បរទេស ៖ មានការបែ..កធ្លាយ និងនិយាយដល់ជាបន្តបន្ទាប់ពាក់ព័ន្ធនឹងប្រធានបទ កាបូបប្រណីតរបស់ប្រេនលំដាប់ពិភពលោកជាង 80% គឺផលិតនៅក្នុងប្រទេសចិន ហើយនាំចូលទីកាន់ប្រទេសនៅអឺរ៉ុបដើម្បីវាយស្លាកថាផលិតនៅប្រទេសទាំងនោះ និងដាក់លក់ក្នុងតម្លៃថ្លៃកប់ពពកទៅកាន់អតិថិជន។

នៅលើបណ្ដាញសង្គមTiktokមួយរយៈចុងក្រោយនេះ មានការផ្ទុះខ្លាំងពាក់ព័ន្ធនឹងការចោទប្រកាន់យីហោល្បីៗលំដាប់ពិភពលោកដូចជា Hermes, Chanel, Louis Vuitton និងប្រេនជាច្រើនទៀត ថាបានបោកប្រាស់អតិថិជន ដោយការដាក់លក់កាបូបក្នុងតម្លៃខ្ពស់ខ្លាំង ទាំងដែលជាក់ស្ដែងវត្ថុធាតុដើម និងការផលិតគឺធ្វើនៅក្នុងប្រទេសចិន និងមិនសាកសមនឹងតម្លៃនោះឡើយ។

ការចោទប្រកាន់នេះត្រូវបានធ្វើឡើងបន្ទាប់ពីមានម្ចាស់គណនីTikTok ម្នាក់បានចេញមុខមកអះអាងថា គាត់គឺជាអ្នកធ្វើការនៅក្នងរោងចក្រមួយក្នុងប្រទេសចិន ដែលផលិតនិងតម្លើងកាបូបប្រណីតឲ្យម៉ាកយីហោល្បីៗ និងបញ្ជូនទៅលក់នៅប្រទេសក្នុងប៉ែកអឺរ៉ុបដូចជា អាមេរិក អ៊ីតាលី និងបារាំងជាដើម។

បន្ទាប់មកក៏មានអ្នកចេញមកនិយាយជាបន្តបន្ទាប់ពីរឿងនេះ ដោយលើកឡើហស្រដៀងៗគ្នាថា ៖ ភាគច្រើននៃទំនិញប្រណីតៗរបស់ប្រេនធំៗដែលដាក់លក់នៅតាមបណ្ដារប្រទេសនៅអឺរ៉ុប រួមទាំងសហរដ្ឋអាមេរិក បានតម្លើងស្ទើរួចរាល់នៅក្នុងរោងចក្រប្រទេសចិន បន្ទាប់មកទើបបញ្ជូនចេញទៅប្រទេសទាំងនោះធ្វើការវេចខ្ចប់សារជាថ្មី និងធ្វើការវាយតែមLogoរបស់ពួកគេ។ អ្នកផលិតមាតិកានៅក្នុងTikTok ទាំងនោះថែមទាំងបានណែនាំទៅកាន់អ្នកនិយមទិញកាបូបប្រេនៗទាំងអស់ថា៖ យល់ល្អអ្នកគួរតែស្វែងរកទិញវានៅលើគេហទំព័រទំនិញចិន ឬមកទិញនៅចិនផ្ទាល់តែម្ដងទៅ ព្រោះថាទំនិញទាំងនេះមានការផលិត និងប្រើប្រាស់វត្ថុធាតុដើមដូចគ្នាទេ ខុសគ្នាតែមួយមុខគត់ នោះគឺ “តម្លៃ”។

