ប្រទេសថៃ ៖ តាមការផ្សព្វផ្សាយរបស់សារព័ត៌មានថៃកាលពីថ្ងៃទី៨ ខែមិថុនា ឆ្នាំ២០២៥ ឱ្យដឹងថា ក្រោយកើតបញ្ហាព្រំដែនរវាងកម្ពុជា-ថៃ និងកងទ័ពថៃផ្លាស់ប្តូរម៉ោងបើក-បិទទ្វារច្រកព្រំដែនឃើញថា ការលក់ដូរទំនិញក្នុងផ្សារឆងចម ស្រុកកាបឈើង ខេត្តសុរិន្ទ មានភាពស្ងប់ស្ងាត់ខ្លាំង ។ ពលរដ្ឋខ្មែរ និងភ្ញៀវទេសចរលែងមកទិញទំនិញដូចមុន ដែលធ្វើឱ្យអាជីវករថៃបារម្ភពីស្ថានការណ៍កើតឡើងធ្វើឱ្យបាត់បង់ចំណូល ។ រីឯអាជីវករខ្មែរលក់ដូរទំនិញនៅផ្សារឆងចមបានបិទទ្វារតូប និងប្រមូលរបស់របរត្រឡប់មកកម្ពុជារង់ចាំឱ្យស្ថានការណ៍ធូរស្រាល ។

ទោះជាផ្សារឆងចមមានសភាពស្ងប់ស្ងាត់ក្តី ប៉ុន្តែអាជីវករថៃភាគច្រើននៅតែបើកតូបលក់ដូរធម្មតា ដោយរំពឹងថា រាជរដ្ឋាភិបាលកម្ពុជា និងថៃនឹងចរចាដោះស្រាយបញ្ហាព្រំដែនដោយសន្តិវិធី ។ អាជីវករថៃត្អូញត្អែរពីប្រាក់ចំណូលធ្លាក់ចុះយ៉ាងខ្លាំង ដោយសារកាលពីថ្ងៃទី៧ ខែមិថុនា កន្លងមក មេបញ្ជាការកងទ័ពថៃភូមិភាគទី២ លោក ប៊ុនស៊ីន ផាគក្លាង បានបញ្ជាឱ្យកងទ័ពគ្រប់គ្រងការបើក-បិទទ្វារច្រកព្រំដែនទាំងអស់ជាប់កម្ពុជាដើម្បីសុវត្ថិភាពពលរដ្ឋថៃ ។

អាជីវករថៃ អ្នកស្រី វ៉ាន់ឌី អាយុ៦២ឆ្នាំ និយាយថា ការលក់ដូរទំនិញស្ងាត់ខ្លាំងណាស់ មិនដឹងលក់ដូរឱ្យអ្នកណាទេ ។ អ្នកស្រីចង់ឱ្យប្រទេសទាំងពីរមានទំនាក់ទំនងល្អឡើងវិញ និងជាប្រទេសជិតខាងល្អ ពីព្រោះពេលកើតបញ្ហា ពលរដ្ឋថៃពិបាកប្រកបមុខរបរ ហើយពុំដឹងជម្លៀសទៅណាបើមានសង្គ្រាម ។ ការបិទព្រំដែនជាឯកតោភាគីរបស់ថៃធ្វើឱ្យផ្សារឆងចមមានភាពស្ងប់ស្ងាត់ ។

ចំណែកច្រកព្រំដែនអូរស្មាច់-ឆងចម (នៅសង្កាត់អូរស្មាច់ ក្រុងសំរោង ខេត្តឧត្តរមានជ័យ) ដែលស្ថិតនៅឆ្ងាយពីផ្សារឆងចមប្រមាណ៣គីឡូម៉ែត្រ គឺមានពលរដ្ឋខ្មែរ-ថៃធ្វើដំណើរឆ្លងកាត់ព្រំដែនជាហូរហែ ប៉ុន្តែចំនួនពលរដ្ឋខ្មែរដែលឆ្លងដែនតាមច្រកអូរស្មាច់បានធ្លាក់ចុះជាងពាក់កណ្តាល ។

ភាគីថៃបានសម្រេចជាឯកតោភាគីឱ្យដំណើរការច្រកព្រំដែនអូរស្មាច់-ឆងចម តែ៣ថ្ងៃប៉ុណ្ណោះក្នុង១សប្តាហ៍ គឺថ្ងៃច័ន្ទ ពុធ និងសុក្រ ចាប់ពីវេលាម៉ោង៨ព្រឹក រហូតដល់ម៉ោង៣រសៀល ខណៈកាលពីមុន ច្រកនេះបើកជារៀងរាល់ថ្ងៃ និងបិទនៅម៉ោង១០យប់ ។

