ប្រទេសហ្វីលីពីន៖ មន្ត្រីប៉ូលីសនៅក្នុងប្រទេសហ្វីលីពីន ថ្មីៗនេះ ត្រូវបានគេផ្តល់សារដ៏តឹងរឹងមួយថា ត្រូវសម្រក់ទម្ងន់តាមស្ដង់ដារក្នុងរយៈពេលមួយឆ្នាំ បើមិនដូច្នោះទេនឹងត្រូវដកចេញពីតួនាទី។ អគ្គស្នងការនគរបាលជាតិហ្វីលីពីន (PNP) លោក Nicolas Torre III បានប្រកាសថា មន្ត្រីដែលលើសទម្ងន់ត្រូវតែសម្រកទម្ងន់ ដើម្បីរក្សាកម្លាំង។ លោកបាននិយាយថា ច្បាប់នេះអនុវត្តចំពោះមន្ត្រីប៉ូលិសគ្រប់គ្នា រាប់ចាប់ពីមន្ត្រីជាន់ខ្ពស់រហូតដល់អ្នកល្បាត ទាំងស្ត្រីនិងបុរស។ នេះបើតាមប្រភបសារព័ត៌មានក្នុងស្រុក The Philippine Star ចុះផ្សាយកាលពីថ្ងៃទី ១៧ ខែមិថុនា ឆ្នាំ ២០២៥។

ឧត្តមសេនីយទោ Jean Fajardo អ្នកនាំពាក្យ PNP បាននិយាយថា “វាមានសារៈសំខាន់ខ្លាំងណាស់សម្រាប់មន្រ្តីប៉ូលីសដើម្បីឱ្យមើលទៅសមរម្យ និងមានសុខភាពល្អ” ។ “វាបង្ហាញថាមានវិន័យនៅក្នុងអង្គភាពរបស់យើង។”

យោងតាមច្បាប់ដែលមានស្រាប់ (ច្បាប់សាធារណៈលេខ 6975) មន្ត្រីនគរបាលគួរថ្លឹងទម្ងន់មិនលើស ឬតិចជាងប្រាំគីឡូក្រាមពីទម្ងន់ស្តង់ដារសម្រាប់កម្ពស់ អាយុ និងភេទរបស់ពួកគេ។ មន្ត្រីដែលមានទម្ងន់ធ្ងន់ពេកនឹងមានពេលមួយឆ្នាំដើម្បីឈានទៅរកទម្ងន់ដែលមានសុខភាពល្អ។ ប្រសិនបើពួកគេបរាជ័យ ពួកគេនឹងត្រូវដកចេញពីក្របខណ្ឌប៉ូលិស។ សម្រាប់មន្ត្រីដែលឈឺ ឬមានស្ថានភាពសុខភាពមិនល្អ PNPកំពុងសម្លឹងមើលជម្រើសពីរ៖ គឺពួកគេអាចត្រូវបានផ្តល់ការងារនៅក្នុងការិយាល័យ ឬត្រូវចូលនិវត្តន៍ជាផ្លូវការក្រោមហេតុផលពិការភាព។ លោក Fajardo បានពន្យល់ថា មន្រ្តីប៉ូលីសអាចជ្រើសរើសវិធីផ្ទាល់ខ្លួន ដើម្បីបញ្ចុះទម្ងន់បាន។ គាត់បានបន្ថែមថា៖ «យើងនឹងមិនប្រាប់ពួកគេពីរបៀបហាត់ប្រាណ ឬរបបអាហារទេ ប៉ុន្តែយើងនឹងពិចារណាពីបញ្ហាវេជ្ជសាស្ត្រ»។

ក្រៅពីច្បាប់ស្ដីពីកាយសម្បទា ប្រធាន PNP ក៏កំពុងជំរុញឲ្យពេលវេលានៃឆ្លើយតបរបស់ប៉ូលិសកាន់តែលឿនផងដែរ។ លោក Torre ចង់ឱ្យមន្ត្រីប៉ូលីសទាំងអស់ឆ្លើយតបទៅនឹងការហៅទូរស័ព្ទបន្ទាន់ក្នុងរយៈពេលប្រាំនាទី ឬតិចជាងនេះ។ មេបញ្ជាការមួយចំនួននៅក្រុង Metro Manila និងខេត្តផ្សេងទៀតត្រូវបានដកចេញរួចហើយ ដោយសារតែការខកខានមិនបានបំពេញតាមគោលដៅ។