ក្រោយមកមានមនុស្សជាច្រើន ដែលជាអតិថិជនរបស់ប្រេនល្បីៗទាំងនោះ បានស្នើសុំឲ្យមានការបកស្រាយពីក្រុមហ៊ុនថាតើវាជាការពិតដែរ ឬក៏អត់ ព្រោះថាបើវាជាការពិតនោះ ពួកគេមានការខកចិត្តខ្លាំងណាស់។ ក្នុងន័យនេះ ពួកគេមិនមែនចង់ថាទំនិញដែលផលិតនោប្រទេសចិនមានគុណភាពអន់នោះទេ ប៉ុន្តែគេចង់សំដៅដល់ការដែលប្រើប្រាស់វត្ថុធាតុដើមរបស់ចិនគឺមានតម្លៃសមរម្យ ហើយបើផលិតនៅចិននោះថ្លៃកម្លាំងពលកម្មរបស់កម្មករទាំងនោះ ក៏មិនបានខ្ពស់ដែរ ដូច្នេះប្រសិនបើពួកគេយកមកលក់ដោយដាក់តម្លៃក្នុងកាបូបមួយរាប់ពាន់ រាប់ម៉ឺនដុល្លាបែបនេះវាមិនសមហេតុផលឡើយ។ យ៉ាងណាមិញគេនៅមិនទាន់ឃើញមានប្រេនធំៗណាមួយបានចេញមកបកស្រាយចំពោះការចោទប្រកាន់នេះឡើយទេ ដោយវានៅតែស្ថិតនៅក្នុងមន្ទិលសង្ស័យរបស់មនុស្សជាច្រើនដដែល៕

រដ្ឋអូហាយ៉ូ ៖ វគ្គបណ្ដុះបណ្ដាលពាក់ព័ន្ធនឹកការគេងឲ្យបានត្រឹមត្រូវមិនមែនអនុវត្តសម្រាប់តែទារកនោះទេ ថ្មីៗនេះនៅរដ្ឋអូហាយ៉ូ នៅតាមសាលារៀនមួយចំនួនបានបន្ថែមម៉ោងថ្មីដែលបង្រៀនសិស្សក្នុងការគេងឲ្យបានលក់ស្កប់ស្កល់ជាមួយនឹងគ្រូជំនាញ ជាពិសេសគេផ្ដោតសំខាន់ទៅលើសិស្សវ័យជំទង់។

វគ្គសិក្សាថ្មីនេះ ត្រូវបានលើកឡើងនៅវិទ្យាល័យ Mansfield Senior High School គឺជាប្រធានបទមួយដែលក្មេងជំទង់ទូទាំងប្រទេសកំពុងមានបញ្ហាជាមួយ “ ការគេង ” ដោយភាគច្រើននៃក្មេងជំទង់ទាំងនោះ មិនអាចចូលគេងដោយងាយៗឡើយ។ សិស្សថ្នាក់ទី៩ម្នាក់បាននិយាយថា ៖ ជារៀងរាល់យប់គេត្រូវការមើលTikTok និងអូសមើលរហូតដល់គេគេងលក់តែម្ដង។ ដោយឡែក មានសិស្សម្នាក់ទៀតលើកឡើងថា៖ នាងតែងតែគេងលក់ខណៈពេលកំពុងជជែកគ្នាលេងជាមួយមិត្តភក្តិនៅក្នុង Group Chat ពេលយប់ជ្រៅ ។

គ្រូបង្រៀនពីសុខភាពនៅ Mansfield លោក Tony Davis ដែលបានដាក់បញ្ចូលកម្មវិធីសិក្សាថ្មីអំពីដំណេកនៅក្នុងថ្នាក់សុខភាពវិទ្យាល័យបាននិយាយថា “វាប្រហែលជាស្ដាប់ទៅរៀងចម្លែកបន្តិចក្នុងការនិយាយថាក្មេងៗនៅវិទ្យាល័យត្រូវតែរៀនជំនាញក្នុងការគេង ប៉ុន្តែអ្នកនឹងភ្ញាក់ផ្អើលបន្ទាប់ពីដឹងថាមានមនុស្សប៉ុន្មាននាក់ដែលមិនដឹងថាត្រូវគេងយ៉ាងម៉េច”។

សាស្ត្រាចារ្យជាន់ខ្ពស់នៅសាលា Stanford Graduate School of Education និងអ្នកជំនាញជាច្រើន បានណែនាំទៅកាន់អាណាព្យាបាលអំពីសារៈសំខាន់នៃការគេងបានគ្រប់គ្រាន់របស់ក្មេងជំទង់។ ការគេងគឺទាក់ទងដោយផ្ទាល់ជាមួយសុខភាពផ្លូវចិត្ត ដោយក្មេងជំទង់ត្រូវការការគេងពី 8 ទៅ 10 ម៉ោងជារៀងរាល់យប់សម្រាប់ខួរក្បាល និងរាងកាយដែលកំពុងលូតលាស់របស់ពួកគេ ប៉ុន្តែស្ទើរតែ 80% នៃក្មេងជំទង់ទាំងនោះគឺគេងបានតិចជាងនេះ។

