កងទ័ពឥណ្ឌា និងប៉ាគីស្ថាន បានបា.ញ់កាំភ្លើងធំដាក់គ្នាទៅវិញទៅមកនៅតាមបណ្តោយព្រំដែនមានជម្លោះរវាងប្រទេសទាំងពីរ ធ្វើឱ្យមនុស្សស្លា.ប់យ៉ាងហោចណាស់ ៣៤នាក់ និងរងរបួសជិត១០០នាក់ បន្ទាប់ពីរដ្ឋាភិបាលឥណ្ឌាបើកការវាយប្រ.ហារដោយមីស៊ីលទៅលើប៉ាគីស្ថាន ​។ នេះបើតាមការចុះផ្សាយរបស់សារព័ត៌មានបរទេស កាលពីថ្ងៃទី៧ ខែឧសភា ឆ្នាំ២០២៥ ។

សារព័ត៌មាន AFP រាយការណ៍ថា រហូតមកដល់បច្ចុប្បន្ន មានមនុស្សស្លាប់យ៉ាងហោចណាស់៣៤នាក់ ដោយសារការផ្ទុះអាវុធរវាងឥណ្ឌា និងប៉ាគីស្ថាន ។ បើតាមរដ្ឋាភិបាលប៉ាគីស្ថាន គឺពលរដ្ឋប៉ាគីស្ថានបានស្លាប់២៦នាក់ ដោយសារការវាយប្រហារ និងបាញ់កាំភ្លើងរបស់ឥណ្ឌានៅតាមបណ្តោយព្រំដែន ខណៈរដ្ឋាភិបាលឥណ្ឌាថា ពលរដ្ឋឥណ្ឌាស្លាប់អស់៨នាក់ ក្រោយការបាញ់កាំភ្លើងធំរបស់ប៉ាគីស្ថាន ។

កងទ័ពអាកាសឥណ្ឌាឱ្យដឹងថា កងទ័ពឥណ្ឌាបានវាយប្រហារ និងបំផ្លាញទីតាំងរបស់ក្រុមប្រដាប់អាវុធប៉ាគីស្ថាន ចំនួន៩កន្លែង ខណៈរដ្ឋាភិបាលឥណ្ឌាបញ្ជាក់បន្ថែមថា សកម្មភាពរបស់កងទ័ពមានគោលដៅច្បាស់លាស់ ប្រុងប្រយ័ត្ន និងពុំបង្កើនហិង្សា ។ ការបំផ្លាញទីតាំងក្រុមប្រដាប់អាវុធកើតឡើងមិនប៉ុន្មានថ្ងៃ ក្រោយពីរដ្ឋាភិបាលឥណ្ឌាចោទប្រកាន់រដ្ឋាភិបាលប៉ាគីស្ថានជាអ្នកគាំទ្រការវាយប្រហារនៅតំបន់កាស្មៀ ដែលស្ថិតក្រោមការគ្រប់គ្រងរបស់ឥណ្ឌា ។

ចំណែករដ្ឋមន្ត្រីក្រសួងការពារជាតិប៉ាគីស្ថាន លោក Khawaja Muhammad Asif បានចោទប្រកាន់នាយករដ្ឋមន្ត្រីឥណ្ឌា លោក Narendra Modi ដែលបានបើកឆាកធ្វើសង្គ្រាមជាមួយប៉ាគីស្ថាន ដើម្បីទទួលបានការគាំទ្រ និងបង្កើនប្រជាប្រិយភាពរបស់ខ្លួននៅឥណ្ឌា ។ រដ្ឋាភិបាលប៉ាគីស្ថានបានតបតវិញ ហើយសង្ឃឹមថា ប៉ាគីស្ថាននឹងចំណាយពេលមិនយូរដើម្បីបញ្ចប់សង្គ្រាមនេះ ។

អ្នកនាំពាក្យកងទ័ពប៉ាគីស្ថានបាននិយាយក្នុងសន្និសីទសារព័ត៌មាននៅទីក្រុងអ៊ីស្លាម៉ាបាដ ថា ប៉ាគីស្ថានបានបាញ់ទម្លាក់យន្តហោះចម្បាំងរបស់ឥណ្ឌា ចំនួន៥គ្រឿង ធ្លាក់នៅបរិវេណព្រំដែន ព្រមទាំងបាញ់យន្តហោះចម្បាំងរ៉ាហ្វានរបស់បារាំង ចំនួន៣គ្រឿងទៀត ក្រោយពីយន្តហោះទាំងនេះវាយប្រហារប៉ាគីស្ថាន ។