លោកប្រធានាធិបតី Ferdinand Marcos Jr. ថ្មីៗនេះបានឃើញការបង្ហាញពីរបៀបដែលប៉ូលីសឆ្លើយតបទៅនឹងការហៅទូរស័ព្ទ 911 ។ គាត់សប្បាយចិត្តដែលឃើញក្រុមប៉ូលីសមួយចំនួនអាចមកដល់កន្លែងក្នុងរយៈពេលត្រឹមតែបីនាទីប៉ុណ្ណោះ។ លោកបាននិយាយថានេះបង្ហាញថាកិច្ចខិតខំប្រឹងប្រែងដើម្បីកែលម្អសុវត្ថិភាពសាធារណៈកំពុងដំណើរការល្អហើយ។
ជាមួយគ្នានេះដែរ PNP សង្ឃឹមថាការអនុវត្តច្បាប់ដែលមានស្រាប់ទាំងនេះនឹងកសាងកម្លាំងនគរបាលអោយកាន់តែរឹងមាំ លឿន និងប្រកបដោយវិជ្ជាជីវៈបន្ថែមទៀត៕

រាជធានីភ្នំពេញ ៖ បន្ទាប់ពីការសន្ទនាជាលក្ខណៈឯកជនរបស់លោកស្រី ផែថងថាន ស៊ីណាវ៉ាត្រ ដែលបាននិយាយដល់«មេទ័ពភូមិភាគទីពីរ» លោក ប៊ុនស៊ីន ផាត់ខ្លាំង ថាជាក្រុមប្រឆាំងនឹងរដ្ឋាភិបាល ពេលនេះកងទ័ពភូមិន្ទថៃបានសម្តែងការគាំទ្ររបស់ខ្លួនចំពោះមេទ័ពរូបនេះ ថាជាបុគ្គលដ៏អង់អាចក្លាហាន ហ៊ានលះបង់គ្រប់យ៉ាងដើម្បីការពារទឹកដី។

យោងតាមការចុះផ្សាយរបស់ The Nation Thailand នៅថ្ងៃទី១៨ ខែមិថុនា ឆ្នាំ២០២៥ បានឲ្យដឹងថា កងទ័ពភូមិន្ទថៃ និងអង្គភាពយោធាផ្សេងៗ ដូចជានាយកដ្ឋានកិច្ចការស៊ីវិល បានបង្ហោះសារនៅលើទំព័រ Facebook របស់ពួកគេ ដោយដកស្រង់ព្រះរាជសាររបស់ព្រះបាទ ចូឡាឡុងកន (រាមាទី ៥) អំពីសេចក្តីថ្លៃថ្នូររបស់ទាហាន។ សេចក្តីប្រកាសបានគូសបញ្ជាក់ថា៖
ទាហានគឺជាបុគ្គលដែលទទួលបានការគោរពខ្ពស់បំផុតពីប្រទេសជាតិ ជាសុភាពបុរស និងកាន់អាវុធដើម្បីការពារប្រទេស។ ទាហានលះបង់ប្រយោជន៍ផ្ទាល់ខ្លួន ដើម្បីសុខុមាលភាពប្រជាជន និងការរស់រានមានជីវិតរបស់ប្រទេសជាតិ។ ទាហានឲ្យតម្លៃខ្ពស់ជាងទ្រព្យសម្បត្តិ។ ដូចនេះ មិនគួរមាននរណាម្នាក់មកប្រមា.ថមើលងាយបុគ្គលដែលជាទាហានបានឡើយ។

