ប្រទេសថៃ ៖ នាយករដ្ឋមន្ត្រីថៃ លោកស្រី ផេថងថាន ស៊ីណាវ៉ាត់ បានបញ្ជាឱ្យសមត្ថកិច្ចចា.ប់ខ្លួនជនល្មើ.សដែលបង្កចលាចលនៅបណ្តាខេត្តភាគខាងត្បូងដើម្បីផ្តល់សុវត្ថិភាពដល់ពលរដ្ឋ ហើយស្នើឱ្យុប្រព័ន្ធផ្សព្វផ្សាយកុំប្រើពាក្យប្រកាន់ពូ.ជសាសន៍ និងសាសនា ដោយរដ្ឋាភិបាលថៃនឹងព្យាយាមដោះស្រាយបញ្ហាអសន្តិសុខនៅខេត្តភាគខាងត្បូង ។ នេះបើតាមការចុះផ្សាយរបស់សារព័ត៌មានថៃ Khaosod កាលពីថ្ងៃទី៦ ខែឧសភា ឆ្នាំ២០២៥ ។

នាយករដ្ឋមន្ត្រីថៃ លោកស្រី ផេថងថាន បានផ្តល់សម្ភាសន៍ជាមួយប្រព័ន្ធផ្សព្វផ្សាយនៅវិមានរដ្ឋាភិបាល កាលពីថ្ងៃទី៦ ខែឧសភា ក្រោយពីបញ្ចប់កិច្ចប្រជុំគណៈរដ្ឋមន្ត្រីពាក់ព័ន្ធនឹងស្ថានការណ៍អសន្តិសុខនៅខេត្តភាគខាងត្បូងថា រដ្ឋាភិបាលពុំគាំទ្រការប្រើប្រាស់អំពើហិង្សាណាទាំងអស់ ហើយរដ្ឋាភិបាលបានបញ្ជាឱ្យភ្នាក់ងារពាក់ព័ន្ធចាត់ការបញ្ហានេះរួចហើយ ។

រដ្ឋាភិបាលបានបញ្ជាទៅកងទ័ព សមត្ថកិច្ច និងជជែកជាមួយលោក Phumtham Wechayachai ឧបនាយករដ្ឋមន្ត្រី និងរដ្ឋមន្ត្រីក្រសួងការពារជាតិ ឱ្យត្រៀមកងកម្លាំងការពារសន្តិសុខយ៉ាងតឹងរ៉ឹង ។ ការជជែកគ្នានេះដើម្បីឱ្យកងកម្លាំងទាំងអស់អាចស្នើសុំការគាំទ្រពីរដ្ឋាភិបាល ឬរដ្ឋាភិបាលអាចជួយអ្វីបានខ្លះ?

លោកស្រីថ្លែងថា ៖ «ខ្ញុំចង់សង្កត់ធ្ងន់ និងសុំការសហការពីប្រព័ន្ធផ្សព្វផ្សាយ គឺពុំចង់ឱ្យផ្សាយព័ត៌មានបែងចែកសាសនា ជាតិសាសន៍ ពីព្រោះមនុស្សគ្រប់រូបតែងមានគ្រួសារ ។ យើងពុំបែងចែកទេ ពុំគួរប្រើប្រាស់អំពើហិង្សា រដ្ឋាភិបាលមិនគាំទ្រអំពើហិង្សា ពីព្រោះមនុស្សគ្រប់រូបដែលស្លាប់ទៅសុទ្ធតែមានតម្លៃ ។ ដូច្នេះ ខ្ញុំចង់ឱ្យជួយគ្នាកុំបែងចែកសាសនា ជាតិសាសន៍» ។

ភ្នាក់ងារសន្តិសុខបានវិភាគពីហេតុការណ៍ចលាចលកើតឡើងនៅខេត្តភាគខាងត្បូង គឺវាកើតឡើងដោយសារជម្លោះជាច្រើនយ៉ាង រដ្ឋាភិបាលបានបង្កើនកងកម្លាំងការពារសន្តិសុខដល់ពលរដ្ឋក្នុងតំបន់ ពីព្រោះខេត្តភាគខាងត្បូងបានកើតអំពើហិង្សាជាថ្មីដូចកាលពី២០ឆ្នាំមុន ។ កងទ័ពបានបង្កើតប៉ុស្តិ៍ត្រួតពិនិត្យរួចហើយ ហើយជនណាម្នាក់ប្រព្រឹត្តខុស ត្រូវតែទទួលទោសតាមច្បាប់ ។

