រាធានីភ្នំពេញ ៖ ក្រសួងការពារជាតិកម្ពុជា បានធ្វើការច្រានចោលយ៉ាងដាច់អហង្ការចំពោះការអះអាងដែលផ្ទុយពីការពិតរបស់អ្នកនាំពាក្យកងទ័ពជើងគោកថៃ ជុំវិញករណីទាហានថៃនាំអ្នកជិះកង់ជនជាតិថៃចំនួន ១៥០នាក់ ឡើងប្រាសាទតាមាន់ធំ និងដោយមិនបានជូនដំណឹងកម្ពុជាជាមុន កាលពីព្រឹកថ្ងៃទី២២ ខែមិថុនា ឆ្នាំ២០២៥ ទាំងដែលទីតាំងខាងលើ គឺស្ថិតនៅក្នុងទឹកដីកម្ពុជា ហើយការធ្វើបែបនេះបាននាំឲ្យប៉ះពាល់ដល់ការជឿទុកចិត្តគ្នាទៅវិញទៅមក នឹងគំរាមកំហែងដល់ស្ថិរភាពក្នុងតំបន់ជាខ្លាំង។

ជាមួយគ្នានេះ ដើម្បីជាភាពច្បាស់លាស់ និងការពិតចំពោះឧប្បត្តិហេតុនេះ កងយោធពលខេមរភូមិន្ទ នៃព្រះរាជាណាចក្រកម្ពុជា សូមធ្វើការបញ្ជាក់ចំនួន ៤ចំណុចដូចតទៅ៖

ទីមួយ៖ ការអះអាងរបស់អ្នកនាំពាក្យកងទ័ពជើងគោកថៃ ដែលថាខ្លួនបានជូនដំណឹងដល់កងទ័ពកម្ពុជាអំពីការមកទស្សនារបស់អ្នកជិះកង់ជនជាតិថៃចំនួន១៥០នាក់នៅប្រាសាទតាមាន់ធំ គឺជារឿងមិនពិត។ កងទ័ពកម្ពុជាពុំបានទទួលការជូនដំណឹងពីភាគីថៃ មិនថាជាពាក្យសម្តី ឬតាមរយៈទំនាក់ទំនងផ្លូវការ អំពីការមកទស្សនាប្រាសាទរបស់ក្រុមអ្នកជិះកង់ជនជាតិថៃទាំងនេះទេ។ ប្រសិនបើកងទ័ពថៃពិតជាមានភាពស្អាតស្អំ និងគ្មានចេតនាមិនល្អនោះទេ គួរតែធ្វើសកម្មភាពប្រកបដោយតម្លាភាព និងស្របតាមកិច្ចព្រមព្រៀងនៃប្រទេសទាំងពីរ ដែលបញ្ជាក់យ៉ាងច្បាស់ពាក់ព័ន្ធនឹងពេលវេលា និងលក្ខខណ្ឌនៃការចេញចូលប្រាសាទ។

ទីពីរ៖ ពេលសង្កេតឃើញការមកទស្សនាដោយគ្មានការអនុញ្ញាត ពីសំណាក់អ្នកជិះកង់ជនជាតិថៃទាំងនេះ កងទ័ពកម្ពុជាបានឆ្លើយតបដោយសមរម្យ មានសុជីវធម៌ និងប្រកបដោយវិជ្ជាជីវៈខ្ពស់។ កងទ័ពកម្ពុជាបានរំឭកកងទ័ពថៃថា ការមកទស្សនាដោយគ្មានការឯកភាពគ្នាជាមុននេះ គឺជាការបំពានលើកិច្ចព្រមព្រៀងហើយបានជំរុញឱ្យភាគីថៃគោរពលក្ខខណ្ឌទាំងនេះឱ្យបានខ្ជាប់ខ្ជួន និងម៉ឺងម៉ាត់។ ទោះបីជាមានការបំពានដូចបានរៀបរាប់ខាងលើក៏ដោយ កងទ័ពកម្ពុជាបានអនុញ្ញាតឱ្យពួកគេថតរូប និងចាកចេញពីតំបន់នោះដោយសន្តិវិធី ដែលនេះបង្ហាញឱ្យឃើញពីការអត់ធ្មត់ ការទទួលខុសត្រូវ និងបំណងប្រាថ្នាដ៏ស្មោះស្ម័គ្ររបស់កងទ័ពកម្ពុជា ក្នុងការជៀសវាងកុំឱ្យមានភាពតានតឹងដោយមិនចាំបាច់។

