្រទេសថៃ ៖ សារព័ត៌មានថៃ Khaosod រាយការណ៍កាលពីថ្ងៃទី១២ ខែមិថុនា ឆ្នាំ២០២៥ ថា ក្រសួងសុខាភិបាលថៃបានត្រៀមមន្ទីរពេទ្យមួយចំនួនសម្រាប់សង្គ្រោះពលរដ្ឋរងរបួសករណីកើតសង្គ្រាមនៅព្រំដែនខេត្តសុរិន្ទ គឺមន្ទីរពេទ្យភ្នំដងរ៉ាក់ និងមន្ទីរពេទ្យកាបឈើង ។ ក្រៅពីនេះ ក្រសួងសុខាភិបាលថៃក៏បានបញ្ជូនក្រុមគ្រូពេទ្យកងទ័ពមកហ្វឹកហាត់ជម្លៀសអ្នកជំងឺផងដែរ ។

កាលពីថ្ងៃទី១២ ខែមិថុនា កន្លងមក លោកវេជ្ជបណ្ឌិត អូផាស កានកាវីនផុង មន្ត្រីក្រសួងសុខាភិបាលថៃបាននិយាយពីករណីនាយករដ្ឋមន្ត្រីថៃ លោកស្រី ផេថងថាន ស៊ីណាវ៉ាត់ មានវិធានការជួយសង្គ្រោះពលរដ្ឋរស់នៅខេត្តចំនួន៧ ជាប់ព្រំដែនកម្ពុជា-ថៃ ដោយឱ្យខេត្តសុរិន្ទត្រៀមរៀបចំកន្លែងស្នាក់នៅបណ្តោះអាសន្ន និងរៀបចំមន្ទីរពេទ្យភ្នំដងរ៉ាក់ មន្ទីរពេទ្យកាបឈើង ឱ្យមានទីធ្លាធំទូលាយសម្រាប់ទទួលពលរដ្ឋរងរបួសករណីកើតសង្គ្រាមនៅព្រំដែន ។

លោកវេជ្ជបណ្ឌិត អូផាស និយាយថា បើត្រូវជម្លៀសពលរដ្ឋនៅព្រំដែនខេត្តសុរិន្ទ រំពឹងថា និងមានពលរដ្ឋប្រមាណ១៤៤.៣០០នាក់ ដោយមានការរៀបចំកន្លែងស្នាក់នៅបណ្តោះអាសន្នចំនួន៦៦កន្លែង ស្ថិតនៅ៥ស្រុក រួមមាន ៖ ស្រុកប្រាសាទ ស្រុកសាំងខាក់ ស្រុកឡាំឌួន ស្រុកស្រ៊ីណារ៉ុង និងស្រុកមឿងសុរិន្ទ (ស្រុកមឿងសុរិន្ទ គឺសម្រាប់ទទួលជនបរទេសរងរបួស ឬពលរដ្ឋមកពីខេត្តផ្សេង) ។ ក្រសួងសុខាភិបាលផ្តោតលើការជួយសង្គ្រោះពលរដ្ឋចំនួន៦ចំណុច រួមមាន ៖

១-ព្យាបាលជំងឺឆ្លងក្នុងតំបន់ដែលមានមនុស្សច្រើន ដូចជា ជំងឺផ្លូវដង្ហើម ជំងឺស្បែក និងជំងឺប្រព័ន្ធរំលាយអាហារ
២-ព្យាបាលជំងឺផ្លូវចិត្តកើតឡើងដោយសារអំពើហិង្សា
៣-ត្រៀមស្បៀងអាហារ និងទឹកស្អាត ការពារកង្វះអាហារូបត្ថម្ភ និងជំងឺឆ្លងពីទឹក
៤-ការពារក្រុមងាយរងគ្រោះ ដូចជា កុមារ មនុស្សចាស់ ស្ត្រីមានផ្ទៃពោះ និងជនពិការ
៥-រៀបចំបណ្តាញបញ្ជូនអ្នកជំងឺ និងត្រៀមផ្តល់ឈាមរវាងកន្លែងស្នាក់នៅបណ្តោះអាសន្ន មន្ទីរពេទ្យជួរមុខ និងមន្ទីរពេទ្យសំខាន់ និង
៦-កំណត់សុវត្ថិភាពអ៊ីនធើរណេតក្នុងប្រព័ន្ធទិន្នន័យសុខភាព ។

