ប្រទេសថៃ ៖ កាលពីថ្ងៃទី២១ ខែមិថុនា ឆ្នាំ២០២៥ សារព័ត៌មានថៃរាយការណ៍ថា រដ្ឋមន្ត្រីក្រសួងពាណិជ្ជកម្មថៃ លោក ផិឆ័យ ណារីតថាផាន់ បានបញ្ជាទៅកាន់នាយកដ្ឋានពាណិជ្ជកម្មបរទេសឱ្យពង្រឹង និងរឹតបន្តឹងការនាំចូលដំឡូងមីពីប្រទេសកម្ពុជា ក្រោយពីស្ថានការណ៍ព្រំដែនកម្ពុជា-ថៃតានតឹង ។ លោកបានបញ្ជាក់ពីគោលជំហររបស់រដ្ឋាភិបាលថៃនឹងការពារកសិកររបស់ខ្លួន ដោយផ្តោតសំខាន់លើការកំណត់តម្លៃដំឡូងមីនៅប្រទេសថៃ ។

រដ្ឋមន្ត្រីក្រសួងពាណិជ្ជកម្មថៃ លោក ផិឆ័យ ណារីតថាផាន់ និយាយថា លោកបានបញ្ជាទៅកាន់នាយកដ្ឋានពាណិជ្ជកម្មបរទេស ដែលជាភ្នាក់ងារត្រួតពិនិត្យការនាំចូលដំឡូងមីឱ្យពង្រឹង និងរឹតបន្តឹងការនាំចូលដំឡូងមីកម្ពុជាតាមច្រកព្រំដែនកម្ពុជា-ថៃ ពីព្រោះវានឹងប៉ះពាល់ដល់តម្លៃដំឡូងមីរបស់កសិករថៃនាពេលបច្ចុប្បន្ន ។

ក្រសួងពាណិជ្ជកម្មថៃបានកំណត់វិធានការត្រួតពិនិត្យការនាំចូលដំឡូងមី ដោយកំណត់ទីតាំងអនុញ្ញាតឱ្យនាំចូលដំឡូងមីកម្ពុជាតាមច្រកព្រំដែនក្នុងខេត្តចំនួន៥ រួមមាន ៖ ខេត្តចាន់បុរី ស្រះកែវ ត្រាត សុរិន្ទ និងស៊ីសាកេត ។ ក្រសួងពាណិជ្ជកម្មបានកំណត់ឱ្យអ្នកនាំចូលដំឡូងមីត្រូវតែចុះបញ្ជី, ផ្តល់ទិន្នន័យការនាំចូលជាមុន និងមានកន្លែងស្តុកដំឡូងមីកម្ពុជាដាច់ដោយឡែកពីដំឡូងមីថៃ ហើយរាយការណ៍ព័ត៌មានទៅស្ថាប័នពាក់ព័ន្ធជានិច្ច ។

ក្រៅពីនេះ លោក ផិឆ័យ ក៏បានបញ្ជាឱ្យបង្កើនកម្លាំងមន្ត្រីនាយកដ្ឋានពាណិជ្ជកម្មបរទេសចុះពិនិត្យមើលដល់ព្រំដែនកម្ពុជា-ថៃ ចំនួន៦កន្លែង ដើម្បីពិនិត្យគុណភាពដំឡូងមីនាំចូល ។ បើរកឃើញថា ដំឡូងមីនាំចូលពុំត្រូវតាមលក្ខខណ្ឌកំណត់ គឺត្រូវផ្អាកការចុះបញ្ជីនាំចូលភ្លាមៗ រហូតដល់ដំឡូងមីបានបំពេញគ្រប់លក្ខខណ្ឌកំណត់ ។

