រាជធានីភ្នំពេញ ៖ ផ្លូវថ្មើជើងថ្មីនៅមាត់ទន្លេ ឬហៅថា Walk Street នៅតាមបណ្តោយតីរវិថីព្រះស៊ីសុវត្ថិ (ចាប់ពីផ្លូវលេខ៩៤ រហូតដល់មុខព្រះបរមរាជវាំង) ស្ថិតក្នុងសង្កាត់ជ័យជំនះ ខណ្ឌដូនពេញ រាជធានីភ្នំពេញ ត្រូវបានប្រសិទ្ធនាមថាជា «ផ្លូវថ្មើរជើងចតុមុខ» នឹងត្រូវដាក់សម្ពោធឱ្យប្រើប្រាស់ជាផ្លូវការ នាថ្ងៃទី២១ ខែមិថុនា ឆ្នាំ២០២៥ ខាងមុខនេះ។

យោងតាមសេចក្ដីជូនដំណឹងរបស់រដ្ឋបាលរាជធានីភ្នំពេញបានឲ្យដឹងថា ពិធីដាក់សម្ពោធឱ្យប្រើប្រាស់ជាផ្លូវការនូវ «ផ្លូវថ្មើរជើងចតុមុខ» នឹងត្រូវបានប្រព្រឹទ្ធទៅក្រោមអធិបតីភាពដ៏ខ្ពង់ខ្ពស់ នៃសម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រី នៃព្រះរាជាណាចក្រកម្ពុជា និងលោកជំទាវបណ្ឌិត ពេជ ចន្ទមុន្នី ហ៊ុនម៉ាណែត។

គួរជម្រាបផងដែរថា ដើម្បីឱ្យពិធីដាក់សម្ពោធឱ្យប្រើប្រាស់ជាផ្លូវការ និងប្រសិទ្ធនាមផ្លូវថ្មើរជើងចតុមុខខាងលើប្រព្រឹត្តទៅ ដោយរលូន រក្សាបាននូវសន្តិសុខ សុវត្ថិភាព សណ្តាប់ធ្នាប់ និងរបៀបរៀបរយសាធារណៈ អាជ្ញាធរមានសមត្ថកិច្ច នឹងធ្វើការរៀបចំសម្រួលចរាចរណ៍ជាបណ្តោះអាសន្ន នៅតំបន់ជុំវិញទីតាំងប្រារព្ធពិធី និងតាមបណ្តោយតីរវិថី ព្រះស៊ីសុវត្ថិ (ចាប់ពីផ្លូវលេខ៩៤ រហូតដល់មុខព្រះបរមរាជវាំង) ដោយស្នើប្រជាពលរដ្ឋទាំងអស់ដែល ត្រូវធ្វើដំណើរឆ្លងកាត់តំបន់ជុំវិញទីតាំងខាងលើមេត្តាយោគយល់ អធ្យាស្រ័យ ដោយអនុគ្រោះ ចាប់ពីវេលាម៉ោង ១៤:០០នាទី រហូតដល់បញ្ចប់កម្មវិធី។

ដោយឡែកចំពោះប្រជាពលរដ្ឋ ដែលមានបំណងដើរលេងកម្សាន្ត នៅផ្លូវថ្មើរជើងតាមបណ្តោយតីរវិថីព្រះស៊ីសុវត្ថិ នៅតែអាចធ្វើដំណើរដើរកម្សាន្តបានជាធម្មតា៕

តារាចម្រៀង វេហាស៍ ,លោក មាស សាលី រួមទាំងទស្សនិកជនជាច្រើនទៀតកំពុងមាន ការងឿងឆ្ងល់ យ៉ាងខ្លាំងបន្ទាប់ពីឃើញហាងលក់ទំនិញអាស៊ីនៅសហរដ្ឋអាម៉េរិក លក់ប្រហុកហើយបានបញ្ជាក់ថាផលិតនៅប្រទេសថៃបែរជាមានដាក់រូបប្រាសាទអង្គរវត្ត។

កាលពីថ្ងៃទី១៤ មិថុនា នៅលើបណ្តាញសង្គមរបស់លោក មាស សាលី បានបង្ហោះវីដេអូ មួយដោយភ្ជាប់មកជាមួយនឹងចំណងជើងថា «បងប្អូនជួយពិចារណាខ្ញុំ តើផ្ទះលេខ២ធ្វើ ចឹងមានន័យថាម៉េច?»។ ក្នុងវីដេអូនេះលោក វេហាស៍ ដែលជាប្អូនប្រុសរបស់លោក មាស សាលីបានបញ្ជូលសំឡេងដោយសេចក្តីហួសចិត្តយ៉ាងខ្លាំងពេលលោកដើរទិញអីវ៉ាន់ប្រហុកនៅហាងទំនិញអាស៊ីនៅសហរដ្ឋអាម៉េរិកស្រាប់តែបានឃើញមានរូបប្រាសាទអង្គរវត្តប៉ុន្តែបានដាក់ការសម្គាល់ថាជាផលិតផលរបស់ប្រទេសថៃ (Products of Thailand)។