ដោយឡែក ជើងហោះហើររបស់ក្រុមហ៊ុនអាកាសចរណ៍ឥណ្ឌា និងប៉ាគីស្ថាន បានលុបចោលការហោះហើរជិត៥៥០ជើង តាំងពីប្រទេសទាំងពីរកើតហិង្សាជាមួយគ្នា ។ តាមទិន្នន័យក្នុងគេហទំព័រតាមដានការហោះហើរ Flightradar24 គឺយន្តហោះដឹកអ្នកដំណើរនៅប៉ាគីស្ថាន ១៦% និងនៅឥណ្ឌា ៣% បានលុបចោលការហោះហើរ ។

ប្រទេសជាច្រើនបានបង្ហាញក្តីកង្វល់ចំពោះសង្គ្រាមរវាងឥណ្ឌា និងប៉ាគីស្ថាន ដូចជា ៖ រដ្ឋមន្ត្រីក្រសួងការបរទេសបារាំង លោក Jean-Noël Barrot បានអំពាវនាវឱ្យប្រទេសទាំងពីរអត់ធ្មត់ កុំឱ្យការវាយប្រហាររាលដាលកាន់តែខ្លាំង និងការពារអាយុជីវិតពលរដ្ឋ ។ រីឯក្រសួងការបរទេសរុស្ស៊ីបានចេញសេចក្តីថ្លែងការណ៍បង្ហាញពីការបារម្ភយ៉ាងខ្លាំងចំពោះការប្រឈមមុខគ្នាកាន់តែខ្លាំងរវាងកងទ័ពទាំងពីរប្រទេស ហើយរុស្ស៊ីសង្ឃឹមថា ឥណ្ឌា និងប៉ាគីស្ថាន នឹងដោះស្រាយបញ្ហាដោយសន្តិវិធី ៕

សហរដ្ឋអាមេរិក ៖ ប្រធានាធិបតីអាមេរិក លោក Donald Trump បានប្រកាសកាលពីថ្ងៃទី៤ ខែឧសភា ឆ្នាំ២០២៥ ថា លោកមានគម្រោងដាក់ពន្ធ១០០% លើភាពយន្តបរទេស ដើម្បីការពារវិស័យភាពយន្តអាមេរិកដោយសារការប្រកួតប្រជែងពុំយុត្តិធម៌ ។ គម្រោងដាក់ពន្ធភាពយន្តបរទេសខ្ពស់នេះ ធ្វើឱ្យបណ្តាផលិតករភាពយន្តអាមេរិក និងវិនិយោគិនផ្នែកភាពយន្តបារម្ភយ៉ាងខ្លាំងពីប្រទេសនានាហាមចាក់បញ្ចាំងភាពយន្តអាមេរិកក្នុងរោងកុន ឬដំឡើងពន្ធភាពយន្តអាមេរិកវិញ ។

វាធ្វើឱ្យភាគហ៊ុនរបស់ក្រុមហ៊ុនធំៗ ដូចជា ៖ Netflix និង Paramount ធ្លាក់ចុះ ខណៈ Disney និង Comcast គឺជាក្រុមហ៊ុនមេរបស់ Universal ក៏ប្រឈមនឹងសម្ពាធដូចគ្នា ក្រោយសារព័ត៌មានផ្សព្វផ្សាយថា លោក Trump នឹងដាក់ពន្ធភាពយន្តបរទេសរហូតដល់១០០% ដើម្បីការពារភាពយន្តអាមេរិក ។

លោក Trump បានសរសេរក្នុងបណ្តាញសង្គមថា ការដាក់ពន្ធភាពយន្តបរទេស គឺចង់ការពារមិនឱ្យភាពយន្តអាមេរិកដួលរលំយ៉ាងឆាប់រហ័ស ហើយលោកក៏បានចោទប្រកាន់ប្រទេសនានាព្យាយាមលើកទឹកចិត្តផ្នែកពន្ធ ដើម្បីទាក់ទាញផលិតករភាពយន្តចេញពីអាមេរិក ។ ភាពយន្ត Hollywood និងភាពយន្តជាច្រើនទៀតរបស់អាមេរិកត្រូវបានបំផ្លាញ ហើយនេះជាការព្យាយាមរួមគ្នារបស់ប្រទេសនានា និងគំរាមកំហែងសន្តិសុខជាតិ ។