ចំណែកនាយកដ្ឋានពាណិជ្ជកម្មផ្ទៃក្នុងនឹងមានវិធានការគ្រប់គ្រងការដឹកជញ្ជូនដំឡូងមីស្រស់ ដោយហាមឃាត់ការដឹកជញ្ជូនដំឡូងមីក្នុងបរិមាណចាប់ពី១ម៉ឺនគីឡូក្រាមឡើងទៅ គឺពុំអាចដឹកជញ្ជូនចេញ ឬចូលក្នុងទីតាំងគ្រប់គ្រងចំនួន៦០ស្រុក ស្ថិតក្នុង១៦ខេត្ត លើកលែងតែទីតាំងអនុញ្ញាត ។ បើល្មើសនឹងបម្រាមនេះ នឹងជាប់ពន្ធនាគាររយៈពេល៥ឆ្នាំ ឬពិន័យជាប្រាក់ចំនួន១សែនបាត ឬទាំងជាប់ពន្ធនាគារ និងពិន័យជាប្រាក់ ។

រដ្ឋមន្ត្រីក្រសួងពាណិជ្ជកម្មថៃបញ្ជាក់ថា បើទោះជាបច្ចុប្បន្ន ជិតដល់ចុងរដូវប្រមូលផលដំឡូងមីទាំងថៃ និងកម្ពុជា ប៉ុន្តែក្រសួងពាណិជ្ជកម្មថៃនឹងបន្តរឹតបន្តឹងការនាំចូលដំឡូងមីពីកម្ពុជា ដើម្បីកុំឱ្យប៉ះពាល់ដល់តម្លៃដំឡូងមីកសិករថៃ រួមទាំងលើកកម្ពស់គុណភាពដំឡូងមីថៃឈានទៅប្រកួតប្រជែងលើទីផ្សារពិភពលោក ៕

ប្រទេសអ៊ីរ៉ង់ ៖ តាមការផ្សព្វផ្សាយរបស់សារព័ត៌មានបរទេសកាលពីថ្ងៃទី២០ ខែមិថុនា ឆ្នាំ២០២៥ ឱ្យដឹងថា សង្គ្រាមរវាងប្រទេសអ៊ីស្រាអែល និងអ៊ីរ៉ង់កាន់តែធ្ងន់ធ្ងរខ្លាំងឡើង ហើយរដ្ឋាភិបាលអ៊ីរ៉ង់ប្រកាសយ៉ាងច្បាស់ពុំចូលរួមចរចានុយក្លេអ៊ែរ ពីព្រោះអ៊ីស្រាអែលនៅតែវាយប្រហារអ៊ីរ៉ង់ ។ អ៊ីរ៉ង់នឹងពុំចរចាដាច់ខាត បើទោះជាអាមេរិកព្យាយាមដាក់សម្ពាធឱ្យចរចាក្តី អ៊ីរ៉ង់បានវាយប្រហារអ៊ីស្រាអែលវិញរយៈពេល១សប្តាហ៍ហើយ ។

សង្គ្រាមនៅមជ្ឈិមបូព៌ារវាងអ៊ីស្រាអែល និងអ៊ីរ៉ង់ នៅតែកើតឡើងមិនឈប់ឈរ ក្រោយពីប្រទេសទាំងពីរវាយប្រហារគ្នាទៅវិញទៅមក ។ អ៊ីស្រាលអែលប្រកាសថា បានវាយប្រហារលើទីតាំងកងទ័ពអ៊ីរ៉ង់ ជាង១០កន្លែងត្រឹមតែរយៈពេល១យប់ រួមទាំងកំទេចរោងចក្រផលិតមីស៊ីល និងស្ថាប័នស្រាវជ្រាវពាក់ព័ន្ធគម្រោងនុយក្លេអ៊ែរនៅទីក្រុងតេហេរ៉ង់ រួមទាំងកំទេចទីតាំងកងទ័ពនៅភាគខាងលិច និងកណ្តាលរបស់អ៊ីរ៉ង់ ។

