ប្រទេសថៃ ៖ តាមការផ្សព្វផ្សាយរបស់សារព័ត៌មាន Thairath កាលពីថ្ងៃទី១៥ ខែមិថុនា ឆ្នាំ២០២៥ ឱ្យដឹងថា គណបក្សនយោបាយមួយឈ្មោះ «ថៃសាងថៃ» បានជំរុញឱ្យរដ្ឋាភិបាលរបស់លោកស្រី ផេថងថាន ស៊ីណាវ៉ាត់ និងក្រសួងការបរទេសថៃ ប្រញាប់ប្រកាសទៅស្ថានទូតនានានៅប្រទេសថៃ អំពីមូលហេតុដែលថៃពុំទទួលស្គាល់អំណាចយុត្តាធិការតុលាការយុត្តិធម៌អន្តរជាតិ (ICJ) ក្នុងការដោះស្រាយបញ្ហាប្រាសាទតាមាន់ធំ ប្រាសាទតាមាន់តូច ប្រាសាទតាក្របី និងតំបន់មុំ៣ ជាមួយកម្ពុជា ។

អ្នកនាំពាក្យគណបក្សថៃសាងថៃបានអំពាវនាវឱ្យរដ្ឋាភិបាលលោកស្រី ផេថងថាន ស៊ីណាវ៉ាត់ និងរដ្ឋមន្ត្រីក្រសួងការបរទេសថៃដោះស្រាយបញ្ហាជម្លោះព្រំដែនជាមួយកម្ពុជា ដោយប្រកាសជូនដំណឹងបន្ទាន់ទៅស្ថានទូតនានានៅថៃឱ្យបានដឹងពីមូលហេតុថៃពុំអាចដោះស្រាយជម្លោះព្រំដែនជាមួយកម្ពុជានៅតុលាការយុត្តិធម៌អន្តរជាតិ (ICJ) ។

កាលពីថ្ងៃទី១៥ ខែមិថុនា លោក ប៉ារិយុត អាំងគូនគីទិ អ្នកនាំពាក្យគណបក្សថៃសាងថៃបាននិយាយពីបញ្ហាព្រំដែនកម្ពុជា-ថៃថា គណបក្សថៃសាងថៃសូមអំពាវនាវឱ្យរដ្ឋាភិបាលប្រញាប់ចេញសេចក្តីថ្លែងការណ៍ជាផ្លូវការផ្តល់ដំណឹងដល់ប្រទេសនានា ជំនួសការធ្វើសន្និសីទសារព័ត៌មាន ឬសេចក្តីថ្លែងការណ៍របស់រដ្ឋាភិបាលតែក្នុងប្រទេសថៃ ។ បច្ចុប្បន្ន ស្ថានការណ៍ព្រំដែនអាចនឹងតានតឹងខ្លាំងឡើង បើរដ្ឋាភិបាលថៃខ្វះខាតផែនការទំនាក់ទំនងជាមួយបរទេស និងបង្ហាញគោលជំហរច្បាស់លាស់របស់ខ្លួន រួមទាំងបង្ហាញមូលហេតុដែលថៃពុំអាចដោះស្រាយបញ្ហាព្រំដែននៅតុលាការយុត្តិធម៌អន្តរជាតិ ។

គណបក្សថៃសាងថៃ ក៏បានជំរុញឱ្យរដ្ឋមន្ត្រីក្រសួងការបរទេសថៃប្រញាប់ជូនដំណឹងទៅស្ថានទូតនានានៅប្រទេសថៃផងដែរ ដោយលោក ប៉ារិយុត សួរថា ហេតុអ្វីរដ្ឋមន្ត្រីក្រសួងការបរទេសថៃគ្មានវិធានការអ្វីដើម្បីសម្របសម្រួលជាមួយមន្ត្រីទូតបរទេសប្រចាំនៅថៃ?

លោកថា សេចក្តីថ្លែងងការណ៍របស់រដ្ឋាភិបាលថៃកន្លងមក គឺគ្មានខ្លឹមសារសំខាន់ដែលលើកឡើងពីមូលហេតុថៃពុំប្រើប្រាស់យន្តការតុលាការយុត្តិធម៌អន្តរជាតិដោះស្រាយបញ្ហា ។ ដូច្នេះ នាយករដ្ឋមន្ត្រីថៃគួរប្រញាប់ពិភាក្សាជាមួយប្រទេសម៉ាឡេស៊ីក្នុងឋានៈជាប្រធានាអាស៊ាន និងប្រទេសចិនដែលធ្វើសមយុទ្ធជាមួយកម្ពុជា រួមទាំងពិភាក្សាជាមួយប្រទេសបារាំងដែលនឹងធ្វើជាអាជ្ញាកណ្តាលក្នុងការចរចា ។ វាបង្ហាញពីគោលដៅ និងការប្តេជ្ញាចិត្តរបស់ថៃក្នុងការដោះស្រាយបញ្ហាយ៉ាងសន្តិវិធី និងជាបញ្ហាដែលកម្ពុជា-ថៃអាចដោះស្រាយក្នុងកម្រិតទ្វេភាគី ។

