ទូរទស្សន៍ Press TV របស់អ៊ីរ៉ង់បានចេញផ្សាយកាលពីថ្ងៃអាទិត្យនេះថា ក្រុមប្រឹក្សាសន្តិសុខជាតិកំពូលរបស់អ៊ីរ៉ង់ កំពុងសម្រេចចិត្តចុងក្រោយថា តើត្រូវបិទច្រកសមុទ្រ Hormuz ដែរឬទេ? បន្ទាប់ពីមានការវា.យឆ្មក់ដោយគ្រាប់បែ.ករបស់សហរដ្ឋអាមេរិក។ នេះបើយោងតាមការចុះផ្សាយរបស់សារព័ត៌មាន Reuters។

ប្រភពដដែលបានឲ្យដឹងថា រដ្ឋាភិបាលអ៊ីរ៉ង់បានប្រើប្រាស់ការគំរា.មកំហែងដោយការបិទច្រកសមុទ្រនេះជាយូរមកហើយ ដែលតាមរយៈការបិទនេះ គេរំពឹងថាប្រហែល 20% នៃតម្រូវការប្រេងឥន្ធនៈ និងឧស្ម័នសកល នឹងជួយទប់ស្កាត់ការជ្រៀតចូលពីសំណាក់លោកខាងលិច ដែលឥឡូវនេះឈានដល់កម្រិតធ្ងន់ធ្ងរបំផុត បន្ទាប់ពីការវា.យប្រហារត្រឹមពេលមួយយប់របស់សហរដ្ឋអាមេរិកទៅលើទីតាំងនុយក្លេអ៊ែររបស់អ៊ីរ៉ង់។

ដោយឡែក បើតាមសម្ដីរបស់សមាជិកនៃគណៈកម្មការសន្តិសុខជាតិរបស់សភា លោក Esmail Kosari នៅលើប្រព័ន្ធផ្សព្វផ្សាយអ៊ីរ៉ង់មួយទៀតបានឲ្យដឹងថា “សម្រាប់ពេលនេះ សភាអ៊ីរ៉ង់បានឈានដល់ការពិចារណាអំពីការដែលគួរបិទច្រកសមុទ្រ Hormuz ដែរឬទេ ប៉ុន្តែការសម្រេចចិត្តចុងក្រោយក្នុងរឿងនេះ គឺជាការទទួលខុសត្រូវរបស់ឧត្តមក្រុមប្រឹក្សាសន្តិសុខជាតិ”។

ចំណែកលោក Kosari ដែលជាមេបញ្ជាការឆ្មាំបដិវត្តន៍ផងដែរកាលពីថ្ងៃអាទិត្យបានប្រាប់ក្លឹបអ្នកកាសែតថា«ការបិទច្រកសមុទ្រ ត្រូវបានដាក់បញ្ចូលក្នុងរបៀបវារៈហើយ វានឹងត្រូវអនុវត្តនៅពេលណាដែលចាំបាច់បំផុត។»

គួរឲ្យដឹងថា ច្រកសមុទ្រនេះស្ថិតនៅចន្លោះរវាងប្រទេសអូម៉ង់ និងប្រទេសអ៊ីរ៉ង់ ហើយភ្ជាប់ឈូងសមុទ្រកណ្តាលភាគខាងជើងជាមួយឈូងសមុទ្រអូម៉ង់ទៅខាងត្បូង និងសមុទ្រអារ៉ាប់។ វាជាផ្លូវទឹកដ៏សំខាន់សម្រាប់ការផ្គត់ផ្គង់ប្រេងឥន្ធនៈរបស់ពិភពលោកពីមជ្ឈិមបូព៌ា។ ជាមួយគ្នានេះ មានការប៉ាន់ប្រមាណថា តម្លៃប្រេងនឹងកើនឡើងដល់ 120-130 ដុល្លារ/បារ៉ែល ប្រសិនបើច្រកសមុទ្រត្រូវបានបិទដោយសារតែភាពតានតឹងនៃសង្រ្គា.ម៕

