ប្រទេសឥណ្ឌា ៖ បន្ទាប់ហេតុការណ៍ធ្លា.ក់យន្តហោះដ៏រន្ធ.ត់មួយបានកើតឡើង គឺសល់តែបុរសម្នាក់ប៉ុណ្ណោះដែលនៅរស់រានមានជីវិត ខណៈអ្នកដំណើរចំនួន ២៤១នាក់ផ្សេងទៀតដែលរួមដំណើរជាមួយគ្នា បានបា.ត់បង់ជីវិតយ៉ាងអាណោចអធ័មទាំងអស់។ នេះបើយោងតាមសារព័ត៌មានបរទេស បានរាយការណ៍។

កាលពីថ្ងៃព្រហស្បត្តិ៍ ទី១២ ខែមិថុនា ហេតុការណ៍ដ៏គួរឲ្យត.ក់ស្លុ.តមួបានកើតឡើងឡើង ដោយយន្តហោះមួយគ្រឿងរបស់ក្រុមហ៊ុនអាកាសចរណ៍ India Air ដែលទើបហោះហើរចេញផុតពីព្រលានបានបន្តិច បែរជាធ្លាក់ចុះវិញចំពីលើអគារមហាវិទ្យាល័យពេទ្យដែលនៅក្បែរទីនោះ។ ភ្លាមៗក្រោយការធ្លាក់នេះ ក្រុមជួយសង្រ្គោះបានទៅដល់ទីតាំងធ្លាក់នោះ ដើម្បីសង្រ្គោះ និងស្វែងរកមនុស្សដែលកប់នៅក្រោមកម្ទិចកម្ទីរដែលបាក់បេក និងក្រោយមករកឃើញថា ក្នុងចំណោមអ្នកដំណើរនៅលើយន្តហោះសរុបចំនួន ២៤២នាក់ គឺមានតែម្នាក់ប៉ុណ្ណោះដែលនៅមានជីវិត។

បុរសបានរួចផុតជីវិតពីគ្រោះថ្នាក់ដ៏រន្ធ.ត់មួយនេះ គឺជាជនជាតិអង់គ្លេស តែមានដើមកំណើតឥណ្ឌា មានឈ្មោះថា រ៉ាមេស វិស្វាសគូម៉ា (Ramesh Vishwashkumar) ដែលអង្គុយនៅកៅអីលេខ 11A ជិតច្រកចេញសង្រ្គោះបន្ទាន់។ បន្ទាប់ពីត្រូវបានបញ្ជូនមកសម្រាកព្យាបាលនៅមន្ទីរពេទ្យ គាត់ត្រូវបានគេសាកសួរអំពីរបៀបដែលគាត់អាចរួចផុតជីវិតបែបនេះ ព្រោះវាពិតជារឿងដែលគួរឲ្យភ្ញាក់ផ្អើលខ្លាំងណាស់។

លោក រ៉ាមេស បាននិយាយថា គាត់បានធ្វើដំណើរមកពីប្រទេសអង់គ្លេស ដើម្បីមកលេងក្រុមគ្រួសារដែលរស់នៅក្នុងប្រទេសឥណ្ឌា ជាមួយនឹងប្អូនប្រុសគាត់ម្នាក់ទៀត។ នៅពេលដែលយន្តហោះបានហោះឡើងបានត្រឹមតែរយៈពេលប្រហែល៣០វិនាទីប៉ុណ្ណោះ សម្លេងផ្ទុះដ៏ខ្លាំងមួយបានបន្លឺឡើង ហើយភ្លាមៗនោះគាត់បានចាប់អារម្មណ៍ថាយន្តហោះបានធ្លាក់ចុះវិញយ៉ាងលឿន។ ជាអកុសល ប្អូនប្រុសរបស់គាត់បានបាត់បង់ជីវិតទៅជាមួយអ្នកដំណើរដទៃទៀតបាត់ទៅហើយ។