សារលិខិតក៏បានលើកទឹកចិត្តដល់ឧត្តមសេនីយ៍ឯក ប៊ុនស៊ីន និងទាហានទាំងអស់ ដោយគេបានសង្កត់ធ្ងន់ថា «ទឹកដីថៃមិនមែនបានមកដោយពាក្យសម្ដីទេ តែតាមរយៈដង្ហើម និងជីវិតរបស់ដូនតាយើង ដែលបានលះបង់ពេលវេលាចុងក្រោយដើម្បីការពារវា។»

ក្រៅពីនេះ ក៏មានការតាំងបង្ហាញរូបថតរបស់លោក ប៊ុនស៊ីន នៅលើផ្ទាំងLED ធំៗតាមអគារប៉ុស្តិ៍នគរបាល និងទីស្នាក់ការកងទ័ពថៃមួយចំនួន នៅលើផ្លូវ Vibhavadi Rangsit ក្នុងទីក្រុងបាងកក ដើម្បីជាចូលរួមជាការលើកទឹកចិត្តចំពោះមេទ័ពរូបនេះ។

ជាមួយគ្នានេះ ទំព័រហ្វេសប៊ុកកងទ័ពភូមិន្ទថៃ បានបង្ហោះសារដោយបញ្ជាក់ថា ទោះស្ថិតក្នុងកាលៈទេសៈណាក៏ដោយ កងទ័ពបានត្រៀមខ្លួនរួចជាស្រេច ដើម្បីឈរជើងយ៉ាងរឹងមាំក្នុងការការពារអធិបតេយ្យភាពជាតិ រួមនឹងសញ្ញា #Save2ndArmyRegionChief ដែលមានន័យថា «ការពារលោកមេទ័ពតំបន់ភូមិភាគទីពីរ»។

គួរជម្រាបថា បច្ចុប្បន្នស្ថានភាពនយោបាយនៅក្នុងប្រទេសថៃកំពុងមានភាពតានតឹងខ្លាំង ដោយអ្នកនយោបាយ និងគណបក្សជាច្រើនបានដាក់សម្ពាធឲ្យលោកស្រី ផែថងថាន ធ្វើការលាលែងពីតំណែងដោយខ្លួនឯង។ ចំណែកប្រជាជនក៏បានបង្ហាញការមិនពេញចិត្តយ៉ាងខ្លាំងរបស់ពួកគេផងដែរ ដែលមេទ័ពគំរូរបស់ពួកគេ ត្រូវបានចោ.ទប្រកាន់ថាជាជនប្រឆាំងនឹងរដ្ឋាភិបាលដោយនាយករដ្ឋមន្រ្តីបែបនេះ៕

ប្រទេសថៃ ៖ តាមការផ្សព្វផ្សាយរបស់សារព័ត៌មានថៃ Amarin News កាលពីថ្ងៃទី១៧ ខែមិថុនា ឆ្នាំ២០២៥ ឱ្យដឹងថា ឈ្មួញថៃជួបទុក្ខលំបាកយ៉ាងខ្លាំងដោយសារពុំអាចនាំចេញបន្លែ ផ្លែឈើមកកម្ពុជា ហើយឈ្មួញត្រូវលក់ដោយខ្លួនឯងនៅថៃ ។ ឈ្មួញបានស្នើរដ្ឋាភិបាលលោកស្រី ផេថងថាន ស៊ីណាវ៉ាត់ ប្រកាសឱ្យច្បាស់លាស់ថា តើថៃបិទព្រំដែន ឬក៏បើក? ពុំមែនម្តងបើកព្រំដែន ម្តងបិទ ធ្វើឱ្យឈ្មួញលំបាកបែបនេះទេ ។ រីឯអាជីវករថៃលក់បន្លែ ផ្លែឈើនៅផ្សារឆងចម ខេត្តសុរិន្ទ ប្រាប់ថា ត្រូវដឹកបន្លែ ផ្លែឈើលក់តាមភូមិ ក្រោយពីកម្ពុជាហាមនាំចូលបន្លែ ផ្លែឈើថៃ ។