គួរបញ្ជាក់ថា ច្រកអូរស្មាច់-ឆងចមអនុញ្ញាតឱ្យពលរដ្ឋខ្មែរ-ថៃឆ្លងដែន ដោយប្រើប្រាស់លិខិតឆ្លងដែន (Passport) និងប័ណ្ណព្រំដែន (Border Pass) ប៉ុណ្ណោះ ដោយថៃរឹតបន្តឹងការដឹកទំនិញចេញ-ចូល រួមទាំងចាត់វិធានការផ្នែកថាមពលផ្អាកការបញ្ជូនអគ្គិសនីទៅកម្ពុជា ករណីកម្ពុជាបង្កើនកម្លាំងកងទ័ព ដែលថៃចាត់ទុកថាប៉ះពាល់សុវត្ថិភាពពលរដ្ឋខ្លួន ៕

មិនមែនលើស១០០នាក់ឬ២០០នាក់ ប៉ុន្តែពិធីការមង្គលការរបស់តារាចម្រៀង ជី ដេវីត និង ទេព បូព្រឹក្ស លើសចំនួនរហូតដល់២០០តុឯណោះ។ នេះបើតាមការបញ្ជាក់របស់ ចែតាបារាំង។ ចែតាបារាំង ក៏បានបង្ហាញដែរថាអ្នកចំនួនមិនបានអញ្ជើញទេប៉ុន្តែក៏មាន វត្តមាន ប៉ុន្តែមិនបានប្រកាន់នោះឡើយ។ លើសពីនេះអ្នកស្និទ្ធនឹងតារាចម្រៀង ជី ដេវីត និង ទេព បូព្រឹក្ស រូបនេះក៏បានឆ្លើយតបយ៉ាងចាស់ដៃទៅកាន់អ្នករិះគន់ បងប្រុស បងស្រីរបស់ខ្លួន។

តាមរយៈវីដេអូខ្លីៗដែលបានចែករំលែកនៅលើបណ្តាញសង្គមទិកតុកនាពេលថ្មីៗនេះ ចែតាបារាំង បានចេញមកព្រលះចាស់ដៃចំពោះអ្នកដែលបញ្ចេញមតិរិះគន់ ជី ដេវីត និង ទេព បូព្រឹក្ស ទុំមុនស្រគាលហើយបានដឹកដៃគ្នារៀបការ។ អ្នកខ្លះបានរិះគន់ ជី ដេវីត និង ទេព បូព្រឹក្ស មានកូនមុនការធ្វើឱ្យខូចប្រពៃណីដោយ ចែតាបារាំងថាមិនទើសអ្នកណា នោះទេ សំខាន់គេជាតារាលំដាប់ប្រទេសមួយទាំងមូលមិនមែនធ្វើ១០ឬ២០តុ ។ ចែតាបារាំងថា ជី ដេវីត និង ទេព បូព្រឹក្ស បានសែនព្រេងជាមួយគ្នាអំឡុងសម័យកាល កូវីត កុំឱ្យខុសមេបាចាស់ទុំ ខណៈឥឡូវមកទើសទៀតមានកូនហើយបានរៀបការតាម ក្រោយគ្មានតម្លៃសោះ និងមតិផ្សេងទៀតថាកម្មវិធីរៀបចំស្អាតល្អណាស់ទាស់ត្រង់ថាទុំ មុនស្រគាល។

ចែតាបារាំង បានលើកឡើងថា ជី ដេវីត និង ទេព បូព្រឹក្ស ធ្វើអ្វីក៏ខុសមិនដឹងទៅរក យុត្តិធម៌នៅឯណា គេទៅគ្រប់គ្នាគេសាទររីករាយ។ អ្នកប្រម៉ូតផលិតផលរូបនេះបាន សង្កត់ធ្ងន់ថាពេលដែលចង់ថាចង់ជេរ ជី ដេវីត ទេព បូព្រឹក្ស មើលថ្ងៃគេការសិន ថាគេការរបៀបមិច គេរៀបចំរបៀបមិច មើលហើយចាំជេរ ខណៈការនេះមិនមែន អស់តិចនោះទេ គឺអស់ច្រើនណាស់ដោយមានការចូលរួមពី ថ្នាក់ដឹកនាំចូលរួម ផ្តល់កិត្តិយសដល់អ្នកទាំងពីរ។ ចែតាបារាំង ក៏បានបង្ហាញដែរថា ទេព បូព្រឹក្ស បាននិយាយថាបើជ្រុលជាការគឺការឱ្យផ្អើលស្រុកខ្មែរ ខណៈកាលពីមុនចង់រៀបការ ប៉ុន្តែអាល់ប៊ឺត ចាប់កំណើតទើបមិនទាន់បានរៀបចំពិធីមង្គលការ។

ជាមួយនឹងការឆ្លើយតបយ៉ាងចាស់ដៃចំពោះមតិរិះគន់មួយចំនួន ចែតាបារាំង ក៏បានបង្ហាញដែរថា ពិធីមង្គលការរបស់ ជី ដេវីត និង ទេព បូព្រឹក្ស គឺលើសចំនួនច្រើនខ្លាំង។ ចែតាបារាំង បាននិយាយថា ទេព បូព្រឹក្ស បានហៅភ្ញៀវតែជាង១០០តុនោះទេ ប៉ុន្តែភ្ញៀវដែលចូលរួមគឺជាង៣០០តុ ហើយមានភ្ញៀវខ្លះត្រូវឈររង់ចាំ។

