ក្រោយពីចូលរួម ជី ដេវីត ក្នុងកម្មវិធី «Solidarity March» តារាចម្រៀងរូបនេះក៏បាន បង្ហាញអារម្មណ៍មោទនភាពដែលកើតមកមានឈាមជ័រជាខ្មែរ និងបានលើកទឹកចិត្ត យ៉ាងពេញទំហឹងគាំទ្រដល់វីរៈកងទ័ពនៅតំបន់ជួរមុខក្នុងបុព្វហេតុការពារទឹកដី។ អ្វីដែលធ្វើឱ្យអ្នកគាំទ្រមានទាំងសរសើរផងនិងសើចផងបន្ទាប់ពីដឹងថាតារាចម្រៀងល្បីឈ្មោះ ជី ដេវីត និង ទេព បូព្រឹក្ស សុខចិត្តមិនគេងនោះទេព្រោះតែខ្លាចយឺតពេលសម្រាប់ ចូលរួមនេះ។
កាលពីម្សិលមិញនេះអ្នកគាំទ្ររួមទាំងអ្នកសិល្បៈមួយចំនួនគឺបានបង្ហាញរូបភាពរបស់តារាចម្រៀងដ៏ល្បីល្បាញគឺ ជី ដេវីត និង ទេព បូព្រឹក្ស សម្រាប់ចូលរួមព្រឹត្តិការណ សាមគ្គីជា ធ្លុង មួយក្នុងកម្មវិធី «Solidarity March» ជាមួយបងប្អូនប្រជាពលរដ្ឋគ្រប់មជ្ឈដ្ឋាន និងបងប្អូនសិល្បករដទៃទៀតដើម្បី បង្ហាញការរួមគ្នាជាធ្លុងមួយ គាំទ្ររាជរដ្ឋាភិបាល និងកងកម្លាំងជួរមុខកម្ពុជា ក្នុងគ្រាដែល កម្ពុជា-ថៃ មានជម្លោះតានតឹងនៅបណ្តោយ ព្រំដែន ដែលភាគីថៃជាអ្នកចាប់ផ្តើមបញ្ហាមុន។
ទន្ទឹមនឹងមានវត្តមានក្នុងកម្មវិធីខាងលើនេះជំទាវ ចន ច័ន្ទលក្ខិណា បានបង្ហើបពី ទេព បូព្រឹក្ស ខ្សឹបប្រាប់ខ្លួនថាមិនទាន់បានគេងនោះទេ ខណៈអតីតប្រធានសមាគមសិល្បករ រូបនេះបាននិយាយថា ខ្លួនដឹងថា បូព្រឹក្ស និង ដេវីត ឱ្យតែការងារត្រូវងើបពីងងឹត គឺសុខចិត្តអត់គេង។ នៅលើបណ្តាញសង្គមទិកតុកវិញក៏មានវីដេអូដែលតារាចម្រៀង ជី ដេវីត បានលាអ្នកគាំទ្ររបស់ខ្លួនត្រឡប់ទៅគេហដ្ឋានវិញហើយ លោកបាននិយាយ ច្បាស់ៗថាពុំទាន់បានគេងនោះទេដែលធ្វើឱ្យអ្នកគាំទ្រនៅទីនោះសើចលោកផងដែរ។
បន្ទាប់ពីចូលរួមក្នុងកម្មវិធី «Solidarity March» ជី ដេវីត បានបង្ហាញពីចំណាប់អារម្មណ៍ របស់ខ្លួននៅល្ងាចថ្ងៃទី១៨ មិថុនា ថា «ខ្ញុំ និង ភរិយា បានចូលរួមកម្មវិធីកាលពីព្រឹកមិញ នេះ ដោយស្មារតីជាតិ និង មោទនភាពជាតិយើងខ្ញុំរក្សាជំហរយ៉ាងពេញលេញក្នុងស្មារតី លើកទឹកចិត្ត និងគាំទ្រយ៉ាងពេញទំហឹងដល់បងៗកងទ័ពនៅតំបន់ទ័ពជួរមុខក្នុងបុព្វហេតុ ការពារជាតិមាតុភូមិ គ្រប់ប្រការមិនថាក្នុងលក្ខខណ្ឌសន្តិវិធីឬការប្រឈមដោយ សស្ត្រាវុធ»។
ជី ដេវីត ថា «ក្នុងតម្រាប្រវត្តិសាស្ត្រកម្ពុជាតែងតែគិតមុនគូរប្រកាន់ខ្ជាប់នូវការដឹកនាំ ប្រកបដោយ ទសពិធ រាជធម៌ ខ្ញុំមានមោទកភាពដែលបានចាប់កំណើតភ្ជាប់ដំណក់ ឈាមជាមួយដែនដីនេះ។ដោយសេចក្តីគោររពដ៏ខ្ពង់ខ្ពស់បំផុតពីខ្ញុំ ងួន ចាន់ ដាវីត និង ភរិយា ទេព បូព្រឹក្ស»។
គួរបញ្ជាក់ផងដែរថា កម្មវិធីដំណើរថ្មើរជើង «Solidarity March» មានបងប្អូនប្រជាពលរដ្ឋខ្មែរគ្រប់ទិសទី ប្រមាណជាង១៥ម៉ឺននាក់មកចូលរួម៕
