដាក់ទេ ប៉ុន្តែអ្នកស្រីបែរជាមានអារម្មណ៍ស្រឡាញ់ពួកវាកាន់តែខ្លាំង ។

ចំណែក Guinness World Records បញ្ជាក់ថា នៅឆ្នាំ២០២៥ អ្នកស្រី Benecke បានក្លាយជាម្ចាស់កំណត់ត្រាពិភពលោក ដែលបានប្រមូលតុក្កតាពណ៌លឿង Minions ច្រើនបំផុតសម្រាប់ទុកជាអនុស្សាវរីយ៍ ៕

សហរដ្ឋអាមេរិក ៖ ប្រធានាធិបតីអាមេរិក លោក Donald Trump លើកឡើងថា អាមេរិកបានចរចាពីវិធានការពន្ធទំនិញជាមួយចិនរួចហើយ ប៉ុន្តែរដ្ឋាភិបាលក្រុងប៉េកាំងបានបដិសេធនឹងការលើកឡើងនេះថា អាមេរិកពុំទាន់បានចរចាពាណិជ្ជកម្មជាមួយចិននៅឡើយទេ ។ តើអាមេរិកចរចាពាណិជ្ជកម្មពេលណា? ចរចាជាមួយអ្នកណា? ហេតុអ្វីចិនពុំដឹងរឿង? ចិនអំពាវនាវឱ្យអាមេរិកលុបចោលពន្ធទំនិញចិនទាំងអស់ ។ អាមេរិកពុំបានបញ្ជូនមន្ត្រីតំណាងក្រុងវ៉ាស៊ីនតោនមកចរចាទេ ស្របពេលប្រទេសទាំងពីរមានភាពតានតឹងសេដ្ឋកិច្ចយូរមកហើយ ។

លោក Trump បានថ្លែងក្នុងកិច្ចប្រជុំជាមួយនាយករដ្ឋមន្ត្រីន័រវេស នៅសេតវិមានថា ពួកយើងបានប្រជុំជាមួយចិនរួចហើយ កាលពីព្រឹកថ្ងៃទី២៥ ខែមេសា ឆ្នាំ២០២៥ ។ ប៉ុន្តែលោកពុំបង្ហាញមន្ត្រីតំណាងចិនទេ ដោយគ្រាន់តែបញ្ជាក់ថា អាចមានការបង្ហាញមន្ត្រីចិនពេលក្រោយ ហើយអាមេរិកពិតជាបានចរចាពាណិជ្ជកម្មជាមួយចិនមែន ។

ប៉ុន្តែក្រសួងពាណិជ្ជកម្មចិនបានបដិសេធនឹងការលើកឡើងរបស់លោក Trump ដោយមន្ត្រីនាំពាក្យក្រសួងពាណិជ្ជកម្មចិន លោក He Yadong និយាយថា ពេលនេះ អាមេរិកពុំទាន់ចរចាពាណិជ្ជកម្មជាមួយចិនទេ ។ រីឯសារព័ត៌មាននានាចុះផ្សាយពីការចរចារវាងប្រទេសទាំងពីរ គឺគ្រាន់តែជាការរំពឹងទុកប៉ុណ្ណោះ វាមិនពិតទេ ។ ចិននៅតែប្រកាន់គោលជំហរចរចាពាណិជ្ជកម្មជាមួយអាមេរិកដោយផ្អែកលើភាពស្មើគ្នា ។

ពាក្យចចាមអារ៉ាមការចរចាពាណិជ្ជកម្មរវាងប្រទេសទាំងពីរពុំពិតទេ អាមេរិកគួរបង្ហាញភាពស្មោះត្រង់ បើអាមេរិកចង់ឈានដល់ការធ្វើកិច្ចព្រមព្រៀងជាមួយចិន ។ អាមេរិកគួរស្តាប់សំឡេងសហគមន៍អន្តរជាតិ និងប្រទេសរបស់ខ្លួន ព្រមទាំងលុបចោលពន្ធទំនិញចិនទាំងអស់ ទើបអាចដោះស្រាយបញ្ហាបាន ។ នេះបើតាមលោក He Yadong ។