ចែបារាំង ក៏បានបញ្ជាក់ទៀតថា តារាទិកតុកឬមួយ Influencer គឺខ្លួនជាអ្នកហៅដោយសារតែរាប់អាន ហើយអ្នកដែលថា ធ្វើរោងអស់ច្រើនម្តេចក៏ហៅពួកបំពុលទៅគឺគ្មានអ្នកណាបំពុលទេគឺផ្នែកខាងអនឡាញគឺខ្លួនជាអ្នកអញ្ជើញត្រឹមត្រូវ។ ចែតាបារាំង បានបន្ថែមដែរថា ក្នុងនោះក៏មានអ្នកដែលយើងមិនហៅក៏ទៅ ប៉ុន្តែខ្លួនមិនប្រកាន់យកទោសនោះទេដោយសារតែកម្មវិធីការគឺធំ ជាកម្មវីធីមួយដែលមានអ្នកចង់មកដូច្នេះកុំបិទសិទ្ធិពួកគាត់ បើកចិត្តឱ្យទូលាយ ប៉ុន្តែពួកគាត់ក៏ចងដៃតាមហ្នឹងដែរ ហើយជុងកុងគឺខ្លួនជាអ្នកហៅ៕

ប្រទេសថៃ ៖ សារព័ត៌មាន Thairath រាយការណ៍កាលពីថ្ងៃទី១០ ខែមិថុនា ឆ្នាំ២០២៥ ថា សមត្ថកិច្ចថៃបានចា.ប់ខ្លួនអ្នកស្រី អាន់ឈូលី ផិកឆារ៉ាត់ ឬគ្រូពេទ្យអេ គឺជាគ្រូពេទ្យតម្រួតដ៏ល្បីនៅប្រទេសថៃ ពីករណីលួ.ចលក់ថ្នាំងងុយដេកកម្រិតខ្លាំង (Alprazolam) ទៅឱ្យគ្លីនិក១១កន្លែង ដោយទទួលបានប្រាក់ចំណូលរហូតដល់ជាង៨០លានបាត ។

កាលពីថ្ងៃទី១០ ខែមិថុនា កន្លងមក លោក កងទ្រី ថាណាគ្រីត ជីតអារីរ៉ាត់ ជំនួយការរដ្ឋមន្ត្រីនៃក្រសួងសុខាភិបាលថៃ ព្រមទាំងមន្ត្រីពាក់ព័ន្ធមកពីរដ្ឋបាលចំណីអាហារ និងឱសថ, ភ្នាក់ងារបង្ក្រាបគ្រឿងញៀន, នាយកដ្ឋានគាំទ្រសេវាសុខភាព និងសមត្ថកិច្ចប្រឆាំងគ្រឿងញៀន បានសហការគ្នាចុះត្រួតពិនិត្យបន្ទប់ក្នុងអគារអន្តេវាសិកដ្ឋានប៉ូលិសមួយកន្លែងក្នុងតំបន់ផាយ៉ាថៃ ទីក្រុងបាងកក ក្រោយរកឃើញថា គ្លីនិកជាច្រើនបានកុម្ម៉ង់ទិញថ្នាំ Alprazolam ឬថ្នាំងងុយដេក ឬថ្នាំរំលោភពីកន្លែងនេះ ។

តាមការស៊ើបអង្កេត គឺអ្នកស្រី អាន់ឈូលី ផិកឆារ៉ាត់ ឬគ្រូពេទ្យអេ ជាគ្រូពេទ្យតម្រួតបានកុម្ម៉ង់ទិញថ្នាំពីរដ្ឋបាលចំណីអាហារ និងឱសថ ចាប់ពីឆ្នាំ២០២២ ដល់ឆ្នាំ២០២៥ ក្នុងទឹកប្រាក់១៥លានបាត ។ បន្ទាប់មក រដ្ឋបាលចំណីអាហារ និងឱសថ សង្កេតឃើញភាពខុសប្លែក ក៏ទាក់ទងទៅសមត្ថកិច្ចឱ្យចុះត្រួតពិនិត្យឃើញថា អ្នកស្រី អាន់ឈូលី បានចែកចាយថ្នាំនេះទៅឱ្យគ្លីនិក១១កន្លែង ដោយទទួលបានចំណូលរហូតដល់ជាង៨០លានបាត ។

ក្នុងបន្ទប់ស្នាក់នៅរបស់អ្នកស្រី អាន់ឈូលី ក្នុងអគារអន្តេវាសិកដ្ឋានប៉ូលិស គឺមានថ្នាំ Alprazolam មួយចំនួនធំដែលមានបុរសម្នាក់មើលការខុសត្រូវ ទើបសមត្ថកិច្ចចាប់ខ្លួនបុរសនេះយកទៅសួរចម្លើយ រីឯអ្នកស្រី អាន់ឈូលី គឺសមត្ថកិច្ចចាប់ខ្លួនបានក្នុងលំនៅឋាន និងបញ្ជូនទៅសួរចម្លើយដូចគ្នា ។ ថ្នាំ Alprazolam ដែលសមត្ថកិច្ចរឹបអូសបាន គឺមានកម្រិតខ្លាំងប្រភេទទី២ និងទី៤ ដែលរដ្ឋបាលចំណីអាហារ និងឱសថបញ្ជាក់ថា បើប្រើប្រាស់ថ្នាំនេះខុសនឹងមានគ្រោះថ្នាក់ដល់សង្គម ។