ទោះជារដ្ឋាភិបាលអាមេរិកពុំទាន់បញ្ជាក់ច្បាស់លាស់ពីការដាក់ពន្ធភាពយន្តបរទេស ប៉ុន្តែមន្ត្រីនាំពាក្យសេតវិមាន លោក Kush Desai និយាយថា អាមេរិកបានពិចារណាគ្រប់វិធីសាស្ត្រដើម្បីការពារស្ថិរភាពសេដ្ឋកិច្ច និងវិស័យភាពយន្តរបស់ខ្លួន ។

ការដាក់ពន្ធភាពយន្តខ្ពស់ធ្វើឱ្យបណ្តាវិនិយោគិនបារម្ភពីផលប៉ះពាល់មកលើភាពយន្តអាមេរិក ជាពិសេស ការចំណាយដើមទុនផលិតនឹងកើនឡើងខ្ពស់ ប៉ុន្តែចំនួនភាពយន្តដែលផលិតបាននឹងធ្លាក់ចុះ ។ លោក Benjamin Swinburne ប្រធានផ្នែកស្រាវជ្រាវប្រព័ន្ធផ្សព្វផ្សាយអាមេរិករបស់ Morgan Stanley ឱ្យដឹងថា ការដំឡើងពន្ធភាពយន្តបរទេស ១០០% គឺអាចធ្វើឱ្យផលិតករភាពយន្តអាមេរិកពិបាកសម្រេចចិត្តយ៉ាងខ្លាំងក្នុងការផលិតភាពយន្តអ្វីខ្លះ ។

លោក Swinburne ដាស់តឿនថា គោលនយោបាយដំឡើងពន្ធភាពយន្តបរទេសរបស់លោក Trump អាចជំរុញឱ្យប្រទេសនានាសងសឹកវិញ ដោយការដំឡើងពន្ធភាពយន្តអាមេរិក ឬបិទភាពយន្តអាមេរិកមិនឱ្យចាក់បញ្ចាំងក្នុងរោងកុន ។ ហេតុនេះ ភាពមិនច្បាស់លាស់ពាក់ព័ន្ធនឹងការដំឡើងពន្ធភាពយន្តបរទេសអាចបង្កហានិភ័យរយៈពេលវែងសម្រាប់ភាពយន្តអាមេរិក បើប្រទេសនានាដំឡើងពន្ធ ឬបិទភាពយន្តអាមេរិក ៕

សហរដ្ឋអាមេរិក ៖ កាលពីថ្ងៃទី៣ ខែឧសភា ឆ្នាំ២០២៥ សារព័ត៌មានបរទេសរាយការណ៍ថា វាពិតជាធ្វើឱ្យមានការភ្ញាក់ផ្អើលយ៉ាងខ្លាំង ពេលឃើញសត្វឆ្កែមានខ្លួនធំបំផុតបានជួបគ្នាជាមួយឆ្កែខ្លួនតូចបំផុតនៅលើពិភពលោកជាលើកដំបូងនៅរដ្ឋអៃដាហូ សហរដ្ឋអាមេរិក ហើយពួកវាងាកមុខរកគ្នា ដោយឆ្កែខ្លួនធំត្រូវឱនមុខចុះក្រោម រីឯឆ្កែខ្លួនតូចត្រូវងឿយមុខឡើងលើ ។ ឆ្កែទាំង២ក្បាលនេះត្រូវបាន Guinness World Records ចុះក្នុងកំណត់ត្រាពិភពលោក គឺជាឆ្កែមានទំហំខ្លួនធំបំផុត និងតូចបំផុត ។

ឆ្កែឈ្មោះ Reginald អាយុ៧ឆ្នាំ មកពីរដ្ឋអៃដាហូ សហរដ្ឋអាមេរិក ត្រូវបាន Guinness World Records ចុះក្នុងកំណត់ត្រាជាឆ្កែខ្ពស់បំផុតលើពិភពលោក ខណៈឆ្កែឈ្មោះ Pearl អាយុ៤ឆ្នាំ មកពីរដ្ឋផ្លរីដា ជាប់កំណត់ត្រាជាឆ្កែខ្លួនតូចបំផុតលើពិភពលោក ។ ទោះជាឆ្កែទាំង២ក្បាល មានទំហំខ្លួនខុសគ្នាយ៉ាងខ្លាំងក្តី ប៉ុន្តែការជួបគ្នាលើកដំបូងនេះ គឺពួកវាមានភាពស្និទ្ធស្នាលមិនគួរឱ្យជឿ ដូចជា ៖ ហិតក្លិនគ្នាទៅវិញទៅមក បក់កន្ទុយ និងរត់លេងគួរឱ្យស្រឡាញ់ ។