លោក វេហាស៍ បាននិយាយដោយអារម្មណ៍ខឹងញ័រសាច់មិនដឹងថាលោកចេះមិនដល់ឬ យ៉ាងណាហើយវាអាចទៅរួចទេដែលប្រាសាទអង្គរវត្តរបស់ខ្មែរយើងគេយកទៅប្រើលើដប ប្រហុកហើយដាក់ថាជាផលិតផលរបស់ប្រទេសថៃហើយមានប្រាសាទអង្គរវត្តនៅលើដប។ តារាចម្រៀងរូបនេះថា លោកមានការឆ្ងល់ហើយមិនដឹងថាគេមានបំណងអ្វី។ ក្នុងនោះលោក វេហាស៍ បានបន្ថែមថាលោកមិនដឹងក្រសួងពាក់ព័ន្ធនៅខ្មែរបានដឹងពីបញ្ហា នេះឬមានការអនុញ្ញាតណាមួយ លោកមិនដឹងនោះទេប៉ុន្តែលោកពិតជាឆ្ងល់មែនទែន ហើយការធ្វើបែបនេះខុសឬក៏ត្រូវ។

លោក វេហាស៍ បានបញ្ជាក់ទៀតថាផលិតផលនេះគឺមានការដាក់លក់យ៉ាងទូលំទូលាយ នៅសហរដ្ឋអាម៉េរិកសឹងតែគ្រប់ហាងទំនិញអាស៊ី ខណៈដែលលោកទើបតែចាប់អារម្មណ៍ មើលឃើញលើកទី១។ ក្នុងនោះលោកក៏បង្ហាញទឹកត្រីមួយប្រភេទដែលមានអក្សរបី ប្រទេសចូលគ្នាគឺថៃ វៀតណាម និងខ្មែរ ហើយដាក់ថាជាផលិតផលរបស់ប្រទេសថៃនិង រូបកោះត្រល់ដែលជាអតីតកោះរបស់ខ្មែរ។ លោកមិនដឹងថាគេមានចេតនាយ៉ាងមិច នោះទេ។

លើសពីនេះទៅទៀត លោក មាស សាលី បានសរសេរបន្ថែមក្នុងវីដេអូដែរថាហាង អាហារថៃ គឺបានដាក់រូបប្រាសាទអង្គរវត្តរបស់យើងដោយមិនក្រែងចិត្តថាជារបស់ខ្លួន។ លោកថា ប្រទេសនេះបង្រៀននិងបណ្តុះគំនិតកូនចៅតែម្តង ថាខ្មែរយើងលួចទឹកដី លួចប្រាសាទវាទាំងដែលការពិតគឺដូនតាប្រទេសថៃបំភ្លៃប្រវត្តិសាស្រ្តទាំងស្រុង ៕

រាជធានីភ្នំពេញ ៖ ឯកឧត្តម ឧបនាយករដ្ឋមន្ត្រី ទៀ សីហា រដ្ឋមន្ដ្រីក្រសួងការពារជាតិកម្ពុជា បានចេញសារឆ្លើយតបទៅនឹងការចោ.ទប្រកាន់ពីសំណាក់យោធាថៃថា «កម្ពុជាបានបង្វែរកាណុងកាំ.ភ្លើ.ងទៅភូមិដ្ឋាន និងបន្ទាយយោធាររបស់ថៃ» នៅលើទំព័រហ្វេសប៊ុករបស់លោក កាលពីថ្ងៃទី១៦ ខែមិថុនា ឆ្នាំ២០២៥។

នៅក្នុងសំណេរនោះលោកបានឆ្លើយតបថា ៖ នេះជាយុទ្ធវិធីការពារជាតិរបស់កម្ពុជា ព្រោះនៅពេលបំពាក់សព្វាវុធគឺដើម្បីការពារបូរណភាពទឹកដី ហើយច្បាស់ណាស់គោលដៅគឺតម្រង់ទៅខ្មាំងស..ត្រូវ មិនដែលមានក្បួនទ័ពណាដែលបង្វែរកាណុងមកផ្ទះខ្លួនឯងនោះទេ។ ក្នុងនោះលោករដ្ឋមន្ត្រីបានចោ.ទជាសំណួរថា «ឬមួយកងទ័ពថៃរៀនយុទ្ធវិធីខុសពីកម្ពុជា?»

បន្ថែមពីការឆ្លើយតបនេះ ប្រមុខការពារជាតិកម្ពុជារូបនេះក៏បានលើកឡើងថា ៖ ជម្រើសសន្តិវិធី គឺការចរចារវាងរដ្ឋាភិបាលទាំងពីរទាំងផ្នែកនយោបាយ ផ្នែកសេដ្ឋកិច្ច និងផ្នែកផ្សេងៗ។ ចំពោះផ្នែកយោធា គឺជម្រើសចុងក្រោយ។ លោកបានគូសបញ្ជាក់ផងដែរថា សម្រាប់កម្ពុជាក៏ត្រៀមរួចជាស្រេចក្នុងការការពារទឹកដីកម្ពុជា ដោយគ្មានមហិច្ឆតាឈ្លានពានទៅប្រទេសជិតខាងឡើយ៕