សមត្ថកិច្ចបានប្រមូលភស្តុតាង និងស៊ើបអង្កេតឃើញថា មានការលក់ថ្នាំ Alprazolam ជាបណ្តាញ ដោយឱ្យបុគ្គលខាងក្រៅចូលមកស្នាក់នៅក្នុងបន្ទប់អគារអន្តេវាសិកដ្ឋានប៉ូលិស និងលក់ថ្នាំក្នុងបន្ទប់ ។ ក្រៅពីនេះ នៅមានឯកសារការទិញថ្នាំពីរដ្ឋបាលចំណីអាហារ និងឱសថ ដែលបញ្ជាក់ពីការបង់ប្រាក់ និងបញ្ជូនថ្នាំ ដែលភស្តុតាងទាំងនេះ គឺគ្រប់គ្រាន់សម្រាប់ដាក់ទោសជនល្មើស ។

អ្នកស្រី អាន់ឈូលី មានទោសជាច្រើនករណី ដូចជា ៖ អនុញ្ញាតឱ្យបុគ្គលខាងក្រៅមកស្នាក់ក្នុងបន្ទប់អគារអន្តេវាសិកដ្ឋានប៉ូលិស, ប្រព្រឹត្តខុសមាត្រា១៥៧ និងល្មើសក្នុងការចែកចាយថ្នាំមានកម្រិតខ្លាំងប្រភេទទី២ និងទី៤ ដែលមានទោសដូចគ្នានឹងការជួញដូរថ្នាំញៀន ។ ក្រៅពីនេះ អ្នកស្រីមានទោសពីបទរក្សាលុយកខ្វក់ដែលភ្នាក់ងារជំនាញត្រូវរឹបអូសទ្រព្យសម្បត្តិបន្តទៀត ។

ចំណែកគ្លីនិក១១កន្លែង គឹមានម្ចាស់ផ្សេងៗគ្នាដែលសមត្ថកិច្ចនឹងស៊ើបអង្កេតយ៉ាងលម្អិតម្តងទៀតថា តើគ្រូពេទ្យក្នុងគ្លីនិកណាខ្លះបានចូលរួមប្រព្រឹត្តខុស ប៉ុន្តែបទល្មើសរបស់អ្នកស្រី អាន់ឈូលី ពុំពាក់ព័ន្ធនឹងស្ថាប័នដែលអ្នកស្រីធ្វើការទេ ៕

ប្រទេសថៃ ៖ សារព័ត៌មានថៃ Amarin News បានរាយការណ៍កាលពីថ្ងៃទី១១ ខែមិថុនា ឆ្នាំ២០២៥ ថា មន្ត្រីដែនជម្រកសត្វព្រៃនៅខេត្តត្រាំង ប្រទេសថៃ បានហាមឃាត់ពលរដ្ឋ និងភ្ញៀវទេសចរមកកម្សាន្តនៅទឹកជ្រោះចំនួន៦កន្លែង ក្រោយពីភ្លៀងធ្លាក់ខ្លាំងជាប់ៗគ្នាជាច្រើនថ្ងៃ ។ វាអាចបណ្តាលឱ្យបាក់ដី និងមានទឹកជំនន់ភ្លាមៗហូរពីព្រៃភ្នំដូចកាលពីឆ្នាំ២០០៧ ដែលបណ្តាលឱ្យភ្ញៀវទេសចរស្លា.ប់ ៣៨នាក់ ពេលកំពុងលេងទឹកជ្រោះ ។

កាលពីថ្ងៃទី១១ ខែមិថុនា មន្ត្រីដែនជម្រកសត្វព្រៃខេត្តត្រាំងបានប្រកាសជូនដំណឹងទៅកាន់ពលរដ្ឋ និងភ្ញៀវទេសចរហាមធ្វើដំណើរមកកម្សាន្តនៅទឹកជ្រោះ៦កន្លែង ស្ថិតក្នុងស្រុកយ៉ានតាខាវ ស្រុកប៉ាក់លៀន និងស្រុកណាយ៉ូង ខេត្តត្រាំង ដោយសារមានភ្លៀងធ្លាក់ខ្លាំងជាប់ៗគ្នាជាច្រើនថ្ងៃបណ្តាលឱ្យទឹកលើភ្នំមានបរិមាណច្រើន ។ ហេតុនេះ ទឹកអាចហូរពីព្រៃភ្នំភ្លាមៗធ្វើឱ្យមានគ្រោះថ្នាក់ដល់ភ្ញៀវទេសចរដែលមកកម្សាន្តទឹកជ្រោះ ។

