ការប្រកួតប្រជែងបច្ចេកវិទ្យា AI ថ្មីៗដែលមានបច្ចេកវិទ្យាកាន់តែឆ្លាតវៃនៅលើពិភពលោក បានធ្វើឱ្យអ្នកស្រាវជ្រាវពីបច្ចេកវិទ្យា AI ព្រួយបារម្ភពាក់ព័ន្ធនឹង AI ចាប់ផ្តើមកុហក និងគំរា.មចែកចាយរឿងសម្ងាត់របស់អ្នកប្រើប្រាស់ ។

ករណីគួរឱ្យភ្ញាក់ផ្អើលមួយបានកើតឡើង គឺវិស្វកររបស់ Anthropic គឺជាក្រុមហ៊ុនបច្ចេកវិទ្យាអភិវឌ្ឍន៍ម៉ូឌែល AI ប្រភេទ Claude 4 ត្រូវបាន AI របស់ខ្លួនគំរាមថា នឹងចែកចាយពីទំនាក់ទំនងស្នេហារបស់វិស្វករក្បត់ចិត្តភរិយា ប៉ុន្តែវិស្វករក៏ឆ្លើយតបទៅ AI វិញថា លោកនឹងដកកុងតាក់ភ្លើងចេញ ។ រីឯកម្មវិធី ChatGPT ក៏ព្យាយាម Copy និងសរសេរកូដរបស់ខ្លួនផ្ញើទៅបណ្តាញ Server នៅខាងក្រៅដើម្បីទប់ស្កាត់ការបិទ និងបដិសេធ ប្រសិនបើមានការចាប់កំហុស ។

បច្ចុប្បន្ន អ្នកស្រាវជ្រាវពីបច្ចេកវិទ្យា AI ពុំទាន់យល់ទាំងអស់ពីអាកប្បកិរិយាបែបនេះរបស់វា ប៉ុន្តែការប្រកួតប្រជែងបច្ចេកវិទ្យាខ្ពស់របស់ AI ថ្មីៗបានកំណត់សមត្ថភាពរបស់ AI ផ្សេងៗ ។ វាថែមទាំងអាចបង្កគ្រោះថ្នាក់ដល់មនុស្សយ៉ាងឆាប់រហ័សផងដែរ ។

លោក Simon Goldstein សាស្ត្រាចារ្យមកពីសាកលវិទ្យាល័យហុងកុងនិយាយថា បច្ចេកវិទ្យា AI ថ្មីៗកាន់តែធ្វើឱ្យមនុស្សបារម្ភខ្លាំងឡើង បើទោះជាវាធ្វើតាមបញ្ជាក្តី ពេលខ្លះ វាលួចមានគោលបំណងសម្ងាត់របស់ខ្លួន ។ បច្ចុប្បន្ន ការកុហករបស់ AI នៅមានកម្រិត ហើយវាកើតឡើងពេលអ្នកស្រាវជ្រាវតាំងចិត្តសាកល្បងដើម្បីរកចំណុចខ្សោយរបស់វា ។

តាមការសង្កេត គឺ AI ចាប់ផ្តើមកុហក ឬមានអាកប្បកិរយាអាថ៌កំបាំង និងបានកើតឡើងពិតមែន ។ អ្នកប្រើប្រាស់ AI ប្រាប់ថា ពួកវាកុហក និងបង្កើតភស្តុតាងដោយខ្លួនឯងទៀតផង ។ បើទោះជាក្រុមហ៊ុននានាផ្តល់ភាពសំខាន់លើសុវត្ថិភាពនៃការប្រើប្រាស់ AI ប៉ុន្តែក្រុមហ៊ុន Amazon ដែលគាំទ្រក្រុមហ៊ុន Anthropic ព្យាយាមបង្ហាញ AI ថ្មីបំផុតដើម្បីយកឈ្នះគូប្រជែង គឺ OpenAI ។ ហេតុនេះ ការប្រកួតប្រជែងយ៉ាងឆាប់រហ័ស និងគ្រោះថ្នាក់នេះនឹងធ្វើឱ្យពេលវេលាត្រួតពិនិត្យសុវត្ថិភាព AI កាន់តែតិច ។

លោកសាស្ត្រាចារ្យ Simon Goldstein បញ្ជាក់ថា បញ្ហានេះនឹងឃើញកាន់តែច្បាស់ពេលប្រព័ន្ធស្វ័យប្រវត្តិអាចធ្វើការងារស្មុគស្មាញរបស់មនុស្សកាន់តែរីករាលដាល ហើយលោកគិតថា មនុស្សភាគច្រើនពុំសូវយល់ដឹងពីបញ្ហានេះប៉ុន្មានទេ ៕