ចំណែកលទ្ធផលការស្ទង់មតិបង្ហាញថា ពលរដ្ឋថៃពុំជឿជាក់លើការដោះស្រាយបញ្ហាអសន្តិសុខនៅខេត្តភាគខាងត្បូងរបស់រដ្ឋាភិបាល លោកស្រី ផេថងថាន ថ្លែងថា រដ្ឋាភិបាលបានដោះស្រាយបញ្ហារហូតមក ។ បច្ចុប្បន្ន អំពើហិង្សានៅខេត្តភាគត្បូងកើនឡើងខ្លាំង ដែលត្រូវបង្កើនកងកម្លាំងក្នុងតំបន់ និងផ្តោតលើសុវត្ថិភាពពលរដ្ឋ ហើយរដ្ឋាភិបាលបានតាមដានស្ថានការណ៍នេះជានិច្ច ។

រដ្ឋាភិបាលបានបញ្ជាឱ្យសមត្ថកិច្ចចាប់ខ្លួនជនល្មើសបង្កចលាចល និងបង្កអសន្តិសុខក្នុងតំបន់ អ្នកប្រព្រឹត្តខុសត្រូវទទួលទោសតាមច្បាប់ បើមិនដូច្នោះទេ ជនស្លូតត្រង់នឹងរស់នៅគ្មានសុវត្ថិភាព ។ បើពុំអាចចាប់ខ្លួនជនល្មើសបានទេ ពលរដ្ឋក្នុងតំបន់នឹងពិបាករស់នៅ រដ្ឋាភិបាលបានញ្ជាទៅភ្នាក់ងារពាក់ព័ន្ធថា តើពួកគេត្រូវធ្វើអ្វីខ្លះ?

នាយកក្រុមហ៊ុន Microsoft លោក Bill Gates បានដាស់តឿនទៅកាន់ពលរដ្ឋលើពិភពលោកម្តងទៀតថា បច្ចេកវិទ្យា AI កំពុងតែផ្លាស់ប្តូរការងារលើពិភពលោកទាំងស្រុង ជាពិសេស រយៈពេល១០ឆ្នាំខាងមុខ វានឹងធ្វើការសំខាន់ៗជំនួសមនុស្ស ។ លោកសន្និដ្ឋានថា AI នឹងធ្វើការងារសំខាន់ៗជាច្រើនជំនួសមនុស្ស និងពុំលើកលែង សូម្បីតែការងារជាគ្រូពេទ្យ និងគ្រូបង្រៀន ។

កាលពីថ្ងៃទី២៩ ខែមេសា ឆ្នាំ២០២៥ សារព័ត៌មានបរទេសបានចុះផ្សាយពីបទសម្ភាសន៍ចុងក្រោយបង្អស់របស់លោក Bill Gates ដែលលើកឡើងពីការគិតរបស់ AI គឺវាអាចផ្តល់ប្រឹក្សាផ្នែកវេជ្ជសាស្ត្រ និងអប់រំមនុស្សដោយឥតគិតថ្លៃ ដែលមនុស្សគ្រប់រូបលើពិភពលោក នឹងអាចប្រើប្រាស់ AI បានទាំងអស់ ។

លោក Bill Gates ទទួលស្គាល់ថា ការងារមួយចំនួនដែល AI ពុំអាចធ្វើជំនួសមនុស្ស ដូចជា ៖ លេងកីឡា ឬធ្វើការងារក្នុងសង្គមដែលត្រូវការការចូលរួម ប៉ុន្តែលោកជឿជាក់ថា ឧស្សាហកម្មផលិត ការដឹកជញ្ជូន និងការងារកសិកម្ម នឹងត្រូវជំនួសដោយបច្ចេកវិទ្យាទាំងស្រុង ពុំចាំបាច់ប្រើប្រាស់កម្លាំងមនុស្សទេ ។

ការអភិវឌ្ឍបច្ចេកវិទ្យា AI យ៉ាងឆាប់រហ័សនាពេលបច្ចុប្បន្ន គួរឱ្យភ្ញាក់ផ្អើល និងគួរឱ្យភ័យខ្លាច ហើយនេះជាឱកាសសំខាន់ក្នុងការដោះស្រាយបញ្ហារបស់ពិភពលោក ដូចជា ៖ ការប្រើប្រាស់សេវាសុខភាព វិសមភាពការអប់រំ និងបម្រែបម្រួលអាកាសធាតុ ។ ជាមួយគ្នានេះ នៅតែមានសំណួរសួរថា តើ AI នឹងក្លាយជាឧបករណ៍មួយជួយពង្រឹងសក្តានុពលរបស់មនុស្ស ឬធ្វើការជំនួសយើងជារៀងរហូត?

