នៅក្នុងសកម្មភាពដែលបង្ហាញពីការមិនទុកចិត្តគ្នា និងភាពតានតឹងផ្នែកនយោបាយ រដ្ឋាភិបាលអាមេរិកបានហាមឃាត់បុគ្គលិករបស់ខ្លួនដែលឈរជើងនៅក្នុងប្រទេសចិនមិនឱ្យមានទំនាក់ទំនងស្នេហាជាមួយជនជាតិចិន។ ការណែនាំនេះត្រូវបានអនុវត្តនៅក្នុងខែមករាឆ្នាំ 2025 ដោយឯកអគ្គរដ្ឋទូតសហរដ្ឋអាមេរិកលោក Nicholas Burns នៅមុនពេលដែលគាត់ចាកចេញពីតួនាទី។ នេះបើតាមចុះផ្សាយរបស់សារព័ត័មានបរទេស Bangkok Post។

ការរឹតបន្តឹងនេះអនុវត្តយ៉ាងទូលំទូលាយចំពោះបុគ្គលិករដ្ឋាភិបាលអាមេរិកដែលបានប្រកាសនៅទូទាំងប្រទេសចិនដីគោក រួមទាំងស្ថានកុងស៊ុលធំៗដូចជាទីក្រុងប៉េកាំង ក្វាងចូវ សៀងហៃ សេនយ៉ាង និងវូហាន ក៏ដូចជាដែនដីពាក់កណ្តាលស្វយ័តរបស់ទីក្រុងហុងកុងផងដែរ។ គោលការណ៍នេះមិនត្រឹមតែអនុវត្តចំពោះបុគ្គលិករដ្ឋាភិបាលអាមេរិកដែលឈរជើងនៅក្នុងប្រទេសចិនប៉ុណ្ណោះទេ ប៉ុន្តែថែមទាំងចំពោះសមាជិកគ្រួសារ និងបុគ្គលផ្សេងៗដែលធ្វើការជាមួយរដ្ឋាភិបាលនិងមានសិទ្ធិទទួលបានព័ត៌មានសម្ងាត់ ផងដែរ។

ច្បាប់នេះបានធ្វើឲ្យមានការព្រួយបារម្ភកាន់តែខ្លាំងឡើងរបស់ក្រុងវ៉ាស៊ីនតោនអំពីសន្តិសុខជាតិ ខណៈដែលទំនាក់ទំនងរវាងសហរដ្ឋអាមេរិក និងចិនបន្តកាន់តែយ៉ាប់យ៉ឺនលើបញ្ហាដូចជាជម្លោះពាណិជ្ជកម្ម និងឥទ្ធិពលសកលលោក។ សហរដ្ឋអាមេរិកបានអនុវត្តគោលនយោបាយនេះជាមធ្យោបាយមួយដើម្បីគ្រប់គ្រង ឬដោះស្រាយបញ្ហាប្រឈមដែលកំពុងកើនឡើងនៅក្នុងទំនាក់ទំនងរបស់ខ្លួនជាមួយប្រទេសចិន។ នៅពេលដែលភាពតានតឹងផ្នែកការទូតកើនឡើង សហរដ្ឋអាមេរិកមើលឃើញថាការរឹតបន្តឹងនេះអាចជាវិធានការបង្ការដែលមានគោលបំណងជៀសវាងផលវិបាក ឬហានិភ័យបន្ថែមទៀតនៅក្នុងការដោះស្រាយរបស់ខ្លួនជាមួយទីក្រុងប៉េកាំង។

បច្ចុប្បន្ននេះ ទាំងក្រសួងការបរទេសចិន និងស្ថានទូតអាមេរិកប្រចាំប្រទេសចិន គ្មានភាគីណាបានបញ្ចេញមតិទាក់ទងនឹងការអនុវត្តបម្រាមនេះទេ។ គោលនយោបាយនេះបន្ថែមភាពស្មុគស្មាញដែលមានស្រាប់មួយទៀតនៅក្នុងទំនាក់ទំនងដ៏តានតឹងរវាងមហាអំណាចពិភពលោកទាំងពីរ៕

ផ្សារទំនើបឌូបៃ មានទីតាំងនៅកណ្តាលទីក្រុងឌូបៃ ឈរជាផ្សារទំនើបដ៏ធំបំផុតរបស់ពិភពលោក ដែលផ្តល់ជូននូវការលាយបញ្ចូលគ្នានៃប្រណីតភាព រចនាប័ទ្ម និងការកម្សាន្តជាច្រើន។ ជាមួយនឹងហាងលក់រាយរាប់ពាន់ ជម្រើសអាហារ និងការកម្សាន្តដ៏គួរឱ្យចាប់អារម្មណ៍ ដែលបានទាក់ទាញភ្ញៀវជាតិ និងអន្តរជាតិរាប់លាននាក់ជារៀងរាល់ឆ្នាំ។ ផ្សារទំនើបឌូបៃ គ្របដណ្តប់លើផ្ទៃដីសរុបប្រហែល ១.១ លានម៉ែត្រការ៉េ ដែលស្មើនឹងទីលានបាល់ទាត់ប្រហែល ២០០។ ផ្ទៃខាងក្នុងរបស់វាមានទំហំរហូតដល់ ៥៥០,០០០ម៉ែត្រការ៉េ ជាមួយនឹងទំហំកន្លែងលក់រាយដល់ទៅ ៣៥០,០០០ ម៉ែត្រការ៉េ។