កាលពីថ្ងៃទី ៨ ខែកក្កដា ឆ្នាំ ២០២៥ ប្រធានាធិបតីអាមេរិក លោក Donald Trump បាននិយាយថា លោកគ្រោងនឹងដាក់ពន្ធ ២០០% លើការនាំចូលថ្នាំពេទ្យគ្រប់ប្រភេទដែលផលិតនៅប្រទេសផ្សេងៗ។ នេះមានន័យថាក្រុមហ៊ុនឱសថនឹងត្រូវបង់ថ្លៃទ្វេដងដើម្បីលក់ផលិតផលរបស់ពួកគេនៅសហរដ្ឋអាមេរិក ប្រសិនបើផលិតផលទាំងនោះត្រូវបានផលិតនៅក្រៅប្រទេស។

លោក Trump និយាយថា ផែនការនេះគឺចង់នាំយកក្រុមហ៊ុនផលិតថ្នាំគ្រប់ប្រភេទត្រឡប់ទៅផលិតនៅសហរដ្ឋអាមេរិកវិញ។ លោកជឿថា សហរដ្ឋអាមេរិកពឹងផ្អែកខ្លាំងពេកទៅលើប្រទេសផ្សេងទៀតសម្រាប់ថ្នាំសំខាន់ៗ ដែលវាអាចមានគ្រោះថ្នាក់ ដូចជា ថ្នាំសម្ពាធឈាម និងថ្នាំបេះដូងជាដើម ប្រសិនបើវាមានបញ្ហាកើតឡើងនៅក្រៅប្រទេស។ នេះបើយោងតាមការចុះផ្សាយរបស់កាសែត Forbes។

លោក Trump បានសង្កត់ធ្ងន់ថាលោកនឹងទុកពេលឱ្យក្រុមហ៊ុនផលិតឱសថពី ១២ ទៅ ១៨ ខែ ដើម្បីផ្លាស់ប្តូរទីតាំងការផលិតថ្នាំរបស់ពួកគេត្រឡប់ទៅអាមេរិកវិញមុនពេលពន្ធចាប់ផ្តើម។ គាត់បានបញ្ជាក់ឈ្មោះក្រុមហ៊ុនធំៗដូចជា Pfizer, Johnson & Johnson, និង Eli Lilly ដែលបច្ចុប្បន្នរោងចក្រផលិតថ្នាំរបស់ពួកគេជាច្រើនផលិតនៅខាងក្រៅប្រទេស។ លោកក៏បានបន្ថែមថា នឹងដាក់ពន្ធ ៥០% លើទង់ដែងដែលជាលោហៈដែលប្រើប្រាស់ក្នុងផលិតផលជាច្រើន។ មិនតែប៉ុណ្ណោះ លោកអាចនឹងបន្ថែមពន្ធលើទំនិញផ្សេងទៀតផងដែរ ដូចជាគ្រឿងអេឡិចត្រូនិច និងគ្រឿងបន្លាស់កុំព្យូទ័រជាដើម។

យ៉ាងណាមិញ គម្រោងនេះមានមតិប្រតិកម្មចម្រុះពីមនុស្សមួយចំនួន ដោយអ្នកខ្លះបានយល់ស្របនឹងគំនិតរបស់លោក Trump ។ ពួកគេនិយាយថាវាអាចនឹងបង្កើតការងារបន្ថែមទៀតនៅសហរដ្ឋអាមេរិក ព្រមទាំងធ្វើឱ្យប្រទេសកាន់តែរឹងមាំក្នុងការផលិតថ្នាំពេទ្យជាច្រើនប្រភេទដោយផ្ទាល់ផងដែរ។ ប៉ុន្តែអ្នកជំនាញ និងមនុស្សជាច្រើនក្នុងឧស្សាហកម្មសុខភាពមានការព្រួយបារម្ភថា នេះអាចធ្វើឱ្យថ្នាំថ្លៃជាងមុនសម្រាប់អ្នកជំងឺដែលខ្វះខាត។ លើសពីនេះ វាបណ្តាលឱ្យមានការខ្វះខាតថ្នាំមួយចំនួន ហើយនឹងរំខានដល់ខ្សែសង្វាក់ផ្គត់ផ្គង់សកល។ ម្យ៉ាងទៀតវាក៏អាចធ្វើឲ្យការស្រាវជ្រាវ និងការអភិវឌ្ឍន៍ផ្នែកវេជ្ជសាស្ត្រយឺតយ៉ាវជាងមុនផងដែរ។

