ប្រទេសថៃ ៖ កាលពីថ្ងៃទី២៣ ខែមិថុនា ឆ្នាំ២០២៥ លោក ភីថា លីមចារើនរ៉ាត់ អតីតមេដឹកនាំគណបក្សកាវក្លៃនៅប្រទេសថៃ បានផ្តល់សម្ភាសន៍ពាក់ព័ន្ធនឹងតួនាទីរបស់កងទ័ពថា កងទ័ពមានតួនាទីការពារប្រទេសប៉ុណ្ណោះ ពុំមែនមានអំណាចគ្រប់គ្រងប្រទេសទេ ។ កងទ័ពនឹងការពារការឈ្លានពានពីក្រៅប្រទេស ប៉ុន្តែកងទ័ពពុំពាក់ព័ន្ធនឹងកិច្ចការនយោបាយ ឬជ្រៀតជ្រែកនយោបាយក្នុងប្រទេស ។

ការលើកឡើងរបស់អតីតមេដឹកនាំគណបក្សកាវក្លៃ ស្របពេលប្រទេសថៃមានបញ្ហាផ្ទៃក្នុង ហើយពលរដ្ឋថៃជំរុញឱ្យនាយករដ្ឋមន្ត្រី លោកស្រី ផេថងថាន ស៊ីណាវ៉ាត់ លាលែងពីតំណែងដើម្បីទទួលខុសត្រូវចំពោះការបែកធ្លាយកិច្ចសន្ទនារបស់លោកស្រីជាមួយសម្តេចតេជោ ហ៊ុន សែន ប្រធានព្រឹទ្ធសភាកម្ពុជា ។ ពលរដ្ឋថៃចង់បាននាយករដ្ឋមន្ត្រីថ្មីដែលដឹកនាំប្រទេសពុំផ្តល់អំណាចឱ្យកងទ័ព និងចង់ឱ្យលោក ភីថា លីមចារើនរ៉ាត់ អតីតមេដឹកនាំគណបក្សកាវក្លៃ ឡើងកាន់តំណែងជានាយករដ្ឋមន្ត្រីថ្មី ។

លោក ភីថា លីមចារើនរ៉ាត់ អតីតមេដឹកនាំគណបក្សកាវក្លៃ និយាយថា កន្លងមក ពួកយើងជាអតីតគណបក្សកាវក្លៃបានព្យាយាមជំរុញឱ្យកងទ័ពថៃបំពេញតួនាទីការពារប្រទេស និងបដិសេធកងទ័ពដែលព្យាយាមគ្រប់គ្រងប្រទេស ។ កងទ័ពមានតួនាទីនៅក្បែរពលរដ្ឋ គោរពសិទ្ធិមនុស្ស គ្មានអំពើពុករលួយ ប៉ុន្តែយើងបដិសេធកងទ័ពមានអំណាចគ្រប់គ្រងប្រទេស ប្រើប្រាស់អំណាចក្រៅប្រព័ន្ធ ធ្វើរដ្ឋប្រហារ ជ្រៀតជ្រែកនយោបាយ គ្រប់គ្រងពលរដ្ឋ យកថវិកាពលរដ្ឋហួសហេតុ និងធ្វើសង្គ្រាមព័ត៌មានប្រឆាំងពលរដ្ឋ ។

លោកបានតាមដានស្ថានការណ៍ព្រំដែនដោយក្តីបារម្ភដូចនឹងពលរដ្ឋទូទៅដែរ ប៉ុន្តែលោកពុំអូសទាញ ឬចាត់វិធានការទប់ទល់វិញ ដែលធ្វើឱ្យស្ថានការណ៍កាន់តែតានតឹង ឬមានជម្លោះខ្លាំងជាងនេះ ។ លោកជឿជាក់ថា គណបក្សប្រជាជននៅថៃកំពុងដាស់តឿនស្មារតី ណែនាំរដ្ឋាភិបាលថៃ ស្របពេលស្ថានការណ៍ផុយស្រួយ និងផ្លាស់ប្តូរគ្រប់ពេលវេលា ។ រីឯពលរដ្ឋចង់ឃើញរដ្ឋាភិបាលថៃដោះស្រាយបញ្ហាតានតឹងដោយប្រើប្រាស់វិធីជាច្រើនទៀត ពុំចាំបាច់ដោះស្រាយបញ្ហាដោយប្រើប្រាស់វិធានការកងទ័ព ។