ផ្សារទំនើបនេះមានហាងលក់រាយជាង ១,២០០ហាង ដែលបង្ហាញពីការលាយបញ្ចូលគ្នានៃម៉ាកប្រណីតលំដាប់ខ្ពស់ ម៉ូដទាន់សម័យ និងហាងពិសេសៗ។ វាបំពេញតាមគ្រប់តម្រូវការ និងចំណូលចិត្តរបស់អ្នក មិនថាអ្នកស្វែងរក សម្លៀកបំពាក់ទាន់សម័យ ឬរចនាប័ទ្មដ៏កម្រនោះទេ។ Dubai Mall ក៏ជាមជ្ឈមណ្ឌលកម្សាន្តផងដែរដូចជា Dubai Aquarium & Underwater Zoo ផ្តល់នូវការជម្រកដ៏អស្ចារ្យរបស់ជីវិតសត្វសមុទ្រ រួមទាំងត្រីឆ្លាម និងត្រីរ៉េផងដែរ ខណៈពេលដែល VR Park ដែលជាជាមជ្ឈមណ្ឌលកម្សាន្តនិម្មិតដែលទំនើបទាន់សម័យ បានទាក់ទាញអ្នកទស្សនាក្នុងការផ្សងព្រេងជាមួយកម្មវិធីនិម្មិតដ៏គួរឱ្យរំភើបជាច្រើន។ កន្លែងជិះស្គីទឹកកកឌូបៃដែលមានទំហំធំខ្នាតអូឡាំពិក សាកសមបំផុតមិនថាអ្នកចាប់ផ្តើមដំបូង ឬជាអ្នកជិះស្គីជំនាញនោះទេ។

នៅជាប់នឹងផ្សារទំនើបគឺអគារ Burj Khalifa ដែលជាអគារខ្ពស់ជាងគេក្នុងពិភពលោក បានផ្តល់នូវទិដ្ឋភាពដែលមិនអាចបំភ្លេចបាន។ អ្នកទស្សនាក៏អាចរីករាយជាមួយប្រព័ន្ធទឹកឌូបៃ ដែលជាការបង្ហាញទឹកដ៏អស្ចារ្យមានទីតាំងនៅបឹង Burj តែម្ដង។ អ្វីដែរពិសេសគឺ ផ្សារទំនើបឌូបៃ រៀបចំព្រឹត្តិការណ៍ និងពិធីបុណ្យផ្សេងៗ រាប់ចាប់ពីការបង្ហាញម៉ូត រហូតដល់ការតាំងពិពណ៌វប្បធម៌ បង្កើតជាបទពិសោធន៍សម្រាប់ភ្ញៀវគ្រប់រូបពេញមួយឆ្នាំ។

ដើម្បីធានាបាននូវដំណើរកម្សាន្តដ៏រីករាយ ភ្ញៀវទេសចរណ៍គួរស្ដាប់តាមការណែនាំ ដើម្បីជៀសវាងហ្វូងមនុស្សច្រើនពាន់នាក់។ បាក់ស្បែកជើងដែលមានផាសុខភាពគឺជាកត្តាចាំបាច់សម្រាប់ការធ្វើដំណើរទៅកាន់ផ្សារដែលមានទំហំធំទូលាយនេះ ជាពិសេសគឺពិនិត្យមើលកាលវិភាគកម្មវិធីសំខាន់ៗដែលធ្វើឡើងជារៀងរាល់ឆ្នាំនៅទីនោះតែម្ដង៕

នាយករដ្ឋមន្រ្តីហ្គ្រីនឡែន លោក Jens-Frederik Nielsen បានធ្វើការបដិសេធយ៉ាងម៉ឺងម៉ាត់ចំពោះការអះអាងដែលថាសហរដ្ឋអាមេរិកនឹងមានឪកាសក្នុងការគ្រប់គ្រងហ្គ្រីនឡែន។ សេចក្តីថ្លែងការណ៍របស់គាត់ធ្វើឡើងជាការឆ្លើយតបទៅនឹងការលើកឡើងរបស់ប្រធានាធិបតីអាមេរិក Donald Trump ដែលក្នុងនោះ Trump បានអះអាងថាមានការពិភាក្សាពិតប្រាកដអំពីការបញ្ចូល Greenland ក្នុងអំឡុងអាណតិ្តរបស់លោក។ លោក Trump បានសំដៅទៅលើ Greenland ជាទីតាំងយុទ្ធសាស្ត្រមួយដែលមានតម្លៃភូមិសាស្ត្រនយោបាយដ៏សំខាន់។

លោក Nielsen បានសរសេនៅក្នុង Facebook ដោយបានសង្កត់ធ្ងន់លើស្វ័យភាពរបស់ Greenland ដោយបញ្ជាក់យ៉ាងច្បាស់ថា “អាមេរិកនឹងមិនមានឪកាសក្នុងកាន់កាប់ហ្រ្គីនឡែនឡើយ។ យើងមិនមែនជាកម្មសិទ្ធិរបស់អ្នកណាទេ។ យើងកំណត់អនាគតរបស់យើងផ្ទាល់” ។ ការឆ្លើយតបនេះបង្ហាញពីការប្តេជ្ញាចិត្តរបស់ Greenland ក្នុងការការពារអធិបតេយ្យភាព និងឯករាជ្យភាពរបស់ខ្លួនពីឥទ្ធិពលបរទេស។ សេចក្តីថ្លែងការណ៍នេះគូសបញ្ជាក់យ៉ាងច្បាស់ថា ជោគវាសនារបស់ហ្គ្រីនឡែនស្ថិតនៅក្នុងដៃប្រជាជនរបស់ខ្លួន។

ដោយបន្ថែមភាពស្មុគ្រស្មាញដល់ស្ថានការណ៍ អនុប្រធានាធិបតីសហរដ្ឋអាមេរិកលោក JD Vance ថ្មីៗនេះបានទៅទស្សនាមូលដ្ឋានយោធាអាមេរិកនៅ Greenland ។ ក្នុងអំឡុងពេលទស្សនកិច្ចរបស់គាត់ លោក Vance បានរិះគន់ពីអសមត្ថភាពរបស់ប្រទេសដាណឺម៉ាកក្នុងការផ្តល់ការការពារគ្រប់គ្រាន់សម្រាប់ Greenland ដោយទទូចថាសហរដ្ឋអាមេរិកអាចនឹងមើលថែបានប្រសើរជាងមុនដើម្បីធានាសន្តិសុខនៃទឹកដីនេះ។