គួរឲ្យដឹងថា យន្តហោះដែលជួបគ្រោះថ្នាក់ខាងលើនេះគឺជារបស់ក្រុមហ៊ុនអាកាសចរណ៍ India Air ជើងហោះហើរ AI171 ផ្ទុកអ្នកដំណើរសរុប២៤២នាក់ នៅថ្ងៃកើតហេតុយន្តហោះនេះត្រូវធ្វើដំណើរចេញពីអាកាសយានដ្ឋាន ក្នុងទីក្រុង Ahmedabad ប្រទេសឥណ្ឌា ឆ្ពោះទៅកាន់អាកាសយានដ្ឋានGatwick ក្នុងទីក្រុងឡុងដ៍នៃចក្រភពអង់គ្លេស។ ប៉ុន្តែក្រោយហោះហើរមិនបានប៉ុន្មាននាទីផងនោះ ស្រាប់តែមានបញ្ហាហើយធ្លាក់ចំអគារនៃមហាវិទ្យាល័យពេទ្យបែបនោះតែម្ដង។

បើតាមការរាយការណ៍របស់សារព័ត៌មានCNN នៅពេលដែលយន្តហោះបានធ្លាក់ចុះមកចំអគារនោះ ក៏មានមនុស្សដែលនៅក្នុងអគារបានស្លា.ប់ផងដែរ ព្រោះវាធ្លាក់ចំពេលសម្រាកអាហារថ្ងៃត្រង់។ ប៉ុន្តែសម្រាប់ទិន្នន័យលម្អិតនៃអ្នកនៅក្នុងអគារដែលបានបាត់បង់ជីវិត មិនទាន់អាចបញ្ជាក់បាននៅឡើយទេ។

បច្ចុប្បន្នខាងសមត្ថកិច្ច និងក្រុមជួយសង្រ្គោះកំពុងព្យាយាមកកាយយកជនរងគ្រោះទាំងនោះចេញ និងកំពុងធ្វើការពិនិត្យអត្តសញ្ញាណរបស់សា.កស.ពដែលបានរកឃើញ ដើម្បីប្រគល់ឲ្យក្រុមគ្រួសាររបស់ពួកគេយកទៅធ្វើពិធីបុណ្យតាមប្រពៃណី និងកំពុងធ្វើការស៊ើបអង្កេតបន្ថែម ជុំវិញមូលហេតុនៃការធ្លាក់យន្តហោះនេះ៕

ក្រុមហ៊ុន Tesla នឹងពង្រីកអាជីវកម្មរោងចក្រថាមពលនិម្មិត (Virtual Power Plant – VPP) ទៅទូទាំងប្រទេសជប៉ុន ដោយផ្តល់ថ្មសម្រាប់ស្តុកថាមពលឥតគិតថ្លៃដល់ក្រុមហ៊ុន និងគ្រប់គ្រងពួកវាពីចម្ងាយ ដើម្បីជួយធានាតុល្យភាពរវាងការផ្គត់ផ្គង់ និងការប្រើប្រាស់ថាមពល។ ការផ្លាស់ប្តូរនេះកើតឡើងក្នុងបំណងជំរុញប្រព័ន្ធថាមពលប្រកបដោយនិរន្តរភាព និងបន្ថយភាពពឹងផ្អែកលើប្រេងឥន្ធនៈ។ នេះបើយោងតាមប្រភព Nikkei។

Tesla បានចាប់ផ្តើមគម្រោង VPP ដំបូងនៅក្រុង Miyakojima ខេត្ត Okinawa កាលពីឆ្នាំ ២០២១ ហើយឥឡូវនេះ ក្រុមហ៊ុននឹងពង្រីកអាជីវកម្មនេះ ដោយសហការជាមួយក្រុមហ៊ុនជាមួយ Fuyo General Lease និងក្រុមហ៊ុនថាមពល Global Engineering ដែលមានមូលដ្ឋាននៅទីក្រុង Fukuoka។

ប្រតិបត្តិការរបស់ VPP គឺការគ្រប់គ្រងអាគុយស្តុកថាមពលតូចៗ ដែលបានដំឡើងនៅតាមផ្ទះ និងការិយាល័យ។ ថ្មទាំងនេះនឹងសាកថ្មក្នុងពេលថ្ងៃដោយប្រើប្រាស់ថាមពលពន្លឺព្រះអាទិត្យ ហើយផ្តល់ថាមពលវិញនៅពេលយប់នៅពេលការប្រើប្រាស់ថាមពលកើនឡើង។ Global Engineering បានផ្គត់ផ្គង់អគ្គិសនីទៅកាន់ជាង ១,៥០០ ទីតាំង រួមមានរោងចក្រ និងការិយាល័យ។ សម្រាប់ទីតាំងដែលបានចុះកិច្ចសន្យាជាមួយ Global Engineering ថ្ម Powerwall របស់ Tesla នឹងត្រូវដំឡើងដោយឥតគិតថ្លៃ។