ក្រៅពីនេះ លោក ភីថា បានលើកឡើងពីតំបន់អាស៊ានជំរុញឱ្យកម្ពុជា និងថៃដោះស្រាយបញ្ហាជាមួយគ្នាដោយសន្តិវិធី និងពុំចង់ឱ្យស្ថានការណ៍កាន់តែខ្លាំងជាងនេះ ។ បើមានឱកាសចរចា គឺលោកចង់ឱ្យប្រទេសទាំងពីរដកថយឱ្យឆ្ងាយបំផុតជាមុនសិន ហើយកម្ពុជា និងថៃអាចយកអូសចេញពីគំនរភ្លើង ដោយលោកនិយាយថា ភាពក្លាហានរបស់នាយករដ្ឋមន្ត្រីទាំងពីររូប គឺកើតឡើងដោយសន្តិភាព ពុំមែនសង្គ្រាម ។

លោកបានសិក្សាពីសម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីកម្ពុជា គឺជាមេដឹកនាំប្រទេសជំនាន់ថ្មីមានបារមី ហើយសម្តេចអាចបង្កើតសន្តិភាពរវាងប្រទេសទាំងពីរ ។ លោកក៏សូមផ្តាំផ្ញើទៅនាយករដ្ឋមន្ត្រីទាំងពីររូបផងដែរ គឺសម្តេចមហាបវរធិបតី ហ៊ុន ម៉ាណែត និងលោកស្រី ផេថងថាន ស៊ីណាវ៉ាត់ ជួយគ្នាដោះស្រាយបញ្ហាសេដ្ឋកិច្ចទាំងសងខាង ៕

ប្រទេសថៃ ៖ ប្រទេសថៃពុំបានបិទព្រំដែនជាប់កម្ពុជាទេ គឺច្រកព្រំដែនទាំងអស់នៅតែបើកដំណើរការធម្មតា គ្រាន់តែថៃរឹតបន្តឹងការឆ្លងដែនដើម្បីសុវត្ថិភាពក្រោយពីវាយតម្លៃស្ថានការណ៍ ។ រដ្ឋាភិបាលថៃគ្មានគោលនយោបាយហាមនាំចេញប្រេងឥន្ធនៈ អគ្គិសនី និងសេវាអ៊ីនធើរណេតទៅកម្ពុជា ប៉ុន្តែកម្ពុជាបានសម្រេចចិត្តផ្អាកដោយខ្លួនឯង ហើយថៃពុំអូសទាញពលរដ្ឋទាំងពីរប្រទេសឱ្យរងផលប៉ះពាល់ដោយសារបញ្ហាកើតឡើង ។ នេះបើតាមការលើកឡើងរបស់អ្នកនាំពាក្យមជ្ឈមណ្ឌលគ្រប់គ្រងស្ថានការណ៍ព្រំដែនកម្ពុជា-ថៃ កាលពីថ្ងៃទី២៤ ខែមិថុនា ឆ្នាំ២០២៥ ។

អ្នកនាំពាក្យមជ្ឈមណ្ឌលគ្រប់គ្រងស្ថានការណ៍ព្រំដែនកម្ពុជា-ថៃ លោក និកនឌេត ផ្លាំងគូន បាននិយាយកាលពីថ្ងៃទី២៤ ខែមិថុនា ថា ថៃពុំបានបិទព្រំដែន ឬពុំនាំចេញប្រេងឥន្ធនៈ អគ្គិសនី និងសេវាអ៊ីនធើរណេតទៅកម្ពុជាទេ គ្មានការផ្លាស់ប្តូរអ្វីទាំងអស់ក្នុងគោលនយោបាយពាណិជ្ជកម្ម និងកិច្ចសហការរវាងប្រទេសទាំងពីរ ។ ទំនាក់ទំនងពាណិជ្ជកម្ម និងសេដ្ឋកិច្ចរវាងកម្ពុជា-ថៃនៅតែដំណើរការធម្មតា គ្មានការផ្អាកឡើយ ។