ទីបី៖ ការអះអាងរបស់អ្នកនាំពាក្យកងទ័ពជើងគោកថៃថា បញ្ហាខាងលើនេះអាចបណ្តាលមកពីការយល់ច្រឡំក្នុងទំនាក់ទំនងផ្ទៃក្នុងរវាងកងទ័ពកម្ពុជា និងរាជរដ្ឋាភិបាលរបស់ខ្លួន ការលើកឡើងបែបនេះ គឺជាទង្វើដែលគ្មានការទទួលខុសត្រូវបំផុត ប្រាសចាកពីក្រមសីលធម៌វិជ្ជាជីវៈរបស់ខ្លួនក្នុងនាមជាអ្នកនាំពាក្យ ដែលមានតួនាទីត្រូវផ្តល់ការពិត និងផ្អែកលើភស្តុតាង។ ការចោទប្រកាន់បែបនេះ គឺជាចេតនាបិទបាំងកំហុសឆ្គងរបស់កងទ័ពថៃ ដែលបានល្មើសលើកិច្ចព្រមព្រៀង ហើយមិនហ៊ានទទួលខុសត្រូវ បែរជាមកចោទប្រកាន់កងទ័ពកម្ពុជា ក្នុងចេតនាបំភ័ន្តការពិតជាមួយប្រជាជនខ្លួន។ ក្នុងន័យនេះ រាជរដ្ឋាភិបាល កងទ័ព និងប្រជាជន នៃព្រះរាជាណាចក្រកម្ពុជា គឺរួមគ្នាតែមួយក្នុងការប្តេជ្ញាចិត្តការពារបូរណភាពទឹកដីទោះក្នុងតម្លៃណាក៏ដោយ។

ទីបួន៖ កងយោធពលខេមរភូមិន្ទ នៃព្រះរាជាណាចក្រកម្ពុជា សូមបញ្ជាក់ជាថ្មីថា តាមផែនទីមាត្រដ្ឋាន ១:២០០.០០០ ស្របតាមស្មារតីនៃអនុសញ្ញាបារាំងសៀមឆ្នាំ១៩០៤ និងសន្ធិសញ្ញាបារាំង-សៀម ១៩០៧ ប្រាសាទតាមាន់ធំ គឺជាដែនអធិបតេយ្យរបស់កម្ពុជា ដែលជាការពិតមិនអាចក្រឡាស់បាន។ កម្ពុជាអំពាវនាវឱ្យភាគីថៃគោរពតាមកិច្ចព្រមព្រៀងដែលមានស្រាប់ ឱ្យបានពេញលេញ និងម៉ឺងម៉ាត់ ប្រកបដោយភាពស្មោះត្រង់ ព្រមទាំងជៀសវាងរាល់សកម្មភាពបំភ័ន្តការពិត ដែលអាចបំផ្លាញទំនុកចិត្ត និងការជឿជាក់គ្នាទៅវិញទៅមក។ កងយោធពលខេមរភូមិន្ទ នៃព្រះរាជាណាចក្រកម្ពុជា ប្តេជ្ញាចិត្តក្នុងការរក្សា និងលើកកម្ពស់សន្តិភាព ស្ថិរភាព និងទំនាក់ទំនងមិត្តជិតខាងល្អ ប៉ុន្តែនឹងមិនអនុញ្ញាតឱ្យប្រទេសណាមួយមកឈ្លានពានបានជាដាច់ខាត៕