ហ្គ្រីនលែន គឺជាប្រទេសកោះមួយនៅអាមេរិកខាងជើង ដែលជាផ្នែកនៃព្រះរាជាណាចក្រដាណឺម៉ាក។ វាស្ថិតនៅចន្លោះមហាសមុទ្រអាកទិក និង មហាសមុទ្រអាត្លង់ទិក នៅភាគខាងកើតនៃប្រជុំកោះអាកទិករបស់កាណាដា។ ហ្គ្រីនលែន គឺជាកោះធំជាងគេបំផុតរបស់ពិភពលោក។ទីតាំង និងធនធានធម្មជាតិរបស់វាបានធ្វើឱ្យវាក្លាយជាអ្នកលេងដ៏សំខាន់នៅក្នុងតំបន់អាក់ទិក។

ទោះជាយ៉ាងណាក៏ដោយ ជំហរដ៏ម៉ឺងម៉ាត់របស់ Nielsen បញ្ជាក់យ៉ាងច្បាស់ថា រាល់ក្តីប្រាថ្នារបស់បរទេសដើម្បីគ្រប់គ្រង Greenland គឺមិនស្វាគមន៍ឡើយ ហើយនឹងត្រូវបានប្រឆាំងយ៉ាងម៉ឺងម៉ាត់។ ជាមួយនឹងការកើនឡើងនូវចំណាប់អារម្មណ៍ភូមិសាស្ត្រនយោបាយនៅក្នុងតំបន់អាក់ទិក ភាពជាអ្នកដឹកនាំរបស់ហ្គ្រីនឡែននៅតែបន្តតស៊ូមតិសម្រាប់ស្វ័យភាព និងសិទ្ធិរបស់ប្រជាជនរបស់ខ្លួន ដោយធានាថាអនាគតរបស់ប្រទេសនេះនៅតែស្ថិតក្នុងដៃរបស់ពួកគេ៕

ក្នុងរយៈពេលប៉ុន្មានឆ្នាំចុងក្រោយនេះ ការទទួលបានទិដ្ឋាការសិស្ស F-1 របស់សហរដ្ឋអាមេរិកបានក្លាយជាបញ្ហាប្រឈមកាន់តែខ្លាំងសម្រាប់សិស្សនិស្សិតអន្តរជាតិ។ សារពើពន្ធឆ្នាំ ២០២៣-២០២៤ បានរកឃើញអត្រាបដិសេធនៃការស្នើសុំទិដ្ឋាការ F-1 ៤១% ដែលជាចំនួនខ្ពស់បំផុតក្នុងរយៈពេលមួយទសវត្សរ៍។ ក្នុងចំណោមពាក្យស្នើរសុំចំនួន ៦៧៩,០០០ ដែលទទួលបាន គឺមាន ២៧៩,០០០ ហើយដែលត្រូវបានបដិសេធ ដែលនេះបង្ហាញពីការកើនឡើងគួរឱ្យកត់សម្គាល់ពីអត្រាបដិសេធកាលពីឆ្នាំមុន ៣៩% ។

និន្នាការនេះអាចត្រូវបានសន្មត់ថាជាផ្នែកមួយនៃការផ្លាស់ប្តូរវិធីសាស្រ្ត ដែលក្រសួងការបរទេសសហរដ្ឋអាមេរិកប្រើដើម្បីគណនាទិន្នន័យទិដ្ឋាការ ដែលជាការផ្លាស់ប្តូរដែលបានអនុវត្តចាប់តាំងពីឆ្នាំ ២០១៩ មក ។ ខណៈពេលដែលចំនួនពាក្យស្នើសុំមានការប្រែប្រួលក្នុងរយៈពេលជាច្រើនឆ្នាំ ជំងឺរាតត្បាតនៅឆ្នាំ ២០១៩-២០ បានបណ្តាលឱ្យមានការធ្លាក់ចុះយ៉ាងខ្លាំងបន្ថែមទៀត។ ទោះបីជាចំនួនពាកលស្នើរសុំបានស្ទុះងើបឡើងវិញក្រោយជំងឺរាតត្បាតក៏ដោយ ក៏នៅកំឡុងឆ្នាំ ២០២៣-២៤ មានការថយចុះបន្តិចបើធៀបនឹងឆ្នាំមុនៗ។

ទោះបីជាមានបញ្ហាប្រឈមទាំងនេះក៏ដោយ សហរដ្ឋអាមេរិកនៅតែជាគោលដៅដ៏ពេញនិយមសម្រាប់សិស្សនិស្សិតអន្តរជាតិដែរ ដោយក្នុងឆ្នាំសិក្សា ២០២៣-២០២៤ មានសិស្សជាង 1.1 លាននាក់មកពីជុំវិញពិភពលោកបានចុះឈ្មោះនៅក្នុងស្ថាប័នរបស់សហរដ្ឋអាមេរិក ដែលជាចំនួនខ្ពស់បំផុតមិនធ្លាប់មាន។ និស្សិតទាំងនេះមិនត្រឹមតែរួមចំណែកបង្កើតឲ្យមានវប្បធម៌ចម្រុះនៅក្នុងបរិវេណសាលាប៉ុណ្ណោះទេ ប៉ុន្តែថែមទាំងនាំមកនូវអត្ថប្រយោជន៍សេដ្ឋកិច្ចដ៏សំខាន់ផងដែរ ដោយបន្ថែមទឹកប្រាក់ប្រមាណ ៥០ ពាន់លានដុល្លារដល់សេដ្ឋកិច្ចសហរដ្ឋអាមេរិក។