កាលពីថ្ងៃទី២០ ខែមិថុនា កងទ័ពអ៊ីរ៉ង់ក៏បានវាយប្រហារអ៊ីស្រាអែលវិញ ដោយការបាញ់មីស៊ីសពិសេសលើទីក្រុងបៀសេបា និងទីក្រុងជាច្រើននៅភាគខាងត្បូងអ៊ីស្រាអែល ដោយអ៊ីរ៉ង់បាញ់មីស៊ីលជាង២០គ្រាប់ បណ្តាលឱ្យមនុស្សរងរបួសជាច្រើន ។ កាំជ្រួចអ៊ីរ៉ង់បានវាយប្រហារលើមជ្ឈមណ្ឌលវេជ្ជសាស្ត្រនៅទីក្រុងបៀសេកា ដែលនេះជាការវាយប្រហារដ៏ធំមួយពីទីក្រុងតេអាវីស ហើយអ៊ីរ៉ង់ក៏បានវាយប្រហារទីតាំងជាច្រើនទៀតរបស់អ៊ីស្រាអែល ។

កងទ័ពអ៊ីរ៉ង់និយាយមកកាន់សារព័ត៌មានថា ពួកគេបានប្រើប្រាស់មីស៊ីលពិសេស និងចម្ងាយឆ្ងាយដើម្បីវាយប្រហារលើទីតាំងសំខាន់ៗរបស់អ៊ីស្រាអែល ដូចជា ៖ ទីតាំងកងទ័ព មជ្ឈមណ្ឌលត្រួតពិនិត្យ និងតំបន់ឧស្សាហកម្មការពារប្រទេស ។

ដោយឡែក សេតវិមានអាមេរិកប្រកាសថា លោកប្រធានាធិបតី Donald Trump បានអំពាវនាវឱ្យអ៊ីរ៉ង់ចុះចាញ់ដោយគ្មានលក្ខខណ្ឌ ហើយអាមេរិកនឹងរង់ចាំតាមដានស្ថានការណ៍ចំនួន២សប្តាហ៍ទៀត ។ បើចាំបាច់ អាមេរិកនឹងសម្រេចចិត្តបញ្ជូនកងទ័ពរបស់ខ្លួនទៅចូលរួមជាមួយអ៊ីស្រាអែលវាយប្រហារអ៊ីរ៉ង់ ។

រដ្ឋមន្ត្រីការបរទេសអ៊ីរ៉ង់ លោក Abbas Araghchi និយាយថា អ៊ីរ៉ង់គ្មានផ្លូវចរចាជាមួយអាមេរិកទេ លុះត្រាតែអ៊ីស្រាអែលឈប់ឈ្លានពានអ៊ីរ៉ង់ ហើយលោកបានធ្វើដំណើរទៅទីក្រុងហ្សឺណែវ ប្រទេសស្វីស ដើម្បីពិភាក្សាជាមួយរដ្ឋមន្ត្រីការបរទេសអឺរ៉ុប ។

អ៊ីរ៉ង់រីករាយនឹងពិភាក្សាពីការកំណត់ចម្រាញ់សារធាតុអ៊ុយរ៉ាញ៉ូម ប៉ុន្តែអ៊ីរ៉ង់នឹងបដិសេធសំណើទាំងអស់ដែលតម្រូវឱ្យអ៊ីរ៉ង់បញ្ឈប់ការចម្រាញ់អ៊ុយរ៉ាញ៉ូម ជាពិសេស ពេលអ៊ីស្រាអែលកំពុងវាយប្រហារបែបនេះ ។ នេះបើតាមមន្ត្រីជាន់ខ្ពស់អ៊ីរ៉ង់និយាយមកកាន់សារព័ត៌មាន Reuters ។

សង្គ្រាមរវាងអ៊ីស្រាអែល និងអ៊ីរ៉ង់កាន់តែធ្ងន់ធ្ងរ ដោយអ៊ីស្រាអែលអះអាងថា អ៊ីរ៉ង់ជិតទទួលបានជោគជ័យលើអាវុធនុយក្លេអ៊ែរ ខណៈអ៊ីរ៉ង់ថា គម្រោងនុយក្លេអ៊ែររបស់ខ្លួនមានគោលបំណងសន្តិភាពប៉ុណ្ណោះ ៕

