ប្រទេសថៃ ៖ នៅថ្ងៃទី១៩ ខែមិថុនា ឆ្នាំ២០២៥ សារព័ត៌មានថៃ Amarin News បានច្រានចោលការផ្សព្វផ្សាយព័ត៌មានមិនពិតថា នាយករដ្ឋមន្ត្រីថៃចុះហត្ថលេខាលាលែងពីតំណែងកាលពីម៉ោង១រំលងអធ្រាត្រ ឈានចូលថ្ងៃទី១៩ ខែមិថុនា ឆ្នាំ២០២៥ ហើយលិខិតផ្លូវការនឹងដាក់ចូលសភានៅម៉ោង៩ព្រឹកថ្ងៃទី១៩ ខែមិថុនា ។ ការពិត លោកស្រី ផេថងថាន ពុំទាន់លាលែងពីតំណែងនាយករដ្ឋមន្ត្រីទេ ប៉ុន្តែគណបក្សនយោបាយនានា ដូចជា គណបក្សថៃសាងថៃ និងគណបក្សផ្លាំងប្រាឆារ៉ាត់ បានចេញសេចក្តីថ្លែងការណ៍ជំរុញឱ្យលោកស្រីលាលែង ។

ក្រោយពីការបែកធ្លាយកិច្ចសន្ទនាតាមទូរស័ព្ទរបស់សម្តេចតេជោ ហ៊ុន សែន ប្រធានព្រឹទ្ធសភាកម្ពុជា ជាមួយលោកស្រី ផេថងថាន ស៊ីណាវ៉ាត់ នាយករដ្ឋមន្ត្រីថៃ និងជាប្រធានគណបក្សភឿថៃ ធ្វើឱ្យមានការជជែកគ្នាពីបញ្ហាព្រំដែនកម្ពុជា-ថៃក្នុងបណ្តាញសង្គមយ៉ាងច្រើន រហូតដល់អំពាវនាវឱ្យលោកស្រី ផេថងថាន ទទួលខុសត្រូវចំពោះទង្វើរបស់ខ្លួនដោយការលាលែងពីតំណែង ឬរំលាយសភាដើម្បីបោះឆ្នោតជាថ្មី ។

ដូចគ្នានេះ គណបក្សនយោបាយនានានៅប្រទេសបានចេញសេចក្តីថ្លែងការណ៍ជំរុញឱ្យលោកស្រី ផេថងថាន លាលែងពីតំណែង ដូចជា ៖ គណបក្សថៃសាងថៃ និងគណបក្សផ្លាំងប្រាឆារ៉ាត់ ខណៈគណបក្សចូលរួមជាមួយរដ្ឋាភិបាល គឺគណបក្សភូមិចៃថៃ ក៏បានប្រកាសដកខ្លួនពីរដ្ឋាភិបាលដែរ ។

កាលពីថ្ងៃទី១៨ ខែមិថុនា សារព័ត៌មាន Thairath រាយការណ៍ថា គណបក្សផ្លាំងប្រាឆារ៉ាត់ បានចេញសេចក្តីថ្លែងការណ៍ជំរុញឱ្យលោកស្រី ផេថងថាន លាលែងពីតំណែង ដោយសារលោកស្រីប្រមាថសេចក្តីថ្លៃថ្នូរសន្តិសុខជាតិ ។ លោក ប្រាវីត វង្សសុវណ្ណ ប្រធានគណបក្សផ្លាំងប្រាឆារ៉ាត់ បានចុះហត្ថលេខាលើសេចក្តីថ្លែងការណ៍ជំរុញឱ្យនាយករដ្ឋមន្ត្រីលាលែងដើម្បីទទួលខុសត្រូវនូវទង្វើរបស់ខ្លួនធ្វើឱ្យប៉ះពាល់សេចក្តីថ្លៃថ្នូរប្រទេស ហើយគណបក្សនេះប្រកាន់គោលជំហរគាំទ្រពលរដ្ឋ និងកងទ័ពថៃ ។