ក្រសួងសុខាភិបាលបានប្រគល់តួនាទីឱ្យការិយាល័យសុខភាពសាធារណៈខេត្តសុរិន្ទមើលការខុសត្រូវកន្លែងជម្លៀសពលរដ្ឋ និងគ្រប់គ្រងមិនឱ្យពលរដ្ឋស្នាក់នៅចង្អៀតគ្នា ដោយបែងចែកកន្លែងសម្រាប់អ្នកជំងឺ ក្រុមងាយរងគ្រោះ និងទីតាំងព្យាបាលសុខភាពផ្លូវចិត្ត ។ ក្រៅពីនេះ ត្រូវត្រួតពិនិត្យគុណភាពទឹកជារៀងរាល់ថ្ងៃ កំណត់ផែនការផ្តល់ថ្នាំពេទ្យបន្ទាន់ រួមទាំងរៀបចំក្រុមពិនិត្យជំងឺផ្លូវដង្ហើម ប្រព័ន្ធរំលាយអាហារ និងជំងឺស្បែក ។ នេះបើតាមការលើកឡើងរបស់លោកវេជ្ជបណ្ឌិត អូផាស ។

លោកវេជ្ជបណ្ឌិតបន្តថា ករណីកើតសង្គ្រាម មន្ទីរពេទ្យភ្នំដងរ៉ាក់ និងមន្ទីរពេទ្យកាបឈើង ដែលស្ថិតក្នុងតំបន់ក្រហម នឹងក្លាយជាមន្ទីរពេទ្យជួរមុខដើម្បីសង្គ្រោះពលរដ្ឋរងរបួសនៅព្រំដែន ។ បើស្ថានការណ៍អូសបន្លាយ ឬកាន់តែធ្ងន់ធ្ងរ មន្ទីរពេទ្យទាំង២នេះត្រូវរៀបចំទីធ្លាឱ្យធំទូលាយសម្រាប់ទទួលអ្នកជំងឺ និងបែងចែកអ្នកជំងឺតាមប្រភេទ រួចហើយបញ្ជូនអ្នកជំងឺទៅមន្ទីរពេទ្យសុរិន្ទ មន្ទីរពេទ្យសាំងខាក់ មន្ទីរពេទ្យប្រាសាទ មន្ទីរពេទ្យថាទូម និងមន្ទីរពេទ្យរតនបុរី ។

មន្ទីរពេទ្យត្រូវអនុញ្ញាតឱ្យក្រុមគ្រូពេទ្យកងទ័ពធ្វើការជំនួស បើត្រូវបង្កើតទីតាំងព្យាបាលអ្នកជំងឺបន្ថែមទៀត គឺមន្ទីរពេទ្យសុរិន្ទ និងមណ្ឌលសុខភាពត្រូវសហការគ្នាចាត់ការ ។ បច្ចុប្បន្ន ក្រុមគ្រូពេទ្យកងទ័ពបានហ្វឹកហាត់ជម្លៀសអ្នកជំងឺរបស់មន្ទីរពេទ្យរួចរាល់ហើយ ៕

ក្រៅពីសម្រេចឈប់ទិញអគ្គិសនី និងបណ្ដាញអ៊ីនធើណេតពីប្រទេសថៃយកមកប្រើប្រាស់ ពេលនេះកម្ពុជាក៏បានប្រកាសឲ្យស្ថានីយទូរទស្សន៍ និងរោងភាពយន្តទាំងអស់នៅក្នុងប្រទេសកម្ពុជាឈប់ចាក់បញ្ចាំងខ្សែភាពយន្តថៃផងដែរ។ ប្រមុខថ្នាក់ដឹកនាំកម្ពុជាបានបញ្ជាក់ថា ការសម្រេចធ្វើបែបនេះ គឺបន្ទាប់ពីកម្ពុជាបានរងការគំរា.មកំហែងបិទនេះបិទនោះជាច្រើន រួមទាំងច្រកព្រំដែនពីក្រុមជ្រុលនិយមថៃដែលមានការគាំទ្រដោយពួកយោធា។