ហេតុនេះ សូមពលរដ្ឋថៃ និងអាជីវកម្មថៃកុំយល់ខុស និងបារម្ភពីស្ថានការណ៍បច្ចុប្បន្ន ហើយរដ្ឋាភិបាលថៃនៅតែរក្សាទំនាក់ទំនងដ៏ល្អ និងសហការគ្រប់ផ្នែកជាមួយកម្ពុជាបន្តទៀត ។ ដូច្នេះ ពាណិជ្ជកម្មនៅតាមព្រំដែន រួមទាំងការនាំចេញប្រេងឥន្ធនៈ អគ្គិសនី និងសេវាអ៊ីនធើរណេតទៅកម្ពុជានៅតែដំណើរការធម្មតា គ្មានការរឹតបន្តឹងអ្វីទាំងអស់ ។

លោក និកនឌេត ផ្លាំងគូន បាននិយាយពីកងទ័ពភូមិភាគទី១ កងទ័ពភូមិភាគទី២ និងកងកម្លាំងការពារព្រំដែននៅខេត្តចាន់បុរី និងខេត្តត្រាត បញ្ជាឱ្យរឹតបន្តឹងការឆ្លងដែនគ្រប់ច្រកនៅជាប់កម្ពុជា គឺធ្វើតាមគោលនយោបាយរដ្ឋាភិបាលថៃក្រោយពីពិនិត្យមើលស្ថានការណ៍ក្នុងតំបន់ដើម្បីសុវត្ថិភាព និងការពារទ្រព្យសម្បត្តិពលរដ្ឋ ។ ការរឹតបន្តឹងព្រំដែនកម្ពុជា-ថៃ ក៏អនុវត្តតាមគោលនយោបាយរបស់រដ្ឋាភិបាលក្នុងការបង្ក្រាបឧក្រិដ្ឋកម្មឆ្លងដែន ជាពិសេស ការឆបោកតាមអនឡាញ ។

វាជាវិធានការគ្រប់គ្រង និងរឹតបន្តឹងនៅព្រំដែន ពុំមែនជាការបិទព្រំដែនដូចការផ្សព្វផ្សាយរបស់សារព័ត៌មាននានាទេ បច្ចុប្បន្ន ច្រកព្រំដែនទាំងអស់នៅតែបើកដំណើរការ មិនថាច្រកព្រំដែនអចិន្ត្រៃយ៍ ច្រកព្រំដែនបណ្តោះអាសន្ន និងច្រកដោះដូរទំនិញ ។ ប៉ុន្តែមានការរឹតបន្តឹងការឆ្លងដែនជាងមុន ដែលអនុវត្តតាមវិធានការទី១ និងទី២ ក្នុងចំណោម៤វិធានការ ។

ថៃអនុញ្ញាតឱ្យឆ្លងដែនសម្រាប់បុគ្គលមានការចាំបាច់ និងគោរពគោលការណ៍មនុស្សធម៌ ដូចជា ៖ អ្នកជំងឺសង្គ្រោះនៅមន្ទីរពេទ្យ កូនសិស្ស រួមទាំងការងារចាំបាច់សម្រាប់ជីវិតប្រចាំថ្ងៃពលរដ្ឋ ដូចជា ៖ ការទិញបន្លែ ផ្លែឈើ និងទំនិញប្រើប្រាស់ ។ រដ្ឋាភិបាលថៃគ្មានគោលនយោបាយហាមនាំចេញប្រេងឥន្ទនៈ អគ្គិសនី និងអ៊ីនធើរណេតទៅកម្ពុជាទេ ប៉ុន្តែកម្ពុជាបានសម្រេចចិត្តផ្អាកនាំចូលប្រេងពីថៃ ខណៈថៃមានគោលជំហរច្បាស់លាស់ គឺពុំទាញពលរដ្ឋទាំងពីរប្រទេសឱ្យរងផលប៉ះពាល់ដោយយសារបញ្ហាកើតឡើង ។ នេះបើតាមការលើកឡើងរបស់លោក និកនឌេត ផ្លាំងគូន ៕

ប្រទេសថៃ ៖ គ្រូទាយដ៏ល្បី អ្នកស្រី ប្រាយក្រាស៊ិប ដែលធ្លាប់ទស្សន៍ទាយត្រូវពីហេតុការណ៍គ្រោះរញ្ជួយដីនៅទីក្រុងបាងកក កន្លងមក បានទាយពីលក្ខណៈអនាគតនាយករដ្ឋមន្ត្រីថ្មីរបស់ថៃ ដែលធ្វើឱ្យពលរដ្ឋថៃចាប់អារម្មណ៍ម្តងទៀត ។ អ្នកស្រីបាននិយាយពីស្ថានការណ៍នយោបាយ ជាពិសេស ជោគវាសនារបស់រដ្ឋាភិបាល និងនាយករដ្ឋមន្ត្រីក្នុងកម្មវិធី Thairath Talk ថា រដ្ឋាភិបាលបច្ចុប្បន្ន អាចដឹកនាំប្រទេសពុំដល់៤ឆ្នាំ ឬកាន់តំណែងត្រឹមតែ៣ឆ្នាំកន្លះ ។