គណបក្សផ្លាំងប្រាឆារ៉ាត់បញ្ជាក់ក្នុងសេចក្តីថ្លែងការណ៍ថា បារម្ភចំពោះស្ថានការណ៍នយោបាយ និងសន្តិសុខជាតិដែលស្ថិតក្រោមការដឹកនាំរបស់លោកស្រី ផេថងថាន ដោយសារលោកស្រីបង្ហាញពីភាពទន់ជ្រាយ ខ្វួះបទពិសោធន៍ចរចា និងដោះស្រាយបញ្ហាជម្លោះព្រំដែនកម្ពុជា-ថៃ ។ វាធ្វើឱ្យពលរដ្ឋថៃបាត់បង់ទំនុកចិត្តក្នុងការដឹកនាំប្រទេស ដោយសារលោកស្រីចរចាផ្ទាល់ខ្លួនបង្កហានិភ័យដល់ប្រទេស រួមទាំងធ្វើឱ្យខូចកិត្តិយសដល់កងទ័ពថៃដែលការពារអធិបតេយ្យ ។ ហេតុនេះ នាយករដ្ឋមន្ត្រីថៃគួរលាលែងពីតំណែងដើម្បីបង្ហាញភាពទទួលខុសត្រូវ ។

កិច្ចការសន្តិសុខពុំងាយស្រួលទេ គឺទាមទារចំណេះដឹង និងការឈ្វេងយល់ឱ្យបានច្រើន ។ មេដឹកនាំប្រទេសគ្មានបទពិសោធន៍ នៅទីបំផុត ក៏បានបំផ្លាញទំនុកចិត្តពលរដ្ឋថៃ នាយករដ្ឋមន្ត្រីថៃបច្ចុប្បន្ន ដឹកនាំប្រទេសទៅរកការចាញ់ប្រៀប និងទន់ជ្រាយ ។ កងទ័ពថៃគ្រប់រូបនឹងបំពេញការងារដែលមានព្រះមហាក្សត្រជាប្រមុខ ទឹកដីថៃត្រូវតែជារបស់ពលរដ្ឋថៃ មិនព្រមឱ្យអ្នកណាមករុករានដាច់ខាត ។ នេះជាខ្លឹមសារក្នុងសេចក្តីថ្លែងការណ៍របស់គណបក្សផ្លាំងប្រឆារ៉ាត់ ៕

ប្រទេសថៃ ៖ សារព័ត៌មានថៃ Khaosod រាយការណ៍ថា នៅថ្ងៃទី១៩ ខែមិថុនា ឆ្នាំ២០២៥នេះ គណៈកម្មការព្រឹទ្ធសភាទទួលបន្ទុកកិច្ចការកងទ័ព និងសន្តិសុខរដ្ឋ នឹងដាក់សំណើដកលោកស្រី ផេថងថាន ស៊ីណាវ៉ាត់ ចេញពីតំណែងនាយករដ្ឋមន្ត្រីថៃ ក្រោយការបែកធ្លាយកិច្ចសន្ទនារវាងសម្តេចតេជោ ហ៊ុន សែន ប្រធានព្រឹទ្ធសភាកម្ពុជា ជាមួយលោកស្រី ផេថងថាន ស៊ីណាវ៉ាត់ ដោយសារគណៈកម្មការនេះយល់ឃើញថា ការលើកឡើងរបស់នាយករដ្ឋមន្ត្រីថៃប៉ះពាល់ដល់សន្តិសុខជាតិ ។ ព្រឹទ្ធសភាថៃនឹងពុំអនុញ្ញាតឱ្យបំផ្លាញកិត្តិយ.សប្រទេស និងកងទ័ពថៃ រួមទាំងប្រើប្រាស់យន្តការរដ្ឋធម្មនុញ្ញការពារប្រទេស ។

ដោយឡែក កាលពីថ្ងៃទី១៨ ខែមិថុនា គណបក្សថៃសាងថៃ បានចេញសេចក្តីថ្លែងការណ៍អំពាវនាវឱ្យគណបក្សនយោបាយដែលចូលរួមជាមួយរដ្ឋាភិបាល រួមគ្នាជំរុញឱ្យលោកស្រី ផេថងថាន ស៊ីណាវ៉ាត់ លាលែងពីតំណែងនាយករដ្ឋមន្ត្រីថៃ ដោយសារកិច្ចសន្ទនារវាងសម្តេចតេជោ ហ៊ុន សែន ប្រធានព្រឹទ្ធសភាកម្ពុជា ជាមួយលោកស្រី ផេថងថាន ធ្វើឱ្យប៉ះពាល់ប្រទេសជាតិ អធិបតេយ្យជាតិ រួមទាំងប៉ះពាល់កិត្តិយសកងទ័ពថៃ ។ គណបក្សថៃសាងថៃយល់ឃើញថា ការចុះចេញពីតំណែងរបស់លោកស្រី ផេថងថាន គឺជាការបង្ហាញពីអ្នកនយោបាយដ៏ល្អ ។