ឆ្កែខ្លួនតូចបំផុតឈ្មោះ Pearl មានប្រវែងខ្លួនត្រឹមតែជាង៩សង់ទីម៉ែត្រប៉ុណ្ណោះ ហើយអ្វីគួរឱ្យភ្ញាក់ផ្អើលបំផុតនោះ គឺ Pearl ពុំមែនជាឆ្កែខ្លួនតូចដោយចៃដន្យទេ ពីព្រោះឆ្កែឈ្មោះ Millie ត្រូវជាអ៊ំរបស់វា ក៏បានជាប់កំណត់ត្រាជាឆ្កែខ្លួនតូចបំផុតលើពិភពលោកដែរកន្លងមក ប៉ុន្តែ Millie បានងាប់កាលពីឆ្នាំ២០២០ ។ ឆ្កែ Millie និង Pearl មានទម្ងន់តែជាង២៨ក្រាមប៉ុណ្ណោះ តាំងពីពួកវាកើតមក ។

អ្នកស្រី Vanesa Semler គឺជាម្ចាស់ឆ្កែខ្លួនតូច Millie និង Pearl បាននិយាយដោយក្តីរំភើបថា ៖ «ខ្ញុំមិនធ្លាប់គិតសោះថា ខ្ញុំបានក្លាយជាម្ចាស់ឆ្កែខ្លួនតូចបំផុតលើពិភពលោក រហូតដល់២ក្បាល ។ វាពុំគួរឱ្យជឿពិតមែន» ។

ចំណែកឆ្កែឈ្មោះ Reginald បានជាប់កំណត់ត្រាជាឆ្កែមានកម្ពស់ខ្ពស់បំផុតលើពិភពលោក ដោយសារវាមានកម្ពស់រហូតដល់ជាង១ម៉ែត្រ ។ ទោះជាឆ្កែ Reginald មានខ្លួនធំខ្លាំងក្តី ប៉ុន្តែពេលវាបានជួបឆ្កែ Pearl មានខ្លួនតូចបំផុត គឺ Reginald បែរជាបង្ហាញអាកប្បកិរិយាគួរឱ្យស្រឡាញ់ ។ លោក Sam Johnson Reiss ជាម្ចាស់ Reginald និយាយថា ៖ «មើលទៅ Reginald ហាក់មានការប្រុងប្រយ័ត្នណាស់ ហើយវាក៏រំភើបដែរ ដោយសារវាពុំចង់ឱ្យឆ្កែតូច Pearl រងរបួសឈឺចាប់ ។ វាពុំបានលេងខ្លាំងៗជាមួយឆ្កែតូចទេ» ។

ទោះជាឆ្កែទាំង២ក្បាលការពារកន្លែងដេក និងរបស់លេងរៀងៗខ្លួន ប៉ុន្តែពួកវាអាចលេងជាមួយគ្នាយ៉ាងស្និទ្ធស្នាលអស់រយៈពេល២ថ្ងៃ ។ ការជួបគ្នាលើកដំបូងរបស់ពួកវា គឺរៀបចំឡើងដោយ Guinness World Records នៅរដ្ឋអៃដាហូ សហរដ្ឋអាមេរិក កាលពីខែមេសា ឆ្នាំ២០២៥ ៕

ទីក្រុងម៉ូស្គូ ៖ ប្រទេសរុស្ស៊ី បានចោ..ទប្រកាន់ទៅកាន់អ៊ុយក្រែនថា បានប្រើប្រាស់យន្តហោះគ្មានមនុស្សបើកមកវា..យប្រហារទីក្រុងម៉ូស្គូជាលើកទី៣ជាប់ៗគ្នាបណ្ដាលឲ្យអាកាសយានដ្ឋានអន្តរជាតិសំខាន់ៗចំនួន៤ ត្រូវផ្អាកជាបណ្ដោះអាសន្ន ទាំងដែលរុស្ស៊ីបានប្រកាសបទឈប់បា..ញ់រយៈពេល៣ថ្ងៃចាប់ពីថ្ងៃទី ៧ដល់ទី១០ ឧសភា កាលពីថ្មីៗនេះរួចមកហើយ។