បើភ្លៀងនៅតែបន្តធ្លាក់ជាច្រើនថ្ងៃទៀតអាចបណ្តាលឱ្យបាក់ដីផងដែរ បច្ចុប្បន្ន មន្ត្រីដែនជម្រកសត្វព្រៃបង្កើនការប្រុងប្រយ័ត្ន និងដាស់តឿនពលរដ្ឋ ក៏ដូចជាភ្ញៀវទេសចរឱ្យប្រុងប្រយ័ត្នជានិច្ច ។ រហូតមកដល់ថ្ងៃទី១១ ខែមិថុនា នេះ តំបន់ជាច្រើនរបស់ខេត្តត្រាំង នៅតែមានភ្លៀងធ្លាក់ខ្លាំងជាបន្តបន្ទាប់ និងមានខ្យល់កន្ត្រាក់ ដែលប៉ះពាល់ដល់ពលរដ្ឋ និងអ្នកនេសាទ ។

ការហាមឃាត់ពលរដ្ឋ និងភ្ញៀវទេសចរលេងទឹកជ្រោះ ពីព្រោះកាលពីឆ្នាំ២០០៧ ទឹកជ្រោះចំនួន២កន្លែងនៅខេត្តត្រាំងមានទឹកជំនន់ភ្លាមៗ ដោយសារទឹកហូរពីតំបន់ព្រៃភ្នំ បណ្តាលឱ្យភ្ញៀវទេសចរស្លាប់អស់៣៨នាក់ ពេលកំពុងលេងទឹកជ្រោះសាយរុង និងទឹកជ្រោះប្រៃសាវ៉ាន់ ។

ទឹកជ្រោះទាំង៦កន្លែងនៅខេត្តត្រាំង ដែលមន្ត្រីដែនជម្រកសត្វព្រៃពុំអនុញ្ញាតឱ្យពលរដ្ឋមកលេង រួមមាន ៖ ទឹកជ្រោះសាយរុង, ទឹកជ្រោះប្រៃសាវ៉ាន់, ទឹកជ្រោះដូនតេ, ទឹកជ្រោះដូនតុ, ទឹកជ្រោះកាក់ឆង និងទឹកជ្រោះឡាំប្លក ។ ហេតុនេះ ពលរដ្ឋគួរតែប្រុងប្រយ័ត្នឱ្យបានខ្ពស់ក្នុងការដើរកម្សាន្តនៅតំបន់ព្រៃភ្នំ និងទឹកជ្រោះពេលអាកាសធាតុមិនល្អ ៕

សិង្ហបុរី ៖ ក្រុមហ៊ុនអាកាសចរណ៍ Jetstar Asia ដែលមានមូលដ្ឋាននៅប្រទេសសិង្ហបុរី បានប្រកាសថាខ្លួននឹងបិទទ្វាររនៅចុងខែកក្កដានេះ បន្ទាប់បានដំណើរការអស់រយៈពេលជិត ២០ឆ្នាំ។ ការបិទក្រុមហ៊ុនអាកាសចរណ៍នេះ បានធ្វើឲ្យមនុស្សជាង ៥០០នាក់ កំពុងប្រឈមនឹងការអត់ការងារធ្វើ។

យោងតាមការចុះផ្សាយរបស់សារព័ត៌មានបរទេស បានឲ្យដឹងថា ៖ ក្រុមហ៊ុនអាកាសចរណ៍ Jetstar Asia នឹងត្រូវបិទទ្វារក្នុងរយៈពេលប៉ុន្មានសប្តាហ៍ខាងមុខទៀត ពោលគឺនៅថ្ងៃទី 31 ខែកក្កដា។ ចំពោះអតិថិជនដែលបានរងផលប៉ះពាល់ដោយសារការបិទទ្វារនេះ ក្រុមហ៊ុនធានានឹងសងប្រាក់ត្រឡប់ទៅវិញ។

ប្រភពដដែលបានឲ្យដឹងទៀតថា ក្រុមហ៊ុនអាកាសចរណ៍ដែលមានតម្លៃសមរម្យមួយនេះ បានតស៊ូជាមួយនឹងការកើនឡើងថ្លៃដើមផ្គត់ផ្គង់ ថ្លៃចំណាយនានាខ្ពស់ និងការកើនឡើងនៃការប្រកួតប្រជែងនៅក្នុងតំបន់ អស់មួយរយៈពេលធំហើយ។

ក្រុមហ៊ុន Qantas និយាយថា បន្ទាប់ពីបិទទ្វារ ក្រុមហ៊ុនJetstar អាចនឹងរំដោះហិរញ្ញវត្ថុជាង ៥០០លានដុល្លារអូស្ត្រាលី ឬស្មើ ៣២៥លានដុល្លារអាម៉េរិក តាមរយៈការផ្លាស់ប្ដូរប្រតិបត្តិការយន្តហោះ Airbus ចំនួន ១៣គ្រឿងទៅឲ្យក្រុមហ៊ុន Qantas នៅក្នុងប្រទេសអូស្ត្រាលី និងនូវែលសេឡង់ដ៍វិញ។