ឥណ្ឌាបាននាំមុខគេក្នុងនាមជាប្រភពនៃនិស្សិតអន្តរជាតិធំជាងគេនៅសហរដ្ឋអាមេរិក បន្ទាប់មកគឺប្រទេសចិន។ ប្រទេសវៀតណាមឈរនៅលំដាប់លេខរៀងទីប្រាំមួយដោយមានសិស្សចំនួន ២២,០៦៦ នាក់បានចុះឈ្មោះចូលរៀន។

ការកើនឡើងអត្រាបដិសេធនៃទិដ្ឋាការសុំចូលរៀន F-1 បង្កើតជាចម្ងល់យ៉ាងខ្លាំងអំពីអនាគតនៃការអប់រំអន្តរជាតិនៅសហរដ្ឋអាមេរិក ខណៈពេលដែលបញ្ហាប្រឈមនៅតែមាន ភាពទាក់ទាញជាសកលនៃការអប់រំរបស់អាមេរិកក៏នៅតែមានភាពរឹងមាំផងដែរ ហើយកិច្ចខិតខំប្រឹងប្រែងដើម្បីដោះស្រាយឧបសគ្គទាំងនេះមានសារៈសំខាន់ណាស់ក្នុងការធានាបន្តនូវភាពជោគជ័យរបស់សហរដ្ឋអាមេរិក ក្នុងនាមជាមជ្ឈមណ្ឌលនៃឧត្តមភាពសិក្សា៕

ប្រទេសចិនបានផ្តួចផ្តើមធ្វើសមយុទ្ធយោធាទ្រង់ទ្រាយធំនៅជុំវិញកោះតៃវ៉ាន់នៅដែលខ្លួនហៅថាជា “ការព្រមានយ៉ាងតឹងរ៉ឹង” ដែលប្រឆាំងនឹងសកម្មភាពបំបែកខ្លួនរបស់តៃវ៉ាន់។ វាបានធ្វើឡើងបន្ទាប់ពីមានការលើកឡើងរបស់ប្រធានាធិបតីតៃវ៉ាន់ លោក ឡៃ ឈីងតេ ដែលបានហៅទីក្រុងប៉េកាំងថាជា “កម្លាំងសត្រូវបរទេស”។ សមយុទ្ធនេះរៀបចំឡើងដោយកងទ័ពជើងទឹក និងកងកម្លាំងរ៉ុក្កែតរបស់ប្រទេសចិន រួមមានការសមយុទ្ធត្រៀមប្រយុទ្ធ ការវាយប្រហារតាមដែនសមុទ្រ ដីគោក និងសេណារីយ៉ូបិទផ្លូវ។

រដ្ឋាភិបាលរបស់តៃវ៉ាន់បានប្រតិកម្មយ៉ាងខ្លាំងនឹងវីដេអូរបស់យោធាចិនដាក់ឈ្មោះលោក ឡៃ ឈីងតេ ថាជា “ប៉ារ៉ាស៊ីត” ដែលបង្ហាញរូបគាត់ក្នុងលក្ខណៈបែបតុក្កតា និងប្រមាថមើលងាយ ដោយរដ្ឋមន្ត្រីការពារជាតិរបស់តៃវ៉ាន់បានហៅសកម្មភាពបែបនេះថាមិនត្រឹមតែជាការបង្កហេតុប៉ុណ្ណោះទេ ប៉ុន្តែថែមទាំងបំផ្លាញសន្តិភាព និងស្ថិរភាពក្នុងតំបន់ផងដែរ។

ជាការឆ្លើយតប តៃវ៉ាន់បានចល័តនាវាចម្បាំង យន្តហោះ និងប្រព័ន្ធមីស៊ីល ដើម្បីតាមដានស្ថានការណ៍យ៉ាងដិតដល់។ រដ្ឋាភិបាលរបស់កោះតៃវ៉ាន់បានអះអាងជាថ្មីនូវជំហររបស់ខ្លួនថាការសម្រេចចិត្តអំពីអនាគតរបស់កោះនេះគឺស្ថិតនៅលើប្រជាជនរបស់ខ្លួនតែប៉ុណ្ណោះ ដោយបានច្រានចោលការទាមទារអធិបតេយ្យភាពរបស់ទីក្រុងប៉េកាំង។

កាលពីពេលថ្មីៗនេះ រដ្ឋមន្ត្រីការពារជាតិអាមេរិក លោក Pete Hegseth បានធ្វើទស្សនកិច្ចនៅអាស៊ី ដើម្បីពង្រឹងសម្ព័ន្ធភាព ដែលអាចមានឥទ្ធិពលលើសក្ដានុពលក្នុងតំបន់។ អ្នកវិភាគជឿថា ប្រទេសចិនបានជ្រើសរើសពេលវេលាជាក់លាក់នេះសម្រាប់ធ្វើសមយុទ្ធរបស់ខ្លួន ដើម្បីដាក់សម្ពាធដោយប្រយោលដល់តៃវ៉ាន់ ខណៈពេលដែលជៀសវាងការប្រឈមមុខដាក់គ្នាដោយផ្ទាល់ជាមួយសហរដ្ឋអាមេរិក។ នេះមានសារៈសំខាន់ ខណៈដែលទាំងប្រទេសចិន និងសហរដ្ឋអាមេរិកក៏កំពុងរៀបចំសម្រាប់ការចរចាពាណិជ្ជកម្មផងដែរ ហើយប្រទេសចិនទំនងជាចង់រក្សាតុល្យភាព ដើម្បីជៀសវាងភាពតានតឹងដែលអាចកើនឡើងខ្លាំងពេក។