ក្នុងសេចក្តីថ្លែងការណ៍របស់គណបក្សថៃសាងថៃ បញ្ជាក់ថា កិច្ចសន្ទនារវាងសម្តេចតេជោ ហ៊ុន សែន ប្រធានព្រឹទ្ធសភាកម្ពុជា ជាមួយលោកស្រី ផេថងថាន ធ្វើឱ្យប៉ះពាល់ដល់ប្រទេសជាតិ ជាពិសេស ប៉ះពាល់អធិបតេយ្យជាតិ កិត្តិយសប្រទេស និងប៉ះពាល់កងទ័ពថៃ ។ លោកស្រី ផេថងថាន និយាយក្នុងកិច្ចសន្ទនាដែលបែកធ្លាយថា មេបញ្ជាការកងទ័ពភូមិភាគទី២ លោក ប៊ុនស៊ីន ផាកក្លាង គឺជាភាគីមានគំនិតផ្ទុយពីរដ្ឋាភិបាលថៃ ប៉ុន្តែគណបក្សថៃសាងថៃមើលឃើញថា កងទ័ពថៃបានបំពេញតួនាទីការពារអធិបតេយ្យយ៉ាងអស់ពីសមត្ថភាព ។

ប៉ុន្តែនាយករដ្ឋមន្ត្រីថៃបែរជាចោទប្រកាន់មេបញ្ជាការកងទ័ពភូមិភាគទី២ ថា ជាភាគីផ្ទុយពីរដ្ឋាភិបាល ដែលនេះបង្ហាញថា លោកស្រីខ្វះភាពជាអ្នកដឹកនាំប្រទេស និងខ្វះចំណេះដឹងផ្នែកនយោបាយ រហូតធ្វើឱ្យខូចខាតមុខមាត់ប្រទេសថៃយ៉ាងខ្លាំង ។ ហេតុនេះ គណបក្សថៃសាងថៃអំពាវនាវឱ្យលោកស្រី ផេថងថាន ត្រូវតែទទួលខុសត្រូវចំពោះនយោបាយដោយការលាលែងពីតំណែងនាយករដ្ឋមន្ត្រី ដើម្បីបង្ហាញថាលោកស្រីជាអ្នកនយោបាយដ៏ល្អ ។ ក្រៅពីនេះ លោកស្រីមិនត្រូវប្រើប្រាស់អំណាច ឬធ្វើអ្វីប៉ះពាល់ដល់សភាតំណាងរាស្ត្រ ឬមន្ត្រីរដ្ឋាភិបាល ឬបុគ្គលពាក់ព័ន្ធ ។

គណបក្សថៃសាងថៃ សូមអំពាវនាវឱ្យគណបក្សនយោបាយដែលចូលរួមជាមួយរដ្ឋាភិបាល ជំរុញឱ្យលោកស្រី ផេថងថាន បង្ហាញការទទួលខុសត្រូវចំពោះទង្វើរបស់ខ្លួនដោយការលាលែងពីតំណែងដើម្បីរក្សាកិត្តិយស និងផលប្រយោជន៍ជាតិ មិនមែនបម្រើផលប្រយោន៍ត្រកូលណាមួយ ឬបុគ្គលណាមួយ ៕

ប្រទេសថៃ ៖ នៅថ្ងៃទី១៩ ខែមិថុនា ឆ្នាំ២០២៥ សារព័ត៌មានថៃ Khaosod រាយការណ៍ថា នាយករដ្ឋមន្ត្រីថៃ លោកស្រី ផេថងថាន ស៊ីណាវ៉ាត់ បានកោះហៅលោក Phumtham Wechayachai ឧបនាយករដ្ឋមន្ត្រី និងរដ្ឋមន្ត្រីក្រសួងការពារជាតិ, អនុរដ្ឋមន្ត្រីក្រសួងការពារជាតិ លោក ណាតផុន ណាក់ផានិត ក្នុងឋានៈជាប្រធានគណៈកម្មការមជ្ឈមណ្ឌលគ្រប់គ្រងស្ថានការណ៍ព្រំដែនកម្ពុជា-ថៃ រួមទាំងតំណាងកងកម្លាំងប្រដាប់អាវុធ មកពីប្រជុំពិភាក្សានៅអគារថៃឃូហ្វា ពីការត្រៀមអនុវត្តវិធានការបន្ទាន់បិទព្រំដែនកម្ពុជា-ថៃ ។