ជាមួយនឹងដំណឹងអំពីការកាត់ផ្ដាច់បណ្ដាញអគ្គិសនី អ៊ីនធើណេត និងឈប់ចាក់បញ្ចាំងខ្សែភាពយន្តថៃ ក៏ដូចជាអាចនឹងឈានដល់ការឈប់នាំចូលទំនិញថៃមកប្រើប្រាស់នៅក្នុងទីផ្សារកម្ពុជានៅពេលខាងមុខនេះ លោក ជា វ៉ាន់ដេត រដ្ឋមន្ត្រីក្រសួងប្រៃសណីយ៍និងទូរគមនាគមន៍ បាននិយាយថា ការណ៍នេះនឹងធ្វើឲ្យប្រទេសថៃបាត់បង់ប្រាក់ចំណូលយ៉ាងធ្ងន់ធ្ងរ។

លោករដ្ឋមន្រ្តីបានលើកឡើងយ៉ាងដូច្នេះថា៖ ដោយសារការគម្រា.មកំ.ហែងរបស់ភាគីថៃក្នុងការកាត់ផ្ដាច់ការផ្គត់ផ្គង់សេវាអ៊ីនធឺណិតដល់កម្ពុជា ប្រតិបត្តិករទូរគមនាគមន៍ទាំងអស់របស់កម្ពុជាបានឈប់ប្រើប្រាស់ប្រភពអ៊ីនធឺណិតពីប្រទេសថៃ ដែលនឹងធ្វើឱ្យប្រទេសថៃអាចខាតបង់ចំណូលរាប់រយលានដុល្លារ។

លោកបានគូសបញ្ជាក់ថា ៖ «លទ្ធផលនេះ គឺកើតឡើងដោយសារការគម្រា.មកំ.ហែងរបស់ភាគីថៃមកលើកម្ពុជា។ ថៃជាអ្នកថា តែកម្ពុជាជាអ្នកធ្វើមែន។»

គួរឲ្យដឹងផងដែរថា ប្រទេសថៃមានមុខទំនិញដែលនាំចូលកម្ពុជាមានចំនួនច្រើនជាង ទំនិញដែលកម្ពុជានាំចូលប្រទេសថៃ។ ដោយបើគិតត្រឹម៥ខែដំបូងនៃឆ្នាំ២០២៥ ប្រទេសថៃបាននាំចូលទំនិញមកកម្ពុជាមានទំហំទឹកប្រាក់ ១,៤៨ ពាន់លានដុល្លារ ខណៈដែលការនាំចេញពីកម្ពុជទៅថៃមានទំហំទឹកប្រាក់តែ ៣៩៦ លានដុល្លារ ប៉ុណ្ណោះ។ នេះបើយោងតាមទិន្នន័យដែលទទួលបានពីអគ្គនាយកដ្ឋានគយ និងរដ្ឋាករកម្ពុជា (GDCE) ។