អ្នកស្រីក៏បានប្រាប់ពីលក្ខណៈរបស់នាយករដ្ឋមន្ត្រីថ្មីផងដែរ ដែលនឹងកាន់តំណែងបន្តពីលោកស្រី ផេថងថាន ស៊ីណាវ៉ាត់ គឺនាយករដ្ឋមន្ត្រីថ្មីជាមនុស្សប្រុស អាយុប្រមាណ៤០ឆ្នាំ មានរូបរាងខ្ពស់សង្ហា គ្រប់គ្រងអាជីវកម្មអចលនទ្រព្យ និងសណ្ឋាគារ ។ អនាគតនាយករដ្ឋមន្ត្រីថ្មីរូបនេះពុំធ្វើការពាក់ព័ន្ធនឹងនយោបាយទេ ប៉ុន្តែមានក្រុមគ្រួសារធ្វើនយោបាយ ហើយអ្នកជំនួញនេះនឹងឡើងកាន់តំណែងជានាយករដ្ឋមន្ត្រីថៃដោយគ្មានការបោះឆ្នោត ។ ទោះយ៉ាងណា នយោបាយថៃនាថ្ងៃអនាគត គឺអាស្រ័យលើស្ថានការណ៍ និងការសម្រេចចិត្តសំខាន់ៗ ។

កាលពីថ្ងៃទី២០ ខែមិថុនា ឆ្នាំ២០២៥ អ្នករៀបចំកម្មវិធី Thairath Talk សួរថា តើអ្នកគ្រូបានមើលឃើញពីអនាគតនាយករដ្ឋមន្ត្រីថៃហើយឬនៅ? អ្នកស្រី ប្រាយក្រាស៊ិប ឆ្លើយតបយ៉ាងលឿនថា ៖ «នាយករដ្ឋមន្ត្រីថ្មី គឺជាមនុស្សប្រុសមានកម្ពស់ខ្ពស់ រូបរាងសង្ហា ប្រកបមុខជំនួញអចលនទ្រព្យ និងមានលំនៅឋាន សណ្ឋាគារជាច្រើនកន្លែង ។ នាយករដ្ឋមន្ត្រីថ្មីមានអាយុប្រមាណ៤០ឆ្នាំ ប៉ុន្តែពុំមែនជាលោក ភីថា លីមចារើនរ៉ាត់ អតីតមេដឹកនាំគណបក្សកាវក្លៃ ហើយក៏ពុំមែនជាលោក ថាក់ណាថន ចឹងរុងរឿងកិច្ច អតីតប្រធានគណបក្សអនាគតថ្មី ទេ» ។

នាយករដ្ឋមន្ត្រីថ្មីអាចនឹងឡើងកាន់តំណែងដោយពុំឆ្លងកាត់ការបោះឆ្នោតដោយផ្ទាល់ ប៉ុន្តែមើលទៅ អាចមានកិច្ចព្រមព្រៀងអ្វីម្យ៉ាង ដែលធ្វើឱ្យលោកអាចឡើងកាន់តំណែងជំនួសលោកស្រី ផេថងថាន ស៊ីណាវ៉ាត់ ។ ប៉ុន្តែអ្នកស្រី ប្រាយក្រាស៊ិប ពុំអាចប្រាប់ពីមុខមាត់ច្បាស់លាស់ ពីព្រោះស្ថានការណ៍នយោបាយផ្លាស់ប្តូរគ្រប់ពេលវេលា ប៉ុន្តែបើមានហេតុការណ៍អ្វីកើតឡើង គឺអាចផ្លាស់ប្តូរនាយករដ្ឋមន្ត្រីមុនពេលអស់អាណត្តិ ។ នាយករដ្ឋមន្ត្រីថ្មីជាមនុស្សជិតស្និទ្ធនឹងអ្នកនយោបាយ និងមានអំណាចផ្នែកជំនួញ ។