ការស្រាវជ្រាវបង្ហាញថា ការគេងមិនគ្រប់គ្រាន់ផ្សាភ្ជាប់ដោយផ្ទាល់ជាមួយអារម្មណ៍ សុខភាព និងស្មារតីផ្លូវចិត្ត។ បច្ចុប្បន្នក្មេងៗវ័យជំទង់ជាច្រើនកំពុងជួបប្រទះនឹងការធ្លាក់ទឹកចិត្ត ការថប់បារម្ភ និងការគិតច្រើន និងចង់ធ្វើអ..ត្តឃា..ត។ ដែលកត្តាទាំងអស់នេះអាចបណ្ដាលមកពីការរីកចម្រើននៃបច្ចេកវិទ្យា កម្សោយក្នុងការគ្រប់គ្រងរបស់ឪពុកម្ដាយ រួមទាំងកត្តាសង្គមមួយចំនួនទៀត។

មូលហេតុទាំងនេះហើយ ទើបធ្វើឲ្យតាមបណ្ដារសាលារៀនមួយចំនួន ជាពិសេសក្នុងរដ្ឋOhio សហរដ្ឋអាមេរិក សម្រេចបន្ថែមម៉ោងសិក្សាថ្មីនេះ ដើម្បីឲ្យកុមារយល់ដឹងពីសារសំខាន់ក្នុងការគេង របៀបចូលគេងឲ្យបានត្រឹមត្រូវ។ ក្រៅពីរដ្ឋOhio ក៏មានសាលានៅរដ្ឋផ្សេងទៀតដូចជា Mennesota ក៏កំពុងសាកល្បងកម្មវិធីសិក្សាថ្មីនេះ ដើម្បីជួយសិស្សឲ្យបានសម្រាកគ្រប់គ្រាន់ កាត់បន្ថយអវត្តមាន សិស្សមានស្មារតីរឹងមាំ និងបង្កើនលទ្ធផលសិក្សា៕

ប្រទេសចិន ៖ ក្នុងការអភិវឌ្ឍន៍ដ៏ជឿនលឿន និងឆាប់រហ័ស នាពេលថ្មីៗនេះប្រទេសចិនបានដាក់ដំណើរការនូវបណ្ដាញអ៊ីនធើណេតល្បឿនលឿនបំផុត ជាប្រភេទបណ្ដាញអ៊ីនធើណេតពាណិជ្ជកម្ម (Commercial Network) ដែលធ្វើឲ្យប្រទេសនេះក្លាយជាប្រទេសដំបូងគេបង្អស់ដែលមានអ៊ីនធើណេតល្បឿនរហូតដល់ 10GB។

របកគំហើញនេះត្រូវបានធ្វើឡើងដោយក្រុមហ៊ុន Huawei និង China Unicom បានចាប់ផ្តើមបង្កើតរួមគ្នានូវបណ្តាញអ៊ីនធឺណេត 10GB ដំបូងបង្អស់នៅក្នុងខោនធី Sunan ដែលមានទីតាំងនៅក្នុងខេត្ត Hebei ប្រទេសចិន នេះបើតាមការរាយការណ៍របស់ Azernews ដោយដកស្រង់ចេញពីគេហទំព័របច្ចេកវិទ្យាក្នុងស្រុក Mydrivers ។

បណ្តាញនេះប្រើប្រាស់បច្ចេកវិទ្យា 50G Passive Optical Network (PON) ដែលមានល្បឿនទាញយកជិត 10GB ពោលគឺ 9,834 Mbps និងល្បឿន Upload រហូតដល់ 1,008 Mbps ដែលវាមានល្បឿនលឿនខ្លាំងជាងបណ្ដាញអ៊ីនធើណេតទូទៅ។