កន្លងមក លោកស្រី ផេថងថាន ស៊ីណាវ៉ាត់ នាយករដ្ឋមន្ត្រីថៃបានចេញសេចក្តីថ្លែងការណ៍ពុំទទួលស្គាល់អំណាចយុត្តាធិការតុលាការយុត្តិធម៌អន្តរជាតិ (ICJ) ហើយបញ្ជាក់ពីគោលជំហរថា ថៃនៅតែដោះស្រាយបញ្ហាព្រំដែនជាមួយកម្ពុជាតាមរយៈយន្តការទ្វេភាគីប៉ុណ្ណោះ ។

កាលពីថ្ងៃទី១៥ ខែមិថុនា ឆ្នាំ២០២៥ រាជរដ្ឋាភិបាលកម្ពុជាបានបញ្ជូនលិខិតជាផ្លូវការទៅកាន់តុលាការយុត្តិធម៌អន្តរជាតិ (ICJ) ដើម្បីជួយស្វែងរកដំណោះស្រាយពាក់ព័ន្ធនឹងបញ្ហាវិវាទព្រំដែននៅតំបន់ប្រាសាទតាមាន់ធំ ប្រាសាទតាមាន់តូច ប្រាសាទតាក្របី និងតំបន់មុំបី ត្រូវនឹងថ្ងៃប្រវត្តិសាស្ត្រ៦៣ឆ្នាំមុន ដែលតុលាការយុត្តិធម៌អន្តរជាតិ (ICJ) បានសម្រេចឱ្យកម្ពុជាឈ្នះលើរឿងក្តីប្រាសាទព្រះវិហារ ៕

ប្រទេសថៃ ៖ ប្រទេសថៃខកបំណងយ៉ាងខ្លាំងលើកិច្ចប្រជុំគណៈកម្មការចម្រុះព្រំដែន (JBC) កម្ពុជា-ថៃ កាលពីថ្ងៃទី១៤-១៥ ខែមិថុនា ឆ្នាំ២០២៥ និងចោទប្រកាន់កម្ពុជាខ្វះការប្តេជ្ញាចិត្តក្នុងការប្រើប្រាស់យន្តការទ្វេភាគី គឺកម្ពុជាពុំបានចរចាដោះស្រាយបញ្ហាក្នុងតំបន់ជម្លោះទាំង៤ ជាមួយថៃ ។ ប្រធាន JBC ថៃបានឆ្លើយតបរាល់ការលើកឡើងរបស់កម្ពុជាក្នុងកិច្ចប្រជុំ ហើយថាកម្ពុជាបដិសេធជំនួបចរចាទ្វេភាគីផ្សេងទៀត ។ នេះបើតាមការផ្សព្វផ្សាយរបស់សារព័ត៌មានថៃ Dailynews នៅថ្ងៃទី១៦ ខែមិថុនា ឆ្នាំ២០២៥ ។

កាលពីថ្ងៃទី១៥ ខែមិថុនា ក្រសួងការបរទេសថៃបានបង្ហាញលទ្ធផលកិច្ចប្រជុំគណៈកម្មការចម្រុះព្រំដែន (JBC) កម្ពុជា-ថៃ លើកទី៦ នាថ្ងៃទី១៤-១៥ ខែមិថុនា ឆ្នាំ២០២៥ នៅរាជធានីភ្នំពេញ ប្រទេសកម្ពុជា ថា នេះជាកិច្ចប្រជុំលើកដំបូងក្នុងរយៈពេល១៣ឆ្នាំ ក្រោយកិច្ចប្រជុំលើកចុងក្រោយកាលពីឆ្នាំ២០១២ នៅរាជធានីភ្នំពេញ ។ ភាគីទាំងពីរបានពិភាក្សាគ្នាយ៉ាងទូលំទូលាយលើការអនុវត្តបច្ចេកទេសក្រោមយន្តការ JBC ចំនួន៤ចំណុច រួមមាន ៖