រហូតមកដល់ចុងខែមេសា ការចរចាពាណិជ្ជកម្មរវាងប្រទេសមហាអំណាចសេដ្ឋកិច្ចលើពិភពលោកទាំងពីរនៅតែពុំច្បាស់លាស់ ប៉ុន្តែវិនិយោគិនយល់ថា ការបង្ហាញអាកប្បកិរិយាវិជ្ជមានរបស់អាមេរិកអាចជួយកាត់បន្ថយក្តីបារម្ភ និងធ្វើឱ្យទីផ្សារភាគហ៊ុនទូទាំងពិភពលោក ចាប់ផ្តើមងើបឡើងវិញពីការខាតបង់នៅខែមេសា ។ លើសពីនេះ ក្រោយមានសេចក្តីរាយការណ៍ថា រដ្ឋាភិបាលលោក Trump បានពិចារណាកាត់បន្ថយពន្ធទំនិញចិន ចាប់ពី៥០% ទៅ៦៥% ។

លោក Trump បានសរសេរក្នុងបណ្តាញសង្គម Truth Social ថា ចិនពុំព្រមទទួលយកយន្តហោះ Boeing ហើយចិនបណ្តោយឱ្យថ្នាំញៀនហ្វេនតានីលចូលទឹកដីអាមេរិក តាមរយៈម៉ិកស៊ិក និងកាណាដា ។ លោកថែមទាំងអំពាវនាវឱ្យក្រុមហ៊ុន Boeing ចាត់វិធានការចិនតាមច្បាប់ ករណីចិនពុំព្រមទទួលយកយន្តហោះអាមេរិក Boeing និងពុំទូទាត់ថ្លៃយន្តហោះដែលចិនកុម្ម៉ង់ទិញ ហើយលោកដំឡើងពន្ធទំនិញចិន កាណាដា និងម៉ិកស៊ិក គឺដើម្បីដាក់សម្ពាធឱ្យមានការប្រែប្រួលពាណិជ្ជកម្ម និងគ្រប់គ្រងថ្នាំញៀន ។

ប្រធានាធិបតីអាមេរិកបានទាក់ទងជាមួយប្រធានាធិបតីចិន លោក ស៊ី ជិនពីង ជាច្រើនលើក ប៉ុន្តែលោក ស៊ី ពុំឆ្លើយតប ដោយសារចិនចង់ឱ្យអាមេរិកកំណត់លក្ខខណ្ឌឱ្យច្បាស់លាស់មុនពេលចរចា ព្រមទាំងគោរពចិន និងតែងតាំងមន្ត្រីតំណាងមកចរចាជាផ្លូវការ ។ ក្រៅពីនេះ ចិនចង់ឱ្យអាមេរិកប្រកាសគោលជំហរច្បាស់លាស់ចំពោះក្តីបារម្ភរបស់ចិន ដូចជា ៖ វិធានការដាក់ទណ្ឌកម្មរបស់អាមេរិក និងប្រធានបទតៃវ៉ាន់ ដែលចិននឹងបញ្ចូលតៃវ៉ាន់ជាទឹកដីរបស់ខ្លួន ទោះជាចិនត្រូវប្រើប្រាស់កម្លាំងទ័ពក្តី ៕

ទីក្រុងប៉េកាំង ៖ ក្រសួងពាណិជ្ជកម្មចិនបានចេញមកបដិសេដថា ស្ថានភាពសង្រ្គាមពាណិជ្ជកម្មនៅមិនទាន់មានភាពល្អប្រសើទេ ព្រោះនៅមិនទាន់មានការចរចាលើកិច្ចព្រមព្រៀងណាមួយឡើយ ហើយអ្វីដែលោក Trump បាននិយាយកាលពីដើមសប្ដាហ៍មុនថា “អ្វីគ្រប់យ៉ាងគឺសកម្ម” ដែលសំដៅលើការចរចារវាងចិន និងអាមេរិកនោះ គឺមិនមានមូលដ្ឋានច្បាស់លាស់នោះទេ។