កាលពីថ្ងៃទី១៧ ខែមិថុនា រថយន្តដឹកជញ្ជូនបន្លែ ផ្លែឈើថៃរាប់ពាន់គ្រឿងបានកកស្ទះនៅច្រកព្រំដែនអន្តរជាតិចាំយាម-បានហាតឡិក (ខេត្តកោះកុង-ខេត្តត្រាត) តាំងពីពេលព្រឹក រហូតដល់រសៀល ក្នុងនោះរថយន្តខ្លះបានចតនៅមាត់ច្រករង់ចាំស្តាប់ស្ថានការណ៍ ខណៈរថយន្តខ្លះទៀតត្រឡប់ទៅវិញ ។ ក្រុមឈ្មួញថៃនិយាយថា ពួកគេបម្រុងនាំចេញបន្លែ ផ្លែឈើទៅខេត្តកោះកុង ប្រទេសកម្ពុជា ប៉ុន្តែពេលដឹកមកដល់ព្រំដែនត្រូវកម្ពុជាហាមឃាត់ ។

លោក វិឈិត ម៉េនថានូ និងលោក ផៃសាល ឆបសាវ៉ាង ជាឈ្មួញរកស៊ីដឹកជញ្ជូនផ្លែឈើថៃ ប្រាប់ថា ពួកគេបានទិញបន្លែ ផ្លែឈើយកទៅលក់នៅខេត្តកោះកុង ប៉ុន្តែត្រូវកម្ពុជាហាមឃាត់ឆ្លងដែនធ្វើឱ្យពួកខ្លួនជួបទុក្ខលំបាកយ៉ាងខ្លាំង ។ ពេលនេះ ពុំដឹងយកបន្លែ ផ្លែឈើទៅលក់នៅកន្លែងណាទេ និងពុំដឹងធ្វើដូចម្តេច បញ្ហាសំខាន់បន្លែ ផ្លែឈើទិញមកហើយពុំអាចលក់ទៅឱ្យម្ចាស់ដើមវិញ ។ ដូច្នេះ មានតែដើរលក់បន្លែ ផ្លែឈើដោយខ្លួនឯងដើម្បីកុំឱ្យស្អុយទាន់ ។

លោក ផៃសាល បន្តថា ហេតុអ្វីរដ្ឋាភិបាលថៃពុំជជែកឱ្យច្បាស់លាស់ពីការបើក-បិទព្រំដែន ហើយឱ្យពលរដ្ឋមកជួបទុក្ខលំបាកបែបនេះ ។ តើរដ្ឋាភិបាលនឹងធ្វើដូចម្តេច? រដ្ឋាភិបាលត្រូវប្រកាសឱ្យច្បាស់លាស់ថា តើនឹងបើកព្រំដែន ឬក៏បិទ? ដើម្បីកុំឱ្យពលរដ្ឋច្របូកច្របល់ ។ វិធីល្អ រដ្ឋាភិបាលគួរបិទព្រំដែនតែម្តងទៅ រួចហើយចាំជជែកគ្នាឱ្យយល់ និងបើកព្រំដែនធម្មតាឡើងវិញ ពុំមែនម្តងបិទ ម្តងបើកទេ ។ ក្រុមឈ្មួញថៃបានសំណូមពរឱ្យរដ្ឋាភិបាលប្រញាប់ជជែកពិភាក្សាឱ្យច្បាស់លាស់ថា តើរដ្ឋាភិបាលនឹងដោះស្រាយបញ្ហាបើក-បិទព្រំដែនដូចម្តេច ។

ដោយឡែក ស្ត្រីអាជីវករថៃម្នាក់លក់បន្លែ ផ្លែឈើនៅផ្សារឆងចម ខេត្តសុរិន្ទ ប្រាប់ថា អ្នកស្រីត្រូវដឹកបន្លែ ផ្លែឈើលក់តាមភូមិក្រោយពីកម្ពុជាបិទច្រកព្រំដែនហាមនាំចូលបន្លែ ផ្លែឈើថៃ ។ អ្នកស្រីលំបាកណាស់ ពុំចង់ឱ្យស្ថានការណ៍ព្រំដែនអូសបន្លាយយូរទេ និងចង់ឱ្យស្ថានការណ៍វឹលត្រឡប់មកធម្មតាវិញយ៉ាងឆាប់រហ័ស ។ សូមរដ្ឋាភិបាលមើលឃើញពីទុក្ខលំបាកពលរដ្ឋរស់នៅតំបន់ព្រំដែនផង អាជ្ញាធរឱ្យពលរដ្ឋត្រៀមខ្លួនជម្លៀសចេញ ប៉ុន្តែពលរដ្ឋខ្វះខាតជីវភាព ៕

