តារាចម្រៀងល្បីឈ្មោះប្រចាំប្រទេសអ្នកនាង មាស សុខសោភា បានធ្វើឱ្យសាធារណជនបញ្ចេញមតិព្រាតបន្ទាប់ពីបង្ហោះនៅលើបណ្តាញសង្គមរបស់ខ្លួនជាមួយនឹងពាក្យថា ខ្មៅគូនឹងល្អ ល្អគូនឹងអាក្រក់និងបានចោទសួរថា កម្មគូជាមួយនឹងអ្វី។ តារាចម្រៀងរូបនេះទើបតែស្ងប់ស្ងាត់រឿងអាស្រូវនៅលើបណ្តាញសង្គមបន្ទាប់ពីមានរឿងរកាំរកូសជាមួយនឹងអតីតស្វាមី។
នៅយប់ថ្ងៃទី១០ មិថុនា តារាចម្រៀង មាស សុខសោភា បានបង្ហោះរូបភាព៣សន្លឹក ជាមួយនឹងសម្តីថា « សភាវៈគ្រប់យ៉ាងដែលមាននៅលើលោកនេះគឺសុទ្ធសឹងតែ មកជាគូទាំងអស់ដូចជាពាក្យ ខ្មៅគូនឹងល្អ សគូនឹងខ្មៅ ប្រុសគូនឹងស្រី ល្អគូនឹងអាក្រក់ ចុះកម្មគូនឹងអ្វីទៅបងប្អូន សូម comment ខាងក្រោម»។ ការលើកឡើងរបស់ តារាចម្រៀងចាស់វស្សានៅក្នុងរង្វង់សិល្បៈរូបនេះ បានជំរុញឱ្យសាធារណជន អ្នកប្រើប្រាស់បណ្តាញសង្គមចូលបញ្ចេញមតិយោបល់ជាច្រើន។ 
អ្នកលេងបណ្តាញសង្គមបានខម្មិនថា «កម្មមិនមានគូទេ តែត្រូវស្វែងយល់ពីព្រះធម៌ និង អំពើល្អមកដាក់ក្នុងខ្លួនដើម្បីអោយមានលំហរជ្រះថ្លានៃចិត្តIDOl , ធ្វើល្ឣបានឣាក្រក់ ធ្វើបុណ្យបានបាប នេះដោយហេតុតែមនុស្សយកបិសាចធ្វើព្រះ, មនុស្សមិនស្គាល់ខ្លួនឯងផង ឱ្យគេមកយល់ចិត្តខ្លួនមិចកើត។ ឣាមីតាភូត.., ខ្មៅ ផ្ទុយនឹង ស ល្អផ្ទុយនឹងអាក្រក់មិនមែនគូទេ idol , កម្មជាទង្វើការធ្វើ អ្វីៗមានគូកើត/ស្លាប់.ស/ខ្មៅ.យល់បានល្អប្អូន»។
គណនីហ្វេកប៊ុកជាច្រើនទៀតបានបញ្ចេញមតិថា« កម្ម ជាគូនឹងម្ចាស់របស់កម្ម!កម្មគូកុសលផលបុណ្យ យើងសាងអីទទូលបានហ្នឹងប្អូនស្រី , កុំផ្តេកផ្តួលទៅលើ អបិយជំនឿពេក 50% បានហើយ, ឈប់ទៅidol ហ្វេនសុំអង្វរ, ភាសាបាលី កម្ម ប្រែថាអំពើ លោកចែកចេញជា២យ៉ាង អំពើល្អ និងអំពើរអាក្រក់ គូគឺកុសលនិងអកុសលបងស្រី»។
គួរបញ្ជាក់ផងដែរថា បន្ទាប់ពីរឿងអាស្រូវដ៏កក្រើករវាងតារាចម្រៀង មាស សុខសោភា និងអតីតស្វាមី រួមទាំងលោកតាសក់សភ្នំត្បែង ស្ងប់ស្ងាត់បានមួយរយៈពេលហើយ។ ទោះបីជារងនូវរឿងអាស្រូវផ្អើលប្រទេស តារាចម្រៀង មាស សុខសោភា តាំងជំហរយ៉ាងរឹងមាំដោយនៅតែបំពេញការងារសិល្បៈជាធម្មតាក្រោមការលើកទឹកចិត្តពីមិត្តសិល្បៈជាច្រើន៕