ល្បឿននេះអនុញ្ញាតអោយអ្នកប្រើប្រាស់អាច Download ភាពយន្តកម្រិត 4K ដែលមានទំហំ 20G ក្នុងរយៈពេលតឺជាង ២០វីនាទីប៉ុណ្ណោះ ។ អ្វីដែលរឹតតែអស្ចារ្យសម្រាប់បច្ចេកវិទ្យាមួយននេះ គឺវាត្រូវបានបង្កើតឡើងជាពិសេសសម្រាប់តម្រូវការប្រើប្រាស់លើវិស័យ Livestream, Gaming , ឧបករណ៍ VR/AR, បច្ចេកវិទ្យា Cloud និងប្រព័ន្ធអេកូឡូស៊ី។

ចំពោះការដាក់ឱ្យដំណើរការដំបូងនេះ គឺការសាកល្បងដែលគ្របដណ្តប់លើទីតាំងមួយចំនួននៅក្នុងប្រទេសចិនរួមមាន៖ Huawancheng Park និង Xiong’an High-Tech Zone។ ហើយសម្រាប់ Xiong’an គឺជាទីក្រុងអនាគត ដែលគេបានកំណត់សម្រាប់ការធ្វើតេស្តបច្ចេកវិទ្យាកម្រិតខ្ពស់។ លើសពីនេះ រដ្ឋាភិបាលគ្រោងនឹងពង្រីកបណ្តាញ 10G ទៅកាន់ទីក្រុងធំៗផ្សេងទៀតដូចជា ប៉េកាំង សិនជិន សៀងហៃ និងក្វាងចូវ ប្រសិនបើមានតម្រូវការច្រើននៃអ្នកប្រើប្រាស់។

ប្រទេសចិនឈានមុខគេនៃបច្ចេកវិទ្យា broadband សកល តាមរយៈការសាក់ប្រើប្រាស់សាកល្បងនេះ ដោយវ៉ាដាច់ប្រទេសផ្សេងទៀតដូចជា កូរ៉េខាងត្បូង អារ៉ាប់រួម និងកាតា ដែលសុទ្ធតែជាប្រទេសមានកម្រិតអ៊ីនធឺណេតកម្រិតខ្ពស់។ ហើយចិនថែមទាំងបានសន្យាថា នឹងផ្តល់សេវាអ៊ីនធើណេតដែលលឿនបំផុត និងអនុញ្ញាតឱ្យមានយុគសម័យថ្មីនៃកម្មវិធីឌីជីថលសម្រាប់អ្នកប្រើប្រាស់ និងឧស្សាហកម្មនានា៕

ក្រុមហ៊ុន Apple គ្រោងផ្លាស់ប្តូរទីតាំងផលិតទូរស័ព្ទ iPhone សម្រាប់លក់នៅអាមេរិក ចេញពីប្រទេសចិនទៅឥណ្ឌាវិញ ដើម្បីគេចពីការបង់ពន្ធទំនិញខ្ពស់របស់ប្រធានាធិបតីអាមេរិក លោក Donald Trump ស្របពេលភាពតានតឹងពាណិជ្ជកម្មរវាងអាមេរិក និងចិនកាន់តែរាលដាលខ្លាំង ។ នេះបើតាមការចុះផ្សាយរបស់សារព័ត៌មានបរទេស នៅថ្ងៃទី២៦ ខែមេសា ឆ្នាំ២០២៥ ។

កាលពីដើមខែមេសា ឆ្នាំ២០២៥ ប្រធានាធិបតីអាមេរិក លោក Donald Trump បានដំឡើងពន្ធទំនិញប្រទេសនានាធ្វើឱ្យភ្ញាក់ផ្អើលពេញពិភពលោក ជាពិសេស លោកដំឡើងពន្ធទំនិញចិនខ្ពស់រហូតដល់១៤៥% ។ លោកអះអាងថា ការដំឡើងពន្ធទំនិញនាំចូលខ្ពស់នឹងជួយដល់ការផលិតទំនិញក្នុងស្រុករបស់ក្រុមហ៊ុនអាមេរិក និងដោះស្រាយបញ្ហាអតុល្យភាពពាណិជ្ជកម្ម ។ ប៉ុន្តែវាបែរជាធ្វើឱ្យចិនដំឡើងពន្ធទំនិញអាមេរិកវិញ ព្រមទាំងរឹតបន្តឹងការនាំចេញទំនិញនានាពីប្រទេសចិន ។

