កាលពីថ្ងៃទី១៥ ខែឧសភា ឆ្នាំ២០២៥ សារព័ត៌មានបរទេសរាយការណ៍ថា ប្រទេសជាច្រើននៅតំបន់អាស៊ីបានប្រឈមនឹងជំងឺកូវីដ-១៩ ឆ្លងរាតត្បាតជាថ្មី ក្នុងនោះជំងឺកូវីដនៅប្រទេសថៃ បានឆ្លងខ្លាំងក្នុងពេលចូលឆ្នាំ ជាពិសេស ទីក្រុងបាងកក ហើយវាក៏បានឆ្លងខ្លាំងនៅប្រទេសជាច្រើនទៀត ដូចជា ៖ វៀតណាម សិង្ហបុរី ចិន ហុងកុង និងតៃវ៉ាន់ ។ គ្រូពេទ្យដាស់តឿនឱ្យថែទាំសុខភាពដោយពាក់ម៉ាស់ការពារ និងកុំប្រមា.ថ ។

ទោះពេលវេលាកន្លងផុតទៅច្រើនឆ្នាំ ប៉ុន្តែជំងឺកូវីដពុំបាត់ទៅណាទេ គឺចាប់ពីខែមេសា ឆ្នាំ២០២៥ ជំងឺនេះបានឆ្លងខ្លាំងជាថ្មីនៅប្រទេសជាច្រើន ប៉ុន្តែមានអាការៈពុំធ្ងន់ធ្ងរ ដែលធ្វើឱ្យគ្រូពេទ្យដាស់តឿនសូមកុំប្រមាថ ជាពិសេស មនុស្សចាស់ និងអ្នកជំងឺប្រចាំកាយ ។ តាមទិន្នន័យចុងក្រោយរបស់នាយកដ្ឋានគ្រប់គ្រងជំងឺថៃ ចាប់ពីថ្ងៃទី១ ខែមករា ដល់ថ្ងៃទី១៤ ខែឧសភា ឆ្នាំ២០២៥ ថៃមានអ្នកជំងឺកូវីដចំនួន៧១,០៦៧នាក់ ស្លាប់១៩នាក់ ក្នុងនោះទីក្រុងបាងកក មានអ្នកជំងឺកូវីដច្រើនជាងគេ ជាពិសេស ចាប់ពីថ្ងៃទី២៧ ខែមេសា ដល់ថ្ងៃទី៣ ខែឧសភា អ្នកជំងឺកូវីដកើនឡើងដល់១៤,០០០នាក់ ។

រដ្ឋមន្ត្រីក្រសួងសុខាភិបាលថៃ លោក ស៊ុមសាក់ ថេបសុថិន ឱ្យដឹងថា ពុំគួរភ្ញាក់ផ្អើលនឹងជំងឺកូវីដឆ្លងលើកនេះ ពីព្រោះថៃបានចាត់ទុកកូវីដជាជំងឺក្នុងតំបន់ ។ អ្នកជំងឺភាគច្រើនពុំមានអាការៈធ្ងន់ធ្ងរ ហើយការឆ្លងខ្លាំងនេះ ដោយសារផ្លាស់ប្តូររដូវកាល និងការប្រមូលផ្តុំមនុស្សច្រើនពេលចូលឆ្នាំ ហើយលោកបានណែនាំឱ្យពាក់ម៉ាស់ ត្រួតពិនិត្យ ATK បើលទ្ធផលវិជ្ជមាន ត្រូវនៅឱ្យឆ្ងាយពីក្រុមងាយឆ្លង ។ ក្រៅពីជំងឺកូវីដឆ្លងខ្លាំងនៅទីក្រុងបាងកក ខេត្តឈុនបុរី នុនថាក់បុរី និងរ៉ាក់យ៉ង ក៏មានអ្នកជំងឺកូវីដច្រើនដែរ គឺកូវីដ XBB.1.16 ឆ្លងយ៉ាងឆាប់រហ័ស ប៉ុន្តែពុំធ្ងន់ធ្ងរ ដែលតម្រូវឱ្យថៃត្រូវតាមដានដោយប្រុងប្រយ័ត្ន ។