ថៃ ៖ ក្រុមហ៊ុន OR ដែលជាមេរបស់ក្រុមហ៊ុន PTT ប្រចាំនៅប្រទេសថៃបានបញ្ជាក់ថា បើទោះបីជាមានការហាមឃា.ត់នាំចូលប្រេងឥន្ធនៈពីថៃមកលក់នៅកម្ពុជាក៏ពិតមែន ប៉ុន្តែវានឹងមិនប៉ះពាល់ដល់ប្រាក់ចំណូលរបស់ OR ច្រើនទេ ព្រោះនៅក្នុងប្រទេសកម្ពុជាមានស្ថានីយ៍ PTT តិចតួចប៉ុណ្ណោះ បោះធៀបទៅនឹងប្រទេសថៃ។

យោងតាមការចុះផ្សាយរបស់សារព័ត៌មានថៃ Khaosod កាលពីថ្ងៃអាទិត្យ ទី២២ មិថុនា បានឲ្យដឹងថា ដោយសារកម្ពុជាបានហាមឃាត់ការនាំចូលប្រេងឥន្ធនៈរបស់ក្រុមហ៊ុន OR ដើម្បីលក់ក្នុងប្រទេស នោះ OR នឹងលក់ប្រេងដែលនៅសល់ទាំងអស់នៅក្នុងធុងសាំងរបស់ស្ថានីយ៍ប្រេងនីមួយៗរហូតដល់អស់ ដើម្បីតាមដានស្ថានភាព។

ជាមួយគ្នានេះ លោក Pirapan Salirathavibhaga រដ្ឋមន្រ្តីក្រសួងរ៉ែ និង ថាមពលរបស់ប្រទេសថៃ បានបញ្ជាក់ថា ៖ ការណ៍នេះនឹងមិនប៉ះពាល់ដល់ប្រាក់ចំណូលរបស់ក្រុមហ៊ុន OR ច្រើនទេ ព្រោះមានស្ថានីយ៍ប្រេងតែ 186 និង ហាងកាហ្វេ«អាម៉ាហ្សូន»ចំនួន 254 សាខាប៉ុណ្ណោះនៅក្នុងប្រទេសកម្ពុជា បើធៀបនឹងស្ថានីយ៍ប្រេង OR ចំនួនជាង 2,000 នៅក្នុងប្រទេសថៃ។

លើសពីនេះ ក្រសួងពាណិជ្ជកម្មថៃធ្លាប់បានរាយការណ៍ពីតម្លៃពាណិជ្ជកម្មតាមព្រំដែនរវាងថៃ និងកម្ពុជាក្នុងរយៈពេល៤ខែនៃដើមឆ្នាំនេះ ពោលចាប់ពីខែមករា ដល់ខែមេសា ឆ្នាំ២០២៥ ថៃបាននាំចេញប្រេងចម្រាញ់មកកម្ពុជាសរុបមានតម្លៃ២០,០១១លានបាត (ប្រហែល 540.3 លានដុល្លារអាមេរិក)។

ដោយឡែកនាពេលថ្មីៗនេះ ក្រសួងថាមពលក៏បានទទួលរបាយការណ៍ថា លោក Pirapan បានពិភាក្សាជាមួយនាយកប្រតិបត្តិ និងស្ថាប័នពាក់ព័ន្ធទាក់ទងនឹងការផ្អាកការនាំចូលប្រេងពីប្រទេសថៃ។ ដោយគេរំពឹងថា នឹងមានវឌ្ឍនភាពនិងព័ត៌មានលម្អិតបន្ថែមទៀតនឹងចេញផ្សាយនៅថ្ងៃចន្ទ ទី២៣ មិថុនា ២០២៥ ជាបន្តទៀត៕