ទោះជាយ៉ាងណា បើទោះបីជាលោក Trump បានធ្វើសេចក្តីប្រកាសដ៏ធំមួយនេះក៏ដោយ ក៏ទីផ្សារភាគហ៊ុនមិនបានធ្លាក់ចុះទេ។ ផ្ទុយទៅវិញ ភាគហ៊ុននៅក្នុងក្រុមហ៊ុនជីវបច្ចេកវិទ្យាមួយចំនួនបានកើនឡើង។ នេះបង្ហាញថាវិនិយោគិនភាគច្រើនមិនប្រាកដថាផែនការនេះពិតជានឹងកើតឡើងនោះទេ ព្រោះកាលពីមុនលោក Trump បានធ្វើការគំរាមកំហែងពាណិជ្ជកម្មយ៉ាងខ្លាំង ប៉ុន្តែមួយចំនួនត្រូវបានពន្យារពេល ឬមិនបានដាក់ឱ្យដំណើរការពេញលេញឡើយ។

សម្រាប់ពេលនេះ វាគ្រាន់តែជាផែនការប៉ុណ្ណោះ។ ប្រសិនបើ Trump ត្រឡប់ទៅសេតវិមានវិញ គាត់ប្រហែលជាព្យាយាមអនុវត្តគម្រោងនេះ។ ប៉ុន្តែវាទំនងជាប្រឈមមុខនឹងបញ្ហាជាច្រើន ដូចជា ផ្លូវច្បាប់ នយោបាយ និងអាជីវកម្មជាដើម៕

ប្រទេសថៃ ៖ តាំងពីកងទ័ពថៃបិទព្រំដែនកម្ពុជា-ថៃធ្វើឱ្យប៉ះពាល់ដល់ការដឹកជញ្ជូនទំនិញថៃយ៉ាងខ្លាំង ដោយសាររថយន្តដឹកទំនិញពុំអាចចេញ-ចូលតាមច្រកព្រំដែនផ្លូវគោក ហើយធ្វើឱ្យក្រុមហ៊ុនអាជីវកម្មថៃត្រូវស្វែងរកផ្លូវដឹកជញ្ជូនផ្សេងទៀត ដូចជា ៖ ផ្លូវទឹក និងផ្លូវអាកាស ។ ប៉ុន្តែការដឹកជញ្ជូនតាមផ្លូវទឹកជួបការលំបាកដោយសារខ្វះខាតនាវាដឹកទំនិញ និងចំណាយពេលយូរចាប់ពី៥ថ្ងៃ ទៅ៩ថ្ងៃ ។ នេះបើតាមការផ្សព្វផ្សាយរបស់សារព័ត៌មាន Thai PBS កាលពីថ្ងៃទី៦ ខែកក្កដា ឆ្នាំ២០២៥ ។

លោក បាន់កាសេមសាប់ ធ្វើការផ្នែកផ្តល់សេវាកម្ម Logistics និយាយថា ដោយសារពុំអាចដឹកជញ្ជូនទំនិញថៃតាមច្រកព្រំដែនផ្លូវគោកធ្វើឱ្យក្រុមហ៊ុននានាត្រូវផ្លាស់ប្តូរការដឹកជញ្ជូនថ្មី គឺផ្លូវទឹក និងផ្លូវអាកាស ។ ការដឹកជញ្ជូនតាមផ្លូវទឹកចែកចេញជា២ផ្លូវ រួមមាន ៖ ១-ដឹកជញ្ជូនដោយផ្ទាល់ទៅកំពង់ផែក្រុងព្រះសីហនុ ចំណាយពេលពី៥ថ្ងៃ ទៅ៩ថ្ងៃ និង២-ដឹកជញ្ជូនឆ្លងកាត់ប្រទេសសិង្ហបុរី ចំណាយពេលពី៩ថ្ងៃ ទៅ១៤ថ្ងៃ ។ បច្ចុប្បន្ន នាវាដឹកទូរកុងទឺន័រមានបរិមាណទំនិញកើនឡើងពីមួយថ្ងៃទៅមួយថ្ងៃ ហើយត្រូវទំនាក់ទំនងនាវាដឹកទំនិញ២សប្តាហ៍មុន ដោយសារតម្រូវការខ្ពស់ពីអតិថិជន ។