១-ពិនិត្យ និងអនុម័តលើកំណត់ហេតុកិច្ចប្រជុំលើកទី៤ របស់អនុគណៈកម្មការបច្ចេកទេសចម្រុះព្រំដែន (JTSC) កម្ពុជា-ថៃ ថៃ-កម្ពុជា ចុះថ្ងៃទី១៤ ខែកក្កដា ឆ្នាំ២០២៤ នៅខេត្តសៀមរាប ព្រះរាជាណាចក្រកម្ពុជា
២-ពិនិត្យ និងពិភាក្សាលើការកែសម្រួល TOR ឆ្នាំ២០០៣ ពាក់ព័ន្ធការផលិតផែនទីអ័រតូហ្វូតូ (ជំហាន២ ក្នុងចំណុច៤ នៃ TOR)
៣-ពិភាក្សា និងអនុម័តលើការបញ្ចូនក្រុមវាស់វែងចម្រុះចុះវាស់វែង និងខណ្ឌសីមាព្រំដែននៅលើដីជាក់ស្តែង នៅចន្លោះទីតាំងពិតប្រាកដនៃបង្គោលព្រំដែនដែលបានឯកភាពគ្នា (កំណត់ខ្សែព្រំដែនដើរតាមផ្លូវទឹក និងកំណាត់ខ្សែត្រង់)
៤-ពិភាក្សាលើសេចក្តីណែនាំលើការវាស់វែងនៅ Sector 6 (ចំណុច IX នៃកិច្ចប្រជុំលើកទី៤ និងកិច្ចប្រជុំពិសេសរបស់ JBC ឆ្នាំ២០០៩) ។

ការឯកភាពអនុម័តលើរបៀបវារៈចំនួន៤នេះ គឺប្រទេសថៃខកបំណងយ៉ាងខ្លាំងចំពោះកម្ពុជា ដែលពុំព្រមសហការជាមួយថៃដោះស្រាយបញ្ហាជាក់លាក់ និងកាត់បន្ថយភាពតានតឹងរវាងប្រទេសទាំងពីរ ប៉ុន្តែកម្ពុជានៅតែប្រកាន់ជំហរយកបញ្ហាប្រាសាទតាមាន់ធំ ប្រាសាទតាមាន់តូច ប្រាសាទតាក្របី និងតំបន់មុំ៣ ទៅតុលាការយុត្តិធម៌អន្តរជាតិ (ICJ) ។ នេះបង្ហាញថា កម្ពុជាខ្វះការប្តេជ្ញាចិត្តក្នុងការប្រើប្រាស់យន្តការទ្វេភាគីផ្សេងៗដែលមានរួមគ្នាផ្អែកលើមួលដ្ឋានប្រទេសជិតខាងល្អ ។

លោក ប្រាសាស ប្រាសាសវិនិច្ឆ័យ ទីប្រឹក្សាក្រសួងការបរទេសថៃ និងជាប្រធានគណៈកម្មការចម្រុះព្រំដែនថៃបានបញ្ជាក់ពីគោលជំហររបស់ថៃក្នុងកិច្ចប្រជុំដែលបានកត់ត្រា និងភ្ជាប់ក្នុងឯកសារលទ្ធផល Agreed Minutes របស់កិច្ចប្រជុំលើកនេះ ដូចជា ៖

១-សកម្មភាពរបស់ថៃ គឺចាំបាច់ធ្វើតាមគោលការណ៍ការពារខ្លួនពីការវាយប្រហាររបស់កម្ពុជាមុន និងសមស្របតាមច្បាប់អន្តរជាតិ

២-ថៃបង្ហាញការខកបំណងដែលកម្ពុជាពុំចរចាបញ្ហាជម្លោះ៤ចំណុចដោយសន្តិវិធីតាមគោលជំហររបស់រដ្ឋាភិបាលថៃ ដោយផ្តោតសំខាន់លើការដោះស្រាយបញ្ហារួមគ្នាទ្វេភាគី និងតួនាទីសំខាន់របស់ JBC ក្នុងការបង្កើតព្រំដែនច្បាស់លាស់រវាងគ្នាដើម្បីផលប្រយោជន៍ពលរដ្ឋកម្ពុជា-ថៃ

៣-ថៃផ្តោតលើសារៈសំខាន់ដែលភាគីទាំងពីរត្រូវប្រកាន់ខ្ជាប់តាម MOU រវាងរាជរដ្ឋាភិបាលកម្ពុជា និងថៃ ថា ការចុះវាស់វែង និងបោះបង្គោលព្រំដែនគោកកម្ពុជា-ថៃ ឆ្នាំ២០០០ ដែលកម្ពុជាបានឯកភាពជាមួយថៃ គឺមិនចាត់វិធានការណាមួយដែលផ្លាស់ប្តូរបរិយាកាសព្រំដែន គ្មានការរំលោភបំពានគ្នាទៅវិញទៅមក ។ ភាគីទាំងពីរត្រូវអត់ធ្មត់ដើម្បីកុំឱ្យស្ថានការណ៍រាលដាល និង

