ក្រុមហ៊ុន Phase Scientific International (PSI) ដែលមានមូលដ្ឋាននៅទីក្រុងហុងកុង បានប្រកាសអំពីការរៃអង្គាសបានទុនចំនួន ៣៤ លានដុល្លារអាមេរិកក្នុងវគ្គវិនិយោគស៊េរី A ដោយមានការចូលរួមពីមូលនិធិវិនិយោគឯកជន Value Partners Group និងអ្នកវិនិយោគផ្សេងៗទៀត។ ទុននេះនឹងត្រូវប្រើប្រាស់សម្រាប់ការអភិវឌ្ឍន៍តេស្ត Human Papillomavirus (HPV) ដំបូងគេរបស់ពិភពលោកតាមរយ:ទឹកនោម។

HPV គឺជាវីរុសមួយដែលអាចឆ្លងពីមនុស្សម្នាក់ទៅមនុស្សម្នាក់តាមរយៈការប៉ះពាល់ផ្លូវភេទ ហើយវាជាមូលហេតុចម្បងនៃជំងឺមហារីកមាត់ស្បូន។ អង្គការសុខភាពពិភពលោក (WHO) បានឱ្យដឹងថា ប្រហែល ៩៥ ភាគរយនៃករណីជំងឺមហារីកមាត់ស្បូនបណ្តាលមកពីការឆ្លងវីរុស HPV។ បច្ចេកវិទ្យាថ្មីរបស់ PSI មានគោលបំណងធ្វើឱ្យការធ្វើតេស្តកាន់តែងាយស្រួល មិនរំខានដល់រាងកាយ និងអាចប្រើនៅគ្រប់ទីកន្លែង ដោយប្រើប្រាស់ទឹកនោមជាសំណាក។ នាយកប្រតិបត្តិ និងស្ថាបនិក PSI លោក Ricky Chiu Yin-to បានបញ្ជាក់ថា ក្រុមហ៊ុនបានអភិវឌ្ឍបច្ចេកវិទ្យាជាសិទ្ធិប៉ាតង់សម្រាប់ប្រមូលនិងបន្សុទ្ធទឹកនោម ដើម្បីអាចចាប់បានសារធាតុបញ្ជាក់ជំងឺ (biomarkers) ដ៏មានប្រសិទ្ធភាពខ្ពស់ជាងវិធីធម្មតាដល់ទៅ ១០ ដង។

ការសិក្សាគ្លីនិកថ្មីដែលធ្វើឡើងជាមួយសាកលវិទ្យាល័យ Peking University Shenzhen Hospital លើអ្នកចូលរួម ១,000 នាក់ បង្ហាញថា តេស្តនេះមានភាពត្រឹមត្រូវរហូតដល់ ៩៣.៤% ក្នុងការរកឃើញដំបៅមុនជំងឺមហារីក និងអាចសម្រេចលទ្ធផលជាមួយនឹងតេស្ត Pap smear ស្តង់ដារមាសក្នុងអត្រា ៩៧%។ PSI គ្រោងនឹងពង្រីកការសិក្សាផ្នែកព្យាបាលលើអ្នកចូលរួម ២០,០០០ នាក់ នៅឆ្នាំក្រោយ ដោយសហការជាមួយមន្ទីរពេទ្យមួយនៅសាកលវិទ្យាល័យប៉េកាំង និងសាកលវិទ្យាល័យមួយនៅហុងកុង។ ប្រសិនបើលទ្ធផលបន្តល្អ PSI នឹងស្នើសុំអនុម័តពីអាជ្ញាធរច្បាប់សម្រាប់ការចេញលក់ជាសាធារណៈ រួមមាន FDA (សហរដ្ឋអាមេរិក) និង NMPA (ចិន)។