គួរបញ្ជាក់ថា រាជរដ្ឋាភិបាលកម្ពុជាបានធ្វើការបញ្ជាក់រួចមកហើយថា ក្នុងករណីដែលថៃនៅតែបន្តរឹតបន្តឹង និងបិទច្រកព្រំដែនដោយឯកតោភាគី កម្ពុជានឹងអនុវត្តគោលការណ៍ធំៗចំនួន៦ចំណុចរួមមាន៖ ១.ប្រកាសឈប់ប្រើប្រាស់ទំនិញថៃនៅក្នុងទីផ្សារកម្ពុជា ២.ស្វែងរកទីផ្សារសម្រាប់កសិផលរបស់ប្រជាជនដែលតែងលក់ឲ្យថៃឲ្យបានទាំងក្នុង និងក្រៅស្រុក ៣. បង្វែរអ្នកជំងឺដែលសម្រាកព្យាបាលនៅប្រទេសថៃ ឲ្យមកព្យាបាលក្នុងស្រុក ឬទៅប្រទេសផ្សេង ៤. ត្រៀមទទួលយក និងដោះស្រាយការងារជូនពលករដែលនឹងវិលត្រឡប់ពីប្រទេសថៃ ៥. ត្រៀមកម្លាំងប្រដាប់អាវុ.ធ២៤ម៉ោងលើ២៤ម៉ោង ដើម្បីវាយបកការពារខ្លួន ៦. ជម្លៀសប្រជាជននៅតាមព្រំដែនមកកាន់តំបន់មានសុវត្ថិភាព។

ដូចនេះ ប្រសិនបើកម្ពុជាត្រូវអនុវត្តគោលការណ៍ដូចខាងលើមែន នោះអ្នកដែលទទួលរងផលប៉ះពាល់ធ្ងន់ធ្ងរគឺភាគីថៃ។ ហើយទាំងអស់នេះ បានកើតឡើងដោយសារតែការគំរា.មកំហែងមកលើកម្ពុជា ដោយថៃខ្លួនឯង៕

ប្រទេសថៃ ៖ ក្រោយការប៉ះទង្គិចដោយអាវុ.ធ រវាងកងទ័ពខ្មែរ និងថៃ នៅភូមិតេជោមរកត ឃុំមរកត ស្រុកជាំក្សាន្ត ខេត្តព្រះវិហារ ជាប់ខេត្តឧប៊ុនរ៉ាជធានី ប្រទេសថៃ ធ្វើឱ្យស្ថានការណ៍តាមបណ្តោយព្រំដែនប្រទេសទាំងពីរមានភាពតានតឹង ហើយថ្មីៗនេះ ពលរដ្ឋថៃបានចែកចាយរូបភាពហាងលក់ទំនិញមួយនៅថៃមិនស្វាគមន៍អតិថិជនខ្មែរ ។ កាលពីថ្ងៃទី៦ ខែមិថុនា ឆ្នាំ២០២៥ សារព័ត៌មានថៃឈ្មោះ ThaiNews ផ្សព្វផ្សាយថា ហាងលក់ទំនិញមួយនៅថៃបានដាក់ស្លាកហាមពលរដ្ឋខ្មែរចូលទិញដាច់ខាត ដោយហាងថៃនេះចោទប្រកាន់ថា មកពីកងទ័ពខ្មែរចូលក្នុងទឹកដីថៃ ។

ការប៉ះទង្គិចគ្នារវាងកងទ័ពខ្មែរ និងថៃ កើតឡើងដោយសារកងទ័ពថៃប្រើប្រាស់អាវុធមុនបាញ់មកលើកងទ័ពខ្មែរ ហើយបណ្តាលឱ្យកងទ័ពខ្មែរបាត់បង់ជីវិតម្នាក់ ប៉ុន្តែកងទ័ពថៃបែរជាថា ពួកគេគ្រាន់តែការពារខ្លួន និងការពារអធិបតេយ្យជាតិ ដោយសារកងទ័ពខ្មែរចូលក្នុងទឹកដីខ្លួន ។ រីឯពលរដ្ឋថៃមួយចំនួនបានប្រឹងបំភ្លៃព័ត៌មាន ឬផ្សព្វផ្សាយព័ត៌មានក្លែងក្លាយពាក់ព័ន្ធនឹងស្ថានការណ៍ព្រំដែនកម្ពុជា-ថៃ ធ្វើឱ្យពលរដ្ឋថៃផ្សេងទៀតជឿជាក់លើព័ត៌មានក្លែងក្លាយ និងចែកចាយជាច្រើនក្នុងបណ្តាញសង្គម ។