ចំណែកវៀតណាម គ្រូពេទ្យបានដាស់តឿនឱ្យប្រុងប្រយ័ត្នជំងឺកូវីដ ក្រោយពីពលរដ្ឋវៀតណាមរស់នៅ២៧ខេត្ត-ក្រុង បានឆ្លងជំងឺកូវីដចំនួន១៤៨នាក់ តាំងពីដើមឆ្នាំ២០២៥ ។ ទីក្រុងហូជីមិញ មានអ្នកជំងឺកូវីដច្រើនជាងគេ ចំនួន៣៤នាក់ បន្ទាប់មក គឺហៃហ្វង ហាណូយ ង៉ាអាន និងប៉ាក់មិញ ហើយទោះជាគ្មានមនុស្សស្លាប់ ប៉ុន្តែរដ្ឋាភិបាលវៀតណាមណែនាំឱ្យប្រយ័ត្នជំងឺនេះ ជាពិសេស ក្រោយពីឈប់សម្រាកថ្ងៃបុណ្យចាប់ពីថ្ងៃទី៣០ ខែមេសា ដល់ថ្ងៃទី១ ខែឧសភា ដែលមានការធ្វើដំណើរ និងប្រមូលផ្តុំច្រើន ។ ក្រសួងសុខាភិបាលវៀតណាមបានឃ្លាំមើលការឆ្លងជំងឺកូវីដលើក្រុមងាយឆ្លង ដូចជា ៖ ស្ត្រីមានផ្ទៃពោះ មនុស្សចាស់ និងអ្នកជំងឺរ៉ាំរ៉ៃ ព្រមទាំងឱ្យពលរដ្ឋពាក់ម៉ាស់នៅទីសាធារណៈ ចៀសវាងទៅកន្លែងមនុស្សច្រើន លាងដៃញឹកញាប់ និងប្រញាប់ទៅមន្ទីរពេទ្យ បើមានអាការៈសង្ស័យ ។

សិង្ហបុរី ក៏មានអ្នកឆ្លងជំងឺកូវីដច្រើនដែរ គឺពីចំនួន១១,១០០នាក់ កើនឡើងដល់១៤,២០០នាក់ ចាប់ពីថ្ងៃទី២៧ ខែមេសា ដល់ថ្ងៃទី៣ ខែឧសភា ឆ្នាំ២០២៥ ។ បើទោះជាអ្នកជំងឺធ្ងន់ធ្ងរក្នុងបន្ទប់ ICU បានធ្លាក់ចុះពី៣នាក់ មកត្រឹម២នាក់ ប៉ុន្តែអ្នកជំងឺសម្រាកនៅមន្ទីរពេទ្យ បានកើតឡើងពី១០២នាក់ ទៅ១៣៣នាក់ ។ គ្រូពេទ្យសិង្ហបុរីឱ្យដឹងថា ជំងឺនេះស្រដៀងជំងឺផ្លូវដង្ហើម ហើយកូវីដដែលឆ្លងពេលនេះ គឺ LF.7 និង NB.1.8 បំលែងមកពីកូវីដ JN.1 ។ ក្រសួងសុខាភិបាលសិង្ហបុរីបានត្រៀមខ្លួនទប់ទល់នឹងជំងឺកូវីដឆ្លងរាតត្បាត ហើយរដ្ឋមន្ត្រីក្រសួងសុខាភិបាលណែនាំពលរដ្ឋអាយុចាប់ពី៦០ឆ្នាំឡើង, ក្រុមងាយឆ្លង, គ្រូពេទ្យ និងអ្នករស់នៅតំបន់ប្រឈម គួរចាក់វ៉ាក់សាំងថ្មី ចំនួន១លើកក្នុង១ឆ្នាំ ។ រីឯពលរដ្ឋធម្មតាអាចចាក់វ៉ាក់សាំងកូវីដបាន ប្រសិនបើត្រូវការ ។

រីឯនៅចិន អ្នកជំនាញឱ្យដឹងថា អ្នកឆ្លងជំងឺកូវីដបានកើនឡើងតិចតួចក្នុងរយៈពេល២ខែកន្លងមក ហើយមានអាការៈស្រដៀងផ្តាសាយធំ កើនឡើងពី៧.៥% ទៅ១៦.២% ចាប់ពីថ្ងៃទី៣១ ខែមីនា ដល់ថ្ងៃទី៤ ខែឧសភា ឆ្នាំ២០២៥ ខណៈអ្នកជំងឺផ្លូវដង្ហើមធ្ងន់ធ្ងរ កើនឡើងពី៣.៣% ទៅ៦.៣% ។ ជំងឺកូវីដបានឆ្លងនៅតាមបណ្តាខេត្តភាគខាងត្បូងចិនច្រើនជាងភាគខាងជើង បើទោះជាការឆ្លងក្នុងតំបន់មួយចំនួនធ្លាក់ចុះក្តី ។