PSI បច្ចុប្បន្នមានមន្ទីរពិសោធន៍ផ្ទាល់ខ្លួននៅហុងកុង សិនជិន និងកាលីហ្វ័រញ៉ា ដែលអាចដំណើរការគំរូទឹកនោមសម្រាប់តេស្តនេះ។ កាលពីឆ្នាំ ២០២៣ ក្រុមហ៊ុនបានទិញយកមន្ទីរពិសោធន៍ ONCO ដែលជាអ្នកផ្តល់សេវាតេស្តរោគស្ត្រីធំបំផុតមួយនៅហុងកុង។ PSI គ្រោងនឹងប្រើ ONCO ដើម្បីបន្តអនុវត្តតេស្តទឹកនោមនេះទៀតផង ហើយជំហានបន្ទាប់ ក្រុមហ៊ុនគ្រោងនឹងចាប់ផ្តើមវគ្គរៃអង្គាសស៊េរី B ក្នុងរយៈពេល ១២ ទៅ ១៨ ខែក្រោយ ដើម្បីគាំទ្រការចូលទីផ្សារ និងការធ្វើពាណិជ្ជកម្មតេស្តនេះ។ លោក Chiu បានបញ្ជាក់ថា ក្រុមហ៊ុនក៏កំពុងនឹងស្វែងរកដៃគូយុទ្ធសាស្ត្រដើម្បីពង្រីកសេវាកម្ម និងចូលទៅកាន់ទីផ្សារអន្តរជាតិ។

លើសពីនេះ ការធ្វើតេស្តនេះក៏អាចប្រើសម្រាប់បុរសផងដែរ។ ក្នុងប្រទេសអភិវឌ្ឍន៍ដូចជាសហរដ្ឋអាមេរិក ករណីជំងឺមហារីកក្បាល និងកដែលបណ្តាលមកពី HPV បានកើនឡើងខ្ពស់ជាងមហារីកមាត់ស្បូន។ នេះបង្ហាញពីសក្ដានុពលទីផ្សារថ្មី និងឱកាសច្រើនសម្រាប់ការអភិវឌ្ឍន៍បន្ថែមនាពេលអនាគត។ នេះបើតាមការចុះផ្សាយរបស់ South China Morning Post នៅព្រឹកថ្ងៃអង្គារ ខែឧសភា ឆ្នាំ ២០២៥ នេះ៕

ប្រទេសជប៉ុន ៖ កាលពីថ្ងៃទី២០ ខែឧសភា ឆ្នាំ២០២៥ សារព័ត៌មានបរទេសរាយការណ៍ថា ប្រទេសជប៉ុនប្រឈមនឹងអាកាសធាតុក្តៅខ្លាំងប៉ះពាល់ដល់សុខភាពពលរដ្ឋ ហើយសីតុណ្ហភាពនៅតំបន់ខ្លះបានកើនឡើងរហូតដល់ជាង៣៥អង្សាសេ ។ ហេតុនេះ រដ្ឋាភិបាលជប៉ុនបានដាស់តឿនពលរដ្ឋពីការដាច់សរសៃឈាមខួរក្បាលពេលអាកាសធាតុក្តៅខ្លាំង ដោយសាររាងកាយសម្របខ្លួនមិនទាន់ ។

ភ្នាក់ងារឧតុនិយមជប៉ុនបានជូនដំណឹងទៅកាន់ពលរដ្ឋ និងភ្ញៀវទេសចរឱ្យប្រុងប្រយ័ត្នការដាច់សរសៃឈាមខួរក្បាល ជាពិសេស ពលរដ្ឋជប៉ុនដែលមានសុខភាពខ្សោយ រាងកាយសម្របខ្លួនមិនទាន់ជាមួយការផ្លាស់ប្តូរអាកាសធាតុពីត្រជាក់ទៅក្តៅ ។ នៅថ្ងៃទី២០ ខែឧសភា អាកាសធាតុក្តៅបានគ្របដណ្តប់នៅតំបន់ខាងកើត និងខាងលិចប្រទេសជប៉ុន ហើយអាកាសធាតុនឹងបន្តក្តៅខ្លាំងថែមទៀត ។

នៅថ្ងៃទី២០ ខែឧសភានេះ អាកាសធាតុកើនឡើងរហូតដល់៣៤អង្សាសេ នៅទីក្រុងអូសឹគិ ខេត្តយ៉ាម៉ាណាឈិ ខណៈទីក្រុងហាជិអូចិ ស្ថិតនៅភាគខាងលិចទីក្រុងតូក្យូ សីតុណ្ហភាពកើនឡើងដល់ជាង៣៣អង្សាសេ ។ រីឯទីក្រុងអិតុឈិម៉ាក់ ខេត្តហ្វូគុអូកាក់ និងទីក្រុងអាសាគុ ខេត្តហៀងហុ សីតុណ្ហភាពស្មើ៣៣អង្សា ខណៈសីតុណ្ហភាពនៅតំបន់កណ្តាលទីក្រុងតូក្យូ កើនដល់៣០អង្សាជាលើកដំបូងក្នុងឆ្នាំនេះ ។