កាលពីវេលាម៉ោង៩និង៣០នាទីព្រឹក ថ្ងៃទី១៩ ខែមិថុនានេះ លោកស្រី ផេថងថាន នាយករដ្ឋមន្ត្រីថៃ បានមកកាន់វិមានរដ្ឋាភិបាលដើម្បីបំពេញការងារ ស្របពេលគណបក្សនយោបាយនានាដាក់សម្ពាធឱ្យលោកស្រីលាលែងពីតំណែង ក៏ដូចជាការចេញខ្លួនចេញពីរដ្ឋាភិបាលរបស់គណបក្សភូមិចៃថៃ ក្រោយពីការបែកធ្លាយកិច្ចសន្ទនាតាមទូរស័ព្ទរបស់លោកស្រីជាមួយសម្តេច ហ៊ុន សែន ប្រធានព្រឹទ្ធសភាកម្ពុជា ។

លោកស្រី ផេថងថាន បានធ្វើដំណើរមកកាន់វិមានរដ្ឋាភិបាលតាមផ្លូវលូកហ្លួង ឆ្លងកាត់ស្ពានអ័រ៉ាថ័យ ដើម្បីគេចពីក្រុមអ្នកតវ៉ាដែលប្រមូលផ្តុំគ្នានៅបរិវេណគល់ស្ពានសាម័យមេរុឆេត និងផ្លូវពិស្នុលោក ។ ក្រុមអ្នកតវ៉ាបានប្រមូលផ្តុំដើម្បីអានសេចក្តីថ្លែងការណ៍អំពាវនាវឱ្យលោកស្រី ផេថងថាន ពិនិត្យមើលតួនាទីរបស់នាយករដ្ឋមន្ត្រីឡើងវិញ និងទាមទារឱ្យលោកស្រីលាលែងពីតំណែង ។

លោកស្រី ផេថងថាន បានប្រជុំពិភាក្សានៅអគារថៃឃូហ្វា ជាមួយមន្ត្រីពាក់ព័ន្ធជាច្រើន ដូចជា ៖ លោក Phumtham Wechayachai ឧបនាយករដ្ឋមន្ត្រី និងរដ្ឋមន្ត្រីក្រសួងការពារជាតិ, លោកឧត្តមសេនីយ៍ ឃ្លេវ ផ្លតថុក អគ្គមេបញ្ជាការកងទ័ពភូមិន្ទថៃ, អនុរដ្ឋមន្ត្រីក្រសួងការពារជាតិ លោក ណាតផុន ណាក់ផានិត ក្នុងឋានៈជាប្រធានគណៈកម្មការមជ្ឈមណ្ឌលគ្រប់គ្រងស្ថានការណ៍ព្រំដែនកម្ពុជា-ថៃ រួមទាំងតំណាងកងកម្លាំងប្រដាប់អាវុធ ។

ការប្រជុំគ្នាលើកនេះរបស់លោកស្រី ផេថងថាន នាយករដ្ឋមន្ត្រីថៃ គឺដើម្បីត្រៀមអនុវត្តវិធានការបន្ទាន់បិទព្រំដែនកម្ពុជា-ថៃ ។ ប៉ុន្តែពុំទាន់មានព័ត៌មានលម្អិតពីរឿងការបិទព្រំដែននៅឡើយទេ ថា តើថៃនឹងបិទព្រំដែនទាំងស្រុងឬក៏យ៉ាងណា ៕

ប្រទេសចិន ៖ មហាជនបានរិះគ.ន់ក្រុមហ៊ុនចិនដ៏ល្បីមួយនៅខេត្តក្វាងទុង ក្រោយពីកំណត់វិធានការប្លែកៗ គឺដាក់ទោ.សបុគ្គលិកណាដែលឆ្លុះកញ្ចក់, បរិភោគនំពេលកំពុងធ្វើការ និងដើរចេញពីតុធ្វើការ ដោយក្រុមហ៊ុននេះបញ្ជាក់ថា បើបុគ្គលិកពុំអនុវត្តតាមទេ អាចត្រូវកាត់ប្រាក់ខែ ឬបណ្តេញចេញពីការងារភ្លាមៗ ។