៤-ប្រទេសទាំងពីរត្រូវចៀសវាងការផ្សព្វផ្សាយព័ត៌មានធ្វើឱ្យយល់ខុស និងមានជម្លោះ រួមទាំងផ្តោតលើសារៈសំខាន់នៃការប្រើប្រាស់យន្តការសហការទ្វេភាគីផ្សេងៗជួយដោះស្រាយបញ្ហា ដូចជា ៖ គណៈកម្មការព្រំដែនទូទៅ (GBC), គណៈកម្មការព្រំដែនតំបន់ (RBC) និងកិច្ចប្រជុំអភិបាលខេត្តព្រំដែនកម្ពុជា-ថៃ ប៉ុន្តែកម្ពុជាបានបដិសេធ ។

កិច្ចប្រជុំគណៈកម្មការចម្រុះព្រំដែន (JBC) កម្ពុជា-ថៃ ពុំបានពិភាក្សាពីប្រធានបទដែលកម្ពុជានឹងដោះស្រាយបញ្ហានៅតុលាការយុត្តិធម៌អន្តរជាតិ (ICJ) ទេ និងពុំបានពិភាក្សាពីប្រធានបទផែនទីគណៈកម្មការព្រំដែនសៀម-ឥណ្ឌូចិនតាមការលើកឡើងរបស់កម្ពុជា ។ ប៉ុន្តែកិច្ចប្រជុំលើកនេះពិភាក្សាពីប្រធានបទបច្ចេកទេសក្នុងការធ្វើផែនទីថតពីលើអាកាស ។ ភាគីថៃនឹងរៀបចំកិច្ចប្រជុំពិសេសនៃគណៈកម្មការព្រំដែនចម្រុះកម្ពុជា-ថៃ នៅខែកញ្ញា ឆ្នាំ២០២៥ ។ នេះបើតាមការផ្សព្វផ្សាយរបស់សារព័ត៌មានថៃ ៕

ប្រទេសថៃ ៖ នៅថ្ងៃទី១៦ ខែមិថុនា ឆ្នាំ២០២៥ លោកស្រី ផេថងថាន ស៊ីណាវ៉ាត់ នាយករដ្ឋមន្ត្រីថៃបានថ្លែងនៅចំពោះមុខប្រព័ន្ធផ្សព្វផ្សាយ ក្រោយពីលោកស្រីប្រជុំជាមួយមន្ត្រីពាក់ព័ន្ធស្តីពីលទ្ធផលកិច្ចប្រជុំគណៈកម្មការចម្រុះព្រំដែន (JBC) កម្ពុជា-ថៃ ថា ប្រទេសថៃពុំបានបិទច្រកព្រំដែនទេ ថៃគ្រាន់តែផ្លាស់ប្តូរពេលវេលាបើក-បិទច្រកព្រំដែនដើម្បីសុវត្ថិភាពពលរដ្ឋ ហើយលោកស្រីបញ្ជាក់ថា ថៃមិនឱ្យអ្នកណាម្នាក់គំរា.មកំហែ.ង ថៃមានសេចក្តីថ្លៃថ្នូរ រដ្ឋាភិបាលថៃគ្មានបញ្ហាជាមួយកងទ័ព ។

នាយករដ្ឋមន្ត្រីថៃ លោកស្រី ផេថងថាន ស៊ីណាវ៉ាត់ ថ្លែងថា ថៃពុំទទួលស្គាល់អំណាចយុត្តាធិការតុលាការយុត្តិធម៌អន្តរជាតិ (ICJ) ហើយថៃបានបង្កើតគណៈកម្មការដើម្បីឆ្លើយតបនឹងកម្ពុជាប្តឹងទៅតុលាការយុត្តិធម៌អន្តរជាតិ (ICJ) ។ លោកស្រីថា ថៃពុំបានបិទច្រកព្រំដែនជាប់កម្ពុជាទេ គឺថៃគ្រាន់តែផ្លាស់ប្តូរពេលវេលាបើក-បិទច្រកព្រំដែនប៉ុណ្ណោះ ដោយសារមានការបញ្ជូនអាវុ.ធមកកាន់ព្រំដែន ។