ដូចយើងបានដឹងស្រាប់មកហើយថា ប្រទេសកម្ពុជាយើង និង ថៃមានការប្រាព្ធនូវពិធីច្រត់ព្រះនង្គ័លដូចគ្នា។ ក្នុងឆ្នាំ ២០២៥ នេះប្រទេសទាំងពីរបានប្រារព្ធពិធីនេះហើយរួចរាល់យ៉ាងឧឡារិករៀងៗខ្លួនកាលពីខែឧសភាកន្លងទៅ។ អ្វីដែលគួរឲ្យកត់សម្គាល់ខ្លាំងនោះ គឺឧសភរាជថៃ បានជ្រើសរើសបរិភោគស្មៅ និងផឹកស្រា ហើយលទ្ធផលនេះហោរាថៃបានទាយថាល្អ ដែលការទស្សន៍ទាយបែបនេះហាក់ផ្ទុយពីក្បួនតម្រាខ្មែរទាំងស្រុង។

ព្រះរាជពិធីច្រត់ព្រះនង្គ័ល នៅកម្ពុជាឆ្នាំ២០២៥ ដែលបានប្រារព្ធឡើងកាលពីថ្ងៃទី១៥ ខែឧសភា កន្លងទៅទទួលបានលទ្ធផលល្អប្រសើរជាប្រក្រតី ដោយឧសភរាជទាំងពីរបានជ្រើសរើសបរិភោគ ស្រូវ ពោត និងសណ្ដែក។ លទ្ធផលនេះត្រូវបានគេព្យាករណ៍ទុកថា សម្រាប់ឆ្នាំនេះទិន្នផលនៃដំណាំខាងលើនឹងទទួលបានផលខ្ពស់ និងដំណាំកសិកម្មផ្សេងទៀតក៏ទទួលបានផលល្អគួរសម ព្រមទាំងគ្មានជំងឺដង្កាត់ធ្ងន់ធ្ងរណាមួយកើតមានលើសត្វពាហនៈរបស់កសិករផងដែរ។

ផ្ទុយទៅវិញ បើយើងក្រឡេកទៅមើលលទ្ធផលរបស់ពិធីច្រត់ព្រះនង្គ័លនៅប្រទេសថៃ គឺឧសភរាជរបស់ថៃបានជ្រើសរើសស៊ីស្មៅ និងផឹកស្រា។ ទោះជាយ៉ាងណា លទ្ធផលនេះត្រូវបានហោរាថៃគុនគូរឃើញថា វាជារឿងល្អនោះទេ ហើយឆ្នាំនេះប្រទេសថៃនឹងទទួលបានផលល្អ សម្បូរសប្បាយ ទាំង្នែកកសិកម្ម និងការធ្វើពាណិជ្ជកម្មជាមួយបរទេស។

ក្នុងនោះ នៅក្នុងក្បួនទស្សន៍ទាយរបស់ថៃបានចារថា «គោស៊ីស្មៅ» ទំនាយទាយថា ការធ្វើកសិកម្មរបស់កសិករនឹងទទួលបានផលច្រើន ពិសេសលើដំណាំធុញ្ញជាតិ ផ្លែឈើ និងសាច់ ព្រមទាំងមានការផ្គត់ផ្គង់ទឹកបានច្រើនគួសមផងដែរ។ លើសពីនេះ «គោផឹកស្រា» បើតាមក្បួនច្បាប់គេព្យាករណ៍ថា ការដឹកជញ្ជូនទៅមកនឹងកាន់តែងាយស្រួល ជាពិសេសការធ្វើពាណិជ្ជកម្មជាមួយអន្តរជាតិនឹងប្រសើរឡើង ហើយសេដ្ឋកិច្ចនឹងរីកចម្រើន ដោយ«ស្រា» តំណាងឲ្យការជួបជុំជល់កែវអបអរ ការបង្កើតទំនាក់ទំនងពាណិជ្ជកម្ម និងការទូតជាមួយបណ្តារប្រទេសជាមិត្ត។