ជំងឺកូវីដក៏បានឆ្លងខ្លាំងនៅហុងកុងដែរ កាលពីមុន អ្នកជំងឺកូវីដស្លាប់ត្រឹម៣នាក់ក្នុង១ខែ បានកើនឡើងដល់២៦នាក់ក្នុង១ខែ ។ អ្នកជំងឺមានអាការៈធ្ងន់ធ្ងរ៨០% គឺជាមនុស្សចាស់អាយុចាប់ពី៦៥ឆ្នាំ, ៦៤% រស់នៅមណ្ឌលចាស់ជរា និង៩៥% មានជំងឺប្រចាំកាយ និងពុំបានចាក់វ៉ាក់សាំងរយៈពេល៦ខែចុងក្រោយ ។ ជំងឺនេះឆ្លងខ្លាំងនៅមណ្ឌលចាស់ជរា ចំនួន៣២កន្លែង និងឆ្លងនៅតំបន់ចំនួន៥ ក្នុងរយៈពេលត្រឹម២ថ្ងៃ នៃសប្តាហ៍ទី៣ ខែឧសភា ។

ចុងក្រោយ នៅតៃវ៉ាន់ ចាប់ពីថ្ងៃទី៤ ដល់ថ្ងៃទី១០ ខែឧសភា អ្នកជំងឺកូវីដបានព្យាបាលក្នុងបន្ទប់សង្គ្រោះបន្ទាន់ និងគ្លីនិក ស្មើជិត១ម៉ឺននាក់ កើនឡើងដល់៦៦% បើធៀបនឹងពេលមុននេះ ។ វាជាការឆ្លងជាបន្តបន្ទាប់ក្នុងរយៈពេល៥សប្តាហ៍ បើទោះជាចំនួនឆ្លងតិចជាងពេលដូចគ្នាកាលពីឆ្នាំ២០២៤ ប៉ុន្តែគ្រូពេទ្យដាស់តឿនថា ជំងឺកូវីដនឹងឆ្លងខ្លាំងនៅខែមិថុនា ។

មជ្ឈមណ្ឌលបង្ការជំងឺតៃវ៉ាន់រាយការណ៍ថា សប្តាហ៍ទី១ ខែឧសភា អ្នកជំងឺកូវីដបានស្លាប់៦នាក់ និងអ្នកជំងឺអាការៈធ្ងន់ធ្ងរ ស្មើ៣៤នាក់ ។ អ្នកជំងឺកូវីដបច្ចុប្បន្ន ស្មើ៤៩% បើធៀបនឹងឆ្នាំ២០២៤ ដែលមានអ្នកជំងឺកូវីដ រហូតដល់១៣ម៉ឺន៤ពាន់នាក់ក្នុង១សប្តាហ៍ ។ ទោះចំនួនអ្នកជំងឺកូវីដ និងមនុស្សស្លាប់ដោយសារកូវីដលើពិភពលោកតិចជាងឆ្នាំ២០២៤ ប៉ុន្តែការឆ្លងជំងឺកូវីដនៅតំបន់អាស៊ីបង្ហាញថា ជំងឺនេះមិនបាត់ទៅណាទេ ហើយវានឹងនៅជាមួយយើងយូរទៀត ដែលយើងត្រូវថែទាំសុខភាពជានិច្ច និងកុំប្រមាថជំងឺនេះ ៕