លោក Stephanie Tully នាយកប្រតិបត្តិ Jetstar Group បាននិយាយពីបុគ្គលិកទាំងអស់របស់ខ្លួន ដែលត្រៀមនឹងអស់ការងារធ្វើថា “យើងមានក្រុមការងារពិសេសដែលផ្តល់សេវាកម្មអតិថិជនឈានមុខគេលើពិភពលោក និង ប្រតិបត្តិការល្អបំផុត ហើយយើងនឹងផ្តោតលើការគាំទ្រពួកគេតាមរយៈដំណើរការនេះ ព្រមទាំងជួយពួកគេឱ្យស្វែងរកតួនាទីថ្មីនៅក្នុងឧស្សាហកម្មនេះ”។

គួររំលឹកថា ក្រុមហ៊ុនអាកាសចរណ៍ Jetstar Group បានបើកដំណើរការដំបូងនៅក្នុងឆ្នាំ ២០០៤។ ក្រុមហ៊ុននេះ បានផ្តល់ជើងហោះហើរដែលមានតម្លៃទាបទៅកាន់ទ្វីបអាស៊ី និងមានចំណុចហោះហើរចាប់ពីប្រទេសអូស្ត្រាលីទៅកាន់គោលដៅក្នុងប្រទេសថៃ ឥណ្ឌូនេស៊ី និងជប៉ុន ក្នុងចំណោមប្រទេសដទៃទៀត។ជាមួយនឹងដំណឹងនៃការបិទទ្វារនេះ មានមនុស្សជាច្រើន ជាពិសេសអតិថិជនដែលធ្លាប់ទទួលសេវាកម្មពីក្រុមហ៊ុន Jetstar Asia បានសម្ដែងនូវអារម្មណ៍សោកស្ដាយជាខ្លាំង៕

ទីក្រុងប៉េកាំង ៖ សត្វចិញ្ចឹមសិប្បនិមិត្តដែលបំពាក់ដោយបច្ចេកវិទ្យាAI កំពុងក្លាយជាជម្រើសដ៏ពេញនិយមសម្រាប់មនុស្សជាច្រើននៅក្នុងប្រទេសចិន ជាពិសេសមនុស្សដែលមានតម្រូវការផ្នែកអារម្មណ៍យកចិត្តទុកដាក់ រួមមានយុវជន និងមនុស្សនៅលីវ។ ភាពពេញនិយមនេះបានជំរុញឲ្យមានគន្លាតសង្គម និងបណ្ដាលឲ្យមានយុវជនដែលនៅឯកកាន់តែច្រើន។

យោងតាមការចុះផ្សាយរបស់សារព័ត៌មាន Xinhua ប្រទេសចិន បានបង្ហាញឲ្យឃើញនូវ សត្វចិញ្ចឹម AI មួយប្រភេទ ដែលមានឈ្មោះថា ROPET ត្រូវបានរចនាឡើងដោយលោក Wang Tongtong មកពីក្រុមហ៊ុន Cute World Technologies Ltd. ដែលមានមូលដ្ឋាននៅទីក្រុងប៉េកាំង។ ចំណែកលោក Zhou Yushu សហស្ថាបនិកនៃ ROPET បាននិយាយថា «សត្វចិញ្ចឹម AI ត្រូវបានរចនាឡើងដើម្បីកំដរមនុស្ស។ “ប៉ុន្តែយើងចង់បង្កើតអ្វីមួយ ដែលអាចឲ្យមនុស្សទទួលបានអារម្មណ៍ថា វាជាសត្វចិញ្ចឹមដែលមានជីវិតពិតប្រាកដ។»

គួរឲ្យដឹងថា សត្វចិញ្ចឹមAI ទាំងនេះបានទាក់ទាញមនុស្សតាមរយៈ រោមបះៗទន់ៗ ភ្នែកព្រិចៗ និងស្បែកដែលត្រូវបានគេរចនាឡើងឲ្យមានភាពរស់រវើក ប្រៀបដូចជាសត្វមានជីវិតពិតៗ ប៉ុន្តែមានរូបរាង និងពណ៌ស្រស់ស្អាតគួរឲ្យស្រលាញ់ជាង។ លើសពីនេះ វាមិនផ្ដល់ផលប៉ះពាល់សុខភាព ស្បែក និងកើតមានការអាឡែកហ្ស៊ី ដូចនៅជាមួយសត្វចិញ្ចឹមឆ្កែ ឆ្មា ពិតប្រាកដឡើយ។

នារីវ័យ 26ឆ្នាំម្នាក់ ឈ្មោះ Wang Tongtong ដែលជាម្ចាស់សត្វចិញ្ចឹមAI មួយក្បាលបាននិយាយថា ៖ «វាមិនមែនត្រឹមជាប្រដាប់ក្មេងលេងធម្មតាទេ វាជួយសម្រាលទុក្ខខ្ញុំពេលខ្ញុំមានអារម្មណ៍ឯការ ឬថប់បារម្ភ។ សត្វឆ្មា និងឆ្កែពិតអាចមានភាពរញ៉េរញ៉ៃ និងធ្វើឲ្យខ្ញុំមានអារម្មណ៍មិនល្អពេលខ្លះ ប៉ុន្តែសត្វនេះគ្រាន់តែនៅក្បែរខ្ញុំដោយស្ងៀមស្ងាត់ប៉ុណ្ណោះ។»