ប្រទេសថៃ ៖ សារព័ត៌មានថៃ Top News បានរាយការណ៍នៅថ្ងៃទី១៨ ខែមិថុនា ឆ្នាំ២០២៥ ថា នាយករដ្ឋមន្ត្រីថៃ លោកស្រី ផេថងថាន ស៊ីណាវ៉ាត់ នឹងធ្វើឱ្យស្ថានការណ៍ព្រំដែនកម្ពុជា-ថៃត្រឡប់មកធម្មតាវិញ ហើយលោកស្រីណែនាំឱ្យក្រសួងសេដ្ឋកិច្ចឌីជីថល និងសង្គម ទប់ស្កាត់ព័ត៌មានក្លែងក្លាយក្នុងបណ្តាញសង្គមថៃដែលផ្សព្វផ្សាយបង្កជម្លោះជាមួយកម្ពុជា ។

បន្ទាប់ពីធ្វើជាប្រធានកិច្ចប្រជុំមន្ត្រីរដ្ឋាភិបាលកម្រិតក្រសួង លើកទី៥/ឆ្នាំ២០០៥ នៅក្រសួងថាមពល កាលពីថ្ងៃទី១៨ ខែមិថុនា លោកស្រី ផេថងថាន នាយករដ្ឋមន្ត្រីថៃថ្លែងថា អង្គភាពរដ្ឋ រួមទាំងក្រសួងសេដ្ឋកិច្ចឌីជីថល និងសង្គម ត្រូវតែយកចិត្តទុកដាក់ក្នុងការផ្តល់ព័ត៌មានពិតដល់ពលរដ្ឋ ពីព្រោះកន្លងមក មានការផ្សព្វផ្សាយព័ត៌មានក្លែងក្លាយពីស្ថានការណ៍ព្រំដែនកម្ពុជា-ថៃ ។ រីឯក្រសួងថាមពលត្រូវកំណត់តម្លៃអគ្គិសនីឱ្យសមរម្យ និងកុំដាក់បន្ទុកដល់ពលរដ្ឋ ។

នាយករដ្ឋមន្ត្រីថៃបញ្ជាក់ថា នឹងធ្វើឱ្យស្ថានការណ៍ព្រំដែនកម្ពុជា-ថៃត្រឡប់មកធម្មតាវិញ ដោយក្រសួងសេដ្ឋកិច្ចឌីជីថល និងសង្គម មានតួនាទីត្រួតពិនិត្យព័ត៌មានក្លែងក្លាយដែលផ្សាយបង្កជម្លោះព្រំដែនកម្ពុជា-ថៃ ។ ស្ថានការណ៍បច្ចុប្បន្ន យើងជ្រាបច្បាស់ហើយថា ការផ្សាយព័ត៌មាននានាមិនថាក្នុងប្រទេស ឬក្រៅប្រទេស គឺសំខាន់ខ្លាំងណាស់ និងមានផលប៉ះពាល់ដល់ការកំណត់ទិសដៅគោលនយោបាយ ។ រាល់ថ្ងៃនេះ សម្បូរព័ត៌មានក្លែងក្លាយច្រើន ដូចជា ៖ ស្ថានការណ៍ព្រំដែនកម្ពុជា-ថៃដែលកើតឡើង គឺបណ្តាលមកពីព័ត៌មានក្លែងក្លាយច្រើនពេក មិនថាព័ត៌មាន AI ដែលបង្កើតរូបភាពដូចពិតប្រាកដ ។