គួរបញ្ជាក់ថា បេក្ខជននាយករដ្ឋមន្ត្រីថ្មី ចំនួន៥រូប ដែលថៃបានរៀបចំឱ្យឈរឈ្មោះត្រៀមកាន់តំណែងជំនួសលោកស្រី ផេថងថាន ស៊ីណាវ៉ាត់ គឺគ្មានបេក្ខជនណាម្នាក់មានអាយុប្រមាណ៤០ឆ្នាំ ដូចការលើកឡើងរបស់គ្រូទាយទេ ។ វាធ្វើឱ្យពលរដ្ឋថៃកាន់តែឆ្ងល់ខ្លាំងឡើង និងចង់ឃើញមុខមាត់នាយករដ្ឋមន្ត្រីថ្មីឆាប់ៗ ៕

ប្រទេសថៃ ៖ កាលពីថ្ងៃទី២៥ ខែមិថុនា ឆ្នាំ២០២៥ សារព័ត៌មាន Thairath រាយការណ៍ថា មជ្ឈមណ្ឌលគ្រប់គ្រងស្ថានការណ៍ព្រំដែនកម្ពុជា-ថៃ បានសំណូមពរឱ្យពលរដ្ឋថៃគួរបញ្ឈប់ការនិយាយញុះញង់ និងបំភ្លៃព័ត៌មានក្នុងបណ្តាញសង្គមដើម្បីកាត់បន្ថយភាពតានតឹង កុំឱ្យពលរដ្ឋទាំងពីរប្រទេស (ខ្មែរ-ថៃ) តទល់គ្នាទៅវិញទៅមកក្នុងបណ្តាញសង្គម ។

កាលពីថ្ងៃទី២៥ ខែមិថុនា នៅវិមានរដ្ឋាភិបាល អ្នកស្រី ម៉ារ៉ាទី ណាលិតា អាន់ដាម៉ូ អគ្គនាយករងនៃនាយកដ្ឋានព័ត៌មាន និងអ្នកនាំពាក្យរងក្រសួងការបរទេស បានសំណូមពរឱ្យពលរដ្ឋថៃឈប់និយាយញុះញង់ និងបំភ្លៃព័ត៌មានក្នុងបណ្តាញសង្គម កុំបង្កើនភាពតានតឹង និងធ្វើឱ្យពលរដ្ឋខ្មែរ-ថៃតទល់គ្នាទៅវិញទៅមកក្នុងបណ្តាញសង្គម ។ ព័ត៌មានមួយចំនួនមានគោលបំណងញុះញង់ បំភ្លៃខុសពីការពិត ក្នុងចេតនាធ្វើឱ្យស្ថានការណ៍ព្រំដែនកាន់តែតានតឹង រហូតឈានដល់ការបិទព្រំដែនជាមួយកម្ពុជា ។

រដ្ឋាភិបាលថៃចង់ឃើញពលរដ្ឋបញ្ចេញមតិស្ថាបនាក្នុងបណ្តាញសង្គម ពុំជ្រៀតជ្រែកកិច្ចការផ្ទៃក្នុងរបស់ប្រទេសជិតខាង ដើម្បីឱ្យស្ថានការណ៍ធូរស្រាល និងបង្កើតបរិយាកាសជជែកគ្នារកដំណោះស្រាយសម្រាប់ភាគីទាំងពីរ ជាពិសេស រដ្ឋាភិបាលត្រូវឆ្លើយតបជាមួយពលរដ្ឋ ។ គោលដៅសំខាន់របស់ថៃ ជាពិសេស ក្រសួងការបរទេស នៅតែចង់ឃើញការត្រឡប់មកកាន់តុចរចា ហើយសង្ឃឹមថា កម្ពុជានឹងឆ្លើយតបតាមការអញ្ជើញចូលរួមកិច្ចប្រជុំគណៈកម្មការព្រំដែនតំបន់ (RBC) ។

ក្រៅពីនេះ លោកស្រីក៏បាននិយាយពីលទ្ធផលកិច្ចប្រជុំមជ្ឈមណ្ឌលគ្រប់គ្រងស្ថានការណ៍ព្រំដែនកម្ពុជា-ថៃ ថា មានការរឹតបន្តឹងការចេញ-ចូលព្រំដែនកម្ពុជា-ថៃ ប៉ុន្តែថៃអនុញ្ញាតឱ្យឆ្លងដែនសម្រាប់បុគ្គលមានការចាំបាច់តាមគោលការណ៍មនុស្សធម៌ ចូលរួមកិច្ចប្រជុំ អ្នកជំងឺ និងសិស្ស និស្សិត ។ ជាក់ស្តែង នៅខេត្តសុរិន្ទ ខេត្តស្រះកែវ និងខេត្តចាន់បុរី បានបើកព្រំដែនបញ្ជូនអ្នកជំងឺខ្មែរចំនួន៧នាក់ ទៅសង្គ្រោះបន្ទាន់នៅមន្ទីរពេទ្យ ។