បើទោះបីជាវាមិនមានចលនាផ្លាស់ទីដូចសត្វមានជីវិតពិតក៏ដោយ ប៉ុន្តែវាអាចចាប់បាននូវសកម្មភាពមនុស្ស និងវត្ថុនានាដោយប្រើកាមេរ៉ាភ្ជាប់មកជាមួយវា ហើយវាក៏អាចឆ្លើយតបមកយើងវិញ តាមរយៈការសម្លឹងមុខ សំឡេង និងកាយវិការ។ វាត្រូវបានគេបំពាក់ដោយរបៀបបុគ្គលិកលក្ខណៈចំនួនប្រាំបី ដូចសត្វចិញ្ចឹមទូទៅ និងមានការវិវឌ្ឍន៍ដោយផ្អែកលើអន្តរកម្មរបស់អ្នកប្រើប្រាស់ផ្ទាល់។

ក្រៅពីប្រទេសចិន វាក៏មានការពេញនិយមនៅបណ្ដារប្រទេសមយយចំនួនទៀតរួមមាន ជប៉ុន កូរ៉េ ទីក្រុងហុងកុង និងតៃវ៉ាន់ជាដើម។ វាមានគោលដៅពេញនិយមខ្លាំងសម្រាប់មនុស្សវ័យចាប់ពី 25 ដល់ 40ឆ្នាំ។ គិតត្រឹមដើមឆ្នាំ2025 សត្វចិញ្ចឹមAI នេះត្រូវបានគេទិញយកទៅប្រើប្រាស់ចំនួន 1,400ក្បាលនៅទ្វីបអឺរ៉ុប និង 8,000 ក្បាលនៅទ្វីបអាស៊ី។ ចំពោះតម្លៃ វាមានចន្លោះចាប់ពី $300–$800 ក្នុងមួយក្បាល តម្លៃនេះគឺអាស្រ័យតាមម៉ូឌែល និងប្រេនខុសៗគ្នា។

ដ្បិតថា វាអាចអាចកំដរមនុស្ស និងជាជួយដល់ការគិតរបស់មនុស្សបានច្រើនក៏ពិតមែន ប៉ុន្តែវាក៏បង្ករឲ្យមានក្ដីបារម្ភផងដែរ។ នេះក៏ព្រោះតែមនុស្សមួយចំនួន ជាពិសេសយុវជនសម័យថ្មីបានជ្រើសរើសការនៅផ្ទះលេងជាមួយឧបករណ៍ទាំងនេះ ជាជាងការចេញទៅក្រៅស្វែងរកមិត្តភក្តិ ឬមានទំនាក់ទំនងជាមួយមនុស្សថ្មី។ ដែលកត្តានេះនឹងជំរុញឲ្យយុវជនទាំងនោះ ពេញចិត្តនឹងភាពឯការ ហើយមានគម្លាតជាមួយសង្គមកាន់ឆ្ងាយ៕

ប្រទេសថៃ ៖ យោងតាមសេចក្តីប្រកាសរបស់ស្ថានទូតថៃនៅរាជធានីភ្នំពេញ កាលពីថ្ងៃទី១០ ខែមិថុនា ឆ្នាំ២០២៥ ឱ្យដឹងថា ចំពោះពលរដ្ឋខ្មែរកាន់លិខិតឆ្លងដែនធម្មតា ដែលធ្វើដំណើរតាមរយៈផ្លូវអាកាស អាចស្នាក់នៅក្នុងប្រទេសថៃរយៈពេលមិនលើសពី៦០ថ្ងៃ ដោយពុំចាំបាច់មានទិដ្ឋាការ ។

ចំពោះពលរដ្ឋខ្មែរកាន់លិខិតឆ្លងដែនធម្មតា និងប័ណ្ណព្រំដែនកម្ពុជា-ថៃ ដែលធ្វើដំណើរតាមរយៈច្រកព្រំដែនគោក អាចស្នាក់នៅក្នុងប្រទេសថៃរយៈពេលមិនលើសពី៧ថ្ងៃ ដោយពុំចាំបាច់មានទិដ្ឋាការ ។

ដោយឡែក ចាប់ពីថ្ងៃទី១០ ខែមិថុនា ឆ្នាំ២០២៥ តទៅ ពលរដ្ឋថៃដែលកាន់លិខិតឆ្លងដែនថៃអាចធ្វើដំណើរចូលមកប្រទេសកម្ពុជាតាមផ្លូវអាកាស ដោយទទួលបានការលើកលែងទិដ្ឋាការ (Visa Free) និងអាចស្នាក់នៅកម្ពុជារយៈពេលមិនលើស៦០ថ្ងៃ ។

