ក្នុងការតំណាងឱ្យសិល្បករកម្ពុជាចូលរួមនៅក្នុងកម្មវិធី Round Festival តារាចម្រៀង ទេព បូព្រឹក្ស ពិតជាមិនធ្វើឱ្យអ្នកគាំទ្រខកចិត្តនោះទេដោយតារាចម្រៀងរូបនេះបានបង្ហាញវប្បធម៌ខ្មែរដ៏ល្អផូរផង់គួរជាទីមោទនៈ។
ថ្មីៗនេះតារាចម្រៀង ទេព បូព្រឹក្ស បានធ្វើឱ្យបណ្តាញសង្គមមានភាពរំជើបរំជួលយ៉ាងខ្លាំងបន្ទាប់ពីបង្ហាញខ្លួនជាតារាចម្រៀងតំណាងឱ្យកម្ពុជាចូលរួមក្នុងកម្មវិធី Round Festival នៅឯប្រទេសម៉ាឡេស៊ី ដែលកម្មវិធីនេះមានការចាក់ផ្សាយនៅលើប្រព័ន្ធផ្សព្វផ្សាយដ៏ធំគឺ KBS World ដែលមានអ្នកតាមដានជាង២០លាននាក់នៅលើឆាណែលយូធូប។ ការចូលរួមនេះ ទេព បូព្រឹក្ស គឺបានសម្តែងខុសប្លែកពីសិល្បករដទៃទៀតដោយបានបង្ហាញការសម្តែង តាមបែបសហសម័យ។ 
តាមការចែករំលែកនៅលើបណ្តាញសង្គម ទេព បូព្រឹក្ស បានសម្តែងដូចជាបទ «វីរៈនារី» «Drama Queen» រួមទាំងបទ «ទេវរាជ»។ ទស្សនីយភាពដែលបង្ហាញគឺពិតជាមានតម្លៃណាស់ព្រោះតារាចម្រៀងរូបនេះបានបង្ហាញពីសិល្បៈវប្បធម៌ខ្មែរដ៏ល្អផូរផង់បង្ហាញទៅកាន់ពិភពលោកតាមរយៈស្នាដៃតន្រ្តីក្លាយជាការសម្តែងបែបសហសម័យដ៏ជក់ចិត្តនិងត្រជាក់ភ្នែកមានទាំងល្ខោនខោល របាំអប្សរា ក្បាច់គុនល្បុកតោខ្មែរជាដើម។
បន្ទាប់ពីឃើញការសម្តែងរបស់ ទេព បូព្រឹក្ស អ្នកគាំទ្រជាច្រើនរួមទាំងអ្នកសិល្បៈមួយចំនួនបានសម្តែងការកោតសរសើរទៅកាន់តារាចម្រៀងរូបនេះដែលតំណាងឱ្យសិល្បករកម្ពុជាហើយបានបង្ហាញពីវប្បធម៌ខ្មែរនៅលើឆាកអន្តរជាតិ ខណៈតាមការឱ្យដឹងពីអ្នកជិតស្និទ្ធរបស់តារាចម្រៀងរូបនេះគឺការសម្តែងរបស់ ទេព បូព្រឹក្ស គឺមានការចូលរួមដល់ទៅជាង៣០នាក់ទៅកាន់ប្រទេសម៉ាឡេស៊ី។ 
ក្នុងដំណើរដ៏សំខាន់និងប្រកបដោយភាពជោគជ័យរបស់ ទេព បូព្រឹក្ស គឺ ជី ដេវីត ដែលជាស្វាមីបានដើរតួយ៉ាងសំខាន់នៅពីក្រោយខ្នងភរិយាជាហេតុធ្វើឱ្យទស្សនិកជនជាច្រើនកោតសរសើរប្តីប្រពន្ធមួយគូនេះ៕