ម្ចាស់កម្មសិទ្ធិអាគុយទាំងនេះនឹងជាក្រុមហ៊ុន Fuyo ខណៈក្រុមហ៊ុនដែលចូលរួមអាចកាត់បន្ថយថ្លៃថាមពល ដោយប្រើប្រាស់ថាមពលស្តុកនៅពេលតម្លៃថោក និងអាចប្រើបានសម្រាប់គ្រោះអាសន្នផងដែរ។ គម្រោងនេះនឹងចាប់ផ្តើមចែកចាយ Powerwall ចំនួន ១០០ គ្រឿង ចាប់ពីខែមិថុនានេះតទៅ នៅក្នុងរយៈពេលរដ្ឋបាលសារពើពន្ធឆ្នាំ ២០២៥។

ការកើនឡើងនៃការផលិតថាមពលកកើតឡើងវិញ ដូចជា ថាមពលព្រះអាទិត្យ និងខ្យល់ ដែលអាស្រ័យលើអាកាសធាតុ បានជំរុញឲ្យមានតម្រូវការចំពោះសមត្ថភាពស្តុកថាមពលកាន់តែខ្ពស់។ Tesla បានដំឡើងអាគុយ Powerwall ច្រើនជាង ៩៥០,០០០ គ្រឿងគ្រប់ទូទាំងពិភពលោក ហើយកំពុងពង្រីកអាជីវកម្មនេះយ៉ាងសកម្ម។ នៅឆ្នាំ ២០២២ ក្រុមហ៊ុនបានចាប់ផ្តើមផ្គត់ផ្គង់អគ្គិសនីនៅតាមផ្ទះនៅរដ្ឋតិចសាស់ (Texas) ដោយប្រើបច្ចេកវិទ្យា VPP និងថ្ម Powerwall ។

នាយកប្រតិបត្តិ Tesla លោក Elon Musk បានបង្ហាញទស្សនវិស័យថា Tesla នឹងក្លាយជាអ្នកផ្គត់ផ្គង់ថាមពលវិមជ្ឈការ (decentralized energy provider)។ ប្រសិនបើអាគុយសម្រាប់ផ្ទះក្លាយជារឿងធម្មតា នៅក្នុងប្រទេសជប៉ុន Tesla អាចនឹងពង្រីកខ្លួនទៅក្នុងវិស័យថ្មីៗដូចជា ការលក់រាយអគ្គិសនីជាដើម។

គួរបញ្ជាក់ថា ដើម្បីគាំទ្រការអភិវឌ្ឍន៍ VPP នៅជប៉ុន រដ្ឋាភិបាលមានគម្រោងបង្កើតស៊ុមនយោបាយក្នុងសារពើពន្ធ ឆ្នាំ ២០២៦ ដើម្បីលើកកម្ពស់ទីផ្សារទិញ-លក់ថាមពលស្តុកទុក។ ក្រុមហ៊ុនជប៉ុនជាច្រើនក៏កំពុងចូលរួមប្រកួតប្រជែងក្នុងវិស័យនេះផងដែរ ដូចជា TEPCO Energy Partners ដែលកំពុងសហការជាមួយ Itochu និង Eneres ក្នុងគម្រោងសាកល្បងដាច់ដោយឡែក ដើម្បីគ្រប់គ្រងថ្មស្តុកថាមពលក្នុងផ្ទះពីចម្ងាយ៕

្រទេសថៃ ៖ សារព័ត៌មានថៃ Khaosod រាយការណ៍កាលពីថ្ងៃទី១២ ខែមិថុនា ឆ្នាំ២០២៥ ថា ក្រសួងសុខាភិបាលថៃបានត្រៀមមន្ទីរពេទ្យមួយចំនួនសម្រាប់សង្គ្រោះពលរដ្ឋរងរបួសករណីកើតសង្គ្រាមនៅព្រំដែនខេត្តសុរិន្ទ គឺមន្ទីរពេទ្យភ្នំដងរ៉ាក់ និងមន្ទីរពេទ្យកាបឈើង ។ ក្រៅពីនេះ ក្រសួងសុខាភិបាលថៃក៏បានបញ្ជូនក្រុមគ្រូពេទ្យកងទ័ពមកហ្វឹកហាត់ជម្លៀសអ្នកជំងឺផងដែរ ។