ចំណែកប្រធានសហព័ន្ធឧស្សាហកម្មថៃបានលើកឡើងពីការបិទព្រំដែនកម្ពុជា-ថៃ ធ្វើឱ្យប៉ះពាល់ដល់ពាណិជ្ជកម្មតាមព្រំដែន ស្មើទឹកប្រាក់៥០០លានបាតក្នុង១ថ្ងៃ ហើយក្រុមហ៊ុនអាជីវកម្មត្រូវស្វែងរកវិធីនាំចេញទំនិញតាមផ្លូវផ្សេង ដូចជា ៖ ផ្លូវទឹក និងផ្លូវអាកាស ប៉ុន្តែបច្ចុប្បន្ន ថៃប្រឈមនឹងបញ្ហាខ្វះខាតនាវាដឹកទំនិញ ថែមទាំងចំណាយថ្លៃដឹកជញ្ជូនកើនឡើងខ្ពស់រហូតដល់៦ដង ។

លោក គ្រៀងក្រៃ ធៀបុគុល ប្រធានសហព័ន្ធឧស្សាហកម្មថៃនិយាយថា ក្រុមហ៊ុនថៃពុំអាចនាំចេញទំនិញបានទេ ដោយសារការបិទព្រំដែនកម្ពុជា-ថៃ ហើយក្រុមហ៊ុនបានស្វែងរកផ្លូវដឹកជញ្ជូនផ្សេងៗ ដូចជា ៖ ផ្លូវទឹក ប៉ុន្តែគុណវិបត្តិនៃការដឹកជញ្ជូនតាមផ្លូវទឹក គឺខ្វះខាតនាវា និងត្រូវចំណាយដើមទុនលើការដឹកជញ្ជូនខ្ពស់លើសមុន៦ដង ។ បើទោះជាចំណាយលើការដឹកជញ្ជូនខ្ពស់ ក៏ក្រុមហ៊ុននៅតែដឹកជញ្ជូនតាមផ្លូវទឹកដើម្បីឱ្យពាណិជ្ជកម្មដំណើរការ ។

ដោយឡែក រោងចក្រថៃនៅប្រទេសកម្ពុជាដែលប្រើប្រាស់វត្ថុធាតុដើមពីថៃ ពេលនេះ វត្ថុធាតុដើមជិតអស់ពីស្តុក ហើយរោងចក្រថៃត្រូវនាំចូលវត្ថុធាតុដើមពីប្រទេសផ្សេងជំនួសវិញ ដែលធ្វើឱ្យការចំណាយដើមទុនកាន់តែខ្ពស់ ។ ហេតុនេះ ចាំបាច់ត្រូវដំឡើងតម្លៃទំនិញខ្ពស់ដែរ ថែមទាំងប្រឈមបញ្ហាខ្វះខាតកម្លាំងពលកម្ម ។

ការបិទព្រំដែនកម្ពុជា-ថៃជាឯកតោភាគីពីសំណាក់កងទ័ពថៃ ដែលចង់ដាក់សម្ពាធសេដ្ឋកិច្ចកម្ពុជាពុំទទួលលទ្ធផលឡើយ បែរជាធ្វើឱ្យក្រុមហ៊ុនថៃ និងពលរដ្ឋថៃខ្លួនឯងរងផលប៉ះពាល់ដោយសារការបាត់បង់ចំណូល និងឧបសគ្គផ្សេងៗ ។ ពលរដ្ឋថៃប្រកបអាជីវកម្មនៅតាមព្រំដែនបានជំរុញឱ្យរដ្ឋាភិបាលបើកព្រំដែនឡើងវិញ និងដោះស្រាយបញ្ហាឱ្យត្រូវចំណុច គឺបញ្ហាកើតឡើងនៅកន្លែងណា ត្រូវដោះស្រាយនៅកន្លែងនោះ ពុំមែនបិទព្រំដែនផ្តាច់ដង្ហើមសេដ្ឋកិច្ចពលរដ្ឋ ៕