ប្រទេសថៃ ៖ កាលពីថ្ងៃទី២២ ខែមិថុនា ឆ្នាំ២០២៥ សារព័ត៌មានថៃផ្សាយថា មានអាជីវករជនជាតិថៃម្នាក់តានតឹងផ្លូវចិត្តយ៉ាងខ្លាំងដោយសារពុំអាចនាំចេញផ្លែឈើមកលក់នៅប្រទេសកម្ពុជា ពីព្រោះស្ត្រីរូបនេះបានជំពាក់បំណុលគេយកប្រាក់មកទិញផ្លែឈើ ។ ក្រោយពីស្ថានការណ៍ព្រំដែនកម្ពុជា-ថៃតានតឹង ធ្វើឱ្យផ្លែឈើស្អុយរលួយអស់ គ្មានលទ្ធភាពសងបំណុល ក៏សម្រេចចិត្តបា.ញ់សម្លា.ប់ខ្លួនឯងនៅក្នុងផ្ទះតែម្តង ។

ក្រោយពីកងទ័ពថៃបានប្រើប្រាស់វិធានការបិទច្រកព្រំដែន និងកែប្រែពេលវេលានៃការបិទ-បើកច្រកព្រំដែនរវាងប្រទេសទាំងពីរជាឯកតោភាគី ធ្វើឱ្យអាជីវករថៃរងផលប៉ះពាល់យ៉ាងខ្លាំង ជាពិសេស អ្នករកស៊ីនាំចេញបន្លែ ផ្លែឈើមកកម្ពុជា ។ បើទោះជាអាជីវរថៃសំណូមពរទៅកាន់កងទ័ពឱ្យបើកព្រំដែនដូចមុនឡើងវិញ ដោយសារធ្វើឱ្យប៉ះពាល់ដល់ការរកស៊ី ហើយផ្លែឈើត្រូវស្អុយរលួយចោល ប៉ុន្តែកងទ័ពថៃនៅតែប្រកាន់គោលជំហរគ្រប់គ្រងព្រំដែនយ៉ាងតឹងរ៉ឹង ។ ហេតុនេះ ធ្វើឱ្យអាជីវករថៃម្នាក់សម្រេចចិត្តធ្វើអត្តឃាត ដោយសារគ្មានការអន្តរាគមន៍ពីរដ្ឋាភិបាលថៃរកបើកច្រកព្រំដែន ។

ការពិនិត្យក្នុងកាមេរ៉ាសុវត្ថិភាព គឺស្ត្រីឈ្មោះ ស៊ុ ណាត់នីដា បានបើករថយន្តតូចពណ៌ស ចូលក្នុងបរិវេណផ្ទះរបស់ខ្លួន រួចហើយ ស្ត្រីរូបនេះក៏ចុះពីរថយន្តដើរចូលក្នុងផ្ទះ ។ មិនយូរប៉ុន្មាន ស្រាប់តែឮស្នូរគ្រាប់កាំភ្លើង១គ្រាប់ ដែលធ្វើឱ្យក្រុមគ្រួសារភ្ញាក់ផ្អើលយ៉ាងខ្លាំងនឹងសំឡេងគ្រាប់កាំភ្លើង ហើយក៏ឃើញស្ត្រីរូបនេះស្លាប់ក្នុងបន្ទប់ទឹក ។

ប្អូនស្រីរបស់សាកសព រៀបរាប់ថា បងស្រីខ្លួនបានចាកចេញពីផ្ទះជាច្រើនថ្ងៃហើយ ទើបតែបើករថយន្តត្រឡប់មកផ្ទះវិញពេលល្ងាច ហើយក៏ធ្វើអត្តឃាតក្នុងបន្ទប់ទឹក ។ ពេលឮសំឡេងគ្រាប់កាំភ្លើង ខ្លួន និងឪពុកបានចូលទៅមើលក្នុងផ្ទះ ស្រាប់តែឃើញបងស្រីបាត់បង់ជីវិតក្នុងបន្ទប់ទឹក ។

លោក ណាត ជាស្វាមីសាកសព និយាយថា ភរិយាជាអ្នករកស៊ីចិញ្ចឹមគ្រួសារ ហើយជំពាក់បំណុលគេច្រើន យកប្លង់ផ្ទះទៅបញ្ចាំយកប្រាក់មករកស៊ី ហើយមកជួបបញ្ហាពុំអាចនាំចេញផ្លែឈើទៅកម្ពុជា ។ ហេតុនេះ ធ្វើឱ្យភរិយាពិបាកចិត្តខ្លាំង ភរិយាធ្លាប់ប្រាប់ថា ពុំចង់រស់នៅបន្តទៀតទេ ប៉ុន្តែខ្ញុំពុំនឹកស្មានថា នាងហ៊ានធ្វើបែបនេះ ពុំដឹងនាងបានកាំភ្លើងពីណាទេ ។