ប្រទេសថៃ ៖ កាលពីថ្ងៃទី១២ ខែឧសភា ឆ្នាំ២០២៥ ការិយាល័យស្រុកឡាតក្របាំង (Lat Krabang District Office) បានដាស់តឿនពលរដ្ឋឱ្យពាក់ម៉ាស់គ្រប់ពេលវេលា ដោយសារអគ្គិភ័យបានឆាបឆេះរោងចក្រផលិតគ្រឿងសង្ហារិម ឈ្មោះ «KING» នៅផ្លូវឆាឡងគ្រុង តំបន់ឡាតក្រាបាំង បណ្តាលឱ្យមានផ្សែងខ្មៅយ៉ាងក្រាស់គ្របដណ្តប់ក្នុងតំបន់ ។ ការដាស់តឿននេះ ដោយសារបារម្ភពីផលប៉ះពាល់សុខភាពពលរដ្ឋ ជាពិសេស អ្នកមានជំងឺផ្លូវដង្ហើម ពីព្រោះភ្នាក់ងារពន្លត់អគ្គិភ័យអាចគ្រប់គ្រងស្ថានការណ៍បានខ្លះប៉ុណ្ណោះ ។ នេះបើតាមការចុះផ្សាយរបស់សារព័ត៌មាន Thairath ។

ក្រោយពីស្ថានីយវិទ្យព្រះរ៉ាម បានទទួលសេចក្តីរាយការណ៍ពីអគ្គិភ័យឆាបឆេះរោងចក្រគ្រឿងសង្ហារិមឈ្មោះ «KING» នៅផ្លូវឆាឡងគ្រុង តំបន់ឡាតក្រាបាំង ទីក្រុងបាងកក បានធ្វើឱ្យភ្នាក់ងារពន្លត់អគ្គិភ័យតំបន់ឡាតក្រាបាំង និងភ្នាក់ងារពន្លត់អគ្គិភ័យស្ម័គ្រចិត្តបញ្ជូនរថយន្តបាញ់ទឹកជាច្រើនគ្រឿងមកកាន់កន្លែងកើតហេតុ ។ រហូតមកដល់ថ្ងៃទី១២ ខែឧសភា ភ្នាក់ងារពន្លត់អគ្គិសនីអាចគ្រប់គ្រងស្ថានការណ៍បានខ្លះៗប៉ុណ្ណោះ ដោយសាររោងចក្រនេះស្ថិតនៅទីតាំងចង្អៀត និងមានប្រេងឥន្ធនៈក្នុងអគារ ។

អាជ្ញាធរបានជម្លៀសពលរដ្ឋចេញពីលំនៅឋានជាង១៤០ខ្នង ពីព្រោះបារម្ភពីផលប៉ះពាល់សុខភាពដោយសារផ្សែងពុល ហើយអាជ្ញាធរក៏បានធ្វើជម្រកស្នាក់នៅបណ្តោះអាសន្នសម្រាប់ពលរដ្ឋ ។ នៅវេលាម៉ោង១០ព្រឹកថ្ងៃទី១២ ខែឧសភា នាយកដ្ឋានសុខភាពទីក្រុងបាងកក បានបញ្ជូនមន្ត្រីមកត្រួតពិនិត្យគុណភាពខ្យល់នៅតំបន់ក្បែររោងចក្រគ្រឿងសង្ហារិម ដោយសារតាំងពីពេលកើតហេតុ នៅតែមានផ្សែងយ៉ាងក្រាស់ពេញអាកាស ។

ការត្រួតពិនិត្យគុណភាពខ្យល់ គឺដើម្បីវាយតម្លៃកំហាប់ធូលី និងសារធាតុពុលដែលសាយភាយពេញលំនៅឋានពលរដ្ឋ ពីព្រោះសារធាតុគីមីអាចប៉ះពាល់សុខភាព ជាពិសេស អ្នកមានជំងឺផ្លូវដង្ហើម ។ ក្រៅពីនេះ អាជ្ញាធរក៏បានជូនដំណឹងទៅកាន់ពលរដ្ឋរស់នៅក្បែរកន្លែងកើតហេតុ សូមពាក់ម៉ាស់គ្រប់ពេលវេលា ហើយបើពលរដ្ឋចង់ទទួលបានការសង្គ្រោះបឋម ឬចង់ជម្លៀសពីលំនៅឋានទៅស្នាក់នៅជម្រកបណ្តោះអាសន្ន គឺអាចទាក់ទងមកកាន់មជ្ឈមណ្ឌលបញ្ជាការឧប្បត្តិហេតុនៅសាលារៀនឡាំផាអ៊ុង ។