ការចែកចាយព័ត៌មានក្លែងក្លាយ ឬបំប៉ោងស្ថានការណ៍ព្រំដែនរបស់ពួកជ្រុលនិយមថៃនេះ ធ្វើឱ្យពលរដ្ឋថៃផ្សេងទៀតយល់ច្រឡំមកពីលើកងទ័ពខ្មែរ និងពលរដ្ឋខ្មែរ ហើយពួកគេក៏មានគំនិតជាតិនិយមជ្រុល មានការរើសអើងជាតិសាសន៍ និងដាក់ស្លាកមុខហាងទំនិញមិនស្វាគមន៍ ឬមិនលក់ទំនិញឱ្យពលករខ្មែរធ្វើការនៅថៃ ។ ការរើសអើងបែបនេះ គឺដូចពេលកន្លងមកដែរ ពលរដ្ឋថៃធ្លាប់រើសអើងមិនលក់អាហារឱ្យពលករមីយ៉ាន់ម៉ាធ្វើការនៅថៃ និងធ្វើឱ្យពលករមីយ៉ាន់ម៉ាមិនពេញចិត្ត ។

ស្លាកសញ្ញានៅមុខហាងលក់ទំនិញសរសេរថា «ហាមខ្មែរចូលទិញទំនិញក្នុងហាងដាច់ខាត! ទីនេះ ប្រទេសថៃ» ។ ស្លាកសញ្ញាហាមឃាត់ត្រូវបានថតបង្ហោះចែកចាយពេញបណ្តាញសង្គមនៅប្រទេសថៃ ក្នុងនោះក៏មានហ្វេសប៊ុកផេករបស់ថៃមួយឈ្មោះ «World Forum ข่าวสารต่างประเทศ» ក៏បានចែកចាយស្លាកសញ្ញាហាមឃាត់ផងដែរ និងសរសេរថា អ្នកជិតខាងពិបាកយកចិត្ត ពលរដ្ឋខ្មែរក្នុងប្រទេសទើបតែនាំគ្នាឈប់ទិញទំនិញថៃ ។

ពលរដ្ឋថៃមានគំនិតជ្រុលនិយមបែបនេះ ដោយសារពួកគេជឿជាក់លើការផ្សព្វផ្សាយព័ត៌មានក្លែងក្លាយជាច្រើនក្នុងបណ្តាញសង្គម ដែលមានគំនិតអគតិមកលើប្រទេសជិតខាង ។ ទោះជាអ្នកដឹកនាំថៃអំពាវនាវឱ្យពលរដ្ឋឈប់បង្ហោះព័ត៌មានក្លែងក្លាយ ប៉ុន្តែនៅតែមានការបង្ហោះមិនឈប់ឈរ ។

គួរបញ្ជាក់ថា សមត្ថកិច្ចថៃមកពីនាយកដ្ឋានស៊ើបអង្កេតឧក្រិដ្ឋកម្មបច្ចេកវិទ្យាបានចា.ប់ខ្លួនស្ត្រីម្នាក់នៅខេត្តឧប៊ុនរ៉ាជថានី ពីករណីបង្ហោះព័ត៌មានក្លែងពាក់ព័ន្ធនឹងស្ថានការណ៍ព្រំដែនកម្ពុជា-ថៃ ដែលបង្កការភ័យស្លន់ស្លោ និងមានពលរដ្ឋថៃរាប់រយជឿជាក់លើព័ត៌មាននេះចុច Like យ៉ាងច្រើន ។ ជនល្មើសសារព័ត៌មានថា ខ្លួនមានគំនិតលម្អៀងពាក់ព័ន្ធនឹងជម្លោះព្រំដែន ៕