លើសពីនេះទៀត ចារកម្មពីតៃវ៉ាន់បង្ហាញថា ចិនអាចនឹងប្រើសមយុទ្ធទាំងនេះ ដើម្បីបង្វែរការផ្តោតអារម្មណ៍របស់យោធាខ្លួនពីបញ្ហាផ្ទៃក្នុង រួមទាំងការស៊ើបអង្កេតអំពើពុករលួយ ដែលបានធ្វើឱ្យរង្គោះរង្គើដល់ការបង្កើតវិស័យការពារជាតិនាពេលថ្មីៗនេះ។នេះបើតាមគេហ័ទំព័រសារព័ត៌មានបរទេស CNN៕

បន្ទាប់ពីជិតមួយទស្សវត្សនៃការឈរនៅលេខរៀងទីពីរ McDonald’s បានត្រលប់មកចំណាត់ថ្នាក់កំពូលវិញ ដោយវ៉ាដាច់ Starbucks ក្លាយជាយីហោភោជនីយដ្ឋានដ៏មានតម្លៃបំផុតរបស់ពិភពលោក។ ព្រឹត្តិការណ៍ដ៏សំខាន់នេះកើតឡើងនៅពេលដែលក្រុមហ៊ុនកាហ្វេយក្សកំពុងប្រឈមមុខនឹងបញ្ហាជាច្រើនដែលបានធ្វើឲ្យរង្គោះរង្គើភាពលេចធ្លោរបស់ខ្លួននៅក្នុងឧស្សាហកម្មនេះ។ តើអ្វីដែលនាំឲ្យ Starbucks ធ្លាក់តំណែងបែបនេះ?

បើតាមគេហ័ទំព័រ Brand Finance យោងតាមទិន្នន័យថ្មីៗនេះ តម្លៃម៉ាក McDonald’s បានកើនឡើង 7% ឈានដល់ 40.5 ពាន់លានដុល្លារ។ ផ្ទុយទៅវិញ Starbucks បានទទួលរងនូវការធ្លាក់ចុះយ៉ាងខ្លាំង 36% ដែលនាំឱ្យតម្លៃម៉ាកយីហោរធ្លាក់ចុះដល់ 38.8 ពាន់លានដុល្លារ។ ការធ្លាក់ចុះយ៉ាងខ្លាំងនេះត្រូវបានគេសន្មត់ថាដោយសារមានការមិនពេញចិត្តក្នុងចំណោមអតិថិជន Starbucks ដែលតម្លៃទំនិញឡើងខ្ពស់ និងការរង់ចាំយូរ។ លើសពីនេះ ក្រុមហ៊ុនបានប្រឈមមុខនឹងប្រតិកម្មតបតជុំវិញយុទ្ធនាការធ្វើពហិការដែលភ្ជាប់ទៅនឹងគោលជំហររបស់ខ្លួនលើជម្លោះតំបន់ហ្គាហ្សា ដែលធ្វើឲ្យប៉ះពាល់ដល់ទំនុកចិត្តអ្នកអតិថិជនបន្ថែមទៀត។

បន្ថែមពីនេះបញ្ហារបស់ Starbucks មួយទៀតគឺការមកដល់នៃក្រុមហ៊ុន Luckin Coffee របស់ចិននៅក្នុងទីផ្សារសហរដ្ឋអាមេរិក។ ខ្សែសង្វាក់កាហ្វេចិន ដែលឥឡូវធំជាងគេនៅក្នុងប្រទេសចិន គ្រោងនឹងដាក់លក់កាហ្វេមួយកែវ ២ដុល្លារ នៅអាមេរិក ដោយជាការប្រកួតប្រជែងខ្លាំងជាមួយតម្លៃកាហ្វេរបស់ Starbucks ។

ចំពេលមានការលំបាកទាំងនេះ នាយកប្រតិបត្តិថ្មីរបស់ Starbucks លោក Brian Niccol កំពុងចាត់វិធានការយ៉ាងម៉ឺងម៉ាត់ក្នុងការធ្វើឱ្យម៉ាកយីហោនេះរស់ឡើងវិញ។ Niccol បានគូសបញ្ជាក់អំពីផែនការដើម្បីកែទម្រង់មូលដ្ឋានប្រតិបត្តិការរបស់ក្រុមហ៊ុន រួមទាំងការដកមុខម៉ឺនុយខ្លះចោល និងកាត់បន្ថយកម្លាំងការងារដោយបញ្ឈប់បុគ្គលិកជាង 1,000 នាក់។ វិធានការទាំងនេះមានគោលបំណងកសាងទំនុកចិត្តអ្នកប្រើប្រាស់ឡើងវិញ និងបង្កើនប្រសិទ្ធភាពនៃខ្សែសង្វាក់នេះ។

នៅពេលដែលការប្រជែងគ្នារវាង McDonald’s និង Starbucks កាន់តែខ្លាំងនោះ ឆ្នាំខាងមុខនឹងមានរឿងដែលដ៏គួរឱ្យចាប់អារម្មណ៍ផ្សេងៗនៅក្នុងឧស្សាហកម្មម្ហូបអាហារ fast food និងភេសជ្ជៈពិភពលោកទាំងពីរនេះ។ ខណៈពេលដែល McDonald’s អបអរនឹងការវិលត្រឡប់របស់ខ្លួនមកកាន់ម៉ាកយីហោដែលមានតម្លៃថ្លែនោះ Starbucks ក៏នឹងស្វែងរកវិធីសាស្ត្រទីផ្សារថ្មីៗដើម្បីដណ្តើមមកុដរបស់ខ្លួនមកវិញផងដែរ។