ដោយឡែក អភិបាលក្រុងបាងកក លោក ឆ័យឆាត សិទ្ធិផាន់ បានចុះមកត្រួតពិនិត្យអគ្គិភ័យឆាបឆេះនៅរោងចក្រគ្រឿងសង្ហារិម និងទៅពិនិត្យមើលជម្រកស្នាក់នៅបណ្តោះអាសន្ន ព្រមទាំងផ្តល់កម្លាំងចិត្តដល់ពលរដ្ឋផងដែរ ។ លោកបានសង្កត់ធ្ងន់លើសុវត្ថិភាពបំពេញការងាររបស់ភ្នាក់ងារពន្លត់អគ្គិភ័យ និងភ្នាក់ងារពាក់ព័ន្ធ រួមទាំងសុវត្ថិភាពពលរដ្ឋដែលរស់នៅក្បែរនោះ ត្រូវជម្លៀសចេញពីលំនៅឋានដោយសារផ្សែងចេញពីរោងចក្រអាចប៉ះពាល់សុខភាព ។

នៅវេលាម៉ោង១២និង៣០នាទីថ្ងៃទី១២ ខែឧសភា ភ្នាក់ងារ Best 1555 ទីក្រុងបាងកក តំបន់ឡាតក្របាំង បានធ្វើជម្រកបណ្តោះអាសន្ននៅសាលារៀនចំនួន២ សម្រាប់ពលរដ្ឋរងផលប៉ះពាល់ដោយសារភ្លើងឆេះ ។ ក្រៅពីនេះ មជ្ឈមណ្ឌលសេវាកម្មសង្គ្រោះបន្ទាន់ទីក្រុងបាងកក ក៏បានបញ្ជូនមន្ត្រីមកត្រួតពិនិត្យសុខភាពអ្នករងផលប៉ះពាល់ផងដែរ ៕

ប្រទេសថៃ ៖ កាលពីវេលាម៉ោង៩ព្រឹក ថ្ងៃទី១២ ខែឧសភា ឆ្នាំ២០២៥ ពលរដ្ឋថៃនៅខេត្តបុរីរាំ សុរិន្ទ និងស៊ីសាកេត បានប្រមូលផ្តុំគ្នានៅមុខរូបសំណាក់ព្រះអង្គម្ចាស់សុរិន្ទភក្តី ខេត្តសុរិន្ទ ដើម្បីការពារអធិបតេយ្យជាតិនៅប្រាសាទតាមាន់ធំ ស្ថិតលើភ្នំដងរែក ឃុំគោកមន ស្រុកបន្ទាយអំពិល ខេត្តឧត្តរមានជ័យ ជាប់ព្រំដែនខេត្តសុរិន្ទ ព្រមទាំងផ្តល់កម្លាំងចិត្តដល់មេទ័ពថៃភូមិភាគទី២ លោក ប៊ុនស៊ីន ភាគក្លាង ក៏ដូចជាកងទ័ពថៃទាំងអស់ ។ អ្នកតវ៉ាទាំងនេះថា ពួកគេពុំស្តាប់តាមលោក Phumtham Wechayachai ឧបនាយករដ្ឋមន្ត្រី និងរដ្ឋមន្ត្រីក្រសួងការពារជាតិថៃ ដែលបញ្ជាឱ្យដកកងទ័ពចេញពីប្រាសាទតាមាន់ធំទេ ពីព្រោះបារម្ភពីថៃអាចបាត់បង់ទឹកដីដូចប្រាសាទព្រះវិហារ ។

ពលរដ្ឋថៃដែលមកប្រមូលផ្តុំគ្នានៅខេត្តសុរិន្ទ និយាយថា កន្លងមក លោក Phumtham Wechayachai ឧបនាយករដ្ឋមន្ត្រី និងរដ្ឋមន្ត្រីក្រសួងការពារជាតិថៃ បានឯកភាពតាមកម្ពុជា ដោយបញ្ជាឱ្យដកថយកងទ័ពថៃចេញពីប្រាសាទតាមាន់ធំ ដើម្បីចៀសវាងការប្រឈមមុខដាក់គ្នា ប៉ុន្តែកងទ័ពខ្មែរមានជម្លោះជាមួយកងទ័ពថៃនៅប្រាសាទតាមាន់ធំ ដែលពលរដ្ឋថៃចាត់ទុកថា ស្ថិតនៅលើទឹកដីថៃ ។ រីឯមេទ័ពថៃភូមិភាគទី២ លោក ប៊ុនស៊ីន ភាគក្លាង ក៏ពុំឯកភាពនឹងការដកថយកងទ័ពចេញពីប្រាសាទតាមាន់ធំដែរ ។