បើតាមសមត្ថកិច្ច គឺស្ត្រីរូបនេះឈ្មោះ ស៊ុ ណាត់នីដា អាយុ៣៩ឆ្នាំ បានបាញ់សម្លាប់ខ្លួននៅបន្ទប់ទឹកក្នុងផ្ទះខេត្តចាន់បុរី ដោយសារពិបាកចិត្តខ្លាំងរបស់ជំពាក់បំណុល ។ ក្រោយទទួលបានដំណឹងពីក្រុមគ្រួសារ សមត្ថកិច្ចក៏ចុះទៅកន្លែងកើតហេតុ និងបញ្ជូនសាកសពទៅពិនិត្យយ៉ាងលម្អិត មុនពេលប្រគល់សាកសពឱ្យក្រុមគ្រួសារធ្វើពិធីបុណ្យតាមប្រពៃណី ។

ការធ្វើអត្តឃាតរបស់ពលរដ្ឋថៃកើតឡើងដោយសារទង្វើរបស់ក្រុមជាតិនិយមជ្រុល និងកងទ័ពថៃដែលបានជំរុញឱ្យស្ថានការណ៍ឈានដល់កម្រិតនេះ ហើយមិនមែនមានតែពលរដ្ឋថៃម្នាក់ទេដែលជួបបញ្ហាវិបត្តិសេដ្ឋកិច្ច គឺនៅមានពលរដ្ឋថៃជាច្រើនទៀតជួបបញ្ហាបាត់បង់ចំណូលធ្ងន់ធ្ងរ ជាពិសេស ម្ចាស់ចម្ការ ឈ្មួញ និងអាជីវករថៃដែលរកស៊ីបោះដុំទំនិញមកកម្ពុជា ៕

ប្រទេសថៃ ៖ កាលពីថ្ងៃទី២២ ខែមិថុនា ឆ្នាំ២០២៥ សារព័ត៌មានថៃ TNN រាយការណ៍ថា មេបញ្ជាការកងទ័ពថៃ ភូមិភាគទី២ លោក ប៊ុនស៊ីន ផាកក្លាង នឹងត្រៀមបិទច្រកព្រំដែនកម្ពុជា-ថៃជាឯកតោភាគី ចំនួន២កន្លែងទៀត គឺច្រកទ្វារព្រំដែនអន្តរជាតិជាំ-សាងាំ (ខេត្តឧត្តរមានជ័យ-ខេត្តស៊ីសាកេត) និងច្រកទ្វារព្រំដែនអន្តរជាតិអូរស្មាច់-ឆងចម (ខេត្តឧត្តរមានជ័យ-ខេត្តសុរិន្ទ) បន្ទាប់ពីមេបញ្ជាការកងទ័ពរូបនេះទើបតែបញ្ជាឱ្យបិទច្រកដោះដូរទំនិញជប់គគីរ-សាយតាគូ (ខេត្តឧត្តរមានជ័យ-ខេត្តបុរីរាំ) កាលពីថ្ងៃទី២១ ខែមិថុនា ។

ក្នុងលិខិតបញ្ជាឱ្យបិទច្រកដោះដូរទំនិញជប់គគីរ-សាយតាគូ (ខេត្តឧត្តរមានជ័យ-ខេត្តបុរីរាំ) របស់លោក ប៊ុនស៊ីន ផាកក្លាង មេបញ្ជាការកងទ័ពភូមិភាគទី២ បញ្ជាក់ថា គឺដើម្បីសុវត្ថិភាពពលរដ្ឋថៃ ហើយកងទ័ពភូមិភាគទី២ និងកងកម្លាំងស៊ុណារី មានអំណាចគ្រប់គ្រងការបើក-បិទច្រកព្រំដែនទាំងអស់នៅតាមបណ្តោយព្រំដែនកម្ពុជា-ថៃ ។ ការបិទព្រំដែននេះ គឺកងទ័ពថៃមានគោលបំណងការពារអធិបតេយ្យ បូរណភាពទឹកដី រក្សាសុវត្ថិភាព ការពារជីវិត និងទ្រព្យសម្បត្តិរបស់ពលរដ្ឋថៃ ។