ប្រទេសថៃ ៖ ក្រសួងការបរទេសថៃបានជូនដំណឹងពីគម្រោងកាត់ផ្តាច់ចរន្តអគ្គិសនី និងសេវាអ៊ីនធើរណេតនៅតាមបណ្តោយព្រំដែនកម្ពុជា-ថៃ គឺថៃមានគោលបំណងបង្ក្រាបឧក្រិដ្ឋ.កម្មឆ្លងដែន ផ្តល់សុវត្ថិភាពដល់ពលរដ្ឋប្រទេសទាំងពីរ ទប់ស្កាត់ការជួញដូរមនុស្ស និងឧក្រិដ្ឋ.កម្មបច្ចេកវិទ្យា ហើយការកាត់ផ្តាច់នេះពុំពាក់ព័ន្ធនឹងលទ្ធផលកិច្ចប្រជុំគណៈកម្មការព្រំដែនរួម (JBC) ទេ ។ នេះបើតាមការចុះផ្សាយរបស់សារព័ត៌មានថៃ កាលពីថ្ងៃទី១១ ខែមិថុនា ឆ្នាំ២០២៥ ។

លោក និកាន់ឌេត ផ្លាំងគូន អ្នកនាំពាក្យក្រសួងការបរទេសថៃបញ្ជាក់ថា គម្រោងកាត់ផ្តាច់ចរន្តអគ្គិសនី និងអ៊ីនធើរណេតនៅតាមបណ្តោយព្រំដែនកម្ពុជា-ថៃ គឺថៃមានគោលបំណងការពារ និងបង្ក្រាបឧក្រិដ្ឋកម្មឆ្លងដែន ផ្តល់សុវត្ថិភាពដល់ពលរដ្ឋប្រទេសទាំងពីរ ទប់ស្កាត់ការជួញដូរមនុស្ស និងឧក្រិដ្ឋកម្មបច្ចេកវិទ្យា ។ កិច្ចប្រជុំក្រុមប្រឹក្សាសន្តិសុខជាតិនឹងពិចារណាពីវិធានការនេះបន្ថែមទៀត ហើយនេះពុំមែនជាវិធីសម្រាប់ថៃប្រើប្រាស់ដាក់សម្ពាធលើកិច្ចប្រជុំ JBC ឬរំពឹងលើលទ្ធផលកិច្ចចរចាទ្វេភាគីទេ ។

វាផ្ទុយពីការចុះផ្សាយរបស់សារព័ត៌មានប្រទេសទាំងពីរដែលថា ថៃកាត់ផ្តាច់អគ្គិសនី និងអ៊ីនធើរណេតនៅតាមព្រំដែនជាប់កម្ពុជា ដោយសារថៃចង់ដាក់សម្ពាធលើកិច្ចប្រជុំ JBC នាពេលឆាប់ៗនេះ ។ ដូច្នេះ ថៃសូមអំពាវនាវឱ្យកម្ពុជាជួយសហការប្រឆាំងនឹងការផ្សព្វផ្សាយព័ត៌មានមិនពិត ។

ប្រទេសថៃសូមបញ្ជាក់ពីគោលជំហរប្រើប្រាស់យន្តការទ្វេភាគីដែលមានស្រាប់ក្នុងការចរចាដោះស្រាយបញ្ហាព្រំដែនជាមួយកម្ពុជា ជាពិសេស កិច្ចប្រជុំគណៈកម្មការព្រំដែនរួម (JBC) នាថ្ងៃទី១៤ ខែមិថុនា ខណៈការចរចារវាងអង្គភាពកងទ័ពក្នុងតំបន់នៅតែបន្ត ។ ថៃធ្លាប់ពីបានបញ្ជាក់ជាច្រើនលើកហើយនាពេលកន្លងមក គឺថៃប្រកាសពុំទទួលស្គាល់អំណាចយុត្តាធិការតុលាការយុត្តិធម៌អន្តរជាតិ (ICJ) តាំងពីឆ្នាំ១៩៦០ រហូតដល់បច្ចុប្បន្ន ។