ប្រទេសចិន ៖ តាមទិន្នន័យបង្ហាញថា ការបញ្ជូនទិន្នន័យតាមប្រព័ន្ធអ៊ីនធើរណេតនៅទូទាំងពិភពលោក ស្មើ៩៥% ត្រូវបានបញ្ជូនតាមខ្សែកាបនៅបាតសមុទ្រ ហើយពិភពលោក ចាត់ទុកថា ខ្សែកាបមានសារៈសំខាន់ខ្លាំងណាស់ ហើយយើងនឹងរងផលប៉ះពាល់យ៉ាងខ្លាំង ប្រសិនបើខ្សែកាបខូចខាត ឬកាច់ផ្តាច់ ។ ប៉ុន្តែនាពេលថ្មីៗនេះ ប្រទេសចិនបានបង្ហាញឧបករណ៍ថ្មីអាចកាត់ផ្តាច់ខ្សែកាបនៅបាតសមុទ្រ ក្នុងជម្រៅជាង៤,០០០ម៉ែត្រ ដែលព័ត៌មាននេះធ្វើឱ្យពិភពលោក បារម្ភខ្លាំង ។

ការចុះផ្សាយរបស់ South China Morning Post កាលពីចុងខែមីនា ឆ្នាំ២០២៥ បង្ហាញថា ចិនបានអភិវឌ្ឍន៍ឧបករណ៍ថ្មី ដែលធ្វើឱ្យប្រទេសនានាភ្ញាក់ផ្អើលយ៉ាងខ្លាំង គឺឧបករណ៍នេះអាចកាត់ផ្តាច់ខ្សែកាបតភ្ជាប់អ៊ីនធើរណេតនៅបាតសមុទ្រ ក្នុងជម្រៅ៤,០០០ម៉ែត្រ ហើយចិននឹងប្រើប្រាស់ឧបករណ៍នេះជាមួយនាវាមុជទឹកម៉ាក Fendouzhe និង Haidou ។

ឧបករណ៍នេះមានកង់ស្រោបពេជ្រ និងបម្លាស់ទីក្នុងល្បឿន១,៦០០ជុំក្នុង១វិនាទី ។ វាអាចកាត់ផ្តាច់ខ្សែកាបនៅបាតសមុទ្របាន បើទោះជាខ្សែកាបនោះហ៊ុព័ទ្ធដោយដែក ឬកៅស៊ូ ប៉ុន្តែវារំខានដីល្បប់នៅបាតសមុទ្រតិចបំផុត ព្រមទាំងប្រើប្រាស់ម៉ូទ័រថាមពលទាបដើម្បីសន្សំសំចៃធនធានក្នុងនាវាមុជទឹកផងដែរ ។

ការបង្ហាញឧបករណ៍កាត់ផ្តាច់ខ្សែកាបតភ្ជាប់អ៊ីនធើរណេតនៅបាតសមុទ្ររបស់ចិន បានធ្វើឱ្យពិភពលោកបារម្ភពីការបញ្ជូនទិន្នន័យតាមអ៊ីនធើរណេតរាំងស្ទះ ពីព្រោះខ្សែកាបនៅបាតសមុទ្រពិតជាមានសារៈសំខាន់ខ្លាំងណាស់ ។ ពិភពលោកនឹងរងផលប៉ះពាល់ខ្លាំង ប្រសិនបើខ្សែកាបខូចខាត ឬត្រូវបានកាត់ផ្តាច់ ។

ប៉ុន្តែអ្នកជំនាញចិនឱ្យដឹងថា ចិនផលិតឧបករណ៍នេះឡើងសម្រាប់ការស្រាវជ្រាវ និងជីកយកធនធានរ៉ែក្នុងមហាសមុទ្រតែប៉ុណ្ណោះ ហើយចិនផ្តោតលើការអភិវឌ្ឍធនធាននៅបាតសមុទ្រ ។ ជំហានដំបូង ឧបករណ៍នេះសម្រាប់ឱ្យពលរដ្ឋចិនប្រើប្រាស់ ដូចជា ៖ ការជីកយករ៉ែក្រោមសមុទ្រ និងជួយសង្គ្រោះ ។ ទោះជាអ្នកជំនាញចិនអះអាងបែបនេះ ប៉ុន្តែវាធ្វើឱ្យប្រទេសនានាបារម្ភពីការប្រើប្រាស់ឧបករណ៍របស់ចិន ដូចជា ៖ តើពិភពលោកនឹងក្លាយទៅជាបែបណា បើចិនផ្លាស់ប្តូរពីពលរដ្ឋប្រើប្រាស់ឧបករណ៍ ទៅជាទុកឱ្យកងទ័ពចិនប្រើប្រាស់ជំនួសវិញ ។

បើទោះជាបច្ចុប្បន្ន ខ្សែកាបតភ្ជាប់អ៊ីនធើរណេតនៅបាតសមុទ្រត្រូវបានការពារសុវត្ថិភាពយ៉ាងរឹងមាំក្តី ប៉ុន្តែការខូចខាតខ្សែកាបនៅបាតសមុទ្របាល់ទិក កាលពីឆ្នាំ២០២២ កាន់តែធ្វើឱ្យពិភពលោកបារម្ភពីការខូចខាតខ្សែកាបខ្លាំងឡើង ។ រីឯព័ត៌មានការបង្ហាញឧបករណ៍ថ្មីរបស់ចិនសម្រាប់កាត់ផ្តាច់ខ្សែកាបបាតសមុទ្រ ធ្វើឱ្យពិភពលោកកាន់តែបារម្ភ ៕