ភ្នាក់ងារឧតុនិយមជប៉ុនសូមឱ្យពលរដ្ឋគ្រប់រូបថែទាំសុខភាពរបស់ខ្លួនឱ្យល្អ ដើម្បីការពារការដាច់សរសៃឈាមខួរក្បាល ព្រមទាំងប្រើប្រាស់ម៉ាស៊ីនត្រជាក់ឱ្យបានត្រឹមត្រូវ ផឹកទឹកញឹកញាប់ និងចៀសវាងធ្វើអ្វីមួយនៅក្រោមកំដៅថ្ងៃ ។ រីឯក្រុមហ៊ុនផ្សេងៗចាប់ផ្តើមមានវិធានការការពារបុគ្គលិករបស់ខ្លួន ដូចជា ៖ ត្រួតពិនិត្យសុខភាពបុគ្គលិក ការសង្គ្រោះបឋម និងបញ្ជូនបុគ្គលិកទៅមន្ទីរពេទ្យភ្លាមៗ ប្រសិនបើក្រុមហ៊ុនណាមួយពុំចាត់វិធានការការពារបុគ្គលិកទេ ក្រុមហ៊ុននោះនឹងទទួលទោសតាមច្បាប់ ។

ដោយឡែក អ្នកជំនាញសុខភាពណែនាំឱ្យប្រុងប្រយ័ត្នការបរិភោគចំណីអាហារផ្សេងៗ ពេលសីតុណ្ហភាពកើនឡើងខ្ពស់ ចាប់ពី២៥អង្សាសេ ទៅ៤០អង្សាសេ ពីព្រោះបាក់តេរីក្នុងចំណីអាហារនឹងធំលូតលាស់យ៉ាងឆាប់រហ័ស ។ ក្រៅពីនេះ គួរតែរង់ចាំឱ្យអាហារត្រជាក់សិន មុនពេលច្រកចូលក្នុងថង់ ឬប្រអប់ ដើម្បីកុំឱ្យប៉ះពាល់សុខភាព ៕

មុនពេលធ្វើដំណើរទៅលេងនៅប្រទេសណាមួយ យើងគួរតែឈ្វេងយល់ពីពលរដ្ឋប្រទេសនោះថា តើពួកគេចូលចិត្តអ្វី និងពុំចូលចិត្តអ្វីខ្លះ ពីព្រោះការអប់រំ និងការទទួលបានព័ត៌មាន ធ្វើឱ្យពលរដ្ឋប្រទេសនីមួយៗមានការយល់ឃើញខុសៗគ្នា ។ នៅប្រទេសកូរ៉េខាងត្បូងក៏ដូចគ្នាដែរ ពលរដ្ឋកូរ៉េខាងត្បូងមួយចំនួនធំពុំចូលចិត្ត ៧ចំណុចនេះទេ ។

១-ពលរដ្ឋកូរ៉េខាងជើង ៖ ពលរដ្ឋកូរ៉េខាងត្បូងមួយចំនួនស្អប់ខ្ពើម និងរើសអើងពលរដ្ឋកូរ៉េខាងជើង ដោយសារពួកគេយល់ថា ពលរដ្ឋកូរ៉េខាងជើងមានតម្លៃទាបជាងខ្លួនគ្រប់ផ្នែកទាំងអស់ ។

២-អ្នកប្រព្រឹត្តខុស ៖ ទោះជាអ្នកណាម្នាក់ប្រព្រឹត្តខុសបន្តិចបន្តួចក្តី ប៉ុន្តែពលរដ្ឋកូរ៉េខាងត្បូងនឹងរិះគន់មិនឈប់ឈរ ។