ប៉ុន្តែលោកថា បើទោះជា AI ឆ្លាតយ៉ាងណាក្តី ប៉ុន្តែវាក៏មានកំហុសឆ្គងផងដែរ ពីព្រោះវាមិនដឹងពីរបៀបត្រួតពិនិត្យចម្លើយរបស់ខ្លួន ។ វានឹងជួយបង្កើនប្រសិទ្ធភាពផ្នែកវេជ្ជសាស្ត្រ និងការអប់រំ ប៉ុន្តែមនុស្សនៅតែអាចគ្រប់គ្រងវាបាន មុនពេលវាគ្រប់គ្រងយើង ។

ស្របពេលពិភពលោកឈានទៅរកការប្រើប្រាស់បច្ចេកវិទ្យា AI ដ៏ទំនើប គឺការដាស់តឿនរបស់លោក Bill Gates បញ្ជាក់ថា បច្ចេកវិទ្យាមិនត្រឹមតែផ្តល់ភាពងាយស្រួល ឬរីកចម្រើនប៉ុណ្ណោះទេ ប៉ុន្តែយើងត្រូវគិតពីផលប៉ះពាល់រយៈពេលយូរ ។ លោកចង់ឱ្យពិភពលោកត្រៀមខ្លួន មុនពេល AI ផ្លាស់ប្តូរពិភពលោក ហើយយើងគ្មានឱកាសត្រៀមខ្លួន ។

តាមអ្នកជំនាញជាច្រើនរូប គឺការផ្លាស់ប្តូរនេះអាចបង្កឱ្យសេដ្ឋកិច្ចពិភពលោកចលាចល និងប៉ះពាល់ស្ទើរគ្រប់ឧស្សាហកម្មទាំងអស់ ហើយពិភពលោកត្រូវត្រៀមខ្លួនដោះស្រាយបញ្ហានាថ្ងៃអនាគត ដែលបច្ចេកវិទ្យានឹងបំពេញតួនាទីច្រើនជាងមនុស្សជាច្រើនផ្នែក ។ ពិភពលោកបានផ្លាស់ប្តូរយ៉ាងឆាប់រហ័សមិនធ្លាប់កើតឡើងពីមុនមក សំណួរគឺ តើយើងបានត្រៀមខ្លួនទទួលយកបច្ចេកវិទ្យាហើយឬនៅ?

ប្រទេសថៃ ៖ ក្នុងព្រះរាជពិធីបុណ្យច្រត់ព្រះនង្គ័ល ពុទ្ធសករាជ ២៥៦៨ (គ.ស ២០២៥) នៅទីធ្លា ព្រះរាជពិធីច្រត់ព្រះនង្គ័ល នាថ្ងៃទី ៩ ឧសភា គោឧសភរាជទាំង២ បានបរិភោគស្មៅ ផឹកទឹក និងផឹកស្រាបផងដែរ ដែលសម្រាប់លទ្ធផលនេះ ហោរាថៃទាយថានឹងមានដំណើរការល្អក្នុងវិស័យកសិកម្ម និងទំនាក់ទំនងពាណិជ្ជកម្មជាមួយបរទេស។