ទោះជាពលរដ្ឋថៃភាគច្រើនគាំទ្រឱ្យកាត់ផ្តាច់អគ្គិសនី និងអ៊ីនធើរណេតនៅព្រំដែនកម្ពុជា ប៉ុន្តែមតិមួយចំនួនបារម្ភថា វិធានការផ្លាស់ប្តូរម៉ោងបើក-បិទទ្វារច្រកព្រំដែន និងការកាត់ផ្តាច់អគ្គិសនី-អ៊ីនធើរណេតនៅព្រំដែន គឺជាវិធានការដែលថៃរៀបចំឡើងទាំងអស់ដើម្បីចាត់ការរឿងព្រំដែន ។ ថៃយកបញ្ហាការផ្តាច់អគ្គិសនី-អ៊ីនធើរណេតមកពាក់ព័ន្ធអាចធ្វើឱ្យបញ្ហាព្រំដែនកាន់តែតានតឹងខ្លាំងឡើង ប៉ុន្តែក្រសួងការបរទេសថៃបដិសេធថា ការកាត់ផ្តាច់នេះពុំពាក់ព័ន្ធនឹងព្រំដែនទេ ។

ដោយឡែក រាជរដ្ឋាភិបាលកម្ពុជានៅតែប្រកាន់គោលជំហរយកបញ្ហាប្រាសាទតាមាន់ធំ ប្រាសាទតាមាន់តូច ប្រាសាទតាក្របី និងតំបន់មុំ៣ ទៅកាន់តុលាការយុត្តិធម៌អន្តរជាតិ (ICJ) ទោះជាថៃមានគម្រោងកាត់ផ្តាច់អគ្គិសនី និងសេវាអ៊ីនធើរណេតនៅព្រំដែនក្តី វានឹងពុំធ្វើឱ្យកម្ពុជាផ្លាស់ប្តូរគោលជំហរឡើយ ។

ឯកឧត្តម កែវ រតនៈ រដ្ឋមន្ត្រីក្រសួងរ៉ែ និងថាមពលកម្ពុជាមានប្រសាសន៍ថា ៖ «ម៉ោងនេះ កម្ពុជាពុំបានយកភ្លើងពីប្រទេសថៃចូលមកកាន់បណ្តាញជាតិរបស់កម្ពុជានោះទេ គឺសូន្យ ហើយពេលនេះ កម្ពុជាមានអគ្គិសនីប្រើប្រាស់គ្រប់គ្រាន់នៅទូទាំងប្រទេស» ៕

ប្រទេសថៃ ៖ លោក ម៉ារីស សាងៀមផុង រដ្ឋមន្ត្រីក្រសួងការបរទេសថៃនិយាយថា ថៃនឹងពុំព្រមបាត់បង់ទឹកដីសូម្បីតែបន្តិច បញ្ហាព្រំដែនកម្ពុជា-ថៃ គឺថៃប្រកាន់យកការចរចាទ្វេភាគីតាមរយៈកិច្ចប្រជុំគណៈកម្មការព្រំដែនរួម (JBC) នាថ្ងៃទី១៤ ខែមិថុនា ដើម្បីមានភាពច្បាស់លាស់លើខ្សែបន្ទាត់ព្រំដែន ។ ថៃពុំទទួលស្គាល់អំណាចយុត្តាធិការតុលាការយុត្តិធម៌អន្តរជាតិ (ICJ) តាំងពីឆ្នាំ១៩៦០ រហូតដល់បច្ចុប្បន្ន ។ នេះបើតាមការផ្សព្វផ្សាយរបស់សារព័ត៌មានថៃ Khaosod កាលពីថ្ងៃទី១១ ខែមិថុនា ឆ្នាំ២០២៥ ។

កាលពីថ្ងៃទី១១ ខែមិថុនា កន្លងមក នៅក្រសួងការបរទេសថៃ លោក ម៉ារីស សាងៀមផុង រដ្ឋមន្ត្រីក្រសួងការបរទេសបាននិយាយពីការចរចារវាងប្រទេសកម្ពុជា និងថៃ ក្នុងកិច្ចប្រជុំគណៈកម្មការព្រំដែនរួម (JBC) ថា លោកបានកំណត់គោលនយោបាយសំខាន់ៗចំនួន៣ចំណុច រួមមាន ៖