មេបញ្ជាការកងទ័ពភូមិភាគទី២ លោក ប៊ុនស៊ីន ផាកក្លាង ឱ្យដឹងថា ការបិទច្រកព្រំដែនទាំង៣កន្លែង រួមមាន ៖ ១-ច្រកដោះដូរទំនិញជប់គគីរ-សាយតាគូ ២-ច្រកទ្វារព្រំដែនអន្តរជាតិជាំ-សាងាំ និង៣-ច្រកទ្វារព្រំដែនអន្តរជាតិអូរស្មាច់-ឆងចម គឺស្ថិតក្រោមការគ្រប់គ្រងរបស់កងកម្លាំងស៊ុណារី ដែលចាត់វិធានការឆ្លើយតបនឹងស្ថានការណ៍តានតឹងនៅតាមបណ្តោយព្រំដែនកម្ពុជា-ថៃ ដើម្បីរក្សាភាពស្ងប់ស្ងាត់ និងផ្តល់សុវត្ថិភាពដល់ពលរដ្ឋក្នុងតំបន់ ។

ក្រោយពីមេបញ្ជាការកងទ័ពថៃ លោក ប៊ុនស៊ីន ផាកក្លាង បញ្ជាឱ្យបិទច្រកដោះដូរទំនិញជប់គគីរ-សាយតាគូ (ខេត្តឧត្តរមានជ័យ-ខេត្តបុរីរាំ) កាលពីយប់ថ្ងៃទី២១ ខែមិថុនា សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃព្រះរាជាណាចក្រកម្ពុជា បានឯកភាពឱ្យឯកឧត្តមអភិបាលនៃគណៈអភិបាលខេត្តឧតុ្តរមានជ័យ សម្រេចបិទច្រកជប់គគីរ-សាយតាគូ ស្ថិតនៅស្រុកបន្ទាយអំពិល ខេត្តឧត្តរមានជ័យ ជាអចិន្ត្រៃយ៍វិញដែរចាប់ពីថ្ងៃទី២១ ខែមិថុនា តទៅ ។

បន្ថែមពីលើច្រកជប់គគីរនេះ សម្តេចមហាបវរធិបតី ហ៊ុន ម៉ាណែត ក៏បានបញ្ជាឱ្យឯកឧត្តមអភិបាលខេត្តបិទច្រកមួយទៀតតែម្តង គឺច្រកទ្វារព្រំដែនជាំ ស្ថិតនៅស្រុកអន្លង់វែង ខេត្តឧត្តរមានជ័យ (ឬច្រកសាងាំ ខេត្តស៊ីសាកេត) ចាប់ពីថ្ងៃទី២១ ខែមិថុនា តទៅ ។ សម្តេចបញ្ជាក់ថា ចាប់ពីថ្ងៃទី៧ ខែមិថុនា ឆ្នាំ២០២៥ កងទ័ពថៃបានប្រើប្រាស់វិធានការបិទច្រកព្រំដែន និងកែប្រែពេលវេលានៃការបិទ-បើកច្រកព្រំដែនរវាងប្រទេសទាំងពីរជាឯកតោភាគី ដោយពុំបានគិតពីផលប៉ះពាល់ដល់ការធ្វើដំណើរឆ្លងកាត់របស់ពលរដ្ឋប្រទេសទាំងពីរឡើយ ។

កម្ពុជាមិនដែលមានបំណងចង់បង្កការលំបាកដល់ពលរដ្ឋនៃប្រទេសទាំងពីរដែលរស់នៅ ឬធ្វើដំណើរឆ្លងកាត់ច្រកព្រំដែននោះទេ ។ ប៉ុន្តែបើកងទ័ពថៃនៅបន្តប្រើវិធីបែបនេះដើម្បីដាក់គំនាបមកលើកម្ពុជានោះ គឺកម្ពុជាកំដរបានគ្រប់ពេលវេលា ។