នៅក្នុងព្រះរាជពិធីបុណ្យច្រត់ព្រះនង្គ័លថៃឆ្នាំនេះ ដែលបានប្រព្រឹត្តទៅនៅបរិវេណព្រះបរមរាជវាំង Grand Palace ក្នុងក្រុងបាងកកក្រោមព្រះរាជវត្តមានព្រះមហាក្សត្រ Maha Vajiralongkorn គោឧសភរាជមួយនឹម ត្រូវបានគេរៀបចំអាហារចំនួន៧មុខដែលដាក់នៅលើថាសមាសដើម្បីឲ្យបរិភោគ។ ក្នុងអំឡុងពេលនោះ គោឧសភរាជទាំង២ បានជ្រើសរើសបរិភោគស្មៅ ផឹកទឹក និងបន្ទាប់មកផឹកស្រាផងដែរ។ ក្នុងក្បួនទំនាយរបស់ព្រះរាជគ្រូហោរានៃប្រទេសថៃបានទាយថា គោពិសិដ្ឋ “ស៊ីស្មៅ និងផឹកទឹក” ទំនាយទាយថានឹងមានការផ្គត់ផ្គង់ទឹកច្រើនគួរសម រួមជាមួយដំណាំធញ្ញជាតិ ផ្លែឈើ អាហារ និងសាច់បាននឹងបានផលដ៏ច្រើនសន្ធឹកសន្ធាប់។ លើសពីនេះ គោ “ផឹកស្រា” បើតាមក្បួនច្បាប់គេព្យាករណ៍ថា ការដឹកជញ្ជូនទៅមកនឹងកាន់តែងាយស្រួល ជាពិសេសការធ្វើពាណិជ្ជកម្មជាមួយអន្តរជាតិនឹងប្រសើរឡើង ហើយសេដ្ឋកិច្ចនឹងរីកចម្រើនផងដែរ។

គួរជម្រាបថា ប្រទេសកម្ពុជា និងថៃមានទំនៀមទម្លាប់ក្នុងការរៀបចំព្រះរាជពិធីច្រត់ព្រះនង្គ័លនេះដូចគ្នា ស្ថិតនៅក្នុងខែតែមួយ និងប្រារព្ធឡើងក្នុងគោលបំណងដូចគ្នាផងដែរ ពោលគឺធ្វើឡើងដើម្បី ជាសារប្រកាសប្រាប់បណ្តាប្រជាកសិករទាំងអស់ ឱ្យដឹងអំពីរដូវកាលនៃការធ្វើស្រែវស្សា និងដំណាំដាំដុះផ្សេងៗ ព្រមទាំងប្រាប់ពីប្រផ្នូលរបស់ប្រទេស តាមរយៈការបរិភោគរបស់គោឧសភរាជ។

ប៉ុន្តែទោះជាយ៉ាងណា សម្រាប់ការទស្សន៍ទាយនៃលទ្ធផលបរិភោគរបស់គោ ថៃហាក់មានការយល់ឃើញផ្ទុយពីខ្មែរយើងទៅវិញ។ ជាពិសេសទៅលើការដែលគោឧសភរាជ “ស៊ីស្មៅ និង ផឹកស្រា” ដោយថៃយល់ថា នៅពេលដែលគោ “ស៊ីស្មៅ” នោះបានន័យថាដីមានជីជាតិល្អផលដំណាំអ្វីក៏នឹងទទួលបានផលច្រើន។ ចំណែកបើគោ “ផឹកស្រា” នោះសំដៅដល់ការជួបជុំជល់កែវអបអរ ការបង្កើតទំនាក់ទំនងពាណិជ្ជកម្ម និងការទូតជាមួយបណ្តាប្រទេសជាមិត្ត នឹងដំណើរទៅដោយរលូនយ៉ាងល្អប្រសើរ។

ដោយឡែក សម្រាប់ទំនាយខ្មែរយើងប្រសិនបើ “គោស៊ីស្មៅ” នោះទំនាយទាយថា នឹងមានជំងឺអុតត្បាតទាំងឡាយកើតលសត្វពាហនៈ។ រីឯប្រសិនបើគោ “ផឹកស្រា” ទំនាយទាយថា នឹងកើតមនុស្សពាល ចោរលួចចោរប្លន់ បញ្ហាអសន្តិសុខជាដើម …។ល៕

សហរដ្ឋអាមេរិក ៖ ភ្នំភ្លើងក្រោមទឹកមួយ ដែលស្ថិតនៅចម្ងាយប្រមាណ ៣០០ម៉ាយ (៤៨០គ.ម) ពីឆ្នេរសមុទ្ររបស់រដ្ឋ Oregon សហរដ្ឋអាមេរិក កំពុងបញ្ចេញកម្ដៅ និងពពុះទឹកឡើងមកលើដែលជាការបង្ហាញសញ្ញាថាវានឹងមានការផ្ទុះឡើងឆាប់ៗ។ នេះបើយោងតាមសារព័ត៌មានបរទេស CNN កាលពីថ្ងៃព្រហស្បត្តិ៍ ទី៨ ឧសភា។