១-ថៃចង់ឱ្យមន្ត្រីតំណាងចូលរួមកិច្ចប្រជុំគណៈកម្មការព្រំដែនរួម (JBC) ភាគីថៃបញ្ជាក់ទៅកាន់កម្ពុជាថា ថៃបានដោះស្រាយបញ្ហានៅតំបន់ព្រំដែនដោយមានការចរចារវាងកងទ័ពដើម្បីកាត់បន្ថយការប្រឈមមុខគ្នាទាំងសងខាងមួយកម្រិត ហើយថៃចង់ឃើញតំបន់ព្រំដែនអាចរួមរស់ជាមួយគ្នាយ៉ាងមានសន្តិភាពជារៀងរហូត ។

២-ថៃចង់ឱ្យការចរចាគណៈកម្មការព្រំដែនរួម (JBC) នាថ្ងៃទី១៤ នេះមានភាពច្បាស់លាស់លើខ្សែបន្ទាត់ព្រំដែនដើម្បីឱ្យភាគីទាំងពីរយល់ច្បាស់រួមគ្នា និងឈានទៅរកការដោះស្រាយបញ្ហាព្រំដែនយូរអង្វែង ។

៣-ស្នើឱ្យប្រធានកិច្ចប្រជុំ JBC បញ្ជាក់ពីអធិបតេយ្យភាពរបស់ប្រទេស និងពុំព្រមឱ្យថៃបាត់បង់ទឹកដីសូម្បីតែបន្តិច ។ ក្នុងយន្តការចរចា ប្រទេសថៃពុំទទួលស្គាល់អំណាចយុត្តាធិការតុលាការយុត្តិធម៌អន្តរជាតិ (ICJ) តាំងពីឆ្នាំ១៩៦០ រហូតដល់បច្ចុប្បន្ន ។ យើងពុំទទួលស្គាល់អំណាចនេះដាច់ខាត ដោយនឹងប្រើប្រាស់ក្របខ័ណ្ឌពិភាក្សាប្រកបដោយប្រសិទ្ធភាព និងសមស្របបំផុត ។

លោក ម៉ារីស សាងៀមផុង បន្តថា តាំងពីមានបញ្ហាមក នាយករដ្ឋមន្ត្រីថៃ លោកស្រី ផេថងថាន ស៊ីណាវ៉ាត់ បានបញ្ជាឱ្យក្រសួងការបរទេសសហការជាមួយកម្ពុជា ហើយ ក្រសួងការពារជាតិ និងក្រសួងការបរទេសបានបង្ហាញគោលជំហររួមគ្នាដើម្បីដោះស្រាយបញ្ហាព្រំដែន ។ សូមឱ្យពលរដ្ឋមានទំនុកចិត្តថា កងទ័ពថៃអាចគ្រប់គ្រងតំបន់ព្រំដែន ។

ចំណែកកម្ពុជាដែលប្រកាន់យកគោលជំហរដោះស្រាយបញ្ហាព្រំដែននៅតុលាការយុត្តិធម៌អន្តរជាតិ (ICJ ) គឺលោក ម៉ារីស សាងៀមផុង យល់ថា ការដោះស្រាយបញ្ហារវាងប្រទេសពីរ សូម្បីតែនៅក្នុងក្របខ័ណ្ឌអង្គការសហប្រជាជាតិក៏ដោយ គឺនឹងធ្វើតាមយន្តការមានប្រសិទ្ធភាពសម្រាប់ការចរចាដោះស្រាយ រួមមាន ៖ គណៈកម្មការព្រំដែនរួម (JBC), គណៈកម្មការព្រំដែនទូទៅកម្ពុជា-ថៃ (GBC) និងគណៈកម្មការព្រំដែនតំបន់ (RBC) មិនមែនដោះស្រាយបញ្ហានៅតុលាការយុត្តិធម៌អន្តរជាតិទេ ៕