បទចម្រៀងដំបូងរបស់ក្រុមចម្រៀងថ្មី Allday Project បន្តកើនឡើងខ្ពស់មិនគួរឱ្យជឿនៅលើតារាងតន្ត្រីកូរ៉េ។ ក្រុមថ្មីនេះស្ថិតក្រោមផលិតកម្ម Black Label ដែលបង្កើតឡើងដោយផលិតករ Teddy ដែលក្រុមមានសមាជិកចំនួន៥នាក់បានបង្ហាញខ្លួនជាផ្លូវការនៅថ្ងៃទី ២៣ខែមិថុនា តាមរយៈអាល់ប៊ុមខ្នាតតូចមានបទចម្រៀងពីរបទ «Famous» និង «Wicked«។
បន្ទាប់ពីការចេញផ្សាយរយៈពេល ១ ថ្ងៃ បទចម្រៀងទាំងពីររបស់ Allday Project បច្ចុប្បន្នកំពុងចូលក្នុងតារាងតន្ត្រីកំពូលភាគច្រើននៅក្នុងប្រទេសកូរ៉េ។ ជាពិសេសបទ «Famous» ទទួលបានលទ្ធផលអស្ចារ្យ។គិតត្រឹមល្ងាចថ្ងៃទី ២៤ ខែមិថុនា «Famous» បានកើនឡើងដល់TOP1 នៅលើ Bugs, TOP4 នៅលើ Flo, TOP4នៅលើ Genie និងឡើងដល់លេខ ៤ នៅលើ Melon Top 100 ដែលជាតារាងតន្ត្រីឌីជីថលដ៏ធំបំផុត នៅក្នុងប្រទេសកូរ៉េ។
គួរកត់សម្គាល់ថានៅលើតារាងប្រចាំថ្ងៃរបស់ Melon បទចម្រៀង «Famous» បានបង្ហាញខ្លួននៅលេខ ៤៦ ។ នេះគឺជាបទចម្រៀងក្រុម K-pop ដែលមានចំណាត់ថ្នាក់ខ្ពស់បំផុតទីពីរដែលបានបង្ហាញខ្លួននៅលើតារាងប្រចាំថ្ងៃរបស់ Melon មួយទសវត្សរ៍នេះ នៅពីក្រោយបទ «Attention» របស់ NewJeans ។
នៅលើ YouTube MV បទ «Famous» នៅតែឈរនៅលើកំពូលតារាងតន្ត្រីដែលកំពុងពេញនិយមរបស់យូធូបកូរ៉េហើយបច្ចុប្បន្នជាវីដេអូចម្រៀងដែលកំពុងពេញនិយមលេខ ២ នៅទូទាំងពិភពលោក។
ការទទួលបានចំណាត់ថ្នាក់ខ្ពស់ពីបទចម្រៀងដំបូង «Famous» បង្ហាញថា Allday Project កំពុងយកឈ្នះទស្សនិកជនជាមួយនឹងពណ៌តន្ត្រីផ្ទាល់ខ្លួន និងទេពកោសល្យ របស់សមាជិកម្នាក់ៗ។ក្រុមនេះត្រូវបានគេចាត់ទុកយ៉ាងខ្លាំងចំពោះបុគ្គលិកលក្ខណៈពិសេសរបស់សមាជិកនីមួយៗ។ ស្ទីលហ៊ីបហបរបស់ Allday Project គឺនឹកឃើញដល់រចនាប័ទ្មរបស់ YG Entertainment ដែល Teddy ធ្លាប់ជាអ្នកផលិតតន្ត្រីសម្រាប់ក្រុមល្បីៗជាច្រើនដូចជា Big Bang, 2NE1, Blackpink , Winner ។ Allday Project មិនទាន់បានឡើងឆាកដំបូងនៅឡើយទេ ប៉ុន្តែថ្មីៗនេះ វីដេអូច្រៀងផ្ទាល់របស់ក្រុមបានល្បីពេញអ៊ីនធឺណិតនិងទទួលបានការសរសើរជាខ្លាំង។
ចាប់ផ្តើមសប្តាហ៍នេះ Allday Project នឹងសម្តែងក្នុងកម្មវិធីតន្ត្រីប្រចាំសប្តាហ៍ដូចជា M Countdown និង Inkigayo ហើយក៏នឹងបង្ហាញខ្លួននៅលើកម្មវិធីកម្សាន្ត និងវិទ្យុ។
នៅថ្ងៃទី ២៦ ខែកក្កដា ក្រុមនេះគ្រោងនឹងសម្តែងនៅក្នុងព្រឹត្តិការណ៍ SBS Summer Gayo Daejeon 2025។ បន្ទាប់មក នៅដើមខែសីហា Allday Project នឹងត្រូវបានបញ្ចូលក្នុងក្រុមសិល្បករនៃមហោស្រពតន្ត្រីប្រចាំឆ្នាំ KCON Los Angeles ៕