យោងតាមសារព័ត៌មាន Reuters នៅថ្ងៃពុធ ទី៧ នេះបានឲ្យដឹងថា ៖ ខណៈពេលប្រទេសរុស្ស៊ីកំពុងធ្វើក្បួនដង្ហែរដើម្បីអបអរសាទរខួបជ័យជម្មះលើកទី៨០ក្នុងសង្រ្គាមលោកលើកទី២ អ៊ុយក្រែនបែរជាឆ្មក់វា..យប្រហារតាមរយៈយន្តហោះគ្មានមនុស្សបើកមកកាន់តំបន់សំខាន់ៗរបស់រុស្ស៊ី និងជាពិសេសទីក្រុងម៉ូស្គូ។ ក្នុងហេតុការណ៍ខាងលើ ប្រព័ន្ធការពារដែនអាកាសរបស់រុស្សក៏បានបា..ញ់ទម្លាក់ដ្រូនយ៉ាងហោចណាស់ ១៤គ្រឿង។

អ្នកនាំពាក្យវិមានក្រឹមឡាំង លោក Dmitry Peskov បាននិយាយកាលពីថ្ងៃអង្គារថា “ភ្លើងគួរត្រូវបានពន្លត់ ប៉ុន្តែទីក្រុង Kyiv បរាជ័យក្នុងការបញ្ឈប់វា ហើយនៅតែបន្តវា..យប្រហារមកកាន់ពួកយើង ដូច្នេះការឆ្លើយតបដ៏សមស្របមួយនឹងត្រូវបានផ្ដល់ឲ្យទៅកាន់អ៊ុយក្រែន”។

យោងតាមសារព័ត៌មានបរទេស ដោយសារតែបារម្ភពីបញ្ហាអសុវត្ថិភាពនៅក្នុងការប្រារព្ធពិធីខាងលើ ប្រធាននាធិបតីរុស្ស៊ីលោក Vladimir Putin បានបញ្ជារឲ្យបញ្ឈប់ការបា..ញ់កាំជ្រួចភ្លាមៗ និងជាសំណាងល្អមិនមាននរណាម្នាក់រងរបួសនោះទេ។

គួររំលឹកថា កាលពីសប្ដាហ៍មុនលោក ពូទីន បានប្រកាសបទឈប់បា..ញ់រយៈពេល៣ថ្ងៃជាឯតោភាគី ដើម្បីឲ្យស្របតាមកម្មវិធីបុណ្យជាតិដែលសហភាពសូវៀតទទួលបានជ័យជម្នះក្នុងសង្រ្គាមលោកលើកទី២ ចាប់ពីថ្ងៃទី៧ ដល់ទី១០ ខែឧសភា។ ប៉ុន្តែការលើកឡើងនេះត្រូវបានច្រានចោលពីភាគីអ៊ុយក្រែន ដោយលោក Volodymyr Zelenskyy បានបដិសេដនឹងសំណើរនេះ ហើយលោកគាំទ្រការឈប់បា..ញ់ដែលយូរជាងនេះ ។ លោក Zelenskyy ក៏បានចោ..ទប្រកាន់រុស្ស៊ីថា ៖ រុស្ស៊ីប្រកាសបែបនេះគ្រាន់តែជា “ការសម្ដែង” ប៉ុណ្ណោះ។ លោកបានបន្ថែមថា ៖ បទឈប់បា..ញ់គួរមានរយៈពេលយ៉ាងហោចណាស់ 30 ថ្ងៃ ហើយរុស្ស៊ីត្រូវបញ្ឈប់ការវាយប្រហារដោយមីស៊ីល និងយន្តហោះគ្មានមនុស្សបើកមកកាន់ជនស៊ីវិលផងដែរ។

យ៉ាងណាមិញ បន្ទាប់ពីមានការវា..យប្រហារដោតដ្រូននេះ ភាគីអ៊ុយក្រែននៅមិនទាន់ចេញសេចក្ដីអត្ថធិប្បាយនៅឡើយទេ ប៉ុន្តែអ្នកជំនាញខាងវិភាគនយោបាយបាននិយាយាថា ៖ ការវា..យប្រហារបែបនេះរបស់អ៊ុយក្រែន គឺជាផ្នែកដ៏សំខាន់មួយ ក្នុងការផ្ដល់ផលរំខានដល់ប្រតិបត្តិការយោធាររបស់រុស្ស៊ី និងខ្សែផ្គត់ផ្គង់ ជាពិសេសនៅពេលដែលរុស្ស៊ីកំពុងប្រារព្ធពិធីបុណ្យសំខាន់ៗបែបនេះ៕