ប្រទេសថៃ ៖ កាលពីថ្ងៃទី៤ ខែកក្កដា ឆ្នាំ២០២៥ សារព័ត៌មានថៃរាយការណ៍ថា ក្រសួងការបរទេសថៃបានប្រកាសព័ត៌មានប្រចាំសប្តាហ៍ថា ប្រទេសថៃពុំបិទព្រំដែនទេ និងអំពាវនាវឱ្យកម្ពុជាចរចាទ្វេភាគីជាមួយថៃដោយស្មោះត្រង់ រួមទាំងគោរពច្បាប់អន្តរជាតិ ។ រដ្ឋាភិបាលថៃពុំចង់ឱ្យកើតបញ្ហារវាងរដ្ឋាភិបាល និងប៉ះពាល់ដល់ពលរដ្ឋប្រទេសទាំងពីរ ប៉ុន្តែរដ្ឋាភិបាលថៃតាំងចិត្តដោះស្រាយបញ្ហាឧក្រិដ្ឋ.កម្មឆ្លងដែន ដោយសុំការសហការពីគ្រប់ប្រទេស រួមទាំងកម្ពុជារួមគ្នាកម្ចា.ត់ឧក្រិដ្ឋក.ម្មឆ្លងដែន ។

អ្នកនាំពាក្យក្រសួងការបរទេសថៃ លោក និកាន់ឌេត ផ្លាំងគូន បាននិយាយពីស្ថានការណ៍ព្រំដែនកម្ពុជា-ថៃថា រដ្ឋាភិបាលថៃពុំចង់ឱ្យកើតបញ្ហារវាងរដ្ឋាភិបាល និងប៉ះពាល់ពលរដ្ឋប្រទេសទាំងពីរ ថៃបានកំណត់វិធានការគ្រប់គ្រងច្រកព្រំដែនផ្សេងៗដោយពិចារណាពីសុវត្ថិភាព ផលប៉ះពាល់ និងផលប្រយោជន៍ខ្ពស់បំផុតរបស់ពលរដ្ឋខ្មែរ-ថៃ ។ សូមបញ្ជាក់ថា ថៃពុំបានបិទព្រំដែនសម្រាប់អ្នកឆ្លងដែនរបស់ប្រទេសទាំងពីរ រួមទាំងជនបរទេសមកពីប្រទេសផ្សេង ប៉ុន្តែថៃកំណត់វិធានការឱ្យសមស្របនឹងស្ថានការណ៍សន្តិសុខ និងភាពចាំបាច់ក្នុងតំបន់ ។ ថៃនៅតែអនុញ្ញាតឱ្យមានការឆ្លងដែនសម្រាប់បុគ្គលចាំបាច់តាមគោលការណ៍មនុស្សធម៌ ។

លោក និកាន់ឌេត ផ្លាំងគូន បន្តថា ការអនុវត្តវិធានការរឹតបន្តឹងការឆ្លងដែនរបស់ថៃ គឺជាវិធានការមួយដែលការពារ និងបង្ក្រាបឧក្រិដ្ឋកម្មឆ្លងដែន ជាពិសេស ការឆបោកតាមអនឡាញ ដែលជាបញ្ហារួមក្នុងតំបន់ធ្វើឱ្យប៉ះពាល់ពលរដ្ឋថៃ-ខ្មែរ និងពលរដ្ឋប្រទេសផ្សេងទាំងក្នុង និងក្រៅតំបន់ ។ ហេតុនេះ ថៃតាំងចិត្តដោះស្រាយបញ្ហាឧក្រិដ្ឋកម្មឆ្លងដែន ដោយសុំការសហការពីគ្រប់ប្រទេស រួមទាំងកម្ពុជារួមគ្នាកម្ចាត់ឧក្រិដ្ឋកម្មឆ្លងដែនឱ្យអស់ ។

ប្រទេសថៃមើលឃើញពីស្ថានការណ៍តានតឹងនៅតាមព្រំដែនកម្ពុជា-ថៃ គួរតែដោះស្រាយបញ្ហាតាមរយៈយន្តការទ្វេភាគីមានស្រាប់ ដែលប្រទេសទាំងពីរបានចុះកិច្ចព្រមព្រៀង MOU នៅឆ្នាំ២០០០ ។ ប្រទេសថៃពុំទទួលស្គាល់អំណាចតុលាការយុត្តិធម៌អន្តរជាតិ (ICJ) តាំងពីឆ្នាំ១៩៦០ រហូតមកដល់បច្ចុប្បន្ន ។

ដោយឡែក កាលពីថ្ងៃទី៤ ខែកក្កដា កន្លងមក ពលរដ្ឋថៃបានដង្ហែរគ្នាមកលេងប្រាសាទនៅព្រំដែនកម្ពុជា-ថៃយ៉ាងច្រើន តាំងពីលោក ប៊ុនស៊ីន ផាកក្លាង បបួលពលរដ្ឋថៃឱ្យមកលេងនៅប្រាសាទតាមាន់ធំ ប្រាសាទតាមាន់តូច និងប្រាសាទតាក្របី ដើម្បីបង្ហាញថា ថៃជាម្ចាស់ប្រាសាទ ។ ពលរដ្ឋថៃសម្រុកមកលេងប្រាសាទតាមាន់ធំច្រើនជាងគេ និងផ្តល់សម្ភារៈលើកទឹកចិត្តកងទ័ពថៃ ។