ថៃ ៖ នាយកប្រតិបត្តិរបស់ក្រុមហ៊ុនចំនួន 100 បង្ហាញការអំពាវនាវឲ្យលោកស្រី Paetongtarn Shinawatr លាលែងពីតំណែងជានាយករដ្ឋមន្រ្តី ដើម្បីដោះស្រាយវិបត្តិនយោបាយ ស្ដារសេដ្ឋកិច្ច និងរដ្ឋាភិបាលរបស់ប្រទេសថៃឡើងវិញ បន្ទាប់ពីវិនិយោគគ្រិនបរទេសជាច្រើនបានសម្រុកលក់ភាគហ៊ុនរបស់ខ្លួនចេញ។ នេះបើយោងតាមការចុះផ្សាយរបស់សារព័ត៌មានថៃ The Nation។

នាព្រឹកថ្ងៃសុក្រ ទី២០ មិថុនា សារព័ត៌មានរបស់ថាមួយនេះបានឲ្យដឹងថា ៖ ការស្ទង់មតិនាពេលថ្មីៗនេះដែលធ្វើឡើងដោយ Krungthep Turakij បានសាកសួរនាយកប្រតិបត្តិចំនួន 100 នាក់មកពីវិស័យឈានមុខដូចជា ផលិតកម្ម កសិកម្ម ថាមពល អចលនទ្រព្យ ការនាំចេញ ហិរញ្ញវត្ថុ .ល. អំពីទស្សនៈវិស័យរបស់ពួកគេ។ ភាគច្រើននៃនាយកប្រតិបត្តិទាំងនោះ បានអំពាវនាវឲ្យលោកស្រី Paetongtarn ធ្វើការលាលែងពីតំណែងនាយករដ្ឋមន្រ្តី ព្រោះពួកគេជឿជាក់ថា ការដឹកនាំរបស់នាងកំពុងធ្វើឱ្យស្ថានភាពនយោបាយ និងសេដ្ឋកិច្ចក្នុងប្រទេសថៃកាន់តែអាក្រ.ក់ទៅៗ ។

ការស្ទង់មតិនេះ បានឲ្យដឹងទៀតថា ៖ ទីផ្សារហ៊ុនក្នុងស្រុកកាន់តែធ្លាក់ចុះខ្លាំង បន្ទាប់ពីលេចធ្លាយការសន្ទនារបស់លោកស្រីជាមួយអតីតនាយករដ្ឋមន្ត្រីកម្ពុជា ដែលប៉ះពាល់យ៉ាងខ្លាំងដល់ទំនុកចិត្តរបស់សាធារណជនចំពោះរដ្ឋាភិបាល។ ហើយវិបត្តិនេះ កាន់តែធ្ងន់ធ្ងរថែមទៀតនៅពេលគណបក្ស Bhumjaithai បានដកខ្លួនចេញពីរដ្ឋាភិបាលចម្រុះ។

នាយកប្រតិបត្តិប្រហែល 42.6% នៅក្នុងប្រទេសចង់ឲ្យលោកស្រី Paetongtarn ចុះចេញពីតំណែង ខណៈ 27.7% ស្នើសុំរំលាយសភា និង 26.7% គិតថាការរុះរើគណៈរដ្ឋមន្ត្រីជាដំណោះស្រាយដ៏សមស្របបំផុត។

គួរឲ្យដឹងផងដែរថា 55% នៃនាយកប្រតិបត្តិក្រុមហ៊ុនក្នុងប្រទេសថៃ ជឿជាក់ថាភាពមិនប្រាកដប្រជាខាងនយោបាយនៅក្នុងពេលបច្ចុប្បន្ន កំពុងជះឥទ្ធិពលយ៉ាងខ្លាំងដល់ការធ្វើផែនការយុទ្ធសាស្រ្តអាជីវកម្ម ដោយបង្ខំឱ្យក្រុមហ៊ុនពិចារណាពីហានិភ័យនយោបាយកាន់តែប្រុងប្រយ័ត្ន ក្នុងការរៀបចំយុទ្ធសាស្រ្តរយៈពេលវែងរបស់ពួកគេ។