កាលពីថ្ងៃទី១២ ខែមិថុនា កន្លងមក លោកវេជ្ជបណ្ឌិត អូផាស កានកាវីនផុង មន្ត្រីក្រសួងសុខាភិបាលថៃបាននិយាយពីករណីនាយករដ្ឋមន្ត្រីថៃ លោកស្រី ផេថងថាន ស៊ីណាវ៉ាត់ មានវិធានការជួយសង្គ្រោះពលរដ្ឋរស់នៅខេត្តចំនួន៧ ជាប់ព្រំដែនកម្ពុជា-ថៃ ដោយឱ្យខេត្តសុរិន្ទត្រៀមរៀបចំកន្លែងស្នាក់នៅបណ្តោះអាសន្ន និងរៀបចំមន្ទីរពេទ្យភ្នំដងរ៉ាក់ មន្ទីរពេទ្យកាបឈើង ឱ្យមានទីធ្លាធំទូលាយសម្រាប់ទទួលពលរដ្ឋរងរបួសករណីកើតសង្គ្រាមនៅព្រំដែន ។

លោកវេជ្ជបណ្ឌិត អូផាស និយាយថា បើត្រូវជម្លៀសពលរដ្ឋនៅព្រំដែនខេត្តសុរិន្ទ រំពឹងថា និងមានពលរដ្ឋប្រមាណ១៤៤.៣០០នាក់ ដោយមានការរៀបចំកន្លែងស្នាក់នៅបណ្តោះអាសន្នចំនួន៦៦កន្លែង ស្ថិតនៅ៥ស្រុក រួមមាន ៖ ស្រុកប្រាសាទ ស្រុកសាំងខាក់ ស្រុកឡាំឌួន ស្រុកស្រ៊ីណារ៉ុង និងស្រុកមឿងសុរិន្ទ (ស្រុកមឿងសុរិន្ទ គឺសម្រាប់ទទួលជនបរទេសរងរបួស ឬពលរដ្ឋមកពីខេត្តផ្សេង) ។ ក្រសួងសុខាភិបាលផ្តោតលើការជួយសង្គ្រោះពលរដ្ឋចំនួន៦ចំណុច រួមមាន ៖

១-ព្យាបាលជំងឺឆ្លងក្នុងតំបន់ដែលមានមនុស្សច្រើន ដូចជា ជំងឺផ្លូវដង្ហើម ជំងឺស្បែក និងជំងឺប្រព័ន្ធរំលាយអាហារ
២-ព្យាបាលជំងឺផ្លូវចិត្តកើតឡើងដោយសារអំពើហិង្សា
៣-ត្រៀមស្បៀងអាហារ និងទឹកស្អាត ការពារកង្វះអាហារូបត្ថម្ភ និងជំងឺឆ្លងពីទឹក
៤-ការពារក្រុមងាយរងគ្រោះ ដូចជា កុមារ មនុស្សចាស់ ស្ត្រីមានផ្ទៃពោះ និងជនពិការ
៥-រៀបចំបណ្តាញបញ្ជូនអ្នកជំងឺ និងត្រៀមផ្តល់ឈាមរវាងកន្លែងស្នាក់នៅបណ្តោះអាសន្ន មន្ទីរពេទ្យជួរមុខ និងមន្ទីរពេទ្យសំខាន់ និង
៦-កំណត់សុវត្ថិភាពអ៊ីនធើរណេតក្នុងប្រព័ន្ធទិន្នន័យសុខភាព ។