ទោះជាយ៉ាងណា បើក្រឡេកមើលលើក្បួនទស្សន៍ទាយរបស់ខ្មែរយើងពីដើមវិញ ប្រសិនបើ “គោស៊ីស្មៅ” នោះទំនាយទាយថា នឹងមានជំងឺអុតត្បាត អាសន្នរោគទាំងឡាយកើតលើសត្វពាហនៈដូចជា គោ ក្របី ជ្រូក សេះ ជាដើម។ ជាងនេះទៅទៀត ប្រសិនបើឧសភរាជ “ផឹកស្រា” នោះទំនាយទាយថា នឹងកើតមានភាពចលាចល បញ្ហាអសន្តិសុខ បញ្ហាទាស់ទែង កលិយុគ ឬសង្រ្គា.មកើតមាននៅក្នុងប្រទេសជាក់ជាមិនខាន។ ហេតុដូចនេះ ទើបចាស់បុរាណតែងមានការព្រួយបារម្ភប្រសិនបើឧសភរាជបរិភោកអាហារទាំងពីរមុខនេះ។

គួរជម្រាបថា បច្ចុប្បន្នបើគេសង្កេតឃើញមានរឿងហេតុជាច្រើនដែលបានកើតមាននៅក្នុងប្រទេសថៃ ហាក់ដូចជាត្រូវជាមួយនឹងការទស្សន៍ទាយដោយប្រើក្បួនតម្រារខ្មែរច្រើនជាង ក្នុងនោះរួមមានការកើតមានជំងឺ«អង់ដ្រាក់»លើសត្វគោ និងសត្វពាហនៈ, គ្រោះធម្មជាតិ, បញ្ហាអស្ថិរភាពនៅក្នុងប្រទេសដូចជា កើតមានជម្លោះជាមួយប្រទេសជិតខាង និងការរង្គោះរង្គើរផ្ទៃក្នុងនៃប្រទេសជាដើម។ ដូច្នេះតើអ្នកយល់ថាក្បួនទស្សន៍ទាយរវាងខ្មែរ និងថៃ មួយណាសមហេតុផល និងត្រឹមត្រូវជាង?

ប្រទេសម៉ាឡេស៊ី ៖ កាលពីថ្ងៃទី២០ ខែមិថុនា ឆ្នាំ២០២៥ សារព័ត៌មានបរទេសរាយការណ៍ថា ក្រសួងមហាផ្ទៃរបស់ម៉ាឡេស៊ីមានគម្រោងសាងសង់របងប្រវែង៤៥គីឡូម៉ែត្រ និងដំឡើងកាមេរ៉ានៅតាមបណ្តោយព្រំដែនម៉ាឡេស៊ី-ថៃ ស្ថិតនៅខេត្ត Kelantan ដើម្បីគ្រប់គ្រងការលួ.ចដឹកជញ្ជូនថ្នាំញៀន ទប់ស្កាត់បទល្មើសផ្សេងៗ និងការឆ្លងដែនខុសច្បាប់ ។

អនុរដ្ឋមន្ត្រីក្រសួងមហាផ្ទៃម៉ាឡេស៊ី លោក Shamsul Anuar Nasarah និយាយថា សុវត្ថិភាពនៅតំបន់ព្រំដែនជាអ្វីដែលរដ្ឋាភិបាលម៉ាឡេស៊ីផ្តល់ភាពសំខាន់ជាចម្បង ដោយសារព្រំដែនម៉ាឡេស៊ី-ថៃ គឺជាកន្លែងលួចដឹកជញ្ជូនថ្នាំញៀន និងប្រើប្រាស់គ្រឿងញៀនដែលតែងតែគំរាមកំហែងសន្តិសុខ ។ ហេតុនេះ ម៉ាឡេស៊ីនឹងគ្រប់គ្រងតំបន់ព្រំដែនជាប់ថៃឱ្យកាន់តែតឹងរ៉ឹង ។

យើងផ្តល់ភាពសំខាន់ខ្លាំងបំផុតលើការគ្រប់គ្រងតំបន់ព្រំដែន បើពុំគ្រប់គ្រងទេ វាមិនត្រឹមតែមានការដឹកជញ្ជូនថ្នាំញៀនប៉ុណ្ណោះទេ ប៉ុន្តែអាចកើតហេតុការណ៍មិនល្អផ្សេងៗ ។ នេះបើតាមលោក Shamsul Anuar Nasarah អនុរដ្ឋមន្ត្រីក្រសួងមហាផ្ទៃម៉ាឡេស៊ី ។