គួរបញ្ជាក់ថា ការបិទច្រកព្រំដែនកម្ពុជា-ថៃពីសំណាក់កងទ័ពថៃដែលមានអំណាចជាងរដ្ឋាភិបាល បានធ្វើឱ្យការលក់ដូរនៅតាមព្រំដែន និងការឆ្លងដែនរបស់ពលរដ្ឋប្រទេសទាំងពីរជួបការលំបាក ជាពិសេស ពលរដ្ឋថៃ និងអាជីវករថៃ ដែលពឹងផ្អែកលើប្រាក់ចំណូលពីការលក់ដូរនៅព្រំដែន ។ ពលរដ្ឋថៃបានសំណូមពរឱ្យនាយករដ្ឋមន្ត្រីថៃ លោកស្រី ផេថងថាន ស៊ីណាវ៉ាត់ ដោះស្រាយស្ថានការណ៍តានតឹងព្រំដែនឱ្យបានឆាប់រហ័ស ៕

ប្រទេសថៃ ៖ ក្រោយពីគណបក្សប្រឆាំងមួយរបស់ថៃផ្តល់យោបល់ទៅរដ្ឋាភិបាលរបស់ខ្លួនឱ្យឈប់លក់ប្រេងឥន្ធនៈឱ្យកម្ពុជាដើម្បីឱ្យកម្ពុជាចុះចាញ់ ហើយសម្តេចតេជោ ហ៊ុន សែន ប្រធានព្រឹទ្ធសភាកម្ពុជាបានបញ្ជាក់ទៅវិញថា កម្ពុជាមិនស្លា.ប់ដោយសារមិននាំប្រេងពីថៃទេ ប៉ុន្តែអ្នកស្លា.ប់ គឺក្រុមហ៊ុនថៃ PTT ។ ក្រោយមក សារព័ត៌មានថៃផ្សាយថា ពេលនេះ កម្ពុជាខ្វះខាតប្រេង ហើយតម្លៃប្រេងឡើងថ្លៃ ធ្វើឱ្យពលរដ្ឋខ្មែរនៅទីក្រុងប៉ោយប៉ែតសម្រុកទៅចាក់ប្រេងនៅថៃ ដែលធ្វើឱ្យស្ថានីយប្រេងថៃអះអាងថា គ្មានពលរដ្ឋខ្មែរណាម្នាក់មកចាក់ប្រេងនៅថៃដូចការផ្សាយរបស់សារព័ត៌មានថៃទេ ។

កាលពីថ្ងៃទី២១ ខែមិថុនា ឆ្នាំ២០២៥ សារព័ត៌មានថៃ Khaosod រាយការណ៍ថា ស្ថានីយប្រេងនៅខេត្តស្រះកែវ ប្រទេសថៃ បញ្ជាក់ថា គ្មានពលរដ្ឋខ្មែរនាំគ្នាសម្រុកមកចាក់ប្រេងនៅថៃដូចការផ្សព្វផ្សាយរបស់សារព័ត៌មានថៃទេ ហើយអ្នកដែលចាក់ប្រេង គឺមានតែមានពលរដ្ឋថៃប៉ុណ្ណោះ ។ នាយកសមាគមធុរកិច្ចទេសចរណ៍ប្រចាំខេត្តស្រះកែវ បានត្រួតពិនិត្យស្ថានការណ៍រួចហើយ គឺនៅទីក្រុងប៉ោយប៉ែត មានប្រេងប្រើប្រាស់គ្រប់គ្រាន់ ពុំខ្វះខាតឡើយ ។

ថ្មីៗនេះ សារព័ត៌មានមួយចំនួនរបស់ថៃផ្សាយថា ពលរដ្ឋខ្មែររស់នៅទីក្រុងប៉ោយប៉ែត ប្រទេសកម្ពុជា បាននាំគ្នាសម្រុកមកចាក់ប្រេងម៉ូតូ និងរថយន្តនៅថៃ ក្រោយពីកម្ពុជាខ្វះខាតប្រេង និងតម្លៃប្រេងខ្ពស់ជាងថៃ ។ កាលពីថ្ងៃទី២១ ខែមិថុនា នាយកសមាគមធុរកិច្ចទេសចរណ៍ខេត្តស្រះកែវ បានត្រួតពិនិត្យនៅតាមស្ថានីយលក់ប្រេងស្រុកអារញ្ញប្រាថេត និងទទួលបានព័ត៌មានពីស្ថានីយចាក់ប្រេងថៃថា មានអតិថិជនមកចាក់ប្រេងធម្មតា ប៉ុន្តែសុទ្ធតែជាអតិថិជនថៃទាំងអស់ គ្មានអតិថិជនខ្មែរមកបន្តកន្ទុយគ្នាចាក់ប្រេងនៅថៃទេ ។