ក្រសួងសុខាភិបាលបានប្រគល់តួនាទីឱ្យការិយាល័យសុខភាពសាធារណៈខេត្តសុរិន្ទមើលការខុសត្រូវកន្លែងជម្លៀសពលរដ្ឋ និងគ្រប់គ្រងមិនឱ្យពលរដ្ឋស្នាក់នៅចង្អៀតគ្នា ដោយបែងចែកកន្លែងសម្រាប់អ្នកជំងឺ ក្រុមងាយរងគ្រោះ និងទីតាំងព្យាបាលសុខភាពផ្លូវចិត្ត ។ ក្រៅពីនេះ ត្រូវត្រួតពិនិត្យគុណភាពទឹកជារៀងរាល់ថ្ងៃ កំណត់ផែនការផ្តល់ថ្នាំពេទ្យបន្ទាន់ រួមទាំងរៀបចំក្រុមពិនិត្យជំងឺផ្លូវដង្ហើម ប្រព័ន្ធរំលាយអាហារ និងជំងឺស្បែក ។ នេះបើតាមការលើកឡើងរបស់លោកវេជ្ជបណ្ឌិត អូផាស ។

លោកវេជ្ជបណ្ឌិតបន្តថា ករណីកើតសង្គ្រាម មន្ទីរពេទ្យភ្នំដងរ៉ាក់ និងមន្ទីរពេទ្យកាបឈើង ដែលស្ថិតក្នុងតំបន់ក្រហម នឹងក្លាយជាមន្ទីរពេទ្យជួរមុខដើម្បីសង្គ្រោះពលរដ្ឋរងរបួសនៅព្រំដែន ។ បើស្ថានការណ៍អូសបន្លាយ ឬកាន់តែធ្ងន់ធ្ងរ មន្ទីរពេទ្យទាំង២នេះត្រូវរៀបចំទីធ្លាឱ្យធំទូលាយសម្រាប់ទទួលអ្នកជំងឺ និងបែងចែកអ្នកជំងឺតាមប្រភេទ រួចហើយបញ្ជូនអ្នកជំងឺទៅមន្ទីរពេទ្យសុរិន្ទ មន្ទីរពេទ្យសាំងខាក់ មន្ទីរពេទ្យប្រាសាទ មន្ទីរពេទ្យថាទូម និងមន្ទីរពេទ្យរតនបុរី ។

មន្ទីរពេទ្យត្រូវអនុញ្ញាតឱ្យក្រុមគ្រូពេទ្យកងទ័ពធ្វើការជំនួស បើត្រូវបង្កើតទីតាំងព្យាបាលអ្នកជំងឺបន្ថែមទៀត គឺមន្ទីរពេទ្យសុរិន្ទ និងមណ្ឌលសុខភាពត្រូវសហការគ្នាចាត់ការ ។ បច្ចុប្បន្ន ក្រុមគ្រូពេទ្យកងទ័ពបានហ្វឹកហាត់ជម្លៀសអ្នកជំងឺរបស់មន្ទីរពេទ្យរួចរាល់ហើយ ៕

ក្រៅពីសម្រេចឈប់ទិញអគ្គិសនី និងបណ្ដាញអ៊ីនធើណេតពីប្រទេសថៃយកមកប្រើប្រាស់ ពេលនេះកម្ពុជាក៏បានប្រកាសឲ្យស្ថានីយទូរទស្សន៍ និងរោងភាពយន្តទាំងអស់នៅក្នុងប្រទេសកម្ពុជាឈប់ចាក់បញ្ចាំងខ្សែភាពយន្តថៃផងដែរ។ ប្រមុខថ្នាក់ដឹកនាំកម្ពុជាបានបញ្ជាក់ថា ការសម្រេចធ្វើបែបនេះ គឺបន្ទាប់ពីកម្ពុជាបានរងការគំរា.មកំហែងបិទនេះបិទនោះជាច្រើន រួមទាំងច្រកព្រំដែនពីក្រុមជ្រុលនិយមថៃដែលមានការគាំទ្រដោយពួកយោធា។

ជាមួយនឹងដំណឹងអំពីការកាត់ផ្ដាច់បណ្ដាញអគ្គិសនី អ៊ីនធើណេត និងឈប់ចាក់បញ្ចាំងខ្សែភាពយន្តថៃ ក៏ដូចជាអាចនឹងឈានដល់ការឈប់នាំចូលទំនិញថៃមកប្រើប្រាស់នៅក្នុងទីផ្សារកម្ពុជានៅពេលខាងមុខនេះ លោក ជា វ៉ាន់ដេត រដ្ឋមន្ត្រីក្រសួងប្រៃសណីយ៍និងទូរគមនាគមន៍ បាននិយាយថា ការណ៍នេះនឹងធ្វើឲ្យប្រទេសថៃបាត់បង់ប្រាក់ចំណូលយ៉ាងធ្ងន់ធ្ងរ។