ពេលលោកស្រីឃើញរូបភាពបង្កើតដោយ AI ធ្វើឱ្យលោកស្រីច្របូកច្របល់ មិនដឹងជារូបភាពពិត ឬមិនពិត ។ បើបច្ចេកវិទ្យា AI បង្កើតរូបលោកស្រី គឺនឹងដឹងភ្លាមថា វាជារូបក្លែងក្លាយ ប៉ុន្តែបើ AI បង្កើតរូបភាពអ្នកដទៃ លោកស្រីក៏ពុំប្រាកដថាជារូបពិតឬក៏អត់ ។ ដូច្នេះ លោកស្រីសូមឱ្យស្ថាប័នទាំងអស់ព្យាយាមផ្សព្វផ្សាយព័ត៌មានពិតជានិច្ចដើម្បីឱ្យពលរដ្ឋទទួលបានព័ត៌មានពិត ហើយក្រសួងសេដ្ឋកិច្ចឌីជីថល និងសង្គម មានតួនាទីពិនិត្យព័ត៌មានក្លែងក្លាយ ។

ស្របពេលស្ថានការណ៍សេដ្ឋកិច្ចពិភពលោកប្រែប្រួលជាច្រើន រួមទាំងស្ថានការណ៍ព្រំដែនកម្ពុជា-ថៃ គឺរដ្ឋាភិបាលថៃនឹងព្យាយាមធ្វើឱ្យស្ថានការណ៍គ្រប់យ៉ាងត្រឡប់មកធម្មតាវិញ ដោយរដ្ឋាភិបាលថៃប្រកាន់ខ្ជាប់នូវសន្តិវិធី ព្យាយាមមិនឱ្យកើតការប៉ះទង្គិច និងព្យាយាមចរចាឱ្យច្រើនបំផុត ។ យើងចង់ឱ្យពលរដ្ឋត្រឡប់ទៅធ្វើការ ប្រកបមុខរបរចិញ្ចឹមខ្លួនបាន គឺជាអ្វីដែលរដ្ឋាភិបាលព្យាយាមធ្វើឱ្យពលរដ្ឋរស់នៅមានជីវភាពសមរម្យ ។ នេះបើតាមការលើកឡើងរបស់លោកស្រី ផេថងថាន ស៊ីណាវ៉ាត់ ៕

ប្រទេសថៃ ៖ តាមការផ្សព្វផ្សាយរបស់សារព័ត៌មានថៃ Khaosod កាលពីថ្ងៃទី១៨ ខែមិថុនា ឆ្នាំ២០២៥ ឱ្យដឹងថា ប្រាក់ចំណូលរបស់អាជីវករថៃលក់ទំនិញនៅព្រំដែនកម្ពុជា-ថៃបានធ្លាក់ចុះយ៉ាងខ្លាំង កន្លងមក អាជីវករថៃធ្លាប់ទទួលបានចំណូល១ម៉ឺនបាតក្នុង១ថ្ងៃ ពេលនេះ ចំណូលធ្លាក់ចុះមកនៅត្រឹម១០០បាតប៉ុណ្ណោះក្នុង១ថ្ងៃ តាំងពីមានបញ្ហាព្រំដែន ។ អាជីវកទាំងនេះបារម្ភពីបញ្ហាព្រំដែនអូសបន្លាយប៉ះពាល់ដល់ចំណូល និងសំណូមពរឱ្យរដ្ឋាភិបាលពន្លឿនដោះស្រាយបញ្ហាដើម្បីកាត់បន្ថយការលំបាករបស់ពលរដ្ឋ ។

ភាគីកម្ពុជា និងថៃបានបើកច្រកព្រំដែនជប់គគី-សាយតាគូ (ខេត្តឧត្តរមានជ័យ-ខេត្តបុរីរាំ) ដើម្បីឱ្យពលរដ្ឋទាំងពីរប្រទេសឆ្លងដែនទិញទំនិញទៅវិញទៅមក ដោយអនុវត្តតាមគោលការណ៍កាត់បន្ថយថ្ងៃបើក-បិទព្រំដែន គឺពី៧ថ្ងៃក្នុង១សប្តាហ៍ មកនៅត្រឹម៣ថ្ងៃក្នុង១សប្តាហ៍ (ថ្ងៃអង្គារ ថ្ងៃពុធ និងថ្ងៃព្រហស្បតិ៍) ។ ភាគីថៃបើកព្រំដែននៅម៉ោង៩ព្រឹក រីឯកម្ពុជាបើកព្រំដែនម៉ោង១០ព្រឹក និងបិទពេលវេលាដូចគ្នា គឺម៉ោង១២ថ្ងៃត្រង់ ។

