Huang Zitao បដិសេធការពពោះជំនួសនិងត្រៀមចាត់វិធានការតាមច្បាប់

យោងតាមសារព័ត៌មាន Sina Entertainment កាលពីថ្ងៃទី២៥ ខែមិថុនា វីដេអូរបស់ ម្តាយរបស់តារាស្រី Xu Yiyang និងមេដោះម្នាក់កំពុងបីទារកត្រឡប់មកផ្ទះវិញត្រូវបាន ផ្សព្វផ្សាយតាមប្រព័ន្ធអ៊ីនធឺណេតនាពេលថ្មីៗនេះដែលបង្កឱ្យមានការរំពឹងទុក យ៉ាងខ្លាំង។

កាលពីកន្លងទៅនេះអ្នកនិយមលេងអ៊ីនធឺណិតមួយចំនួនបានអះអាងថា ពួកគេបានជួប Huang Zitao និង Xu Yiyang អំឡុងពេលពិនិត្យផ្ទៃពោះនៅសហរដ្ឋអាម៉េរិក ហើយអ្នកទាំងពីរបានរស់នៅសហរដ្ឋអាម៉េរិកមួយរយៈ។ នេះបានជំរុញឱ្យមាន ពាក្យចចាមអារ៉ាមថា Huang Zitao និង Xu Yiyang ឱ្យគេពរពោះកូនជំនួស។

ផ្ទុះពាក្យចចាមអារ៉ាមពេញបណ្តាញសង្គមនៅថ្ងៃទី ២៥ ខែមិថុនា ស្ទូឌីយ៉ូរបស់ Huang Zitao បានចេញសេចក្តីថ្លែងការណ៍ដ៏មួយដោយបញ្ជាក់ថា ព័ត៌មានមិនពិត និងការព្យាបាទអំពីអ្វីដែលហៅថា «ការពពោះជំនួស» របស់លោក Huang Zitao និង Xu Yiyang ដែលជាភរិយាគឺជាការប្រឌិត កុហកយ៉ាងធ្ងន់ធ្ងរ ហើយបានបង្កការខូចខាតយ៉ាងធ្ងន់ធ្ងរដល់សិទ្ធិកេរ្តិ៍ឈ្មោះរបស់តារាទាំងពីរ។ ក្នុងសេចក្តីថ្លែងការណ៍បានបញ្ជាក់ថាអ្នកទាំងពីរ មិនដែលអនុវត្ត ឬចូលរួមក្នុងទម្រង់នៃការពពោះជំនួសឡើយ។ ពាក្យចចាមអារ៉ាមពាក់ព័ន្ធគឺជាការបង្កាច់បង្ខូចយ៉ាងធ្ងន់ធ្ងរ និងការជ្រៀតជ្រែកដោយគ្មានហេតុផលនៅក្នុងជីវិតឯកជនរបស់សិល្បករ។ ដើម្បីឆ្លើយតបទៅនឹងស្ថានភាពនេះ ស្ទូឌីយោបានប្រគល់ឱ្យមេធាវីដើម្បីបន្តការទទួលខុសត្រូវតាមផ្លូវច្បាប់របស់អ្នកប្រើប្រាស់ដែលពាក់ព័ន្ធ។ ទោះជាយ៉ាងនេះក្តី សេចក្តីថ្លែងការណ៍មិនបានបដិសេធយ៉ាងច្បាស់ថា Huang Zitao និង Xu Yiyang មានកូននោះទេ។

គួរបញ្ជាក់ផងដែរថា Huang Zitao និង Xu Yiyang បានប្រកាសចំណងស្នេហ៍ជាសាធារណៈកាលពីថ្ងៃទី១៤ ខែកក្កដា ឆ្នាំ២០២៤ ខណៈអ្នកទាំងពីរមានពាក្យចចាមអារ៉ាមស្នេហាក្នុងឆ្នាំ២០២០។ នៅខែសីហា ២០២៤ Huang Zitao បានស្នើសុំ Xu Yiyang រៀបការហើយនៅថ្ងៃទី២ ខែធ្នូ ឆ្នាំ ២០២៤ បានបង្ហាញសំបុត្រអាពាហ៍ពិពាហ៍របស់ពួកគេ។ Huang Zitao មិនត្រឹមតែតារាចម្រៀងនិងសម្តែងប៉ុណ្ណោះទេប៉ុន្តែគឺជាសេដ្ឋីវ័យក្មេងព្រោះលោក
ត្រូវបានគេរាយការណ៍ថាបានទទួលមរតកទ្រព្យសម្បត្តិប្រមាណ ៣ពាន់លានដុល្លារអាម៉េរិកពីឪពុកអ្នកជំនួញរបស់ខ្លួនក្នុងឆ្នាំ២០២០៕