ការបិទព្រំដែនកម្ពុជា-ថៃ គឺស្របតាមសេចក្តីប្រកាសរបស់នាយករដ្ឋមន្ត្រី លោកស្រី ផេថងថាន ស៊ីណាវ៉ាត់ ដែលមានបំណងសំខាន់បង្ក្រាបឧក្រិដ្ឋកម្មឆ្លងដែន និងពុំសំដៅដល់ពលរដ្ឋទូទៅ ប៉ុន្តែរដ្ឋាភិបាលអនុវត្តវិធានការដើម្បីសុវត្ថិភាពពលរដ្ឋនៅព្រំដែនប្រទេសទាំងពីរ ។ រដ្ឋាភិបាលថៃនឹងសហការជាមួយប្រទេសនានាដើម្បីទប់ស្កាត់ការឆបោកតាមអនឡាញ ។

គួរបញ្ជាក់ថា រដ្ឋាភិបាលថៃបានចោទប្រកាន់ និងទម្លាក់កំហុសមកលើកម្ពុជា គឺជាទីតាំងឧក្រិដ្ឋឆ្លងដែន និងការឆបោកតាមអនឡាញ ទើបថៃសម្រេចបិទព្រំដែនទាំងអស់ជាមួយកម្ពុជា ពុំមែនបិទព្រំដែនដោយសារជម្លោះព្រំដែនឡើយ ។ ថៃចង់បង្ហាញទៅកាន់ពិភពលោកពីមូលហេតុបិទព្រំដែន ដើម្បីកុំប្រទេសនានាចោទប្រកាន់មកលើថៃបំបិទសិទ្ធិសេរីភាពការឆ្លងដែន ៕

ប្រទេសឥណ្ឌាបានបើកទំព័រប្រវត្តិសាស្ត្រថ្មីមួយក្នុងវិស័យអវកាសរបស់ខ្លួន ក្រោយពីបានបញ្ជូនអវកាសយានិកជនម្នាក់ទៅកាន់អាកាសជាលើកដំបូងក្នុងរយៈពេលជាង ៤ ទសវត្សរ៍។ កាលពីថ្ងៃទី ២៥ ខែមិថុនា ឆ្នាំ ២០២៥ អវកាសយានិកឥណ្ឌា លោក Shubhanshu Shukla បានចូលរួមក្នុងបេសកកម្មអវកាសអន្តរជាតិ Axiom Mission 4 (Ax-4) ដែលដឹកជញ្ជូនដោយយានអវកាស Crew Dragon របស់ក្រុមហ៊ុន SpaceX។ នេះបើតាមសារព័ត៌មាន BBC។

បេសកកម្មនេះបានធ្វើដំណើរឡើងពី មជ្ឈមណ្ឌលអវកាស Kennedy នៅរដ្ឋ Florida សហរដ្ឋអាមេរិក និងគ្រោងនឹងចុះចតនៅស្ថានីយអវកាសអន្តរជាតិ (ISS) នៅក្នុងរយៈពេលប្រហែល ២៦ ម៉ោង បន្ទាប់ពីការបង្ហោះ។ នេះគឺជាលើកដំបូងដែលអវកាសយានិកជនជាតិឥណ្ឌា ធ្វើដំណើរទៅដល់ ISS ហើយក៏ជាជំហានដ៏សំខាន់សម្រាប់ ISRO ក្នុងការរៀបចំសម្រាប់បេសកកម្មអវកាសជាតិផងដែរ។

លោក Shukla កឺជាមនុស្សទីពីររបស់ឥណ្ឌាហើយ ដែលបានធ្វើដំណើរទៅកាន់អវកាស បន្ទាប់ពីអវកាសយានិកប្រវត្តិសាស្ត្រ Rakesh Sharma ដែលធ្វើដំណើរជាមួយសហភាពសូវៀតនៅឆ្នាំ ១៩៨៤។ នៅពេលនោះ គាត់ជាអវកាសយានិក ISRO ដំបូងម្នាក់ ដែលធ្វើដំណើរទៅកាន់ ISS ហើយត្រូវបានមនុស្សជាច្រើនចាត់ទុកថាជាជំហានបើកផ្លូវដំបូង សម្រាប់ការបំពេញបេសកកម្មបញ្ជូនមនុស្សទៅអវកាស (Human Spaceflight) ដោយខ្លួនឯងរបស់ឥណ្ឌា។