៣-ជនជាតិមូស្លីម ៖ ទោះជាជនជាតិមូស្លីមរស់នៅប្រទេសកូរ៉េខាងត្បូងតិចតួច ប៉ុន្តែពលរដ្ឋកូរ៉េខាងត្បូងតែងរើសអើងមូស្លីម និងគិតថា មូស្លីមចូលចិត្តប្រើប្រាស់អំពើហិង្សា ដោយសារពលរដ្ឋកូរ៉េខាងត្បូងទទួលព័ត៌មានច្រើនពីការប្រើហិង្សារបស់មូស្លីម ។

៤-ឱ្យតម្លៃស្ត្រីទាបជាងបុរស ៖ ពលរដ្ឋកូរ៉េខាងត្បូងភាគច្រើនផ្តល់តម្លៃទៅលើបុរស ឬចាត់ទុកបុរសជាធំ ហើយគិតថា ស្ត្រីមានតម្លៃទាបជាងបុរស ទទួលឱកាសតិចជាងបុរសក្នុងតួនាទីការងារ ។ ពួកគេចាត់ទុកថា ពេលរៀបការរួច ស្ត្រីមានតួនាទីថែទាំក្រុមគ្រួសារ និងកូនៗ ។

៥-ក្រុមស្រឡាញ់ភេទដូចគ្នា ៖ សង្គមកូរ៉េខាងត្បូងពុំទាន់បើកទូលាយ ឬទទួលស្គាល់អ្នកស្រឡាញ់ភេទដូចគ្នា (LGBTQ+) ទេ ទើបពលរដ្ឋកូរ៉េខាងត្បូងរើសអើស និងប្រឆាំងជាមួយអ្នកស្រឡាញ់ភេទដូចគ្នា ។ ហេតុនេះ ធ្វើឱ្យក្រុម LGBTQ+ ត្រូវលាក់បាំង ពុំបើកចំហជាសាធារណៈ និងរស់នៅជាមួយគ្នាដោយលួចលាក់ ។

៦-ស្ថានភាពអាពាហ៍ពិពាហ៍ ៖ សង្គមកូរ៉េខាងត្បូងចង់ឱ្យអ្នករៀបអាពាហ៍ពិពាហ៍បង្កើតក្រុមគ្រួសាររស់នៅជួបជុំគ្នា រីឯការនៅលីវ ការលែងលះ ឬរៀបការជាមួយជនបរទេស គោរពសាសនាខុសគ្នា តែងតែត្រូវបានពលរដ្ឋកូរ៉េខាងត្បូងវាយតម្លៃថា ពុំល្អ ។

៧-តួនាទីការងារ ៖ ពលរដ្ឋកូរ៉េខាងត្បូងឱ្យតម្លៃលើតួនាទីការងារល្អៗ ឬមានកិត្តិយស ដូចជា ៖ គ្រូពេទ្យ មេធាវី និងវិស្វករ ច្រើនជាងការងារប្រើប្រាស់កម្លាំងពលកម្ម ទើបធ្វើឱ្យមានការបែងចែកវណ្ណៈ និងរើសអើងតួនាទីការងារ ៕

ប្រទេសថៃ ៖ បញ្ហាមួយដែលពលរដ្ឋថៃចាប់អារម្មណ៍ និងជជែកគ្នាយ៉ាងច្រើន គឺក្រោយពីអ្នកជំនាញនិយាយថា ផ្ទាំងទឹកកកនៅតំបន់ប៉ូលខាងជើង និងប៉ូលខាងត្បូង ផ្ទាំងទឹកកកលើកំពូលភ្នំ និងផ្ទាំងទឹកកកនៅហ្គ្រីនឡែន (Greenland) គឺជាកោះដ៏ធំរបស់ប្រទេសដាណឺម៉ាក និងមានទំហំធំជាងកោះនានាលើពិភពលោក នឹងរលាយអស់ដោយសារអាកាសធាតុក្តៅយ៉ាងខ្លាំង ហើយធ្វើឱ្យកម្រិតទឹកសមុទ្រលើផែនដីកើនឡើង ចាប់ពី៦០ម៉ែត្រ ទៅ៧០ម៉ែត្រ ។ ពេលនោះ ប្រទេសមួយចំនួន រួមទាំងទីក្រុងបាងកក និងខេត្តជាច្រើនរបស់ថៃ ដូចជា ៖ សាមុតប្រាកាន សាមុតសាខន នុនថាក់បុរី និងប៉ាធុមថានី លិចក្រោមទឹកសមុទ្រ ដោយសារខេត្តទាំងនេះស្ថិតក្នុងតំបន់ទំនាបក្បែរឆ្នេរសមុទ្រ ។