ភ្នំភ្លើងសកម្មមួយនេះមានឈ្មោះថា Axial Seamount គឺជាភ្នំភ្លើងក្រោមទឹមួយស្ថិតនៅក្រោមបាតសមុទ្រ មានកម្ពស់ប្រហែល ៤,៩០០ហ្វីត (ប្រមាណ ១,៤៩០គ.ម) នៅខាងក្រោមផ្ទៃមហាសមុទ្រប៉ាស៊ីហ្វិក បានបញ្ចេញបញ្ចេញកម្ដៅរបស់វាពីក្រោមផ្ទៃទឹកមក នាំឲ្យអ្នកជំនាញមានការព្រួយបារម្ភពីការផ្ទុះឡើងម្ដងទៀត។

គួររំលឹកថា កន្លងមកភ្នំភ្លើងនេះធ្លាប់បានផ្ទុះឡើងចំនួន៣ដងមកហើយ ដោយបានផ្ទុះនៅក្នុងឆ្នាំ១៩៩៨, ឆ្នាំ២០១១, ឆ្នាំ២០១៥ និងត្រូវគេសន្និដ្ឋានថាអាចផ្ទុះឡើងម្ដងទៀតមិនខាន នៅមុនពេលដាច់ឆ្នាំ២០២៥នេះ។

មូលហេតុដែលវាជាភ្នំភ្លើងសកម្ម គឺដោយសារតែវាមានទីតាំងស្ថិតនៅលើខ្សែ Juan de Fuca ជាចំណុចផ្សារភ្ជាប់រវាងផ្ទាំងបន្ទះ Pacific និង Juan de Fuca ដែលដាច់ចេញពីគ្នា។ អ្នកវិទ្យាសាស្រ្តបានកត់សម្គាល់ថា ផ្ទៃដីនៅតំបន់នេះចាប់ផ្ដើមមានចលនារង្គើរម្ដងទៀតហើយ ព្រោះចំនួនម៉ាក់ម៉ាបានកើនឡើងខ្ពស់ ហើយវាអាចនឹងបង្ករឲ្យមានរញ្ជួយដីកម្រិតស្រាលច្រើនដងផងដែរក្នុងមួយថ្ងៃៗ។

ចំណែកក្ដីបារម្ភទៅលើផលប៉ះពាល់ដែលអាចកើតមានពេលភ្នំភ្លើងខាងលើនេះផ្ទុះគឺ វាអាចបង្ករជារលកយក្សស៊ូណាមិ ព្រោះពេលផ្ទុះវានឹងមានកម្លាំងជំរុញពីក្រោមទឹកមក។ ដូច្នេះជីវិតមនុស្ស សត្វ ដែលនៅជុំវិញនោះ នឹងប្រឈមជាមួយការគំរាមកំហែង ដែលទាមទារឲ្យមានការជម្លៀសចេញ មុនពេលរឿងទាំងនោះកើតឡើង។ ក្រៅពីនេះ កម្ដៅ និងកម្លាំងដែលកើតមានក្នុងអំឡុងពេលផ្ទុះនោះ ក៏នឹងបំផ្លិចបំផ្លាញប្រព័ន្ធអេកូឡូស៊ីរបស់សមុទ្រនៅតំបន់នោះផងដែរ។

បច្ចុប្បន្នភ្នំភ្លើងក្រោមទឹក Axial Seamunt នេះត្រូវបានតាមដានយ៉ាងយកចិត្តទុកដាក់ពីក្រុមអ្នកជំនាញ Ocean Observatories Initiative’s Regional Cabled Array ដែលផ្ដល់ទិន្នន័យពីពេលវេលាពិតនៃសកម្មភាពរញ្ជួយដី និងចលនាផែនដីក្រោមផ្ទៃសមុទ្រ៕

ប្រទេសអូស្ត្រាលី ៖ តុលាការនៅទីក្រុង Melbourne ប្រទេសអូស្ត្រាលី បានកាត់ក្តីឱ្យក្រុមហ៊ុនច្បាប់មួយឈ្មោះ Erudite Legal បង់ប្រាក់ពិន័យក្រោយពីនារីម្នាក់ជាអតីតបុគ្គលិកបានប្តឹងក្រុមហ៊ុននេះ ដោយសារបង្ខំឱ្យនាងធ្វើការរយៈពេល២៤ម៉ោង ធ្វើឱ្យសុខភាពទ្រុឌទ្រោម គ្មានពេលវេលាថែទាំគ្រួសារ ថែមទាំងបង្ខំឱ្យនាងធ្វើអ្វីប្លែកៗ ដូចជា ៖ ទៅមើលកុនពេលយប់ ។ តុលាការចាត់ទុកថា នេះជាការល្មើសច្បាប់ការងារ និងបង្កើតបរិយាកាសការងារគួរឱ្យស្អ.ប់ខ្ពើ.ម ។