បុគ្គលិកធ្វើការក្នុងស្ថានីយចាក់ប្រេងថៃនិយាយថា មានអតិថិជនថៃមកចាក់ប្រេងនៅស្ថានីយតាមធម្មតា គ្មានអតិថិជនខ្មែរឡើយ ។ រីឯសារព័ត៌មានថៃបង្ហោះរូបភាពពលរដ្ឋខ្មែរជាច្រើននាក់សម្រុកមកចាក់ប្រេងនៅថៃនោះ គឺជារូបភាពពលរដ្ឋខ្មែរឆ្លងដែនមកលក់ដូរនៅផ្សាររុងក្លឿង ។

លោកស្រី រ៉ាទ្រី ស៊ែងរុងរឿង នាយកសមាគមធុរកិច្ចទេសចរណ៍ប្រចាំខេត្តស្រះកែវ បានឃើញសារព័ត៌មាននានារបស់ថៃផ្សព្វផ្សាយពីទីក្រុងប៉ោយប៉ែតខ្វះខាតប្រេង ហើយអាជីវកម្មលក់ប្រេងនៅប៉ោយប៉ែតបិទលែងដំណើរការ ទើបលោកស្រីសាកសួរទៅកាន់ក្រុមហ៊ុនប្រេងនៅកម្ពុជាថា តើការផ្សព្វផ្សាយរបស់សារព័ត៌មានថៃជាការពិតដែរឬទេ? ក្រុមហ៊ុនប្រេងនៅកម្ពុជាប្រាប់ថា កម្ពុជាពុំបានខ្វះខាតប្រេងឡើយ នេះជាព័ត៌មានមិនពិត ៕

ប្រជាជននៅទូទាំងប្រទេសអ៊ីរ៉ង់កំពុងរស់នៅក្នុងភាពភ័យខ្លាច និងច្របូកច្របល់ បន្ទាប់ពីសហរដ្ឋអាមេរិកបានធ្វើការវាយប្រហារតាមអាកាស ទៅលើទីតាំងនុយក្លេអ៊ែរសំខាន់ៗមួយចំនួនរបស់ប្រទេសអ៊ីរ៉ង់។ ការវាយប្រហារបានវាយលុកលើទីតាំងសំខាន់ៗនៅក្នុងក្រុង Fordow, Natanz និង Isfahan ដែលជាចំណុចកណ្តាលនៃការផលិតនុយក្លេអ៊ែររបស់អ៊ីរ៉ង់ កាលពីថ្ងៃទី ២២ ខែ មិថុនា ម្សិលមិញនេះ។

ប្រជាជនអ៊ីរ៉ង់ជាច្រើនបានប្រាប់ក្រុមអ្នកសារព័ត៌មាន BBC ថាពួកគេមានការភ្ញាក់ផ្អើល និងមិនបានត្រៀមខ្លួនឡើយ ព្រោះពួកគេមិនបានទទួលបានការព្រមានណាមូយមុនពេលការបំ ផ្ទុះនោះទេ។ អ្នកខ្លះបាននិយាយថាពួកគេមានអារម្មណ៍ថា “ជាប់គាំង” ហើយមិនដឹងថាត្រូវធ្វើអ្វី។ មនុស្សម្នាក់ទៀតបាននិយាយថា៖ «យើងត្រូវបានគេតាមដានជានិច្ច។ “ជារៀងរាល់ថ្ងៃនាំមកនូវការភ័យខ្លាចកាន់តែច្រើន” ។