បន្ទាប់មក មន្ត្រីគយអាមេរិកបានបង្ហាញឈ្មោះទំនិញផ្សេងៗដែលអាមេរិកដាក់ពន្ធត្រឹម២០% រួមមាន ៖ កុំព្យូទ័រ លេបថប ស្មាតហ្វូន និងឧបករណ៍បច្ចេកវិទ្យាមួយចំនួន ដើម្បីឱ្យក្រុមហ៊ុនអាមេរិកដែលផលិតទំនិញនៅក្រៅប្រទេស មានពេលវេលាគ្រប់គ្រាន់ក្នុងការផ្លាស់ប្តូរទីតាំងផលិតមកអាមេរិក ។

តាមប្រភពច្បាស់ការណ៍ឱ្យដឹងថា Apple គឺជាក្រុមហ៊ុនអាមេរិក ពុំបានផ្លាស់ប្តូរទីតាំងផលិតទូរស័ព្ទ iPhone មកអាមេរិកទេ ប៉ុន្តែក្រុមហ៊ុននឹងប្តូរទីតាំងផលិតទូរស័ព្ទ iPhone ចេញពីចិនទៅឥណ្ឌា នាចុងឆ្នាំ២០២៦ ដើម្បីគេចពីការដំឡើងពន្ធទំនិញរបស់លោក Trump ។ ក្នុង១ឆ្នាំៗ Apple បានផលិត iPhone រហូតដល់ជាង៦០លានគ្រឿង សម្រាប់លក់ឱ្យអាមេរិក បើទោះជា Apple ផ្លាស់ប្តូរទីតាំងផលិតទៅឥណ្ឌា ប៉ុន្តែចិននៅតែជាមជ្ឈមណ្ឌលសម្រាប់ការផលិត iPhone នាំមុខសម្រាប់លក់ទៅប្រទេសនានា ។

ក្រុមហ៊ុន Apple ចំណាយប្រាក់យ៉ាងច្រើនមហាសាលវិនិយោគនៅចិនក្នុងរយៈពេលជិត២ទសវត្សរ៍កន្លងមក ហើយការផ្លាស់ប្តូរទីតាំងផលិត iPhone ទៅឥណ្ឌា បង្ហាញថា Apple ចង់គេចពីការដំឡើងទំនិញចិនខ្ពស់ ខណៈលោក Trump បានដាក់ពន្ធទំនិញផលិតនៅឥណ្ឌា ត្រឹមតែ១០% ប៉ុណ្ណោះ ។ កាលពីខែកញ្ញា ឆ្នាំ២០២៤ ទូរស័ព្ទ iPhone ថោកជាងគេមានតម្លៃត្រឹមតែ៧៩៩ដុល្លារ ប៉ុន្តែបច្ចុប្បន្ន វាកើនឡើងរហូតដល់៤៣% មកស្មើនឹង១,១៤២ដុល្លារ ដោយសារការដំឡើងពន្ធទំនិញ ។

ប្រធានាធិបតីអាមេរិក លោក Trump ចង់ឱ្យក្រុមហ៊ុន Apple ផ្លាស់ប្តូរទីតាំងផលិតទូរស័ព្ទ iPhone ពីចិនមកអាមេរិកវិញ ពីព្រោះនៅអាមេរិកមានកម្លាំងពលកម្ម និងធនធានលើសលប់ ប៉ុន្តែនាយកក្រុមហ៊ុន Apple លោក Tim Cook បានបដិសេធថា វាពុំអាចទៅរួចទេ ដែលឱ្យក្រុមហ៊ុន Apple ផលិតទូរស័ព្ទ iPhone នៅអាមេរិក ពីព្រោះចិនសម្បូរអ្នកជំនាញជាងអាមេរិក ។ ពេលលោក Trump ដំឡើងពន្ធទំនិញចិនខ្ពស់ ក្រុមហ៊ុន Apple នៅតែបដិសេធប្តូរទីតាំងផលិតទូរស័ព្ទមកអាមេរិក បែរជាប្តូរទៅឥណ្ឌា ៕