កាលពីថ្ងៃព្រហស្បត្តិ៍ ទី២៤ ប្រទេសចិនបានធ្វើការច្រានចោលចំពោះការអះអាងរបស់ប្រធានាធិបតីអាមេរិកលោក Donald Trump ដែលថាភាគីទាំង២ បានចូលរួមក្នុងកិច្ចចរចាយ៉ាងសកម្មជុំវិញបញ្ហាពន្ធគយជាមួយគ្នា។ អ្នកនាំពាក្យក្រសួងពាណិជ្ជកម្មចិន លោក He Yadong បាននិយាយក្នុងសន្និសីទសារព័ត៌មានថា “តើមានការបញ្ជាក់ណាមួយដែរឬទេ អំពីវឌ្ឍនភាពនៃការចរចាពណិជ្ជកម្មរវាងចិន និងសហរដ្ឋអាមេរិក? ចម្លើយនោះគឺគ្មានមូលដ្ឋានច្បាស់លាស់ទេ”។ ប្រទេសចិនក៏បានបញ្ជាក់យ៉ាងច្បាស់ថា កិច្ចពិភាក្សាគួរតែពាក់ព័ន្ធនឹងការលុបចោលពន្ធគយទាំងអស់ដែលខ្លួនកំពុងប្រឈមមុខដាក់គ្នានាពេលនេះ។

ដោយឡែក រដ្ឋបាល Trump នៅថ្ងៃព្រហស្បតិ៍នេះបានបង្ហាញសញ្ញាចម្រុះ ដែលហាក់កំពុងព្រួយបារម្ភបន្ទាប់ពីអាជីវកម្ម និងចំនួននៃអ្នកប្រើប្រាស់ទំនិញចិននៅក្នុងប្រទេសអាមេរិកកើនឡើងខ្ពស់ ខណៈអាមេរិកបានតម្លើងពន្ធលើទំនិញចិនធ្វើឲ្យទំនិញទាំងនោះឡើងថ្លៃ ដែលអាចនាំឲ្យមានលំឳនសេដ្ឋកិច្ចនៅសហរដ្ឋអាមេរិក។

ជាក់ស្ដែងសម្រាប់ប្រទេសចិន បានចាត់វិធានការសងសឹកទៅកាន់សហរដ្ឋអាមេរិកវិញដោយការតម្លើងពន្ធនាំចូលពីអាមេរិកដូចគ្នា និងធ្វើការរឹតបន្តឹងការនាំចេញរ៉ែកម្រពីប្រទេសចិនដែលអាមេរិកត្រូវការចាំបាច់ ដែលកត្តានេះបានរាំងស្ទះដល់ខ្សែចង្វាក់ផលិតកម្មនៃបច្ចេកវិទ្យា និងឧបករណ៍អេឡិចត្រូនិចសំខាន់ៗរបស់អាមេរិក។

ចិនបាននៅតែប្រកាន់ជំហររឹងមាំដោយបញ្ជាក់ថា ៖ វិធានការតម្លើងពន្ធនេះ គឺសហរដ្ឋអាមេរិកជាអ្នកចាប់ផ្ដើមឡើង។ ដូច្នេះប្រសិនបើសហរដ្ឋអាមេរិកពិតជាចង់ដោះស្រាយបញ្ហាមែន វាគួរតែប្រឈមមុខនឹងសហគមន៍អន្តរជាតិ និងគ្រប់ភាគីទាំងអស់ ដើម្បីលុបចោលទាំងស្រុងនូវវិធានការពន្ធឯកតោភាគីប្រឆាំងនឹងប្រទេសជាច្រើន ជាពិសេសគឺចិន និងស្វែងរកវិធីដោះស្រាយតាមរយៈការសន្ទនាដោយស្មើភាព៕