ដើមបណ្តឹងជាមេធាវីស្រី និងជាអតីតបុគ្គលិកក្រុមហ៊ុន Erudite Legal បាននិយាយទៅកាន់តុលាការថា នាងទទួលបានប្រាក់ខែពីក្រុមហ៊ុននេះទាបជាងស្តង់ដារ គឺត្រឹមតែ៨,០០០ដុល្លារប៉ុណ្ណោះក្នុងរយៈពេល៣សប្តាហ៍ ប៉ុន្តែនាងត្រូវធ្វើការចាប់ពី១២ម៉ោង ទៅ១៨ម៉ោងក្នុង១ថ្ងៃ ។ ដើមបណ្តឹងដែលពុំប្រាប់ឈ្មោះអះអាងថា នាងត្រូវធ្វើការរហូតដល់២៤ម៉ោងក្នុងសប្តាហ៍ទី១ គឺចាប់ពីថ្ងៃត្រង់ថ្ងៃដំបូង រហូតដល់ថ្ងៃត្រង់នាថ្ងៃបន្ទាប់ ទើបបានសម្រាក ។

លោក Shivesh Kuksal ជានាយកក្រុមហ៊ុនប្រាប់នាងឱ្យសម្រាកតែ២-៣ម៉ោងប៉ុណ្ណោះ ហើយឱ្យនាងធ្វើការបន្ត ។ ចាប់ពីពេលនោះមក នាងត្រូវធ្វើការបន្តរហូតជិតម៉ោង១យប់ ។ ព្រឹកឡើង នាយកក្រុមហ៊ុនប្រាប់ឱ្យនាងធ្វើការក្នុងបន្ទប់សណ្ឋាគារ ហើយឱ្យនាងកលើគ្រែតែមួយជាមួយនាយក ។ បន្ទាប់ពីនាងធ្វើការបាន១៤ម៉ោង និងបញ្ចប់ការងារនៅម៉ោង១ភ្លឺ នាយកក្រុមហ៊ុនប្រាប់ឱ្យនាងទៅមើលកុនបន្តទៀត ។ ការធ្វើការច្រើនម៉ោង មិនត្រឹមតែធ្វើឱ្យនាងមានសុខភាពទ្រុឌទ្រោមប៉ុណ្ណោះទេ ប៉ុន្តែធ្វើឱ្យនាងគ្មានពេលវេលាថែទាំម្តាយដែលទើបចេញពីមន្ទីរពេទ្យ ។

លើសពីនេះ ពេលនាងសុំច្បាប់សម្រាកដើម្បីទៅចូលរួមពិធីបុណ្យសពអតីតស្វាមី នាងត្រូវក្រុមហ៊ុនបង្ខំឱ្យធ្វើការ ។ នាងគ្មានពេលវេលានៅជាមួយគ្រួសារ និងដាច់ការទំនាក់ទំនង ។ បើតាមការលើកឡើងរបស់តុលាការ គឺក្រុមហ៊ុននេះធ្វើឱ្យបរិយាកាសការងាររបស់បុគ្គលិកគួរឱ្យស្អប់ខ្ពើម និងរំលោភកិច្ចសន្យាការងារដោយអយុត្តិធម៌ ។

ចំណែកក្រុមហ៊ុន Erudite Legal ពុំបានអនុវត្តតាមដីការបស់តុលាការ ដែលតម្រូវឱ្យក្រុមហ៊ុនសងប្រាក់បុគ្គលិក ដោយសារក្រុមហ៊ុនផ្តល់ប្រាក់ខែឱ្យបុគ្គលិកតិចជាងស្តង់ដារ ។ ក្រុមហ៊ុនបានកាត់ផ្តាច់លេខទូរស័ព្ទ ទើបធ្វើឱ្យអ្នកសារព័ត៌មានពុំអាចសាកសួរពាក់ព័ន្ធនឹងករណីនេះ ។ តុលាការបានកាត់ក្តីឱ្យក្រុមហ៊ុនបង់ប្រាក់ន័យទៅដើមបណ្តឹង ចំនួន២២,២០០ដុល្លារ ព្រោះក្រុមហ៊ុនពុំបានបើកប្រាក់ខែទៀងទាត់ និងបង់ប្រាក់ចំនួន២៦,៦៤០ដុល្លារទៀតទៅយដើមបណ្តឹង គឺជាសំណងដែលឱ្យដើមបណ្តឹងធ្វើការច្រើនម៉ោង ។