លោកបន្តថា ក្រសួងមហាផ្ទៃ និងភ្នាក់ងារសន្តិសុខ ដូចជា ៖ សមត្ថកិច្ច និងភ្នាក់ងារអនុវត្តច្បាប់ព្រំដែនបានត្រួតពិនិត្យព័ត៌មានដើម្បីកំណត់ទីតាំងដែលត្រូវគ្រប់គ្រងយ៉ាងតឹងរ៉ឹង រួមទាំងដំឡើងកាមេរ៉ាត្រួតពិនិត្យ និងសាងសង់រចនាសម្ព័ន្ធសុវត្ថិភាព ។ យើងយកគម្រោងទាំងអស់មកពិចារណា ដូចជា ៖ គម្រោងសាងសង់របង និងដំឡើងកាមេរ៉ានៅតាមបណ្តោយព្រំដែនម៉ាឡេស៊ី-ថៃ រួមទាំងការណែនាំពីបច្ចេកវិទ្យា ។

ម៉ាឡេស៊ីនឹងអនុវត្តគម្រោងទាំងនេះតាមតម្រូវការក្នុងតំបន់ ពីព្រោះវាមិនត្រឹមតែទប់ស្កាត់ការគំរាមកំហែងសន្តិសុខនៅព្រំដែនប៉ុណ្ណោះទេ គឺវានឹងទប់ស្កាត់បទល្មើសនៅទូទាំងប្រទេសផងដែរ ។ ចំណុចសំខាន់ត្រូវតែប្រាកដចិត្តថា ព្រំដែនម៉ាឡេស៊ីមានសុវត្ថិភាព អាចគ្រប់គ្រងបាន និងគ្មានការឆ្លងដែនខុសច្បាប់ ។

កាលពីថ្ងៃទី១១ ខែមិថុនា កន្លងមក មេបញ្ជាការប៉ូលិសនៅខេត្ត Kelantan រាយការណ៍ថា ការសាងសង់របងនៅខេត្ត Kelantan ដែលមានព្រំដែនជាប់ថៃ គឺជាវិធីដោះស្រាយបញ្ហាដ៏មានប្រសិទ្ធភាពបំផុតដើម្បីប្រឆាំងនឹងការលួចដឹកទំនិញខុសច្បាប់ ។ ព្រំដែនមានប្រវែង៤៥គីឡូម៉ែត្រ គឺធំទូលាយពេក ពិបាកគ្រប់គ្រងបទល្មើស ៕

តាមការផ្សព្វផ្សាយរបស់សារព័ត៌មានបរទេស កាលពីថ្ងៃទី២០ ខែមិថុនា ឆ្នាំ២០២៥ ឱ្យដឹងថា ប្រធានាធិបតីចិន លោក ស៊ី ជិនពីង និងប្រធានាធិបតីរុស្ស៊ី លោក វ៉្លាឌីមៀ ពូទីន បានបង្ហាញពីគោលជំហររួមគ្នាអំពាវនាវឱ្យភាគីទាំងអស់ ជាពិសេស អ៊ីស្រាអែលបញ្ឈប់ប្រតិបត្តិការកងទ័ពមកលើអ៊ីរ៉ង់ ពីព្រោះវាពុំអាចរកដំណោះស្រាយលើគម្រោងនុយក្លេអ៊ែរអ៊ីរ៉ង់ដោយការប្រើប្រាស់កម្លាំងកងទ័ពបានទេ ។

ការបង្ហាញគោលជំហររួមគ្នានេះកើតឡើងក្រោយពីការពិភាក្សាតាមទូរស័ព្ទរវាងមេដឹកនាំទាំង២រូប កាលពីថ្ងៃទី១៩ ខែមិថុនា ស្របពេលស្ថានការណ៍កាន់តែតានតឹងខ្លាំងបន្ទាប់ពីអ៊ីស្រាអែលបើកការវាយប្រហារលើគម្រោងនុយក្លែអ៊ែររបស់អ៊ីរ៉ង់ ហើយអ៊ីរ៉ង់ឆ្លើយតបវិញដោយបាញ់មីស៊ីលវាយប្រហារលើទីតាំងរបស់ពលរដ្ឋអ៊ីស្រាអែល ។