ចាប់តាំងពីមានការវាយប្រហារមក សង្កាត់ជាច្រើនបានជួបប្រទះនឹងការដាច់ភ្លើង និងការបិទអ៊ីនធឺណិត កាត់ផ្តាច់ទំនាក់ទំនង និងធ្វើឱ្យមនុស្សមានអារម្មណ៍ឯកោកាន់តែខ្លាំង។ ក្រុមគ្រួសារកំពុងស្នាក់នៅក្នុងផ្ទះដោយមានព័ត៌មានតិចតួចបំផុតអំពីអ្វីដែលកំពុងកើតឡើង។ លើសពីនេះ ប្រជាជនក៏ជួបការលំបាកជាមួយនឹងការខ្វះខាតស្បៀងអាហារ ថ្នាំពេទ្យ និងប្រេងឥន្ធនៈជាដើម។ ហើយ ការវាយប្រហារនេះ បានធ្វើឱ្យជីវិតដែលតែងតែលំបាកស្រាប់ ឲ្យកាន់តែយ៉ាប់យ៉ឺនថែមទៀត។

ខណៈពេលដែលអ្នកខ្លះបន្ទោសសហរដ្ឋអាមេរិកចំពោះការវាយប្រហារនេះ ប្រជាជនអ៊ីរ៉ង់ជាច្រើនក៏ខឹងសម្បារចំពោះរដ្ឋាភិបាលរបស់ពួកគេផងដែរ ដោយនិយាយថា រដ្ឋាភិបាលមិនបានការពារពួកគេ ឬប្រាប់ការពិតនោះទេ។ បុរសម្នាក់បាននិយាយថា “មេដឹកនាំរបស់យើងបន្តនិយាយថាអ្វីៗគឺល្អ ប៉ុន្តែយើងមើលមិនឃើញបែបនោះទេ យើងជាអ្នករងទុក្ខ”។ ទន្ទឹមនឹងនោះ ក៏មានការព្រួយបារម្ភយ៉ាងខ្លាំងថា ការវាយប្រហារពីបរទេសកាន់តែច្រើនអាចនាំឱ្យមានបញ្ហាកាន់តែច្រើនសម្រាប់ប្រជាជនអ៊ីរ៉ង់។ អ្នកខ្លះបារម្ភថា រដ្ឋាភិបាលអាចនឹងឆ្លើយតបដោយការបង្រ្កាបសេរីភាពកាន់តែខ្លាំង ឬកាន់តែឈ្លានពានចំពោះអ្នកក្រៅ។

គួររំលឹកថា ការវាយ.ប្រហារនេះបានកើតឡើងនៅព្រឹកព្រលឹមថ្ងៃទី ២២ ខែមិថុនា សំដៅលើទីតាំងចម្រាញ់សារធាតុអ៊ុយរ៉ាញ៉ូមក្រោមដីរបស់អ៊ីរ៉ង់នៅ Fordow, Natanz និង Isfahan ។ ប្រតិបត្តិការនេះត្រូវបានគេរាយការណ៍ថាមានឈ្មោះកូដថា “Midnight Hammer” ពាក់ព័ន្ធនឹងការប្រើប្រាស់យន្តហោះទម្លាក់គ្រាប់បែកបំបាំងកាយ B-2 ដែលហោះហើរមិនឈប់ពីរដ្ឋ Missouri និងបានទម្លាក់គ្រាប់បែកបំបាំងកាយ GBU-57 ដែលនីមួយៗមានទម្ងន់ប្រហែល ៣០,០០០ ផោន។ កាំជ្រួច Tomahawk ក៏ត្រូវបានបាញ់ចេញពីនាវាមុជទឹករបស់សហរដ្ឋអាមេរិក ដែលមានទីតាំងនៅក្នុងដែនទឹកក្បែរនោះផងដែរ។ សរុបមក មានយន្តហោះអាមេរិកជាង ១២៥ គ្រឿងបានចូលរួមក្នុងបេសកកម្មនេះ រួមទាំងយន្តហោះជំនួយសម្រាប់ការចាក់ប្រេង និងស៊ើបការណ៍។

ពេលនេះមនុស្សជាច្រើនបាននិយាយថា ពួកគេគ្រាន់តែព្យាយាមរក្សាសុវត្ថិភាពនិងរស់រានមានជីវិតប៉ុណ្ណោះ។ ប៉ុន្តែដោយគ្មានផែនការច្បាស់លាស់ គ្មានចម្លើយ និងគ្មានការគ្រប់គ្រងឡើយ មនុស្សជាច្រើននិយាយថាអនាគតរបស់ពួកគេមានភាពមិនច្បាស់លាស់ច្រើនជាងពេលណាៗទាំងអស់៕