ទោះជាយ៉ាងណាក៏ដោយ នៅពេលសួរថាតើរដ្ឋាភិបាលមានផែនការ ឬយុទ្ធសាស្ត្រមានប្រសិទ្ធភាពក្នុងការដោះស្រាយបញ្ហាសេដ្ឋកិច្ចដែរឬទេ? នាយកប្រតិបត្តិជាង 57.4% បាននិយាយថា ពួកគេមានអារម្មណ៍ថារដ្ឋាភិបាលសព្វថ្ងៃខ្វះផែនការច្បាស់លាស់ ឬមានប្រសិទ្ធភាព។ ដូច្នេះទើបមាននាយកប្រតិបត្តិខ្ឡះបានដកការវិនិយោគរបស់ខ្លួនចេញពីប្រទេសថៃ រីឯនាយកប្រតិបត្តិដែលនៅសេសសល់បានកត់សម្គាល់ថាពួកគេមិនបានឃើញការខិតខំប្រឹងប្រែងរបស់រដ្ឋាភិបាលដើម្បីដោះស្រាយបញ្ហានោះទេ៕

ប្រទេសថៃ ៖ ថ្មីៗនេះ សារព័ត៌មានថៃផ្សាយថា ស្ថានការណ៍ព្រំដែនកម្ពុជា-ថៃមានភាពតានតឹងក្រោយការប៉ះទង្គិចរវាងកងទ័ពទាំងពីរប្រទេស ធ្វើឱ្យភាគីថៃរឹតបន្តឹងការឆ្លងដែនជាឯកតោភាគី និងផ្លាស់ប្តូរម៉ោងបើក-បិទទ្វារច្រកព្រំដែន ខណៈច្រកព្រំដែនខ្លះបើកតែ៣ថ្ងៃក្នុង១សប្តាហ៍ ។ កម្ពុជាក៏បានហាមឃាត់ការនាំចូលបន្លែ ផ្លែឈើថៃគ្រប់ច្រកព្រំដែន ដែលធ្វើឱ្យរដ្ឋមន្ត្រីក្រសួងការបរទេសថៃ លោក ម៉ារីស សាងៀមផុង បញ្ជាទៅឯកអគ្គរាជទូតថៃប្រចាំកម្ពុជាត្រឡប់មកថៃវិញ ដើម្បីកាត់បន្ថយទំនាក់ទំនងការទូតមកនៅត្រឹមឧបទូត ដែលនេះជាចំណាត់ការរបស់ថៃមកលើកម្ពុជា ។

ក្រោយសារព័ត៌មានថៃផ្សាយបែបនេះ កាលពីថ្ងៃទី២០ ខែមិថុនា ឆ្នាំ២០២៥ ក្រសួងការបរទេសថៃបានបដិសេធចំពោះព័ត៌មាននេះថា ក្រសួងការបរទេសថៃគ្រាន់តែអញ្ជើញមន្ត្រីស្ថានទូតថៃប្រចាំកម្ពុជា មកប្រជុំនៅថៃដើម្បីវាយតម្លៃស្ថានការណ៍ និងកំណត់វិធានការឆ្លើយតបជាមួយកម្ពុជានាពេលខាងមុខ ប៉ុន្តែក្រសួងពុំទាន់ឈានដល់ពេលកាត់បន្ថយទំនាក់ទំនងការទូតជាមួយកម្ពុជាពេលនេះទេ ។