សារព័ត៌មានបរទេសរាយការណ៍ថា នាយកក្រុមហ៊ុនដ៏ល្បីមួយនៅខេត្តក្វាងទុង ត្រូវបានមហាជនរិះគន់ក្រោយពីបង្កើតវិធានការប្លែកៗ ដោយការកាត់ប្រាក់ខែបុគ្គលិកណាដែលឆ្លុះកញ្ចក់ និងបរិភោគនំពេលកំពុងធ្វើការ ។ ក្រុមហ៊ុននេះឈ្មោះ Man Wah Holdings Ltd ដែលផលិតសាឡុង កម្រាលពូក និងគ្រឿងសង្ហារិមឈើ ស្ថិតក្រោមការគ្រប់គ្រងរបស់លោក លីវ ។

កាលពីខែឧសភា ឆ្នាំ២០២៥ លោក លីវ បានប្រកាសទៅកាន់បុគ្គលិកពីវិធានការថ្មីដែលក្រុមហ៊ុនរឹតបន្តឹងយ៉ាងខ្លាំង ដូចជា ៖ ហាមបុគ្គលិកបរិភោគនំនៅកន្លែងធ្វើការ, បុគ្គលិកត្រូវតែធ្វើការលើសម៉ោង និងត្រូវស្កេនកាតចូល-ចេញពីធ្វើការ ចំនួន៦លើកក្នុង១ថ្ងៃ ។ បើបុគ្គលិកពុំអនុញ្ញាតតាមវិធានការនេះ ក្រុមហ៊ុននឹងផ្តល់លិខិតលាឈប់ពីការងារឱ្យបុគ្គលិក ។

នាយកក្រុមហ៊ុននិយាយថា ពេលនេះ ជាពេលផ្សព្វផ្សាយសំខាន់របស់ក្រុមហ៊ុន ប៉ុន្តែបុគ្គលិកខ្លះពុំអង្គុយនៅតុធ្វើការរបស់ខ្លួន បុគ្គលិកខ្លះនៅក្នុងបន្ទប់ទឹក ឆ្លុះកញ្ចក់ ឬរកហេតុផលមកអះអាងជាមួយក្រុមហ៊ុន ។ លើសពីនេះ បើក្រុមហ៊ុនដឹងថា បុគ្គលិកណាលេងហ្គាមពេលម៉ោងការងារ ក្រុមហ៊ុននឹងបណ្តេញចេញភ្លាមៗ ។

បុគ្គលិកបរិភោគនំនៅកន្លែងធ្វើការ នឹងត្រូវពិន័យប្រាក់ ហើយមិនលើកលែងសូម្បីមានតួនាទីជាអ្នកគ្រប់គ្រង គឺចាប់ពី៥០០យាន់ ទៅ២,០០០យាន់ (ឬពី៦៦ដុល្លារ ទៅ២៧២ដុល្លារ) ។ រីឯបុគ្គលិកក្រោកចេញពីតុធ្វើការដោយគ្មានមូលហេតុលើសពី៣ដង ក្រុមហ៊ុននឹងកាត់ប្រាក់ខែ ចំនួន២,០០០យាន់ (ស្មើ២៧២ដុល្លារ) ។

មេធាវីម្នាក់ឈ្មោះ Yao Kun ធ្វើការនៅក្រុមហ៊ុនច្បាប់ Kangda Law Firm និយាយថា ការពិន័យប្រាក់បុគ្គលិកដោយសារចូលបន្ទប់ទឹក ឬឆ្លុះកញ្ចក់ គឺជាវិធានការធ្ងន់ធ្ងរ និងខុសច្បាប់ ។

គួរបញ្ជាក់ថា ក្រុមហ៊ុន Man Wah Holdings Ltd បានបង្កើតឡើងកាលពីឆ្នាំ១៩៩២ ដែលមានទីស្នាក់ការធំនៅខេត្តក្វាងទុង ស្ថិតនៅភាគខាងត្បូងប្រទេសចិន ហើយក្រុមហ៊ុននេះមានបុគ្គលិករហូតដល់ជាង២៧,០០០នាក់ ៕