ប្រទេសថៃ ៖ កាលពីថ្ងៃទី៣ ខែមេសា ឆ្នាំ២០២៥ សារព័ត៌មានថៃរាយការណ៍ថា នៅអាកាសយានដ្ឋានដនមឿង ទីក្រុងបាងកក លោកស្រី ផេថងថាន ស៊ីណាវ៉ាត់ នាយករដ្ឋមន្ត្រីថៃ បានប្រាប់ទៅពលរដ្ឋកុំឱ្យបារម្ភ ករណីអាមេរិកដំឡើងពន្ធខ្ពស់លើទំនិញនាំចូលពីប្រទេសថៃ រហូតដល់៣៦% ។ លោកស្រីនឹងចរចាជាមួយអាមេរិក ហើយលោកស្រីជឿជាក់ថា ប្រទេសថៃនឹងអាចកែសម្រួលអត្រាពន្ធបាន វានឹងពុំប៉ះពាល់ដល់គោលដៅផលិតផលក្នុងស្រុកសរុប (GDP) របស់ថៃទេ ។

លោកស្រី ផេថងថាន នាយករដ្ឋមន្ត្រីថៃបានលើកឡើងពីករណីអាមេរិកដំឡើងពន្ធខ្ពស់លើទំនិញនាំចូលពីថៃ រហូតដល់៣៦% ថា ប្រទេសថៃត្រូវតែកែសម្រួលអត្រាពន្ធជាមួយអាមេរិក និងបង្កើតក្រុមការងារចរចាជាមួយអាមេរិក ។ ថៃពុំបាននាំចូលទំនិញពីអាមេរិកច្រើនទេ ប៉ុន្តែត្រូវបានអាមេរិកកំណត់ពន្ធទំនិញថៃខ្ពស់ រហូតដល់៣៦% ទើបថៃត្រូវត្រៀមផែនការរយៈពេលខ្លី និងរយៈពេលវែង ក្នុងនោះផែនការរយៈពេលខ្លី គឺចរចាជាមួយអាមេរិកដើម្បីជួយក្រុមហ៊ុននាំចេញទំនិញថៃ ។

នាយករដ្ឋមន្ត្រីថៃបានត្រៀមវិធានការផ្សេងៗរួចរាល់ហើយ កាលពីព្រឹកថ្ងៃទី៣ ខែមីនា លោកស្រី ផេថងថាន បានជជែកជាមួយលោក ជូឡាផាន់ អាម៉ុនវិវ៉ាត់ អនុរដ្ឋមន្ត្រីក្រសួងហិរញ្ញវត្ថុ ក្រោយពីអាមេរិកប្រកាសអត្រាពន្ធថ្មី ។ លោកស្រីធ្លាប់បានជជែកពីការកំណត់ពន្ធរបស់អាមេរិកជាមួយមន្ត្រីពាក់ព័ន្ធ ជាពិសេស គឺការបង្កើតក្រុមចរចា សូមពលរដ្ឋកុំបារម្ភបញ្ហានេះ ។ ថៃមានវិធានការការពារក្រុមហ៊ុននាំចេញរបស់ខ្លួន ប៉ុន្តែផលប៉ះពាល់ដោយសារការដំឡើងពន្ធខ្ពស់ លោកស្រីជឿថា នឹងអាចចរចាជាមួយអាមេរិកបាន ។

ប្រទេសថៃនឹងពុំបណ្តោយឱ្យការដំឡើងពន្ធខ្ពស់លើទំនិញថៃ ខុសនឹងគោលដៅផលិតផលក្នុងស្រុកសរុប (GDP) របស់ថៃទេ ដោយក្រសួងហិរញ្ញវត្ថុនឹងជូនដំណឹងលម្អិតដល់ពលរដ្ឋយ៉ាងឆាប់រហ័សបំផុត ។ ការកំណត់អត្រាពន្ធទំនិញថ្មីរបស់អាមេរិក គឺថៃត្រូវតែកែសម្រួលឡើងវិញ ដោយមានលោក ផាន់សាក់ វីនយ៉ារ៉ាត់ ប្រធានគណៈកម្មការប្រឹក្សាគោលនយោបាយរបស់នាយករដ្ឋមន្ត្រី បានធ្វើឯកសារពាណិជ្ជកម្មជាមួយអាមេរិក គឺពិនិត្យមើលគ្រប់ទំនិញដែលថៃនាំចូល និងនាំចេញ ។ លោកស្រីសង្ឃឹមថា វិធានការនឹងចេញមក នាពេលឆាប់ៗ ។

គួរបញ្ជាក់ថា ប្រធានាធិបតីអាមេរិក លោក Donald Trump បានកំណត់ពន្ធអប្បបរមា ស្មើ១០% លើទំនិញនាំចូលពីគ្រប់ប្រទេស និងអនុវត្តចាប់ពីថ្ងៃទី៥ ខែមេសា តទៅ ។ រីឯប្រទេសដែលអាមេរិកចាត់ទុកថា ការប្រមូលពន្ធ ឬវិធានការពាណិជ្ជកម្មពុំយុត្តិធម៌ អាមេរិកនឹងប្រមូលពន្ធខ្ពស់ (ហៅថា Reciprocal Tariffs) អនុវត្តចាប់ពីថ្ងៃទី៩ ខែមេសា ។

ការប្រកាសគោលនយោបាយថ្មី ស្តីពីពាណិជ្ជកម្មអន្តរជាតិរបស់ប្រធានាធិបតីអាមេរិក បានធ្វើឱ្យប្រទេសជាច្រើនរងផលប៉ះពាល់ ដូចជា ៖ ពន្ធទំនិញកម្ពុជា ៤៩%, ឡាវ ៤៨%, វៀតណាម ៤៦%, មីយ៉ាន់ម៉ា ៤៤% , បង់ក្លាដែស ៣៧%, ថៃ ៣៦%, ចិន ៣៤%, ឥណ្ឌូណេស៊ី ៣២%, កូរ៉េខាងត្បូង ២៥%, ម៉ាឡេស៊ី ២៤%, ជប៉ុន ២៤% , សហភាពអឺរ៉ុប (EU) ២០%, ហ្វីលីពីន ១៧%, សិង្ហបុរី ១០% ៕