លើសពីនេះ ខេត្តជាច្រើនទៀតនៅភាគកណ្តាលប្រទេសថៃ ដូចជា ៖ អយុធ្យា សុផាន់បុរី និងណាខនប៉ាធុម នឹងរងផលប៉ះពាល់យ៉ាងខ្លាំងដោយសារកម្រិតទឹកសមុទ្រកើនឡើង ។ រីឯខេត្តនៅឆ្នេរសមុទ្រនៅភាគខាងកើត ដូចជា ៖ ឈុនបុរី រ៉ាក់យ៉ង ចាន់ថាក់បុរី និងត្រាត នឹងក្លាយទៅជាសមុទ្រ និងលិចទឹកជារៀងរហូត ។ ខេត្តភាគខាងត្បូងនៅជាប់ឆ្នេរសមុទ្រ ទាំងឈូងសមុទ្រថៃ និងសមុទ្រអាន់ដាម៉ាន់ រួមមាន ៖ សុងក្លា ប៉ាតានី ណារ៉ាធីវ៉ាត ភូកេត ផាំងង៉ា និងក្រាប៊ី នឹងទឹកលិចយ៉ាងខ្លាំង ខណៈកោះនានារបស់ថៃអាចលិចក្រោមទឹកសមុទ្រ និងមានទំហំតូចជាងមុន ។

ការផ្លាស់ប្តូរភូមិសាស្ត្រប្រទេសថៃ គឺបណ្តាខេត្តស្ថិតនៅតំបន់ទំនាបនឹងក្លាយជាបឹង ឬសមុទ្រថ្មី ហើយភ្នំខ្ពស់ៗនឹងក្លាយជាកោះមានទឹកព័ទ្ធជុំវិញ ។ ដោយឡែក តំបន់ខ្ពង់រាបនៅភាគខាងជើង និងខាងលិច នឹងក្លាយជាកោះធំៗហ៊ុព័ទ្ធដោយទឹកសមុទ្រ ខណៈហេដ្ឋារចនាសម្ព័ន្ធ ដូចជា ៖ ផ្លូវ មន្ទីរពេទ្យ និងអាកាសយានដ្ឋាន នឹងខូចខាត ។ ដូចគ្នានេះ ផ្ទៃដីកសិកម្ម និងតំបន់ឧស្សាហកម្មនានានៅតំបន់ទំនាបត្រូវបំផ្លាញទាំងស្រុង ។

ទោះបីជាផ្ទាំងទឹកកកនៅតំបន់នានាលើផែនដី អាចចំណាយពេលរលាយរហូតដល់រាប់រយឆ្នាំ ឬរាប់ពាន់ឆ្នាំ ទើបប្រទេសមួយចំនួន រួមទាំងថៃលិចក្រោមទឹកសមុទ្រ ប៉ុន្តែអ្នកជំនាញបញ្ជាក់ថា កម្រិតទឹកសមុទ្របានកើនឡើងជាបន្តបន្ទាប់ ដោយសារផែនដីឡើងកំដៅ ។ អ្នកជំនាញសន្និដ្ឋានថា នៅឆ្នាំ២០៥០ កម្រិតទឹកសមុទ្រនៅប្រទេសថៃអាចកើនឡើងចាប់ពី៣០សង់ទីម៉ែត្រ ទៅ៥០សង់ទីម៉ែត្រ ដែលធ្វើឱ្យតំបន់ឆ្នេរសមុទ្រ និងតំបន់ទំនាបប្រឈមការលិចទឹកប៉ះពាល់ដល់ការរស់នៅរបស់ពលរដ្ឋថៃ ។