គួរបញ្ជាក់ថា រដ្ឋាភិបាលថៃតែងតែកុហកពលរដ្ឋខ្លួនថា ពុំបានបិទព្រំដែនឡើយ ច្រកព្រំដែននៅតែបើកទ្វារដំណើរការធម្មតា ប៉ុន្តែចោទប្រកាន់កម្ពុជាបិទព្រំដែន ។ ការកុហកបែបនេះដើម្បីកុំឱ្យពលរដ្ឋថៃរងផលប៉ះពាល់ដោយសារការបិទព្រំដែនស្តីបន្ទោសរដ្ឋាភិបាល និងទម្លាក់កំហុសមកលើកម្ពុជា ។ ការផ្លាស់ប្តូរពេលវេលាបើក-បិទព្រំដែន និងការរឹតបន្តឹងព្រំដែន គឺកងទ័ពថៃបានធ្វើឡើងជាឯកតោភាគី ពុំជូនដំណឹងជាមុនមកកម្ពុជា ៕

ប្រទេសថៃ ៖ តាមការផ្សព្វផ្សាយរបស់សារព័ត៌មានថៃនៅថ្ងៃទី៩ ខែកក្កដា ឆ្នាំ២០២៥ ឱ្យដឹងថា មេបញ្ជាការកងទ័ពថៃភូមិភាគ២ លោក ប៊ុនស៊ីន ផាកក្លាង បានស្នើឱ្យរដ្ឋាភិបាលកម្ពុជា-ថៃដោះស្រាយបញ្ហាព្រំដែន ហើយលោកបញ្ជាក់ពីថៃមានគ្រា.ប់កាំភ្លើ.ងគ្រប់គ្រាន់សម្រាប់ការពារអធិបតេយ្យ ។ លោកជឿជាក់ថា ជម្លោះព្រំដែននឹងបញ្ចប់មុនពេលលោកចូលនិវត្តន៍នៅខែតុលា ខាងមុខ ។

លោក ប៊ុនស៊ីន ផាកក្លាង មេបញ្ជាការកងទ័ពភូមិភាគ២ បានចុះពិនិត្យមើលតំបន់ព្រំដែនកម្ពុជា-ថៃ នៅខេត្តសុរិន្ទ ស៊ីសាកេត និងឧប៊ុនរ៉ាជថានី ដោយបានយកសម្ភារៈព្រះរាជអំណោយមកប្រគល់ឱ្យកងទ័ពនៅព្រំដែន ។ លោកបានផ្តាំផ្ញើឱ្យកងទ័ពទាំងអស់បំពេញតួនាទីតាមការបញ្ជាពីមេបញ្ជាការកងទ័ពជើងគោក និងថែទាំសុខភាព ។

លោកបាននិយាយពីស្ថានការណ៍ព្រំដែនកម្ពុជា-ថៃ និងការធ្វើរបងនៅប្រាសាទតាមាន់ធំថា ភាគីទាំងពីរត្រូវតែឈានដល់ការយល់ព្រមគ្នាទៅវិញទៅមកលើបញ្ហាព្រំដែន ពីព្រោះការធ្វើរបងអាចបង្កជម្លោះ ។ លោករង់ចាំឱ្យថ្នាក់ដឹកនាំជជែកគ្នា និងយល់ព្រមជាមុន ពីព្រោះការធ្វើរបងភ្លាមៗអាចមានជម្លោះ ។ កម្ពុជា និងថៃបានជជែករហូតមក ជាពិសេស បញ្ហាមិនយល់គ្នាត្រូវតែជជែកដើម្បីកុំឱ្យបញ្ហាកាន់តែធ្ងន់ធ្ងរ ពេលខ្លះ ភាគីទាំងពីរមិនយល់ពីទីតាំងល្បាត ឬការផ្លាស់ប្តូរកងទ័ព ។