លោកស្រី ផេថងថាន បញ្ជាក់ថា កិច្ចប្រជុំគណៈកម្មការចម្រុះព្រំដែន (JBC) កម្ពុជា-ថៃ មិនមែនជាការជជែកពិភាក្សាគ្នាហើយបញ្ចប់នោះទេ ប៉ុន្តែលទ្ធផលកិច្ចប្រជុំនឹងសរសេរជាលាយលក្ខណ៍អក្សរដើម្បីឱ្យពិភពលោកដឹងថា ប្រទេសទាំងពីរមានកិច្ចព្រមព្រៀងអ្វីខ្លះ ។ នារសៀលថ្ងៃទី១៦ ខែមិថុនា នេះ ក្រសួងការបរតេសថៃបានរៀបចំកិច្ចប្រជុំជាមួយមន្ត្រីស្ថានទូតគ្រប់ប្រទេសឱ្យបានដឹងឮ ។ អ្វីដែលថៃអនុវត្តតិចជាង គឺការទំនាក់ទំនងសាធារណៈ ពីព្រោះថៃគោរពកិច្ចចរចាអន្តរជាតិ និងទ្វេភាគី ហើយអ្វីដែលពិភាក្សាគ្នា គួរតែមានលក្ខណៈផ្លូវការ និងកម្រិតទ្វេភាគី ។ ថៃពុំធ្លាប់ញុះញង់ ឬនិយាយឱ្យមានការប៉ះទង្គិចអ្វីទាំងក្នុងប្រទេស និងក្រៅប្រទេស ។

លោកស្រី ផេថងថាន បន្តថា ៖ «ខ្ញុំជានាយករដ្ឋមន្ត្រី បើមានការប៉ះទង្គិចខ្លាំងក្លានៅព្រំដែន មានន័យថា ខ្ញុំត្រូវតែជ្រាបថា តើមានអ្វីកើតឡើង ។ បើខ្ញុំព្រមព្រៀងឱ្យមានការប៉ះទង្គិច គឺត្រូវមានការជជែកជាមួយកងទ័ពផងដែរថា តើត្រៀមខ្លួនហើយឬនៅ ។ បើយើងស្ថិតក្នុងស្ថានការណ៍ណាមួយ គឺត្រូវតែស្ថិតក្នុងស្ថានការណ៍នោះ មិនមែននៅសុខៗកើតរឿងមក ស្រាប់តែដុតភ្លើងឱ្យឆេះ នេះជាអ្វីដែលគ្រប់គ្នាត្រូវប្រកាន់ខ្ជាប់» ។

កងទ័ពក៏ដូចគ្នាដែរ គឺត្រូវការពារអធិបតេយ្យរបស់យើង ប៉ុន្តែធ្វើឱ្យណា កុំឱ្យមានការប៉ះទង្គិច ឬបង្ហូរឈាមកើតឡើង ។ រដ្ឋាភិបាលគោរពកងទ័ពជានិច្ច ពីព្រោះកងទ័ពជាអ្នកបម្រើជាតិ និងស្គាល់ពីអាវុធគ្រប់ប្រភេទ ។ លោកស្រីបានពិនិត្យជាមួយកងទ័ពគ្រប់ពេលវេលាថា គួរធ្វើដូចម្តេចឱ្យបង្កើតប្រយោជន៍ខ្ពស់បំផុតសម្រាប់ប្រទេសថៃ ។ ការចល័តកងទ័ពក៏ត្រូវពិភាក្សាជាមួយរដ្ឋាភិបាលដែរថា តើអាចចល័តបានឬអត់ ។

រដ្ឋាភិបាលថៃ និងកងទ័ពគ្មានបញ្ហាជាមួយគ្នាទេ និងសូមឱ្យគ្រប់គ្នាគាំទ្ររដ្ឋាភិបាល និងកងទ័ពឱ្យក្លាយជាស្ថាប័នតែមួយ ។ ប្រទេសថៃរួបរួមគ្នា និងពុំព្រមឱ្យអ្នកណាមកកកាយ ឬឱ្យអ្នកណាមកបង្កាច់បង្ខូច ឬគំរាមទេ ថៃជាប្រទេសមានសេចក្តីថ្លៃថ្នូរ និងរឹងមាំ ។ ចំណុចនេះនឹងបញ្ជាក់ថា ថ្ងៃនេះ (ថ្ងៃទី១៦ ខែមិថុនា) បើមិនគោរពច្បាប់ទេ ពិភពលោកទាំងមូលក៏ពុំអាចទទួលយកបានដែរ ។ នេះបើតាមការអះអាងរបស់នាយករដ្ឋមន្ត្រីថៃ ។