កាលពីខែវិច្ឆិកា ឆ្នាំ២០២៤ តុលាការក៏ធ្លាប់កាត់ក្តីនាយកក្រុមហ៊ុន លោក Kuksal ពាក់ព័ន្ធនឹងរឿងក្តីមួយទៀត ដោយតុលាការចោទប្រកាន់ថា លោកពុំអាចធ្វើការផ្នែកច្បាប់ ហើយហាមលោកផ្ញើអ៊ីម៉ែល ឬសារក្នុងនាមក្រុមហ៊ុន Erudite Legal ឬហាមធ្វើជាអ្នកតំណាងក្រុមហ៊ុន ។ ការហាមឃាត់នេះ ដោយសារកាលពីឆ្នាំ២០២៣ លោកបានរឹបអូសគ្រឿងសង្ហារិមរបស់អតិថិជន និងផ្ញើលិខិតគំរាមអតិថិជន ដោយប្រើឈ្មោះក្រុមហ៊ុន ៕

ប្រទេសថៃ ៖ កាលពីថ្ងៃទី៨ ខែឧសភា ឆ្នាំ២០២៥ សារព័ត៌មាន Thairath រាយការណ៍ថា នៅទីក្រុងបាងកក មានអ្នកជំងឺកូវីដ-១៩ ចំនួន២,៩៦៧នាក់ ត្រឹមតែ១សប្តាហ៍ ប៉ុន្តែបើសរុបទូទាំងប្រទេសថៃ គឺមានអ្នកជំងឺកូវីដ រហូតដល់ជាង៨,០០០នាក់ ត្រឹម១សប្តាហ៍ ហើយអ្នកជំងឺកូវីដភាគច្រើន គឺជាវ័យធ្វើការ និងមនុស្សចាស់ រីឯកុមារតូចៗក៏ប្រឈមនឹងការឆ្លងជំងឺនេះដែរ ដោយសារសាលារៀនជិតបើកបវសនកាល ។ គ្រូពេទ្យបានផ្តាំផ្ញើទៅកាន់ពលរដ្ឋឱ្យពាក់ម៉ាស់ លាងដៃដោយសាប៊ូ ប្រើប្រាស់អាល់កុលពេលទៅទីប្រជុំជន និងមកព្យាបាលនៅមណ្ឌលសុខភាពសាធារណៈ ។

លោក ស៊ុនថន ស៊ុនថារៈឆាត វេជ្ជបណ្ឌិតនៅទីក្រុងបាងកក បាននិយាយពីស្ថានការណ៍ជំងឺកូវីដ នៅទីក្រុងបាងកក ដោយយោងតាមទិន្នន័យរបស់នាយកដ្ឋានសុខាភិបាលបង្ហាញថា ចាប់ពីថ្ងៃទី២៧ ខែមេសា ដល់ថ្ងៃទី៣ ខែឧសភា ឆ្នាំ២០២៥ គឺមានអ្នកជំងឺកូវីដ ចំនួន២,៩៦៧នាក់ ក្នុងនោះជនជាតិថៃ ២,៣៨១នាក់ និងជនបរទេស ៥៨៦នាក់ ពុំមានអ្នកស្លាប់ ។ ប៉ុន្តែបើគិតចាប់ពីថ្ងៃទី១ ខែមករា គឺមានអ្នកជំងឺកូវីដសរុបស្មើ១៥,០៥៥នាក់ ក្នុងនោះជនជាតិថៃ ១១,៧០០នាក់ និងជនបរទេស ៣,៣៥៥នាក់ ហើយរយៈពេលនេះមានអ្នកជំងឺស្លាប់ម្នាក់ ។

តាមការតាមដានស្ថានការណ៍ឃើញថា ជំងឺកូវីដបានឆ្លងរាតត្បាតចាប់ពីខែមេសា ឆ្នាំ២០២៥ ជាពិសេស វាឆ្លងរាតត្បាតខ្លាំងចាប់ពីក្រោយចូលឆ្នាំ ដល់ខែឧសភា ដោយសារមានការប្រមូលផ្តុំមនុស្សជាច្រើនជាបន្តបន្ទាប់ និងអាកាសធាតុប្រែប្រួលពីក្តៅទៅភ្លៀងធ្លាក់ ទើបធ្វើឱ្យជំងឺកូវីដងាយឆ្លងជាងជំងឺផ្តាសាយធំ ។