ថៃ ៖ អ្នកនាំពាក្យក្រសួងការបរទេសថៃ លោក Nikorndej Balankura បាននិយាយថា ប្រទេសថៃចាត់ទុកការគំរា.មបិទព្រំដែន និងហាមឃា.ត់ការនាំចូលផលិតផលថៃទាំងស្រុង របស់សម្ដេច ហ៊ុន សែន ប្រសិនបើថៃមិនព្រមធ្វើតាមការទាមទាររបស់គាត់នោះ គឺជាសកម្មភាពដែល “អ្នកជិតខាងល្អនឹងមិនធ្វើនោះទេ” ។ នេះបើយោងតាមការចុះផ្សាយរបស់សារព័ត៌មានថៃ Thai PBS World កាលពីល្ងាច ថ្ងៃទី១៦ ខែមិថុនា។

ដោយមិនបញ្ចេញឈ្មោះស្ដេចតេជោ ហ៊ុន សែន ដោយផ្ទាល់ ប៉ុន្តែអ្នកនាំពាក្យរូបនេះបាននិយាយថា «អ្នកជិតខាងល្អគួរតែចូលរួមក្នុងការសន្ទនា ដើម្បីស្វែងរកដំណោះស្រាយ និងស្ថាបនាគ្នាទៅវិញទៅមក ជំនួសឱ្យការផ្តល់ឳកាសជាចុងក្រោយ។ ផលប៉ះពាល់នៃវិធានការបែបនេះ នឹងត្រូវប្រជាជននៃប្រទេសទាំងពីរជាអ្នកទទួលរង។»

លោក Nikorndej បានលើកឡើងថា «លោក ហ៊ុន សែន និងកូនប្រុសរបស់គាត់លោក ហ៊ុន ម៉ាណែត ដែលជានាយករដ្ឋមន្ត្រីកាន់អំណាច តែងប្រើប្រព័ន្ធផ្សព្វផ្សាយសង្គមដើម្បីចេញសេចក្តីថ្លែងការណ៍ផ្លូវការនានា។ អ្នកនាំពាក្យរូបនេះបន្ថែមទៀតថា «ប្រព័ន្ធផ្សព្វផ្សាយសង្គមមិនមែនជាបណ្តាញផ្លូវការ សម្រាប់ទំនាក់ទំនងការទូតនោះទេ។»

គួររំលឹកថា កាលពីព្រឹកថ្ងៃចន្ទ ទី១៦ ខែមិថុនា ម្សិលមិញ សម្តេចតេជោ ហ៊ុន សែន បានគំរា.មថា ប្រសិនបើថៃមិនព្រមបើកច្រកព្រំដែនទាំងអស់ជាមួយកម្ពុជាឡើងវិញនៅថ្ងៃស្អែកទេ កម្ពុជានឹងដាក់បម្រាមមិនអោយបន្លែ ផ្លែឈើថៃចូលតាមច្រកព្រំដែនណាមួយរបស់កម្ពុជាឡើយ។ ការប្រកាសនេះធ្វើឡើង បន្ទាប់ពីប្រទេសថៃបានដាក់កំហិតលើម៉ោងបើក.បិទច្រកព្រំដែនជាច្រើនជាមួយកម្ពុជាដោយឯកតោភាគីកាលពីសប្តាហ៍មុន ចំពេលដែលមានភាពតានតឹងកើនឡើងនៅក្នុងជម្លោះព្រំដែនរវាងប្រទេសទាំងពីរ។

លោក Nikorndej បានឆ្លើយតបដោយនិយាយថា “ការចេញផ្សាយជាចុងក្រោយ ឬធ្វើសេចក្តីថ្លែងការណ៍ជាសាធារណៈដែលនាំឱ្យមានការយល់ច្រលំបែបនេះ ឆ្លុះបញ្ចាំងពីកង្វះខាតនៃចេតនាពិតប្រាកដរបស់កម្ពុជា ក្នុងការប្រើប្រាស់យន្តការទ្វេភាគីដែលមានស្រាប់ ដោយផ្អែកលើទំនាក់ទំនងអ្នកជិតខាងល្អ”។

លោក Nikorndej បានសង្កត់ធ្ងន់ថា ៖ ក្នុងការដោះស្រាយភាពតានតឹងតាមព្រំដែន ប្រទេសថៃផ្តល់អាទិភាពដល់សុខុមាលភាពរបស់ប្រជាជន។ លោកបានបន្តថា៖ «វិធានការប្រឆាំងរបស់ប្រទេសថៃគឺសំដៅមកលើរដ្ឋាភិបាលមិនមែនប្រជាជននោះទេ»។ «រដ្ឋាភិបាលថៃតែងអនុវត្តការវិនិច្ឆ័យដោយប្រុងប្រយ័ត្ន និងមានស្មារតីចាស់ទុំក្នុងការអនុវត្តវិធានការប្រឆាំងដោយមិនបញ្ចេញអារម្មណ៍ និងមិនធ្វើនយោបាយលើទំនាក់ទំនងនៃប្រទេសទាំងពីរនោះទេ»៕