ហេតុនេះ អ្នកជំនាញបានសំណូមពរឱ្យរដ្ឋាភិបាលថៃគួរតែសម្របខ្លួន និងបង្កើតផែនការកែលម្អហេដ្ឋារចនាសម្ព័ន្ធ តំបន់កសិកម្ម រួមទាំងអភិរក្សបរិស្ថាននៅឆ្នេរសមុទ្រ ដើម្បីកាត់បន្ថយផលប៉ះពាល់មកលើប្រទេសថៃ ដោយសារផ្ទាំងទឹកកករលាយនៅតំបន់ប៉ូល និងតំបន់ផ្សេងៗ ៕

ប្រទេសវៀតណាម ៖ វៀតណាមបានកែលម្អអគារអ្នកដំណើរថ្មីរបស់អាកាសយានដ្ឋានអន្តរជាតិ Phu Quoc (កោះត្រល់) ឱ្យមានរូបរាងស្រដៀងនឹងសត្វស្លាបហោះ ព្រមទាំងបំពាក់បច្ចេកវិទ្យាទំនើបក្នុងអាកាសយានដ្ឋានតាមលក្ខណៈស្តង់ដារដូចគ្នានឹងអាកាសយានដ្ឋានសិង្ហបុរី Changi និងអាកាសយានដ្ឋានជប៉ុន Haneda ។ នេះបើតាមការចុះផ្សាយរបស់សារព័ត៌មានបរទេស កាលពីថ្ងៃទី១៩ ខែឧសភា ឆ្នាំ២០២៥ ។

រដ្ឋាភិបាលវៀតណាមមានគម្រោងឱ្យអាកាសយានដ្ឋាន Phu Quoc (កោះត្រល់) មានតួនាទីសំខាន់ក្នុងការអភិវឌ្ឍហេដ្ឋារចនាសម្ព័ន្ធដឹកជញ្ជូន និងទេសចរណ៍ ព្រមទាំងសាងសង់អគារអ្នកដំណើរថ្មីសម្រាប់ការប្រជុំកិច្ចសហការសេដ្ឋកិច្ចអាស៊ីប៉ាស៊ីហ្វិក (APEC) ឆ្នាំ២០២៧ ។ អាកាសយានដ្ឋាននេះនឹងកែលម្អថ្មីទាំងស្រុងដើម្បីឱ្យមានលក្ខណៈទំនើប និងអស្ចារ្យបំផុតក្នុងតំបន់អាស៊ីអាគ្នេយ៍ ។

តាមគម្រោង គឺអាកាសយានដ្ឋាននឹងគ្របដណ្តប់លើផ្ទៃដីជាង១,០៥០ហិកតា និងស្របតាមស្តង់ដារ 4E ដែលកំណត់ដោយអង្គការអាកាសចរណ៍ស៊ីវិលអន្តរជាតិ (ICAO) ។ ការកែលម្អនេះដើម្បីឱ្យអាកាសយានដ្ឋានអាចទទួលយន្តហោះធំៗចុះចត ដូចជា ៖ Boeing 747, Boeing 787 និង Airbus A350 ។ អគារអ្នកដំណើរថ្មីនឹងកែលម្អតាមលក្ខណៈស្តង់ដារអន្តរជាតិ រួមមាន ៖ អគារអ្នកដំណើរក្នុងស្រុក និងអន្តរជាតិ, ហាងលក់ទំនិញ និងកន្លែងតាំងពិព័រណ៍ ។

មុនកិច្ចប្រជុំ APEC 2027 វៀតណាមរំពឹងថា អាកាសយានដ្ឋាន Phu Quoc នឹងអាចទទួលអ្នកដំណើររហូតដល់១៨លាននាក់ក្នុង១ឆ្នាំ ដែលច្រើនជាងអ្នកដំណើរបច្ចុប្បន្ន រហូតដល់ជាង៤ដង ដើម្បីបម្រើវិស័យទេសចរណ៍ និងការរីកចម្រើនសេដ្ឋកិច្ច ។ អាកាសយានដ្ឋាននេះនឹងទទួលអ្នកដំណើររហូតដល់៥០លាននាក់ក្នុង១ឆ្នាំ និងទទួលទំនិញ៥ម៉ឺនតោនក្នុង១ឆ្នាំ នៅឆ្នាំ២០៥០ ។