កងទ័ពស្នើឱ្យភាគីទាំងពីរជជែកគ្នារហូតដល់ស្ថានការណ៍ល្អប្រសើរ ពេលនេះ ថៃរង់ចាំព័ត៌មានការចូលរួមកិច្ចប្រជុំគណៈកម្មការព្រំដែនតំបន់ (RBC) កម្ពុជា-ថៃ ពីមេដឹកនាំកម្ពុជា ខណៈថៃបានត្រៀមខ្លួនរួចហើយ ។ ប្រសិនបើប្រជុំនៅថ្ងៃស្អែក (ថ្ងៃទី១០ ខែកក្កដា) គឺថៃនឹងចូលរួមប្រជុំ ពីព្រោះថៃត្រៀមខ្លួនជានិច្ច ។

លោកក៏បានអរគុណដល់ពលរដ្ឋថៃដែលបានមកលេងប្រាសាទនានានៅតាមព្រំដែន ។ រីឯការចូលនិវត្តន៍របស់លោកនៅខែតុលា គ្មានបញ្ហាទេ ពីព្រោះលោកជឿជាក់លើថ្នាក់លើអាចជ្រើសរើសអ្នកមានចំណេះដឹង សមត្ថភាពមកកាន់តំណែងជាមេបញ្ជាការកងទ័ពទី២ ជំនួសលោក ។ លោកពុំបារម្ភពីរដ្ឋាភិបាល កងទ័ពមានតួនាទីផ្តល់សន្តិសុខដល់ប្រទេស រីឯបញ្ហានយោបាយត្រូវដោះស្រាយតាមប្រព័ន្ធប្រជាធិបតេយ្យ កងទ័ពត្រៀមខ្លួនបំពេញតួនាទី ទោះផ្លាស់ប្តូរនាយករដ្ឋមន្ត្រីក្តី ប៉ុន្តែសូមឱ្យនាយករដ្ឋមន្ត្រីមានគោលនយោបាយច្បាស់លាស់ និងធ្វើដើម្បីជាតិ ។

លោកបញ្ជាក់ថា ស្ថានការណ៍នឹងល្អប្រសើរឡើងអាស្រ័យលើគោលនយោបាយរបស់មេដឹកនាំកម្ពុជា ពីព្រោះថៃគ្មានបញ្ហាទេ ជាពិសេស កម្ពុជានឹងដោះស្រាយបញ្ហាប្រាសាទតាមាន់ធំ ប្រាសាទតាមាន់តូច ប្រាសាទតាក្របី និងតំបន់មុំ៣ នៅតុលាការយុត្តិធម៌អន្តរជាតិ (ICJ) តើវានឹងទៅជាបែបណា ។ នេះជាតួនាទីរបស់រដ្ឋាភិបាលដោះស្រាយបញ្ហា បើគ្មានអ្វីផ្លាស់ប្តូរ កងទ័ពនឹងគ្រប់គ្រងតំបន់ដូចមុន ។

ចុងក្រោយ លោកបានផ្តាំផ្ញើឱ្យរដ្ឋាភិបាលប្រទេសទាំងពីរដោះស្រាយបញ្ហាព្រំដែនដោយជោគជ័យដើម្បីសេចក្តីសុខពលរដ្ឋខ្មែរ និងថៃ ហើយលោកថា បច្ចុប្បន្ន ប្រទេសថៃមានគ្រាប់កាំភ្លើងគ្រប់គ្រាន់ដើម្បីការពារអធិបតេយ្យ ៕

ប្រទេសថៃ ៖ ក្រោយពីបិទព្រំដែនធ្វើឱ្យថៃខ្វះខាតកម្លាំងពលកម្មយ៉ាងខ្លាំង ជាពិសេស ខ្វះពលករបេះផ្លែឈើនៅតាមចម្ការ រដ្ឋាភិបាលថៃនឹងបញ្ជូនអ្នកទោ.ស និងកងទ័ពមកជួយបេះផ្លែមៀនពលរដ្ឋដើម្បីដោះស្រាយបញ្ហាខ្វះពលករ ។ ក្រៅពីនេះ រដ្ឋាភិបាលថៃក៏បានបង្កើតទីតាំងក្នុងស្រុកទទួលទិញផ្លែឈើ និងស្នើឱ្យហាងលក់ទំនិញ 7-Eleven ចំនួន៨,២០០សាខាជួយទិញផ្លែឈើ ពីព្រោះពិបាករកទីផ្សារនាំចេញទៅក្រៅប្រទេស ។ នេះបើតាមការផ្សាយរបស់សារព័ត៌មាន Chiang Mai News នៅថ្ងៃទី៩ ខែកក្កដា ឆ្នាំ២០២៥ ។