បើតាមមន្ត្រីក្រសួងការបរទេសថៃ គឺក្រសួងបានអញ្ជើញមន្ត្រីស្ថានទូតថៃប្រចាំកម្ពុជាមកប្រជុំពិភាក្សានៅថៃតាមធម្មតាប៉ុណ្ណោះ ហើយក្រសួងពុំបានកាត់ផ្តាច់ទំនាក់ទំនងការទូតជាមួយកម្ពុជា រីឯមន្ត្រីស្ថានទូតថៃនឹងធ្វើដំណើរត្រឡប់មកកម្ពុជាវិញនាពេលឆាប់ៗ ។

គួរបញ្ជាក់ថា ថ្មីៗនេះ សារព័ត៌មានថៃរាយការណ៍ថា ក្រសួងការបរទេសថៃបានហៅមន្ត្រីស្ថានទូតថៃប្រចាំកម្ពុជាមកថៃវិញ រួមទាំងកាត់បន្ថយទំនាក់ទំនងការទូតមកនៅត្រឹមឧបទូតដើម្បីឆ្លើយតបទៅកម្ពុជា ហើយក្រសួងការបរទេសថៃនឹងចាត់វិធានការឆ្លើយតបបន្ថែមទៀត ។ កន្លងមក កម្ពុជា និងថៃធ្លាប់កាត់ផ្តាច់ទំនាក់ទំនងការទូតចំនួន២លើក ដោយសាររឿងប្រាសាទព្រះវិហារ ហើយប្រទេសទាំងពីរធ្លាប់កាត់បន្ថយទំនាក់ទំនងការទូត ចំនួន២លើក ដោយសារការដុតស្ថានទូតថៃ ។

សារព័ត៌មានថៃរាយការណ៍ទៀតថា ថៃកាត់ផ្តាច់ទំនាក់ទំនងការទូតជាមួយកម្ពុជា ដោយសារស្ថានការណ៍តានតឹងនៅតំបន់ព្រំដែន និងមានការបែកធ្លាយកិច្ចសន្ទនារវាងសម្តេចតេជោ ហ៊ុន សែន ប្រធានព្រឹទ្ធសភាកម្ពុជា ជាមួយនាយករដ្ឋមន្ត្រីថៃ លោកស្រី ផេថងថាន ស៊ីណាវ៉ាត់ ។ ក្រសួងការបរទេសថៃក៏អញ្ជើញមន្ត្រីទូតកម្ពុជាប្រចាំប្រទេសថៃមកទទួលលិខិតតវ៉ា ដែលមានខ្លឹមសារថា ការបែកធ្លាយកិច្ចសន្ទនា គឺជាការខុសក្រមសីលធម៌រវាងប្រទេស និងជាការបំផ្លាញទំនុកចិត្តយ៉ាងខ្លាំងរវាងប្រទេសជិតខាង ៕

ទូរទស្សន៍ NHK របស់ជប៉ុនបានរាយការណ៍កាលពីថ្ងៃទី 19 ខែមិថុនា ដោយដកស្រង់ប្រភពការទូតដែលមិនបញ្ចេញឈ្មោះមួយនៅប្រទេសលោកខាងលិច និងរុស្ស៊ីថា ៖ ប្រទេសកូរ៉េខាងជើងកំពុងពិចារណាបញ្ជូនកម្មកររហូតដល់ 25,000 នាក់ទៅកាន់ប្រទេសរុស្ស៊ីដើម្បីជួយក្នុងការផលិតយន្តហោះគ្មានមនុស្សបើកប្រភេទ Shahed ។

កម្មករទាំងនោះ នឹងត្រូវបានបញ្ជូនទៅកាន់តំបន់សេដ្ឋកិច្ចពិសេស Alabuga ក្នុងសាធារណរដ្ឋ តាតាស្តង់ របស់រុស្ស៊ី ជាកន្លែងដែលទីក្រុងម៉ូស្គូដំណើរការកន្លែងសម្រាប់ដំឡើងយន្តហោះគ្មានមនុស្សបើក Shahed ដែលរចនាដោយអ៊ីរ៉ង់។ នេះបង្ហាញពីការអភិវឌ្ឍយ៉ាងឆាប់រហ័សក្នុងកិច្ចសហប្រតិបត្តិការយោធារវាងក្រុងម៉ូស្គូនិងក្រុងព្យុងយ៉ាង។