គួរបញ្ជាក់ថា នាយករដ្ឋមន្ត្រីថៃថ្លែងបែបនេះ គឺក្រោយពីសម្តេចតេជោ ហ៊ុន សែន ប្រធានព្រឹទ្ធសភាកម្ពុជាប្រកាសថា កម្ពុជាទុកពេលឱ្យថៃរយៈពេល២៤ម៉ោង ធ្វើឱ្យស្ថានភាពច្រកព្រំដែនត្រឡប់មកធម្មតាវិញ បើមិនដូច្នោះ កម្ពុជានឹងបិទមិនឱ្យនាំចូលបន្លែ ផ្លែឈើរបស់ថៃនៅគ្រប់ច្រកព្រំដែន ៕

ប្រទេសថៃ ៖ យោងតាមការផ្សព្វផ្សាយរបស់សារព័ត៌មានថៃខុមឆាត់លឹក (komchadluek) កាលពីថ្ងៃទី១៦ ខែមិថុនា ឆ្នាំ២០២៥ ឱ្យដឹងថា រដ្ឋមន្ត្រីក្រសួងសុខាភិបាលថៃ លោក ស៊ុមសាក់ ថេបសុថិន បាននិយាយយ៉ាងមានអំណួតថា ពលរដ្ឋខ្មែរនៅតែជ្រើសរើសមន្ទីរពេទ្យថៃសម្រាប់ព្យាបាលជំងឺ បើទោះជាបច្ចុប្បន្ន ប្រទេសកម្ពុជា និងថៃ មានបញ្ហាព្រំដែនជាមួយគ្នាក្តី ហើយលោកថា ដោយសារអ្នកជំងឺមានទំនុកចិត្តលើប្រព័ន្ធសុខាភិបាលថៃ ដូចជាថ្នាំពេទ្យ និងសេវាមន្ទីរពេទ្យ ។

កាលពីថ្ងៃទី១៦ ខែមិថុនា រដ្ឋមន្ត្រីក្រសួងសុខាភិបាលថៃ លោក ស៊ុមសាក់ ថេបសុថិន បានចូលរួមកិច្ចប្រជុំស្តីពី «មន្ទីរពេទ្យថៃក្នុងសម័យឌីជីថល និង Trend Health Partners» នៅសណ្ឋាគារ Asia Airport ខេត្តប៉ាធុមថានី ហើយលោកបាននិយាយពាក់ព័ន្ធនឹងព័ត៌មានផ្សព្វផ្សាយថា ពលរដ្ឋខ្មែរនឹងឈប់មកព្យាបាលជំងឺនៅមន្ទីរពេទ្យថៃតាមគោលនយោបាយរបស់រាជរដ្ឋាភិបាលកម្ពុជា ។ លោកថា វាគ្រាន់តែជាព័ត៌មានចចាមអារ៉ាមប៉ុណ្ណោះ និងពុំមែនជាការពិត ហើយលោកជឿជាក់ថា ពលរដ្ឋខ្មែរនឹងមកព្យាបាលជំងឺនៅមន្ទីរពេទ្យថៃ ដោយសារប្រព័ន្ធសុខាភិបាលថៃមានគុណភាពទាំងផ្នែកថ្នាំពេទ្យ និងមន្ទីរពេទ្យ ។

អ្នកជំងឺត្រូវចូលព្យាបាលនៅមន្ទីរពេទ្យ ឬជ្រើសរើសគ្រូពេទ្យល្អ ដោយសារប្រទេសថៃមានប្រព័ន្ធសុខាភិបាលល្អ ហើយរឿងពាក្យចចាមអារ៉ាមមិនឱ្យពលរដ្ឋខ្មែរមកព្យាបាលជំងឺនៅថៃ គឺពុំមែនជាការពិតទេ ។ វាជាការយល់ខុស ហើយមិនយូរទេនឹងបាត់ពាក្យចចាមអារ៉ាមនេះវិញ ។ នេះបើតាមការលើកឡើងរបស់រដ្ឋមន្ត្រីក្រសួងសុខាភិបាលថៃ ។

ពលករ និងពលរដ្ឋខ្មែរជាច្រើនបានមកព្យាបាលជំងឺនៅថៃ ក្នុងនោះអ្នកជំងឺខ្លះពុំបានចុះបញ្ជី ឬគ្មានឈ្មោះក្នុងប្រព័ន្ធធានារ៉ាប់រងសុខភាព ។ ហេតុនេះ ធ្វើឱ្យការត្រួតពិនិត្យការចាយវាយថ្លៃមន្ទីរពេទ្យពិបាកយ៉ាងខ្លាំង ។ កន្លងមក ក្រសួងសុខាភិបាលមានដំណោះស្រាយជាមួយគណៈរដ្ឋមន្ត្រីពាក់ព័ន្ធនឹងការព្យាបាលអ្នកជំងឺបរទេស ប៉ុន្តែពុំទាន់ប្រើប្រាស់នៅឡើយ ពេលនេះ ក្រសួងសុខាភិបាលនឹងជំរុញឱ្យមានការអនុវត្តយ៉ាងទូលំទូលាយដើម្បីការពារការខ្វះខាតថវិកាក្នុងមន្ទីរពេទ្យ ។