ប្រទេសថៃ ៖ សារព័ត៌មានថៃ Khaosod រាយការណ៍ថា កាលពីថ្ងៃទី២២ ខែមិថុនា ឆ្នាំ២០២៥ ក្រសួងការបរទេសថៃបានចេញសេចក្តីប្រកាសហាមឃាត់ពលរដ្ឋថៃធ្វើដំណើរមកប្រទេសកម្ពុជា ប្រសិនបើគ្មានភាពចាំបាច់ ។ រីឯពលរដ្ឋថៃរស់នៅកម្ពុជា ត្រូវអនុវត្តតាមការណែនាំរបស់ស្ថានទូត និងស្ថានអគ្គកុងស៊ុលថៃប្រចាំកម្ពុជាដើម្បីសុវត្ថិភាព ចៀសវាងធ្វើដំណើរទៅកាន់ទីប្រជុំជន និងតាមដានស្ថានការណ៍ជានិច្ច ។

ស្របពេលមានស្ថានការណ៍តានតឹងកើតឡើងរវាងប្រទេសកម្ពុជា និងថៃ ក្រសួងការបរទេសថៃបានចេញសេចក្តីប្រកាសហាមពលរដ្ឋថៃធ្វើដំណើរមកកម្ពុជា ប្រសិនបើពុំចាំបាច់ដើម្បីសុវត្ថិភាព ខណៈពលរដ្ឋថៃរស់នៅកម្ពុជា សូមឱ្យបង្កើនការប្រុងប្រយ័ត្នក្នុងការរស់នៅប្រចាំថ្ងៃ និងចៀសវាងធ្វើដំណើរទៅទីប្រជុំជន ឬកន្លែងប្រឈមផ្សេងៗ ។ ក្រៅពីនេះ ពលរដ្ឋថៃត្រូវតាមដានស្ថានការណ៍ជានិច្ច និងអនុវត្តតាមការណែនាំរបស់ស្ថានទូត និងស្ថានអគ្គកុងស៊ុលថៃ ។

ប្រសិនបើពលរដ្ឋថៃរស់នៅប្រទេសកម្ពុជា ត្រូវការជំនួយ ឬមានហេតុការណ៍បន្ទាន់ ពលរដ្ឋថៃអាចទាក់ទងទៅកាន់ស្ថានទូតថៃនៅរាជធានីភ្នំពេញតាមរយៈលេខទូរស័ព្ទ ឬទូរស័ព្ទទៅកាន់ស្ថានអគ្គកុងស៊ុលថៃនៅខេត្តសៀមរាប ឬទូរស័ព្ទទៅកាន់នាយកដ្ឋានកិច្ចការកុងស៊ុលរយៈពេល២៤ម៉ោង ឬទាក់ទងតាមរយៈកម្មវិធីអនឡាញ Thai Consular ។

ការហាមឃាត់ពលរដ្ឋថៃចូលមកកម្ពុជានេះ ក្រោយពីស្ថានការណ៍ព្រំដែនរវាងកម្ពុជា និងថៃនៅតែតានតឹង ដោយសារថៃដាក់គំនាប និងកំណត់វិធានការផ្សេងៗមកលើកម្ពុជា ក្នុងគោលបំណងឱ្យកម្ពុជាដកពាក្យបណ្តឹងពីតុលាការយុត្តិធម៌អន្តរជាតិ (ICJ) និងងាកមកចរចាទ្វេភាគីជាមួយថៃដោះស្រាយបញ្ហាប្រាសាទតាមាន់ធំ ប្រាសាទតាមាន់តូច ប្រាសាទតាក្របី និងតំបន់មុំបី ។

ប៉ុន្តែសម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីកម្ពុជាបញ្ជាក់ថា កម្ពុជាមិនមែនជាអ្នកចាប់ផ្តើមបញ្ហានេះទេ ។ ហេតុដូច្នេះ កម្ពុជាក៏មិនត្រូវជាអ្នកដែលបញ្ចប់បញ្ហានេះមុនដែរ ។ រឿងដែលកើតឡើងដោយឯកតោភាគី ត្រូវបញ្ចប់ដោយឯកតោភាគី មិនមានការចាំបាច់ចរចាគ្នានោះទេ ។ អ្នកណាចាប់ផ្តើមមុន អ្នកនោះបញ្ចប់មុនទៅជាការស្រេច ៕