លោករដ្ឋមន្រ្តីបានលើកឡើងយ៉ាងដូច្នេះថា៖ ដោយសារការគម្រា.មកំ.ហែងរបស់ភាគីថៃក្នុងការកាត់ផ្ដាច់ការផ្គត់ផ្គង់សេវាអ៊ីនធឺណិតដល់កម្ពុជា ប្រតិបត្តិករទូរគមនាគមន៍ទាំងអស់របស់កម្ពុជាបានឈប់ប្រើប្រាស់ប្រភពអ៊ីនធឺណិតពីប្រទេសថៃ ដែលនឹងធ្វើឱ្យប្រទេសថៃអាចខាតបង់ចំណូលរាប់រយលានដុល្លារ។

លោកបានគូសបញ្ជាក់ថា ៖ «លទ្ធផលនេះ គឺកើតឡើងដោយសារការគម្រា.មកំ.ហែងរបស់ភាគីថៃមកលើកម្ពុជា។ ថៃជាអ្នកថា តែកម្ពុជាជាអ្នកធ្វើមែន។»

គួរឲ្យដឹងផងដែរថា ប្រទេសថៃមានមុខទំនិញដែលនាំចូលកម្ពុជាមានចំនួនច្រើនជាង ទំនិញដែលកម្ពុជានាំចូលប្រទេសថៃ។ ដោយបើគិតត្រឹម៥ខែដំបូងនៃឆ្នាំ២០២៥ ប្រទេសថៃបាននាំចូលទំនិញមកកម្ពុជាមានទំហំទឹកប្រាក់ ១,៤៨ ពាន់លានដុល្លារ ខណៈដែលការនាំចេញពីកម្ពុជទៅថៃមានទំហំទឹកប្រាក់តែ ៣៩៦ លានដុល្លារ ប៉ុណ្ណោះ។ នេះបើយោងតាមទិន្នន័យដែលទទួលបានពីអគ្គនាយកដ្ឋានគយ និងរដ្ឋាករកម្ពុជា (GDCE) ។

គួរបញ្ជាក់ថា រាជរដ្ឋាភិបាលកម្ពុជាបានធ្វើការបញ្ជាក់រួចមកហើយថា ក្នុងករណីដែលថៃនៅតែបន្តរឹតបន្តឹង និងបិទច្រកព្រំដែនដោយឯកតោភាគី កម្ពុជានឹងអនុវត្តគោលការណ៍ធំៗចំនួន៦ចំណុចរួមមាន៖ ១.ប្រកាសឈប់ប្រើប្រាស់ទំនិញថៃនៅក្នុងទីផ្សារកម្ពុជា ២.ស្វែងរកទីផ្សារសម្រាប់កសិផលរបស់ប្រជាជនដែលតែងលក់ឲ្យថៃឲ្យបានទាំងក្នុង និងក្រៅស្រុក ៣. បង្វែរអ្នកជំងឺដែលសម្រាកព្យាបាលនៅប្រទេសថៃ ឲ្យមកព្យាបាលក្នុងស្រុក ឬទៅប្រទេសផ្សេង ៤. ត្រៀមទទួលយក និងដោះស្រាយការងារជូនពលករដែលនឹងវិលត្រឡប់ពីប្រទេសថៃ ៥. ត្រៀមកម្លាំងប្រដាប់អាវុ.ធ២៤ម៉ោងលើ២៤ម៉ោង ដើម្បីវាយបកការពារខ្លួន ៦. ជម្លៀសប្រជាជននៅតាមព្រំដែនមកកាន់តំបន់មានសុវត្ថិភាព។

ដូចនេះ ប្រសិនបើកម្ពុជាត្រូវអនុវត្តគោលការណ៍ដូចខាងលើមែន នោះអ្នកដែលទទួលរងផលប៉ះពាល់ធ្ងន់ធ្ងរគឺភាគីថៃ។ ហើយទាំងអស់នេះ បានកើតឡើងដោយសារតែការគំរា.មកំហែងមកលើកម្ពុជា ដោយថៃខ្លួនឯង៕