ប្រទេសថៃ ៖ សារព័ត៌មានថៃរាយការណ៍ថា កាលពីវេលាម៉ោង៨និង១៥នាទីព្រឹកថ្ងៃទី២៥ ខែមេសា ឆ្នាំ២០២៥ យន្តហោះធុនតូចរបស់ស្នងការប៉ូលិសជាតិថៃបានធ្លាក់ចូលសមុទ្រ ប្រមាណ១០០ម៉ែត្រពីឆ្នេរ នៅខាងមុខសណ្ឋាគារ Baby Grand Hua Hin Hotel ក្នុងស្រុកឆៈអាំ ខេត្តផេជបុរី ដែលបណ្តាលឱ្យមនុស្ស៥នាក់ស្លា.ប់ក្នុងយន្តហោះ និងរងរបួសធ្ងន់ធ្ងរម្នាក់ស្លា.ប់នៅមន្ទីរពេទ្យ ។ នៅចំណុចយន្តហោះធ្លាក់នេះ គឺជាព្រំដែនជាប់គ្នារវាងខេត្តផេជបុរី និងខេត្តប្រាជួបស៊ិរីខាន់ ។

ភ្នាក់ងារសង្គ្រោះ និងមន្ត្រីពាក់ព័ន្ធត្រូវបានបញ្ជូនមកកាន់កន្លែងកើតហេតុភ្លាម! ក្រោយទទួលសេចក្តីរាយការណ៍ថា យន្តហោះរបស់ស្នងការប៉ូលិសជាតិថៃធ្លាក់ ។ បើតាមការត្រួតពិនិត្យបឋម គឺមនុស្សជិះលើយន្តហោះទាំងអស់ជាប៉ូលិសបានស្លាប់នៅកន្លែងកើតហេតុ៥នាក់ ហើយរបួសធ្ងន់ម្នាក់ស្លាប់ពេលបញ្ជូនមកដល់មន្ទីរពេទ្យ ។ អាជ្ញាធរសន្និដ្ឋានថា យន្តហោះបានហ្វឹកហាត់ហោះហើរ ប៉ុន្តែដោយសារបញ្ហាបច្ចេកទេស ទើបជួបគ្រោះថ្នាក់ ។

មន្ត្រីនាំពាក្យរបស់ស្នងការប៉ូលិសជាតិថៃ លោក អាសាយ៉ុន ក្រៃថង និយាយថា យន្តហោះនេះរបស់ស្នងការប៉ូលិសជាតិថៃ ដែលធ្លាក់ចូលសមុទ្រពេលកំពុងបំពេញភារកិច្ចត្រួតពិនិត្យការហោះហើរ ដើម្បីត្រៀមខ្លួនសម្រាប់ការលោតឆ័ត្រយោងនៅស្រុកហួហ៊ីន ខេត្តប្រាជួបស៊ិរីខាន់ ។ ស្នងការប៉ូលិសជាតិថៃកំពុងស៊ើបអង្កេតរកមូលហេតុបណ្តាលឱ្យយន្តហោះធ្លាក់ និងប្រមូលទិន្នន័យពីបំណែកយន្តហោះ., កាមេរ៉ាថតការហោះហើរ រួមទាំងទាក់ទងជាមួយភ្នាក់ងារពាក់ព័ន្ធផ្នែកអាកាសចរណ៍ដើម្បីរួមគ្នាត្រួតពិនិត្យយ៉ាងលម្អិត ។

ស្នងការប៉ូលិសជាតិថៃនឹងរៀបចំពិធីបុណ្យសពប៉ូលិសថៃទាំងអស់ឱ្យស័ក្តិសមនឹងកិត្តិយស ព្រមទាំងបង្កើនការស៊ើបអង្កេតរកការពិតដើម្បីការពារកុំឱ្យហេតុការណ៍នេះកើតឡើងម្តងទៀត ។ ស្នងការប៉ូលិសជាតិថៃបានបង្ហាញការសោកស្តាយយ៉ាងខ្លាំងចំពោះការបាត់បង់ជីវិតរបស់ប៉ូលិសគ្រប់រូបក្នុងហេតុការណ៍នេះ ខណៈហ្វេសប៊ុកផេកស្នងការប៉ូលិសជាតិថៃបានបង្ហោះកាន់ទុក្ខដល់ប៉ូលិសដែលស្លាប់គ្រប់រូប និងបង្ហាញការសោកស្តាយដល់គ្រួសារសាកសព ។