ក្រុមអ្នកតវ៉ាបន្តថា យើងប្រមូលផ្តុំគ្នាតវ៉ាដើម្បីប្រឆាំងនឹងរដ្ឋមន្ត្រីក្រសួងការពារជាតិថៃបេះដូងខ្មែរ ដែលបញ្ជាឱ្យដកកងទ័ពថៃចេញពីប្រាសាទតាមាន់ធំ ។ យើងនឹងពុំដកថយចេញពីប្រាសាទដាច់ខាត សូម្បីតែ១ជំហ៊ាន យើងជាជនជាតិថៃ ពុំព្រមបាត់បង់ទឹកដីទេ ។

ការប្រមូលម្តុំគ្នានេះ ធ្វើឡើងតាមការអំពាវនាវរបស់លោក ផិឈិត ឆ័យមង្គល ជាមេដឹកនាំបណ្តាញកំណែទម្រង់និស្សិត និងពលរដ្ឋថៃ ដែលបានសរសេរក្នុងហ្វេសប៊ុកកន្លងមកថា ៖ «លោក Phumtham រដ្ឋមន្ត្រីក្រសួងការពារជាតិថៃ បានបញ្ជាឱ្យដកកងទ័ពចេញពីប្រាសាទតាមាន់ធំ ដើម្បីចៀសវាងការប្រឈមមុខគ្នា ហើយអ្នកណាប្រឈមមុខជាមួយអ្នកណា លោក Phumtham ដឹងច្បាស់ ។ កងទ័ពខ្មែរមានជម្លោះជាមួយកងទ័ពថៃនៅប្រាសាទតាមាន់ធំ ដែលយើងចាត់ទុកថា ជាប្រាសាទរបស់ថៃ ហើយកងទ័ពខ្មែរអំពាវនាវឱ្យថៃដកថយក្នុងកិច្ចប្រជុំ GBC បែរជាលោក Phumtham យល់ស្រប ហើយក៏បញ្ជាឱ្យដកកងទ័ពតាមកម្ពុជា ។ លោកបានបញ្ជាឱ្យដកកងទ័ពម្តងទៀត តើលោក Phumtham ជារដ្ឋមន្ត្រីការពារជាតិថៃ ឬកម្ពុជា ឱ្យប្រាកដ?» ។

លោក ផិឈិត ឆ័យមង្គល បញ្ជាក់ថា ៖ «បើយើងដកថយកងទ័ព ស្មើនឹងយើងទទួលស្គាល់ថា តំបន់ប្រាសាទតាមាន់ធំ គឺកម្ពុជាមានសិទ្ធិបញ្ជា ។ វាធ្វើឱ្យយើងបាត់បង់ទឹកដី លោក Phumtham នឹងលក់ទឹកដី ។ ដូច្នេះ បងប្អូនពលរដ្ឋរស់នៅខេត្តសុរិន្ទ និងខេត្តក្បែរៗ សូមមកប្រមូលផ្តុំគ្នានៅរូបសំណាក់ព្រះអង្គម្ចាស់សុរិន្ទភក្តី ខេត្តសុរិន្ទ នៅវេលាម៉ោង៩ព្រឹក ថ្ងៃទី១២ ខែឧសភា ។ ខ្ញុំនឹងចូលរួមជាមួយបងប្អូន ឬយើងត្រូវឡើងទៅប្រាសាទតាមាន់ធំដោយខ្លួនឯង… ជួបគ្នានៅខេត្តសុរិន្ទ» ៕

ប្រទេសបារាំង ៖ ពាក្យចចាមអារាមអំពីប្រធានាធិបតីបារាំង លោក Emmanuel Macron ថាបានប្រើប្រាស់សារធាតុញៀ.ន បានចាប់ផ្ដើមរាលដាល ជាបន្តបន្ទាប់កាលពីថ្ងៃទី 9 ខែឧសភា ឆ្នាំ 2025។ ព័ត៌មាននោះកើតឡើងបន្ទាប់ពីមានការចែករំលែកវីដេអូ ក្នុងដំណើរធ្វើដំណើរដោយរថភ្លើងទៅទីក្រុង Kyiv ជាមួយនាយករដ្ឋមន្រ្តីអាល្លឺម៉ង់ Friedrich Merz និងនាយករដ្ឋមន្ត្រីអង់គ្លេស Keir Starmer។