លោក ស៊ុមសាក់ បន្តថា មិនមែនមានតែពលរដ្ឋខ្មែរទេដែលមកព្យាបាលជំងឺនៅថៃ គឺនៅមានពលរដ្ឋមីយ៉ាន់ម៉ា និងពលរដ្ឋប្រទេសផ្សេងៗ សរុបជាង១លាននាក់ ឬលើសនេះ ដោយសារគ្មានការចុះឈ្មោះអ្នកជំងឺច្បាស់លាស់ ។ ប៉ុន្តែថៃនឹងចាត់វិធានការតាមច្បាប់ចំពោះអ្នកជំងឺបរទេសណាដែលមកព្យាបាលនៅថៃដោយកាន់កាតមាសដូចពលរដ្ឋថៃ និងចំណាយប្រាក់ត្រឹមតែ៣០បាត ៕

ថៃ ៖ លោក Plodprasob Suraswadi អតីតឧបនាយករដ្ឋមន្ត្រីថៃ បានប្រកាសក្ដែងៗស្នើឱ្យរដ្ឋាភិបាលថៃ ប្តឹ.ងយកខេត្តកោះកុងដែលបារាំងធ្លាប់កាត់ឲ្យប្រទេសថៃមកវិញ ប្រសិនបើកម្ពុជាពិតជាចង់ដោះស្រាយដោយផ្អែកលើច្បាប់មែន។ នេះបើយោងតាមការចុះផ្សាយដោយសារព័ត៌មានថៃ Nation Weekend News។

យោងតាមប្រភពខាងលើបានរាយការណ៍ កាលពីថ្ងៃទី១៥ ខែមិថុនា នេះថា អតីតឧបនាយករដ្ឋមន្ត្រីថៃ លោក Plodprasob Suraswadi បាននិយាយប្រាប់សារព័ត៌មានថា «ប្រសិនបើយើងពិតជាត្រូវពឹងផ្អែកលើតុលាការយុត្តិធម៌អន្តរជាតិមែន ខ្ញុំសូមស្នើឱ្យរដ្ឋាភិបាលថៃប្តឹ.ងយកខេត្តកោះកុងមកវិញ ព្រោះបារាំងប្រើកម្លាំងដើម្បីដណ្ដើមវាពីយើងទៅ។ ខ្ញុំធ្លាប់ទៅខេត្តនោះកាលពីមុន ហើយឃើញថាមនុស្សគ្រប់គ្នានៅទីនោះអាចនិយាយភាសាថៃបាន។»

គួរជម្រាបថា ការលើកឡើងរបស់អតីតឧបនាយករដ្ឋមន្ត្រីថៃ គឺចង់សំដៅលើទឹកដីមួយភាគធំដែលធ្លាប់ ទន្រ្ទានយកបានពីកម្ពុជា ក្រោមការគាំទ្រដោយអាណានិគមនិយមជប៉ុនដែលជាអ្នកឈ្នះសង្រ្គាម ឆ្នាំ១៩៤១ ក្នុងពេលដែលប្រទេសបារាំងកំពុងចុះខ្សោយ។

ប៉ុន្តែក្រោយមក នៅប្រទេសជប៉ុន បានចា.ញ់សង្រ្គាមលោកលើកទី២ គឺនៅថ្ងៃទី១៧ ខែវិច្ឆិកា ឆ្នាំ១៩៤៦ នៅទីក្រុងវ៉ាស៊ីនតោន មានកិច្ចព្រមព្រៀងបារាំង.សៀមមួយ បានរំលាយចោលនូវអនុសញ្ញាចុះថ្ងៃទី៩ ខែឧសភា ឆ្នាំ១៩៤១នោះវិញ។ ដូច្នេះថៃ ត្រូវប្រគល់ទឹកដីមួយចំនួនរបស់កម្ពុជា ដែលខ្លួនបានកាន់កាប់ចាប់ពីឆ្នាំ១៩៤១ នោះមកឱ្យខ្មែរវិញ។ ហើយថៃចាត់ទុកថា នោះគឺជាទឹកដីរបស់ខ្លួនដែលបានបាត់បង់៕