ចៅហ្វាយស្រុកហួហ៊ីន លោក ប្រាស៊ូត ហមបាន់ថើង ឱ្យដឹងថា យន្តហោះ១គ្រឿងនេះបានជួបគ្រោះថ្នាក់ ក្រោយពីពលរដ្ឋឮសំឡេងម៉ាស៊ីនយន្តហោះយ៉ាងខ្លាំងដូចគ្រាប់បែកផ្ទុះ ។ យន្តហោះព្យាយាមហោះត្រឡប់មកអាកាសយានដ្ឋានវិញ ប៉ុន្តែពុំអាចធ្វើបាន ទើបធ្លាក់ចូលសមុទ្រ ។

អគ្គបញ្ជាការស្នងការប៉ូលិសជាតិថៃបានធ្វើដំណើរតាមឧទ្ធម្ភាគចក្រពីទីក្រុងបាងកក ទៅកាន់ចំណុចកើតហេតុក្នុងខេត្តផេជបុរី ក្រោយទទួលដំណឹងយន្តហោះធ្លាក់ ។ ទិន្នន័យរបស់ស្នងការប៉ូលិសជាតិថៃបញ្ជាក់ថា វាជាយន្តហោះប្រភេទ DHC6-400 Twin Otter របស់ស្នងការប៉ូលិសជាតិថៃ ដែលចាប់ផ្តើមប្រតិបត្តិការតាំងពីឆ្នាំ២០២០ ។

យន្តហោះនេះសម្រាប់ប្រើប្រាស់ក្នុងភារកិច្ចជាច្រើន ដូចជា ៖ ដឹកជញ្ជូនកងកម្លាំងតាមអាកាស, ដឹកជញ្ជូនមនុស្សទៅមន្ទីរពេទ្យ, ដឹកជញ្ជូនឧបករណ៍, ស្វែងរក និងជួយសង្គ្រោះផ្សេងៗ ព្រមទាំងអាចដឹកមនុស្សច្រើនបំផុតចំនួន១៩នាក់ និងដាក់គ្រែពេទ្យបាន៤ ។ យន្តហោះនេះប្រចាំការនៅអាកាសចរណ៍ប៉ូលិសបរិវេណអាកាសយានដ្ឋានដនមឿង ទីក្រុងបាងកក ៕

ប្រទេសមីយ៉ាន់ម៉ា ៖ សារព័ត៌មានបរទេសរាយការណ៍ថា សមត្ថកិច្ចមីយ៉ាន់ម៉ាបានចា.ប់ខ្លួនលោក ចន ម៉ូថេ អាយុ២១ឆ្នាំ ជាគ្រូទាយតាម TikTok ដែលមានចំនួនតាមដានរហូតដល់ជាង៣សែននាក់ ក្រោយពីគ្រូទាយរូបនេះបង្ហោះវីដេអូការទាយរបស់ខ្លួនថ្ងៃទី៩ ខែមេសា ថា នឹងមានគ្រោះរញ្ជួយដីធ្ងន់ធ្ងរកើតឡើងជាថ្មីនៅប្រទេសមីយ៉ាន់ម៉ានៅថ្ងៃទី២១ ខែមេសា ដែលធ្វើឱ្យពលរដ្ឋមីយ៉ាន់ម៉ាភ័យខ្លាចពុំហ៊ាននៅក្នុងផ្ទះ ។