លោក ពូទីន និងលោក ស៊ី បានថ្កោលទោសយ៉ាងខ្លាំងចំពោះទង្វើរបស់អ៊ីស្រាអែល ដោយមេដឹកនាំទាំងពីររូបមើលឃើញថា នេះជាការល្មើសច្បាប់អង្គការសហប្រជាជាតិ និងច្បាប់អន្តរជាតិ ហើយដំណោះស្រាយវិបត្តិនេះត្រូវតែធ្វើតាមរយៈនយោបាយ និងការទូតប៉ុណ្ណោះ ។ មេដឹកនាំរុស្ស៊ីក៏បានសុំសម្រុះសម្រួលជម្លោះពាក់ព័ន្ធនឹងគម្រោងនុយក្លេអ៊ែររបស់អ៊ីរ៉ង់ដែលទទួលបានការគាំទ្រពីចិន ដោយមេដឹកនាំរុស្ស៊ីបញ្ជាក់ថា វិធីនេះអាចជួយកាត់បន្ថយភាពតានតឹងបាន ។ នេះបើតាមការលើកឡើងលោក Yuri Ushakov ទីប្រឹក្សាប្រធានាធិបតីរុស្ស៊ី ។

ប្រព័ន្ធផ្សព្វផ្សាយផ្លូវការរបស់ចិនរាយការណ៍ថា លោកប្រធានាធិបតី ស៊ី អំពាវនាវឱ្យប្រទេសមហាអំណាច (សហរដ្ឋអាមេរិក) ជួយកាត់បន្ថយស្ថានការណ៍តានតឹង និងដាស់តឿនថា ពិភពលោកពុំគួរបណ្តោយឱ្យសង្គ្រាមរាលដាលឈានទៅពិបាកគ្រប់គ្រង ។ គ្រប់ភាគី ជាពិសេស អ៊ីស្រាអែលគួរបញ្ឈប់ប្រតិបត្តិការកងទ័ពយ៉ាងឆាប់រហ័សបំផុតដើម្បីចៀសវាងការប៉ះទង្គិចដដែលៗ និងការពារមិនឱ្យមានផលប៉ះពាល់ឆ្លងព្រំដែន ។

ការអំពាវនាវឱ្យអ៊ីស្រាអែលកាត់បន្ថយអំពើហិង្សាលើអ៊ីរ៉ង់នេះ ស្របពេលទំនាក់ទំនងរវាងបណ្តាប្រទេសលោកខាងលិចមានភាពប្រេះស្រាំ ដោយលោក Yuri Ushakov ទីប្រឹក្សាប្រធានាធិបតីរុស្ស៊ីនិយាយថា មេដឹកនាំចិន និងរុស្ស៊ីបាននិយាយពីសង្គ្រាមក្នុងក្រុមប្រទេស G7 ដែលទើបរៀបចំនៅកាណាដា ។

បច្ចុប្បន្ន មានពលរដ្ឋរុស្ស៊ីជាង២០០នាក់ ធ្វើការក្នុងរោងចក្រថាមពលនុយក្លេអ៊ែរនៅអ៊ីរ៉ង់ ដែលរុស្ស៊ីជាអ្នកសាងសង់រោងចក្រនេះ ហើយមេដឹកនាំរុស្ស៊ីបានធ្វើកិច្ចព្រមព្រៀងជាមួយអ៊ីស្រាអែលដើម្បីផ្តល់សុវត្ថិភាពដល់ពលរដ្ឋរុស្ស៊ីធ្វើការក្នុងរោងចក្រ ។ មេដឹករុស្ស៊ីបានយល់ព្រមទំនាក់ទំនងយ៉ាងជិតស្និទ្ធជាមួយមេដឹកនាំចិនក្នុងស្ថានការណ៍តានតឹង និងត្រៀមជួបគ្នាម្តងទៀតក្នុងកិច្ចប្រជុំអង្គការសហប្រតិបត្តិការសៀងហៃ (SCO) នៅចិន នាខែសីហា ឆ្នាំ២០២៥ ៕