ប្រទេសវៀតណាម ៖ សេដ្ឋកិច្ចវៀតណាមបានរីកចម្រើនយ៉ាងឆាប់រហ័ស ក្រៅពីវិស័យឧស្សាហកម្ម រដ្ឋាភិបាលវៀតណាមបានព្យាយាមលើកកម្ពស់វិស័យទេសចរណ៍ និងសេវាកម្មនានាដើម្បីប្រមូលប្រាក់ចំណូលជួយជំរុញសេដ្ឋកិច្ចជាតិ ។ រដ្ឋាភិបាលវៀតណាមបានកំណត់គោលដៅឱ្យប្រទេសវៀតណាមក្លាយជាគោលដៅទេសចរណ៍លំដាប់ទី១ នៅតំបន់អាស៊ាន និងនាំមុខថៃ គឺវៀតណាមនឹងទាក់ទាញភ្ញៀវទេសចរបរទេសមកកម្សាន្ត រហូតដល់២៣លាននាក់ ក្នុងឆ្នាំ២០២៥ ។

គោលដៅភ្ញៀវទេសចរបរទេស ចំនួន២៣លាននាក់ក្នុងឆ្នាំ២០២៥នេះ គឺខ្ពស់ជាងចំនួនភ្ញៀវទេសចរបរទេសមកវៀតណាម មុនជំងឺកូវីដ-១៩ ឆ្លងរាតត្បាតទៅទៀត ។ ស្ថាប័នស្រាវជ្រាវ DMI សន្និដ្ឋានថា វិស័យទេសចរណ៍វៀតណាមនឹងងើបឡើងវិញនៅឆ្នាំ២០២៥ ខណៈរដ្ឋាភិបាលវៀតណាមកំណត់ចំនួនភ្ញៀវទេសចរបរទេសឆ្នាំនេះ កើនឡើង៣០% ក្រោយពីវៀតណាមទទួលបានភ្ញៀវទេសចរច្រើនកាលពីឆ្នាំ២០២៤ ។ នេះបើតាមការចុះផ្សាយរបស់សារព័ត៌មានបរទេស នាដើមខែមេសា ឆ្នាំ២០២៥ ។

កាលពីឆ្នាំ២០២៤ ភ្ញៀវទេសចរឥណ្ឌាបានមកកម្សាន្តនៅវៀតណាម រហូតដល់៥សែន១ពាន់នាក់ ហើយភ្ញៀវទេសចរឥណ្ឌាបានធ្វើដំណើរមកវៀតណាម កើនឡើងទ្វេដង បើធៀបនឹងរយៈពេល២ឆ្នាំកន្លងមក ។ បច្ចុប្បន្ន វៀតណាមក្លាយជាគោលដៅទេសចរណ៍មួយគួរឱ្យចាប់អារម្មណ៍ ជាពិសេស វៀតណាមលេចធ្លោជាងគេក្នុងចំណោមប្រទេសនៅតំបន់អាស៊ីអាគ្នេយ៍ ។

របាយការណ៍បញ្ជាក់ថា កាលពីឆ្នាំ២០២៤ វៀតណាមទទួលបានភ្ញៀវទេសចរបរទេស ចំនួន១៧លាន៥សែននាក់ កើនឡើងជាង៣៩.៥% បើធៀបនឹងឆ្នាំ២០២៣ ។ ក្រៅពីភ្ញៀវទេសចរឥណ្ឌាមកកម្សាន្តនៅវៀតណាមច្រើនជាងគេ គឺមានភ្ញៀវទេសចរមកពីបណ្តាប្រទេសអាស៊ីអាគ្នេយ៍ ស្មើ៨០% នៃចំនួនភ្ញៀវទេសចរបរទេសសរុប ។ រដ្ឋាភិបាលវៀតណាមបាននិយាយកាលពីពាក់កណ្តាលឆ្នាំ២០២៤ ថា វៀតណាមនឹងកំណត់វិស័យទេសចរណ៍ជាប្រភពចំណូលចម្បងដើម្បីជំរុញការរីកចម្រើនសេដ្ឋកិច្ច ។

រដ្ឋាភិបាលវៀតណាមសង្ឃឹមថា នឹងអាចនាំមុខប្រទេសថៃក្នុងវិស័យទេសចរណ៍នាពេលឆាប់ៗនេះ ខណៈថៃបានទទួលភ្ញៀវទេសចរបរទេសកាលពីឆ្នាំ២០២៤ ចំនួន៣៥លាន៥សែននាក់ ។ ស្ថាប័នពាក់ព័ន្ធនឹងវិស័យទេសចរណ៍វៀតណាមបានជំរុញឱ្យពលរដ្ឋដើរកម្សាន្តក្នុងស្រុក ក៏ដូចជាជំរុញឱ្យភ្ញៀវទេសចរបរទេសមកកម្សាន្តនៅវៀតណាម ជាពិសេស ភ្ញៀវទេសចរឥណ្ឌានឹងជំនួសភ្ញៀវទេសចរចិន ដោយសារមានជើងហោះហើរត្រង់ពីឥណ្ឌា មកវៀតណាម ។

ហេតុនេះ ភោជនីយដ្ឋាននានានៅវៀតណាម បានសរសេរអក្សរឥណ្ឌាក្នុងបញ្ជីម្ហូបអាហារកាន់តែច្រើន បន្ទាប់ពីភាសាអង់គ្លេស និងចិន ដើម្បីទាក់ទាញភ្ញៀវទេសចរឥណ្ឌា ។ ដូចគ្នានេះ ស្លាកសញ្ញាប្រាប់ផ្លូវនៅតំបន់ទេសចរណ៍វៀតណាម ក៏មានសរសេរអក្សរឥណ្ឌាដែរ ៕