ក្រោយមីយ៉ាន់ម៉ាកើតគ្រោះរញ្ជួយដីធ្ងន់ធ្ងរកម្រិត៧.៧រិចទ័រ កាលពីថ្ងៃទី២៨ ខែមីនា ធ្វើឱ្យពលរដ្ឋមីយ៉ាន់ម៉ាស្លាប់ចំនួន៣,៧០០នាក់, ពលរដ្ឋជាង៦ម៉ឺននាក់បាត់បង់លំនៅឋាន និងបំផ្លាញវត្តអារ៉ាមមានអាយុកាលរាប់រយឆ្នាំ ។ លោក ចន ទាយថា នៅថ្ងៃទី២១ ខែមេសា នឹងមានរញ្ជួយដីធ្ងន់ធ្ងរកើតឡើងនៅមីយ៉ាន់ម៉ា និងមានកម្លាំងរំញ័រទៅទីក្រុងទាំងអស់ មនុស្សម្នាពុំគួរនៅលើអគារខ្ពស់ទេ គួរដាក់របស់សំខាន់តាមខ្លួន និងរត់ចេញពីអគារពេលរញ្ជួយដី ។ វីដេអូរបស់លោកមានចំនួនទស្សនាជាង៣លាន៣សែននាក់ ប៉ុន្តែអ្នកជំនាញពុំអាចប៉ាន់ស្មានពីរញ្ជួយដី ដោយសារមានកត្តាស្មុគស្មាញពាក់ព័ន្ធនឹងគ្រោះមហន្តរាយនេះ ។

ពលរដ្ឋជាច្រើនរស់នៅទីក្រុងយ៉ាំងហ្គន បានជឿជាក់លើការទស្សន៍ទាយរបស់គ្រូទាយតាម TikTok ហើយនៅថ្ងៃទី២១ ខែមេសា ពួកគេពុំហ៊ាននៅក្នុងផ្ទះទេ ដោយនាំគ្នាបោះតង់នៅក្រៅផ្ទះ ក្រោយពីលោក ចន ប្រាប់ថា គឺទាយតាមក្បួនហោរាសាស្ត្រ និងមើលបាតដៃ ។

សេចក្តីថ្លែងការណ៍របស់រដ្ឋាភិបាលយោធាមីយ៉ាន់ម៉ាបញ្ជាក់ថា ៖ «ការផ្សព្វផ្សាយព័ត៌មានក្លែងក្លាយក្នុង TikTok ថា នឹងកើតរញ្ជួយដីធ្ងន់ធ្ងរ យើងនឹងចាប់ខ្លួនបុគ្គលនេះយើងនឹងចាត់វិធានការតាមច្បាប់ពាក់ព័ន្ធនឹងការសរសេរ ផ្សព្វផ្សាយ ឬចែកចាយព័ត៌មានមិនពិត» ។ សមត្ថកិច្ចបានចាប់ខ្លួនគ្រូទាយតាម TikTok ក្នុងលំនៅឋាននៅទីក្រុងសាកាយ កាលពីថ្ងៃទី២២ ខែមេសា ករណីផ្សាយព័ត៌មានមិនពិតដោយចេតនា និងធ្វើឱ្យពលរដ្ឋមីយ៉ាន់ម៉ាភ័យខ្លាច ។

គណនី TikTok របស់លោក ចន បានបង្ហោះវីដេអូការទស្សន៍ទាយពីហេតុការណ៍ផ្សេងៗ រួមទាំងគ្រោះមហន្តរាយធម្មជាតិ និងវីដេអូការដោះលែងលោកស្រី អង់សានស៊ូជី អតីតមេដឹកនាំរដ្ឋាភិបាលមីយ៉ាន់ម៉ា ដែលត្រូវបណ្តេញចេញពីអំណាចដោយរដ្ឋប្រហារយោធាកាលពីឆ្នាំ២០២១ ។

គួរបញ្ជាក់ថា ទីក្រុងម៉ាន់ដាឡៃ និងទីក្រុងសាកាយ បានរងផលប៉ះពាល់យ៉ាងធ្ងន់ធ្ងរដោយសាររញ្ជួយដីកាលពីថ្ងៃទី២៨ ខែមីនា ដែលធ្វើឱ្យរដ្ឋាភិបាលយោធាមីយ៉ាន់ម៉ាប្រកាសស្នើសុំជំនួយពីបរទេស ៕