បើតាមប្រភពសារព័ត៌មានបរទេសបានឲ្យដឹងថា ៖ នៅថ្ងៃទី 12 ខែឧសភា ឆ្នាំ 2025 នេះ វិមានប្រធានាធិបតីបារាំង បានបដិសេធយ៉ាងខ្លាំងចំពោះការចោ.ទប្រកាន់នេះ ព្រោះរូបភាពដែលបានផ្សព្វផ្សាយនោះ គឺជាការកាត់តដែលយកមកពីរូបដើម ខណៈលោក Macron កំពុងធ្វើដំណើរដោយរថភ្លើងទៅទីក្រុង Kyiv ជាមួយនាយករដ្ឋមន្រ្តីអាល្លឺម៉ង់ Friedrich Merz និងនាយករដ្ឋមន្ត្រីអង់គ្លេស Keir Starmerប៉ុណ្ណោះ។

រដ្ឋាភិបាលបារាំងបានបញ្ជាក់ប្រាប់សារព័ត៌មានថា នេះគឺជាព័ត៌មានមិនពិតឡើយ (disinformation) និងបានចោ.ទប្រកាន់ថាវាមានប្រភពមកពីក្រុមដែលគាំទ្ររុស្ស៊ី ដែលមានបំណងបង្ខូចកេរ្តិ៍ឈ្មោះ និងបោកបញ្ឆោតសាធារណជន។

រូបភាពដែលគេនាំគ្នាចែកចាយបង្ហាញពី លោក Macron លោក Merz និងលោក Starmer កំពុងជជែកគ្នាសើចសប្បាយក្នុងសម្លៀកបំពាក់ធម្មតាជាមួយនឹងវត្ថុអ្វីម្យ៉ាងដែលត្រូវបានរមួលដោយក្រដាសជូតមាត់ទុកនៅលើតុនោះ វិមានប្រធានាធិបតីបារាំង Elysee បានបកស្រាយថាវត្ថុនោះគ្រាន់តែជាក្រដាសជូតដែលពួករមួលដើម្បីជូតច្រមុះប៉ុណ្ណោះ ហើយពុំមានអ្វីពាក់ពន្ធ័នឹងថ្នាំញៀ..នទេ។ មួយវិញទៀត ចំពោះមូលហេតុដែលមេដឹកនាំទាំង៣ ស្ថិតនៅក្នុងសម្លៀកបំពាក់ធម្មតា គឺដោយសារតែពេលនោះពួកគាត់ស្ថិតនៅក្នុងទូររថភ្លើង ដែលកំពុងធ្វើដំណើរទៅកាន់ទីក្រុង Kyiv ប្រទេសអ៊ុយក្រែន។

តាមពិតនេះមិនមែនជារឿងថ្មីឡើយ ដែលមេដឹកនាំប្រទេសត្រូវបានចោ.ទប្រកាន់ថា ប្រើប្រាស់គ្រឿងញៀ.នបេបនេះ។ កន្លងមកក្រុមអ្នកឃោសនិករុស្ស៊ី ក៏ធ្លាប់ផ្សព្វផ្សាយនូវពាក្យចចាមអារាមថា ប្រធានាធិបតី អ៊ុយក្រែន លោក Zelensky ប្រើប្រាស់សាធាតុកូកាអ៊ីនផងដែរ។

ករណីនេះជាផ្នែកមួយនៃយុទ្ធនាការផ្សព្វផ្សាយព័ត៌មានមិនពិត ដើម្បីបង្ករផលប៉ះពាល់ដល់ស្ថិរភាពនយោបាយនៅអឺរ៉ុប ព្រមទាំងធ្វើឲ្យមេដឹកនាំអឺរ៉ុបបាត់កត្តិយស និងឥទ្ធិពល។ ហើយបច្ចុប្បន្នប្រទេសបារាំងកំពុងចាត់វិធានការខ្ពស់ដើម្បីប្រឆាំងនឹងពាក្យចចាមអារាមទាំងនោះ ដើម្បីការពារស្ថាប័នរបស់ខ្លួន និងសម្ព័ន្ធអន្តរជាតិ៕