គួររំលឹកថា កាលពីថ្ងៃទី 17 ខែមិថុនាកន្លងទៅ រដ្ឋលេខាធិការក្រុមប្រឹក្សាសន្តិសុខរុស្ស៊ីលោក Sergei Shoigu បានទៅបំពេញទស្សនកិច្ចនៅកូរ៉េខាងជើងតាមសេចក្តីរាយការណ៍ពី “ការចាត់តាំងពិសេស” ពីប្រធានាធិបតីរុស្ស៊ី លោក Vladimir Putin ។ បន្ទាប់ពីបានជួបលោក Kim Jong Un រួច លោក Shoigu បាននិយាយថា ទីក្រុងព្យុងយ៉ាងបានយល់ព្រមបញ្ជូនវិស្វករប្រយុទ្ធចំនួន 1,000 នាក់ និងអ្នកសាងសង់ផ្នែកយោធាចំនួន 5,000 នាក់ទៅកាន់តំបន់ Kursk របស់ប្រទេសរុស្ស៊ីដើម្បីជួយក្នុងការកសាងយន្តហោះគ្មានមនុស្សបើក Shahed។

គួរជម្រាបថា យន្តហោះគ្មានមនុស្សបើក Shahed ដែលត្រូវបានគេស្គាល់ពីភាពខ្លាំងរបស់វា ហើយត្រូវបានប្រើប្រាស់យ៉ាងទូលំទូលាយដោយប្រទេសរុស្ស៊ីចាប់តាំងពីចុងឆ្នាំ 2022 ក្នុងការវាយប្រហារទីក្រុងនានារបស់អ៊ុយក្រែន។ ដែលជាហេតុនាំឲ្យទីតាំងដែលផលិតយន្តហោះនេះនៅ Alabuga ត្រូវបានកងកម្លាំងអ៊ុយក្រែនវា.យប្រហារម្តងហើយម្តងទៀតដើម្បីរំខានដល់ការផលិត។

ប្រមុខចារកម្មយោធាអ៊ុយក្រែន លោក Kyrylo Budanov បាននិយាយកាលពីថ្ងៃទី ៩ ខែមិថុនាថា ទីក្រុងព្យុងយ៉ាង និងទីក្រុងមូស្គូ បានព្រមព្រៀងគ្នាក្នុងការចាប់ផ្តើមការផលិតយន្តហោះគ្មានមនុស្សបើក Shahed-136 ក្នុងស្រុកនៅលើទឹកដីកូរ៉េខាងជើង។

បើតាមការអង្កេត គេអាចសន្មត់បានថា លោក Kim គឺជាមិត្តល្អរបស់លោក ពូទីន ដោយមិនត្រឹមតែផ្គត់ផ្គង់ផ្នែកទាហានប៉ុណ្ណោះទេ តែថែមទាំងមានកាំភ្លើងធំ យន្តហោះគ្មានមនុស្សបើក និងកាំជ្រួចផ្លោងទៀតផង។ ក្នុងអំឡុងពេលព្យុហយាត្រាទិវាជ័យជម្នះ ៩ ឧសភា របស់រុស្ស៊ីនៅទីក្រុងមូស្គូ លោក ពូទីន បានស្វាគមន៍ដោយផ្ទាល់ដល់ទាហានកូរ៉េខាងជើង ទោះបីជាលោក គីម មិនបានចូលរួមក៏ដោយ។ នេះបង្ហាញពីចំណងមិត្តភាពដ៏ជិតស្និតរបស់ប្រទេសមហាអំណាចសព្វាវុធទាំងពីរ៕