ភាពលេចធ្លោរបស់អាកាសយានដ្ឋាន គឺបំពាក់ដោយបច្ចេកវិទ្យាទំនើបដូចគ្នានឹងបច្ចេកវិទ្យាក្នុងអាកាសយានដ្ឋានលំដាប់ពិភពលោក ដូចជា ៖ អាកាសយានដ្ឋានសិង្ហបុរី Changi, អាកាសយានដ្ឋានជប៉ុន Haneda និងអាកាសយានដ្ឋានចិននៅទីក្រុងប៉េកាំង ។ អ្នកដំណើរនឹងងាយស្រួល Check in ជាមុនពីចម្ងាយ, មានប្រព័ន្ធបែងចែកសម្ភារៈដោយស្វ័យប្រវត្តិ និងបច្ចេកវិទ្យាកាត់បន្ថយរយៈពេល Check in ត្រឹមតែពី១៥នាទី ទៅ៣០នាទី ។ ក្រៅពីនេះ ក្នុងអាកាសយានដ្ឋាននឹងសាងសង់អគារពិសេសសម្រាប់ស្វាគមន៍មេដឹក និងមន្ត្រីជាន់ខ្ពស់មកចូលរួមកិច្ចប្រជុំ APEC ។

លើសពីនេះ Runway ចាស់របស់អាកាសយានដ្ឋាន នឹងពង្រីករហូតដល់៣,៥០០ម៉ែត្រ និងបង្កើត Runway ថ្មីមួយទៀត ប្រវែង៣,៣០០ម៉ែត្រ ។ រីឯចំណតយន្តហោះនឹងពង្រីកឱ្យកាន់តែទូលាយសម្រាប់ការចុះចតរបស់យន្តហោះធំៗ ។ បច្ចុប្បន្ន អាកាសយានដ្ឋាន Phu Quoc មានលក្ខណៈស្តង់ដារ 4E ដែលអគារអ្នកដំណើរអាចទទួលអ្នកដំណើរចំនួន៤លាននាក់ក្នុង១ឆ្នាំ និងមានអគារស្តុកទំនិញ ចំនួន១៤,៥០០តោនក្នុង១ឆ្នាំ ។

កាលពីឆ្នាំ២០២៤ អាកាសយានដ្ឋាន Phu Quoc បានទទួលអ្នកដំណើរជាង៤លាន១សែននាក់ គឺលើសពីការរំពឹងទុក ក្នុងនោះអ្នកដំណើរក្នុងស្រុក ស្មើ២លាន៣សែននាក់ និងអ្នកដំណើរអន្តរជាតិ ស្មើ១លាន៨សែននាក់ ៕

ប្រទេសជប៉ុន ៖ ភោជនីយដ្ឋានមួយឈ្មោះ «Yakitori» នៅទីក្រុងអូសាកា ប្រទេសជប៉ុន បានធ្វើឱ្យមហាជនពុំពេញចិត្តយ៉ាងខ្លាំង ក្រោយពីភោជនីយដ្ឋាននេះដាក់ស្លាកពុំទទួលស្វាគមន៍ភ្ញៀវចិន ហើយអះអាងថា មកពីភ្ញៀវចិនភាគច្រើនពុំសុភាពពេលចូលបរិភោគអាហារ ។ បើទោះជាគ្មានការអះអាងច្បាស់លាស់ថា ហេតុអ្វីភោជនីយដ្ឋានសម្រេចចិត្តបដិសេធភ្ញៀវចិន ប៉ុន្តែវាពុំមែនជាលើកដំបូងទេ ដែលភោជនីយដ្ឋានជប៉ុនត្រូវបានមហាជនចោទប្រកាន់ថា រើ.សអើងភ្ញៀវចិន ។ នេះបើតាមការចុះផ្សាយរបស់សារព័ត៌មានបរទេស កាលពីថ្ងៃទី១៨ ខែឧសភា ឆ្នាំ២០២៥ ។