ប្រទេសថៃ ៖ កាលពីថ្ងៃទី១៥ ខែមិថុនា ឆ្នាំ២០២៥ សារព័ត៌មានថៃ Khaosod រាយការណ៍ថា នាយករដ្ឋមន្ត្រីថៃ លោកស្រី ផេថងថាន ស៊ីណាវ៉ាត បានបញ្ជាក់ពីគោលជំហររបស់រដ្ឋាភិបាលថៃ គឺពុំធ្លាប់មានគំនិតបណ្តេញពលករខ្មែរ ឬពលករប្រទេសផ្សេងៗឱ្យត្រឡប់ទៅប្រទេសវិញទេ ។ លោកស្រីសន្យាពុំយករឿងទំនាក់ទំនងរវាងប្រទេសមកធ្វើជាបញ្ហានយោបាយ ។

ក្រោយពីសម្តេចតេជោ ហ៊ុន សែន ប្រធានព្រឹទ្ធសភាកម្ពុជាអំពាវនាវឱ្យពលករខ្មែរធ្វើការនៅប្រទេសថៃធ្វើដំណើរត្រឡប់មកកម្ពុជាវិញមុនពេលថៃបណ្តេញចេញ លោកស្រី ផេថងថាន ស៊ីណាវ៉ាត នាយករដ្ឋមន្ត្រីថៃបានសរសេរក្នុងបណ្តាញសង្គមកាលពីថ្ងៃទី១៥ ខែមិថុនា ថា ប្រទេសថៃទទួលយកពលករបរទេសមកធ្វើការ ដោយផ្តល់ការថែទាំសុខុមាលភាពដល់ពលករដែលចូលមកធ្វើការដោយស្របច្បាប់តាមសិទ្ធិ និងប្រកាន់ខ្ជាប់នូវគោលការណ៍សិទ្ធិមនុស្ស ។

រដ្ឋាភិបាលថៃពុំធ្លាប់មានគំនិតបណ្តេញពលករប្រទេសណាមួយទេ ប៉ុន្តែបើប្រទេសណាមានវិធានការហៅពលករត្រឡប់ទៅវិញ ហើយពលករមានការងារធ្វើក្នុងប្រទេសរបស់ខ្លួន វាជាសិទ្ធិសេរីភាពដែលពលករប្រទេសនីមួយៗអាចសម្រេចចិត្ត និងស្ថិតក្រោមការទទួលខុសត្រូវរបស់រដ្ឋាភិបាលប្រទេសនោះ ។

លោកស្រី ផេថងថាន បញ្ជាក់ថា ៖ «ខ្ញុំសន្យាពុំយកទំនាក់ទំនងអន្តរជាតិរវាងប្រទេសមកធ្វើជាប្រធានបទនយោបាយ ។ ខ្ញុំសូមអំពាវនាវឱ្យមានវិធានការអន្តរជាតិណាមួយដែលផ្តល់ផលប្រយោជន៍ដល់ប្រទេស និងពលរដ្ឋ ដូចគ្នានឹងផលប្រយោជន៍នយោបាយក្នុងប្រទេសរបស់ខ្លួន» ។

គួរបញ្ជាក់ថា សម្តេចតេជោ ហ៊ុន សែន ប្រធានព្រឹទ្ធសភាកម្ពុជាបានអំពាវនាវឱ្យពលករខ្មែរត្រឡប់មកមាតុភូមិវិញ មុនពេលអាជ្ញាធរថៃបណ្តេញចេញ ឬប្រមាថ អ្នកណាក៏ដោយឱ្យតែខ្មែរ ទោះជាមានឯកសារ ឬគ្មានឯកសារ ក៏រាជរដ្ឋាភិបាលទទួលយកទាំងអស់ ។

សម្តេចតេជោបានមានប្រសាសន៍ថា ៖ «បងប្អូនពលករដែលចំណាកស្រុកទៅធ្វើការងារនៅដីសៀម សូមត្រឡប់មកកម្ពុជាមុនថៃបណ្តេញចេញ ដែលពេលនេះ កំពុងទទួលការមើលងាយ និងប្រមាថយ៉ាងធ្ងន់ធ្ងរនៅតំបន់មួយចំនួន» ។ លើសពីនេះ សម្តេចតេជោ ហ៊ុន សែន ក៏បានស្នើឱ្យរាជដ្ឋាភិបាលកម្ពុជាត្រៀមខ្លួនទទួលយក និងដោះស្រាយការងារជូនពលករដែលនឹងវិលត្រឡប់ពីប្រទេសថៃ ៕