ការលើកឡើងរបស់តារាសម្តែងជើងចាស់អ្នកស្រី ច័ន្ទ តារាទី មិនចូលចិត្តចំពោះនរណាដែលហៅថា «ម៉ែៗ» បានបង្កឱ្យសាធារណជនបញ្ចេញមតិវែកញែកយ៉ាងខ្លាំង។ យ៉ាងណាមិនត្រឹមតែទស្សនិកជនប៉ុណ្ណោះទេអ្នកសិល្បៈមួយចំនួនក៏បានបញ្ចេញមតិប្រតិកម្មដូចគ្នានិងសម្តែងការមិនពេញចិត្តចំៗចំពោះតារាជើងចាស់រូបនេះតែម្តង។
អ្នកនាង ងិន ម៉ារ៉ាឌី បវរកញ្ញាចក្រវាលកម្ពុជាឆ្នាំ២០២១ បានចែករំលែកត្រង់សម្តីរបស់អ្នកស្រី ច័ន្ទ តារាទី ដែលសម្តែងការមិនពេញចិត្តរបស់ខ្លួនដោយនាងបានលើកឡើងយ៉ាងដូច្នេះថា « ខ្ញុំយល់ថាយើងមិនគួរហៅនរណាម្នាក់ថាម៉ែផ្តេសផ្តាសទេ ព្រោះម៉ែមានតែមួយ។ តែមនុស្សមួយចំនួនហៅមនុស្សដទៃដែលមានវ័យចាស់ជាងថាម៉ែក៏មិនខុសដែរ អាចមកពីគេគោរពនិងឱ្យតម្លៃលើបុគ្គលនោះ។ ម៉ារ៉ាឌី បានបន្ថែមទៀតថា «អ៊ំកុំចិត្តចង្អៀតពេកអី ដូចខ្ញុំអី នរណាដែលវ័យចាស់ជាងខ្ញុំ ខ្ញុំគោរពស្រឡាញ់ខ្ញុំហៅម៉ែហើយ តែមើលមនុស្សដែរ បើមនុស្សចាស់ខ្លះមិនល្អជាមួយខ្ញុំ មិនចូលចិត្តខ្ញុំ ចាសអរគុណសូម្បីមុខក៏ស្រីឌីមិនមើលផង មិនមែនចាស់ធ្វើអីក៏ត្រូវទេ»។
មិនត្រឹមតែ ងិន ម៉ារ៉ាឌី និយាយចំៗកុំឱ្យអ្នកស្រី ច័ន្ទ តារាទី មានចិត្តចង្អៀតចំពោះពាក្យថាម៉ែនេះ តារាចម្រៀង ទីងតុង និយាយលើកឡើងតែម្តងថាមិនហៅអ្វីទាំងអស់។
តារាចម្រៀង ទីងតុង បានលើកឡើងនៅលើបណ្តាញសង្គមថា «អ៊ីចឹងបានថា មិនមែនឱ្យតែមនុស្សចាស់ និយាយត្រូវរហូតទេ។ ចាស់ខ្លះ ស្អុយដែរ (មិនហៅអីទាំងអស់ មិន!)»។
គួរបញ្ជាក់ផងដែរថា អ្នកស្រី ច័ន្ទ តារាទី ដែលប្រឡូកអាជីពសិល្បៈ៤០ឆ្នាំមកហើយបាននិយាយនៅក្នុងកម្មវិធី សខ្មៅ ដែលបានចាក់ផ្សាយកាលពីយប់ថ្ងៃទី១៩ មិថុនា ថាអ្នកស្រី មនុស្សសម័យទម្លាប់អាក្រក់ឃើញនរណាក៏ហៅថា ម៉ែ ហៅថា អ្នកគ្រូ ហើយអ្នកស្រីមិនពេញចិត្តទេ។ ការមិនពេញចិត្តនេះអ្នកស្រីបានបញ្ជាក់មូលហេតុថា ការហៅម៉ែនេះដោយសារតែភាគច្រើនសម័យនេះ ម៉ែ គឺទៅជាម៉ែយ៉ែម៕