ការផ្លាស់ប្តូរម៉ោងបើក-បិទព្រំដែននេះធ្វើឱ្យពលរដ្ឋកម្ពុជា និងថៃ នៅសល់ពេលតែ២ម៉ោងប៉ុណ្ណោះក្នុង១ថ្ងៃ ហើយធ្វើឱ្យការលក់ដូរនៅច្រកព្រំដែនជប់គគី-សាយតាគូ ស្ងាត់ជ្រងំ ។ ពលរដ្ឋកម្ពុជា-ថៃបានឆ្លងដែនទិញទំនិញទៅវិញទៅមកមិនដល់១០០នាក់ទេក្នុង១ថ្ងៃ ដែលធ្វើឱ្យប៉ះពាល់ដល់ការលក់ដូររបស់អាជីវករថៃ តូបខ្លះបិទទ្វារដោយសារគ្មានចំណូល តូបខ្លះនៅតែបើកលក់ ប៉ុន្តែទទួលចំណូលតិចតួច ។

បើតាមស្ត្រីអាជីវករថៃម្នាក់លក់ជីកសិកម្ម និងផលិតផលកសិកម្មនៅច្រកព្រំដែនជប់គគី-សាយតាគូ គឺតាំងពីការប៉ះទង្គិចគ្នារវាងកងទ័ពទាំងពីរប្រទេស និងមានវិធានការគ្រប់គ្រងពេលវេលាបើក-បិទព្រំច្រកដែន ធ្វើឱ្យប៉ះពាល់ដល់ការលក់ដូរជាបន្តបន្ទាប់ ។ កាលពីមិនទាន់មានបញ្ហាព្រំដែន អាជីករថៃអាចលក់ដូររាល់ថ្ងៃ និងទទួលចំណូលចំនួន១ម៉ឺនបាតក្នុង១ថ្ងៃ ប៉ុន្តែពេលនេះ ទទួលចំណូលត្រឹមតែ១០០បាតប៉ុណ្ណោះ ហើយស្ទើរតែគ្មានពលរដ្ឋខ្មែរឆ្លងដែនមកទិញជីកសិកម្ម ឬផលិតផលកសិកម្ម ។

អ្នកស្រីបារម្ភថា បើបញ្ហាព្រំដែនអូសបន្លាយយូរទៀតនឹងប៉ះពាល់ដល់ការលក់ដូរកាន់តែខ្លាំង ។ ការពិត អាជីវករថៃ និងពលរដ្ឋទាំងពីរប្រទេសគ្មានបញ្ហាអ្វីជាមួយគ្នាទេ អ្នកស្រីសំណូមពរទៅរដ្ឋាភិបាលពន្លឿនការចរចារកដំណោះស្រាយបញ្ឈប់ជម្លោះយ៉ាងឆាប់រហ័សបំផុត ដើម្បីកាត់បន្ថយផលប៉ះពាល់អាជីវករ និងពលរដ្ឋ ។

ចំណែកស្ត្រីម្នាក់ទៀតលក់សាច់ក្រក ប្រាប់ថា ប្រាក់ចំណូលធ្លាក់ចុះតាំងពីមានបញ្ហាព្រំដែនកើតឡើង ដោយសារពលរដ្ឋកម្ពុជា-ថៃពុំអាចឆ្លងដែនដើម្បីលក់ដូរ-ទិញទំនិញដូចមុន ។ អ្នកស្រីចង់ឱ្យរដ្ឋាភិបាលប្រញាប់ចរចាបញ្ចប់បញ្ហាជម្លោះឱ្យលឿនបំផុត ដើម្បីឱ្យពលរដ្ឋអាចលក់ដូរទំនិញដូចធម្មតា ៕