បើប្រៀបធៀបចំនួនអ្នកជំងឺកូវីដ ក្នុងពេលវេលាដូចគ្នាជាមួយឆ្នាំ២០២៤ និងឆ្នាំ២០២៣ គឺពុំគួរឱ្យបារម្ភទេ ដោយសារចំនួនអ្នកជំងឺកូវីដឆ្នាំ២០២៥ តិចជាងឆ្នាំមុនៗ ។ ចំណែកនៅទីក្រុងបាងកក គ្រូពេទ្យបានជូនដំណឹងពីវិធីការពារ និងគ្រប់គ្រងជំងឺកូវីដយ៉ាងតឹងរ៉ឹង ដោយពាក់ម៉ាស់ជានិច្ចពេលទៅទីប្រជុំជន ឬទៅកន្លែងមនុស្សច្រើន ព្រមទាំងចៀសវាងទៅកន្លែងប្រឈមការឆ្លង ។ បើនៅជិតអ្នកជំងឺកូវីដ គួរពាក់ម៉ាស់ លាងដៃដោយសាប៊ូនិងទឹកជានិច្ច ឬប្រើប្រាស់អាល់កុល ។

ចំណែកក្រុមងាយឆ្លងជំងឺកូវីដ រួមមាន ៖ មនុស្សចាស់ និងកុមារតូចៗ គឺអ្នកថែទាំ ឬអាណាព្យាបាលគួរប្រុងប្រយ័ត្ន និងថែទាំពួកគេឱ្យបានដិតដល់ ជាពិសេស ពេលសាលារៀនជិតបើកបវសនកាល ដើម្បីការពារការឆ្លងរាតត្បាតជំងឺកូវីដ ។ បើឆ្លងជំងឺកូវីដ ពលរដ្ឋអាចទៅព្យាបាលនៅមណ្ឌលសុខភាពសាធារណៈនៅទីក្រុងបាងកក ចំនួន៦៩កន្លែង ឬសាកសួរព័ត៌មានបន្ថែមមកកាន់នាយកដ្ឋានសុខាភិបាល ។

ដោយឡែក លោកវេជ្ជបណ្ឌិត ធីរៈ វរៈថណារ៉ាត់ សាស្ត្រាចារ្យមហាវិទ្យាល័យវេជ្ជសាស្ត្រនៅសាកលវិទ្យាល័យជូឡាឡុងកន បានសរសេរក្នុងហ្វេសប៊ុកឈ្មោះ «Thira Woratanarat» ថា រយៈពេល៤ថ្ងៃចុងក្រោយនេះ អ្នកជំងឺកូវីដមកព្យាបាលនៅមន្ទីរពេទ្យ មានចំនួនច្រើនជាងអ្នកជំងឺផ្តាសាយធំ រហូតដល់ជាង៦ដង ហើយអ្នកជំងឺស្រីច្រើនជាងប្រុស ២ដង ភាគច្រើនជាវ័យធ្វើការ ។ អ្វីគួរឱ្យបារម្ភ គឺកុមារតូចៗអាយុក្រោម៤ឆ្នាំនៅទីក្រុងបាងកក កើតជំងឺកូវីដច្រើន ។

លោកបានបង្ហាញចំនួនអ្នកជំងឺកូវីដនៅទូទាំងប្រទេសថៃ ចាប់ពីថ្ងៃទី២៧ ខែមេសា ដល់ថ្ងៃទី៣ ខែឧសភា ឆ្នាំ២០២៥ មានអ្នកជំងឺកូវីដសរុបទូទាំងប្រទស ចំនួន៨,៤៤៦នាក់ បានមកសម្រាកព្យាបាលនៅមន្ទីរពេទ្យ (ចំនួននេះពុំរួមបញ្ចូលអ្នកជំងឺកូវីដព្យាបាលនៅផ្ទះទេ) ។ វាធ្វើឱ្យអាណាព្យាបាលសិស្សបារម្ភពីការឆ្លងជំងឺកូវីដពេលសាលារៀនបើកបវសនការ ដោយសារជារដូវវស្សា ជំងឺនេះងាយឆ្លង ហើយវាមានរោគសញ្ញាស្រដៀងជំងឺផ្តាសាយធំ ៕