កាលពីឆ្នាំ២០២៣ Influencer ជនជាតិចិនបានបង្ហោះរូបភាពភោជនីយដ្ឋានមួយកន្លែងលក់អាហារចិននៅទីក្រុងតូក្យូ ប្រទេសជប៉ុន បានដាក់ស្លាកពុំទទួលភ្ញៀវចិន ដោយសរសេរអក្សរជប៉ុនថា នេះជាវិធានការការពារវីរុសចិន ។ លើសពីនេះ ភោជនីយដ្ឋានមួយទៀតនៅទីក្រុងតូក្យូ ក៏ធ្លាប់សរសេរក្នុងបណ្តាញសង្គមកាលពីខែកក្កដា ឆ្នាំ២០២៤ ថា ហាមភ្ញៀវចិន និងកូរ៉េខាងត្បូងចូលបរិភោគអាហារក្នុងភោជនីយដ្ឋាន ។

ការបដិសេធពុំទទួលស្វាគមន៍ភ្ញៀវចិនចូលភោជនីយដ្ឋានជប៉ុននៅទីក្រុងអូសាកា បានធ្វើឱ្យមានការជជែកវែកញែកយ៉ាងខ្លាំងក្នុងបណ្តាញសង្គមប្រទេសចិន ប៉ុន្តែពលរដ្ឋជប៉ុនមួយចំនួនដែលមានគំនិតជាតិនិយម បែរជាគាំទ្រភោជនីយដ្ឋាននេះ ។

ពលរដ្ឋចិនមួយចំនួនធំបានបង្ហាញការខកចិត្ត និងពុំពេញចិត្តយ៉ាងខ្លាំងចំពោះភោជនីយដ្ឋានជប៉ុនរើសអើងភ្ញៀវចិន ។ ពលរដ្ឋចិនយល់ឃើញថា ទង្វើរបស់ភោជនីយដ្ឋានជប៉ុន គឺជ្រុលហួសហេតុជាងភ្ញៀវចិនដែលមិនសុភាពទៅទៀត ខណៈអ្នកខ្លះថា នេះជាវិធីសាស្ត្រទាក់ទាញភ្ញៀវចូលបរិភោគអាហារ តាមរយៈការបង្ហាញពីទឹកចិត្តស្រឡាញ់ជាតិរបស់ខ្លួន ។ ប៉ុន្តែអ្នកផ្សេងទៀតគាំទ្រភោជនីយដ្ឋានជប៉ុន និងនិយាយថា ពលរដ្ឋចិនគួរតែស្នើឱ្យពលរដ្ឋចិនដូចគ្នាកែប្រែទម្លាប់មិនល្អចេញ ជាពិសេស នៅទីសាធារណៈ ។

តាមច្បាប់របស់ជប៉ុន គឺភោជនីយដ្ឋាននានាអាចបដិសេធភ្ញៀវដែលពុំនិយាយភាសាជប៉ុន ដោយសារបុគ្គលិកភោជនីយដ្ឋាននិយាយភាសាបរទេសមានកម្រិត ប៉ុន្តែបើភោជនីយដ្ឋានណាមួយរើសអើងពូជសាសន៍ ឬសញ្ជាតិ ចាត់ទុកថា ភោជនីយដ្ឋាននោះល្មើសនឹងរដ្ឋធម្មនុញ្ញជប៉ុន ។

គួរបញ្ជាក់ថា កាលពីឆ្នាំ២០២៤ ប្រទេសជប៉ុនទទួលបានភ្ញៀវទេសចរបរទេស ចំនួន៣៦លាន៩សែននាក់ កើនឡើង៤៧.១% បើធៀបនឹងឆ្នាំ២០២៣ ខណៈឆ្នាំ២០១៩ ជប៉ុនទទួលបានភ្ញៀវទេសចរបរទេស ត្រឹមតែ៣១លាន៩សែននាក់ប៉ុណ្ណោះ ។ រីឯភ្ញៀវទេសចរមកកម្សាន្តនៅជប៉ុនច្រើនបំផុត គឺកូរ៉េខាងត្បូង ស្មើ២៣.៨% និងចិន ស្មើ១៨.៩៥ ។ ភ្ញៀវទេសចរចិន និងកូរ៉េខាងត្បូង ដែលបរិភោគអាហារក្នុងភោជនីយដ្ឋានជប៉ុនពេលធ្វើដំណើរមកដល់ជប៉ុន ពួកគេចង់ឱ្យភោជនីយដ្ឋានជប៉ុនផ្លាស់ប្តូរទស្សនៈនេះ ៕