គួរបញ្ជាក់ថាបេសកកម្ម Ax-4 នេះ មានអាវកាសិកជនចំនួន ៤ រូបបានចូលរួម រួមមាន Peggy Whitson មកពីសហរដ្ឋអាមេរិក ជាអ្នកគ្រប់គ្រងបេសកកម្ម និងជាស្ត្រីដែលមានរយៈពេលស្ថិតនៅអវកាសយូរបំផុតក្នុងប្រវត្តិសាស្ត្រ ព្រមទាំង Slawosz Uznański មកពីប្រទេសប៉ូឡូញ, Tibor Kapu ប្រទេសហុងគ្រី និងចុងក្រោយមកពីឥណ្ឌា លោក Shubhanshu Shukla។

ជាមួយ បេសកកម្មដែលបានរៀបចំដោយក្រុមហ៊ុនឯកជន Axiom Space ដែលជាការសហការរវាង NASA, ESA, SpaceX, និង ISRO លោក Shukla ត្រូវបានជ្រើសរើសពីកងអាកាសឥណ្ឌា បន្ទាប់ពីធ្វើការប្រកួតប្រជែងតាមលក្ខណៈវិជ្ជាជីវៈ។ លោកបានទទួលការបណ្ដុះបណ្ដាលយ៉ាងតឹងរឹងនៅអាមេរិក និងមូលដ្ឋានអវកាសផ្សេងទៀតក្នុងរយៈពេលជាច្រើនខែ ដើម្បីរៀបចំសម្រាប់ការធ្វើដំណើរមួយនេះ។ រដ្ឋភិបាលឥណ្ឌា បានចំណាយទឹកប្រាក់សរុបប្រមាណ ៥៩ លានដុល្លារ (ស្មើនឹងជាង ៥០០ កោដិរ៊ូពី) សម្រាប់ការចូលរួមនៅក្នុង Ax-4 រួមទាំងចំណាយសម្រាប់ការបណ្តុះបណ្តាល សុវត្ថិភាព និងផ្នែកបច្ចេកទេសផ្សេងៗ។

បន្ទាប់ពីឈានចូលទីអវកាស លោក Shukla បានផ្ញើសារមួយចេញពី Crew Dragon មកកាន់ប្រជាជនឥណ្ឌាថា “យើងបានត្រឡប់ទៅអវកាសវិញបន្ទាប់ពី ៤១ ឆ្នាំ។ ពេលនេះយើងកំពុងវិលជុំវិញភពផែនដីក្នុងល្បឿន ៧.៥ គីឡូម៉ែត្រក្នុងមួយវិនាទី។ ខ្ញុំកំពុងកាន់ទង់ជាតិឥណ្ឌា ដើម្បីបញ្ជាក់ពីកេរ្តិ៍ឈ្មោះរបស់យើង។ នេះគ្រាន់តែជាការចាប់ផ្តើមប៉ុណ្ណោះសម្រាប់កម្មវិធីអវកាសរបស់ឥណ្ឌា។”

ព្រឹត្តិការណ៍នេះបានធ្វើឲ្យប្រជាជនឥណ្ឌាជាច្រើនមានអារម្មណ៍រីករាយ និងមោទនភាពជាខ្លាំង។ អ្នកជំនាញបានថ្លែងថា ភាពជោគជ័យនេះអាចជួយជម្រុញឱ្យយុវជនឥណ្ឌាមានចំណាប់អារម្មណ៍ក្នុងវិស័យវិទ្យាសាស្ត្រនិងបច្ចេកវិទ្យា (STEM) កាន់តែខ្លាំងថែមទៀត។ នៅក្នុងអនាគតគេរំពឹងថា ឥណ្ឌានឹងស្ថាបនាស្ថានីយអវកាសជាតិមួយ នៅមុនឆ្នាំ ២០២៥ ហើយធ្វើដំណើរទៅឋានព្រះច័ន្ទ ក្នុងសតវត្សរ៍នេះ៕