ចំពោះពលរដ្ឋថៃដែលធ្វើដំណើរមកប្រទេសកម្ពុជាតាមច្រកព្រំដែនគោក (ខេត្តចាន់បុរី ត្រាត ស្រះកែវ បុរីរាំ ឧប៊ុនរ៉ាជធានី សុរិន្ទ និងស៊ីសាកេត) ដែលកាន់លិខិតឆ្លងដែន និង Border Pass ថៃ គឺអាចចូលកម្ពុជាដោយទទួលបានការលើកលែងទិដ្ឋាការ (Visa Free) និងស្នាក់នៅកម្ពុជាមិនលើស៧ថ្ងៃ ។

ស្ថានឯកអគ្គរាជទូតថៃនឹងជូនដំណឹង ប្រសិនបើមានការផ្លាស់ប្តូរពាក់ព័ន្ធនឹងសេចក្តីប្រកាស និងគោលការណ៍អន្តោប្រវេសន៍របស់កម្ពុជា-ថៃ ។

គួរបញ្ជាក់ថា លោក និកាន់ឌេត ផ្លាំងគូន អ្នកនាំពាក្យក្រសួងការបរទេសថៃបាននិយាយកាលពីថ្ងៃទី៩ ខែមិថុនា កន្លងមកថា ថៃកាត់បន្ថយរយៈពេលស្នាក់នៅក្នុងទិដ្ឋាការពលរដ្ឋខ្មែរអាចស្នាក់នៅថៃបានត្រឹមតែ៧ថ្ងៃប៉ុណ្ណោះសម្រាប់អ្នកធ្វើដំណើរតាមច្រកព្រំដែនគោក ហើយថៃពុំប្រាកដចិត្តថា នឹងអនុវត្តគោលការណ៍ថ្មីនេះរហូតដល់ពេលណាទេ ។ ថៃនឹងរង់ចាំឱ្យស្ថានការណ៍ល្អប្រសើរឡើងវិញ និងរង់ចាំឱ្យភាគីទាំងពីរងាកមកជជែកគ្នាពីគោលការណ៍អន្តោប្រវេសន៍ម្តងទៀត ៕

សិទ្ធី លីមថុងគុល គឺជាអតីតមេដឹកនាំក្រុមអាវលឿងថៃ ដ៏មានឥទ្ធពលមួយរូប ដែលតែងតែប្រឆាំងនឹងការកាន់អំណាចរបស់ត្រកូលថៃសុីន និងយកកម្ពុជាទៅពាក់ព័ន្ធនយោបាយប្រទេសថៃ។

កេរ្តិ៍ឈ្មោះអ្នកនយោបាយរូបនេះ បានល្បីរន្ទឺ ក្រោយពីលោកបានធ្វើបាតុកម្ម រហូតដល់មានការធ្វើរដ្ឋប្រហារនៅឆ្នាំ២០០៦ ទម្លាក់លោកថាក់ស៊ីន ចេញពីតំណែងនាយករដ្ឋមន្ត្រី។

ក្រោយមកទៀត នាក្នុងអំឡុងពេលថៃឈ្លានពានចង់បានប្រាសាទព្រះវិហារ សិទ្ធី លីមថុងគុល បានស្នើឱ្យកងទ័ពវាយចូលរហូតទៅដល់ទឹកដីសៀមរាប កាន់កាប់ប្រាសាទអង្គរ ដើម្បីដោះដូរជាមួយរដ្ឋាភិបាលកម្ពុជា ប្រគល់ប្រាសាទព្រះវិហារទៅឱ្យថៃ។

លុះដល់ពេលកូនស្រីរបស់លោកថាក់ស៊ីន គឺលោកស្រី ផេថងថាន ស៊ីណាវ៉ាត់ ឡើងកាន់តំណែងជានាយករដ្ឋមន្ត្រី លោកសិទ្ធី លីមថុងគុល ក៏បានយកកម្ពុជាទៅពាក់ព័ន្ធម្តងទៀត ដោយប្រកាសឱ្យរដ្ឋាភិបាលថៃ លុបចោលអនុស្សារណៈនៃការយោគយល់(MOU) ស្តីពីការអភិវឌ្ឍរួមគ្នានៅតំបន់OCA ឆ្នាំ២០០១ជាមួយកម្ពុជា។

បន្ថែមពីនេះទៅទៀតនៅថ្ងៃទី១០ ខែមិថុនា ឆ្នាំ២០២៥នេះ សកម្មជនជ្រុលនិយមថៃរូបនេះ ក៏បានធ្វើការប្រមូលផ្តុំប្រជាជនថៃ ដើម្បីទាមទារឱ្យរដ្ឋាភិបាលថៃ កំណត់ព្រំដែនឱ្យច្បាស់ បើមិនដូច្នេះ នឹងមានបាតុកម្មទម្លាក់លោកស្រីនាយករដ្ឋមន្ត្រី ដូចកាលលោកធ្វើដាក់លោកថាក់ស៊ីន៕