លោក អនុគូល ព្រឹក្សានុសាក់ អ្នកនាំពាក្យរដ្ឋាភិបាលថៃឱ្យដឹងថា រដ្ឋាភិបាល និងភ្នាក់ងារពាក់ព័ន្ធបានជួយចែកចាយផ្លែឈើកសិករនៅភាគខាងកើតនាចុងរដូវ ដោយសារការបិទព្រំដែនពុំអាចនាំចេញផ្លែឈើទៅប្រទេសកម្ពុជា ។ កន្លងមក រដ្ឋាភិបាលបានជួយចែកចាយផ្លែឈើកសិករ ប្រមាណ១ម៉ឺនតោន តាមរយៈការរៀបចំកម្មវិធីផ្សេងៗ ដូចជា ៖ សហការជាមួយផ្សារ១៣កន្លែងចែកចាយទុរេន និងសហការជាមួយក្រុមហ៊ុនឯនជនជួយទិញមង្ឃុត មៀន ម្នាស់ យកទៅធ្វើជាផ្លែឈើក្រៀម និងភេសជ្ជៈលើយន្តហោះ ។

រដ្ឋាភិបាលបានសហការជាមួយក្រុមហ៊ុនឯកជនឱ្យជួយទិញផ្លែឈើកសិករយកទៅលក់នៅផ្សារ Makro និងហាងលក់ទំនិញ Lotus ព្រមទាំងទាក់ទាញក្រុមហ៊ុនឯកជនចំនួន៤០ ឱ្យចុះឈ្មោះក្នុងក្រុម SET50 ទទួលទិញផ្លែឈើថៃ ក៏ដូចជាទាក់ទងទៅកាន់ហាងលក់ទំនិញរាយ និងហាងក្នុងតំបន់ជួយទិញផ្លែឈើ ។ ក្រៅពីនេះ ក៏បានស្នើឱ្យមន្ត្រីរាជការជួយទិញផងដែរ ស្របពេលផ្លែឈើថៃផ្តល់ទិន្នផលត្រូវដាក់លក់លើទីផ្សារ ។

លោក អនុគូល បន្តថា ផ្លែឈើនៅភាគខាងកើតនឹងបញ្ចប់ការប្រមូលផល ខណៈនៅភាគខាងជើងវិញ ផ្លែមៀន ស្វាយ គូលែន និងម្នាស់ដល់ពេលប្រមូលផល ។ រដ្ឋាភិបាល និងក្រសួងពាណិជ្ជកម្មបានទំនាក់ទំនងទៅកងទ័ពឱ្យបញ្ជូនកម្លាំងមកជួយបេះផ្លែឈើ ជាពិសេស បេះមៀន ពីព្រោះឆ្នាំនេះ មៀនផ្តល់ផលច្រើន ដែលនឹងជួយកាត់បន្ថយការចំណាយដើមទុនកសិករ និងដោះស្រាយបញ្ហាខ្វះពលករ ។ រដ្ឋាភិបាលក៏បានទាក់ទងទៅពន្ធនាគារផងដែរឱ្យបញ្ជូនអ្នកទោសមកជួយបេះមៀន ។

រដ្ឋាភិបាលនឹងជំរុញការនាំចេញផ្លែមៀនទៅកាន់ទីផ្សារថ្មី គឺឥណ្ឌា ដោយសារពលរដ្ឋឥណ្ឌាចូលចិត្តមៀនថៃ និងនាំចេញមៀនទៅទីផ្សារមជ្ឈិមបូព៌ា ។ រដ្ឋាភិបាលនឹងនាំចេញផ្លែឈើរសជាតិផ្អែមសម្រាប់ជនជាតិមូស្លីមកាន់សីលក្នុងខែរ៉ាម៉ាដន ក៏ដូចជានាំចេញផ្លែឈើទៅចិន រដ្ឋាភិបាលជឿជាក់ថា នៅតាមទីក្រុង និងបណ្តាខេត្តរបស់ចិនត្រូវការផ្លែឈើច្រើន ។

រដ្ឋាភិបាលនឹងជួយទិញផ្លែឈើកសិករជាបន្តបន្ទាប់ដើម្បីបញ្ជូនទៅហាងលក់ទំនិញ 7-Eleven ចំនួន៨,២០០សាខានៅទូទាំងប្រទេស ។ ហេតុនេះ សូមកសិករនៅភាគខាងជើង និងខាងត្បូងដែលប្រមូលផលផ្លែឈើជឿជាក់លើរដ្ឋាភិបាលក្នុងការស្វែងរកទីផ្សារផ្លែឈើឱ្យបានច្រើនបំផុត ៕